Chapter 61

🫶Chapter 61

သည်တစ်ကြိမ်တွင် ပဲရစ်ဖက်ရှင်ရှိုးက နှစ်ခါခွဲ၍ကျင်းပခဲ့သည်။ အမျိုးသားနှင့်အမျိုးသမီးပွဲနှစ်ပွဲကို တစ်ဆက်တည်းကျင်းပသော်လည်း ကွဲပြားသည့်နေရာများတွင်ဖြစ်သည်။ 

နျန်ယွီယီက ဖက်ရှင်ရှိုးကို သိပ်စိတ်မဝင်စားချေ။ သူ လင်းရီယွဲ့နှင့်အတူအဖော်ပြုနေပေးချင်သော်လည်း အဆုံးတွင် ရှဲ့လို့ထံသို့ အပ်နှံခံလိုက်ရသည်။ 

လင်းရီယွဲ့က ရှဲ့လို့အား နျန်နျန်ကို ဝတ်စားဆင်ယင်မှုပုံံစံများကို ပြသရန် ညွှန်ကြားခဲ့ပြီး အမျိုးသမီးဖက်ရှင်ရှိုးကို ကြည့်ရန် ရှဲ့ယီကျိုးနှင့်ရှဲ့ယီနန်တို့ကို ဆွဲခေါ်သွားခဲ့သည်။ 

ဖန်ကျုံးချွမ်းနှင့် နောက်ဆုံးတွေ့ဆုံခဲ့မှုပြီးနောက် သူက ရှဲ့မိသားစုမိဘများကို မရှောင်တော့ဘဲ နျန်ယွီယီနှင့်အတူ အမျိုးသားဖက်ရှင်ရှိုးပွဲသို့ အဖော်ပြုလိုက်လာခဲ့သည်။ 

ရှိုးပွဲတစ်ခုပြီးနောက် နျန်ယွီယီ ငိုက်မျဥ်းနေပြီဖြစ်၏။ ရှဲ့လို့သာ “ဒါလေးကိုဘယ်လိုမြင်လဲ” ဟုမေးမလာပါက ဖန်ကျုံးချွမ်းကို မှီ၍ အိပ်ပျော်သွားသည်မှာ ကြာလောက်ပေပြီ။ 

လင်းရီယွဲ့က ဝတ်စုံအများကြီးရွေးရန် တိုက်တွန်းထားသောကြောင့် နျန်ယွီယီ အရမ်းမတောက်ပြောင်ဘဲ မဆန်းသစ်သည့် ဝတ်စုံအနည်းငယ်ရွေးကာ ဓာတ်ပုံရိုက်ပြီးနောက် တာဝန်ပြီးမြောက်ရန် လင်းရီယွဲ့ကိုပြဖို့စီစဥ်လိုက်သည်။ 

…

ဟယ်ရှောင်ရှောင်သည် ရင်းရွှီကျယ်နှင့်အတူ ဝင်လာသောကြောင့် အမျိုးသမီးဖက်ရှင်ရှိုးသို့ တစ်ယောက်တည်း ဝင်မသွားနိုင်ဘဲ သူနှင့်အတူ အမျိုးသားဖက်ရှင်ရှိုးသို့ အဖော်ပြုလိုက်ပေးရသည်။ 

ပြေးလမ်းပေါ်တွင် လျှောက်ပြေးနေသည့်ဖက်ရှင်ရှိုးကို ခဏကြည့်ပြီးနောက် အခန်းထဲတွင် ရင်းနှီးနေသည့် မျက်နှာများကို ရုတ်တရက်တွေ့လိုက်ရသည်။ 

……နျန်ယွီယီလည်း ဒီကိုရောက်နေတယ်…။

ဟယ်ရှောင်ရှောင်သည် သတိမထားမိသည့်နျန်ယွီယီအား မျက်လုံးများကျဥ်းမြောင်း၍ကြည့်လိုက်ကာ ဖုန်းဖြင့် ဗီဒီယိုရိုက်လိုက်သည်။ 

ဗီဒီယိုရိုက်နေချိန်တွင် နျန်ယွီယီဘေးရှိ သက်လတ်ပိုင်းအမျိုးသားတစ်ယောက်က ကိုယ်ကိုကိုင်းလာကာ တစ်ခုခုပြောလာ၏။ သူတို့ကိုကြည့်ရသည်မှာ အရမ်းရင်းနှီးနေသလိုပင်။ 

ဟယ်ရှောင်ရှောင်သည် စီးပွားရေးမဂ္ဂဇင်းများမှ ထို “သက်လတ်ပိုင်းအမျိုသား” ကိုမှတ်မိလိုက်သည်။ 

ထိုလူက ရှဲ့မိသားစု၏လက်ရှိခေါင်းဆောင်ဖြစ်ပြီး ရှဲ့ကုမ္ပဏီ၏တာဝန်ရှိသူ ရှဲ့လို့ဖြစ်သည်။ 

ဟယ်ရှောင်ရှောင်က ဗီဒီယီုနှင့်ပုံကို သူမကိုယ်စားလှယ်ဆီသို့ ပို့လိုက်၏။

ဟယ်ရှောင်ရှောင် : အင်တာနက်ဆယ်လီတစ်ယောက်ကိုဆက်သွယ်ပြီး ခေတ်စားနေတဲ့ အကြောင်းအရာနေရာကို ဝယ်ပေး…ကုန်ကျစရိတ်ကို ကျွန်မအကောင့်ထဲက နှုတ်လိုက်…။

ကန်ဟွေ့ : ရှဲ့လို့လား…ဒါကိုတကယ်ပဲ တင်လို့ရလို့လား…။

ဟယ်ရှောင်ရှောင် : ကျွန်မဆီကလာမှန်း ဘယ်သူမှသိမှာမဟုတ်ဘူး…ဒီည နိုင်ငံကိုပြန်ရောက်မယ်…။

ကန်ဟွေ့ : ကောင်းပြီ…ရှဲ့လို့ရဲ့မျက်နှာကို ဝါးရဦးမလား…။

ဟယ်ရှောင်ရှောင် : မလိုဘူး…နျန်ယွီယီက အဲ့လောက်နာမည်မကြီးသေးဘူး…ဒါပေမယ့် ရှဲ့လို့ကိုထည့်လိုက်တာက အကြောင်းအရာကိုပိုပြီး ပေါက်သွားစေလိမ့်မယ်…။

ကန်ဟွေ့ : သိပြီ…ငါတို့ရဲ့အရင်းအမြစ်တွေကို ဆက်သွယ်လိုက်မယ်…။

ဟယ်ရှောင်ရှောင် : ကောင်းပြီ…ဟိုင်မြို့ကို မနက်ဖြန်မနက်ရောက်မယ်…ကျွန်မကိုလာကြိုဦး…။

ဟယ်ရှောင်ရှောင်သည် ဝီချက်မှထွက်ကာ ဖုန်းကိုပိတ်လိုက်သည်။ ထို့နောက် မော့ကြည့်လိုက်ရာ ရွှီရင်းကျယ်၏ အကြည့်များကို တွေ့လိုက်ရသည်။ 

“လိုချင်တာရပြီလား” ရွှီရင်းကျယ် မျက်ခုံးပင့်လာ၏။

“ရပြီ” ဟယ်ရှောင်ရှောင်က သူနှင့်အသေးစိတ်ဆွေးနွေးမနေလိုက်ချေ။ 

ရွှီရင်းကျယ်က အေးအေးလူလူဖြင့် နျန်ယွီယီ၏လားရာကိုကြည့်လိုက်သည်။ 

ဟယ်ရှောင်ရှောင်က သူ့အတွက် နျန်ယွီယီနှင့်ရှဲ့ယီကျိုးတို့အား ကိုင်တွယ်ပေးနေသောကြောင့် သူပို၍မကျေနပ်ဘဲ မနေနိုင်ချေ။ (ကျေနပ်)

……

ဖက်ရှင်ရှိုးမှထွက်လာပြီးနောက် လင်းရီယွဲ့၏ အမျိုးသမီးဖက်ရှင်ရှိုးဘက်က အနည်းငယ်ဝေးနေသေးသည်။ ရှဲ့လို့က သူမကိုရှာရန်သွားသောကြောင့် နျန်ယွီယီသည် ဖန်ကျုံးချွမ်းအား ခဏထိုင်ရန် အနားရှိကော်ဖီဆိုင်သို့ ခေါ်သွားလိုက်သည်။ 

လေပြေအေးထဲသို့ ထွက်လာပြီးနောက် နျန်ယွီယီနောက်ဆုံးတွင် ပြန်လည်ရှင်သန်လာသလို ခံစားလိုက်ရသည်။ ကော်ဖီနှင့် ကိတ်သေးသေးလေးတစ်လုံးမှာလိုက်ကာ ဖုန်းကိုထုတ်၍ကစားနေလိုက်သည်။ 

ကော်ဖီရောက်လာသည့်အခါ ဖန်ကျုံးချွမ်းက နျန်ယွီယီအားမပေးခင် ခွက်အားသကြားထည့်လိုက်သည်။ 

“သေစမ်း” နျန်ယွီယီ ရုတ်တရက်ပြောလာသည်။ “ဓာတ်ပုံထပ်အရိုက်ခံလိုက်ရပြန်ပြီလား”

“ဘာဖြစ်လို့လဲ” ဖန်ကျုံးချွမ်းက သူ့ထံမှ ဖုန်းကိုယူလိုက်ကာ ကြည့်ပြီးနောက် မျက်မှောင်ကြုတ်သွားသည်။ “ပထမပုံကဟိုတယ်မှာ…ဒုတိယပုံကတော့ ဖက်ရှင်ရှိုးက ဗီဒီယို”

“ဟုတ်တယ်…ပြီးတော့ သူတို့က ကျွန်တော်တို့နဲ့ မျက်နှာချင်းဆိုင်မှာ ထိုင်နေတာ” နျန်ယွီယီသည် ဖန်ကျုံးချွမ်းအား ဒုက္ခများနေသည့် အမူအရာဖြင့်ကြည့်လိုက်သည်။ “ဘာလို့ ကျွန်တော်ပဲ အမြဲဓာတ်ပုံအရိုက်ခံနေရတာလဲ”

ဖန်ကျုံးချွမ်းက ရှဲ့ယီကျိုးနှင့်ရှဲ့ယီနန်တို့ကို စာပို့နေ၏။

နျန်ယွီယီက စားပွဲပေါ်သို့ မှီလိုက်ကာ သူ့ဖုန်းမှ ဗီဒီယိုကို ထပ်တလဲလဲကြည့်နေပြီး ဒေါသတကြီးဖြင့် ဆံပင်များကို ဆွဲဖွလိုက်သည်။ 

“ဘာမှမဖြစ်ဘူး” ဖန်ကျုံးချွမ်း သူ့လက်ကိုကိုင်လိုက်သည်။ “ဖုန့်ဟွာက အဖွဲ့တွေ ကိုင်တွယ်လိမ့်မယ်”

“ကျွန်တော်သိပါတယ်…ဒါပေမယ့် တစ်ချိန်လုံးစောင့်ကြည့်ခံနေရသလိုခံစားရလို့” နျန်ယွီယီ ရင်ဘတ်တွင် တင်းကြပ်မှုကိုခံစားရင်း ထုတ်ပြောလိုက်သည်။ “ကျွန်တော်တို့နိုင်ငံမှာ လူထုအမြင်ထဲရှိနေတာကတစ်မျိုးလေ…ဒါပေမယ့် ဘယ်လိုလုပ် ပဲရစ်အထိတောင် ဓာတ်ပုံအရိုက်ခံရတာလဲ”

ဖန်ကျုံးချွမ်းထရပ်လိုက်ကာ နျန်ယွီယီကိုဖက်လိုက်ကာ သူ့မေးကို နျန်ယွီယီ၏ခေါင်းပေါ်သို့ တင်ထားလိုက်သည်။

“ဟိုတယ်ကိုပြန်သွားရအောင်”

သတင်းကိုကြားပြီးနောက် ရှဲ့ယီကျိုးနှင့်ရှဲ့ယီနန်တို့ ဟိုတယ်ကိုပြန်လာကြသည်။ နျန်ယွီယီပြန်ရောက်သောအခါ လင်းရီယွဲ့က သူ့ကိုသေချာစစ်ဆေးလာသည်။ 

“နျန်နျန်…ကြည့်ရအောင်…စိတ်မကောင်းမဖြစ်နဲ့နော်…ဖုန့်ဟွာရဲ့ ပီအာရ်အဖွဲ့က ရှင်းနေပြီ”

“အင်း”

ထိုအချိန်တွင် ရှဲ့ယီနန်က ဝေ့ပေါ်မှ မှတ်ချက်များကို ကြည့်နေသည်။ သတင်းဖြန့်သူမှာ လူများငှားရမ်းထားပုံရပြီး ပရိုဖိုင်အတုများဖြင့်ဟန်ဆောင်နေကြသည့် အခြားပရိသတ်များကြောင့် မကောင်းသောမှတ်ချက်များက နျန်ယွီယီ၏ ပရိသတ်များကိုဖုံးလွှမ်းထားသည်။ 

[အိုးမိုင်ဂေါ့…သည်ဗီဒီယိုကြောင့် တကယ်လန့်သွားတယ်…]

[နျန်ယွီယီရဲ့ ပရိသတ်တွေက သူ့ကို ကလေးလေးလို့ခေါ်နေတာ…ဟ…အဲ့ ကလေးလေးက အခု အသက်ငါးဆယ်အရွယ် လူကြီးနဲ့အိပ်နေတာလား…]

[တကယ်ကိုပဲ…ဒါက ယွီစစ်ဟန်နဲ့ဘာကွာလို့လဲ…ပိုတောင်ဆိုးနေသေးတယ်…ရှဲ့မိသားစု အကုန်လုံးနဲ့ဖြစ်နေတာ…တစ်မိသားစုလုံးက လူတစ်ယောက်တည်းကို ကစားနေကြတာလား…]

[လူချမ်းသာတွေက ပိုက်ဆံကိုဘယ်လိုချွေတာရမလဲ သိတာပဲ…တစ်မိသားစုလုံး တစ်ယောက်တည်းကို ဝေမျှထားကြတာ…အကုန်အကျသက်သာတာပေါ့…]

[ရှဲ့ယီကျိုးရဲ့ပရိသတ်တွေဘယ်ရောက်နေလဲ…အမြဲတမ်းရွှီရင်းကျယ်က လွမ်းမိုးမှုမရှိဘူး…ဖော်လိုဝါမရှိဘူးနဲ့ ပြောနေကြတာ…အနည်းဆုံးတော့ ရွီရင်းကျယ်က သူ့မိန်းမကိုသစ္စာရှိတယ်…ရှဲ့ယီကျိုးကရော? လူတစ်ယောက်ကို သူ့အစ်ကို၊ အဖေနဲ့အတူ မျှစားနေတယ်လေ]

[ငါ့ရဲ့ထင်မြင်ချက်တွေကို သိမ်းထားဦးမယ်…နျန်ယွီယီနဲ့ပတ်သက်တဲ့ အငြင်းပွားတာတွေက နောက်ဆုံး ပေါ်လာမယ့်ပုံပဲ…ဆက်စောင့်ကြည့်တာပေါ့]

[အရင်က အောင်မြင်မှုတွေက ရှဲ့မိသားစုကိုကပ်တွယ်ပြီးရလာခဲ့တာတွေပေါ့? ရွံဖို့ကောင်းလိုက်တာ]

[ကျစ်…ကျစ်…တစ်ခုပဲပြောစရာရှိတယ်…သနားစရာ လူကြီးမင်းရှဲ့]

[မြတ်စွာဘုရား…ဒါက…ငါက ဒီအတိုင်းဖြတ်လျှောက်လေးတစ်ယောက်ပါ…ဒါပေမယ့် တော်တော်လေး လန့်သွားတယ်…ရှဲ့ယီကျိုး၊ ရှဲ့ယီနန်နဲ့ ရှဲ့လို့တို့က သားအဖတွေမဟုတ်ဘူးလား…ဘယ်လိုလုပ် နျန်ယွီယီနဲ့ ပတ်သက်နေကြတာလဲ]

[ဤမှတ်ချက်မှာ အဖျက်ခံလိုက်ရပါပြီ]

[နေပါဦး…ငါ့ရဲ့မှတ်ချက်ကို ဘာလို့ဖျက်လိုက်တာလဲ…မှားတာတစ်ခုခုပြောမိလို့လား…ဘယ်လိုဆွဲဆောင်မှုမျိုးက သည်လောက်လူတွေအများကြီးကို ဆွဲဆောင်နိုင်တာလဲ သိချင်ရုံတင်ကို…]

[ဝတ္ထုတွေမှာတောင် အခုလိုပုံမျိုး ရေးကြရဲမှာမဟုတ်ဘူး…သည်သတင်းက တကယ်ကို အကြီးကြီးပဲဟေ့]

သဘာဝကျစွာဖြင့် ဘက်ညီနေသည့်မှတ်ချက်များလည်း ရှိနေသည်။ အချို့က နျန်ယွီယီမှာ ရှဲ့ယီကျိုးနှင့် တွဲနေပြီး သူတို့မိဘတွေကို တွေ့တာမဖြစ်နိုင်ဘူးလား ဟူ၍လည်း မေးခွန်းထုတ်ကြသည်။

သို့သော် ထိုမှတ်ချက်မှာ ရှဲ့ယီကျိုး၏ပရိသတ်များ၊ ရေတပ်များနှင့်အခြားသူများထံမှ လျင်မြန်စွာ အဖျက်ခံလိုက်ရ၏။

နျန်ယွီယီဝင်လာသောအခါ ရှဲ့ယီနန်က နောက်ဆုံး ဖုန်းကိုကြည့်နေရာမှ ခေါင်းထောင်လာသည်။ 

“နျန်နျန်” ရှဲ့ယီနန်က နူးနူးညံံ့ညံ့လေးခေါ်လာသည်။ 

“ဟင်”

နျန်ယွီယီတုံ့ပြန်လိုက်ပြီး ရှဲ့ယီကျိုးနှင့်ရှဲ့ယီနန်တို့က သူ့ကိုကြည့်နေသည်ကို တွေ့လိုက်ရသည်။ 

သူတို့ဘာပြောနေသည်ကို သူဝေဝါးနေသည်။ 

လွန်ခဲ့သည့်လများတွင် သူ့အပေါ် ရှဲ့မိသားစု၏သဘောထားများကို ပြန်တွေးရင်း ကိုယ်ဟန်အမူအရာ တစ်ခုချင်းစီတိုင်းက သူတို့၏စိတ်များကို ဆက်သွယ်နေသလိုပင်။ 

သို့သော် အလယ်တန်းကျောင်းမှ ရင်းနှီးသည့်သူငယ်ချင်းတစ်ယောက်၏ နာကျင်စရာစကားလုံးများက သူ့ကိုခြောက်လှန့်နေဆဲဖြစ်သည်။ 

အတွေးထဲတွင် နစ်မျောနေရင်း နျန်ယွီယီ ရုတ်တရက်နဖူးတွင် နွေးထွေးနေသည့်လက်တစ်ဖက်ကို ခံစားလိုက်ရသည်။ 

ဖန်ကျုံးချွမ်းက တိတ်တဆိတ်ဖြင့် အားပေးလာ၏။

နျန်ယွီယီ မျက်လုံးများကိုပိတ်ကာ အသက်ပြင်းပြင်းရှူ၍ ခေါင်းညိတ်လိုက်သည်။ 

“လူထုကိုချပြလိုက်ရအောင်…ကြီးကြီးမားမားမှမဟုတ်တာ”

သူပြောပြီးသည်နှင့် အခန်းထဲတွင်စိတ်အခြေအနေများမှာ သိသိသာသာမြင့်တက်သွားကြသည်။ 

ရှဲ့ယီကျိုးက အပြုံးကိုကြိုးစား၍ထိန်းထားပြီး ဖုန်းကိုကိုင်၍ ဝေ့ပေါ်သို့ဝင်လိုက်သော်လည်း စိတ်ထဲတွင် သူ၏ပုံစံငယ်လေးက ရွှင်မြူးစွာ ကခုန်နေလေသည်။ 

ရှဲ့လို့ကတော့ ကုမ္ပဏီအား သူတို့တရားဝင်ဝေ့ပေါ်တွင် တင်ရန် ညွှန်ကြားကာ နျန်ယွီယီ၏ပရိုဖိုင်ကိုမြှင့်တင်ပေးရန် ကြိုးစားသည်။ 

ထိုအချိန်တွင် လင်းရီယွဲ့က နျန်ယွီယီ၏ပုံများကို သူမ၏လူထုစာမျက်နှာတွင်တင်ကာ သူမ၏သူငယ်ချင်းများအား “သားငယ်လေး” ဖြစ်ကြောင်း မိတ်ဆက်ပေးနေ၏။

ဖုန့်ဟွာအား နှစ်ပေါင်းများစွာ ကြီးကြပ်လာခဲ့သောကြောင့် ရှဲ့ယီနန်က ဖျော်ဖြေရေးအသိုင်းအဝိုင်း၏ပြောင်းလဲမှုများကို ကောင်းကောင်းကြီးနားလည်သည်။ ဝေ့ပေါ်သို့ ပို့စ်တစ်ခုတင်ပြီးနောက် သူ့ကိုယ်တိုင်အတွက် ခေတ်စားနေသည့်နေရာတစ်ခုတွင် တင်ပေးလိုက်သည်။

----တိုက်ရိုက်ကို ထိပ်ဆုံးနေရာသို့ရောက်သွားလေသည်။

ပိုက်ဆံက ရှဲ့မိသားစုအတွက် ဘယ်တော့မှပြဿနာမဖြစ်ခဲ့ချေ။ 

သိပ်မကြာခင်တွင် ခေတ်စားနေသည့်အကြောင်းတရားတစ်ခုက ဝေ့ပေါ်တွင် တက်လာသည်။

#နျန်ယွီယီ ရှဲ့မိသားစု#

အတင်းအဖျင်းပြောစရာကုန်သွားသည့် ပွဲကြည့်သူများမှာ ၎င်းက နောက်ထပ်သတင်းအကြီးတစ်ခုဖြစ်ကြောင်း ထင်ခဲ့သည်။ စစ်ဆေးကြည့်လိုက်သောအခါ စက္ကန့်အနည်းငယ်လောက် မှင်သက်သွားကြပြီး အကောင့်စစ်၊မစစ်ကို သေချာစစ်ဆေးကြတော့သည်။ 

ရှဲ့ယီကျိုး ဗွီ : အသိအကျွမ်းတွေဖြစ်ကြရအောင်...ဒါက လတ်တလောကမှ ပြန်ရှာတွေ့ထားတဲ့ ကျွန်တော့်ညီငယ်လေး @နျန်ယွီယီပါ [ဒီအန်အေစစ်ချက်အဖြေပုံ]

ဖန့်ဟွာဖျော်ဖြေရေးကုမ္ပဏီ-ရှဲ့ယီနန် : ကျွန်တော့်ညီလေးပါ ကျေးဇူးတင်ပါတယ် @နျန်ယွီယီ

ရှဲ့ကုမ္ပဏီ : ကျွန်တော်တို့ရဲ့ သခင်လေးကိုမိတ်ဆက်ပေးပါတယ်...@နျန်ယွီယီ

Postသုံးခုဆက်တိုက်က မထင်မှတ်စရာကောင်းအောင် အံ့ဩဖွယ်ကောင်းသောကြောင့် မုန်းတီနေသူများပင် မည်သို့တုံ့ပြန်ရမလဲမသိဖြစ်သွားကြသည်။ 

သိပ်မကြာခင်တွင် နောက်ထပ်ပို့စ်တစ်ခုက လူထု၏အာရုံကိုပိုဆွဲဆောင်လိုက်တော့၏။

ရှဲ့ကုမ္ပဏီ၊ ရှဲ့ယီကျိုးနှင့် ရှဲ့ယီနန်တို့၏ ပို့စ်များက တစ်ဆက်တည်းတူညီနေပြီး လတ်တလောပြဿနာတွင် စော်ကားခဲ့ကြသည့်သူများကို သတိပေးနေလေသည်။ ထိုအထဲတွင် ရှဲ့ကုမ္ပဏီနှင့်ဖုန့်ဟွာဖျော်ဖြေရေးကုမ္ပဏီများမှ ‌ရှေ့နေများလည်းပါကြသည်။ 

ယခင်က မကောင်းသည့် မှတ်ချက်များ သိသိသာသာလျော့ကျသွားသည်ကို နျန်ယွီယီလျင်မြန်စွာ သတိထားမိသွားသည်။ 

[???? ငါ့မျက်လုံးပဲကန်းတာလား...အကောင့်ပဲအဟက်ခံလိုက်ရတာလား...။]

[ဘုရားသခင်...အဲ့ဒါငယ်ငယ်လေးတည်းက ပျောက်သွားတဲ့ ရှဲ့မိသားစုရဲ့သားငယ်မလား...။]

[ဝိုး...ဒါက ဝထ္ထုမဆန်ဘဲ စိတ်ကူးယဥ်ပိုဆန်နေတယ်...ငါမှားသွားတာ...ဘယ်လိုဇာတ်လမ်းကမှ ဒါကိုမမီနိုင်ဘူး...အံ့ဩစရာပဲ]

[ဟားဟားဟား...မှတ်ချက်မပေးလဲ သည်အတိုင်းကြည့်နေခဲ့လို့ ဝမ်းသာလိုက်တာ...စော်ကားခဲ့တဲ့သူတွေကတော့ အခု တော်တော်လေးလောင်နေလောက်ပြီ...။]

[သူတို့မှာ လောင်ဖို့တောင်အချိန်ရှိချင်မှရှိမှာ...သည်မှတ်ချက်တွေကို ပြန်ဖျက်နေတာနဲ့ အလုပ်များနေလောက်တယ်]

[ငါအရမ်းမနာလိုဖြစ်တာပဲ...ငါ့မှာလည်း အဲ့လိုအံ့ဩစရာကောင်းတဲ့အစ်ကိုနှစ်ယောက်ရှိချင်လိုက်တာ...]

[ရှဲ့ယီကျိုးက နျန်ယွီယီကို သည်လောက်ကြင်နာနေတာ အံ့ဩစရာမရှိတော့ပါဘူး...ဒီအန်အေစစ်ဆေးချက် ထွက်မလာခင်တည်းက သူ့ကိုအရမ်းချစ်တဲ့ပုံပဲဟာ...သွေးစက်တွေရဲ့ တန်ခိုးများလား...]

[ယွီစစ်ဟန်နဲ့ငါတို့ရဲ့နျန်ကို နှိုင်းယှဥ်ခဲ့တဲ့လူတွေ ထွက်လာခဲ့စမ်း...သောက်ကျိုးနည်း...ပြောတဲ့လည်း ငါ့ကိုဘလော့ပြီး မှတ်ချက်တွေကို ဖျက်သွားကြသေးတယ်...ဆက်ပြီးလိမ်ညာရဲသေးလား...]

[အိုး ဘုရားသခင်...ဒါကြောင့် မိဘမဲ့ဂေဟာကအသစ်ပြင်လိုက်တာပဲ...ကြီးကြပ်ရေးမှူးက ရန်ပုံငွေတချို့ ရခဲ့တာကြောင့်လို့ထင်တာ...ရှဲ့မိသားစုကလှူတာဖြစ်နေတာပဲ]

ရှဲ့ကုမ္ပဏီ စာပြန်ခြင်း : [လှူတာမရှိပါဘူး...ကျွန်တော်တို့က ကလေးတွေရဲ့အနာဂတ်အတွက် ရန်ပုံငွေထည့်ဝင်ပြီး ရေရှည်လက်တွဲသွားကြမှာပါ...အလားအလာကောင်းရှိတဲ့ကလေးတွေက ရှဲ့ကုမ္ပဏီမှာ အလုပ်လုပ်ခွင့်ရကြမှာပါ]

[သောက်ကျိုးနည်း...ရှဲ့ကုမ္ပဏီမှာအလုပ်လုပ်ရမယ်? မိုက်တာပေါ့ကွ]

[ဒါကတကယ်ချီးကျူးထိုက်တာပဲ...အဲ့ဒီမိဘမဲ့ဂေဟာမှာ လုပ်အားပေးလုပ်ခဲ့ဖူးတယ်...ကလေးတွေက စားသောက်နေရပေမယ့် ခက်ခဲနေကြတုန်းပဲ...ရှဲ့မိသားစုရဲ့ ထောက်ပံ့မှုနဲ့ဆို သူတို့ရဲ့ ဘဝတွေက ကောင်းကောင်းကြီး တိုးတက်လာလိမ့်မယ်]

ရှဲ့ယီကျိုးနှင့်နျန်ယွီယီ၏ပရိသတ်အုပ်စုများလည်း တက်ကြွစွာ ပြောဆိုလာကြသည်။ 

နျန်ယွီယီ၏ပရိသတ်များက ပျော်ရွှင်နေကြချိန်တွင် ရှဲ့ယီကျိုး၏ပရိသတ်များကတော့ ပို၍အံ့ဩသွားကြသည်။ 

စိတ်အားထက်သန်နေသည့် ပရိသတ်တစ်ယောက်ကဆိုလာ၏။

[ “ယဲ့ကျိုးရဲ့ညီလေးက အခုငါတို့ရဲ့ မောင်လေးပဲပေါ့...သူ့ကိုအတူတူအားပေးရအောင်”]

ရှဲ့ယီကျိုးပရိသတ်များ၏ ပါဝင်လာခြင်းနှင့်အတူ မှတ်ချက်အနည်းငယ်ကလည်း နျန်ယွီယီအကြောင်း ခေါင်းစဥ်တည်လာကြသည်။ 

ပွဲကြည့်သူများစွာက မနေနိုင်ဘဲ ပြောလာကြ၏။ 

[“ဝတ္ထုတွေတောင်မှ သည်လိုဇာတ်ကြောင်းတည်ရဲကြမှာမဟုတ်ဘူး...ဒါက တကယ်ဖြစ်ပျက်နေတာလို့မယုံနိုင်ဘူး”]

သိပ်မကြာခင်တွင် ဖျော်ဖြေရေးအသိုင်းအဝိုင်း၊ ပြည်တွင်းသတင်းများနှင့် စီးပွားရေးသတင်းများတွင် ထိုအကြောင်း ဖော်ပြလာကြသည်။ အနည်းအကျဥ်းက ဗီဒီယိုထဲတွင် ရှဲ့မိသားစုဘေး၌ ပါနေသည့် နောက်လူတစ်ယောက်ဖြစ်သော ဖန်ကျုံးချွမ်း၏တည်ရှိမှုကိုမေးလာကြ၏။

သို့သော် ထိုကဲ့သို့ သံသယများက လျင်မြန်စွာ ဖုံးအုပ်ခံလိုက်ရသည်။ 

[ဖန်မိသားစုနဲ့ ရှဲ့မိသားစုက အမြဲရင်းနှီးခဲ့တာလေ...သူတို့အတူရှိနေတာ သဘာဝကျတာပဲမလား]

[သူတို့တွေက ဆွေမျိုးတွေဖြစ်သွားကြတော့ရော? ဖန်ကျုံးချွမ်းက ဖက်ရှင်ရှိုးတစ်ခုကိုမတက်နိုင်လို့လား...အဲ့နေရာမှာ မထိုင်နိုင်လို့လား]

[မုန်းတီးသူတွေ လက်ညှိုးထိုးစရာကုန်သွားကြပြီလား]

[??? မင်းတို့ကိုစော်ကားဖို့တောင်အားမနေဘူး...အရူးတွေ]

နျန်ယွီယီသည် ရှဲ့ယီကျိုးပရိသတ်များထံမှ ကာကွယ်ပေးနေသည့် မှတ်ချက်မျာကို ပျော်ပျော်ရွှင်ရွှင်နှင့် ဖတ်နေသည်။ 

ရှဲ့ယီနန်က တရားဥပဒေဌာနနှင့်ဖုန်းပြောနေ၏။ နျန်ယွီယီ တစွန်းတစကြားသွားကာ ဖုန်းကြည့်ရင်းပြုံးနေသည့် ရှဲ့ယီကျိုးကို ဆွဲလိုက်သည်။

“ဘာဖြစ်လို့လဲ” ရှဲ့ယီကျိုးက အရမ်းကြီးမပြုံးရန်ကြိုးစား၍ မေးလိုက်သည်။ 

နျန်ယွီယီ ရှဲ့ယီနန်ကိုညွှန်ပြလိုက်၏။ “သူတို့ကိုတကယ်ကြီးတရားစွဲမလို့လား”

“သေချာတာပေါ့” ရှဲ့ယီကျိုးသည် ယခင်ကမှတ်ချက်များကို ပြန်‌တွေးရင်း ဖြေလိုက်သည်။ “အမှန်တရားကို မသိဘဲနဲ့ မင်းကိုစော်ကားဖို့ မတွန့်ဆုတ်ခဲ့ကြဘူးလေ...မင်းလောက်တောင် တွေးမပေးတတ်ကြဘူး” 

နျန်ယွီယီ သက်ပြင်းချလိုက်၏။

“အဆင်ပြေပါတယ်...တခြားဆယ်လီတွေနဲ့ရေတပ်တွေကလွဲရင် လူတော်တော်များများက လေးလေးနက်နက်အပြစ်ပေးခံရမှာမဟုတ်ဘူး...ကိုယ်ရေးမှတ်တမ်းမှာ ခြစ်ရာပါသွားပြီး အစိုးရစာမေးပွဲတွေမှာ မဖြေနိုင်တော့ရုံတင်” 

ရှဲ့ယီကျိုးက သူ့ခေါင်းကိုပုတ်၍ နှစ်သိမ့်လာသည်။ “ဆံပင်တွေရှည်နေပြီ...ပြန်ရောက်ရင် အဖျားတွေတိလိုက်ဦး”

“ဟုတ်ကဲ့”

🫶