Chapter 37

📽️Chapter 37

စန့်ရှန်းက tabletကို ချက်ချင်း ပြန်ချကာ သူ့လက်ဖဝါးကို နွေးသွားစေရန်အတွက် လက်ဖြင့် ခပ်ဖွဖွ အုပ်ထားလိုက်သည်။ 

စန့်ရှန်းက သူ့ကို ဘေးတိုက်ကြည့်ကာ မေးလိုက်သည်။ "ကိုယ်တို့ ပြန်တွဲပြီလား…" 

"ထားလိုက်တော့…" 

"အိုး…"

စန့်ရှန်းက တစက်စက်ကျနေသော ဆေးရည်ကို စိုက်ကြည့်နေပြီးနောက် မဆုတ်မနစ် မေးလိုက်သည်။

"reality showကို ပြန်မသွားခင်နေ့အထိတောင် မရဘူးလား…" 

ရန်ရှူက ကိုက်ခဲနေသော ကိုယ်ဖြင့်ပင် ထထိုင်ကာ သူ့အား စတင်ကြိမ်းမောင်းလေတော့သည်။

"စန့်ရှန်း... မင်း ဂေါက်နေပြီလား... လုပ်စရာမရှိရင် ဂျင်ဂျစ်ခန်းရဲ့ အုတ်ဂူ ဘယ်မှာ ရှိနေမလဲ ဆိုတာ ခွဲခြမ်းစိတ်ဖြာနေလိုက်... မဟုတ်ရင်လည်း ကမ္ဘာပေါ်မှာ မဖြေရှင်းရသေးတဲ့ ပဟေဠိတွေကို ဖြေရှင်းနေပါလား... ဒီလိုဆိုရင် နာမည်ကြီးလာမှာ... ဆက်လုပ်…" 

စန့်ရှန်းက ဆက်မပြောတော့ပေ။ 

ရန်ရှူ ဒေါသထွက်ရလွန်းသဖြင့် အိပ်ရာပေါ် ပြန်လှဲချလိုက်သည်။ 

လှဲချပြီးနောက် ရန်ရှူ တစ်ခဏမျှ စိတ်ငြိမ်သွားပြီး စတင်တွေးတောမိလေတော့သည်။ 

စန့်ရှန်းက ဒီလိုပုံမျိုးနဲ့ ပြန်တွဲချင်နေတာလား... ငါသာ ဒေါသပုံမချလိုက်ရင် ပြဿနာတွေ ရှိလာနိုင်မလား... 

ပြီးတော့ စန့်ရှန်းကို ဒီလို ဖြစ်အောင် လုပ်မိလို့ လက်လွတ်စပယ် လျော်ကြေးပေးခဲ့ရတာ ငါပါပဲလေ... ဝတ္ထုထဲက အယ်လ်ဖာတစ်ယောက်ရဲ့RUTကာလဆိုတာ အရမ်းနာကျင်ရတာတဲ့... 

အဆုံးတွင် သူ့နှလုံးသားလေး ပျော့ပျောင်းသွားလေသည်။ 

"ဒါဆို... မင်း ညင်သာပေးမှ ရမယ်…" 

"အင်းပါ... ဒါဆို…"

စန့်ရှန်း၏ အပြုံးများက ထိန်းမထားနိုင်တော့ပေ။

***

တစ်ဖက်တွင် ဟို့မော့က ဆွေ့ဟိုယွီတစ်ယောက် ခံရခက်နေသည့် အမူအရာ ရှိနေသည်ကို တွေ့လိုက်ရသည်။ သူ့ဖုန်းကို ကော်ဖီစားပွဲပေါ် ပစ်တင်ကာ ချက်ချင်းဆိုသလို အပြုံးလေးတစ်ခုဖြင့် မေးလိုက်သည်။

"ဘာလို့လဲ... သူတို့နှစ်ယောက် ပြန်တွဲသွားကြပြီတဲ့လား…" 

"အင်း..." 

"အား... သူတို့တွေ အကြာကြီး ဇွဲကောင်းကြတာပဲ…" 

ဆွေ့ဟို့ယွီက ဆိုဖာကို မှီလိုက်ပြီး သူ့ခေါင်းကို မော့ကာ သက်ပြင်းအရှည်ကြီး ထုတ်လိုက်လေသည်။ 

ရန်ရှူနှင့် စန့်ရှန်းတို့ လမ်းခွဲလိုက် ပြန်ပေါင်းလိုက် လုပ်ကြတိုင်း နှစ်ဖက်လုံးက နာကျင်မှု အညွှန်းကိန်း 80ခန့်သာ ခံရသည်။ 

သို့သော်လည်း ဆွေ့ဟို့ယွီကမူ အဆ ၈သန်း မက ခံရသည်။ 

လုယန်ရှင်းက မနီးမဝေးတွင် ထိုင်နေပြီး ပြုံး၍ မေးလိုက်သည်။

"ဒီနှစ်ယောက်က တကယ် စိတ်ဝင်စားဖို့ ကောင်းတယ်... ဒီလောက်နှစ်တွေအကြာကြီး ဘယ်လိုများ ဆက်သွားနိုင်ကြပါလိမ့်…" 

ဆွေ့ဟို့ယွီက ပျင်းတိပျင်းရွဲပုံစံဖြင့် ပြန်ဖြေလိုက်သည်။ 

"ရန်ရှူကို ကြည့်လေ... သူက ဆူညံပူညံ လုပ်တတ်ပေမယ့် စန့်ရှန်းအကြောင်းကို စိတ်ထဲအပြည့် စဥ်းစားနေတာ…" 

"တကယ်ကြီးလား…" 

ဆွေ့ဟို့ယွီ ခေါင်းညိတ်ပြလိုက်သည်။

"ရန်ရှူက အရင်ကတည်းက ဆူဆူညံညံလုပ်တတ်ပြီးတော့ သူရဲ့ ဆိုရှယ်ကွန်ရက်ကလည်း အရမ်း ကျယ်ပြန့်တာလေ... သူ့ဘေးနားက မိန်းကလေး သူငယ်ချင်းတွေ အားလုံးနဲ့ သိနေသလောက်ပဲ... စန့်ရှန်းကို ချစ်မိသွားပြီးတော့မှ ဘယ်အရှုပ်တော်ပုံမှ မပါတော့တာ... ပြီးတော့ အစစ်အမှန်ဖြစ်နိုင်မယ့် ချစ်ကျွမ်းဝင်မှုတွေကို ဘယ်တုန်းကမှ လက်မခံခဲ့ဘူး... ကောလဟာလတွေနဲ့ ဖရိုဖရဲ ဖြစ်နေတဲ့ အနုပညာလောကကြီးထဲမှာ ဒီလို လုပ်နိုင်ဖို့ဆိုတာ သူ့အတွက် အရမ်း ရှားတယ်…" 

"နှစ်နှစ်လောက် လမ်းခွဲတာတောင် ရန်ရှူက ဘယ်တုန်းကမှ အချစ်သစ် မရှာခဲ့ဘူး... စန့်ရှန်း သေချာပေါက် သူ့ကိုပြန်လာရှာမယ်ဆိုတာ သိနေလို့လေ…" 

လုယန်ရှင်း စဥ်းစားကြည့်လိုက်ပြီးနောက် ယင်းက အမှန် ဖြစ်နိုင်လောက်သည်ဟု တွေးမိသွားသည်။ 

ဆွေ့ဟို့ယွီ ဆက်ပြောလိုက်သည်။

"ရန်ရှူက စန့်ရှန်းကို နေ့တိုင်း ကြိမ်းမောင်းနေတတ်ပေမယ့် သူကိုယ်တိုင်က စန့်ရှန်း အလုပ်များတာကို သိတယ်လေ... ဒါကြောင့် သူ့မက်ဆေချ့်တွေကို ပြန်ဖြေနိုင်ဖို့ အကောင်းဆုံး ကြိုးစားပြီး အချိန်ဖြုန်းပေးတာ…" 

"တစ်ဖက်မှာလည်း စန့်ရှန်းက သူ့မိသားစုကို ပထမဆုံးအကြိမ်အဖြစ် come out လုပ်ခဲ့ပြီးတော့ သူ့ဘေးနားမှာ ဟိုလိုလို ဒီလိုလိုဟာတွေ မရှိဘူး... ရန်ရှူက စန့်ရှန်းရဲ့ လက်ထောက်ကို လှတယ်လို့ ချီးကျုးဖူးတော့ ရန်ရှူ အထင်လွဲသွားမှာစိုးလို့ ရှန်းကျွင့်ကျင်းကိုပဲ သူ့ရဲ့ ကိုယ်ရေးကိုယ်တာ လက်ထောက်အနေနဲ့ ခေါ်ထားရဲတာ…" 

လုယန်ရှင်း ခေါင်းညိတ်ပြလိုက်သည်။

"အခု နားလည်သွားပြီ... အဲ့ဒီနှစ်ယောက်က ဦးတည်ရာ နှစ်ခုလုံးကို ပြေးနေခဲ့ကြတာပဲ…" 

သို့သော်လည်း ဆွေ့ဟို့ယွီက စိတ်သောက ရောက်နေဆဲပင်။

"သူတို့နှစ်ယောက်က သူတို့ဘာသာ ပျော်နေကြပေမယ့် ရန်ရှူက တကယ့်ကို..."

ထို့နောက် သက်ပြင်းချလိုက်ပြန်သည်။ 

ထိုသက်ပြင်းချသံက အခြားသူများကို အချိန်အကြာကြီး ရယ်မောသွားစေခဲ့လေသည်။ 

တန့်ယိဟန်က အရယ်မောဆုံးလူ ဖြစ်သည်။ 

"ရှန်းကျွင့်ကျင်းက တစ်ချိန်က ဖျတ်လတ်တက်ကြွသူလေး ဖြစ်ခဲ့တာ... အခုတော့... ဒါဘယ်လို ပြစ်မှုမျိုးပါလိမ့်…" 

ရှန်းကျွင့်ကျင်းက သူကိုယ်တိုင်ထက် ပိုဆိုးနိုင်ကြောင်း တွေးမိသွားသဖြင့် ဆွေ့ဟို့ယွီ အဆုံးတွင် စိတ်သက်သာရာ ရသွားလေသည်။

ထိုအခိုက်အတန့်တွင် အလုပ်အကြိုးစားဆုံး အလုပ်သမားလေး ရှန်းကျွင့်ကျင်းမှာ ဟယ်လီကော်ပတာကို စိတ်ကြိုက်ပြင်ဆင်ရမည့် နောက်ဆက်တွဲလုပ်ငန်းစဥ်များကို လေ့လာနေဆဲ ဖြစ်ပေသည်။ 

ကျန်သည့်အရာများကို သူကိုယ်တိုင်ကသာ လုပ်ရပေတော့မည်။ 

………. 

စုတျန့်တျန့်၏ သရုပ်ဆောင်အလုပ်က ရုတ်တရက် ဖွံ့ဖြိုးမှုနှေးကွေးသွားသည်။ သူက ငယ်ရွယ်နေဆဲ ဖြစ်လေရာ သဘာဝကျကျပင် အရှုံးပေးမည်မဟုတ်ပေ။ အဆုံးတွင် သူကိုယ်တိုင်ကလည်း အဆက်အသွယ်များသုံး၍ ဖျော်ဖြေရေးလောကထဲသို့ ဝင်ခဲ့ခြင်းပင်။ 

ဟူရုံချီကို နောက်ထပ် ထည့်မတွက်လျှင် အခြားသော စပွန်ဆာများကို သိအောင် လုပ်ရပေတော့မည်။ သူ့အား ကူညီပေးနိုင်သရွေ့ ယောကျ်ားဖြစ်စေ မိန်းမ ဖြစ်စေ ဂရုမစိုက်ပေ။ 

ယခုရောက်ရှိနေသော ညစာစားပွဲ၏ အရည်အသွေးက မြင့်မားပြီး ဧည့်သည်များအားလုံးက လူကုံထံ အသိုင်းအဝိုင်းမှ ဖြစ်ကြသည်။ စုတျန့်တျန့်က ဤပွဲသို့ ဝင်ရောက်နိုင်ရန် အတော်များများ စတေးလိုက်ရသည်။ 

သူ့သူငယ်ချင်းကောင်း ထူယွမ်ကျယ်က သူ့ဘေးတွင် ရပ်နေရင်း ညွှန်ပြလိုက်သည်။

"ဟိုနားက အနီရောင်ဝတ်ထားတဲ့ အမျိုးသမီးကို တွေ့လား…" 

စုတျန့်တျန့် သူ ပြသည့်နေရာကို ကြည့်လိုက်ရာ သေချာပေါက်ပင် အရပ်ရှည်ရှည်အမျိုးသမီးတစ်ယောက်အနားတွင် ဝိုင်းနေသည့် လူတစ်အုပ်ကို တွေ့လိုက်ရသည်။ 

ထိုအမျိုးသမီးက အနည်းငယ် အသက်ကြီးပုံပေါ်ပြီး စုတျန့်တျန့်က သူမကို အသက်သုံးဆယ် လေးဆယ် ရှိလောက်ပြီဟု အစပိုင်းတွင် ခန့်မှန်းလိုက်သော်လည်း သူမက ကောင်းမွန်စွာ ထိန်းသိမ်းထားပြီး ထင်းထွက်နေသော ကိုယ်ရည်ကိုယ်သွေး ရှိသည်။ သူမ၏ အရိုးတည်ဆောက်ပုံကို ကြည့်ရသလောက် ငယ်ရွယ်စဥ်က ဒိတ်ဒိတ်ကြဲ အလှလေး ဖြစ်ခဲ့ကြောင်း သိနိုင်သည်။ 

ပို၍ ထင်ရှားနေသည်မှာ ထိုအမျိုးသမီးက ဥရောပ အမေရိကန်ပုံစံမျိုး ဖြစ်ပြီး ဂျုံရောင်အသားအရည်က အလွန်ပင် ဆွဲဆောင်မှု ရှိသွားစေသည်။ 

စုတျန့်တျန့် တစ်ချက်ကြည့်၍ မေးလိုက်သည်။

"သူက ဘယ်သူလဲ…" 

"စန့်မိသားစုက မင်းတို့ ကုမ္ပဏီကို ဝယ်လိုက်တယ်မလား... သူက ဥက္ကဌစန့်ရဲ့ အမေပဲ…" 

စုတျန့်တျန့် ကြက်သေသေသွားသည်။ 

သူတွက်ချက်ကြည့်ရသလောက်ဆိုလျှင် စန့်ရှန်းက နှစ်ဆယ်ကျော် သုံးဆယ်နီးပါး ရှိလောက်ပြီ ဖြစ်သည်။ 

ဒါဆို ဒီအမျိုးသမီးက ငါးဆယ်လောက် ရှိနေပြီလား... 

အဲ့ဒီလောက် အသက်ကြီးပုံမပေါ်သလိုပဲ... 

စုတျန့်တျန့်က မဒမ်စန့်ကို ခေါက်တုံ့ခေါက်ပြန် ကြည့်နေသဖြင့် ထူယွမ်ကျယ်က တံတောင်ဖြင့်တွတ်ကာ သတိပေးလိုက်ရသည်။

"ဒါနဲ့ ပတ်သက်ပြီး စိုးရိမ်မနေနဲ့... စန့်မိသားစုရဲ့ မိသားစုစတိုင်က သူတို့ရဲ့ ဇနီးတွေကို အလိုလိုက်ဖို့ပဲ... သူတို့က ဆက်ဆံရေး ကောင်းကြတယ်... ဥက္ကဌစန့်ရှန်းနဲ့ သူ့အဖေက တစ်လမ်းပဲ သွားတတ်တဲ့သူတွေလို့ နာမည်ဆိုးနဲ့ ကျော်ကြားတော့ မင်းမှာ အခွင့်အရေး မရှိဘူး... ဒါက မင်းရဲ့ တစ်ခုတည်းသော အခွင့်အရေးပဲ…" 

စုတျန့်တျန့်ကလည်း သူသာ စန့်ရှန်းကို ထိပ်ဆုံးရောက်အောင် ကူညီပေးပါဟုပြောလျှင် သေချာပေါက် ငြင်းပယ်မည်မှန်း သိနေခဲ့သည်။ 

သူ့မိဘများ၏ ခံစားချက်များကို ဝင်နှောင့်ယှက်မိပါက သေချာပေါက်ပင် သူ့အား ကျေနပ်စေနိုင်မည် မဟုတ်ပေ။ 

သူက စန့်ရှန်းအပေါ်တွင် တစ်စုံတစ်ခု ရှိနေဆဲပင်။

"မင်းအပေါ် မစ္စစန့် အမြင်ကောင်း ရလာအောင် လုပ်နိုင်ရင် မစ္စတာစန့်လည်း မင်းအပေါ် သဘောထားပြောင်းလာလိမ့်မယ်... ခေါင်းကိုင်သားတို့ ဘာတို့ အသိအမှတ်ပြုပေးရင်တော့ အကောင်းဆုံးပေါ့…"

ထူယွမ်ကျယ် သတိပေးလိုက်သည်။ 

"အင်း... ကောင်းပြီ... ငါကြိုးစားပါ့မယ်…" 

စုတျန့်တျန့်က ဝိုင်ခွက်ကိုမြှောက်ကာ မစ္စစန့်ထံ လျှောက်လာခဲ့သည်။ 

မစ္စစန့်နှင့် အကြည့်ချင်းဆုံသွားသောအခါ သူမနှင့် ခွက်ချင်းတိုက်ရန် အနားသို့ ကပ်လာခဲ့သည်။

"ဟယ်လို ကျွန်တော်က စုတျန့်တျန့်ပါ... အခုလောလောဆယ် မဒမ်ရဲ့ သားကုမ္ပဏီက အနုပညာရှင်တစ်ယောက်ပါ…" 

မစ္စစန့်က သူ့ကို ကြည့်ကာ ကောင်းကောင်းမွန်မွန် ပြုံးပြလိုက်သည်။

"ငါမင်းကို သိပါတယ်…" 

မစ္စစန့်သည်လည်း အချိန်နှင့်အမျှ သတင်းဖတ်လေ့ရှိသဖြင့် စုတျန့်တျန့်က ရန်ရှူကို အနိုင်ကျင့်သည့်အကြောင်း ကြားမိလေရာ စုတျန့်တျန့်အပေါ် အမြင်အချို့လည်း ရှိသည်။ 

စုတျန့်တျန့် ထိုစကားကို ကြားလိုက်ရသောအခါ အပျော်လွန်သွားပြီး ထပ်ပြီး စကားပြောတော့မည်အပြု မစ္စစန့်က သူမဘေးမှ အခြားအမျိုးသမီးတစ်ယောက်ကို နှုတ်ဆက်လိုက်ပြီး သူ့အား စကားပြောလိုခြင်း မရှိတော့သည်ကို တွေ့လိုက်ရသည်။ 

မကြာမီပင် ထိုမစ္စစန့်က သူနှင့် ရင်းနှီးရန် ရည်ရွယ်ချက် မရှိကြောင်း နားလည်သွားသည်။ 

လူကုံထံ မိသားစုကြီးများမှ လူချမ်းသာဇနီးများစွာက သူတို့ကဲ့သို့ အနုပညာရှင်များအပေါ် အထင်သေးကြောင်း ကြားခဲ့ဖူးသည်။ ထိုတစ်ယောက်လည်း အတူတူ ဖြစ်နေပုံပင်။ 

ထိုအခိုက်တွင် တစ်စုံတစ်ယောက်က မစ္စစန့်အား မေးလာသည်ကို ကြားလိုက်ရသည်။

"ရှင့်သားက လက်ထပ်ပြီးသွားပြီလား…" 

မစ္စစန့် ပြုံး၍ ပြောလိုက်သည်။

"ဘယ်လိုလုပ် မေ့သွားရတာလဲနော်... ကျွန်မသားက အရင်ကတည်းက စေ့စပ်ထားပြီးသားကို…"

ထိုအချိန်က သူမ၏ ခင်ပွန်းဖြစ်သူမှ ရန်မိသားစုမှ ရန်ရှူကို ကလေးသတို့သမီးအဖြစ် ခေါ်လာခဲ့သဖြင့် သဘာဝကျကျပင် သူ့ကို ကလေးဆွေမျိုးတစ်ယောက်အဖြစ် မှတ်ယူနိုင်ပေသည်။ 

"သူတို့ နှစ်ယောက်က အခုထိ လမ်းမခွဲကြသေးဘူးလား... ဆယ်နှစ်တောင် ရှိလောက်ပြီနော်…" 

"အင်း ဆယ်နှစ်လောက် ရှိလည်း လမ်းမခွဲကြသေးပါဘူး... သူတို့က ဆက်ဆံရေးကောင်းကြတယ်လေ…" 

"ရှင်တို့မိသားစုထဲက ယောကျ်ားသားတွေကိုတော့ တကယ် ကြိုပြီး ချိတ်ထားမှပဲ... မဟုတ်ရင် လုံးဝ ဖမ်းမိလိုက်ကြမှာ မဟုတ်ဘူး…" 

စန့်မိသားစုက ငွေအမြောက်အများ ရှိပြီး စီးပွားရေးတောင့်တင်းသဖြင့် စန့်မိသားစုနှင့် လက်ထပ်ချင်ကြသူများစွာ ရှိကြပေသည်။ 

ထို့အပြင် စန့်မိသားစု ယောကျ်ားသားများက နာမည်ကောင်းနှင့် ကျော်ကြားကြသည်။ သူတို့အားလုံးက တစ်ယောက်တည်းအပေါ်မှာသာ အလုံးစုံ ချစ်ပေးကြပြီး ဇနီးများအပေါ် အလွန် ကောင်းပေးသည်။ သူတို့မိသားစုစတိုင်က ဖြောင့်မတ်သဖြင့် သဘာဝကျကျပင် ပို၍ သဘောကျစရာ ဖြစ်ရသည်။ 

သို့သော်ငြား စန့်မိသားစုစုံတွဲက ကလေးတစ်ယောက်သာ ရခဲ့ပြီး စောစောစီးစီး စေ့စပ်ထားသဖြင့် သူတို့မှာ စိတ်ပင်မကူးနိုင်ခဲ့ပေ။ 

သို့သော်ငြား စုတျန့်တျန့်ကမူ ကမ္ဘာသစ်ကြီးကို ရှာတွေ့သွားသည်။ 

လူကြီးမင်းစန့်(စန့်ရှန်း)က အရင်ကတည်းက ချစ်သူတစ်ယောက် ရှိပြီးတော့ စေ့လည်းစေ့စပ်ထားသေးတယ်ပေါ့ ... ဒါဆို လူကြီးမင်းစန့်နဲ့ ရန်ရှူက... 

မနာလိုမုန်းတီးမှုကြောင့် သူ့ကို သွားများ ယားယံလာသည်အထိ ဖြစ်စေခဲ့သည့် ထိုဆက်ဆံရေးက ဟာသကြီးတစ်ခု ဖြစ်လာသည်။ 

စုတျန့်တျန့် ရုတ်တရက်ဆိုသလို စိတ်အေးသွားသည် ခံစားချက်တစ်ခု ဖြစ်ပေါ် လာခဲ့သည်။ 

ပါတီပြီးသွားသောအခါ မစ္စရှန့်က ဟောခန်းထဲမှ ထွက်လာခဲ့သည်။ အနားတွင် မည်သူမှ မရှိတော့ကြောင်း အတည်ပြုပြီးမှ သူမနှင့် အမြဲတမ်း ဆက်ဆံရေးကောင်းပုံရသည် အမျိုးသမီးကြီးက မေးလိုက်သည်။

 "စန့်ရှန်းနဲ့ ရန်ရှူတို့ ပြတ်သွားပြီလို့ ကြားတယ်... သူတို့ ပြန်မတွဲကြဘူးမလား... မဟုတ်ရင်လည်း ခုဏကတွေ့ခဲ့တဲ့ မိသားစုရဲ့သမီးလေးက တကယ် အဆင်ပြေတယ်နော်…" 

"သူတို့နှစ်ယောက်ကို ခွဲလို့ မရဘူး... ကျွန်မ ကိုယ့်သားအကြောင်း ကိုယ် သိတယ်... ကျွန်မ ဘဝမှာ တစ်ယောက်တည်းကိုပဲ အသိအမှတ်ပြုဖို့ ဆုံးဖြတ်ထားတယ်…" 

"ဒါပေမယ့် ရန်ရှူကရော... ဖျော်ဖြေရေးလောကထဲမှာဆို သူ…" 

မစ္စစန့်၏ မျက်နှာက အနည်းငယ် တည်သွားသည်။

"ရန်ရှူလည်း အဲလိုလုပ်မှာ မဟုတ်ဘူး…ရန်ရှူက အမြဲတမ်း လိမ္မာတဲ့ ကလေး ဖြစ်ခဲ့တာ... ကျွန်မလည်း သူ့ကို အရမ်းသဘောကျတယ်... ကျွန်မရဲ့ စန့်ရှန်းကို အဖော်ပြုပေးမယ့်သူက ရန်ရှူတစ်ယောက်ပဲ ရှိတယ်…" 

ထိုအမျိုးသမီးက သူမ စကားမှားသွားပြီး မစ္စစန့်ကို မပျော်မရွှင် ဖြစ်သွားစေကြောင်း သိလိုက်သဖြင့် အပြုံးလေးတစ်ခုဖြင့် တောင်းပန်လိုက်သည်။ 

📽️

စာရေးသူ၏မှတ်ချက်: 

“Why Don’t You Coax Me” က ချိုမြိန်တဲ့ ဇာတ်လမ်းလေးပါ —— စန့်ရှန်း 

“Why Don’t You Coax Me”က လမ်းခွဲလိုက် ပြန်တွဲလိုက် လုပ်နေကြတဲ့ ဇာတ်လမ်း... ဘာမှ ကြည့်စရာ မရှိဘူး —— ဆွေ့ဟို့ယွီ 

“Why Don’t You Coax Me”က အကြမ်းဖက်ဇာတ်လမ်း—— ရှန်းကျွင့်ကျင်း

🤣