MM Story Teller

Chapter 36

Viewers 2k

💫 Chapter 36

ကျန်းချန်၏စွမ်းအင်ဓားက ဆာ့ဆာ့၏ စွမ်းအင်ဗဟိုချက်ကို တည့်တည့်ချိန်ရွယ်လာ၏။ နောက်တစ်စက္ကန့်တွင် သူ့စိတ်ထဲ၌ တုန်လှုပ်သွားမိသည်။

' မဟုတ်သေးပါဘူး...တစ်ခုခုတော့မှားနေပြီ...ဓားက မက်ခါကို ထိုးဖောက်မသွားဘူး...'

ထို့နောက် သူထိုးဖောက်လိုက်သောမက်ခါက ပျောက်ကွယ်သွားပြီး တစ္ဆေသရဲကို မြင်လိုက်ရသည့်အလားပင်။

' ဒါက ဘယ်လိုလုပ်ဖြစ်နိုင်မှာလဲ...'

' အဲ့ဒီလိုဖြစ်ဖို့ဆိုရင် ဘယ်လောက်တောင် လျင်မြန်နေမှာ ရမှာလဲ...'

ကျန်းချန်မှာ သေချာစဥ်းစားနေရန်ပင် အချိန်မရဘဲ ဆာ့ဆာ့၏ သေစေနိုင်လောက်သောတိုက်ခိုက်မှုကို ရှောင်ရှားရန်အတွက် ထိုအနေအထားမှ ရှောင်တိမ်းလိုက်ရသည်။ သို့သော် တစ်ချိန်တည်းမှာပင် သူ့မက်ခါ၏ ညာဘက်လက်က ဆာ့ဆာ့၏ဓားဖြင့် ခုတ်ပိုင်းခံလိုက်ရသည် ။

မက်ခါပင်မထိန်းချုပ်ရေးစနစ်က သူ့ကို သတိပေးလာ၏။

' မက်ခါပျက်စီးဆုံးရှုံးမှု : 10% '

ကျန်းချန် မယုံကြည်နိုင်ဖြစ်သွား၏။ အခြေခံသုံးဓားများ၏ ထိခိုက်နိုင်စွမ်းက အဆင့်မြင့်မက်ခါလက်နက်များနှင့် ကွာခြားသောကြောင့် ၎င်းကို အခြေခံသုံးမက်ခါများ၌သာ တွေ့ရတတ်သည်။ အထူးသဖြင့် သူ့မက်ခါ 'လေပွေ' ဆိုလျှင် Sအဆင့်ရှိ မက်ခါဖြစ်ပြီး ခုခံနိုင်စွမ်းက ပြောစရာပင် မလိုတော့ချေ။

ဆာ့ဆာ့၏ ကိုယ်ပိုင်ရုပ်ပိုင်းဆိုင်ရာအင်အားက ၎င်း၏ တိုက်ခိုက်စွမ်းအားကို တိုးမြှင့်ပေးသော်လည်း အကန့်အသတ်နှင့်သာဖြစ်သည်။

' ညာဘက်လက်က အဓိကမဟုတ်ဘူး...ဒါပေမဲ့ သူက ဘယ်လိုလုပ်ပြီးတော့များ မက်ခါရဲ့ 10%ကို တန်းပြီးတော့ ထိခိုက်အောင်လုပ်လိုက်တာလဲ...'

ပြန်လည်တိုက်ခိုက်ခြင်းက လျှပ်တစ်ပြက်အတွင်း ထွက်ပေါ်လာ၏။

ကျန်းချန်က ဆာ့ဆာ့၏ ပထမဆုံးတိုက်ကွက်ကို ရှောင်တိမ်းလိုက်ပြီး သူပြန်ပြီး ဟန်ချက်မညီနိုင်မီ ဆာ့ဆာ့က သူ့ကို နောက်တစ်ဖန်တိုက်ခိုက်လာပြန်၏။

ကျန်းချန်မှာ မသိစိတ်ဖြင့် ပြန်တိုက်ခိုက်ချင်နေသော်လည်း ဆာ့ဆာ့ရှိနေသည့်နေရာကို သူ အတိအကျမခန့်မှန်းနိုင်သလို ခံစားမိပြီး သူ့တိုက်ခိုက်မှုက အရာမရောက်ဖြစ်နေ၏။

ကျန်းချန်မှာ မတတ်သာတော့ဘဲ ဆက်ပြီးသာ ရှောင်တိမ်းနေရသည်။ သူက စွမ်းအင်ဗဟိုချက်ကို ကာကွယ်ရန်လုပ်နေသော်လည်း နောက်တစ်ခါထပ်ပြီး သူ့ညာခြေထောက်ကို တိုက်ခိုက်ခံလိုက်ရသည် ။

' မက်ခါပျက်စီးဆုံးရှုံးမှု : 25% '

ကျန်းချန်၏ စိတ်မှာ ချောက်နက်ထဲသို့ ပြုတ်ကျသွားသည့်အလားပင်။ ဆာ့ဆာ့၏ အနီးကပ်တိုက်ခိုက်မှုများက အလွန်အားပြင်းသည်ကို သူသတိထားမိသည်။ သူမ ၎င်းကို မည်သို့လုပ်သွားကြောင်း သူ မသိသော်ငြား သူနောက်ဆုတ်ပြီး အဝေးမှတိုက်ခိုက်ရန်လုပ်ရမည်။ သူ့တွင် အနိုင်ရရန် အခွင့်အရေးရှိသေးသည်။

သို့သော် နောက်တစ်စက္ကန့်အတွင်းမှာပင် ဆာ့ဆာ့က သူ့ကို တစ်ဖန်ထပ်ပြီး တိုက်ခိုက်လာ၏။

ကျန်းချန်မှာ မှန်ကန်သောနည်းဗျူဟာရှိသော်လည်း ကံမကောင်းစွာဖြင့် သူက အလွန်နှေးနေသည့်အတွက်ကြောင့် ပြီးဆုံးအောင်ပင် မလုပ်လိုက်ရချေ။

ဤတစ်ကြိမ်ထိခိုက်သွားသည်က ဘယ်ဘက်လက်ဖြစ်သည်။

' မက်ခါပျက်စီးဆုံးရှုံးမှူ : 50% '

ပြိုင်ပွဲမှာ ကြောင်က ကြွက်ကို လိုက်နေသလိုပင် ဖြစ်နေပြီး ကြွက်က သူဖြစ်နေသည့်အလား ကျန်းချန်မှာ မျှော်လင့်ချက်ကုန်ခမ်းလာ၏။

ရှောင်တိမ်းနေရသည့် ဖြစ်စဥ်တွင် ကျန်းချန် ရုတ်တရက် မေးခွန်းတစ်ခုကို တွေးလိုက်မိသည်။

' အဲ့ဒါက ငါကိုယ်တိုင်ပဲ ရှောင်တိမ်းလိုက်နိုင်တာလား...ဒါမှမဟုတ် ငါ့ကို တဖြည်းဖြည်းချင်း မစွမ်းဆောင်နိုင်တော့အောင် ဆာ့ဆာ့က တမင်တကာလွှတ်ပေးထားတာလား...'

ဆာ့ဆာ့၏ နတ်ဆိုးတစ်ကောင်လို အလျင် နှင့် လှုပ်ရှားမှုများ၊ ခြေလက်များကို တိတိကျကျတိုက်ခိုက်လာခြင်းများနှင့် အထက်ပိုင်းလှုပ်ရှားမှုများကို တွေးကြည့်လိုက်သောအခါ အဖြေက ပေါ်နေပြီးသားပင်။

အခြားစကားဖြင့်ဆိုလျှင် တစ်ဖန်ပြန်လည်တိုက်ခိုက်နိုင်ရန် မည်သည့်အခါကမှ မျှော်လင့်ချက်မရှိဘဲ သူက အစ မှ အဆုံးထိ ထောက်ချောက်မိသောသားရဲတစ်ကောင်လို ဆာ့ဆာ့အကွက်ထဲတွင် ဝင်နေခဲ့ခြင်းဖြစ်သည်။ သူမက သူ့တုံ့ပြန်မှုများအတိုင်း ပူးပေါင်းလာပြီး သူ့ကိုကစားနေရုံသာ။

အရှုံးက သူ့ကိုကြေကွဲစေခြင်းမဟုတ်ဘဲ မျှော်လင့်ချက်ပျက်သုဥ်းခြင်းကသာ သူ့စိတ်ကို ကြေကွဲစေ၏။

" ငါအရှုံးပေးတယ် ..."

ကျန်းချန်က ရုတ်တရက် ရပ်တန့်ကာ အော်ပြောလိုက်သည်။

သို့သော် ဆာ့ဆာ့က ရပ်တန့်မသွားဘဲ သူမ၏ဓားကို ကျန်းချန်၏အရှေ့သို့ ဆွဲလာ၏ ။

ကျန်းချန်မှာ မသိစိတ်ဖြင့် မျက်စိများမှိတ်ထားမိပြီး စိတ်ထဲတွင် ထိတ်လန့်နေမိသည် ။

" ငါ...ငါအရှုံးကို ဝန်ခံလိုက်ပြီလေ...နင်အဲ့ဒီလို လုပ်လို့မရဘူး..."

အေးစက်သောဓားသွားက မက်ခါ၏ အပေါ်ယံလွှာကို ထိုးဖောက်ကာ သူ့မျက်နှာကို ထိလာ၏။ သို့သော် ထင်ထားသလို ထိုးစိုက်ခံရသည့် နာကျင်မှုက ဖြစ်မလာပေ။ ဆာ့ဆာ့၏ ဓားက သူ့မျက်နှာကို အသာအယာလာပုတ်နေ၏။ သူမက မဲ့ပြုံးပြုံးကာ ပြောလိုက်သည် ။

" နင် ဘာတွေတွေးနေတာလဲ... ငါ တကယ် အဲ့လိုလုပ်မယ်လို့တော့ နင်ထင်နေတာ မဟုတ်ပါဘူးနော်... ပြိုင်ပွဲက အဆုံးသတ်သွားပြီ...ငါက နင့်ကို နောက်ဆုံးတစ်ကြိမ်နှုတ်ဆက်ချင်ရုံပါပဲ..."

ကျန်းချန်မှာ မျက်လုံးပွင့်လာပြီး ဆာ့ဆာ့နှင့် အကြည့်ချင်းမဆုံချင်ဘဲ ဆုံလိုက်ရသည်။ အဘယ်ကြောင့်ဆိုသော် သူယခုလေးတင် လုပ်လိုက်သောအရာက ရှက်စရာကောင်းပြီး ခြောက်လှန့်ခံလိုက်ရသည်ဟူသောလက္ခဏာပင်။

" အိုး...ဒါနဲ့စကားမစပ် နင့်ရဲ့ မက်ခါက တော်တော်လေး စျေးကြီးမယ့်ပုံပဲ... ငါ့အထင်တော့ ပျက်စီးဆုံးရှုံးမှုအတွက် ငါကျခံပေးစရာတော့ မလိုပါဘူးနော် ...ဟုတ်တယ်မလား..."

ထိုအချိန်တွင် မကြာသေးမီက အလွန်ခံ့ညားလှသော 'လေပွေ' မှာ ယခုတွင် မှေးမှိန်သွားသောအပေါ်ယံလွှာများပေါ်၌ အစင်းရာဗရပွဖြစ်နေ၏။သူ၏ မျက်နှာနှင့်ခြေလက်အင်္ဂါတို့မှာလည်း ဆိုးဆိုးရွားရွားကို ထိခိုက်ပျက်စီးထားပြီး တော်တော်ပြန်ပြုပြင်ရမည့် ပုံပေါ်သည်။

ကျန်းချန်က အံကြိတ်ထားရင်း ပြောလိုက်သည်။

" မလိုပါဘူး..."

ဆာ့ဆာ့က စိတ်သက်သာရာရသွားပုံပေါ်ပြီး သူမ၏ အရောင်အဆင်းမထွက်သော်လည်း ထိခိုက်ပျက်စီးထားခြင်းမရှိသည့် မက်ခါကို ပြန်သိမ်းလိုက်သည်။ သူမက ကျန်းဝူရွှမ်းနှင့် လီချန်ယွီ ရှိရာဆီသို့ လျှောက်သွားလိုက်သည်။

" ဒေတာတွေအားလုံး မှတ်တမ်းတင်ပြီးသွားပြီမလား..."

" ဘာပြဿနာမှ မရှိဘူး..."

ကျန်းဝူရွှမ်းက လက်ဟန်ဖြင့် 'အိုကေ' ဟုလုပ်ပြလာ၏ ။

" ဒါဆိုလည်း သွားရအောင်..."

ကျန်းဝူရွှမ်း၏ ဘေးတွင်ရပ်နေသော ကျန်းချင်မှာ မျက်နှာဖြူဖျော့လာပြီး ရေရွတ်လိုက်မိသည် ။

" အဲဒီမက်ခါက အဆင့်ဘယ်လောက်လဲ..."

ကျန်းဝူရွှမ်းက ပုခုံးလှုပ်ကာ ပြောလိုက်သည် ။

" ငါလည်းမသိဘူးလေ...အဲ့ဒါက အဆင့်သတ်မှတ်ထားတာမရှိတဲ့ မက်ခါပဲဖြစ်မှာပေါ့..."

သူက တစ်ခုခုကို မှတ်မိသွားသည့်အလား ထပ်ပြောလိုက်သည် ။

" လူငယ်လေး စိတ်အေးအေးထား...မင်း နည်းနည်းလေး သင်ယူလိုက်နိုင်ရုံနဲ့ စိတ်ကြီးမဝင်နဲ့... ကျန်းလီကိုယ်တိုင်တောင် ငါ့ရှေ့မှာ မင်းလောက်စကားများမှာ မဟုတ်ဘူး... ငါ့ကိုများ အမှိုက်တဲ့လား...တစ်နေ့နေ့ကျရင် မင်းက အဲ့ဒီအမှိုက်ရဲ့ မူပိုင်ခွင့်ကို ယူသုံးနေရတာလည်း ဖြစ်နေနိုင်တယ်နော်..."

ကျန်းဝူရွှမ်းက ကျန်းချင်၏ ပုခုံးကို ပုတ်လိုက်ပြီးနောက် ဆာ့ဆာ့ကို အမှီလိုက်သွား၏ ။

" စီနီယာဒေါ်လေး...ဒီပြိုင်ပွဲက သိပ်လည်းမကောင်းပါဘူးနော် ဟုတ်တယ်မလား... အဲဒါက ဒေါ်လေးရဲ့ အင်အားအကုန်ကိုတောင် ထုတ်သုံးလိုက်ရတဲ့ပုံမပေါ်ဘူး..."

ကြည့်နေသူများမှာ ဆွံ့အသွားကုန်၏ ။

မက်ခါတိုက်ခိုက်ရေးအတန်း Bမှ ကျောင်းသားများက ကျန်းချန် ၊ ကျန်းချင်တို့နှင့် အစေးမကပ်ကြသော်လည်း ဤအချိန်တွင် မည်သူတစ်ဦးတစ်ယောက်ကမှ သူတို့ကို ပြက်ရယ်မပြုကြပေ။

ထိုနှစ်ယောက်နှင့် သူတို့မတည့်သည်ကတစ်ကြောင်းဖြစ်သော်လည်း ကျန်းချန်က အမှန်တကယ်ကြိုးစားခဲ့သည်။ သူသာ အရည်အချင်းမရှိလျှင် သူ့စရိုက်ကြောင့် ယခင်ကတည်းက သေလောက်အောင်ရိုက်ခံနေရလောက်သည်။ သို့သော် သူက ကျကျနနလုပ်တတ်ပြီး အတန်းA၏ အတန်းခေါင်းဆောင်လည်း ဖြစ်သည်။

အတန်းBမှလူများက ကျန်းချန်စိတ်တိုနေသည်ကို တွေ့သော်လည်း သူတို့က ရန်သွားစမနေတော့ပေ။ ထိုအစား သူတို့က ဟယ့်ချောင်ယွမ်ဆီသို့သွားကာ ကျန်းချန်နှင့် တစ်ပွဲလောက်နွှဲရန် ပြောနေကြသည်။ သူတို့သာ ကိုယ်တိုင်သွားပါက ကိုယ့်ကိုယ်ကိုယ်အရူးလုပ်နေသလို ဖြစ်ပေလိမ့်မည်။ ဟယ့်ချောင်ယွမ်သာလျှင် ကျန်းချန်ကို အနိုင်ရနိုင်၏။

သို့သော် ဆာ့ဆာ့ထံတွင် အရိုက်ခံလာရသော ကျန်းချန်မှာ ပြန်တိုက်ရန်ပင် အခွင့်အရေးမရှိတော့ချေ။ အသစ်စက်စက် Sအဆင့် မက်ခါက ထိုတစ်ခဏတွင် စုတ်ပြတ်နေသောသံပစ္စည်းအပုံလိုက်နှင့်ပင် သွားတူနေ၏။ ကျန်းချန်၏ စိတ်အခြေအနေက လုံးဝယိုင်လဲသွားသည်။ ဆာ့ဆာ့ထွက်သွားပြီးသည်အထိ သူက ထိုနေရာတွင်သာ တော်တော်ကြာအောင် ရှိနေသေး၏။

ပွဲကြည့်နေကြသူများမှာ ထိတ်လန့်နေပြီး ရယ်ပင်မရယ်နိုင်ကြချေ။ သူတို့လည်း ယခင်က ဆာ့ဆာ့ ရုတ်တရက်ကျောင်းပြောင်းလာသည်နှင့်ပတ်သက်ပြီး များစွာမတွေးမိခဲ့ကြချေ။ သူမ စစချင်းပြောင်းလာစဥ်က သူမကို တစ်စုံတစ်ယောက်က ရန်စခဲ့သော်လည်း နတ်ဘုရားမလေးများအုပ်စုက ကြားဝင်နှောင့်ယှက်ခဲ့သည်။

ယခု သူတို့ ထိုအကြောင်းအရာကို စဥ်းစားလိုက်မိသောအခါ ဆာ့ဆာ့က ကံကောင်းသွားခြင်းမဟုတ်ဘဲ သူတို့ကသာ မသိနားမလည်ဘဲ အရွယ်မရောက်သေးသည့်သူများဖြစ်နေခြင်းပင်။

ကျန်းချန်ပင်လျှင် သူမကို ပြန်မတိုက်ခိုက်နိုင်ပေ။ အကယ်၍ ဆာ့ဆာ့သာ သူတို့ကို ထိုအချိန်ကတည်းက အမှန်တကယ်သင်ခန်းစာပေးချင်လျှင် သူတို့ ယခု ဤနေရာတွင် ရပ်နေနိုင်ရန်ပင် မသေချာပေ။

အမှန်တွင် ဆာ့ဆာ့နှင့်အတူတိုက်ခိုက်ခဲ့သော ကျန့်ချင်းမှာ သူ့စိတ်ထဲတွင် သူမကို ကျေးဇူးတင်လိုက်မိသည် ။

' သူက အတန်းဖော်ကောင်းပဲ...အနည်းဆုံးတော့ ကျန်းချန်ကို ကန်ထုတ်လိုက်သလိုမျိုး ငါ့ကိုမလုပ်ခဲ့ဘူး...'

' ဒါက Sအဆင့်ရှိတဲ့လူတွေရဲ့ ကမ္ဘာများလား...'

' ဒါက ငါတို့ကို ဟာသလုပ်နေတာပဲ...'

သူတို့က ဟယ့်ချောင်ယွမ်နှင့် ကျန်းချန်ကဲ့သို့ Sအဆင့်ရှိ လူများကိုမြင်ဖူးသော်လည်း ဆာ့ဆာ့ကဲ့သို့ အရှိန်အဝါမျိုးကို မပေးနိုင်ပေ။

ဟယ့်ချောင်ယွမ်၏ နှုတ်ခမ်းများက တစ်ပြေးတည်းဖြစ်သွား၏။ သူက သူ့ကိုယ်သူ ကျန်းချန်ထက် သာနေဆဲဟုတွေးမိသော်လည်း ကျန်းချန်မောင်းသည့် လေပွေနှင့် ရင်ဆိုင်ရလျှင် ဆာ့ဆာ့လိုမျိုး ကစားနိုင်နေလိမ့်မည်ဟုမထင်ပေ။

ဆာ့ဆာ့မှာ ပိုပြီး တည်ငြိမ်လေလေ သူမ၏ အင်အားများကို ပိုပြီး ဖုံးကွယ်ထားနိုင်လေလေပင်။ ဆာ့ဆာ့၏ အကွက်များက မည်မျှကောင်းနေပါစေ အကန့်အသတ်ရှိလိမ့်မည်ဟု ဟယ့်ချောင်ယွမ် တွေးထင်ခဲ့သည်။ ဤအချိန်တွင်မူ သူက ဆာ့ဆာ့၏ပြိုင်ဘက်ပင် မဖြစ်နိုင်လောက်ဟူသည့် ဝိုးတဝါးခံစားချက်မျိုး ဟယ့်ချောင်ယွမ် ခံစားနေရသည်။

ဟယ့်ချောင်ယွမ်မှာ ထိုခံစားချက်ကြောင့် ဒေါသထွက်လာရမည့်အစား စိတ်လှုပ်ရှားလာမိသည် ။

' အဲ့ဒါကြောင့်ပဲ ငါအကယ်ဒမီကျောင်းကို လာခဲ့တာ မဟုတ်ဘူးလား...ဒီလိုပါရမီရှင်တွေလို့ သိကြတဲ့သူတွေကို ရင်ဆိုင်တိုက်ခိုက်ဖို့ပဲလေ...'

မိမိထက်ပိုပြီး အင်အားကြီးသောသူကို အနိုင်ယူခြင်းကသာ ပိုပြီး အင်အားကြီးလာနိုင်သည့် တစ်ခုတည်းသော နည်းလမ်းဖြစ်သည်။

' အဲ့ဒါက ဆာ့ဆာ့ပဲမလား...'

သူလည်း အရှုံးကို မည်သည့်အခါမှ ဝန်ခံမည်မဟုတ်ပေ။ သူက ဆာ့ဆာ့နှင့်သူ၏ လာမည့်ပြိုင်ပွဲအတွက် မျှော်လင့်နေမိသည်။

ဆာ့ဆာ့၏ အင်အားအပြင် ဟယ့်ချောင်ယွမ်၌ နောက်ထပ်စိုးရိမ်စရာတစ်ခုရှိသေးသည်။ ဆာ့ဆာ့၏ မက်ခါပင် ။

ဆာ့ဆာ့ ယခင်က အခြေခံသုံးမက်ခါကိုသာ သုံးနေကျဖြစ်ပြီး ထိုမက်ခါက သူမ၏ လုပ်ဆောင်နိုင်စွမ်းများကို ကန့်သတ်ထားကြောင်း သူပြောနိုင်သည်။ သို့သော် ဝဝဖိုင့်ဖိုင့်ငွေရောင်မက်ခါက သူ့အတွက် အမှန်တကယ် အကဲခတ်ရန်ခက်ခဲနေ၏ ။

ဆာ့ဆာ့၏ အရှိန်က အလွန်လျင်မြန်ပြီး ကျန်းချန်ကို အရိပ်ဖြင့် တိုက်ခိုက်သွားသည့်အလားပင်။ သို့သော် ကျန်းချန်၏ Sအဆင့် စိတ်ဝိညာဥ်စွမ်းအားက ကြွားလုံးထုတ်နေရုံ သပ်သပ်မဟုတ်ပေ။ ထိုမျှလောက် တိုက်ခိုက်မှုကို ဖယ်ရှားရန် လွယ်ကူသင့်သည်။ သို့သော် ကျန်းချန်က အရူးဖြစ်ပြီး အကျိုးရှိသည့် တန်ပြန်တိုက်ခိုက်မှုကို မလုပ်ဘဲ ဆာ့ဆာ့၏ အကွက်ထဲသို့ ဝင်သွားသည် ။

' အဲ့ဒါက ဘယ်လို မက်ခါမျိုးလဲ...'

၎င်းက သူမြင်ဖူးနေကျ အဆင့်မြင့်မက်ခါများနှင့် မတူပေ။ သို့သော် ထိုအချက်က သူတွေ့ဖူးသည့် မက်ခါများထက် ပိုမကောင်းလောက်ဟု မဆိုလိုနိုင်ပေ ။

ဟယ့်မိသားစု၏ မိသားစုဝင်ဖြစ်သော ဟယ့်ချောင်ယွမ်က ဟယ့်နျန်၏ စီနီယာတပည့်ဖြစ်သူ လီလင်နှင့် ကောင်းမွန်သောဆက်ဆံရေးရှိပြီး ပထမဆုံးအနေဖြင့် လီလင်ကို သူဆက်သွယ်မေးမြန်းလိုက်သည် ။

" ဆရာလီလင်...ကျွန်တော် ဒီနေ့ ကျန်းဝူရွှမ်းနဲ့ တွေ့ခဲ့တယ်..."

လီလင်မှာ အတော်ကြာအောင် တိတ်ဆိတ်သွားပြီးမှ ပြောလိုက်သည်။

" သူဒီဇိုင်းဆွဲထားတဲ့ မက်ခါကို မင်းမြင်ပြီးသွားပြီမလား...သူက သူ့ရဲ့ မက်ခါကို မက်ခါအဖွဲ့မှာ တင်သွင်းပြီး မှတ်ပုံတင်ဖို့ လျှောက်ထားပြီးသွားပြီ....သူအဲ့ဒီလောက် ဉာဏ်ကွန့်မြူးနိုင်လိမ့်မယ်လို့ ငါဘယ်တုန်းကမှ မတွေးမိခဲ့ဘူး..."

....

တစ်ချိန်တည်းမှာပင် ကမ္ဘာကြီး တုန်လှုပ်သွားသည်ကို မြင်လိုက်ရသော ကျန်းချင်မှာ ကျန်းလီကို ဆက်သွယ်ရန် မစောင့်နိုင်တော့ပေ။

" အန်တီ အရင်က ကျန်းဝူရွှမ်းကို အဆင့်မြင့်မက်ခါတွေ မလုပ်နိုင်လောက်ဘူးလို့ ပြောခဲ့တယ်မလား..."

ကျန်းလီမှာ ဆုလာဘ်လိုမျိုးမက်ခါပညာရှင်ဖြစ်ပြီး မက်ခါတည်ဆောက်ရာ၌ အထင်ကြီးလောက်စရာကောင်းသော ပညာရေးဖြင့် ပျိုးထောင်ခံခဲ့ရသည်။ သူအထင်သေးခဲ့သော အမှိုက်လိုလူ ကျန်းဝူရွှမ်းက အမှန်တွင် ပါရမီရှင်ဖြစ်နေပြီး သူ့ထက်ပင်ပို၍ အရည်အချင်းရှိနေလိမ့်မည်ဟု သူမထင်ထားခဲ့ပေ။ သူမ နားမလည်နိုင်သည့် စုတ်ပြတ်နေသော မက်ခါက သူမဖန်တီးထားသော Sအဆင့်ရှိမက်ခါ 'လေပွေ' က်ပိုပြီး သာနေသည်ကို သူမ မယုံကြည်နိုင်ဖြစ်နေ၏။

သူ့ကို စိတ်အေးအောင်လုပ်ပေးရန် တစ်ယောက်ယောက်ကို လိုအပ်နေသည် ။

" ကျန်းဝူရွှမ်းနဲ့ မင်းတွေ့ခဲ့ပြီးပြီလား..."

ကျန်းလီက သူ့မေးခွန်းကို တိုက်ရိုက်မဖြေလိုက်ပေ ။

" ဟုတ်ကဲ့..."

" သူ့ကို ဆွယ်ဖို့ နည်းလမ်းရှာထားလိုက်...သူနဲ့ ဟယ့်မိသားစုကြားက ဆက်ဆံရေးက မကောင်းသေးဘူး...သူက သူ့ရဲ့ ဒီဇိုင်းအသစ်ကို မက်ခါအသင်းအဖွဲ့မှာ တင်သွင်းလိုက်ပြီ...ဒီဇိုင်းက အရမ်းအရေးကြီးတယ်...ကျန်းမိသားစုသာ မူပိုင်ခွင့်ကို ရနိုင်မယ်ဆိုရင် ငါတို့မိသားစုရဲ့ အင်အားက အများကြီး ပိုခိုင်မာသွားနိုင်တယ်..."

ကျန်းချင်မှာ မနေနိုင်ဘဲ ပြောလိုက်မိသည် ။

" ဒါပေမဲ့ သူက အမှိုက်သာသာပဲမဟုတ်ဘူးလား...သူ့ရဲ့ အတွေးအခေါ်တွေက ဘာမှအသုံးမဝင်ဘူး..."

" တိတ်စမ်း..."

ကျန်းလီက သူ့ကို တင်းမာစွာ ဖြတ်ပြောလိုက်သည်။

" သူသာ တစ်ခုခုမလုပ်နိုင်ခဲ့ဘူးဆိုရင်တော့ သူက အမှိုက်ပဲပေါ့...ဒါပေမဲ့ သူက တစ်ခုခုကို လုပ်လာပြီးတော့ အဲ့ဒါကလည်း အထင်ကြီးစရာပဲ...မင်းရဲ့ အခုအနေအထားနဲ့ သူ့ကို ဝေဖန်နိုင်ဖို့ အရည်အချင်းမရှိသေးဘူး..."

ကျန်းချန်မှာ ကျန်းဝူရွှမ်း မထွက်သွားမီ သူ့ကိုဘာပြောသွားသည်ကို အမှတ်ရမိသွားသည် ။

' ကျန်းလီကိုယ်တိုင်တောင် ငါ့ရှေ့မှာ မင်းလောက် စကားများမှာမဟုတ်ဘူး...'

" မင်းသူ့ကို ဆန့်ကျင်ခဲ့တာတော့ မဟုတ်ပါဘူးနော်...ထားလိုက်တော့...မင်းတို့ နှစ်ယောက်စလုံး ကျန်းဝူရွှမ်းနဲ့ ဝေးဝေးနေလိုက်...နောက်တစ်ခါကျမှ မင်းတို့အဖေကိုယ်တိုင် သူနဲ့ စကားသွားပြောလိမ့်မယ်..."

ကျန်းချန် : "..."

....

တစ်နေရာ၌ စုန့်နင်ဖုန်းက မာရီယာချီတို၏ရှေ့၌ ထိုင်နေသည် ။

မာရီယာက တစ်ချက်ကြည့်လိုက်ပြီးနောက် ရှဲ့ရုန်လိုက်မလာသည်ကို တွေ့လိုက်ရ၏ ။ သူမလည်း မနေနိုင်ဘဲ သူမဆံပင်ကိုဖွကာ ဆွဲဆောင်မှုရှိသော အပြုံးကို လှစ်ဟပြလိုက်သည် ။

" အိုး...ကြည့်ရတာ ရှဲ့ရုန်က ကျွန်မကို တကယ်ကြောက်သွားပြီး မလာတော့ဘူးနဲ့တူတယ်...ကျွန်မက ရက်စက်တဲ့သားရဲလည်းမဟုတ်ဘူး...ကျွန်မကို လက်ထပ်ရတာ အဲ့လောက်ကြောက်ဖို့ကောင်းလို့လား..."

စုန့်နင်ဖုန်းက စိတ်အားထက်သန်စွာဖြင့် ပြောလိုက်သည် ။

" မိန်းကလေးချီတို...ကျွန်တော့်ညီရဲ့ စကားလုံးတွေနဲ့ အပြုအမူတွေက ခင်ဗျားကို တစ်နည်းနည်းနဲ့ စော်ကားသလိုဖြစ်နေမယ်ဆိုရင် ကျွန်တော်ကပဲ သူ့ကိုယ်စားတောင်းပန်ပါတယ်... ဒါပေမဲ့ သူက မိန်းမတွေနဲ့ ပရောပရည်လုပ်ပြီး အထင်မှားစေတတ်တယ်...သူက တစ်ဖက်လူကို ဒုက္ခရောက်စေလိုတဲ့ စိတ်မျိုးတော့ မရှိပါဘူး...သူပြောသမျှ စကားတွေကို အတည်ကြီး မမှတ်ယူလိုက်ပါနဲ့...ပြီးတော့ သူ့ကိုလည်း ထပ်ပြီး နောက်ပြောင်မနေပါနဲ့တော့..."

ရှဲ့ရုန်က မိန်းကလေးများနှင့် လျှောက်သွားရခြင်းကို ကြိုက်သော်လည်း သူ့တွင် မကောင်းသည့်ရည်ရွယ်ချက် မရှိပေ။သူ့စကားအရဆိုလျှင် သူက မိန်းကလေးများနှင့်ပေါ့ပေါ့ပါးပါးစကားပြောနေရသည်ကို သဘောကျပြီး သူတို့ပျော်ရွှင်နေသည်ကို ကြည့်ရခြင်းကလည်း စိတ်ချမ်းသာရစရာတစ်မျိုးပဲဟုဆို၏။

သူသာ မိန်းကလေးများ၏ ခံစားချက်ကို အမှန်တကယ် ကစားရဲလျှင် ရွှီယီက သူ့ကို ဂိုဏ်းထဲက သေချာပေါက် ကန်ထုတ်ပစ်လိမ့်မည်။

" ရှင်ဘာလို့များ ကျွန်မက သူ့ကိုစနေတယ်လို့ထင်တာလဲ...သူက တကယ်ပဲ တော်တော်လေး စိတ်ဝင်စားဖို့ကောင်းပါတယ်...ပြီးတော့ သူ့ကို ဆုတံဆိပ်လိုခင်ပွန်းမျိုးအဖြစ် သိမ်းထားလိုက်ရင် ကောင်းမယ်လို့ ကျွန်မ တွေးမိတယ်...စကားမစပ် ကျွန်မကို မာရီယာလို့ပဲ ခေါ်ပါ... မိန်းကလေးချီတိုလို့ ခေါ်တာကြီးက နည်းနည်းထူးဆန်းတယ်လေ..."

ထို့နောက် စုန့်နင်ဖုန်းက ပြောလိုက်သည်။

" မိန်းကလေးချီတိုရဲ့ အကျင့်စရိုက်နဲ့အနေအထားအရ တစ်စုံတစ်ယောက်ကို ဖိအားမပေးသင့်ပါဘူး...ခင်ဗျား ဒီမှာ ကျွန်တော်နဲ့ စီးပွားရေးအကြောင်းပြောဖို့ရောက်လာတာမလား...စကားကို ကွေ့ဝိုက်မနေဘဲ လိုရင်းဘဲ ပြောကြရအောင်..."

💫💫💫

Prev Next