MM Story Teller

Chapter 39

Viewers 3k

📽️Chapter 39

အခြေအနေ : ချစ်နေမိပြီ

[ T/N - Ch 39ကနေစပြီး 72အထိ အပိုင်းခေါင်းစဉ်တွေက 'အခြေအနေ : ချစ်နေမိပြီ' ပဲ ဖြစ်နေတာမို့ ဒီကြားထဲမှာ Chapterနံပါတ်တွေပဲတပ်ထားပြီး ခေါင်းစဉ်တွေ ထည့်မရေးတော့ပါဘူး💙 ]

ရန်ရှူ သူ့အသင်းဖော်များအား ရွေးချယ်ပြီးနောက်တွင် ဆွေ့ဟို့ယွီ နာမည်ကို ပေးထားပြီးဖြစ်၍ စင်ပေါ်တွင် ဆွေ့ဟို့ယွီ ပထမဆုံး ပေါ်လာသည်မှာ သဘာဝပင် ဖြစ်သည်။

အခြားဧည့်သည့်များ ဆွေ့ဟို့ယွီအား လူကိုယ်တိုင် မြင်ဖူးသည်မှာ ၎င်းက ပထမဆုံးအကြိမ် ဖြစ်သည်။

အဓိကပလက်ဖောင်းများ အားလုံးတွင် အလှအပ effect များ အသုံးပြုမထားဘဲနှင့်ပင် ဂိမ်း၏ တိုက်ရိုက်ထုတ်လွှင့်မှုထဲတွင် ဆွေ့ဟို့ယွီက မငြင်းရက်နိုင်လောက်အောင် စွဲမက်ဖွယ်ကောင်းနေပေသေးသည်။

ပြိုင်ပွဲအား မှတ်တမ်းတင်ထားသော ကင်မရာများအားလုံးက အရည်အသွေးမြင့်ကြပြီး လှုပ်ရှားမှုတိုင်းအား ရှင်းရှင်းလင်းလင်း ဖမ်းယူနိုင်ပေသည်။ ပြိုင်ပွဲအား ပါဝင်ဆင်နွှဲချိန်တွင် သူတို့အလွန်စိတ်လှုပ်ရှားလာကြပြီး အထူးသဖြင့် အမျိုးသားအားကစားသမားများက မိတ်ကပ်များကို မလိမ်းကြချေ။

ထိုသို့ မလိမ်းထားဘဲနှင့်ပင် သူ၏ပုံရိပ်များက အပြစ်အနာဆာကင်းကာ ကြည့်ကောင်းနေ၏။

ယခု ဤကဲ့သို့ မိတ်ကပ်စတိုင် ပြင်ဆင်ပြီးနောက် လူအများရှေ့ ထွက်ပေါ်လာရာ သူ့အား လူအများ၏ မျက်လုံးများထဲတွင် သဘောတကျနှင့် တောက်ပသွားအောင် မပြုလုပ်ရန်မှာ မဖြစ်နိုင်ပေ။

သေချာစွာပင် သူက ပုံမှန်ထက် ပို၍ချောမောခန့်ငြားနေ၏။

ဆွေ့ဟို့ယွီက အမှန်တကယ် စွမ်းဆောင်ရည်ရှိသူ တစ်ဦး ဖြစ်ရုံသာမက ဖျော်ဖြေရေးစက်ဝန်းတွင် ဤကဲ့သို့သော အလှတရားမှာ အမှန်တကယ် ပန်းအိုးတစ်လုံးဖြစ်ပြီး မိနစ်အနည်းငယ်အတွင်းတွင် ကျော်ကြားလာနိုင်ပေသည်။

သိသာထင်ရှားစွာပင် သူ့ရုပ်ရည်အပေါ် မှီခိုပြီးနေထိုင်နိုင်သော်လည်း သူက နိုင်ငံအတွက် ထင်ပေါ်ကျော်ကြားပြီး ဂုဏ်ကျက်သရေ ဆောင်ယူပေးနိုင်ရန် ရွေးချယ်ခဲ့ပေသည်။ မည်သို့ဆိုစေကာမူ သူတိုးတက်နိုင်သည့် အခွင့်အလမ်း အလားအလာက လမ်းကြောင်းပွင့်သွားပြီ ဖြစ်၏။

၎င်းက သိသာစွာပင် မင်းသားလေးတစ်ပါးကဲ့သို့ ပေါ်ထွက်လာခဲ့ခြင်း ဖြစ်သော်ငြား ရန်ရှူ၏ကွဲအက်နေသည့် ငိုသံကြီးကြောင့် တနည်းတဖုံ ရယ်စရာကောင်းသွားသည်။

"အစ်ကိုယွီ..."

သူတို့က တစ်ယောက်နှင့်တစ်ယောက် အချိန်အကြာကြီး မမြင်တွေ့ရပြီးနောက်မှ ပြန်လည်ဆုံစည်းရသကဲ့သို့ ထင်ရသည်။

အမှန်တကယ်တွင်မူ လွန်ခဲ့သော ရက်အနည်းငယ်ကမှ သူတို့တွေ့ခဲ့ပြီးသား ဖြစ်ပေသည်။

ရန်ရှူ ပြန်လည်ကောင်းမွန်လာသည်မှာ ရက်အနည်းငယ်ရှိပြီ ဖြစ်သည်။ နေ့စဥ် စကားပြောရာတွင် သူ့အသံက ပြဿနာ မရှိသောလည်း အော်ဟစ်လိုက်သည့်အခါတွင် အနည်းငယ် အက်ကွဲသွားပေသည်။

ရန်ရှူ အသံအက်သွားသည်ကို ဆွေ့ဟို့ယွီ ကြားလိုက်ပြီး ကျယ်လောင်စွာ ရယ်မောလိုက်သည်။

"မင်းရဲ့အသံနဲ့များ ငါ့ကို ခေါ်သွားချင်နေတယ်ပေါ့..."

အကယ်၍ ရန်ရှူ ကြီးပြင်းလာသည်ကို သူကိုယ်တိုင်မြင်ခဲ့ရ၍သာ မဟုတ်ပါက သူ အနည်းငယ် ရွံရှာစက်ဆုပ်မိပေလိမ့်မည်ပင်။

"အော်ပြီးတာနဲ့ ကျွန်တော်လည်း အံကြိတ်လိုက်တာပဲကို..."

ရန်ရှူက ဆွေ့ဟို့ယွီ နံဘေးအနီးသို့ လျှောက်သွားလိုက်သည်။

"ကျွန်တော့်ခြေထောက်တွေ အားနည်းနေတာ...အခုထိ အပြည့်အဝ ပြန်ကောင်းမလာသေးဘူး..."

ဆွေ့ဟို့ယွီ လက်ဆန့်ကာ ရန်ရှူကို ကူညီလိုက်ပြီး ပခုံးချင်း ယှဥ်တွဲကာ မတ်တတ်ရပ်လိုက်သည်။

ရန်ရှူ အလွန်အလုပ်ကြိုးစားခဲ့သည်ကို သူမြင်နိုင်ပေသည်။ လွန်ခဲ့သော ရက်အနည်းငယ်ကမှ ပြန်လည်ကောင်းမွန်လာသည့် လူတစ်ယောက်အတွက် ယနေ့ ပြင်းပြင်းထန်ထန် ပြေးလွှားရန်မှာ မလွယ်ကူလှပေ။

"ဝိုး..."

ဧည့်သည်တစ်ယောက်က ပင့်သက်မရှိုက်ဘဲ မနေနိုင်တော့ပေ။

"မင်းတို့နှစ်ယောက် တူတူရပ်နေတဲ့ပုံက မတရားကြည့်ကောင်းတာပဲ...မင်းတို့ရုပ်ရည်နဲ့တင် ပြိုင်ဘက်တွေကို ထိုးဖောက်ကျော်ဖြတ်လို့ ရနေပြီ..."

ရန်ရှူ အမြန်ပင် ပြန်ပြောလိုက်သည်။

"ကျွန်တော် ငယ်ငယ်တုန်းကဆိုရင် အစ်ကိုယွီက အရမ်းကြည့်ကောင်းတယ်လို့ ထင်လို့ သူနဲ့တူတူကစားရတာကို ကြိုက်ခဲ့တာရယ်..."

လျို့ရွှမ်းကဲ့သို့သော ပုံမှန်ဧည့်သည်များက လေထုအား တက်ကြွလာအောင် ပူးပေါင်းပေးရန် လိုအပ်၍ မေးလိုက်သည်။

"အမှန်အတိုင်းပြောရရင် နံပါတ် 1 ရဲ့အဓိပ္ပါယ်အကြောင်းကို ငါတော့ နည်းနည်းသိချင်မိသား..."

ဆွေ့ဟို့ယွီ ဘုတ်ပြားကိုချက်ချင်း တစ်ချက်ကြည့်ကာ ရှင်းပြလိုက်သည်။

"ပထမအကြောင်းပြချက်ကို ပြောရရင်တော့ အဲ့ဒါက ကျွန်တော်တို့ စကားပြောတဲ့အခါ သုံးလေ့ရှိတဲ့အချက်ပြပါပဲ...ကျွန်တော်တို့ စကားပြောတိုင်း ရန်ရှုက ပေါက်ကရတွေ အမြဲတမ်းပြောတတ်တယ်...အဲ့ခါကျ ကျွန်တော် ပြန်ဖြေရမှာ ပျင်းလို့ '1' လို့ပဲ ပြန်ပို့လိုက်တယ်...အဓိပ္ပါယ်ကတော့ ငါနားထောင်နေတယ် ဒါကြောင့် မင်း ဆက်ပြောနိုင်ပါတယ်ပေါ့..."

လျို့ရွှမ်း ခေါင်းညိတ်ကာ ပြောလိုက်သည်။

"တကယ်ပဲ ဆက်ဆံပုံက တကယ်ကွာတာပဲ..."

ဆွေ့ဟို့ယွီက လက်တွေ့မကျသောကြောင့် ရန်ရှူက သူနှင့်ဆက်ဆံကာ သူ့ကိုယ်သူ အတောမသတ်နိုင်စွာပြောဆိုနိုင်ပေသည်။

ရန်ရှူက လျို့ရွှမ်းအား အကြောင်းအရာ ခေါင်းစဥ်ကောင်းတစ်ခုကို ရှာဖွေရန် ကြိုးစားသင့်သည်ဟု ပြောဖူးသော်သော်လည်း ရန်ရှုကမူ သူ့စာများအား ပြန်မဖြေချင်ခဲ့ပေ။

စံသတ်မှတ်ချက်က နှစ်ဆဖြစ်သွားတာများလား...

မဟုတ်ချေ။ ရန်ရှူက ထိုသို့မထင်ပေ။

အခြားသော ပုံမှန်ဧည့်သည်များက လိုက်လျောညီထွေစွာ နောက်ကလိုက်ကာ မေးလိုက်သည်။

"ဒီလို ဝမ်းနည်းစရာအကြောင်းအရာကို အဆုံးသတ်လိုက်ဖို့ဆိုရင် နောက်ထပ်အကြောင်းပြချက်ကရောဘာများလဲ...".

ဆွေ့ဟို့ယွီက ထပ်ဖြေလိုက်သည်။

"နောက်ထပ်အကြောင်းပြချက်ကတော့ QQ ကိုသုံးတာကြောင့်ပါ...QQ မှာ သူငယ်ချင်း ဆက်ဆံရေးဘယ်လောက် တိုးတက်လာကြောင်းပြတဲ့ သင်္ကေတသေးသေးလေးတစ်ခု ရှိတယ်လေ...အဲ့တာလေး ပိုကြာရှည် ကြီးထွားလာဖို့ဆိုရင် ကျွန်တော်တို့ နေ့တိုင်းစကားပြောနေဖို့လိုတယ်...ကျွန်တော်တို့နှစ်ယောက်မှာ ဆက်ဆံရေးကြီးကြီးမားမားရှိပြီးသားပါ..."

"ရလဒ်ကတော့ ကျွန်တော်တို့ ရန်ဖြစ်ပြီး သွေးအေးစစ်ပွဲ ကျင်းပလိုက်တဲ့အခါကျ ဒီ ဆက်ဆံရေးကောင်းမွန်ကြောင်းပြတဲ့ သင်္ကေတကြီးကို ပျောက်မသွားစေချင်ဘူးလေ...အဲ့တော့ ဒီသင်္ကေတကြီး ဆက်ကြီးနေဖို့ နှစ်ယောက်သား တစ်ယောက်ကိုတစ်ယောက် လစ်လျူရှုရင်းနဲ့ပဲ '1' ကို အပြန်အလှန် ပို့ကြရော...အဲ့လိုအခြေအနေက နှစ်လကျော်လောက်ကြာအောင်ထိ ဆက်ဖြစ်နေကြတာ..."

ဧည့်သည်တစ်ယောက်က မေးလိုက်သည်။

"သွေးအေးစစ်ပွဲဖြစ်ရတဲ့ အကြောင်းအရင်းကရော..."

ဆွေ့ဟို့ယွီက တိုက်ရိုက်မဖြေပေ။

"တကယ်တော့ ခင်ဗျားမေးခွန်းရဲ့ အစမှတ်ကိုက မှားနေတာ...စဥ်းစားကြည့်လိုက်...ကျွန်တော် သူ့ကိုသိလာတာ နှစ် 20 တောင်ကျော်ပြီ သူ့စရိုက်နဲ့ဆို အဲ့ဒီလောက်ထိ စကားများဖြစ်ဖူးတာမျိုးက တစ်ကြိမ်ပဲရှိသေးတယ်...လွန်ခဲ့တဲ့ အနှစ် 20 လုံးလုံးကို ကျွန်တော် ဘယ်လိုဖြတ်ကျော်ခဲ့ရလဲ ခင်ဗျားသိလား..."

သူ့အဖြေကြောင့် ကျန်သောလူအုပ်စုကြီးက ရယ်မောလိုက်ကြသည်။

ရန်ရှူက ချောင်းအသာဟန့်ကာ ပွဲကိုဆက်လက်လုပ်ဆောငိရန် လိုသေးကြောင်း အချက်ပြရန် လက်ဦးမှုယူလိုက်သည်။

"ဘယ်ဧည့်သည်ကို ရွေးမှာလဲ လျို့ရွှမ်း..."

လျို့ရွှမ်းက တွန့်ဆုတ်မနေဘဲ ဘုတ်ပြားကို ညွှန်ပြလိုက်သည်။

"ငါက အားကစားသမားကိုရွေးမှာ..."

ဆွေ့ဟို့ယွီနှင့် ရန်ရှူဆွဲလိုက်သည့် အစမှတ်က မကောင်းပေ။ ၎င်းက မြေအောက်အကျဥ်းတိုက်ကဲ့သို့သော နေရာတစ်ခု သို့မဟုတ် ရေနံတွင်းကဲ့သို့သော တွင်းပေါက်တစ်ခုဖြစ်၏။

ဆောက်လုပ်ရေးနေရာများတွင် အသုံးပြုလေ့ရှိသည့် ဓာတ်လှေကားဖြင့် လူနှစ်ယောက်အား အောက်သို့ ပို့ကာ ဓာတ်လှေကားဖြင့် ထွက်သွား၍မရဟု သူတို့နှစ်ယောက်ကို ပြောခဲ့သည်။

ရန်ရှူ မျက်လုံးစည်းထားသော အဝတ်စကို ဆွဲချွတ်လိုက်ပြီး ဘေးဘီဝဲယာသို့ ကြည့်လိုက်ရာ အနီရောင်အလင်းအား လျှပ်တပြတ် မြင်လိုက်ရသည်။

ကြောက်စရာအကောင်းဆုံးအရာမှာ အနီရောင်အလင်းအား နောက်ခံထားပြီး ဆံပင်လျော့ရတိလျော့ရဲနှင့် ပေါ်လာသည့် ပုံရိပ်မည်းပင် ဖြစ်သည်။

"ငါ, ငါ...အစ်ကိုယွီ..."

မကောင်းသည့်စကားအား ပြောထွက်မိလုနီးပါး ဖြစ်သွားသည့် ရန်ရှူက ဆွေ့ဟို့ယွီ၏လက်မောင်းအား လှမ်းဆွဲကာ နှစ်သိမ့်ပေးရင်းနှင့်ပင် ပတ်ပတ်လည်အား လက်နှင့်ယမ်းလိုက်သည်။

"အစ်ကိုယွီ မကြောက်နဲ့နော်...သူကဒီတိုင်း NPC လေးပဲရယ်..."

ဆွေ့ဟို့ယွီက သေချာက်ပေါက် မကြောက်ရွံ့ချေ။ သို့သော်ငြား ရန်ရှူက သူ့လက်မောင်းအား ကြမ်းကြမ်းတမ်းတမ်း ဆွဲထားနေ၍ နာကျင်မှုခံစားလိုက်ရသည်။

ရန်ရှူက ပုံရိပ်မည်းကို စိုးရိမ်နေချိန်တွင် သူတို့အနောက်မှ လေအေးတစ်သုတ် တိုက်ခတ်သွားသည်ကို ခံစားလိုက်ရသည်။

သူတို့နှစ်ယောက် အနောက်သို့ တစ်ပြိုင်တည်း လှည့်ကြည့်လိုက်ရာ အမိုးပေါ်ရှိအပေါက်မှ သွေးစုတ်ဖြူဖျော့နေသည့် ပါးနှစ်ဖက်နှင့် အမျိုးသားတစ်ယောက်က တွယ်ကပ်ပြီးထွက်လာရန် ကြိုစားနေသည်ကို တွေ့လိုက်ရသည်။ သွေးများက မျက်နှာပေါ်မှ တစ်စက်စက်စီးကျနေပြီး သူတို့နှစ်ယောက်ထံ ကြမ်းကြုတ်ရက်စက်စွာ အော်ဟစ်လိုက်သည်။

သံသယမဝင်နိုင်စရာပင် အကျိုးသက်ရောက်မှုက ထိတ်လန့်ကြောက်ရွံမှုကို အမြင့်ဆုံးသို့ ရောက်သွားစေပေသည်။

သူတို့ပရိုဂရမ်အဖွဲ့က စီစည်ထားခဲ့သည့် ကြောက်စရာမှာ အနီရောင်အလင်းနှင့် ပုံရိပ်မည်းဟုသာ တွေးခဲ့ကြသည်။ သို့သော် မမျှော်လင့်စွာပင် အမှန်တကယ် အဓိကအပိုင်းက သူတို့နောက်မှ ရုတ်တရက်ထွက်ပေါ်လာခဲ့သည်။

၎င်းကို မမျှော်လင့်ထားဘဲသည့်အပြင် သူတို့နှင့် အလွန်နီးကပ်နေခဲဲ့၍ ကြောက်ရွံ့မှုက ထိန်းမရစွာပင် ပေါက်ကွဲထွက်သွားသည်။

"အား..."

ရန်ရှူ အလွန််ကြောက်လန့်သွားကာ နေရာမှာတင် ခုန်လိုက်ပြီး ဆွေ့ဟို့ယွီကို ဖက်တွယ်ထားပြီး လွှတ်မပေးတော့ပေ။

ဆွေ့ဟို့ယွီကမူ အသံတစ်ချက်လေးသော်မျှ မထွက်လာဘဲ NPC အား သေသေချာချာ ဂရုတစိုက် စစ်ဆေးကြည့်နေကာ သူဘယ်လိုပြန်ထွက်ခွာမလဲ သိချင်နေသည်။ သူရန်ရှူနှင့်အတူ ထိုအရာကို သေသေချာချာ လေ့လာစမ်းစစ်လိုက်ပြီး အသံနိမ့်နိမ့်ဖြင့် ပြောလိုက်သည်။

"တစ်ယောက်ယောက်ကတော့ သူ့ကိုပြန်ဆွဲခေါ်သွားဖို့ သူ့ခြေထောက်ကို အဲ့နေရာထိ တရွတ်တိုက် ဆွဲသွားလိုက်သင့်တယ်..."

"အစ်ကိုယွီ..."

ရန်ရှူ မျက်ရည်လည်ရွှဲဖြင့် ပြောလိုက်သည်။

"ကျေးဇူးပြုပြီး ကျွန်တော့်ကို ဖက်ထားပေး..."

"ဟင်း...ချွဲမနေနဲ့တော့ ငါတို့ မြန်မြန် သဲလွန်စရှာရမယ်..."

ဆွေ့ဟို့ယွီက ငိုနေသည့် ရန်ရှူကို ရိုးရိုးရှင်းရှင်းပင် တွန်းထုတ်လိုက်သည်။ NPC ထွက်သွားပြီးနောက် ခြေလှမ်းအနည်းငယ် နောက်ပြန်ဆုတ်ကာ ဥမင်ထဲသို့ လိုက်သွားလိုက်သည်။

ရန်ရှူက လျင်မြန်စွာ နောက်ကလိုက်လာပြီး ဆက်ခေါ်နေလေသည်။

"အစ်ကိုယွီ အစ်ကိုယွီ...အစ်ကို တစ်ခုခုလိုရင်လေ ကျွန်တော့်ကိုသာ ခေါ်လိုက်နော်...ကျွန်တော် သေချာပေါက် အချိန်မှီ အရောက်လာခဲ့မှာ..."

-------------------

ဆွေ့ဟို့ယွီက စမ်းတဝါးတဝါး သွားနေရင်းမှ ပြန်ပြောလိုက်သည်။

"ဒီမှာ ထွက်ပေါက်တစ်ခုရှိတယ်...ကြည့်ရတာ ရည်ရွယ်ချက်ရှိရှိနဲ့ စီစဥ်ထားတာပဲဖြစ်ရမယ်...ဒီမှာ ခဏနေခဲ့ဦး ငါတစ်ချက် သွားကြည့်လိုက်ဦးမယ်..."

ရန်ရှူက ဥမင်ထဲမှ တွားသွားထွက်လာတော့မည် ဖြစ်၏။

"အစ်ကိုယွီ...ကျွန်တော့်ကို တစ်ယောက်တည်း မထားခဲ့ပါနဲ့..."

ဆွေ့ဟို့ယွီက ဥမင်တွင်း ရောက်သွားပြီဖြစ်သည်။ တစ်ခဏမျှ တွယ်တက်သွားပြီးနောက် ရန်ရှူအား အတွင်းထဲကနေ လှမ်းသတိပေးလိုက်သည်။

"အထဲကိုမဝင်ခဲ့နဲ့...ဒီမှာမြွေတွေရှိတယ် အသက်လည်း ရှင်နေသေးတယ်..."

ထိုသည်ကို ကြားပြီးနောက် ရန်ရှူ သူ့မျက်လုံးများ မည်းမှောင်သွားသည်ဟု ခံစားလိုက်ရသည်။ ဥမင်ထဲမှ ထပ်ထွက်လာပြီး ပြောလိုက်သည်။

"ကျွန်တော်လည်း ပထမပိုင်းကို ကြည့်ခဲ့တယ်...ဒါက လျိုရှင်းရဲ့အစမှတ် မဟုတ်ပါဘူး...ဘာလို့ ဒီမှာ မြွေတွေရှိနေရတာလဲ..."

"အတိအကျကြီးတော့ ထပ်တူညီလို့မရဘူးလေ...မဟုတ်ရင် မှတ်တမ်းတင်ဖို့ ဘယ်လို ထိုက်တန်ပါ့မလဲ..."

ယခုတွင်မူ ရန်ရှူက ပရိုဂရမ်အဖွဲ့ ပြောခဲ့သည့် အဆင့်မြှင့်ထားသည့် ဗားရှင်းဆိုသည်ကို နားလည်သွားလေပြီဖြစ်သည်။

ဤတစ်ကြိမ်အစမှတ်က အမှန်တကယ်ကို နက်မှောင်ပြီး NPC က သူတို့အားခြောက်လှန့်ရန် နေရာတိုင်း အချိန်မရွေး ထွက်ပေါ်လာပေသည်။ မည်းမှောင်ပြီးကျဥ်းမြောင်းလှသည့် ဥမင်လှိုဏ်ခေါင်းအတွင်းတွင် အသက်ရှင်နေသည့် မြွေများလည်း ရှိနေ၏။ ဆွေ့ဟို့ယွီရှိနေခဲ့၍သာ မဟုတ်ပါက သူဘာလုပ်၍ လုပ်ရမည်မှန်း ရန်ရှူ သိမည်မဟုတ်ပေ။

ဤအစစ်အမှန်ရှိုးပွဲတွင် ရုပ်ပိုင်းဆိုင်ရာခွန်အားနှင့် သွက်လက်တက်ကြွမှုအရ သူကအကောင်းဆုံး ဖြစ်သည်မှာ မလွဲပေ။ သို့သော် သတ္တိနှင့် ဦးနှောက်သုံးရသည့် ဝှက်စာ၊အဓိပ္ပါယ်ဖော်ရသည့်နေရာ၌ အမှန်တကယ် မတော်ချေ။

အထဲ၌ မည်းမှောင်ပြီး မြွေများရှိသည်ဟု ကြားခဲ့ရသော်လည်း သဲလွန်စများရှာရန် လိုအပ်နေသေးသည်။ ထို့ကြောင့် သူ ဥမင်ပေါက်ဝ၌ရပ်ပြီး တိုးတိုးလေး လှမ်းမေးရန်သာ တတ်နိုင်ပေသည်။

"အစ်ကိုယွီ...အစ်ကိုယွီ...အစ်ကိုအဆင်ပြေရဲ့လား... အစ်ကိုကြောက်နေတယ်ဆိုရင် ကျွန်တော်နဲ့ စကားပြောနေလို့ ရတယ်နော်..."

ဥမင်ထဲရှိ ပတ်ဝန်းကျင်က မည်းမှောင်ပြီး မှုန်မှိုင်းနေကာ စိတ်ဓါတ်ကျစရာကောင်းလှပြီး လေပြင်းတိုက်ခတ်နေသည်။ ရန်ရှူ၏ မူမမှန်သော အော်ပြောလိုက်သံက အခြေအနေကို ပို၍ကြောက်ရွံ့စရာကောင်းအောင် တနည်းတဖုံ ထပ်ပေါင်းပေးလိုက်သည်။

"ခဏလောက် တိတ်တိတ်လေးနေစမ်းပါ..."

ဆွေ့ဟို့ယွီ အတွင်းထဲတွင် ဆက်လက်စူးစမ်းနေသည်။

"မဟုတ်ဘူး အဲ့ဆို ကျွန်တော် အစ်ကိုနဲ့ဆက်ပြီးစကားမပြောတော့ဘူး...ဒါပေမဲ့ အစ်ကို ကြောက်နေတယ်ဆိုရင်လည်း ကျွန်တော့်ကို အစ်ကို့အတွက် သီချင်းဆိုခွင့်ပြုလေ...ဒီနေ့က နေ့ကောင်းတစ်ရက်ပါကွယ်...မင်းဖြစ်ချင်တာတာတွေအကုန် အမှန်တကယ်ဖြစ်လာနိုင်ပါတယ်...ဒီနေ့က နေ့ကောင်းတစ်ရက်ပါကွယ်...နွေဦးလေညှင်းလေးကို ကြိုဆိုလိုက်ကြရအောင်လေ...အာ..."

ဆွေ့ဟို့ယွီက ဥမင်ထဲတွင် ဆက်လက်ရှာဖွေစူးစမ်းနေရင်း ပြန်ပြောလိုက်သည်။

"ဒါက ဝင်္ကပါအသေးစားလေးတစ်ခုပဲ... တက်သွားတဲ့အချိန်ကျ မြွေတွေကို တွန်းဖယ်ပစ်ဖို့လိုတယ်...ငါ သူတို့ကို တက်နင်းမိသွားမှာစိုးတယ်..."

"အစ်ကိုယွီ...အစ်ကို အဲ့ဒါကြီးကို ပြောပြနေဖို့ မလိုပါဘူး ကျွန်တော်မကြားချင်ဘူး..."

ဆွေ့ဟိုယွီ အတွင်းထဲမှာ တခဏမျှကြာအောင် ရှာဖွေနေပြီးနောက် အပြင်ကို လှမ်းအော်လိုက်သည်။

"ရန်ရှူ အဲ့မှာ လျှို့ဝှက်ခန်း ဒါမှမဟုတ် တခြားတစ်ခုခု ရှိမရှိ တစ်ချက်ကြည့်ကြည့်ပေး..."

ရန်ရှုူကြောက်နေ‌သော်လည်း ဆက်စူးစမ်းနေရဆဲပင်။ အဆုံးတွင် သူ ဆွေ့ဟို့ယွီအပေါ်ကို အလွန်မှီခိုနေ၍ မရပေ။

အလင်းရောင်မှိန်မှိန်လေးရှိသော အခန်းထဲက တံခါးကို စမ်းတဝါးဝါးနှင့် စမ်းကြည့်လိုက်ရာ အမှန်ပင် ပိတ်ထားသော နေရာလွတ်တစ်ခုကို ရှာတွေ့လိုက်၏။

အလွန်မှောင်မည်းနေ၍ ရန်ရှူ သူ့လက်ချောင်းကိုပင် သူ ပြန်မမြင်ရပေ။ လက်ဖြင့် ဘေးနံရံများအား တဖြေးဖြေး စမ်းပြီး ရှေ့လျှောက်ချိန်တွင် ရုတ်တရက် တစ်စုံတစ်ယောက်က သူ့လက်ကောက်ဝတ်အား ဆောင့်ဆွဲလိုက်သည်။

"အား..."

ရန်ရှူ ထိတ်လန့်တကြား အော်ဟစ်ကာ သူရုန်းနိုင်သမျှ အတင်းရုန်းကန်လိုက်သည်။

သို့သော်ငြား သူ့အား ဆုပ်ကိုင်ထားသည့်လက်က အလွန်သန်မာကာ သူ့ကို လွှတ်မပေးပေ။ ရန်ရှူ အလွန် ကြောက်လန့်လွန်း၍ မျက်ရည်များ တာကျိုးသည့်သဖွယ် စီးကျလာသည်။

ဥမင်ထဲတွင် စူးစမ်းနေဆဲ ဆွေ့ဟို့ယွီက အသံကြားလိုက်ချိန်တွင် လျင်မြန်စွာ ပြန်ဆုတ်လာသည်။ သူ ခုန်ဆင်းလာသည့်အခါ ရန်ရှူငိုနေသည်ကို တွေ့လိုက်ရသည်။ ထိုဆုပ်ကိုင်ထားသည့် လက်မှ ရန်ရှူ အမြန်လွတ်မြောက်သွားရန် သူမြန်နိုင်သမျှ မြန်မြန် ကူညီကြိုးပမ်းလိုက်သည်။

ရန်ရှူမှာ အလွန်ကြောက်လန့်လွန်းသွား၍ ဆွေ့ဟို့ယွီ၏ အဝတ်ထောင့်အား ဆောင့်ဆွဲထားပြီး လွှတ်မပေးတော့ပေ။

ဆွေ့ဟို့ယွီ သူ့ကို ချော့မော့နှစ်သိမ့်ပေးလိုက်သည်။

"သူတို့အားလုံးက ဟန်ဆောင်နေကြတာပါ...သူတို့က ဝန်ထမ်းတွေဖြစ်ပြီး လူတွေပါပဲ...မကြောက်နဲ့တော့နော်..."

📽️

Prev Next