MM Story Teller

Chapter 37

Viewers 2k

💫 Chapter 37

ထိုက်ယီဂိုဏ်းက ရိုးရှင်းသော်လည်း စုန့်နင်ဖုန်းမှာ ဂိုဏ်း၏ အကြီးဆုံးစီနီယာအစ်ကိုတစ်ယောက်အနေဖြင့် ကိစ္စမျိုးစုံကို ကိုင်တွယ်ရန်လိုအပ်သည်။ သူ မမြင်ဖူးသည့် လှည့်ကွက်ဆိုသည်မျိုး မရှိပေ။ မာရီယာက ရှဲ့ရုန်ကို သူမ၏မိသားစုထဲသို့ဝင်စေချင်သော်လည်း သူမက စုန့်နင်ဖုန်းနှင့် စီးပွားရေးအကြောင်း ပြောချင်နေသည်။

မာရီယာက သူမမျက်နှာပေါ်ရှိ အပြုံးကို ပြန်သိမ်းကာ ပြောလိုက်သည်။

" မစ္စတာစုန့်က တည့်တိုးဆန်တဲ့သူပဲ...ဒါပေမဲ့ အရင်ဆုံး ကျွန်မ ဘာရှာတွေ့ထားသလဲဆိုတာ ရှင့်ကို အရင်ဆုံးပြပါရစေ..."

" လွန်ခဲ့တဲ့ တစ်လကျော်လောက်တုန်းက B111ဂြိုဟ်ပေါ်မှာ သံလိုက်မုန်တိုင်းတစ်ခုပေါ်လာတယ်...ပြီးတော့ နေရာတော်တော်များများမှာ ဆက်သွယ်ရေးတွေပြတ်တောက်သွားတယ်... ဒါပေမဲ့ ခဏအကြာမှာ ပုံမှန်ပြန်ဖြစ်သွားတာနဲ့ ဆင်ခြေဖုံးမြေရိုင်းမှာ တောင်တစ်လုံးပေါ်လာတာကို ဘယ်သူကမှ သတိမထားမိလိုက်ဘူးလေ... ဓာတ်ရောင်ခြည်လှိုင်းနဲ့ လူတွေရှိနေတာကို ထောက်လှမ်းနိုင်ပေမဲ့ တောင်ပေါ်မှာ ဘာတွေဖြစ်နေလဲဆိုတာကို ဂြိုဟ်တုစောင့်ကြည့်ရေးကတောင် မဖမ်းယူနိုင်ဘူး..."

" လွန်ခဲ့တဲ့ နှစ်ပတ်က ပထမဆုံးဘက်စုံအကယ်ဒမီကျောင်းရဲ့ ဒါရိုက်တာလီစီးက ရုတ်တရက် သုတေသနဌာနကို ဆန်းကြယ်တဲ့ဆေးတစ်မျိုးပို့ပေးခဲ့တယ်... အဲ့ဒီဆေးက ဘာဆိုးကျိုးမှမရှိဘဲ လူတွေရဲ့ ဗီဇအဆင့်နဲ့ စိတ်ဝိညာဥ်ပင်လယ်အဆင့်ကို တိုးမြှင့်ပေးနိုင်တယ်... အဲ့ဒါက ကြယ်တာရာလောကကြီးတစ်ခုလုံးကို သွေးရူးသွေးတန်းဖြစ်စေနိုင်လောက်တယ်... ဒါပေမဲ့ လူတွေ ဘယ်လောက်ပဲ စကားနှိုက်ဖို့ကြိုးစားနေပါစေ...လီစီးက အဲ့ဒီဆေးရဲ့ ဇစ်မြစ်ကို မပြောပြဘူးလေ..."

" မကြာသေးခင်က စီးပွားအရောင်းအဝယ်လုပ်ပြီး ဒုတိယအဆင့်လောက်ရှိတဲ့ လော့မိသားစုက လော့ကျန်းက လူတွေကို ဆေးတချို့ တိတ်တဆိတ်ရောင်းလာတယ်... ပြီးတော့ အဲ့ဒါမတိုင်ခင် လော့ကျန်းက B111ဂြိုဟ်ပေါ်မှာ ရှိနေခဲ့တယ်..."

စုန့်နင်ဖုန်းက တည်ငြိမ်စွာပြောလိုက်သည် ။

" မိန်းကလေးချီတို... ကျွန်တော့်ကို ဒီအကြောင်းအရာတွေနဲ့ လာစမ်းသပ်မနေပါနဲ့...အဲ့ဒီဆေးက ကျွန်တော်တို့ဂိုဏ်းကဆိုတာ ခင်ဗျားကို ပြောပြနိုင်ပါတယ်...အဲ့ဒီတော့ရော..."

သူတို့ဂိုဏ်းကသာ တံခါးများပိတ်ထားပြီး သူတို့ဘာသာနေရန်လုပ်ထားလျှင် အပြင်ဘက်၌ မည်သည့်အရာများ ဖြစ်နေသည်ကို သူတို့လည်း စိတ်ရှုပ်ခံနေစရာမလိုလောက်ပေ။ သူတို့က ဂိုဏ်း၏ပစ္စည်းများကို သူတို့ဘာသာ သိမ်းဆည်းထားရုံသာ။ သို့သော် ဆာ့ဆာ့၏ ကျောင်းဝင်ခွင့်ကြောင့် သူတို့ဂိုဏ်းက အပြင်ဘက်ကမ္ဘာနှင့်အဆက်အဆံများလာ၏။

ပြောင်းလဲမှုများကိုလက်ခံရန် တုံဏှိဘာဝေလုပ်နေမည်ထက်စာလျှင် ကမ္ဘာပေါ်၌ သူတို့ဂိုဏ်း၏ အရှိန်အဝါလွှမ်းမိုးမှုရှိလာအောင် ဖန်တီးသင့်သည်။ ဤနည်းလမ်းဖြင့် သူတို့ဂိုဏ်းက ဝေးလံခေါင်သီသောဂြိုဟ်ပေါ်ကို ရောက်လျှင်ပင် ဂိုဏ်းအပြင်ဘက်၌ သူတို့၏တပည့်များကို မည်သူကမှ အထင်မသေးရဲမည် မဟုတ်တော့ပေ။

၎င်းက ရွှီယီနှင့်သူ ထိုအချိန်က နှစ်ဦးသားသဘောတူခဲ့သည့် နည်းလမ်းဖြစ်သည်။

သက်စောင့်ဆေးနှင့်အတူ ဂိုဏ်း၏အရှိန်အဝါကို တည်ဆောက်ခြင်းက သူတို့၏ ပထမခြေလှမ်းသာဖြစ်ပြီး လော့ကျန်းက အတူတူအလုပ်လုပ်ရန်အတွက် သူတို့ရွေးချယ်ထားသော သူဖြစ်သည်။

စုန့်နင်ဖုန်းက ဂိုဏ်း၏ တည်ရှိမှုကို လူအများသိအောင် ကြေညာရန် မလောသော်လည်း အခြားသူများက သူ့ဆီရောက်လာ၍ သူကလည်း တမင်ဖုံးကွယ်နေတော့မည်မဟုတ်ပေ။ အားလုံးက အနှေးနှင့်အမြန် ထိုက်ယီဂိုဏ်း၏ ကြီးမြတ်သောနာမည်ကို ကြားသိရလိမ့်မည်။

မာရီယာက တိုက်ရိုက်သာပြောလိုက်သည်။

" ကျွန်မ ရှင်နဲ့ စီးပွားရေးလုပ်ချင်တယ်...လော့မိသားစုက Bကြယ်စင်စုမှာ စီးပွားရေး တော်တော်ကျယ်ပြန့်ပေမဲ့လို့ ဖက်ဒရယ်တစ်ခုလုံးမှာတော့ သူတို့ရဲ့ လွှမ်းမိုးမှုက အကန့်အသတ်ရှိတယ်... ချီတိုမိသားစုက ရှင့်အတွက် ရွေးချယ်မှုကောင်းတစ်ခုပဲ... ပြီးတော့ ကျွန်မတို့က ရှင်ကျေနပ်လောက်မဲ့စျေးပေးမှာပါ...ရှင် ကျွန်မတို့နဲ့ ညှိနှိုင်းလို့ရတယ်..."

ဤဆေး၏ နောက်ကွယ်၌ အရေးပါမှုက အလွန်သိသာ၏။ ချီတိုမိသားစုက ငွေပုံပေးပြီး ထောက်ပံ့လာမည်ဆိုလျှင်ပင် သေချာပေါက် အကျိုးအမြတ်က ရှိနေမည်ပင်။

သက်စောင့်ဆေး၏ ကောလဟာလများက မြို့တော်ဂြိုဟ်တွင် ပျံ့နှံ့သွားပြီးနောက် ချီတိုမိသားစုက စတင်စုံစမ်းခဲ့သော်လည်း ကံမကောင်းစွာဖြင့် ဘာတစ်ခုမှ ရှာမတွေ့ခဲ့ပေ။ သူမမှာ အကြံမရှိတော့ဘဲ ရှဲ့ရုန်၏ နောက်ကြောင်းကို စုံစမ်းခိုင်းလိုက်ချိန်မှသာ သဲလွန်စရသွားပြီး အကြောင်းအရာနှစ်ခုကို ချိတ်ဆက်ကြည့်လိုက်မိသည်။ ၎င်းက သေချာပေါက် ကောင်းကင်ဘုံ၏ အကူအညီဖြစ်ပြီး သူမက ထိုကဲ့သို့ အခွင့်အရေးမျိုးကို လုံးဝလက်လွှတ်ခံမည်မဟုတ်ပေ။

ချီတိုမိသားစုကို ဆက်ခံမည့် ရည်မှန်းချက်ကြီးသော အမျိုးသမီးတစ်ယောက်အနေဖြင့် သူမ၏ မျက်လုံးထဲတွင် ရုပ်ရည်ကြည့်ကောင်းခြင်းဆိုသည်က ပဓာနမကျဘဲ အကျိုးအမြတ်များကသာ သူမအတွက် ပိုပြီးဆွဲဆောင်မှုရှိသည် ။

ရှဲ့ရုန်၏ အခြေအနေအမှန်ကို သိသွားသည့်အကြောင်း သူမက မိသားစုအပါအဝင် မည်သူကိုမျှ တစ်လုံးတစ်လေပင် ထုတ်ပြောမည်မဟုတ်ပေ။ မိသားစုက အင်အားကြီးလေလေ ၊ အပြိုင်အဆိုင်က များလေလေပင်။ မာရီယာက ဤအခွင့်အရေးကောင်းကို အခြားသူများဆီ အပါခံမည်မဟုတ်ပေ။

" ငြင်းဖို့လည်း ဆန္ဒမစောပါနဲ့ဦး...သက်စောင့်ဆေးက အရေးကြီးဆုံးပဲ...အဲ့ဒါကို လူတွေ သိပ်မသိကြသေးလို့သာပေါ့...မဟုတ်ရင် လော့မိသားစုရဲ့ အင်အားလောက်နဲ့ အဲ့လိုအရမ်းအရေးကြီးတဲ့ကိစ္စမျိုးကို ကိုင်တွယ်နိုင်မှာ မဟုတ်ဘူး..."

မကောင်းမှုကင်းသော ရာဇဝတ်မှု မရှိပေ။ ၎င်းက တစ်ကမ္ဘာလုံး လက်ခံရမည့် အမှန်တရားသာ။ လော့မိသားစုမှာက အခွင့်အရေးရှိသော်လည်း သူတို့သာ အကျိုးအမြတ်ကို မဝေမျှပေးပါက အနှေးနှင့်အမြန် အခြားမိသားစုများက သူတို့ကို စားသွားလိမ့်မည်။

စုန့်နင်ဖုန်းက သူမ၏ အကွက်များကို မြင်နေသည့်အလား ခပ်ယဲ့ယဲ့သာကြည့်လိုက်သည် ။

" ကျွန်တော်တို့က ဒီမိသားစုကို မထောက်ပံ့ပေးနိုင်လောက်ဘူးလို့ ခင်ဗျားက ထင်နေတာလား... ဒါမှမဟုတ် တစ်စုံတစ်ယောက်က အကွက်ချတာကို ကျွန်တော်တို့က ကြောက်နေလိမ့်မယ်လို့ ထင်နေတာလား..."

သူတို့ဂိုဏ်းမှာ တစ်စုံတစ်ယောက်ကို ကြောက်ရွံ့နေရခြင်းကြောင့် လူများနှင့် အဆက်အဆံမလုပ်ခြင်းမဟုတ်ဘဲ ၎င်းက ကရိကထများလွန်းသောကြောင့်သာ။ သူတို့ ဂိုဏ်း၏ပစ္စည်းများကို ထုတ်ပြခဲ့ခြင်းက သူတို့ကိုယ်တိုင်လုပ်ဝံ့သောကြောင့်သာဖြစ်သည်။ ထ်ိုလူတို့က သူတို့၏ ပိုင်ဆိုင်မှုများကို ထိန်းသိမ်းနိုင်လိမ့်မည်ဟု ယုံကြည်မှုရှိပြီး အကယ်၍ တစ်စုံတစ်ယောက်ကသာ သူတို့ကာကွယ်မှုအောက်တွင်ရှိနေသော မိသားစုကို ထိပါးရဲမည်ဆိုလျှင် ၎င်းက သူတို့ကို ထိပါးလိုက်ခြင်းနှင့် အတူတူဖြစ်သည်။

သူ့အကြည့်အောက်၌ မာရီယာ၏ ဦးရေပြားက စပ်ဖျဉ်းဖျဥ်းဖြစ်နေ၏ ။

သူမက ရာထူးမြင့်သောသူများနှင့် ပြောဆိုဆက်ဆံဖူးပြီး သူမကိုယ်တိုင်က တစ်စုံတစ်ယောက်လာပြီးဖိအားပေးနိုင်လောက်အောင် ဗီဇအဆင့်နှင့်စိတ်ဝိညာဥ်ပင်လယ်အဆင့်နိမ့်နေခြင်းမျိုးမဟုတ်ပေ။ တစ်စုံတစ်ယောက်ကသာ သူမကို လာပြီးဖိအားပေးချင်နေလျှင် ထိုလူကို အစွမ်းအစမရှိသောကြောင့် သူမက လှောင်ရယ်မိမှာပင်။ သို့သော် ဤအချိန်တွင် ထိုတင်းမာမှုက ပျောက်ကွယ်သွားသလိုမျိုး သူမခံစားလိုက်ရသည်။

သို့သော် စုန့်နင်ဖုန်းက ပြန်ပြုံးလိုက်ပြီး သူ့မျက်လုံးထဲရှိ ခြိမ်းခြောက်လိုသော အရိပ်ယောင်များက ပျောက်ကွယ်သွား၏ ။

" သေချာတာပေါ့...မိန်းကလေးချီတိုက စီးပွားရေးအကြောင်း ဆက်ပြီးဆွေးနွေးချင်နေသေးတယ်ဆိုရင်တော့ မဖြစ်နိုင်တာမဟုတ်ပါဘူး..."

မာရီယာက သူမ၏ အရှိန်အဝါများကို ချက်ချင်းလျှော့ချလိုက်သည် ။

" ပြောပါ..."

မာရီယာနှင့် စကားပြောပြီးနောက် စုန့်နင်ဖုန်းက ပြုပြင်စရာရှိသည်များပြုပြင်၍ရအောင် စမ်းသပ်မှုရလဒ်အကြောင်းမေးရန် ပထမဆုံးဘက်စုံအကယ်ဒမီကျောင်းသို့ သွားလိုက်သည် ။

ဆာ့ဆာ့ပင် ဘာမှမပြောရသေးမီ လီချန်ယွီက သူ့ကို အကြီးအကျယ်ဦးညွှတ်လာ၏ ။

" အကြီးဆုံးစီနီယာဦးလေး...ကျွန်တော့်ကို မက်ခါလုပ်ပေးမယ်လို့ ပြောခဲ့တဲ့အတွက် အရင်ဆုံးကျေးဇူးတင်ချင်ပါတယ်...."

' ဝူးဝူးဝူး...'

လီချန်ယွီက ထိုမျှလောက် ကပ်ဖားရပ်ဖားလုပ်တတ်သူမဟုတ်ပေ။ သို့သော် ထိုမျှလောက် ကောင်းသောမက်ခါကို မည်သူက မလိုချင်ဘဲမနေပေ။

ပိုပြီး အင်အားကြီးလာရန်ကို ငြင်းဆိုချင်သည့် မက်ခါတိုက်ခိုက်ရေးသမားမျိုး မရှိသလို မည်သည့် မက်ခါမောင်းနှင်သူကမှလည်း အဆင့်မြင့်မက်ခါ၏ ဆွဲဆောင်မှုကို ငြင်းဆိုနိုင်မည်မဟုတ်ပေ။

လီချန်ယွီက သူရှေ့တွင်ရှိနေသည့် တောင်ကြီးကို သတိမပြုမိသည့်အတွက် တော်တော်နောင်တရမိသည် ။

' ငါဘာလို့များ သာ့ရှန်ရဲ့ စီနီယာအစ်ကိုကြီးကို သံသယဝင်မိရတာလဲ...'

စုန့်နင်ဖုန်း : "...."

' ကောင်းပြီ...မေးနေစရာတောင်မလိုတော့ဘူး...ဒီလောက်ဆိုရင် စမ်းသပ်ချက်ရလဒ်ကို ငါခန့်မှန်းလို့ရနေပြီ...'

*****

မက်ခါအသင်းချုပ်က ဖက်ဒရယ်တွင် တသီးတသန့်နေရာတစ်ခုကို ပိုင်ဆိုင်ထားပြီး သူတို့ရရှိထားသော ဂုဏ်သတင်း ၊ ရာထူးနှင့်အညီ တည်ရှိရမည်ဖြစ်သည်။ အရေးကြီးသော ကိစ္စရပ်များအတွက် သူတို့က မီးစိမ်းကို အသုံးပြုကြသည်။ ကျန်းဝူရွှမ်းက သူ့ဒီဇိုင်းကို မက်ခါအသင်းချုပ်သို့ တင်သွင်းပြီးနောက် ၎င်းကို မြန်မြန်ဆန်ဆန်ပင် စစ်ဆေးပြီး အတည်ပြုပေးလိုက်သည်။

ပင်လယ်ပြာကြယ်စင်ဝေလငါးနှင့် အသက်ပြဒါးရှင်အဆီပေါင်းစပ်မှုက မက်ခါ၏လုပ်ဆောင်နိုင်စွမ်းကို များစွာတိုးမြှင့်ပေးနိုင်လိုက်သည်။ ထို့အပြင် ပင်လယ်ပြာကြယ်စင်ဝေလငါးက ဖမ်းရလွယ်ကူသည့် အဆင့်နိမ့်ဂြိုဟ်သားရဲဖြစ်ပြီး အသက်ပြဒါးရှင်အဆီကလည်း နေ့စဥ်သုံးကျန်းမာရေးဖြည့်စွက်စာတစ်မျိုးဖြစ်သည်။ အဆင့်မြင့်ကုန်ကြမ်းများ ၊ အဆင့်မြင့်ဂြိုဟ်သားရဲပစ္စည်းများဖြင့် ပြုပြင်ရန်လိုအပ်သည့်နေရာ၌ ထိုပစ္စည်းနှစ်ခုဖြင့် အစားထိုးလိုက်သောအခါ လုပ်ဆောင်နိုင်စွမ်းတိုးမြင့်လာသည့်အပြင် ကုန်ကျစရိတ်ကလည်း သက်သာသွားသည်။ ၎င်းက မက်ခါပညာရှင်များ နှင့် မက်ခါတိုက်ခိုက်ရေးသမားများစွာကို အကျိုးပြုပေလိမ့်မည်။

ထို့အပြင် မာကျောသောအရိုးစုနေရာ၌ နူးညံ့သောသားရေဖြင့် အစားထိုးလိုက်ခြင်းက အလွန်စွန့်စားရဲပြီး အမျှော်အမြင်ကြီးပေ၏။ ၎င်းက မက်ခါပညာရှင်များ၏ ကြိုတင်စိတ်ကူးထားသော အကြံဉာဏ်များအတွက် စိန်ခေါ်မှုတစ်ရပ် ဖြစ်ပေလိမ့်မည်။ မက်ခါအသစ်ကို စတင်ချပြလိုက်သောအခါ ကျန်းဝူရွှမ်း၏ ဒီဇိုင်းအမြင်က ပိုကောင်းသည်ဟု တွေးမိကြပြီး သူ့လမ်းကြောင်းကို လိုက်ကြသည့် မက်ခါပညာရှင်များ အများအပြားရှိလာ၏။

ကျန်းဝူရွှမ်းက မက်ခါအသင်းချုပ်ရှိလူများ အများဆုံးအမှတ်ရသည့်သူ ဖြစ်သည်။ သူ့တွင် အရည်အချင်းကောင်းများရှိသော်လည်း လမ်းကြောင်းလွဲကာ တိမ်မြုပ်ပျောက်ကွယ်သွားခဲ့သည်။

ထိုသို့ဖြစ်ရခြင်းမှာ သူက အဆင့်မြင့်မက်ခါများကို မလုပ်တတ်ခြင်းကြောင့် မဟုတ်ဘဲ မလုပ်ခဲ့ရုံကြောင့်သာ ဖြစ်သည်။ သူက ပြောခဲ့သည် ။

" အားလုံးလုပ်နေကြအတိုင်း တစ်ထေရာတည်းတူနေတဲ့ အရာတွေကို ထုတ်လုပ်ရတာက ဘာများပျော်စရာကောင်းမှာ မို့လို့လဲ... ကျွန်တော်က သမိုင်းကို အပြောင်းအလဲဖြစ်သွားစေမယ့် မက်ခါမျိုး လုပ်ချင်တာ..."

အချို့သူများက သူ့ကို သနားကြပြီး အချို့က သူ့ကို ရူးနေသည်ဟုသာ ထင်ကြသည်။ သို့သော် ကျန်းဝူရွှမ်းက ဒီဇိုင်းနှင့်အတူ အမှန်တကယ်ပြန်ပေါ်လာသောအခါ ထိုစိတ်ခံစားမှုများက ရောထွေးသောခံစားချက်အဖြစ် ပြောင်းလဲသွား၏။

' သူတကယ် လုပ်နိုင်သွားတာပဲ...'

လီလင်က အတော်ကြာအောင် တွန့်ဆုတ်နေသော်လည်း နောက်ဆုံးတွင် ကျန်းဝူရွှမ်းကိုဆက်သွယ်လိုက်သည်။ သူတို့ နှစ်,နှစ်ဆယ်လောက် စကားမပြောဖြစ်ခဲ့သော်လည်း လီလင်က သူ့ကိုဆက်သွယ်ရန်နံပါတ်အား သေချာမှတ်ထားသေးသည်။

" ဝူရွှမ်း...ဂုဏ်ယူပါတယ်...မင်းဒီဇိုင်းကို လုပ်နိုင်သွားတယ်ဆိုတာ ဆရာသာသိရင် အရမ်းပျော်သွားလောက်တယ်...သူက မင်းကို အမြဲတမ်း စိတ်ပူနေခဲ့တာပါ...သူက မင်းမှာ ပါရမီပါတယ်ဆိုတာ သိပါတယ်...ဒါပေမဲ့ မင်းလမ်းကြောင်းအမှားကို ဆက်လျှောက်မိမှာကို သူကစိုးရိမ်နေခဲ့တာ..."

ဟယ့်နျန်နဲ့ အခြားသူတွေက ကျန်းဝူရွှမ်းကို ဘာလို့ အသိအမှတ်မပြချင်ရတာလဲ…

အသစ်အဆန်း တီထွင်ရန်က အပြောသာလွယ်သည်။ လက်တွေ့လုပ်ဆောင်ရန်က ထင်သလို မလွယ်ကူပေ။ အမှန်တကယ်အပြီးမသတ်ရသေးမီအထိ ၎င်းက အမှန်လား အမှားလားဆိုသည်ကို မည်သူမှ မသိကြချေ။ တီထွင်မှုပြီးမြောက်သွားပါက အံ့အားသင့်စရာကောင်းသောအိုင်ဒီယာဖြစ်လာနိုင်သော်လည်း ထိုပြီးမြောက်မှုမတိုင်မီတွင် အဆက်မပြတ်စမ်းသပ်မှုများ၊ အမှားများနှင့် ရင်ဆိုင်ရပြီး စမ်းတဝါးဝါးနှင့်သာ လမ်းပျောက်သွားရတတ်သည်။။

ထို့နောက်တွင် ကျန်းဝူရွှမ်းက လမ်းမှားကို ခပ်ဝေးဝေးရောက်အောင် လျှောက်နေပြီး အကန့်အသတ်ကိုကျော်လွန်ကာ သူ့အရည်အချင်းများကို ဖြုန်းတီးပစ်နေသည်ဟုသာ သူတို့ကတွေးမိကြသည်။ သို့သော် ကျန်းဝူရွှမ်းက လုံးဝ နောက်ပြန်မလှည့်ခဲ့ပေ။

ယခင် ကျန်းဝူရွှမ်းက ဤခံယူချက်ကို လိုအပ်ခဲ့ပြီး သူသာမှတ်တိုင်တစ်ခုစိုက်ထူနိုင်ခဲ့လျှင် လီလင်ကို မည်သို့ဦးညွှတ်လာအောင် လုပ်ရမည်ကို သူ တွေးခဲ့ဖူးသည်။ သို့သော် သူ့ခံယူချက်အတိုင်း ဖြစ်လာသောအခါ သူထင်သလို စိတ်ဝင်စားမှုမရှိတော့ချေ။ အတိတ်တွင် သူက သူမှန်ကန် ကြောင်းကို တိုက်ခိုက်ပြီး သက်သေပြချင်သော်လည်း ယခုတွင် စုန့်နင်ဖုန်း၏ လမ်းပြမှုအောက်တွင် လမ်းအသစ်တစ်လမ်းကို ရှာတွေ့သွား၏။

ထိုရည်ရွယ်ချက်များနှင့်ပက်သက်သော အငြင်းပွားစရာများအားလုံးကို သူဘေးဖယ်ထားလိုက်ချေပြီ။

" ကျေးဇူးပါပဲ...ဆရာလီလင်..."

လီလင်က သူ့အသက်ရှူသံမှာ ရပ်တန့်သွားသည့်အလား ပြောလာ၏ ။

" ဝူရွှမ်း...မင်း ငါ့ကို အရင်က စီနီယာအစ်ကိုလို့ ခေါ်နေကျပါ...မင်းဘာလို့ အခုဒီလောက်အထိ စိမ်းကားသွားရတာလဲ...မင်းဆရာရဲ့ စျာပနနှစ်ပတ်လည်က တစ်လလောက်ပဲလိုတော့တယ်...မင်းသူ့ကို ပြန်လာပြီး ကြည့်သင့်တယ်..."

" ကျွန်တော် စိတ်မကောင်းပါဘူး ဆရာလီလင်... ကျွန်တော်အခု တခြားဆရာတစ်ယောက်ဆီမှာ တပည့်ခံယူလိုက်ပါပြီ...ဒါပေမဲ့ အရင်တုန်းက ကျွန်တော့်ကို ဂရုစိုက်ပေးခဲ့တဲ့အတွက် ခင်ဗျားကို ကျေးဇူးတင်နေတုန်းပါပဲ..."

" ဝူရွှမ်း...မင်းဘာတွေပြောနေလဲဆိုတာကိုရော သိရဲ့လား...ငါတို့ဆရာက ငါတို့ကို သင်ပေးခဲ့တာတွေ မနည်းပါဘူး...ငါတို့က မင်းနဲ့ အငြင်းပွားပြီး အဆုံးသတ်ခဲ့တယ်ဆိုရင်တောင် မင်းဒီလောက်အထိတော့ မလုပ်သင့်ပါဘူး..."

လီလင်က အမောတကောပြောလာ၏။

ဟယ့်နျန်ဆုံးသွားပြီးနောက် သူ့ကို ကျော်နိုင်သည့် မက်ခါပညာရှင်ဆိုသည်က မရှိသလောက်ပင်။ လီလင်ကိုယ်တိုင်ပင်လျှင် သူက ဟယ့်နျန်နှင့် ယှဥ်နိုင်သည်ဟု မပြောရဲပေ။

' ကျန်းဝူရွှမ်းက ကျောင်းအသစ်ကို ဝင်လိုက်ပြီ...အဲ့ဒါကြီးက အဓိပ္ပါယ်မရှိရာကျမနေဘူးလား...ဒါက တမင်ပြောတာပဲ ဖြစ်လောက်မှာပါ...'

သို့သော် ကျန်းဝူရွှမ်းက တည်ငြိမ်စွာဖြင့် လီလင်ကို ပြောလိုက်သည် ။

" ကျွန်တော် အရူးလုပ်နေတာမဟုတ်ပါဘူး...ကျွန်တော်လုပ်နေတဲ့အရာကို ကျွန်တော်ကောင်းကောင်းသိပါတယ် စီနီယာအစ်ကို...ဒါက ခင်ဗျားကို ကျွန်တော် နောက်ဆုံးအကြိမ်ဆက်သွယ်ခြင်းပါ...ကျွန်တော် ဒီမှာ လမ်းကြောင်းသစ်ကို ရှာတွေ့သွားပြီ...ဒီမက်ခါဒီဇိုင်းအသစ်က အဆုံးသတ်မဟုတ်ပါဘူး...အစပဲရှိပါသေးတယ်...ကျွန်တော် ဆက်သွားပြီး ဆရာ့ကို အရိုအသေလာပြုမှာပါ...ဒါပေမဲ့ အခုတော့ မဟုတ်သေးဘူး...ကျွန်တော် လိုချင်တဲ့အရာကို ရတဲ့နေ့ကျရင် သူ့ဆီကို ပြန်လာခဲ့မယ်လို့ ကျွန်တော်ပြောထားပြီးသားပါ..."

' အခုတော့...နီးတောင်မနီးစပ်သေးဘူး...'

လီလင်မှာ စိတ်ရှုပ်ထွေးစွာဖြင့် ဖုန်းကို ချလိုက်ရသည်။

ကျန်းဝူရွှမ်းက သူသိခဲ့သည့် ကျန်းဝူရွှမ်းပင်။ သူက အသက်ကြီးလာရုံသာရှိပြီး လူငယ်ဘဝကကဲ့သို့ ခေါင်းမာနေဆဲသာ။ လီလင်က ခါးသက်စွာရယ်လိုက်ရင်း မတွေးမိဘဲမနေနိုင်ပေ ။

' ဒါကပဲ ငါ့ဆရာဟယ့်နျန်ကို ငါဘယ်တော့မှ မကျော်နိုင်ရတဲ့ အကြောင်းအရင်းဖြစ်နေမလား...'

ကျန်းဝူရွှမ်း လုပ်ခဲ့သလိုမျိုး မှားသည်မှန်သည် ဂရုမစိုက်ဘဲ စိတ်ပိုင်းဖြတ်ပြီး လုပ်ဆောင်ခြင်းမျိုး သူက မလုပ်နိုင်ပေ။ သူက ကျန်ဝူရွှမ်းကို မသိလိုက်မသိဘာသာဖြင့် နည်းနည်းလေး မနာလိုနေမိခြင်းမျိုး ဖြစ်နိုင်သည်။

ထို့နောက် လီလင်က ဟယ့်မိသားစုထံမှ ဖုန်းခေါ်ဆိုမှုကို ရရှိလိုက်သည်။

" ကျန်းဝူရွှမ်းက ဟယ့်မိသားစုရဲ့ ဖိတ်ကြားတာကိုရော တခြားမိသားစုတွေက ဖိတ်ကြားလာတာကိုရော လက်ခံမှာမဟုတ်လောက်ဘူး... သူ့ရဲ့ မူပိုင်ခွင့်ကို တင်သွင်းပြီးသွားပြီ...ပြီးတော့ အဲ့ဒါကို မက်ခါပညာရှင်တိုင်း အခမဲ့ယူသုံးလို့ရတယ်ဆိုပေမဲ့ အထက်တန်းလွှာမိသားစုတွေကတော့ အပိုငွေပေးရလိမ့်မယ်..."

လီလင်က သက်ပျင်းချရင်း ပြောလိုက်သည်။

" သူပြောတဲ့အတိုင်းပဲ လုပ်ပေးလိုက်ပါ..."

💫💫💫

Prev Next