MM Story Teller

Chapter 34

Viewers 2k

💫 Chapter 34

စုန့်နင်ဖုန်း၏ ရက်ရောမှုက တောင့်ခံနိုင်ရန်ခက်ခဲသောကြောင့် ရိုးသားသောလူငယ်လေး လီချန်ယွီမှာ အမြန်တုံ့ပြန်လိုက်ရသည်။ သို့သော် ဆာ့ဆာ့နှင့်အတူ လေ့ကျင့်ရေးကွင်းသို့သွားသောအခါ သူ မနေနိုင်တော့ဘဲ စိုးရိမ်စွာမေးလိုက်မိသည် ။

" သာ့ရှန်...အကြီးဆုံးစီနီယာဦးလေးက အဆင့်ဘယ်လောက် မက်ခါပညာရှင်လဲ..."

" အဆင့်လား...သူက အခုထိ အဆင့်မရှိသေးပါဘူး...မက်ခါပညာရှင်တွေအတွက် အဆင့်သတ်မှတ်ချက်ဇယားဆိုတာမျိုးရှိသေးတာလား...အကြီးဆုံးစီနီယာအစ်ကိုက လွန်ခဲ့တဲ့ရက်ပိုင်းလောက်ကမှ မက်ခါကို စလေ့လာခဲ့တာလေ...ပြီးတော့ သူ့မှာ အဆင့်သတ်မှတ်ချက်တွေရအောင် လုပ်နေဖို့လည်း အချိန်ရှိမှာ မဟုတ်သေးဘူး..."

လီချန်ယွီ၏ အမူအရာမှာ ဆို့နင့်သွားပုံရလေ၏ ။

" သာ့ရှန်...ကျွန်တော်အခုတော့ တကယ်ပဲယုံကြည်သွားပြီ...သာ့ရှန်တို့ရဲ့ဆက်ဆံရေးက တကယ်ကောင်းတာပဲ ဖြစ်မယ်..."

ဆာ့ဆာ့က ပျော်ရွှင်စွာပြောလာ၏ ။

" ဟားဟား...ကျွန်မ ရှင့်ကို ပြောသားပဲ...ကျွန်မတို့ဂိုဏ်းရဲ့ဆက်ဆံရေးက တကယ်ရိုးရှင်းပြီး တကယ်ကောင်းပါတယ်ဆို...ဒီလိုသဟဇာတဖြစ်တဲ့လေထုက တကယ်ခံစားရလွယ်ကူတယ်..."

လီချန်ယွီမှာ ခါးသီးစွာဖြင့် ပြောလာ၏ ။

" ဟုတ်ပါတယ်...အဲ့ဒီလို ကောင်းမွန်တဲ့ဆက်ဆံရေးကြောင့်သာ မဟုတ်ရင် မင်းကိုယ်မင်း အဆိပ်နဲ့စမ်းသပ်ဖို့ လိုလားနေမှာမဟုတ်ဘူးလေ..."

ဆာ့ဆာ့ : "...."

" အဟမ်း...အဟမ်း ...အကြီးဆုံးစီနီယာအစ်ကိုကို ရှင်နားမလည်သေးပါဘူး... သူက တကယ်ယုံကြည်စိတ်ချရတဲ့သူ...ပြီးတော့ သူလုပ်တာမှန်သမျှက အရည်အသွေးမြင့်တဲ့အရာတွေပဲဆိုတာကို အာမခံတယ်...ကျွန်မ ရှင့်ကို နောက်ကျရင် သရုပ်ပြမယ်...အဲ့ကျရင် ရှင်သိလာမှာပါ..."

လီချန်ယွီ သူ့ဘာသာတွေးလိုက်မိသည်။

'သူ့ရဲ့ အမြင်အာရုံမှာ တစ်ခုခုကွယ်နေတာများလား...'

မက်ခါပညာရှင်များက ပြုလုပ်သော မက်ခါများပင်လျှင် ရောင်းချခြင်းမပြုမီ အမျိုးမျိုးသော စမ်းသပ်စစ်ဆေးမှုများ ပြုလုပ်ကြရသည်။

မက်ခါအများစု၏ ခန့်မှန်းခြေအဆင့်ကို အဓိကအားဖြင့် စွမ်းအင်ဗဟိုချက်ကိုကြည့်ကာ အလွယ်တကူခွဲခြားနိုင်သည်။ သို့သော် ဆာ့ဆာ့ကို စုန့်နင်ဖုန်းပေးသော မက်ခါ၏ အဆင့်ကိုတော့ အမှန်တကယ်သတ်မှတ်၍မရချေ။

ကျန်းဝူရွှမ်းက သူ့နောက်လိုက်လာပြီး ဆာ့ဆာ့ကို ပြောလိုက်သည် ။

" ဒေါ်လေး...ဆရာက တတိယဦးလေးရဲ့ကိစ္စတွေကို ကိုင်တွယ်ဖို့သွားတယ်...ဒါကြောင့် သူက ကျုပ်ကို ဒေါ်လေးအတွက် စမ်းသပ်ချက်ဒေတာတွေ စစ်ဆေးခိုင်းလိုက်တယ်..."

" ကောင်းပါပြီ..."

အထူးအခြေအနေတစ်ရပ်မရှိလျှင် အကယ်ဒမီကျောင်းက လူသစ်များအတွက် တစ်ဦးတည်းလေ့ကျင့်ရေးကွင်း စီစဥ်ပေးထားခြင်းမျိုးမရှိပေ။ အတန်းတစ်တန်းစီအတွက် လေ့ကျင့်ရေးကွင်းတစ်ကွင်းသာ ပေးထား၏။ ဆာ့ဆာ့က အတန်း၏ လေ့ကျင့်ရေးကွင်းသို့ ရောက်သောအခါ အထဲ၌ အခြားသူများရှိနေပြီးသား ဖြစ်သည်။ သူတို့ အံ့အားသင့်မသွားမိပေ။ မက်ခါမေဂျာရှိလူများက ပုံမှန်အားဖြင့် လေ့ကျင့်ရေးလိုက်စားသူများနှင့် တိုက်ခိုက်ရေးမကောင်းဆိုးဝါးများသာဖြစ်သောကြောင့် လေ့ကျင့်ရေးကွင်းထဲတွင် လူတစ်ယောက်မှ ရှိမနေလျှင်သာ ထူးဆန်းနေလိမ့်မည်။ မည်သို့ပင်ဖြစ်စေ ကွင်းက အလုံအလောက်ကျယ်ဝန်းသောကြောင့် တစ်ယောက်နှင့် တစ်ယောက် လုနေစရာမလိုပေ။

သူမ၏ ဗီဇအဆင့်နှင့် စိတ်ဝိညာဥ်ပင်လယ်အဆင့်အကြောင်းက အကယ်ဒမီကျောင်းတွင် ပျံ့နှံ့နေသည်ကို ဆာ့ဆာ့တစ်ယောက်သာ မသိသေးခြင်းဖြစ်သည်။ သူမက အခြားသူများကို အာရုံမစိုက်သော်လည်း အခြားသူများက သူမကို အာရုံစိုက်နေ၏။

SS အဆင့်လူသစ်တစ်ယောက်ပေါ်ထွက်လာခြင်းက S+နှစ်ထပ်ကွမ်းအဆင့် ပေါ်ထွက်လာခြင်းလောက် ဂယက်ရိုက်စေမည်မဟုတ်သော်လည်း လူများ၏အာရုံကို ဆွဲဆောင်ရန် လုံလောက်သည်။

[T/N - Rankတွေ ရှုပ်သွားမှာစိုးလို့ ရှင်းပြချင်လို့ပါ

ဆာ့ဆာ့ရဲ့လက်ရှိအဆင့်က Double S rank - SS အဆင့်ပါ

Double S+ rankကမှ S+ နှစ်ထပ်ကွမ်းအဆင့်ပါ အဲ့၂ခုကို တူတယ်ထင်သွားကြမှာစိုးလို့ပါ😁]

မက်ခါတိုက်ခိုက်ရေးအတန်းမှ လူအားလုံးက ဆာ့ဆာ့၏ အကြောင်းကို သိချင်နေကြသော်လည်း သူမက အသစ်ပြောင်းလာသော ကျောင်းသူဖြစ်ပြီး လီချန်ယွီမှလွဲ၍ သူမနှင့် ရင်းနှီးသည့်အတန်းဖော်ဆိုလည်း မည်သူမှမရှိချေ။ ထို့အပြင် အားလုံးက သူမနှင့် ရင်းနှီးအောင် မည်သို့လုပ်ရမည်မသိ ဖြစ်နေ၏။ အားလုံးက အခြေအနေကိုသာ စောင့်ကြည့်နေကြသည် ။

ဆာ့ဆာ့နှင့်အခြားသူများ ကွင်းထဲသို့ဝင်လာသည်နှင့် ဒန်းနစ်က သူတို့ဆီသို့ လျှောက်လာ၏။ သူက လီချန်ယွီ နှင့် ဆာ့ဆာ့ကိုကြည့်ကာ ပြောလိုက်သည်။

" မင်းရဲ့ အဆင့်နဲ့ဆိုရင် ကိုယ့်ကိုယ်ကိုယ်နှိမ့်ချပြီး သူနဲ့ လျှောက်သွားမနေသင့်ဘူး...သန်မာတဲ့သူတွေက သန်မာတဲ့သူတွေနဲ့ပဲ အချင်းချင်းသူငယ်ချင်းလုပ်သင့်တာ..."

၎င်းကလည်း တော်တော်များများတွေးနေသည့်အရာပင်။ လီချန်ယွီမှာ မကြာခင်က ပြန်လည်တိုက်ခိုက်သည့်လက္ခဏာများ ပြခဲ့သော်လည်း သူ၏ အရည်အချင်းအဆင့်က ထိုနေရာမှာသာ ရှိနေဆဲဖြစ်သည်။ ထို့အပြင် နံရံကို ထိုးဖောက်နိုင်သည့် အခွင့်အရေးကလည်း အလွန်နည်း၏။ ဆာ့ဆာ့၏ အရည်အချင်းနှင့်ဆိုလျှင် အနာဂတ်က အလွန်တောက်ပနေ၍ လီချန်ယွီလိုလူမျိုးနှင့် ပေါင်းနေစရာပင် မလိုတော့ချေ။

' တကယ်လို့ သူက လေ့လာမှုကိုအစပျိုးဖို့အတွက် အရည်အချင်းရှိတဲ့သူတစ်ယောက်ကို ရှာနေတာဆိုရင်တောင် အဲ့ဒီလိုလူမျိုးကို သွားမရှာသင့်ဘူး...'

အရည်အချင်းရှိသူများက ပိုတိုးတက်အောင် အရည်အချင်းရှိသည့်သူအချင်းအချင်းသာ ပေါင်းသင်းဆက်ဆံသင့်သည်။ ဥပမာအားဖြင့် ဟယ့်ချောင်ယွမ်ကဲ့သို့သော ပါရမီရှင်များ၏ ချဥ်းကပ်ပုံကို ကြည့်သင့်သည် ။

ဆာ့ဆာ့ တောင့်တင်းသွား၏ ။

" ဒါဆို ငါက ဘယ်သူနဲ့များ လျှောက်သွားသင့်တာလဲ...နင်နဲ့လား..."

" သေချာတာပေါ့...ဘာပဲဖြစ်ဖြစ် ငါက လီချန်ယွီထက်တော့ သာတာပဲလေ..."

သူက ထိပ်တန်းမဟုတ်သော်လည်း သူ့အရည်အချင်းက အလယ်အလတ်တန်း၏ အထက်ဆင့်ခန့်ရှိပြီး လီချန်ယွီထက် သာပေ၏ ။ ထို့အပြင် သူက ဝဒ်ဆန်မိသားစုမှလာခြင်းဖြစ်ပြီး သာမန်သာဖြစ်သည့် လီချန်ယွီလိုလူမျိုး မယှဥ်နိုင်လောက်သော မိသားစုနောက်ခံအင်အားရှိသည်။

သို့သော် ဆာ့ဆာ့က ဆက်ပြောလိုက်သည် ။

" ဒါပေမဲ့ ငါမှတ်မိသလောက်ကတော့ နင့်ကိုနောက်ဆုံးတစ်ခေါက် အနိုင်ယူသွားတဲ့သူက လီချန်ယွီပါ... နင်က သူနဲ့တောင်မယှဥ်နိုင်တာ သူကအရည်အချင်းမမှီဘူးလို့ နင်ဘယ်လိုတောင် ပြောနိုင်ရတာလဲ..."

" နင်က အရမ်းသာမန်ကာလျှံကာလေးဖြစ်နေတာတောင် ဘယ်လိုလုပ် အရမ်းယုံကြည်မှုရှိနေနိုင်ရတာလဲ..."

သူမက အမှန်တကယ် နားမလည်နိုင်ဖြစ်နေသောကြောင့် သူမ၏ အသံထဲတွင် သံသယများပါဝင်နေ၏။

ဒန်းနစ်၏မျက်နှာမှာ ချက်ချင်း အစိမ်းရောင်ပြောင်းသွား၏။ လီချန်ယွီနှင့်ပြိုင်ခဲ့သော နောက်ဆုံးပွဲစဥ်က သူ့ကို အရှက်ရစေသည်ဟု ခံယူထားသည်။ ယခုဆာ့ဆာ့က သူ့မျက်နှာကို အဖက်ဆယ်၍မရနိုင်အောင် လုပ်နေသည့် သူများထဲမှ တစ်ဦးဖြစ်နေ၏ ။

" အဲ့ဒါက မတော်တဆပဲ... သူက သူ့ရဲ့လေ့ကျင့်ရေးကို ကူညီပေးဖို့အတွက် ကံကောင်းပြီး ဆရာကောင်းနဲ့ တွေ့သွားရုံပဲလေ... ဒါပေမဲ့ ကံကောင်းမှုဆိုတာက တာရှည်ခံမှာ မဟုတ်ဘူး...နောက်တစ်ခါကျရင် ငါက သူ့ကို ဂုဏ်သိက္ခာရှိရှိ အနိုင်ယူပြမယ်..."

ဆာ့ဆာ့က တစ်ခုခုကို သတိထားမိသွားသည့်အလား သူ့ကိုပြောလာ၏ ။

" နင်မှားနေပြီ...သူက အမြဲတမ်း ကံကောင်းနေမှာ...ဘာလို့လဲဆိုတော့ ငါက သူ့ကို အမြဲတမ်းသင်ပေးနေမှာ မို့လို့လေ..."

" ငါက မင်းအကြောင်း ပြောနေတာမဟုတ်..."

ဒန်းနစ်က ပြောနေရင်း ရုတ်တရက် တန့်သွား၏ ။

" မဟုတ်မှလွဲရော...စတားကွန်ရက်ပေါ်က ဆရာဆိုတာ မင်းလား..."

နောက်ပိုင်းတွင် ဒန်းနစ်လည်း ထိုဆရာဆိုသူနှင့် ဆက်သွယ်နိုင်ရန် ကြိုးစားခဲ့သည်။ သူသာ ထိုလူကို ပိုက်ဆံလုံလုံလောက်လောက်ပစ်ပေးလိုက်ပြီး သူ့စိတ်ရင်းကိုသာ ပြသလိုက်မည်ဆိုလျှင် ထိုလူက လီချန်ယွီကိုသာ သင်ပေးပြီး သူ့ကို မသင်ပေးသည်က မဖြစ်နိုင်ဟု တွေးခဲ့မိသည်။

သို့သော် ထိုအချိန်အတွင်း ဆာ့ဆာ့က ကျောင်းနှင့် အလုပ်များနေပြီး စတားကွန်ရက်ထဲသို့ မဝင်ဖြစ်သောကြောင့် သူက ဆာ့ဆာ့နှင့် ဆက်သွယ်၍မရခဲ့ပေ ။

ဆာ့ဆာ့၏ တိုက်ခိုက်သည့်နည်းစနစ်က လီချန်ယွီ၏ ပုံစံနှင့် အမှန်တကယ်ဆင်နေသော်လည်း သူတို့နှစ်ယောက်လုံး စတားကွန်ရက်ပေါ်ရှိ ဆရာကို အတုခိုးနေခြင်းဖြစ်မည်ဟု ဒန်းနစ် တွေးခဲ့မိသည်။ ထိုအချိန်က လူတစ်ယောက်၏ လှုပ်ရှားမှုဟန်နှင့် အကွက်များကို လူအများက အမှန်ပင် အတုခိုးခဲ့ကြည်။

အဘယ်ကြောင့်ဆိုသော် ဆာ့ဆာ့ကို လူသစ်လေးအဖြစ်သာ သိကြသေးချိန်၌ စတားကွန်ရက်ပေါ်ရှိ ဆရာကြီးကမူ အတော်လေးခေတ်မီဆန်းပြားသည့် တိုက်ခိုက်ရေးစတိုင်မျိုး ရှိပုံပေါ်နေသည်။

" အေးလေ...ငါနင့်ကိုပြောသားပဲ...ငါအရင်က စတားကွန်ရက်ပေါ်မှာ မက်ခါမောင်းဖူးပါတယ်ဆို..."

ဆာ့ဆာ့က ပုခုံးသာ လှုပ်ပြလိုက်သည်။ သူမ အစကတည်းက အမှန်များသာပြောခဲ့သော်လည်း မည်သူကမှ မယုံခဲ့ပေ ။

ကြည့်လေ...ငါက အခုလည်း အမှန်တိုင်းပြောနေတာပဲ... ဒါပေမဲ့ ဒန်းနစ်က နားမလည်နိုင်သလိုမျိုး ' မဖြစ်နိုင်တာ...မဖြစ်နိုင်တာ ...' ဆိုပြီးတော့ပဲ ပြောနေတာလေ...

" နင်က အမှန်တရားကို လက်မခံနိုင်လို့သာ နင့်အတွက် ဘယ်အရာကမှ မဖြစ်နိုင်ဘူးဖြစ်နေတာ..."

ဆာ့ဆာ့က ဤသို့ပြောကာ လီချန်ယွီနှင့်အတူ အဝေးသို့ထွက်သွား၏ ။

ဒန်းနစ်လိုလူမျိုးများက ဆာ့ဆာ့အတွက် တွေ့မြင်နေကျဖြစ်၏။ သူတို့က ပါရမီစွမ်းဆောင်ရည်ကိုသာ မြင်တတ်ကြသူဖြစ်ပြီး စာသင်နှစ်ဝက်မှ အနောက်တံခါးကဝင်လာသော ဆာ့ဆာ့မှာ ပါရမီရှင်ဖြစ်နေကြောင်းကိုပင် လက်ခံရန် တွန့်ဆုတ်နေကြသည်။ သို့သော် ဆာ့ဆာ့က SSအဆင့်ရှိသည်ဟူသော စကားက ပျံ့သွားပြီးနောက် သူမက ကျန့်ချင်းကို အနိုင်ယူလိုက်လျှင်ပင် ပုံမှန်ဟု ယူဆသွားကြ၏။ သူတို့က အဆင့်တစ်ခုချင်းစီတိုင်း၌ လူများမှာ ပုံသေလုပ်ဆောင်နိုင်စွမ်းကိုယ်စီရှိကြမည်ဟု သတ်မှတ်ထားကြပြီး လူတစ်ယောက်က သူတို့၏ ခံယူချက်ကို ချိုးဖောက်လိုက်သည်နှင့် ၎င်းက အလိမ်အညာဖြစ်သွားပြန်၏။

သူတို့က လီချန်ယွီကို ပုံမှန်အားဖြင့် အထင်သေးကြသည်။ ၎င်းက ကျင့်ကြံရေးကမ္ဘာတွင် စိတ်ဝိညာဥ်ရင်းမြစ်မရှိသည့် ဆာ့ဆာ့ကို အထင်သေးကြသည့်သူများကဲ့သို့ပင်။

သူတို့၏ စိတ်နေသဘောထားက မည်သို့ရှိကြောင်း ဆာ့ဆာ့သိသည်။ သို့သော် သူတို့၏ ထိုကဲ့သို့ စိတ်နေသဘောထားမျိုးကို သူမက ခွင့်လွှတ်နားလည်ပေးနေမည် မဟုတ်ပေ ။ ကျင့်ကြံရေးကမ္ဘာ၌ သူမကြုံတွေ့လာရသည်များကို လီချန်ယွီကို ထပ်ပြီးခံစားခွင့်ပေးမည်မဟုတ်ချေ ။

ဝေးဝေးမရောက်မီမှာပင် ဆာ့ဆာ့က လီချန်ယွီကို ပြောလိုက်သည် ။

" ရှင်ကြားလိုက်တယ်မလား...အဲ့ဒီကောင်က ရှင့်ကို နောက်တစ်ကြိမ် အနိုင်ယူချင်နေတုန်းပဲ...သူ့ကို အဲ့ဒီလို လုပ်ဖို့ အခွင့်အရေးမပေးလိုက်နဲ့..."

" ဟုတ်ကဲ့…"

လီချန်ယွီက စိတ်ပိုင်းဖြတ်ထားလျက် ပြန်ဖြေလိုက်သည်။

သူတို့နှစ်ယောက် အပြန်အလှန်ပြောနေသည့်စကားများက ဒန်းနစ်နားထဲရောက်သွား၏။ ၎င်းက သူ့ကို အနိုင်ယူရန် သူတို့အတွက်က အလွန်ရိုးရှင်းလွယ်ကူသည့် ကိစ္စတစ်ခုအလားပင်။ ထိုအရှက်ရမှုက ဒန်းနစ်၏မျက်နှာကို ယင်ကောင်မြိုချလိုက်မိသလိုပင် ကြည့်ရဆိုးသွားစေ၏။

ဆာ့ဆာ့က ဤကိစ္စအသေးအဖွဲလေးကို စိတ်ထဲထားမနေပေ။ သူမက မက်ခါကိုထုတ်ကာ အသားကျအောင်လေ့ကျင့်ကြည့်ရန် ပြင်နေချိန်၌ လေ့ကျင့်ရေးကွင်းထဲတွင် သူတို့ပွဲစဥ်ကိုကစားနေကြသော လူနှစ်ယောက်က ဆာ့ဆာ့ကို ချဥ်းကပ်လာ၏။

" မင်းက ဆာ့ဆာ့လား...ငါ့ကိုယ်ငါ အရင်ဆုံးမိတ်ဆက်ပါရစေ...ငါက မက်ခါတိုက်ခိုက်ရေးအတန်း Aက ကျန်းချန်ပါ ...ငါက မင်းလို SS အဆင့်ရှိတဲ့သူပဲ...မင်းမှာ အခုထိ ကိုယ်ပိုင်မက်ခါမရှိသေးဘူးလို့ ငါကြားထားတယ်...ဒါကြောင့် ငါမင်းကို မက်ခါပညာရှင်တစ်ယောက်နဲ့ မိတ်ဆက်ပေးချင်တယ်..."

ကျန်းချန်က နောက်ထပ်လူတစ်ယောက်ကို ဆာ့ဆာ့၏ ရှေ့သို့ တွန်းပို့ကာ မိတ်ဆက်ပေးလိုက်သည်။

" ဒါက ကျန်းချင်...Sအဆင့် စိတ်ဝိညာဥ်ပင်လယ်အဆင့် နဲ့ Aအဆင့် ဗီဇအဆင့်ရှိတယ်...သူက အခုမှ A+အဆင့်မက်ခါပဲလုပ်နိုင်သေးတယ်ဆိုပေမဲ့ အနာဂတ်မှာ Sအဆင့် မက်ခါပညာရှင် ဖြစ်လာနိုင်ချေအများကြီးရှိပါတယ်...သူက မင်းကို မက်ခါတွေနဲ့ပတ်သက်လို့ ကူညီပေးနိုင်ပြီး နောက်ပိုင်းကျရင် မင်းတို့အချင်းချင်း တိုးတက်အောင်ကူညီပေးလို့ရတာပေါ့..."

ကျန်းမိသားစုမှာ ဟယ့်ချောင်ယွမ်၏ဟယ့်မိသားစုလိုပင် ဂုဏ်သတင်းကြီးပြီး အဆင့်မြင့်မက်ခါတိုက်ခိုက်ရေးသမားများနှင့် မက်ခါပညာရှင်များကို မွေးထုတ်ထားသည်။ ထိုမိသားစုအတွက်က မက်ခါတိုက်ခိုက်ရေးသမားများ နှင့် မက်ခါပညာရှင်များ ပိုများလေ ပိုကောင်းလေဖြစ်သည် ။

ထို့ကြောင့် မက်ခါများက ငွေဖြုန်းတီးရာကျနေလျှင်ပင် မက်ခါတိုက်ခိုက်ရေးသမားများအတွက် သူတို့မှာ ငွေပြတ်လပ်မနေသလို ထိုသူများအတွက် အလကားပေးချင်နေကြသည့် သူများက အမြဲတမ်းရှိနေသည်။

ထို့ကြောင့် ဆာ့ဆာ့၏အဆင့်နှင့်ပတ်သက်၍ သတင်းစကားပျံ့နှံ့သွားသည်နှင့် တစ်ပြိုင်နက် ကျန်းချန်က သူမကို ချဥ်းကပ်ကာ သူ့ဘက်ပါအောင်ဆွယ်ရန် လုပ်နေ၏။

ကျန်းမိသားစုက ကောင်းမွန်သည့်ကမ်းလှမ်းချက်ကို ပေးလာသည်။ အသက်အရွယ်တူတူလောက်ဖြစ်ပြီး အဆင့်လည်းအတူတူဖြစ်သည့် မက်ခါပညာရှင်နှင့်အတူ တိုးတက်အောင်လုပ်ရခြင်းက အနာဂတ်တွင် ပိုပြီးသင့်တော်ကိုက်

ညီသည့် မက်ခါများရလာနိုင်ပြီး ဆာ့ဆာ့လည်း သူမနှင့်ကိုက်ညီသည့် မက်ခ့ကိုရှာရန်အတွက် စိတ်ပူနေစရာလိုမည် မဟုတ်တော့ပေ။

💫💫💫

Prev Next