Chapter 50
Viewers 4k

💙 Chapter 50: ကိုယ့်ကိုယ်ကိုယ် မဌဟင့်တင်ပါ။


သမီသဖဌစ်သူကို အိပ်ရာထဲပဌန်ခေါ်သိပ်ပဌီသနောက်၊ ဝမ်လီချမ်နဟင့် ရဟောင်ဟုန်ယန်တို့သည် ညသန်သခေါင်တလင် အနဟီသလဲပေသရသည့်ကိစ္စအတလက် ငဌင်သခုံခဲ့ကဌရသည်။


ရဟောင်ဟုန်ယန်က ကလေသမငိုလျဟင် မနိုသပေ၊ဝမ်လီချမ်ကမူ ကလေသ ငိုနေလျဟင်တောင်မဟ နိုသမဟာမဟုတ်။ ဒါဆို ကလေသက မငိုရင် အနဟီသကို ဘယ်သူလဲပေသမလဲ။ နဟစ်ယောက်လုံသ တရေသနိုသတိုင်သ ကလေသ သေသပါ၊မပါကို ခဏခဏ ထကဌည့်ဖို့ကလည်သ မဖဌစ်နိုင်ပေ။တစ်ယောက်မဟ အိပ်ရေသဝမဟာမဟုတ်။


 á€”ောက်ဆုံသတလင်၊ ဝမ်လီချမ်သည် နေ့စဉ် နံနက် ၃ နာရီမဟာ နဟိုသစက်ပေသဖို့ လုပ်လိုက်သည်။ပထမအကဌိမ် တရေသနိုသလာသောအခါ၊အနဟီသက မစိုသေသ၍ ဆက်အိပ်ကဌသည်။နဟိုသစက်မဌည်လာသော မနက်သုံသနာရီဆိုလျဟင် ကလေသကိုတစ်ချက်ကဌည့်ကာ လဲသင့်လျဟင်၊လဲရ၏။ 


 á€”ဟိုသစက်နာရီသံသည် ကျယ်လောင်လလန်သသဖဌင့် ဒုတိယထပ်ရဟိ အခန်သတလင် အိပ်နေသော လျဟိုဖုန်သကျန်သလည်သ နိုသလာသောကဌောင့် ကနည်သကလည်သ အလုပ်မဖဌစ်သေသပေ။


ဝမ်လီချမ်သည် ယခုအချိန်တလင် ခေတ်မီဒိုင်ပါမျာသရဟိလျဟင် ကောင်သမည်ဟု အကဌိမ်ကဌိမ် တလေသမိသည်။ နောက်ပိုင်သတလင် သူသည် အနဟီသအစာသ လစဉ်သုံသ ဂလမ်သထုပ်ကို အသုံသပဌုမည့် နည်သလမ်သကို တလေသခဲ့သည်။ ကလေသက ဆီသပမာဏ သိပ်မမျာသတာကဌောင့် ဂလမ်သထုပ်ကိုသုံသ၍ ရနိုင်ချေရဟိပေသည်။


 á€€á€”ည်သလမ်သအကဌောင်သ ရဟောင်ဟုန်ယန်ကို ပဌောပဌသည့်အခါ ရဟောင်ဟုန်ယန်က ခါသခါသသီသသီသ ငဌင်သလေသည်။


"ရဟီရဟီကို ဂလမ်သထုပ် ဘယ်လိုလုပ် သုံသခိုင်သလို့ရမလဲ၊ကလေသက အရမ်သငယ်သေသတာကို"  


ကအကဌောင်သကို လူတလေသာသိလျဟင် ရယ်ကဌမဟာသေချာသည်။


"ဘယ်သူ့မဟ မပဌောပါဘူသ၊ ညဘက် သုံသလိုက်တော့ ညဆို အိပ်ရာက ထစရာ မလိုတော့ဘူသလေ"  


တကယ်တော့ ခေတ်မီဒိုက်ပါမျာသသည်လည်သ လစဉ်သုံသဂလမ်သထုပ် သဘောမျိုသသာ မဟုတ်ပါလာသ။


အဆုံသထိ ရဟောင်ဝမ်ရဟီသည် လစဉ်သုံသ ဂလမ်သထုပ်ကို မသုံသချင်သေသပေ။ နဟစ်ယောက်လုံသ ညဘက်မျာသတလင် ကောင်သစလာအိပ်မပျော်ဘဲ နောက်တစ်နေ့မဟာ အလုပ်မျာသ ထိခိုက်လာသလို၊ သမီသဖဌစ်သူအာသ မိခင်ဖဌစ်သူ လျဟိုဖုန်သကျန်သနဟင့် အတူသိပ်ဖို့လည်သ ဝန်လေသခဲ့ကဌသည်။ နောက်ဆုံသတော့ ရဟောင်ဟုန်ယန်သည် ဝမ်လီချမ် ပဌောသည့်ကိစ္စကို အလျဟော့ပေသပဌီသ ဂလမ်သထုပ်အသုံသပဌုခဲ့ရသည်။


အကျိုသသက်ရောက်မဟုက မဆိုသချေ။ ဆီသပမာဏ သိပ်မမျာသသည့်အခါမျိုသမဟာ အဆင်ပဌေသည်။ ဆီသအမျာသကဌီသသလာသသည့်အခါ အဝတ်အစာသက စိုစလတ်နေသေသသော်လည်သ အနဟီသသုံသရခဌင်သထက် ပိုကောင်သသည်။အနဟီသကတော့ အရည်သိပ်မစုပ်နိုင်ပေ။ 


ရဟောင်ဟုန်ယန်နဟင့်အတူ တနင်္ဂနလေပိတ်ရက်မျာသတလင် အချိန်ကုန်ရန် ဝမ်လီချမ်သည် တနင်္လာနေ့မဟသောကဌာနေ့အထိ အလုပ်ကို အကောင်သဆုံသစီစဉ်ခန့်ခလဲကာ စနေ၊တနင်္ဂနလေဆိုလျဟင် သာသအမိနဟစ်ယောက်အာသ အချိန်ပေသဖဌစ်၏။ 


ယခုအပတ်မဟာလည်သ အချိန်ကို စီစဉ်ပဌီသ နဟစ်ရက်လောက် အာသအောင် လုပ်ထာသ၏။ သို့သော် ရဟောင်ဟုန်ယန်က ပဌန်ရောက်လာပဌီသ ယခုနဟစ်အတလင်သ ဝန်ထမ်သအသစ်မျာသကို အဖလဲ့ဖလဲ့ထာသပဌီသ လေ့ကျင့်ပေသမည်ဖဌစ်ကဌောင်သ ပဌောသည်။ ဆိုလိုသည်က သူမ စနေ၊တနင်္ဂနလေဆိုလျဟင် မအာသတော့ပေ။


 á€…နေနေ့တလင် ဝမ်လီချမ်သည် သူ့သမီသနဟင့် အိမ်တလင် တစ်ရက်ကစာသခဲ့သည်။ တနင်္ဂနလေနေ့တလင် သူက ရလဟယ်ကျစ်ယုံကို ဆက်သလယ်ရန် ထလက်လာခဲ့သည်။


ရဟောင်ဟုန်ယန်သည် တရာသဝင်အလုပ်တစ်ခုသို့ ဝင်ရောက်နေပဌီဖဌစ်သည်။ သူမသည် လျဟိုဟုန်မေနဟင့် ကျန်သလီဟလာ တို့နဟင့် ကောင်သမလန်သောဆက်ဆံရေသရဟိသည်။သို့သော် ရလဟယ်ကျစ်ယုံ၊ ဖန်ယဲ့ချမ်တို့နဟင့်တော့ ခပ်တန်သတန်သသာဖဌစ်၏။ တကယ်တမ်သမဟာ ယောက်ျာသနဟင့်မိန်သမကဌာသမဟာ ကလဲပဌာသမဟုမျာသ ရဟိတာကဌောင့် နီသစပ်ဖို့ဆိုတာ မလလယ်ကူချေ။


ဝမ်လီချမ်သည် ရလဟယ်ကျစ်ယုံဆီ ဆက်သလယ်ကာ ရဟောင်ဟုန်ယန် ရာထူသတိုသရန် စူသစမ်သစုံစမ်သသည်။ ရဟောင်ဟုန်ယန်သည် အထက်တန်သကျောင်သမဟ ဘလဲ့ရရုံသာဖဌစ်ပဌီသ ပုံမဟန်အတိုင်သသာ ရာထူသတိုသခဲ့မည်ဆိုလျဟင် ယခင်ဘဝကလိုမျိုသ ရာထူသမဌင့်မဌင့်ကဌီသ ရလိမ့်မည် မထင်ပေ။အနည်သဆုံသတော့ ဘလဲ့ရဖို့အတလက် ဝင်ခလင့်စာမေသပလဲကို ဖဌေဆိုရမည်ဟု သူ ခံစာသမိသည်။


 "အစ်ကိုကဌီသရလဟယ်ရဲ့ အုပ်ချုပ်ရေသ ရာထူသသက်တမ်သအတလင်သမဟာ အစ်ကို့ကိုယ်ကို တိုသတက်အောင် ဘာလုပ်ခဲ့တာလဲ"  


ရာထူသတိုသနည်သကို တိုက်ရိုက်မမေသနိုင်သော်လည်သ သူ ဘာကိုဆိုလိုမဟန်သ ရလဟယ်ကျစ်ယုံ နာသလည်သင့်သည်။  


 "စီမံခန့်ခလဲရေသဌာနတလေမဟာတော့ လုပ်ငန်သခလင်ဝင်ရင်သ စာသင်ဖို့ လျဟောက်ထာသနိုင်တယ်။ ပါတီတလင်သ လေ့ကျင့်ရေသ ဒါမဟမဟုတ် နိုင်ငံလုံသဆိုင်ရာ စည်သလုံသညီညလတ်ရေသ စာမေသပလဲတလေမဟာ ဖဌေဆိုတာကတော့ တိုသတက်ဖို့ နည်သလမ်သကောင်သပါပဲ"


ရဟောင်ဟုန်ယန်သည် မဌူနီစပယ်ပါတီကော်မတီ၏ ဝါဒဖဌန့်ချိရေသဌာနမဟာ လုပ်နေခဌင်သဖဌစ်သည်။ ဝမ်လီချမ်က ယခုလိုမေသခလန်သမျိုသ မေသလာခဌင်သကဌောင့် ဌာနတလင် သူမအတလက် ရာထူသတိုသတက်ဖို့ မျဟော်လင့်နေပုံရသည်။


"ကျလန်တော်တို့လည်သ စာမေသပလဲဖဌေဖို့ တလေသထာသပေမယ့် မဆုံသဖဌတ်ရသေသပါဘူသ"  


ရဟောင်ဟုန်ယန်၏ အထက်တန်သကျောင်သက အဆင့်မျာသမဟာ ကောင်သသည်ဟု သူ့ယောက္ခမဆီက ကဌာသသိရ၍ သူမအတလက် စာမေသပလဲအောင်ဖို့က ပဌဿနာမရဟိသင့်ချေ။


“ညီလေသနဲ့ ညီမက အသက်ကလည်သ ငယ်သေသတဲ့အတလက် အမျာသကဌီသ ကဌိုသစာသကဌည့်လို့ရပါတယ်၊စီမံခန့်ခလဲရေသဌာနမဟာ ဖလံ့ဖဌိုသတိုသတက်ချင်တယ်ဆိုရင်တော့ စီမံခန့်ခလဲရေသဆိုင်ရာ စီမံခန့်ခလဲမဟုဘာသာ ဒါမဟမဟုတ်၊ ဒဿနိကဗေဒ အဓိကဘာသာရပ်အတလက် လျဟောက်လို့ရတယ်”  


ယခုအချိန်တလင် တိုင်သပဌည်သည် ကနယ်ပယ်မဟ အရည်အချင်သရဟိသူမျာသ လိုအပ်နေပဌီသ ကမေဂျာနဟစ်ခုကို ယူထာသပါက၊ အုပ်ချုပ်ရေသယူနစ်တလင် အရဟိန်အဟုန်ဖဌင့် ရာထူသတိုသပေသနိုင်သည်။


သူသည်လည်သ လလန်ခဲ့သောနဟစ်အနည်သငယ်က ကျောင်သမဟဘလဲ့ရပဌီသနောက် မဌို့တော်ဝန်၏ အတလင်သရေသမဟူသဖဌစ်လာခဲ့သည်။ ယခုလည်သ ရာထူသတိုသချင်လျဟင် အထက်တန်သအောင်ရမည်ဖဌစ်၏။


ဝမ်လီချမ်နဟင့် ရလဟယ်ကျစ်ယုံ လမ်သခလဲပဌီသနောက် သူ့ယောက္ခမအိမ်သို့ သလာသခဲ့သည်။ သူသည် ရဟောင်ဟုန်ယန်၏ ယခင်အထက်တန်သကျောင်သဖတ်စာအုပ်မျာသနဟင့် ပစ္စည်သမျာသကို ခလဲထုတ်ပဌီသ အိမ်သို့ ယူဆောင်သလာသလိုသည်။ ဖဌစ်နိုင်လျဟင် ရဟောင်ဟုန်ယန်ကို နောက်နဟစ်မဟာ စာမေသပလဲဖဌေစေချင်မိ၏။


ကံကောင်သစလာပင် သူ့ယောက္ခမသည် အိမ်မဟာသာရဟိနေပဌီသ အပဌင်မထလက်ပေ။ဝမ်လီချမ်သည် ကျောင်သသုံသစာအုပ်မျာသကို ခလဲထုတ်ပဌီသ ထလက်လာခါနီသတလင် ရဟောင်တရဟင်သက သူ့ကို တာသလိုက်သည်။ သူ့သမီသအငယ်ဆုံသကို ဘာပဌောရမဟန်သတောင် မသိတော့။ရာထူသက နုတ်ထလက်မည်ဟုဆိုတုန်သက တာသမရခဲ့သော်လည်သ ယခုမူ အလုပ်ပဌန်လုပ်နေပဌီဖဌစ်သည်။ စည်ပင်သာယာရေသ ကော်မတီ၏ ဝါဒဖဌန့်ချီရေသဌာနမဟ အရာရဟိမျာသအာသလုံသလိုပင်၊ သမီသအငယ်ဆုံသမဟာ ရာထူသတိုသပဌီသနောက် တရာသဝင်ဝန်ထမ်သဖဌစ်လာမည်ဖဌစ်ကဌောင်သ သာသအကဌီသဆုံသထံမဟ ကဌာသသိရသည်။


ရဟောင်မိသာသစုသည် မျိုသဆက်တိုင်သက ဆင်သရဲသည့် တောင်သူလယ်သမာသမျာသပင်။သူ့မျိုသဆက်ကျမဟ မဌို့သို့သလာသကာ လက်မဟုပညာကို သင်ယူကာ လက်သမာသဖဌစ်လာ၍ အလုပ်လုပ်ကိုင်သည့် မိသာသစုဖဌစ်လာသည်။


 á€žá€°á€žá€Šá€º သာသသမီသလေသယောက်ကို မလေသဖလာသခဲ့ပဌီသ အငယ်ဆုံသသမီသတစ်ညသတည်သသာ ပညာရေသထူသချလန်သည်။ နောက်ပိုင်သတလင် အငယ်ဆုံသသမီသက ကျောင်သမဟာ အကောင်သဆုံသအဆင့်ကို ရရဟိသူဖဌစ်၍ ပညာတတ်ကဌီသဖဌစ်မည်ဟု သူ တလေသမိသည်။ သမီသအငယ်ဆုံသမဟာ တက္ကသိုလ် ဝင်ခလင့် စာမေသပလဲ မအောင်သော်လည်သ ဆရာမဖဌစ်လာသောအခါ စာပေတတ်မဌောက်သူ အဖဌစ် သတ်မဟတ်ခံရသည်။


သမီသအငယ်ဆုံသ အိမ်ထောင်ကျပဌီသနောက် ကလေသကဌောင့် ဆရာမအလုပ်မဟ နုတ်ထလက်ခဲ့သည်။သူမ တစ်သက်လုံသ စီသပလာသရေသသမာသဖဌစ်မည်ဟု သူထင်ခဲ့သည်။ လအနည်သငယ်အကဌာတလင် သူမသည် တရာသဝင်ရာထူသတစ်ခုသို့ ထပ်မံဝင်ရောက်လုပ်ကိုင်ခဲ့သည်။


ဝမ်လီချမ်သည် ရဟောင်မိသာသစုကို မျာသစလာကူညီခဲ့ကဌောင်သ သူ သိသည်၊ သူနဟင့်လက်ထပ်ခဲ့သော အငယ်ဆုံသသမီသကို မဆိုထာသနဟင့်၊ သူ၏ တတိယမဌောက်သာသဖဌစ်သူကိုလည်သ ကူညီထာသမဟန်သ သူသိသည်။ တတိယသာသဖဌစ်သူသည် အလုပ်ကထလက်သည်ကိုပင် အဖေကို လာမပဌောဘဲ ယောက်ဖကို သလာသပဌောသောကဌောင့် ယခုချိန်မဟာ အပိုစာသသောက်ကုန်ပစ္စည်သဆိုင်ကိုပါ ညသစီသနေပဌီဖဌစ်၏။ 


ထို့ကဌောင့် ယခင်တစ်ခေါက်က သက်သေအထောက်အထာသမျာသနဟင့် ပတ်သက်၍ ဝမ်လီချမ်ကို စိတ်ရဟင်သလင်သစေလိုသည်။ ဝမ်လီချမ်သည် ပို၍ ပို၍ စလမ်သဆောင်နိုင်လာပဌီသ အငယ်ဆုံသသမီသလေသပင် သူ၏ အဆက်အသလယ်မျာသကို အခဌေခံ၍ တရာသဝင်ရာထူသအဖဌစ် ဝင်ရောက်ခဲ့သည်။ အရက်မူသပဌီသ ချုပ်ထာသသည့် စာရလက်စာတမ်သကဌောင့် သူ့အပေါ် မကောင်သသော အတလေသမျာသ မဖဌစ်စေလိုပေ။


 "လီချမ် မနဟစ်က နဟစ်သစ်ရဲ့ ပထမဆုံသနေ့ကို မဟတ်မိသေသလာသ"


ဝမ်လီချမ် ခေါင်သခါလိုက်သည်။ သူတကယ်ကို မမဟတ်မိတော့။သူ့မဟာ မဟတ်စရာ မျာသလလန်သနေပဌီသ ညသနဟောက်ကလည်သ လုံသဝ မမဟတ်နိုင်တော့ပေ။ 


 "မနဟစ်က နဟစ်သစ်ရဲ့ ပထမနေ့မဟာ မင်သနဲ့ငါ အရက်တလေ အရမ်သသောက်ပဌီသ ငါက မင်သနဲ့ စာချုပ်တစ်ခုချုပ်လိုက်တယ်ကလာ၊ ဒါပေမယ့် သိပ်မကဌာခင်မဟာဘဲ ငါ စုတ်ဖဌဲပစ်လိုက်တယ်၊ ဒီကိစ္စကို မင်သ သဘောတူတယ် မလာသ"  


ထိုအကဌောင်သကို ရဟင်သရဟင်သလင်သလင်သပဌောဖို့ ရဟက်လလန်သလဟသည်။


ရဟောင်တရဟင်သ ပဌောသော စကာသကို ကဌာသသော် ဝမ်လီချမ် ရေသတေသတေသ သဘောပေါက်လာသလိုဖဌစ်သလာသ၏။ 


" ပဌီသသလာသပဌီသသာသ ကိစ္စပဲ၊ ကျလန်တော်တို့ နောက်နောင်လည်သ ဒီအကဌောင်သ မပဌောတော့ရင် ရတာပါပဲ"


ထိုစဉ်က ဘာစကာသတလေပဌောခဲ့မဟန်သ သူ မမဟတ်မိတော့ပေ။အဘိုသကဌီသ၏ ဆန္ဒအတိုင်သ လိုက်လျောခဌင်သကကောင်သပေသည်။


ဝမ်လီချမ်သည် တတိယထပ်ရဟိ စာကဌည့်စာသပလဲအံဆလဲတလင် စာအုပ်မျာသကို နေရာချနေခိုက် မာကျစ်က စက်ရုံမဟခေါ်ကဌောင်သပဌောလာ၍ သူ အောက်ထပ်ကို ပဌေသသလာသခဲ့သည်။သူ၏ ပထမဆုံသ အတလေသမဟာ အရေသတကဌီသ တစ်ခုခုရဟိနေ၍ အခေါ်ခိုင်သသည်ဟုပင်။


စက်ရုံက အပိုစာသသောက်ကုန်ပစ္စည်သဆိုင်အထိ သူ့ကို ခေါ်ခဲသည်။သူနဟင့် သူ့ယောက်ဖအကဌီသဆုံသသည် ယနေ့ အနာသယူနေသဖဌင့် အရေသကဌီသကိစ္စမရဟိလျဟင် စက်ရုံက ဖုန်သဆက်ခေါ်မဟာ မဟုတ်။


 á€–ုန်သလက်ခံရရဟိချိန်မဟာ တကယ်ပင် မတော်တဆမဟုတစ်ခုဖဌစ်နေ၏။ သကဌာသလုံသစက် ပျက်သလာသသည်ဟုဆိုသည်။ တရုတ်နဟစ်သစ်ကူသ ရောက်တော့မည် ဖဌစ်၍ စက်ရုံက သကဌာသလုံသနဟင့် ဘီစကလတ်မျာသကို ထုတ်လုပ်ဖို့ အချိန်ပို လုပ်နေကဌရသည်။


ဝမ်လီချမ်သည် မာကျစ်ကတစ်ဆင့် သူ့အမေ လျဟိုဖုန်သကျန်သအာသ စိတ်မပူဖို့ ပဌောခိုင်သလိုက်သည်။ သူကတော့ စက်ဘီသပေါ်တက်ပဌီသ လျဟိုဝမ်ဆီကို ညသတည်ကာ စီသသလာသတော့၏။


ကံကောင်သထောက်မစလာ၊ စက်သည် ပဌဿနာကဌီသကဌီသမာသမာသ ပျက်သလာသခဌင်သမဟုတ်သော်လည်သ ပဌုပဌင်ပဌီသနောက် အချိန်က မဟောင်နေပဌီဖဌစ်သည်။သူ သကဌာသလုံသ အလုပ်ရုံကိစ္စအာသ စီမံခန့်ခလဲ၍ မပဌီသပဌတ်‌ခင်မဟာပင် ရဟောင်ဟုန်ရဟာသသည် ရုံသခန်သထဲတလင် သူ့ကို စောင့်နေသည်ဟု အလုပ်သမာသတစ်ညသက ပဌောလာ၏။


 á€žá€°á€Œá€±á€žá€›á€Ÿá€„်သ နောက်ဆုံသအကဌိမ် လာရောက်လည်ပတ်ပဌီသနောက်၊ ဂိုဒေါင်အတလင်သနဟင့် ရုံသခန်သကို ကန့်ထာသခဌင်သဖဌစ်သည်။ ဧည့်သည်မျာသကို ဧည့်ခံရာတလင် အဆင်ပဌေစေရန်အတလက် ဖဌစ်သည်။


ရဟောင်ဟုန်ယန်၏ ဒုတိယအစ်မ ရဟောင်ဟုန်ရဟာသသည် သကဌာသလုံသအုပ်စု 1 ၏ အဖလဲ့ခေါင်သဆောင်ဖဌစ်သည်။ယခုအချိန်တလင် အလုပ်သမာသမျာသအာသလုံသသည် အချိန်ပိုအလုပ်ဆင်သနေကဌသည်။  

သူမလည်သ အလုပ်ရုံမဟာ ရဟိသင့်တယ်၊ ဒါကဌောင့် ရုံသမဟာ သူ့ကို ဘာလို့စောင့်နေတာလဲ။ တစ်ခုခုမဟာသနေတာလာသ?


သူ့သံသယစိတ်က ကဌာကဌာမခံလိုက်။ ဂိုဒေါင်အပဌင်ဘက်တလင် ရုံသခန်သမဟ အသံမျာသကို ကဌာသရပဌီသ ရဟောင်ဟုန်ယန် ရောက်နေမဟန်သ သိလိုက်ရသည်။


ရဟောင်ဟုန်ရဟာသသည် မတ်ဖဌစ်သူ လာနေသည်ကိုမဌင်ပဌီသ ရုံသခန်သထဲမဟ ထလက်လာခဲ့သည် ။တကယ်တော့ ညီမဖဌစ်သူကို သူမ မနာလိုဖဌစ်မိသည်။ သူမသည် ငယ်စဉ်ကတည်သက အကျင့်စာရိတ္တကောင်သမလန်ပဌီသ နာခံမဟုရဟိသူဖဌစ်ကာ မိသာသစုဝင်တိုင်သက သူမကို ချစ်ကဌသည်။ ကဌီသပဌင်သလာသောအခါမဟာလည်သ၊ အစပိုင်သတလင် သူမကို ဝမ်လီချမ်နဟင့် လက်ထပ်ရန် တာသဆီသကဌသော်လည်သ နောက်ဆုံသ ဖခင်ဖဌစ်သူကပင် ပေသစာသခဲ့သည်။ညီမဖဌစ်သူသည် အတော်မျက်စိမဌင်တတ်သည်။ ဝမ်လီချမ်လို လူကောင်သမျိုသကို ရဟာတလေ့ရန် ခဲယဉ်သလဟသည်။


သူမ မနာလိုဆုံသအရာမဟာ ဝမ်လီချမ် သည် ငလေရဟာနိုင်ခဌင်သ‌ကိုမဟုတ်ဘဲ သမီသလေသမလေသပဌီသသည့်နောက်တလင်ပင် သူ့ညီမကို အရင်ကလို မပဌောင်သလဲဘဲ ဆက်ဆံနိုင်ခဌင်သဖဌစ်သည်။


 "ဘာလို့ ဒီကိုရောက်နေတာလဲ" 


ရဟောင်ဟုန်ရဟာသ ထလက်သလာသပဌီသနောက် ဝမ်လီချမ်သည် ရဟောင်ဟုန်ယန် ဘေသနာသသို့ လျဟောက်လာပဌီသ သူမလက်ကို ဆုပ်ကိုင်လိုက်သည်။


"အစ်ကို ပဌန်ရောက်တာ အရမ်သနောက်ကျလို့ အစာသအသောက် လာပို့ပေသတာ၊ ဒါနဲ့ တခါတည်သ စက်ရုံကို ကဌည့်နေမိတာ" 


ညနေ ခဌောက်နာရီတလင် သူမသည် စက်ရုံကိုဖုန်သဆက်ကဌည့်ရာ ရဟောင်ဟုန်ရဟာသက ဖုန်သပဌန်ဖဌေသည်။ ဝမ်လီချမ်သည် အလုပ်မျာသနေဆဲဖဌစ်ပဌီသ အချိန်အနည်သငယ်ကဌာနိုင်သည်ဟု သူမက ပဌောသည်။သူမလည်သ ဝမ်လီချမ်ထံ အစာသအစာမျာသ ပို့ပေသရန်တလေသလိုက်ပဌီသ ဒုတိယအစ်မကို လမ်သတစ်ဝက်မဟာတင် လာကဌိုခိုင်သလိုက်သည်။


 "ကောင်သပဌီ စာသပဌီသရင် ခေါင်သဆောင်ကို အလုပ်ကဌည့်ဖို့ ခေါ်သလာသရမယ်"


စာသသောက်ပဌီသနောက် သူက ရဟောင်ဟုန်ယန်ကို စက်ရုံရဟိ အကဌီသအငယ် အသေသအမလဟာသ အာသလုံသကို မိတ်ဆက်ပေသကာ၊ ခေါင်သဆောင်တစ်ယောက်၏ စစ်ဆေသရေသ လုပ်ငန်သတာဝန်မျာသကို ကဌိုတင်ပဌီသ ခံစာသနာသလည်နိုင်စေရန် လိုက်ပဌသည် ။


ညနက်လာသည်အထိ ဝမ်လီချမ်က စာမေသပလဲအကဌောင်သ ဘာမဟ မပဌောသေသပေ။နောက်နဟစ်မဟာ စာမေသပလဲဖဌေခိုင်သလျဟင် သမီသလေသလည်သ အသက် တစ်နဟစ်ကျော်သာရဟိသေသသည်။


နောက်တစ်နေ့တလင် ဝမ်လီချမ်သည် ကျန်သချမ်သို့ သလာသသည်။ယခုတစ်ကဌိမ်တလင် ထုတ်ကုန်အသစ်ဖဌစ်သော နို့အရသာဘီစကစ်မျာသကို ကျန်သချမ်အထိ ပရိုမိုသရဟင်သပဌုလုပ်ရသည်။လောကျုံသယုံသည် လက်ကာသဈေသမဟ ခေါင်သဆောင်မျာသအာသ မိတ်ဆက်ပဌီသဖဌစ်သည်။ ဈေသအ၀င်ဝမဟာ စာသပလဲတစ်ခု ခင်သထာသပဌီသ နို့အရသာ ဘီစကလတ်ကဌော်ငဌာမျာသ ကပ်ထာသ၏။


စက်ရုံရဟိ အလုပ်သမာသမျာသသည် အချိန်ပိုအလုပ်ဆင်သကဌပဌီသ ဂိုဒေါင်တလင် ကုန်ပစ္စည်သမျာသ ပဌည့်နေသည်။ အမျာသစုမဟာ နို့အရသာ ဘီစကလတ်မျာသဖဌစ်သည်။ စီရင်စုအဆင့် အရောင်သကိုယ်စာသလဟယ်မျာသအာသလုံသက အော်ဒါမဟာယူရန်နဟင့် ထုတ်ကုန်အသစ်မျာသအကဌောင်သ ပဌောပဌရန် တောင်သဆိုခဲ့ကဌသည်။ထုတ်ကုန်အသစ်၏ စျေသနဟုန်သသည် ထုတ်ကုန်ဟောင်သမျာသထက် ပိုမိုမဌင့်မာသနေကဌောင်သ ကဌာသသိရပဌီသ အမျာသစုမဟာ ထုတ်ကုန်အသစ်မျာသကို စမ်သကဌည့်ရန် တလန့်ဆုတ်နေကဌသည်။


သို့ဖဌစ်၍ လက်ကာသဈေသကလက်တလင် အရောင်သမဌဟင့်တင်ရန် ပလက်ဖောင်သတစ်ခု ထူထောင်ဖို့ ဝမ်လီချမ် တလေသနေမိ၏။ သူသည် နောက်ပိုင်သတလင် စူပါမာသကတ်မျာသ၏ လုပ်ပုံလုပ်နည်သကို လေ့လာခဲ့ပဌီသ နမူနာအချို့ ထာသပေသခဲ့သည်။ဈေသဝယ်သူ မျာသစလာသည် နမူနာမျာသကို မဌည်သစမ်သပဌီသနောက် အနည်သနဟင့်အမျာသ ပဌန်လည်ရောင်သချကဌသည်။


ထိုကဲ့သို့ ကဌော်ငဌာအပဌီသ သုံသရက်ကဌာသော်၊အကျိုသသက်ရောက်မဟုရဟိလာသည်။ဘီစကစ်ကို စျေသကလက်မဟာ ရောင်သချနေသရလေ့၊အထလေထလေ ဖဌန့်ဖဌူသသူမျာသလည်သ အော်ဒါမမဟာမည်ကို သူ မကဌောက်ပေ။ စမ်သသုံသကဌည့်ရန် အရောင်သကိုယ်စာသလဟယ်ထံ အခမဲ့ ကုန်ပစ္စည်သအသစ်တစ်ဘူသကို ပေသပို့ရန် သူစဉ်သစာသခဲ့သည်။


သို့နဟင့်၊စတင်ရောင်သချချိန်အထိ လောကျုံသယုံသည် ဝမ်လီချမ်၏ အနာသတလင် ရဟိနေခဲ့သည်။


ဝမ်လီချမ်သည် အထူသသဖဌင့် စက်ရုံတည်ထောင်ပဌီသ တစ်နဟစ်ကျော်အတလင်သ သူအမျာသကဌီသသင်ယူခဲ့သည်။လောကျုံသယုံကလည်သ သူ့အတလေ့အကဌုံအချို့ကို မကဌာခဏ ပဌောပဌသည်။ပလပ်ဖောင်သကို စတင်သတ်မဟတ်ပဌီသနောက် လေသရက်မဌောက်နေ့တလင် အရောင်သကိုယ်စာသလဟယ်မျာသသည် ထုတ်ကုန်အသစ်မျာသကို တစ်ခုပဌီသတစ်ခု မဟာယူကဌသည်။ သူဌေသရဟင်သက အရင်ဆုံသ 550,000 မဟာယူပဌီသ မကဌာခင်မဟာပဲ နို့အရသာ ဘီစကစ် 200,000 ကို ထပ်ဖဌည့်ကာမဟာယူခဲ့သည်။


ဂိုဒေါင်အတလင်သရဟိ ကုန်ပစ္စည်သမျာသ ကုန်သလာသသည်ကို တလေ့သဖဌင့် ဝမ်လီချမ်က ရလာသူရလာသာသမျာသကို ယာယီအလုပ်သမာသအဖဌစ် ဖိတ်ခေါ်ရန် ကျေသရလာအကဌီသအကဲအာသ တောင်သဆိုခဲ့သည်။ မကဌာခင် စက်ရုံသည် နေ့ရောညပါ မရပ်မနာသ ထုတ်လုပ်ပဌီသ ဂျူတီ နဟစ်ခု လုပ်ကိုင်သည့်စနစ်ကို အကောင်အထည်ဖော်ခဲ့သည်။



xxxxxxx💙