MM Story Teller

Chapter 57

Viewers 3k

💫 Chapter 57

အမှန်တွင် ဆာ့ဆာ့ အခြေခံမက်ခါသုံးပြီးကစားသွားသည့် မှတ်တမ်းတစ်ခုတည်းလောက်နှင့် သတင်းက ထိုမျှ ပလူပျံသွားမည်မဟုတ်ပေ။ သို့သော် လီချန်ယွီကို သူမ သင်ကြားပေးပြီးနောက် လီချန်ယွီက သိသိသာသာတိုးတက်လာပြီး ထိုသတင်းကပါပျံ့သွား၍ အခြေခံသုံးမက်ခါက တစ်ဖန်ပြန်လည်ရေပန်းစားလာ၏။

ထို့အပြင် ဆာ့ဆာ့၏ လှုပ်ရှားမှုနှင့်ကစားကွက်များက လက်တွေ့တွင် အတုခိုးရန် မဖြစ်နိုင်သည်တော့ မဟုတ်ပေ။ မက်ခါအကြောင်းကို နားလည်ထားပြီး တုံ့ပြန်သည့် အရှိန်ကို လေ့ကျင့်နေသရွေ့ အကန့်အသတ်ကိုရှာဖွေကာ ကျွမ်းကျင်သည်အထိ လေ့လာနိုင်၏။ ဆာ့ဆာ့လုပ်သမျှကို သူတို့စိတ်တိုင်းကျ လိုက်မလုပ်နိုင်သော်လည်း ယခင်ကနှင့်ယှဥ်လျှင် သူတို့၏ လှုပ်ရှားမှုများက အလွန်တိုးတက်လာ၏။

ဤကဲ့သို့ လက်တွေ့အောင်မြင်မှုများကို သူတို့မျက်စိရှေ့တည့်တည့်တွင် မြင်နေရခြင်းဖြစ်၍ လူအများက အခြေခံသုံးမက်ခါကို ပိုသဘောကျကာ အတုခိုးလာကြသည်။

မက်ခါလိဂ်ပြိုင်ပွဲမစမီအထိ အားလုံးက အခြေခံသုံးမက်ခါကိုသာ အသုံးပြုနေကြသေးသည်။ အချို့သောသူများကမူ အဆင့်မြင့်မက်ခါကို အနိုင်ယူရန် အခြေခံသုံးမက်ခါကိုသာ သုံးရလောက်အောင်အထိ ဉာဏ်မတိမ်ကြပေ။ အချို့သော မက်ခါများက အပြင်ပိုင်းတွင် အခြေခံသုံးမက်ခါ နှင့်တူပြီး အတွင်းပိုင်းကို မက်ခါပညာရှင်များက ပြန်ပြုပြင်ထားကြသည်။

အပြင်ပန်းပုံစံကို မပြောင်းဘဲ အခြေခံသုံးမက်ခါအတိုင်းထားကြခြင်းမှာ ထိုပုံစံက ဂုဏ်သိက္ခာ၏ ပြယုဂ်ဖြစ်နေသောကြောင့်ပင်။

သူတို့၏ ရှေးယခင် ဘိုးဘေးများပင် စကြဝဠာနဂါးငွေ့တန်းကို ရှာဖွေရန် အရိုးရှင်းဆုံးမက်ခါကို သုံးခဲ့ကြသည်။

ငါတို့ကရော ဘာလို့ အဆင့်မြင့်မက်ခါတွေကိုပဲ မှီခိုရမှ ဖြစ်မှာလဲ...ငါတို့လည်း ငါတို့လုပ်နိုင်စွမ်းကို ကျော်လွန်တဲ့အထိ အခြေခံသုံးမက်ခါကိုပဲ သုံးပြီး အနိုင်ယူနိုင်ပါတယ်...

ဆာ့ဆာ့ "...."

' မဟုတ်ဘူးနော်...မဟုတ်ဘူး...'

ဤသို့ကိစ္စကြီးကို ဖြစ်စေသည့် ဆာ့ဆာ့က တွေးလိုက်မိ၏။

'ငါ အခြေခံသုံးမက်ခါကို သုံးတုန်းက အဲ့ဒါမျိုးတွေ တွေးတောင်မတွေးမိပါဘူး...'

အနှီခေတ်စားနေသည့်အရာကို ' ဂျူနီယာညီမလေး၏စတိုင် ' ဟုပင် ခေါ်ဆိုနေကြသည်ကို ဆာ့ဆာ့က မသိပေ။သူမ မသိ၍သာ တော်သေး၏။ မဟုတ်ပါက တော်တော်ရှက်နေမိလိမ့်မည်။ လူများအတွက် တိုးတက်အောင်လုပ်ရန်ဆိုသည်က ပုံမှန်ဖြစ်သော်လည်း အမှန်တွင် အခြေခံသုံးမက်ခါနှင့်က မသက်ဆိုင်ပေ။ မည်သည့်မက်ခါကို သုံးသည်ဖြစ်စေ ၊ လမ်းကြောင်းမှန်မှန်နှင့် လေ့ကျင့်နေသရွေ့ တိုးတက်လာမည်ပင်။ အခြေခံသုံးမက်ခါကိုသုံးပြီး လှုပ်ရှားသည့်အကွက်များကို သေချာမလေ့ကျင့်လျှင်လည်း အလကားပင်။

အနှီ " ဂျူနီယာညီမလေး၏စတိုင် " ကိုထွင်လိုက်သည့် ဆာ့ဆာ့ကိုယ်တိုင်က အခြေခံသုံးမက်ခါကို ဆက်မသုံးတော့သည်ကို သူတို့မသိကြပေ။ ထို့ကြောင့် အဆင့်မြင့်မက်ခါကို သုံးရမည်လားကို ဝေခွဲရခက်နေစရာမလိုပေ။

' အဆင့်မြင့်မက်ခါရှိနေပြီကို အဆိုးဆုံးမက်ခါကိုမှ ပြန်သွားသုံးရအောင် ဦးနှောက်ပျက်နေတာမို့လို့လား...'

အဖွဲ့ဝင်လေးယောက်က တစ်ယောက်ချင်းစီလက်ရည်စမ်းပြိုင်ပွဲတွင် ဦးစွာစာရင်းသွင်းထားလိုက်ကြသည်။ ထိုမှသာ ရွေးချယ်ခံရသည့်စာရင်းထဲ ပါဝင်ရန်အတွက် သေချာစေရန် ရမှတ်များရယူပြီး သူတို့အားလုံး နေ့တစ်ဝက်ခန့်အချိန်ဖြုန်းလိုက်ရသည်။

ထိုတစ်ဦးချင်းပြိုင်ပွဲ၌ ကျွမ်းကျင်သူများလည်း အများအပြားရှိသည်။ သို့သော်ငြား လူတွေ့စစ်ဆေးပွဲ၌ ပါဝင်ယှဥ်ပြိုင်သူက များသောကြောင့် ထိုလူများထဲတွင် အမှန်တကယ်ကျွမ်းကျင်သူများက လျော့နည်းနေ၏။ ပုံမှန်အားဖြင့် အစောပိုင်းအဆင့်များတွင် တကယ့်ဆရာကြီးများနှင့် ထိပ်တိုက်မတွေ့ရတတ်ပေ။ တစ်ခါတစ်ရံတွင် သူတို့ဂိမ်းကိုရှုံးနိမ့်သွားသော်လည်း စုပေါင်းရမှတ်တွင် လျော့သွားခြင်းမျိုးမရှိသောကြောင့် လူတွေ့စစ်ဆေးရေး အမှတ်ပေးရာ၌ ပြဿနာမရှိပေ။

ထို့နောက် သူတို့အားလုံး ပြိုင်ပွဲကွင်းနေရာသို့ အမြန်ပြန်ပြေးလာကြပြီး အဖွဲ့လိုက်အနေဖြင့် စတင်လိုက်ကြသည်။

လူတွေ့စစ်ဆေးချိန်၌ အဖွဲ့လိုက်ပြိုင်ပွဲများက အလွန်ရိုးရှင်းပြီး တစ်ဦးချင်းပြိုင်ပွဲနှင့်လည်း ခပ်ဆင်ဆင်ရှိသည်။

သို့သော် ပဏာမပွဲစဥ်သို့ ဝင်ရောက်သွားလျှင် အဖွဲ့လိုက်ပြိုင်ပွဲများက ထင်ထားသလို ရိုးရှင်းတော့မည် မဟုတ်ချေ။ ထိုပွဲစဥ်တွင် စတားကွန်ရက်က ကျပန်း ရွေးချယ်ပေးသည့် မြေပုံအတိုင်း ယှဥ်ပြိုင်ရမည်ဖြစ်သည်။

အဖွဲ့လိုက်ပြိုင်ပွဲတွင် အမှတ်ရရန်ဆိုလျှင် ပြိုင်ဘက်ကို အနိုင်ယူရန် လိုအပ်ရုံသာမက မြေပုံထဲ၌ ရှိနေသော ဂြိုဟ်သားရဲမျိုးစုံကို တတ်နိုင်သမျှ နှိမ်နင်းပစ်ရန်လည်း လိုအပ်သည်။

ဆာ့ဆာ့နှင့်သူမအသင်း၏ အကြံမှာ ဤသို့ဖြစ်သည်။

' အချိန်က အကန့်အသတ်ရှိတယ်...အဖွဲ့လိုက်လုပ်ဆောင်ဖို့အတွက် ပုံမှန်လေ့ကျင့်ရေးတွေက အချိန်ဖြုန်းရုံဘဲ ရှိမှာ...သူတို့ အဖွဲ့လိုက် လူတွေ့စစ်ဆေးပြီးရင် မြေပုံနဲ့ ရင်းနှီးအောင်လုပ်ဖို့ကိုပဲ ပိုအချိန်ယူရမယ်...'

လေ့ကျင့်ရေးမြေပုံ နှင့် ဂိမ်းမြေပုံတို့က တစ်ထပ်တည်းမတူညီကြပေ။ သို့သော် မြေပုံနှင့် တစ်ခါမှမလေ့ကျင့်ဖူးသည့် လူများအတွက် အသားကျအောင်လုပ်ရန်က အရေးကြီးသည်။ တိုက်ရိုက်တိုက်ခိုက်ရသည့် ပြိုင်ပွဲမျိုးတွင် ထူးချွန်သည့်သူများက မြေပုံစနစ်တွင် ရလဒ်ကောင်းရမည်ဟု မသေချာပေ။

ကျန်းချန် နှင့် ဟယ့်ချောင်ယွမ်က မိသားစုကြီးမှလာသောကြောင့် မြေပုံစနစ်နှင့် စိမ်းမနေပေ။ သို့သော် လုချန်းမင် နှင့် ဆာ့ဆာ့က ဒုတိယနှစ်ကျောင်းသားများသာ သင်ရသည့် မြေပုံစနစ်ကိုတစ်ခါမှ မကြုံဖူးပေ။

သားရဲကောင်အစစ်ကို သတ်ဖို့ကို မပြောနဲ့ဦး... ငါတစ်ခါမှ မြေပုံစနစ်နဲ့တောင် မထိတွေ့ဖူးဘူး...

ဆာ့ဆာ့က ဂြိုဟ်သားရဲကောင်းများ၏ အကြောင်းကို ဗီဒီယိုသင်ခန်းစာများကြည့်ရင်း လေ့လာနေ၏။ ၎င်းက သူမအတွက် ယခုချိန်လိုအပ်နေသော အခြေခံသင်ခန်းစာပင်။ မြေပုံစနစ်ဖြင့် ကစားရမည့် ပြိုင်ပွဲပုံစံကို ကြားလိုက်ရပြီးနောက်တွင် ဆာ့ဆာ့ မျက်လုံးပြူးမိခဲ့သည်။

" အဲ့ဒါက အရမ်းစိတ်ဝင်စားဖို့ကောင်းတာပဲ...ဟုတ်ပြီလေ...ကြိုးစားကြည့်တာပေါ့..."

ထိုအချိန်တွင် မကျေမနပ်ဖြစ်နေသော အသံကထွက်ပေါ်လာ၏။

" ပထမဘက်စုံအကယ်ဒမီကကျောင်းသားတွေက ပြုတ်မှာပဲလို့ အရင်ကတည်းက ပြောနေကြတာ...ငါအရင်ကတော့ အဲ့ဒါကို မယုံပါဘူး...ဒါပေမဲ့ အခုတော့ ယုံမှရတော့မယ်...အဖွဲ့တောင် သေချာမဖွဲ့တတ်ကြဘူးပဲ..."

နောက်မှရောက်လာသော ထိုလူငါးယောက်မှာ ပထမစစ်တပ်အကယ်ဒမီမှ ပထမနှစ်ကျောင်းသားများဖြစ်ပြီး ထိုစကားစပြောသည့်သူက ကျန်းမိသားစုအခွဲမှ ကျန်းဖုန့်ဖြစ်သည်။ ထိုသူက ကျန်းချန်ကိုလည်း တမင်တကာရန်ဆွပေးခဲ့သေးသည်။ ပုံမှန်အားဖြင့် သူတို့က လူအုပ်ကြားထဲတွင် ရောနေသောကြောင့် ဂိမ်းအပြင်ဘက်တွင် အချင်းချင်းမှတ်မိရန် မလွယ်သော်လည်း ဆာ့ဆာ့၏ မက်ခါပုံစံက အလွန်ထင်းကာကြည့်ကောင်းနေ၏။

အဖွဲ့လိုက်ပြိုင်ပွဲများ ဆက်တိုက်ယှဥ်ပြိုင်ပြီးနောက် အားလုံးက သူမ၏ အမှတ်တံဆိပ်ကို သတိပြုမိသွားကြသည်။

ပထမဘက်စုံအကယ်ဒမီကျောင်းက ပထမနှစ်ကျောင်းသားတွေအဖွဲ့မလား...

သူတို့ကို ရှာမတွေ့ရန်ကပင် ခက်ဦးမည်။ ထင်ထားသည့်အတိုင်း ပြဿနာက သူတို့ဆီကို တည့်တည့်ရောက်လာ၏။

အဖွဲ့တစ်ဖွဲ့တွင် လူလေးယောက်မှ ငါးယောက်ခန့်အထိ စာရင်းသွင်း၍ရသော်လည်း လူငါးယောက်စုစည်းနိုင်လျှင် အကောင်းဆုံးပင်။ လူများခြင်းက သေချာပေါက် ပိုပြီးအခွင့်သာစေလိမ့်မည်။

သေချာပေါက် အဖွဲ့အတွက် လူသုံးယောက်ထဲကိုသာ ဖိတ်ခဲ့သည့် ကျန်းချန်မှာလည်း ကိုယ်ပိုင်အကြောင်းပြချက်ရှိသည်။ ပထမနှစ်ကျောင်းသားများကြားတွင် သူတို့လေးယောက်ကသာ SSအဆင့်ရှိသူများ ဖြစ်သည်။ လူများများထည့်ချင်ရုံဖြင့်ပင် အဖွဲ့လိုက်ပူးပေါင်းလုပ်ဆောင်နိုင်မှုကို စတေးပစ်စရာမလိုအပ်ပေ။

ကျန်းဖုန့်က သူတို့အဖွဲ့ဝင်ငါးယောက်စလုံးမှာ SSအဆင့်ရှိသူများ ဖြစ်နေသောကြောင့် အလွန်ဘဝင်ခိုက်နေ၏။ တစ်ယောက်က ဆေးဝါးမှီဝဲပြီး ထိုအဆင့်ကို ရလာခြင်းဖြစ်သော်လည်း အခြားသူများက 'ဘယ်လိုလုပ်ရလာသလဲ'ဆိုသည်ကို ဂရုစိုက်နေမည် မဟုတ်ပေ။

ကျန်းချန်၏ စိတ်အခြေအနေက မကောင်းပေ။ သို့သော် ဤထူးဆန်းသည့် ဒေါသကို သူမအောင့်အီးနိုင်ဖြစ်နေ၏ ။

" လူများလေလေ ပူးပေါင်းရတာခက်လေလေပဲ...မင်းဘာတွေ ကြွားလုံးထုတ်ချင်နေလဲဆိုတာ ငါမသိဘူး မထင်လိုက်နဲ့..."

ကျန်းဖုန့်က ကျန်းချန်၏ ဒေါသကို မမှုပေ။ သူက ယခင်က မိသားစုထဲတွင် ပင်မဆက်ခံသူမဟုတ်သောကြောင့် အမြဲတမ်း ကျန်းချန်၏နောက်မှာသာ နေရသည်။

ဒါပေမဲ့ အမြဲတမ်း ဘာလို့ အဲ့လိုနေရမှာလဲ…

ကျန်းဖုန့်က ကျန်းချန်အပေါ်တွင် အလွန်နာကြည်းမှုများ ရှိ၏။ အခုတွင် သူ ပြန်အဖက်ဆယ်ရန် အခွင့်အရေးရပြီဖြစ်သည့်အတွက် ကျန်းချန်ကို ဤပြဿနာအား လုံးဝ ကျော်သွားခွင့်ပေးမည်မဟုတ်ပေ။

ကျန်းဖုန့်က ဆာ့ဆာ့ကို အပြုံးဖြင့်ကြည့်ရင်း ပြောလိုက်သည်။

" ဝမ်းကွဲရေ...စကားတွေသိပ်မများနဲ့...အခုထိ မြေပုံစနစ်ကိုတောင် မလေ့လာရသေးတဲ့ သူတွေရှိသေးတယ်မလား... ယာယီသတ်မှတ်ချက်တွေဆိုတာက အရေးမပါဘူး... မင်းကတော့ ပြိုင်ပွဲအတွက်တောင် အဖွဲ့ထဲကို ဒီအတိုင်း တွေ့ကရာလူတစ်ယောက် ဆွဲထည့်လိုက်တာပဲ..."

ကျန်းဖုန့်နှင့် အခြားသူများက ဆာ့ဆာ့ ယခုလေးတင်ပြောလိုက်သော စကားကို ကြားသွား၏။

ဤအချိန်တွင် လုချန်းမင်က ရုတ်တရက် ထပြောလာ၏ ။

" ကျောင်းသားရေ...ငါတို့အနိုင်ရဖို့ အခွင့်အရေးက ဘယ်လောက်နည်းလဲဆိုတာ နင်သိလား..."

ကျန်းဖုန့်က မေးလိုက်သည် ။

" ဘယ်လောက်နည်းလို့လဲ..."

" အခုလောလောဆယ် ကြည့်ရတာတော့ ၃၅ရာခိုင်နှုန်းကို ဖြတ်ကျော်နိုင်သေးပုံမရဘူး..."

ကျန်းဖုန့်မှာ အော်ကြီးဟစ်ကျယ် ထရယ်လိုက်မိသည်။

" ကြည့်စမ်းပါဦး... မင်းရဲ့အသင်းသားတွေကတောင် ပြောနေကြပြီ...."

" ငါပြောတာကို ဆုံးအောင်နားထောင်ပါဦး....နင်တို့ကိုဆိုရင်တော့ ငါတို့အနိုင်ရချေက တစ်ရာရာခိုင်နှုန်းပဲ..."

လုချန်းမင်က အတည်ပေါက်လေသံဖြင့် ပြောချလိုက်သည်။

ကျန်းဖုန့်၏ အမူအရာမှာ ချက်ချင်း ကြည့်ရဆိုးသွားပြီး ကျန်းချန်က ပြုံးနေသည်။ အဖွဲ့သားများက သူ့ကို တစ်ခါတစ်ရံ စိတ်တိုအောင် လုပ်တတ်သော်လည်း သူတို့က ဤတစ်ကြိမ်တွင် အခြားသူများကိုပါ စိတ်တိုဒေါသထွက်အောင်လုပ်လိုက်သည့်အတွက် ကျန်းချန် လန်းဆန်းသွား၏။

စစ်တပ်အကယ်ဒမီရှိ အခြားသောကျောင်းသားများပင်လျှင် မကျေမနပ်ဖြစ်သွား၏ ။

" အရမ်းဘဝင်မြင့်နေတာပဲ...."

လုချန်းမင်က ခေါင်းခါရင်း သက်ပြင်းချလိုက်သည်။

" သိပ္ပံနည်းကျဒေတာတွေကို လက်မခံနိုင်တဲ့သူတွေ ဘာလို့ ဒီလောက်တောင်များရတာလဲ ဟူး...ကိုယ့်ကိုယ်ကိုယ် လိမ်နေတာက မကောင်းဘူး..."

" မင်း..."

အချက်အလက်များဖြင့် အကြောင်းပြလာသော သူများက စိတ်ရှုပ်စရာအကောင်းဆုံးပင်။

ကျန်းချန်က မြူးတူးစွာပျော်လာ၏ ။

" အာ...အရမ်းတွေ ဒေါသထွက်ပြမနေစမ်းပါနဲ့...ဒီလို ဒေတာအချက်အလက်လေးကိုတောင် မင်းက လက်မခံနိုင်ဖြစ်နေရင် ငါတို့နဲ့တောင် ထိပ်တိုက်မတွေ့သေးဘူးနော်… မင်း ပြိုင်ပွဲကနေ အရင် ပြုတ်သွားရင် ဘယ်လိုလုပ်မလဲ...အဲ့လိုဆို ပိုပြီး ဒေါသထွက်စရာမကောင်းဘူးလား..."

စစ်တပ်အကယ်ဒမီမှ လူများကို ရန်စပြီးနောက် ကျန်းချန်က ကျန်သုံးယောက်နှင့် ထွက်သွား၏ ။

လာမည့်ပြိုင်ပွဲကြောင့်သာမဟုတ်လျှင် စစ်တပ်အကယ်ဒမီရှိကျောင်းသားများက သူတို့ကို တိုက်ခိုက်ရန် စိန်ခေါ်မိမည်ပင်။

စစ်တပ်အကယ်ဒမီရှိလူများက စိတ်ရှုပ်စရာကောင်းသော်လည်း လုပ်ရည်ကိုင်ရည်ရှိကြသည်။ သူတို့၏ မက်ခါတိုက်ခိုက်ရေးသမားများက ပထမနှစ်ကတည်းကပင် အပြင်းအထန်လေ့ကျင့်ရေးများ ဆင်းထားပြီး သူတို့က သာမန်မိသားစုနောက်ခံဖြစ်လျှင်ပင် မြေပုံစနစ်နှင့် စိမ်းနေမည် မဟုတ်ပေ။ သူတို့၏ လေ့ကျင့်ရေး၌ အဖွဲ့လိုက်လေ့ကျင့်ရေးကလည်း အရေးပါသည်။ ထို့အပြင် ဆာ့ဆာ့တို့လို ယခုမှ အချင်းချင်းသိအောင်လုပ်နေရသည့် အဖွဲ့မျိုးမဟုတ်ဘဲ သူတို့ငါးယောက်အဖွဲ့က သေချာလေးဖွဲ့စည်းထားပုံရ၏။

အမှိုက်သရိုက်စကားများ ပြောနေရခြင်းက အပျင်းပြေစေသော်လည်း မည်သူကမှ အရှုံးကို လိုလားမည်မဟုတ်ပေ။

ဤကဲ့သို့ ပြင်ဆင်နေရသည့် ရက်အနည်းငယ်အတွင်းတွင် သူတို့အဖွဲ့၏ ဖိုင်နယ်ပြင်ဆင်မှုက ပြီးဆုံးလုနီးပါးဖြစ်သွား၏။ လုချန်းမင်က ခွဲခြမ်းစိတ်ဖြာရသောအပိုင်းကို ယူထားပြီး ဆာ့ဆာ့က စောင့်ကြပ်သည့်လမ်းကြောင်းကို အဓိက တာဝန်ယူထား၏။ အားလုံးရင်းနှီးသွားကြပြီးနောက် ဟယ့်ချောင်ယွမ်၏စိတ်နေစိတ်ထားက ယုံကြည်အားကိုးရဆုံးဖြစ်တာကြောင့် သူ့ကို အလုံးစုံအစီစဥ်ဆွဲသည့် နေရာ၌ တာဝန်ယူထားပြီး ကျန်းချန်က ထိုးစစ်အတွက် တာဝန်ယူထားသည်။

အဖွဲ့တည်ဆောက်ပုံက အားလုံးမဟုတ်သေးဘဲ လမ်းကြောင်းခွဲဝေသတ်မှတ်ခြင်းက အကြမ်းဖျင်းသာရှိသေး၏။

နှစ်ရက်ကြာပြီးနောက်တွင် လူတွေ့စစ်ဆေးပွဲအဆုံးသတ်က ပဏာမပွဲစဥ်သို့ ဝင်ရောက်လာသည်။

ပဏာမပွဲစဥ်၌ တစ်ဦးချင်းပြိုင်ပွဲတစ်ရက် ၊ အဖွဲ့လိုက်ပြိုင်ပွဲတစ်ရက်ပါဝင်၏။ ရှုပ်ယှက်ခက်နေသောအရည်အချင်းစစ်ပွဲစဥ်များကဲ့သို့ မဟုတ်ဘဲ ပဏာမပြိုင်ပွဲက အပိုင်းတစ်ပိုင်းချင်းစီအတွက် အချိန်သတ်မှတ်ပေးထားပြီး ပြိုင်ပွဲကွင်းအသီးသီး၌ စောင့်ကြည့်စစ်ဆေးသူများ ထားပေးထားသည်။

သေချာပေါက် ပဏာမပွဲစဥ်သာရှိသေးသည့်အတွက် ပရိသတ်များမှာ သူတို့သဘောကျရသည့်အဖွဲ့ ၊ ယှဥ်ပြိုင်သူကို မတွေ့မချင်း လူများရောနေသေး၏။

ပထမဆုံးယှဥ်ပြိုင်ရသည့် အဖွဲ့မှာ တစ်ဦးချင်းပြိုင်ပွဲ၌ သူတို့၏ ပြိုင်ဘက်များအားလုံးက သာမန်အဆင့်သာဖြစ်နေသောကြောင့် ကံကောင်းသွားသည် ။ သူတို့ အင်အား များစွာမထုတ်လိုက်ရသောကြောင့် နောက်တစ်နေ့ အဖွဲ့လိုက်ပြိုင်ပွဲဝင်ရန် အင်အားအပြည့် ကျန်ရှိနေ၏။

သို့သော် သူတို့ " လူရိုင်းအဖွဲ့" နှင့်ကြုံတွေ့ရချိန်၌ အလုံအလောက် ကံမကောင်းတော့ပေ။ လူရိုင်းအဖွဲ့က သူတို့အဖွဲ့၏ မလှမပပေးထားသောအမည်မှလွဲ၍ ကျပန်းလူများဖြင့် ဖွဲ့ထားသည့်အဖွဲ့ဖြစ်ပြီး လူကြိုက်အများဆုံး ထိပ်တန်း ( ၁၀) ဖွဲ့ထဲ၌ ပါဝင်သည်။

ပဏာမပွဲစဥ်၏ ယှဥ်ပြိုင်ရမည့်စာရင်းထွက်လာချိန်တွင် 'ဘယ်အသင်းက ချန်ပီယံဆုရနိုင်တဲ့ ထိပ်တန်း ၁၀ ဖွဲ့ထဲပါသလဲ ၊ ဘယ်အသင်းက လူကြိုက်အများဆုံး ထိပ်တန်း ၁၀ဖွဲ့ထဲပါသလဲ' ဆိုသည်ကို ရွေးထုတ်ထားကြ၏။ စတားကွန်ရက်ကပင်လျှင် အားလုံးကို အပျော်သဘောဖြင့် လောင်းနိုင်ရန် အကျိုးအမြတ်ပဟေဠိကဏ္ဍကို စီစဥ်ပေးထားသည်။

ဆာ့ဆာ့၏ အသင်းကလည်း လူကြိုက်အများဆုံး ထိပ်တန်းဆယ်ဖွဲ့ထဲပါသော်ငြား အားလုံးက လူရိုင်းအဖွဲ့အပေါ် အမြင်ကောင်းပိုရှိနေ၏။

လုချန်းမင်က ညည်းညူလိုက်သည် ။

" စတားကွန်ရက်ရဲ့ လုပ်နည်းစနစ်တွေက ချို့ယွင်းချက်တွေရှိနေတာပဲ...သူတို့က တစ်ဦးချင်းပြိုင်ပွဲမှာ အခွင့်သာထားတယ်ဆိုရင် အဖွဲ့လိုက်ပြိုင်ပွဲမှာလည်း သေချာပေါက် ပြင်ဆင်ထားမှာပဲ..."

၎င်းက နားလည်ရန်ခက်သော စကားပင်။

ပုံမှန်အားဖြင့် တစ်ဖွဲ့က မလွဲမသွေအဖြုတ်ခံရမည်ဖြစ်သည့်အတွက် ပွဲစစချင်းမှာပင် အင်အားကြီးသည့် အသင်းကို ထည့်ပေးလိုက်သည်က ရှားသည်။ ထို့အပြင် ပဏာမပွဲစဥ်များက အကြိတ်အနယ်နှင့် အတော်လေးစိတ်လှုပ်ရှားစရာကောင်း၏။ သို့သော်ငြား ဆီမီးဖိုင်နယ် နှင့် ဖိုင်နယ်ပွဲစဥ်များက ထိုမျှလောက် စိတ်လှုပ်ရှားဖို့မကောင်းဘူးဆိုပါက ပြိုင်ပွဲကို ဆက်လက်ကျင်းပနိုင်တော့မည် မဟုတ်ပေ။

သို့သော် ဆာ့ဆာ့တို့အဖွဲ့က ပွဲအဖွင့်မှာပင် ဤကဲ့သို့ စိန်ခေါ်မှုမျိုးနှင့် ကြုံတွေ့လိုက်ရသည်။

သတင်းပျံ့သွားသည်နှင့် ပွဲကြည့်စင်၌လည်း လူများအပြည့်ဖြစ်သွား၏။ ၎င်းက ပဏာမပွဲစဥ်တွင် စိတ်လှုပ်ရှားစရာအကောင်းဆုံး ပြိုင်ပွဲဖြစ်မည်ကို အားလုံးသိကြသည်။

ဆာ့ဆာ့၏အသင်းက ပြင်ဆင်နေချိန်တွင် စစ်တပ်အကယ်ဒမီမှ ကျန်းဖုန့်အပါဝင် အခြားသူများပါ လာရောက်ကြည့်ရှူကြသည်။

ဤတစ်ကြိမ်တွင် ကျန်းဖုန့်၏ မျက်နှာ၌ မသာမယာဖြစ်နေခြင်းမျိုးမရှိတော့ပေ။ သူက အပြုံးနှင့်သာ ပြောလိုက်သည်။

" အိုး...ငါတို့သေချာပေါက် မင်းတို့ရဲ့ပွဲကိုလာကြည့်ရမှာပေါ့...ဘာလို့ဆို ဒါကမင်းတို့ရဲ့ နောက်ဆုံးပွဲပဲလေ...ငါမင်းတို့ကို ပြန်ပြီးသတိပေးလိုက်မယ်...ငါတို့နဲ့မပြိုင်ရသေးခင်မှာတင် ပြုတ်မသွားစေနဲ့..."

ပဏာမပွဲစဥ် ယှဥ်ပြိုင်ရမည့် ဇယားကို ကြည့်လိုက်သောအခါ ကျန်းဖုန့် သေလောက်အောင် ရယ်လိုက်မိသည်။

သူတို့လေးယောက်က ကျန်းဖုန့်ကို လျစ်လျူရှူလိုက်ကြသည်။ ဆာ့ဆာ့က ကျန်းချန်ကို ကြည့်ကာ ပြောလိုက်သည်။

" နင့်မိသားစုက တော်တော်သြဇာရှိတယ်မလား...အဲ့ဒါကို နင့်ဝမ်းကွဲကျန်းဖုန့်က ကမ္ဘာကြီးကို မမြင်ဖူးတဲ့အတိုင်းပဲ…သူက အရည်အချင်းရှိတဲ့ပြိုင်ဘက်နဲ့ တစ်ခါမှမတိုက်ခိုက်ဖူးဘူးလား... နင်တို့က ဆင်းရဲတယ်ဆိုရင်တောင် အဲ့လိုမတွယ်ကပ်သင့်ပါဘူး...နင်တို့မိသားစုရဲ့ လေ့ကျင့်ရေးကတကယ်တစ်ဆင့်တက်ဖို့ လိုနေပြီ..."

ကျန်းချန်က တစ်ခါတည်း သဘောတူလိုက်သည်။

" နင်ပြောတာတကယ်မှန်တယ်...ငါ့အဖေကို ငါဒီအကြောင်းပြောပြသင့်တယ်...ငါ့တို့မိသားစုရဲ့ ဂုဏ်သတင်းကို မှေးမှိန်သွားစေလို့ မဖြစ်ဘူး..."

" အိုး...ကျန်းချန်ရဲ့အဖေက အခုလက်ရှိ ကျန်းမိသားစုခေါင်းဆောင်လား..."

နှစ်ယောက်သားက အချင်းချင်းပြောနေကြပြီး ကျန်းဖုန့်ကို စကားတစ်ခွန်းမှ ပြန်မပြောလိုက်သော်လည်း ဒေါသထွက်အောင် လုပ်ပြီးသွားပြီဖြစ်သည်။

' သူတို့က ဟောင်ပဲဟောင်ပြီး မကိုက်တတ်တဲ့အဖွဲ့ပဲ...'

ကျန်းဖုန့်က တိတ်တဆိတ်ဖြင့်သာ သူ့နေရာသူပြန်သွားလိုက်သည် ။

" ငါ ဒီကောင်တွေကို အခုတော့ ဘဝင်မြင့်ခိုင်းထားလိုက်ဦးမယ်...သူတို့ရှုံးတဲ့အခါကျမှ သူတို့မျက်နှာတွေကို ပျော်ပျော်ကြီးရှု့စားပေးရမယ်..."

💫💫💫

Prev Next