Chapter 85 (Extra 1)

🫶Chapter 85 : Side Story နှစ်သစ်ကူးအကြိုနေ့တွင် ဟိုင်မြို့တစ်ခုလုံးတွင် ပွဲတော်များဖြင့် ပြည့်နှက်နေသည်။ နှစ်သစ်ကူးပွဲအား သူ့မိသားစုနှင့် ဆင်နွှဲပြီးနောက် နျန်ယွီယီသည် သူ့အခန်းထဲသို့လင်းရီယွဲ့၏ တွန်းထည့်ခြင်းခံလိုက်ရသည်။ လင်းရီယွဲ့က မီးဖိုခန်းထဲမှနွားနို့နွေးနွေးလေးကိုင်ထားကာ နျန်ယွီယီအား မအိပ်ခင်သောက်ရန် တိုက်တွန်းလိုက်သည်။ “သန်းခေါင်ကျော်နေပြီ...မြန်မြန်‌လေးနွားနို့သောက်ပြီး အိပ်လိုက်တော့” နျန်ယွီယီ စိတ်မပါသော်လည်း လင်းရီယွဲ့သူ့အတွက်ဝယ်လာပေးသည့် အဖြူရောင်ယုန်ပုံစံအမွေးပွညအိပ်ဝတ်စုံကို ဝတ်ထားရသည်။ အိတ်ထဲမှ အနီရောင်အစလေးထွက်နေ၏။ ရှဲ့လို့နှင့်ရှဲ့ယီနန်တို့ထံမှ စာအိတ်နီများဖြစ်သည်။ နှစ်သစ်အား သူ့မိဘများ၊ အစ်ကိုများနှင့် အတူဆင်နွှဲခြင်းမှာ ယခုက နျန်ယွီယီအတွက် ပထမဆုံးအကြိမ်ဖြစ်သည်။ ရှဲ့ယီနန်နှင့်အခြားသူများက အနှစ်နှစ်ဆယ်ကျော်အောင် လွတ်သွားခဲ့သည့် နှစ်သစ်ကူးအတွက် အပြည့်အဝပြန်လည်ပေးဆပ်ခဲ့ကြသည်။ စာအိတ်နီများအပြင် တစ်ယောက်ချင်းစီတိုင်းက နျန်ယွီယီအား လက်ဆောင်များပေးကြသည်။ ရှဲ့လို့က သူ့အားကျင်းမြို့မှ ခြံတစ်ခြံပေးသည်။ လင်းရီယွဲ့က သန်းပေါင်းရာနှင့်ချီတန်ဖိုးရှိသော ရတနာပစ္စည်းတစ်ခုကို ပေးခဲ့ပြီး ရှဲ့ယီနန်သည် အမျိုးသားဇာတ်လိုက်ဇာတ်ကောင်များစွာကို ပေးခဲ့ပြီး ရှဲ့ယီကျိုးကတော့ သူ့ကိုရွှေရောင်ကတ်ပေးလာသည်။ သူတို့က နျန်ယွီယီက ငြင်းဆန်ရန်အချိန်မပေးဘဲ သူတို့၏စာအိတ်နီများကို သူ့လက်ထဲသို့ အတင်းထည့်ပေးလာကြ၏။ ရှဲ့ယီကျိုးက နျန်ယွီယီ၏ယုန်ပုံစံညအိပ်ဝတ်စုံလေးနှင့်ပုံအား ဓာတ်ပုံခိုးရိုက်ကာ ဝေ့ပေါ်တွင်တင်၍ ပရိသတ်များကို အစာကျွေးလိုက်သည်။ ရှဲ့ယီနန်က ထိုပို့စ်ကို ပထမဆုံးတွေ့ပြီး ရှဲ့ယီကျိုး၏ခိုးကြောင်ခိုးဝှက်နိုင်သည့် လုပ်ရပ်များကို စိတ်ထဲတွင် နှာခေါင်းရှုံ့လိုက်သော်လည်း သူ၏ပင်မအကောင့်မှ ရှယ်လိုက်သေးသည်။ ဖုန့်ဟွာဖျော်ဖြေရေးကုမ္ပဏီ-ရှဲ့ယီနန် V: ဝေ့ပေါ်သို့ပြန်တင်ခြင်း (ပုံ) ရှဲ့ယီကျိုး V: ပုံပြန်ဝေမျှခြင်း (ပုံ) မှတ်ချက်နေရာတွင် ရယ်မောစရာပွဲတော်ကြီးအလား အုန်းအုန်းကျက်ကျက်ဖြစ်လာကြသည်။ [ဟားဟားဟား...ရယ်လို့မဆုံးတော့ဘူး...အစ်ကိုကြီးရှဲ့က မနာလိုဖြစ်နေတာလား...ဘယ်သူ့ပုံက ပိုကောင်းလဲ ကျိုးကျိုးနဲ့ ပြိုင်နေတာလား] [ဟားဟားဟားဟား...နျန်နျန်ရဲ့ပရိသတ်တွေ ရီပို့ထုနေကြပြီ...အစ်ကိုကြီးနဲ့ ဒုတိယအစ်ကိုတို့ ပြိုင်ကြ...ငါတို့ပျော်ဖို့ ဓာတ်ပုံတွေများများ ရှယ်ပေးကြ...ပျော်ရွှင်နေသည့်မျက်နှာ အီမိုဂျီ...] [ဟားဟားဟား...ပြောစရာစကားမဲ့သွားပေမယ့် လမ်းကြောင်းကို မဖျက်လိုက်ချင်ဘူး...ပြီးတော့ ရှဲ့ယီကျိုးရဲ့ ဓာတ်ပုံကပိုကောင်းတယ်...အနုပညာရှင်တစ်ယောက်နဲ့ စီအီးအိုတစ်ယောက်တို့ရဲ့ ဓာတ်ပုံရိုက်တဲ့ အရည်အချင်းတွေကွာခြားတာ သိသာလိုက်တာ...] [ဟားဟားဟား...သဘောတူပေမယ့် အဲ့ဒါက ငါတို့အစ်ကိုကြီးရှဲ့ရဲ့ မာနတွေ ဘယ်သွားထားလိုက်မလဲ...] ရှဲ့ယီကျိုး၏ဓာတ်ပုံရိုက်စွမ်းရည်က သူ့ထက်ပိုသာနေကြောင်း မှတ်ချက်များကိုတွေ့သောအခါ ရှဲ့ယီနန်သည် အရိုးထဲအထိနက်ရှိုင်းနေသည့် အပြုံးကပျောက်ကွယ်သွားပြီး စိတ်ဆိုးမာန်ဆိုးဖြင့် ဝေ့ပေါ်မှထွက်လိုက်လေသည်။ (ပြန် share တာလို့ ပြောပြီးတော့ ဘာကိုစကေးကွာတလဲမသိဘူး နားလည်မှုလွဲသွားတာလားမသိဘူး 🥹) ...... နျန်ယွီယီ သူ့အခန်းသို့သွားလိုက်ကာ အဝါရောင်ဘဲရုပ်ကြီးကိုဖက်၍ အိပ်ရာပေါ်တွင်လှဲလိုက်ကာ ခြေထောက်များကို လှဲနေပြီး ဖန်ကျုံးချွမ်းထံသို့ စာပို့လိုက်သည်။ ......အိပ်ပျော်နေပြီလား... ရှားရှားပါးပါးဖြင့် ဖန်ကျုံးချွမ်းသည် သူ့မိဘအိမ်သို့ ပြန်ရောက်နေချိန်ဖြစ်သည်။ သူ့မိသားစုတွင် လူသုံးယောက်ရှိ၏။ သူ့အမေ၊ ရှုရွှမ်က အသားအရေအတွက် ညဘက်နောက်ကျအောင်နေခြင်းမှ ရှောင်ကြဥ်လေသည်။ သူ့အဖေ၊ ဖန်ရှန့်ကတော့ သူ့မိန်းမကိုကြောက်သောကြောင့် ရှုရွှမ်ပြောသမျှအတိုင်း လုပ်သည်။ သူ့အတွက်ကတော့ သူက လူစုလူဝေးများကိုမကြိုက်သောကြောင့် နှစ်သစ်ကူးအကြိုညစာစားပြီးသည်နှင့် အားလုံးအခန်းဆီသို့ ပြန်သွားကြသည်။ သူ့အတွက်ဝီစကီတစ်ခွက်လောင်းထည့်လိုက်ကာ ခုံအနောက်သို့ မှီလိုက်ရင်း အပြင်ဘက်မှဆူညံနေသည့် လျှပ်စစ်မီးသံများကိုနားထောင်နေလိုက်သည်။ စိတ်ထဲမှအတွေးအခေါ်များကို ဖုံးကွယ်ထားရင်း မျက်နှာက မလှုပ်မယှက်ရှိနေသည်။ သူ့ဖုန်းမှ ထွက်လာသည့်သီချင်းသံကြောင့် ဖန်ကျုံးချွမ်းက ခွက်ကိုချလိုက်သည်။ ကိုယ်ရှိတယ်… စာလက်ခံရလိုက်သောအခါ နျန်ယွီယီ၏ နှလုံးသားလေး တစ်ချက်အခုန်မှားသွားရသည်။ ကူရှင်ပေါ်တွင် လှဲနေရင်း စိတ်လှုပ်ရှားစွာဖြင့် စာရိုက်နေလိုက်သည်။ ……ဘာလို့မအိပ်သေးတာလဲ… သူစာရိုက်နေတုန်းမှာပင် သူ့စခရင်တွင်ဗီဒီယိုကောလ်ပေါ်လာသည်။ ဖုန်းကိုဖြေလိုက်ရင်း နျန်ယွီယီသည် ရွှတ်နောက်နောက်ဖြင့် ဘဲရုပ်အဝါလေးကိုညှစ်လိုက်သည်။ “အစ်ကိုကို့မတွေ့ရတာ နှစ်ရက်ရှိနေပြီ” သူတို့က နှစ်သစ်ကူးပွဲတော်ကျင်းပရန် အိမ်အသီးသီးသို့ ပြန်သွားခဲ့ကြ၏။ ဖန်ကျုံးချွမ်း၏အမူအရာများပြောင်းလဲသွားကာ ချက်ချင်းထရပ်၍ ကုတ်အင်္ကျီကိုယူကာ ထွက်လာလိုက်သည်။ နျန်ယွီယီသည် ဗီဒီယိုထဲတွင် နောက်ခံပြောင်းလဲနေသည်ကိုကြည့်ရင်း မျက်တောင်များ တဖျတ်ဖျတ်ခတ်၍ မေးလာသည်။ “ကျွန်တော့်ဆီကိုလာမလို့လား” ဖန်ကျုံးချွမ်းက ကားထဲသို့ဝင်ကာ ဖုန်းကိုနေရာချပြီးနောက် ခေါင်းညိတ်လိုက်သည်။ “ကိုယ့်ကို စောင့်နေပေး” နျန်ယွီယီ၏မျက်လုံးများ တောက်ပသွားကာ ခန်းဆီးများကိုဆွဲလိုက်ပြီးလသာဆောင်သို့ အပြေးလေးသွားလိုက်ကာ စိတ်အားထက်သန်စွာဖြင့် ဗီလာအပြင်ဘက်မှလမ်းကို ကြည့်နေလိုက်သည်။ “ဒါဆို ကျွန်တော်စောင့်နေမယ်” ကားမောင်းရင်းကြည့်နေပြီး နျန်ယွီယီ၏ ညအိတ်ဝတ်စုံလေးဖြင့် ထွက်ရပ်နေပြီး လေက သူ၏ရှေ့ဆံပင်ကို ပင့်တင်ပေးလိုက်ပြီး ချောမွေ့သည့်နဖူးလေးကို ဖော်ပြပေးနေသည်ကိုမြင်သွားသောအခါ ဖန်ကျုံးချွမ်း၏ မျက်ခုံးများက ညင်ညင်သာသာဖြစ်သွားသည်။ “အရင်ဆုံးအထဲကိုပြန်ဝင်နေ…အပြင်မှာအေးတယ် ပြီးတော့အခုမှ နေမကောင်းတာကနေ သက်သာထားတာ” နျန်ယွီယီအပြင်ထွက်လိုက်ချိန်တွင် လေအေးများက သူ့ကိုဖြတ်၍တိုက်ခတ်လာသည်။ ဖန်ကျုံးချွမ်းပြောလာသည်ကို ကြားသောအခါ စိတ်ပျက်စွာဖြင့် အောက်သို့ငုံ့သွား၏။ “လိမ္မာတယ်နော်…ကိုယ်အဲ့ကိုလာခဲ့မယ်” ဖန်ကျုံးချွမ်း အရှိန်တင်လိုက်၏။ နျန်ယွီယီသည် အထဲသို့ဝင်ကာ လသာဆောင်တံခါးကိုပိတ်လိုက်သည်။ လေအေးများတိုက်ခတ်ခံလိုက်ရသောကြောင့် ဖန်ကျုံးချွမ်းကားမောင်းနေဆဲတွင် နျန်ယွီယီသည် လျင်လျင်မြန်မြန်ဖြင့် အဝတ်အစားများလဲလိုက်ကာ သူ့ကိုယ်သူ လက်အိတ်များ၊ မာဖလာများဖြင့် ထွေးထားလိုက်သည်။ အဝတ်အစားများ၊ ဖိနပ်များ၊ မာဖလာများက ရှဲ့မိသားစု သူ့အတွက်ဝယ်ပေးထားသည့် အသစ်များဖြစ်ကြသည်။ ဆိုဒ်ကြီးနေသည့် အပေါ်ထပ်အင်္ကျီဖြင့် မှန်ထဲတွင်ကြည့်ရင်း နျန်ယွီယီ သက်ပြင်းဖွဖွလေးချလိုက်သည်။ တစ်နှစ်ထက်နည်းသည့်အချိန်အတွင်းတွင် သူ့ကမ္ဘာ၏ပြောင်းလဲမှုများက မြေကြီးပြိုကျသွားသလိုဟု ဖော်ပြနိုင်သည်။ လွန်ခဲ့သည့်တစ်နှစ်၌ ဤကဲ့သို့သောင်းချီသောအဝတ်အစားများကို သူအလွယ်တကူနှင့် အိပ်မက်မက်ဝံ့လိမ့်မည်မဟုတ်ချေ။ …… ဟိုင်မြို့၏ မြို့တွင်းသည် ကြီးကြီးမားမားမဟုတ်သောကြောင့် ဖန်ကျုံးချွမ်းမောင်းလာရန် အချိန်သိပ်မကြာလိုက်ချေ။ နျန်ယွီယီသည် ယခုလေးတင် အဝတ်အစားလဲပြီးသွားပြီး လေအေးတိုက်ခြင်းမှကာကွယ်ရန် ခရင်မ်လိမ်းနေချိန်တွင် လသာဆောင်အပြင်ဘက်မှ ကားစက်သံကိုကြားလိုက်သည်။ လက်ထဲတွင်ရှိနေသည်ကို ချက်ချင်းချ၍ အနောက်ဖက်တံခါးမှထွက်ကာ တစ်ဖက်လမ်းဘေး၇ှိကားတွင် ရပ်နေသာ ဖန်ကျုံးချွမ်းကိုဖက်ရန် ပြေးသွားလိုက်သည်။ နျန်ယွီယီသည်မျက်နှာအား ဖန်ကျုံးချွမ်း၏ရင်ခွင်ထဲသို့ထည့်ကာ ရေရွတ်လိုက်သည်။ “ဗီဒီယိုကောလ်ပြောနေတာပဲကို…ဘာလို့ရုတ်တရက်ကြီးလာရတာလဲ” သူ့စကားလုံးများ ဆုံးသွားသည့်အချိန်တွင် အေးစက်နေသည့်လေထုက ကြမ်းတမ်းစွာတိုက်ခတ်လာသည်။ ဖန်ကျုံးချွမ်းသည် လေနှင့်ဆန့်ကျင်ဘက်သို့ကိုယ်ကိုလှည့်၍ နျန်ယွီယီကိုကာပေးလိုက်သည်။ ထို့နောက် အေးးအေးလူလူဖြင့် လက်မြှောက်၍ လက်ချောင်းထိပ်လေးကိုသုံးကာ နျန်ယွီယီ၏ နှုတ်ခမ်းထောင့်မှ ခရင်မ်များကို သုတ်ပေးလိုက်သည်။ “ကိုယ့်ကောင်လေးက ကိုယ့်ကိုလွမ်းနေတာလေ…ကိုယ်သေချာပေါက်လာရမှာပေါ့” နျန်ယွီယီ၏နှုတ်ခမ်းလေးများ လှုပ်ရှားသွားကာ ရယ်လိုက်၏။ “ချင်အန်းကိုသွားရအောင်” နျန်ယွီယီသည် ဖန်ကျုံးချွမ်း၏ လက်ကိုဆွဲလိုက်သည်။ “မိဘတွေနဲ့တွေ့ပြီး ကျန်နေတဲ့အချိန်တွေကို ကျွန်တော့်ကောင်လေးဆီပေးမယ်လေ” ဆိုလိုရင်းကရှင်းလင်းလွန်းသည်။ ဖန်ကျုံးချွမ်း၏အကြည့်များနက်မှောင်သွားကာ မျက်လုံးများတွင် ရွှင်မြူးမှုများ ဖြတ်ပြေးသွားသည်။ ချင်အန်းသို့ရောက်သောအခါ နျန်ယွီယီသည် သူပြောခဲ့သည့်ထိုစကားများက မည်မျှကြီးသည့်တွင်းကို တူးခဲ့ကြောင်းသဘောပေါက်ရင်း တစ်ညလုံး ဖြတ်သန်းရတော့သည်။ ထိုညက ဖန်ကျုံးချွမ်း၏လက်ထပ်ခွင့်တောင်းခြင်းအပြီး တောက်ပနေသည့်မီးရှူးမီးပန်းများက ထိုနေ့မှာပင် လျင်မြန်စွာ ရေပန်းစားသွားခဲ့သည်။ ပြင်သစ်ဘာသာစကားကို အကျဥ်းချုံး၍ ဘာသာပြန်ကြပြီးနောက် မကြာခင်တွင် မှတ်ချက်များမှာ ဤမီးရှူးမီးပန်းများက ဖန်ကျုံးချွမ်းမှနျန်ယွီယီအား လက်ထပ်ခွင့်တောင်းခြင်းအတွက်ဖြစ်ကြောင်း အားလုံးက ခန့်မှန်းကြတော့သည်။ နျန်ယွီယီသည် ရေပန်းစားနေသော အကြောင်းအရာများအောက်တွင် ခန့်မှန်းချက်များကို မြင်တွေ့ပြီးနောက် မရေမတွက်နိုင်သည့် မန်းရှင်းများကို လက်ခံရရှိလိုက်သည်။ သူဝေ့ပေါ်တွင် ပို့စ်တစ်ခုတင်လိုက်၏။ ပါဝင်သည့်အကြောင်းအရာက ဓာတ်ပုံနှစ်ခုတည်းသာဖြစ်သည်။ လက်စွပ်ဝတ်ထားသည့်လက်တစ်ဖက်နှင့် အဖြူရောင်ဝတ်စုံလေးဝတ်ထားသည့် ထျန်ထျန်လေး၏ပုံဖြစ်သည်။ ဆိုလိုရင်းကရှင်း၏။ ဆယ်မိနစ်ကြာပြီးနောက် ဝေ့ပေါ်တစ်ခုလုံး ပျက်သွားတော့သည်။ ဝေ့ပေါ်ကိုဝင်မရကြသည့်သူများကတော့ Douban နှင့်ရက်ဒစ်တို့မှပြောင်း၍ မေးကြသည်။ [ခေါင်းစဥ်: ဝေ့ပေါ်ပျက်သွားခြင်း…ဘာမှမမြင်ရ…နျန်ယွီယီတကယ်လက်ခံခဲ့တာလား…။] [OP: ငါ့ကိုပြစရာ စခရင်ရှော့ခ်တွေရှိလား…သူတကယ်ပဲ လက်ထပ်ခွင့်တောင်းခဲ့တာလား…ငါ့နျန်ကျိုက်လေးက လဝက်ကြီးတောင် ဒိတ်နေခဲ့တာဟ…။] [1L: (ပုံ) ကျေနပ်ပြီလား…] [2L: (ပုံ) ကျေနပ်ပြီလား…] [3L: ဟားဟားဟား ဆောရီး…ငါရယ်မိသွားတယ်…နျန်ယွီယီပရိသတ်တစ်ယောက်ရဲ့ နောက်ဆုံးခေါင်းမာမှု…။] [4L: သည်အထဲကိုဝင်ဖို့ ငါပုံတွေတောင်ဖွက်ထားရတာ…အဲ့ဝေ့ပေါ်ပို့စ်ကို မမြင်ရမချင်း ငါ့ရဲ့နျန်ကျိုက်က မစေ့စပ်ရသေးဘူး…။] [5L: မနေ့ကမီးရှူးမီးပန်းတွေက တကယ်ကို မျက်စိကန်းသွားလောက်အောင် လှလွန်းတယ်...ဈေးနှုန်းကို ခန့်မှန်းပေးနိုင်မယ့် အတွင်းလူယုန်လေးတွေများမရှိဘူးလား...] [6L: မီးရှူးမီးပန်းတွေက သီးသန့်လုပ်ခိုင်းထားတာမျိုး...အနည်းဆုံးတော့ ဂဏန်းခုနစ်လုံးလောက်ရှိလိမ့်မယ်... (မနေ့ကသန်းခေါင်ယံ စာရွက်စာတမ်းတွေကို တံဆိပ်နှိပ်ဖို့နိုးနေခဲ့တဲ့ ယုန်လေးမှပြောကြား)] [7L: ဝေါင်း...အရင်တစ်ခေါက် မီးရှူးမီးပန်းတွေကို မြင်လိုက်ရတဲ့သူတစ်ယောက်ပေါ်လာခဲ့ပြီ...သည်တော့ နင်က ယုန်ဖိုရမ်တွေမှာလည်း လှုပ်ရှားနေတာပေါ့...ဟမ့်] [8L: အထင်လွဲနေပြီ...ခုနစ်ယောက်မြောက်ယုန်ရဲ့စကားလုံးတွေကို ဘာလို့တစ်ယောက်မှ မတုံ့ပြန်ကြတာလဲ...သည်‌တော့ အရင်တစ်ခေါက်က မီးရှူးမီးပန်းတွေကရော ဘော့စ်ဖန်လုပ်တာပဲလား...] ...... [166L: အရင်တစ်ခေါက် ဝေ့ပေါ်ပျက်သွားတုန်းက နျန်ယွီယီကို တချို့လူတွေပုတ်ခတ်ပြောဆိုနေကြတုန်း ရှဲ့မိသားစုက လူတွေထွက်လာခဲ့ကြတာမလား...အရင်တစ်ခေါက်က ရှဲ့ယီကျိုးက ရှဲ့သခင်လေး၂ လို့ တစ်ယောက်ယောက်က တူးဖော်ခဲ့တယ်...။] [167L: အထင်ကြီးစရာပဲ...ရှဲ့မိသားစုက တကယ်ကြီးအထက်တန်းအနုပညာရှင်တွေနဲ့ ပြည့်နေတာ...] [168L: ငါဝေ့ပေါ်မှာတွေ့လိုက်တယ်...ဝူးဝူးဝူး (ဆွိတီလေးက တကယ်ကိုနူးညံ့ပြီးချစ်ဖို့ကောင်းလွန်းတယ်)] [169L: ဆွိတီလေးက တကယ်ကိုချစ်ဖို့ကောင်းတယ်...ငါ့ရဲ့ အသုံးမကျတဲ့ ကြောင်ကတော့ ငါ့ကိုကုတ်ခြစ်နေတာပဲ...အရမ်းဒေါသထွက်စရာကောင်းတယ်...] [170L: ဖန်ကျုံးချွမ်းက နျန်ယွီယီရဲ့ ဝေ့ပေါ်ပို့စ်အောက်မှာ မှတ်ချက်ရေးသွားတယ်...ယုန်တွေ မြန်မြန်သွားကြည့်ကြ...] [171L: ပုံတွေယူလာမလို့လုပ်ပေမယ့်...ဝေ့ပေါ်ကနောက်တစ်ခေါက်ပျက်သွားတဲ့ပုံပဲ...] [172L: ဘော့စ်ဖန်က သူကိုယ်တိုင်နျန်ယွီယီရဲ့လက်ကို ကိုင်ထားတဲ့ပုံတင်ထားတာ...အဓိကအချက်ကသူတို့နှစ်ယောက်လုံး လက်စွပ်တွေဝတ်ထားကြတာပဲ...။] [173L: ဒါဆိုအတည်ပြုပြီးသားဖြစ်သွားပြီပဲ...သူတကယ်ကို လက်ထပ်ခွင့်တောင်းခဲ့ပြီး လုံးဝဖုံးကွယ်မထားကြဘူး...] [174L: သူတို့ရဲ့အဆင့်အတန်းတွေနဲ့ဆို ဘာဖုံးကွယ်ထားစရာလိုလဲ...တစ်ယောက်က ရှဲ့မိသားစုကို ပြန်ရောက်ပြီး ဝင်ငွေဂဏန်းရှစ်လုံးလောက်ရှိနေတဲ့သခင်လေး...နောက်တစ်ယောက်က......] ...... [688L: ယုန်တွေအားလုံးအားပေးထောက်ပံ့နေကြတာလား...မကြာသေးခင်ကမှ ဖျော်ဖြေရေးအသိုင်းအဝိုင်းထဲကို ဝင်လာပြီး ရုပ်ရှင်နည်းနည်းသာရိုက်ရသေးတဲ့ နျန်ယွီယီလက်ထပ်တော့မယ့်အကြောင်း မပြောကြတော့ဘူးလား...အသိုင်းအဝိုင်းထဲမှာ မနေချင်ရင်လည်း အိမ်ပြန်တော့လေ...သည်လောက်အထိ ဆက်တိုက်နာမည်ကြီးနေတာကြီးက အဓိပ္ပာယ်မဲ့လွန်းတယ်...] [689L: အဲ့ဒါ ငါကြားမိတယ် ချဥ်တူးနေတဲ့ကြက်သားဆိုတာလား...အိုး...သူအသက်ရှင်နေသေးတာပဲ...ဟယ်လို ကြက်သားချဥ်တူးရေ...ငါကယုန်က‌လေးပါ] [690L: “LMAO အပေါ်ကမှတ်ချက်က ငါ့ကိုသတ်နေသလိုပဲ”] [691L: သည်လိုလျှောက်ပြောနေတဲ့ အရူးတွေရှိသေးတာပဲ...နျန်ယွီယီက သရုပ်ဆောင်တစ်ယောက်ပဲ...သူက တံဆိပ်တွေ၊ မဂ္ဂဇင်းအဖုံးတွေအတွက် ဘာကိုမှလက်ခံမထားရသေးဘူး...သူကဘာလို့ ရည်းစားထားလို့မရ...လက်ထပ်လို့မရရမှာလဲ...] [692L: သူတို့ရဲ့ အိုင်ဒေါတိတ်တဆိတ်တွဲနေလို့ တစ်ယောက်ယောက်တော့ချဥ်တူးနေတာထင်တယ်...ကြက်သားချဥ်တူးရဲ့ ခံစားချက်တွေနာကျင်နေပြီလား...] ...... [1222L: ရှဲ့ယီကျိုးနဲ့ရှဲ့ယီနန်တို့ ဘာမှမတင်ကြသေးတဲ့ပုံပဲ...သူတို့ရဲ့ အတွေးတွေကိုလည်း သိချင်မိတယ်] [1223L: ဖုန့်ဟွာရဲ့အတွင်းလူဆီက သိလာရတာ...ရှဲ့ယီကျိုးက အခုလေးတင် ကုမ္ပဏီကို အမြန်လေးပြန်လာပြီး အခုစီအီးအိုရုံးခန်းထဲမှာ ရှဲ့ယီနန်နဲ့ တံခါးပိတ်နေနေတယ်တဲ့...] [1224L: သည်အခြေအနေက ငါ့ကို meme တစ်ခုကိုတောင် သတိရစေတယ်... ‘မြုံနေတဲ့ဒေါသ အီမိုဂျီ”] [1225L: သောက်ကျိုးနည်း...ငါဘာလို့ရုတ်တရက်ကြီး ရှဲ့ယီကျိုးကိုချစ်ဖို့ကောင်းတယ်လို့ မြင်လာတာလဲ...ရူးများရူးသွားပြီလား] [1226L: ‌နေပါဦး နင်ကရှဲ့ယီကျိုးမုန်းတီးသူမဟုတ်ဘူးလား...] [1227L: မုန်းတီးသူကနေ ပရိသတ်အဖြစ်ကို‌ပြောင်းသွားတဲ့ ရာဇဝင်တွင်မယ့်အပြောင်းအလဲကြီးကို ကြည့်ရတော့မှာလား] [1228L: သည်ဘဝမှာတော့ ဖြစ်လာမှာမဟုတ်ဘူး...ရွှီရင်းကျယ်ရဲ့ ပရိသတ်အဟောင်းတစ်ယောက်အနေနဲ့ အခုလုံးဝ အသည်းကွဲနေတယ်...နောက်ဘယ်သူ့ကိုမှထပ်မချစ်တော့ဘူး...] ...... [3666L: ငါပြန်လာပြီ...ရှဲ့ယီကျိုးက တကယ်ကိုဆွဲဆောင်မှုရှိလွန်းတယ်...အပြင်ပန်းမှာအေးပေမယ့် သူ့ညီလေးအပေါ်မှာတော့ ချစ်သား...ပြီးတော့နျန်ယွီယီက ချမ်းသာတဲ့မိသားစုက သခင်ငယ်လေးတစ်ယောက်အနေနဲ့ အရမ်းချစ်ဖို့ကောင်းလွန်းတယ်...အရမ်းခိုက်သွားပြီ...] [3667L: ဒါက......] [3668L: သည်ယုန်ကတော့ လက်တွေ့ဘဝရဲ့ရိုက်နှက်တာကိုခံရတော့မယ်လို့မြင်နေတယ်...ဟားဟား] [3669L: LOL ကိုယ့်မျက်နှာကိုဖြတ်ရိုက်နေတာ...] ...... ထိုပို့စ်တွင် မှတ်ချက်ပေါင်း ငါးထောင်ကျော်လောက်ဖြစ်သွားကာ ယုန်ဖိုရမ်တွင် အပြောအများဆုံး အကြောင်းအရာတစ်ခုဖြစ်လာခဲ့သည်။ သူတို့၏ နှစ်ပတ်လည်နေ့တိုင်း ပရိသတ်များက ဤပို့စ်ကို ပြန်လည်လွမ်းဆွတ်တသရင်း လာရှာကြပေလိမ့်မည်။ 🫶