MM Story Teller

Chapter 26

Viewers 2k

💫Chapter 26

SS အဆင့်ရှိသူဆိုလျှင် မည်သည့်နေရာသွားသွား မျက်နှာသာပေးခံရသည်။ ထိုသူက မက်ခါတိုက်ခိုက်ရေးသမားမဖြစ်ချင်လျှင်ပင် မက်ခါပညာရှင်တစ်ယောက်ဖြစ်လာနိုင်ပြီး အဆင့်မြင့်အလုပ်များကို ရနိုင်သည်။ ဗီဇအဆင့်နှင့် စိတ်ဝိညာဥ်အဆင့်မြင့်သောသူတို့က ဘာပဲလုပ်လုပ် အောင်မြင်နိုင်၏ ။

SSအဆင့်ရရှိသူပေါ်ထွက်လာခြင်းက အာရုံအချို့ကို ဖမ်းစားနိုင်သော်လည်း အနည်းဆုံးတော့ S+အဆင့်လောက် ကမ္ဘာကြီးကို တုန်လှုပ်စေမည်မဟုတ်ပေ။ ၎င်းက ဆာ့ဆာ့၏ အင်အားများ 'ဘယ်လိုအမြန်နှုန်းနဲ့ တက်လာသလဲ' ဆိုသည်ကို ဖြေရှင်းပေးနိုင်ပြီး အားလုံးကလည်း လက်ခံယုံကြည်နိုင်လောက်သည်။ ထိုသို့မဟုတ်ဘဲ ဆာ့ဆာ့၏ အဆင့်က သူမ၏အင်အားနှင့် ညီမျှမှုရှိမနေလျှင် အချိန်ကြာလာသည့်အခါ အားလုံးက သံသယဝင်လာနိုင်၏။

ဆာ့ဆာ့က ထိုအဆင့်နှစ်ခုနှင့်ပက်သက်၍ ယေဘုယျသိထားပြီး ယခုသူမ၏ အဆင့်က မက်ခါတိုက်ခိုက်ရေးသမားများကြား၌ မြင့်သည့်အထဲပါသည် ။ သူမလည်း အနည်းငယ်တောင့်တင့်သွား၏ ။

" အာ...ဒါ… SS အဆင့်လား..."

သူမက 'သေချာမလုပ်ခဲ့ရဘူး'ဟုပင် ခံစားမိနေသည်။ ဂိုဏ်းထဲကလူတစ်ယောက်သာဆိုလျှင် သေချာပေါက် လွယ်ကူနေမည်ပင်။

"ဒါတောင် SSအဆင့်ရတာလား... ကြည့်ရတာ ဒါက သိပ်ခက်ပုံမရဘူး..."

လီစီးနှင့်ချန်ရှန်း: " ဘာ.. "

သူတို့ကိုယ်သူတို့ အိုနေပြီဟူပြီး အမြဲမကျေမနပ်ဖြစ်သော သူနှစ်ယောက်မှာ သူတို့အကြားအာရုံပင် ချို့ယွင်းနေပြီလားဟု ထင်မိသည် ။

ဆာ့ဆာ့က ချက်ချင်းခေါင်းခါပြလိုက်၏ ။

" ဘာမှမဟုတ်ပါဘူး..."

သူမလည်း သူမစကားကြောင့် လူမုန်းများစေမည်ဆိုသည်ကို သိသဖြင့် သူတို့ကို သိစေ၍မဖြစ်ပေ ။

ဆာ့ဆာ့က သူမ၏ရလဒ်နှင့်ပက်သက်ပြီး အံ့အားသင့်မနေသည်ကို တွေ့ရသောအခါ သူတို့နှစ်ယောက်က မေးလာ၏။

" အရင်က သမီးအဆင့်ကို သိထားပြီးသားလား... ဘာဖြစ်လို့ ပျော်နေတဲ့ပုံရော မကျေမနပ်ဖြစ်နေတဲ့ပုံရော မပေါ်တာလဲ..."

သာမန်လူတစ်ယောက်သာ သူက SS အဆင့်ဆိုသည်ကို သိလျှင် အစောကတည်းကပင် ထခုန်နေလောက်ပြီ ဖြစ်သည်။ အထူးသဖြင့် ဆာ့ဆာ့အရွယ်ကလေးဆိုလျှင် ၎င်းက သူတို့၏ အိပ်မက်မက်နေသည့်အရာပင်။

ဆာ့ဆာ့၏ အမူအရာက ပုံမှန်မဟုတ်ဘဲ သာမန်နေ့လည်စာသွားစားနေသည့်အလား ဘာမှမဖြစ်သည့်အတိုင်းပင်။ သူမ စစ်ဆေးရန် ရောက်လာစဥ်ကလည်း ပထမဆုံးအကြိမ် စတင်စစ်ဆေးမည့်သူလိုမဟုတ်ဘဲ အလွန်တည်ငြိမ်နေသည်ကို သူတို့မှတ်မိသည်။ အဘယ်ကြောင့်ဆိုလျှင် သာမန်လူတစ်ယောက်ဆိုပါက သူတို့၏ အဆင့်ကို မသိရသေးမီ၌ အလွန်စိတ်လှုပ်ရှားနေမည်အမှန်ပင်။

" အာ...အဲ့ဒါက ဘာမှ ထူးထူးခြားခြား မဟုတ်ပါဘူး..."

ဆာ့ဆာ့က သူမ ခေါင်းကို ကုတ်လိုက်သည် ။

' ရလဒ်က ခန့်မှန်းထားသလောက် မဆိုးရုံပဲမလား...အဲ့ဒီလိုကိစ္စကသာ ငါ့ကို အလွယ်လေး တုန်လှုပ်စေမယ်ဆိုရင် အရင်ကတည်းက အကြိမ်ပေါင်းမနည်း တုန်လှုပ်နေခဲ့ရလောက်ပြီ...'

' ငါ့ရဲ့ ရလဒ်တွေက အရမ်းကောင်းနေရုံနဲ့ ကိုယ့်ကိုယ်ကိုယ် ကျေနပ်အားရသင့်တာလား... ဆရာနဲ့အစ်ကိုတွေကတော့ ငါ့ကိုစိတ်ငြိမ်အောင်လုပ်ပေးပြီး "လာစမ်းပါ..နိုးထတော့ မင်းက ဘာမှမဟုတ်သေးဘူး " လို့ပြောလာမှာပဲ...'

လီစီးသာမက ချန်ရှန်းပါ ၎င်းက ဆာ့ဆာ့ ရိုးရိုးသားသားပြောနေကြောင်း မြင်နိုင်၍ သူတို့ဘာပြောရမည်ပင် မသိကြတော့ပေ။

ဆာ့ဆာ့ရဲ့ စိတ်ပိုင်းဆိုင်ရာအခြေအနေက အရမ်းကောင်းတာပဲလို့ သူတို့ပြောသင့်လား ဒါမှမဟုတ် သူ့ကို ဦးနှောက်ချောင်နေတယ်လို့ပဲ ပြောသင့်လား...

" စကားမစပ် သမီးက လေ့ကျင့်ရေးမှာ အခြေခံသုံးမက်ခါကို သုံးနေတုန်းပဲနော်...အခု သမီးရဲ့အဆင့်ကို သိသွားပြီဆိုတော့ ပိုကောင်းတဲ့တဲ့မက်ခါကို ကိုယ့်ဘာသာရွေးချယ်သင့်တာပေါ့...သုံးနေကျမက်ခါကို မသုံးရသေးဘူးမလား... သမီးမှာ မက်ခါပညာရှင်ရောရှိပြီလား... သီးသန့်စိတ်တိုင်းကျမက်ခါလုပ်ပေးဖို့ မက်ခါပညာရှင်ကို ပြောသင့်တယ်...သမီးနဲ့ မက်ခါက အသားကျလေလေ ထုတ်နိုင်တဲ့အင်အားက ပိုများလေလေပဲ..."

ချန်ရှန်းက ဆာ့ဆာ့၏ အင်အားများကို အလဟဿမဖြစ်စေချင်သောကြောင့် သူမကို သတိပေးလိုက်သည် ။

ဖက်ဒရယ်၏ ပထမဆုံးဘက်စုံအကယ်ဒမီကျောင်းက ကြွယ်ဝမှုရှိသည်ဆိုသော်လည်း သူတို့ဘက်မှ ကျောင်းသားများကို အများဆုံးထောက်ပံ့ပေးနိုင်သည်က နေ့စဥ်လေ့ကျင့်ရေးအတွက် Sအဆင့်အောက်မက်ခါမျှသာ ဖြစ်သည်။ အဘယ်ကြောင့်ဆိုလျှင် Sအဆင့်နှင့်အထက် မက်ခါများကို စီနီယာမက်ခါပညာရှင်များက ကိုယ်ပိုင်ဒီဇိုင်းများဖြင့် ထုတ်လုပ်ကြပြီး အလွယ်တကူထုတ်မရောင်းကြပေ။

အကယ်၍ ဆာ့ဆာ့ကသာ သူမ၏အဆင့်နှင့်မကိုက်ညီသော မက်ခါကို သုံးမည်ဆိုလျှင် ၎င်းက သူမ၏ အင်အားကို ကန့်သတ်ထားသလို ဖြစ်နေလိမ့်မည်။ အချိန်ကြာလာလျှင် သူမက အဆင့်နိမ့်မက်ခါများအား သုံးရသည်ကို အသားကျသွားပြီး အဆင့်မြင့်မက်ခါများကို သုံးနိုင်တော့မည် မဟုတ်ပေ။

ဆာ့ဆာ့က ပြောလိုက်သည် ။

" ကျောင်းက ထောက်ပံ့ပေးထားတဲ့ မက်ခါတွေကလည်း အရမ်းကောင်းပါတယ်... ကျွန်မရဲ့ စီနီယာအစ်ကိုက သီးသန့်ဒီဇိုင်းဆွဲထားတဲ့မက်ခါကို လုပ်ပေးနေတာ ...မကြာခင် ကျွန်မကို ပို့လာပေးမှာပါ..."

ချန်ရှန်းက လီစီးထံမှ အတွင်းသတင်းအချို့ရထားပြီး ဆာ့ဆာ့၏ နောက်ခံက နက်နဲသည်ကို တွေးမိသောအခါ သူက မေးလိုက်သည်။

" ဘယ်ပညာရှင်က သမီးရဲ့စီနီယာအစ်ကိုလဲ..."

" စုန့်နင်ဖုန်း "

"..."

ချန်ရှန်း နားမလည်နိုင်ဖြစ်သွား၏ ။

Sအဆင့်နှင့် ထိုထက်ပိုသောအဆင့်မြင့်မက်ခ်များကို တည်ဆောက်နိုင်သည့် ပညာရှင်များက ဖက်ဒရယ်တိုင်းပြည်တွင် လူသိများကြပြီး စုန့်နင်ဖုန်းဆိုသည်ကိုတော့ သူတစ်ခါမှ မကြားဖူးပေ ။

" သမီးရဲ့စီနီယာအစ်ကိုက အဆင့်ဘယ်လောက်မက်ခါပညာရှင်လဲ...တကယ်လို့ သူက Aအဆင့်ပဲရှိတာဆိုရင် Sအဆင့်လုပ်ပေးနိုင်တဲ့ မက်ခါပညာရှင်နောက်တစ်ယောက်ကို ရှာလိုက်တာက ပိုကောင်းမယ်..."

ဆာ့ဆာ့က မက်ခါပညာရှင်များ၏ တည်ရှိမှုကို သိသောကြောင့် ပြောလိုက်သည် ။

" ကျွန်မရဲ့အစ်ကိုက မက်ခါပညာရှင်မဟုတ်သေးပါဘူး...ဒါပေမဲ့ ရက်အနည်းငယ်အတွင်း ဖြစ်လာတော့မှာပါ... သူလုပ်ပေးတဲ့မက်ခါက သေချာပေါက် ကျွန်မအတွက် အသင့်တော်ဆုံးနဲ့ အကောင်းဆုံးဖြစ်မှာပဲ...ဆရာတကယ်လို့ လိုတယ်ဆိုရင်..."

ဆာ့ဆာ့က ဒီအတိုင်း သူ့ရဲ့စီနီယာအစ်ကိုကို မျက်စိစုံမှိတ်ပြီးကို ယုံကြည်မှုရှိနေတာပဲ...

" မလိုတော့ပါဘူး...ကျေးဇူးပါပဲ… "

ဆာ့ဆာ့က ပြီးအောင်ပင်မပြောရသေးမီ ချန်ရှန်းက သူမကို ငြင်းလိုက်သည်။

' မက်ခါပညာရှင်တောင် မဟုတ်သေးဘူးလား...ဒါတောင် မကြာခင်မှာပဲ သူက ဆာ့ဆာ့နဲ့ သင့်လျော်မယ့် မက်ခါကို ထုတ်နိုင်တော့မယ်ဆိုပဲ...'

' မက်ခါပညာရှင်တစ်ယောက်ဖြစ်ဖို့က အဲ့လောက် လွယ်တယ်များထင်နေလား...အဆင့်မြင့်မက်ခါပညာရှင်တစ်ယောက်ဖြစ်ဖို့က မက်ခါတိုက်ခိုက်ရေးသမားဖြစ်ဖို့ထက်တောင် ပိုခက်သေးတယ်လေ...'

အချို့လူများက အလုပ်ထဲတွင် သူတို့၏တစ်ဘဝလုံး နှစ်မြှုပ်ထားသော်လည်း " အပြောင်မြောက်ဆုံးလက်ရာ" အချို့ကိုသာ ပြုလုပ်နိုင်ခဲ့သည် ။

ချန်ရှန်းက သူမက်ခါပညာရှင်မဟုတ်ဘဲ မက်ခါပညာရှင်များကလည်း ဆာ့ဆာ့၏စကားကို မကြားမိသွားသည့်အတွက် သူဝမ်းသာမိသည်။ သူတို့သာ ဆာ့ဆာ့ပြောသည်ကို ကြားလျှင် ဒေါသအထွက်လွန်ပြီး သေသွားနိုင်၏။

ထို့နောက် ချန်ရှန်းက မေးလိုက်သည် ။

" သမီးရဲ့ စီနီယာအစ်ကိုက သမီးကို မက်ခါလုပ်ပေးမယ်လို့ပြောထားတာလား.."

ဖုံးကွယ်နေစရာမလိုသောကြောင့် ဆာ့ဆာ့က ခေါင်းညိတ်ကာ ပြောလိုက်သည် ။

" ဟုတ်တယ်...ကျွန်မရဲ့ စီနီယာအစ်ကိုက တကယ်တော်တယ်..."

" အဲဒီစီနီယာအစ်ကိုက သမီးရဲ့အုပ်ထိန်းသူလား..."

" အုပ်ထိန်းသူတွေထဲက တစ်ယောက်ပါပဲ..."

ချန်ရှန်းက ဆာ့ဆာ့၏မျက်လုံးများမှတစ်ဆင့် သူမက ထိုစီနီယာအစ်ကိုပေါ် 'ဘယ်လောက်ထိယုံကြည်မှုရှိလဲ' ဆိုသည်ကို မြင်နိုင်၏။ သူက အနည်းငယ်စိုးရိမ်သွားသော်လည်း သူမရှေ့တွင်တော့ ထုတ်မပြပေ။ ထို့ကြောင့် သူမကိုသာ ဦးစွာသွားခိုင်းလိုက်သည်။

သို့သော် သူက ခေါင်းလှည့်လိုက်ပြီးသည်နှင့် လီစီးကို ပြောလိုက်သည် ။

" မိဘတွေကို ခေါ်လိုက်တော့...သူ့ရဲ့ မိဘတွေကို ခေါ်မှဖြစ်မယ်...ဆာ့ဆာ့ရဲ့ အုပ်ထိန်းသူက တကယ်တာဝန်မဲ့တာပဲ...သူ့ကိုတောင် မက်ခါတွေ လုပ်ဖို့လွယ်ပြီး ရက်ပိုင်းအတွင်းမှာ ပို့ပေးလိုက်မယ်လို့တောင် ပြောလိုက်သေးတယ်...ဒါက လွန်လွန်းသွားပြီ..."

ဆာ့ဆာ့က တစ်ခါတစ်ရံ အဓိပ္ပါယ်ကောက်လွဲနေတတ်သည်မှာ အံ့သြစရာမရှိတော့ပေ။ သူမက လူတိုင်းသိသည့် အချို့ကိစ္စများကိုပင် မသိခြင်းမျိုး ဖြစ်နေ၏ ။

ပြဿနာရဲ့အစက သူ့ရဲ့မိဘနဲ့ အုပ်ထိန်းသူတွေကြောင့်ပဲ...အုပ်ထိန်းသူတွေက သူ့ကို အယူအဆအမှားတွေရိုက်သွင်းထားလို့ ခံယူချက်အမှားတွေရှိလာတာပဲ...

ဆာ့ဆာ့က ထိုအုပ်ထိန်းသူကို အလွန်ယုံကြည်နေပုံရသောကြောင့် ချန်ရှန်းက သူမရှေ့တွင် တည့်တိုးကြီးသွားပြော၍ မဖြစ်ပေ။ ၎င်းက သူမ၏ ပုန်ကန်ချင်စိတ်ကို နှိုးဆော်လိုက်သလို ဖြစ်မည်စိုးရသည်။

ကိစ္စများကို သေချာသိရရန် သူတို့ သူမ၏မိဘများနှင့် တွေ့မှဖြစ်မည်။

ဆာ့ဆာ့၏ ကျောင်းဝင်ခွင့်ဖောင်၌ အုပ်ထိန်းသူတို့ကို ဆက်သွယ်ရမည့်အချက်အလက်များလည်း ပါဝင်ပြီး ထိုအချက်အလက်ဖြည့်သွင်းရမည့်နေရာ၌ စုန့်နင်ဖုန်းက သူ့စက္ခုကွန်ရက်နံပါတ်ကိုသာ ထည့်ထားသည် ။

စုန့်နင်ဖုန်းက ကျင့်ကြံရေးကမ္ဘာ၌ အံ့အားသင့်ဖွယ်ကောင်းသောသူတစ်ယောက်ဖြစ်သော်လည်း ကြယ်တာရာခေတ်သို့ရောက်လာသောအခါ ကျောင်းသား၏အုပ်ထိန်းသူဖြစ်လာပြီး ယခင်ကလိုပင် သူ့တည်ငြိမ်မှုကို မထိန်းထားနိုင်တော့ပေ။ သူက စိတ်အားထက်သန်နေပြီး အလွန်ယဥ်ကျေးစွာ ပြောနေ၏။

" ကျောင်းအုပ်လီ မင်္ဂလာပါ...ကျွန်တော် နာမည်ကိုတော့ ကြားဖူးနေတာ ကြာပါပြီ..."

လီစီးက စုန့်နင်ဖုန်း၏လေသံကိုနားထောင်ပြီးနောက် ပုံမှန်ဖြစ်ပုံရသောကြောင့် ကျောင်းသို့လာခဲ့ရန် ယဥ်ကျေးစွာ ဖိတ်ခေါ်လိုက်သည် ။

စုန့်နင်ဖုန်း ထိတ်လန့်သွား၏ ။

" ဆာ့ဆာ့ကို တစ်ယောက်ယောက်ကများ အနိုင်ကျင့်လို့လား... သူ တစ်ခုခုဖြစ်လို့လား...သူမယက သူတို့ကို ဘာလုပ်လိုက်သေးလဲ...အဲ့ဒါကတော့ မဖြစ်နိုင်ပါဘူး... ဆာ့ဆာ့က အမြဲတမ်း သူ ဘာလုပ်နေသလဲဆိုတာကို ကောင်းကောင်းသိတယ်..."

လီစီး "..."

' ဆာ့ဆာ့ရဲ့ အုပ်ထိန်းသူက တကယ်ပြဿနာရှိနေတာပဲ...'

" အဲ့ဒါက ခင်ဗျားထင်နေသလို မဟုတ်ပါဘူး...သူက ကျောင်းမှာ ဘာပြဿနာမှမရှိပါဘူး...ဒါက သူ့ရဲ့ ကိုယ်ရေးကိုယ်တာတိုးတက်မှုအစီစဥ်နဲ့ ဆိုင်တာပါ...ကျွန်တော် သူ့ရဲ့မိဘနှစ်ယောက်လုံးနဲ့ စကားပြောချင်ပါတယ်...ဒါပေမဲ့ အဲ့ဒါက ဆုံးဖြတ်ချက်ချပေးလို့ရမယ့် တရားဝင်အုပ်ထိန်းသူဆိုရင်တော့ ပိုကောင်းပါတယ်..."

စုန့်နင်ဖုန်း တစ်ဝက်ခန့် စိတ်သက်သာရာရသွား၏။

" ဒါဆို ရပါတယ်... ကျွန်တော် သိပ်မကြာခင် ရောက်အောင်လာခဲ့ပါ့မယ် ကျောင်းအုပ်လီ..."

ဆရာရွှီယီက သီးသန့်ကျင့်ကြံနေသောကြောင့် ဂိုဏ်း၏ကိစ္စကြီးငယ်တို့ကို စုန့်နင်ဖုန်းက ကိုင်တွယ်ခွင့်ရှိသည် ။

လီစီး : ' ဒါကလည်း ငါ အစိုးရိမ်နေဆုံး ကိစ္စပဲလေ...'

စုန့်နင်ဖုန်းကမူ လီစီး၏ရင်ထဲမှ စိုးရိမ်ပူပန်နေမှုများကို မကြားနိုင်ပေ။ သူက ဤအခွင့်အရေးကို ရသည့်အတွက် အလွန်ပျော်ရွှင်နေ၏။ သူက ဆာ့ဆာ့၏ ရှင်သန်နေသော ပတ်ဝန်းကျင်နှင့် သင်ယူရသည့် ပတ်ဝန်းကျင်ကို လေ့လာရန် အချိန်ရသွားသည်။ အကယ်၍ ထိုနေရာတွင် ' ဖုံးကွယ်ထားသောအန္တရာယ်'များ ရှိနေပါက သူတတ်နိုင်သမျှ မြန်မြန်ရှင်းပစ်ရမည် ။

သို့သော် ဆာ့ဆာ့အတွက် စုန့်နင်ဖုန်း လုပ်နေသည့်မက်ခါက ယခုထိ မပြီးသေးပေ ။ မက်ခါထဲတွင် အကောင်းဆုံးအဆင့်က သာလွန်Sအဆင့်ဖြစ်သည်ကို သူသိထားပြီး သူက ဆာ့ဆာ့ကို အကောင်းဆုံးမက်ခါအား တပ်ဆင်ပေးချင်၏ ။

ထိုမက်ခါက ဆာ့ဆာ့နှင့် ကိုက်ညီပါ့မလားဆိုသည်ကိုမူ စိတ်ပူနေစရာမလိုပေ။ ယခင်က ဆာ့ဆာ့အတွက် မှော်လက်နက်လုပ်ပေးရန် သူက စိတ်ဝိညာဥ်စွမ်းအားမရှိသည့်သူများပါ သုံး၍ရမည့်နည်းလမ်းကို စဥ်းစားခဲ့သည်။ ယခုလည်း အတူတူပင်။ ၎င်းက သူမနဲ့ ကိုက်ညီမှုမရှိပါက ကိုက်ညီအောင် ပြုပြင်ပေးလိုက်မည်ဖြစ်သည်။

သို့သော် စုန့်နင်ဖုန်း အကြီးမားဆုံးပြဿနာတစ်ခုနှင့် ကြုံတွေ့နေရသည်။

သာလွန်Sအဆင့်မက်ခါဆိုသည်က လုပ်ချင်တိုင်း လုပ်၍မရပေ။ ထို့အပြင် အရေးကြီးသောအစိတ်အပိုင်းများနှင့် အတွင်းပိုင်းစွမ်းအင်တို့က စျေးကွက်ထဲ၌ ရှာရန် ခက်ခဲပြီး ဝယ်ယူ၍မရဖြစ်နေ၏ ။

စုန့်နင်ဖုန်းက ဤပြဿနာကိုသတိထားမိသွားသောအခါ သူ့နှလုံးသားက အနည်းငယ်ကြေကွဲသွား၏။ ယခင် သူလက်နက်များ ပြုလုပ်စဥ်က ရှားပါးပစ္စည်းများကြောင့် ခေါင်းကိုက်ရသည်မှာ အလွန်ရှားသည်။

ကျင့်ကြံရေးကမ္ဘာတွင် ထိုက်ယီဂိုဏ်း၏ လွှမ်းမိုးနိုင်စွမ်းက ကြီးမားပြီး သတင်းစကားပျံ့နှံ့သွားသည်နှင့် သူတို့လိုချင်သောပစ္စည်းကိုရှာပေးကာ ငွေလုံလုံလောက်လောက်နှင့် လဲလှယ်ချင်သည့်သူက အပြည့်ပင်။ ၎င်းက အတော်အတန်ရှာရန် ခက်ခဲသည့်ပစ္စည်းဖြစ်နေလျှင်ပင် သူတို့ကိုယ်တိုင်ထွက်ပြီး ရှာဖွေ၍ရသည်။ သို့မဟုတ် သိုလှောင်အိတ်ထဲ၌ ပစ္စည်းမျိုးစုံရှိနေသော ဆရာရွှီယီကို အကူအညီတောင်းနိုင်၏။

ဒါပေမဲ့ အခုကျတော့ရော...

' ကမ္ဘာကြီးကို ကြေညာပါတယ် ..ငါအဲ့ဒါကို လိုအပ်နေတယ်လို့...'

တစ်ချက်ကြည့်ဖို့ပင် ပျင်းနေသော အခြားသူများ: ' နင်က ဘယ်သူတုန်းဟ…'

ထို့ကြောင့် စုန့်နင်ဖုန်းမှာ အချိန်တစ်ခုခန့်အထိ ရပ်တန့်ထားရသည်။ ထို့နောက် သူက အဆင့်မြင့်မက်ခါထက် မနိမ့်သောဒီဇိုင်းပြန်ဆွဲနိုင်မည်ထင်ရသည့် ပစ္စည်းအချို့ကို တစ်ဖက်လမ်းမှ ဝယ်လိုက်သည်။

သို့သော် ဤကမ္ဘာက ရုပ်ဝတ္ထုပစ္စည်းများ အလွန်ပေါများ လွန်းပြီး ကျယ်ပြောသော စကြဝဠာက မရေမတွက်နိုင်သည့် ဓာတ်သတ္တုများလည်းပေးထားသည်။ စမ်းသပ်ရှာဖွေတတ်သော စုန့်နင်ဖုန်း၏ အကျင့်အရ ချက်ချင်း အသုံးဝင်နိုင်သည့် ပစ္စည်းကို သူ ရှာမတွေ့ပေ ။

စုန့်နင်ဖုန်းက ၎င်းကို တွေးမိပြီး ပစ္စည်းပစ္စယပိုပေါသည့် မြို့တော်သို့ သွားလည်ရန် ဆုံးဖြတ်လိုက်သည်။ ထိုနေရာတွင် သင့်တော်သော ပစ္စည်းကို ရှာတွေ့လျှင် မက်ခါကို အပြီးသတ်နိုင်လောက်သည် ။

စုန့်နင်ဖုန်းက အိတ်များထုပ်ပိုးကာ သူ့ဓားနှင့် တစ်ခါတည်းသွားရန် ပြင်နေ၏။ ဤနေရာတွင် starshipလိုမျိုး အများသုံးသယ်ယူပို့ဆောင်ရေးယာဥ်များရှိသော်လည်း သူတစ်ယောက်တည်းရှိနေချိန်၌ ပိုသက်တောင့်သက်သာရှိသည့် ဓားဖြင့်ပျံသွားရသည်ကို သဘောကျနေဆဲပင် ။

သို့သော် ထိုအချိန်တွင် သူ့ဓားအဖျားနားကို တစ်ယောက်ယောက်က လှမ်းဆွဲထား၏။

ရှဲ့ရုန်က သူ့ကို သနားကမားဖြင့် ကြည့်လာ၏ ။

" စီနီယာအစ်ကိုကြီး... ဆာ့ဆာ့ကို သွားရှာမလို့လား...ကျွန်တော့်ကိုလည်း လိုက်ခွင့်ပေးလေ...ဆာ့ဆာ့နဲ့ကျွန်တော် မတွေ့ရတာကြာနေပြီ..သူလည်း ကျွန်တော့်ကို သတိရနေမှာ သေချာတယ်..."

စုန့်နင်ဖုန်းက အမူအရာကင်းမဲ့စွာဖြင့် သူ့ကို ကန်ချလိုက်သည် ။

" မရဘူး...အရင်တစ်ခေါက်က သူ့အတွက် မင်းစောင့်ရှောက်ပေးမယ့်အဖွဲ့ ထည့်ပေးလိုက်တယ်လေ... သူက အခုမင်းနဲ့အတူတူရှိရမှာတောင် ကြောက်နေလောက်ပြီ... မင်းကိုသိတဲ့သူတွေက အချင်းချင်းလည်း သိနေမှာကို သူက ကြောက်နေတာ...အဲ့ဒါက အရမ်းရှက်ဖို့ကောင်းတာပဲလို့တောင် သူကပြောသေးတယ်..."

" အကြီးဆုံးအစ်ကို နေပါဦး... ကျွန်တော့်ကို ခေါ်သွားဖို့ အကြံပေးပါရစေ...အစ်ကိုက အပြင်ဘက်ကမ္ဘာအကြောင်းသိလို့လား...မြို့တော်က အခြေအနေကိုရော သိလို့လား...အစ်ကိုဘာမှ မသိပါဘူး...အစ်ကိုသာ မြို့တော်မှာ အစ်ကို့ဓားနဲ့ ဒီအတိုင်းလျှောက်ပျံနေမယ်ဆိုရင် အစ်ကိုရော ဓားပါ သေချာပေါက် အဖမ်းခံရမှာပဲ...ပြီးတော့ ကျွန်တော်က စတားကွန်ရက်အကြောင်းလည်း သေချာသိထားတော့ အစ်ကို့ကို ကောင်းကောင်းလမ်းညွှန်ပေးလို့ရတယ်... "

ရှဲ့ရုန်က သူ့ကို စကားကြွယ်ပြနေပြီး ၎င်းက တိုက်ရိုက်ထုတ်လွှင့်သည့်အချိန်၌ ပြောရသည်ထက်ပင် ပိုအာပေါက်သေးသည်။

စုန့်နင်ဖုန်း : "တက်လေ…"

💫💫💫

Prev Next