Chapter 18

🎶 Chapter 18

ယဲ့ဇယ်ရှစ်၏အက ပြီးဆုံးသွားသောအခါ အားပေးသံများက လှိုင်းလုံးများအလားတဝေါဝေါ မြည်ဟီးနေခဲ့သည်။ ထိုအချိန်မှ ယဲ့ဇယ်ရှစ်၏ အပြုံးမှာ ယခုသူပြုံးနေသည်နှင့် တစ်ပုံစံတည်းဖြစ်လေသည်။ 

သူ့ပြိုင်ဖက်အဖြစ် မှတ်ယူထားသောယဲ့ဇယ်ရှစ်မှာ သူ့အား အလေးအနက်ပင်မထားချေ။

ထိုအပြုံးမှာ ယဲ့ဇယ်ရှစ်က သူ့အားပမာမခန့် လုပ်နေရခြင်း မဟုတ်‌ပေ။

ပြောရမည်ဆိုလျှင် အထိမခံဖြစ်နေသူမှာ ကျန်းရန်သာ ဖြစ်နေလေကာ ယဲ့ဇယ်ရှစ်ကမူ သူ့နေမြဲအတိုင်းပင် ‌ဖြစ်သည်။

ထို့ကြောင့် သူက အဆင့်တက်ရန်အလွယ်တကူ အရှုံးပေးနိုင်ခဲ့ခြင်း ဖြစ်သည်။ ယဲ့ဇယ်ရှစ်မှာ ရမှတ်ဆိုသည်များကို လုံးဝဂရုမစိုက်ပေ။

ဤကဲ့သို့ မတိုက်ခိုက်ဘဲ ရရှိလာသော မချင့်မရဲဖြစ်မှုနဲ့အရှုံးမှာ ကျန်းရန်အား အလွန်အထိနာ‌စေ‌လေသည်။ 

ဤကဲ့သို့ ခံစားနေရသော်လည်း သူ ယဲ့ဇယ်ရှစ်နှင့် တစ်ဖွဲ့တည်းနေချင်လေသည်။

ကျန်းရန်၏ အဖြေအား အတော်ကြာစောင့်ဆိုင်းပြီး‌နောက် ထန်ကျင့် ဆက်ပြောလာသည်။

"ငါတော့ ကျန်းရန်က တော်တော်လည်းသင့်တော်တယ်လို့ထင်တယ်...မင်းတို့ရော ဘယ်လိုထင်လဲ..."

ယုယန်နှင့် ဝမ်အန်မှာ ပြောစရာမရှိပေ။ 

ယဲ့ဇယ်ရှစ်မှာလည်း ထူးမခြားနားပင်။ သူ့ကြည့်ရသည်မှာ မည်သည်ကိုမှ ဂရုစိုက်ပုံမရပေ။ 

"အဆင်ပြေတယ်..."

ကျန်းရန်၏ မျက်ဝန်းများ ယောင်ယောင်လေး လှုပ်ရှားသွားသည်။

ကျန်းရန် အနည်းငယ် စိတ်တိုလာမိသည်။ ယဲ့ဇယ်ရှစ်က ဂရုစိုက်ပုံမရသော်လည်း သူက ဂရုစိုက်လေသည်။

သူ "Time Idol" ကို လာရခြင်းမှာ ပွဲဦးထွက်ရန်အတွက်၊ အနိုင်ရရန်အတွက် ဖြစ်လေသည်။ 

ငါက ဘာဖြစ်လို့ ယဲ့ဇယ်ရှစ်ကြောင့် အဆင့်တက်မယ့် အခွင့်အရေးကိုအဆုံးရှုံးခံရမှာလဲ... 

ဤသို့တွေးလိုက်သောအခါ ကျန်းရန် အံကိုကြိတ်ကာ ပြောလိုက်လေသည်။

"ဟုတ်ပြီ...ငါမင်းတို့ အဖွဲ့ထဲကိုဝင်ခဲ့မယ်..."

ထန်ကျင့်ပြုံးလိုက်သည်။ ဤသို့ဖြင့်ပထမဦးဆုံး အဖွဲ့တစ်ဖွဲ့အားအောင်မြင်စွာ ဖွဲ့စည်းလိုက်နိုင်လေသည်။

ဘေးမှ ကြည့်နေကြသူများမှာ တစ်ယောက်ပြီး တစ်ယောက် ခေါင်းခါလိုက်ကြသည်။ သေချာပေါက်ပင် သူတို့ဘာမှ မတတ်နိုင်ကြတော့ပေ။ ထို့ကြောင့် လူတိုင်း စိတ်ဓာတ်ကျစွာဖြင့်ပင် သူတို့ နှစ်သက်သောသူများအား အုပ်စုဖွဲ့ရန် လိုက်ရှာကြတော့သည်။ 

ဤတစ်ခေါက်ပြိုင်ပွဲ၏ ပြောင်းလဲသွား‌သော စနစ်တွင် အသင်းဖွဲ့စည်းမှုအား လွတ်လပ်ခွင့်ပေးထားရုံသာမက သီချင်းရွေးချယ်မှုကိုလည်း ကန့်သတ်ထားခြင်းမရှိပေ။ ပရိုဂရမ်အဖွဲ့သားများနှင့် နည်းပြများမှာလည်း ဝင်ရောက်စွက်ဖက်မည်မဟုတ်ဘဲ ပြိုင်ပွဲဝင်များအား လွတ်လပ်စွာ ရွေးချယ်ခွင့်ပေးထားလေသည်။ 

အသင်းဖွဲ့ခြင်း အောင်မြင်စွာ ပြီးဆုံးပြီးနောက် ပထမဆုံးလုပ်ရသည်မှာ သီချင်းရွေးရခြင်းပင် ဖြစ်သည်။

ယဲ့ဇယ်ရှစ်မှာ သီချင်းရွေးချယ်ရာတွင် လုံးဝ ဝင်မပါ‌ပေ။ မကြာမီတွင် သီချင်းနှစ်ပုဒ်ကို ဇကာတင် ရွေးချယ်လိုက်ကြသည်။

ထို့နောက် ကျန်သည်မှာ C နေရာအတွက် ရွေးချယ်ခြင်းသာ ဖြစ်သည်။

ထန်ကျင့် နှုတ်ခမ်းတို့ကို စုဝိုင်းလိုက်ကာ ယဲ့ဇယ်ရှစ်အား ကြည့်လျက် အရင်ဆုံးပြောလာသည်။

"ယဲ့ဇယ်ရှစ်... ဒီတစ်ခေါက် C နေရာအတွက် မင်းနဲ့ပြိုင်ချင်တယ်..."

ထန်ကျင့်၏ စိတ်ခံစားချက်များမှာ အလွန် ရှုပ်ထွေး‌နေလေသည်။

ယဲ့ဇယ်ရှစ် "Time Idol"တွင် ဝင်ပြိုင်ရခြင်းမှာ သူ့(ထန်ကျင့်)ကို လိုက်ရန်အတွက်ဖြစ်သည်။ အမှန်အတိုင်းပြောရလျှင် ယဲ့ဇယ်ရှစ်အား သူ့မျက်လုံးထဲတွင် လုံးဝထည့်မထားပေ။ 

ယဲ့ဇယ်ရှစ်၏ စိတ်အပြောင်းအလဲ မြန်ပုံမျိုးနှင့်ဆိုလျှင် သူမကြာမီမှာပင် ပြိုင်ပွဲမှ အထုတ်ခံရနိုင်လေသည်။

ကုမ္ပဏီ၏အကူအညီဖြင့် ထန်ကျင့်မှာ သင်တန်းသားအားလုံးတို့၏ စွမ်းရည်တို့ကို လေ့လာထားလေသည်။ သူပထမနေရာကို အလွယ်တကူ ရနိုင်လိမ့်မည်ဟု ထန်ကျင့် ယုံကြည်နေလေသည်။ သူသာ ပွဲဦးထွက်နိုင်ပြီး ဟယ့်ကျင်းယွင်၏ ရုပ်ရှင်တွင် ဇာတ်ကောင်တစ်နေရာစာ ရနိုင်သရွေ့ ယဲ့ဇယ်ရှစ်ပင်ဖြစ်စေ၊ မည်သူ့ပင်ဖြစ်စေ ထိုသူတို့အား သူ ဂရုစိုက်ရန်မလိုပေ။

သို့သော် ထန်ကျင့် မမျှော်လင့်ခဲ့သည်မှာ ယဲ့ဇယ်ရှစ်က ရုတ်တရက်ကြီး သူ့ကိုလိုက်‌နေခြင်းအား လက်လျှော့လိုက်မည်ကို ဖြစ်သည်။

ထို့အပြင် ဒုတိယမြောက်တင်ဆက်မှု၌ အားလုံးကိုပင် အံ့အားသင့်သွား‌စေခဲ့သေးသည်။ 

ထန်ကျင့်၏ နံပါတ်၁ ဟူသော နေရာမှာ သွားလေပြီ ဖြစ်သည်။ ဟယ့်ကျင်းယွင်မှာလည်း ယဲ့ဇယ်ရှစ်ထံသို့ အာရုံစိုက်သွားလေသည်။ 

ထိုသို့ ခံစားနေရသည်မှာ ယဲ့ဇယ်ရှစ်က သူ့စိတ်ထဲ တွေးထားသော ရိုင်းစိုင်းသည့် အခြား ဒုတိယမျိုးဆက်သူဌေးသားလေးများကဲ့သို့ မဟုတ်ကြောင်း နားလည်သွားသောအခါတွင် ဖြစ်လေသည်။

ထန်ကျင့် အဘယ့်ကြောင့် ထိုသို့ နှိုင်းယှဉ်ခဲ့မိမှန်း မသိပေ။ ဟယ့်ကျင်းယွင်က ယဲ့ဇယ်ရှစ်အား ကြော်ငြာရိုက်ရန်ပြောလာသည်ဟု သိလိုက်ရသောအခါတွင် သူ နစ်နာသည်ဟုပင် ခံစားလိုက်ရသည်။

ယဲ့ဇယ်ရှစ်အား စကားပြောရန် အစပြုသည်မှာ ဟယ့်ကျင်းယွင် ဖြစ်သည်ကို သူမြင်ခဲ့ရသည်။ ထို့နောက် ယဲ့ဇယ်ရှစ်နှင့်အတူ ပြန်ထွက်လာသည်ကိုလည်း တွေ့လိုက်ရ‌သည်။

သူ ယမန်နေ့ညက စွေ့ယီနှင့် ရန်ဖြစ်ရသည့်အကြောင်းမှာ စွေ့ယီ၏ လက်လွတ်စပယ်ပြောတတ်သည့် ပါးစပ်ကြောင့်သာမကဘဲ ထိုကိစ္စ‌နှင့် ပတ်သက်၍လည်း ဖြစ်လေသည်။ 

ထန်ကျင့် ယဲ့ဇယ်ရှစ်အား ယနေ့ သူနှင့်အတူ အသင်းဖွဲ့ရန် ပြောရခြင်းမှာ သူ ယဲ့ဇယ်ရှစ်နှင့် ဆက်လက်ယှဉ်ပြိုင်လိုသောကြောင့် ဖြစ်သည်။

ယဲဇယ်ရှစ်က ကြော်ငြာရိုက်ရန်ပူးပေါင်းခြင်းဟု ပြောသော်လည်း ထန်ကျင့်ယုံကြည်ခြင်းမရှိပေ။

ဟယ့်ကျင်းယွင်မှာ သရုပ်ဆောင်စာရင်းအား မထုတ်ပြန်ရသေးသောကြောင့် သူ့တွင် အခွင့်အရေးရှိသေးလေသည်။ 

ယှဉ်ပြိုင်ရန် ပြိုင်ပွဲနှစ်ပွဲ ကျန်နေသေးသောကြောင့် သူအမြင့်ကို တက်လှမ်းရန်လည်း အခွင့်အရေးရှိနေသေးသည်။

ထန်ကျင့်က ဘယ်တော့မှ အလွယ်တကူ အရှုံးပေးလိမ့်မည် မဟုတ်ပေ။

မမျှော်လင့်စွာပင် ထန်ကျင့် ထိုသို့ပြောပြီးနောက် ယဲ့ဇယ်ရှစ်က တိုးလျစွာပြောလာသည်။

"ငါ C နေရာအတွက် မပြိုင်ချင်ဘူး..."

ကျန်းရန်၏ မျက်နှာပေါ်တွင် 'ထင်ထားတဲ့အတိုင်းပဲ' ဆိုသည့်အမူအရာ ဖြစ်နေလေသည်။ 

ထန်ကျင့် ခဏတာ ‌မိန်းမောသွားလေသည်။

"ဘာကြီး..."

ယဲ့ဇယ်ရှစ် ပြုံးလိုက်ကာ အလေးအနက်ပြောလာသည်။ 

"မင်းကကြည့်ကောင်းတာပဲ ပြီးတော့သီချင်းဆိုတာမှာရော ကတာမှာပါ တော်တယ်လေ... ငါတို့အဖွဲ့ထဲမှာ မင်းကပဲ C နေရာအတွက် အသင့်တော်ဆုံးလို့ငါထင်တယ်...ငါတော့မင်း C နေရာကို ယူတာ ဘာမှငြင်းစရာမရှိဘူး...မင်းလုပ်လို့ရတယ်..."

လူကိုယ်တိုင် ချီးကျူးခံလိုက်ရသောအခါ ထန်ကျင့်ပင် အနည်းငယ် ရှက်သွားရသည်ကို မထိန်းနိုင်လိုက်‌ပေ။ သို့သော် တစ်ချိန်ထဲမှာပင် သူ အလွန်စိတ်ရှုပ်ထွေးသွားလေသည်။ 

"နေပါဦး...ဘာဖြစ်လို့ မင်းက ငါနဲ့ Cနေရာအတွက် မပြိုင်ချင်ရတာလဲ..."

"ငါကဘာဖြစ်လို့ Cနေရာအတွက် တိုက်ခိုက်ရမှာလဲ..." 

ယဲ့ဇယ်ရှစ်က မေးခွန်းထုတ်လိုသော အကြည့်တို့ဖြင့်မေးလိုက်‌လေသည်။

ထန်ကျင့် နင်သွားလေသည်။

ယုယန်နှင့် ဝမ်အန်တို့မှာ တစ်ယောက်က်ိုတစ်ယောက် ကြည့်ကာ ပြုံးလိုက်ကြလေသည်။

သေချာပေါက်ပင် ယဲ့ဇယ်ရှစ်က ရေဝိညာဉ် ဆိုသည်ကို ယခင်က အတွေ့အကြုံရှိဖူးသူတို့သာ နားလည်နိုင်‌ပေလိမ့်မည် ဖြစ်လေသည်။ 

(T/N - ရေဝိညာဉ် ဆိုတာ အပျော်လာဆော့တဲ့သူလိုမျိုးပေါ့ သန်မာတဲ့ ပြိုင်ဖက်ဖြစ်ပေမယ့် နိုင်ဖို့ အစီအစဉ်မရှိတဲ့သူမျိုးကို ခေါ်တာပါ)

Cနေရာအတွက် ထန်ကျင့်နှင့် မည်သူမှ မယှဉ်ပြိုင်လိုသောကြောင့် သဘာဝကျစွာပင် Cနေရာမှာ သူရသွားလေသည်။

ထန်ကျင့် မျက်နှာပေါ်ရှိ ရှုပ်ထွေးနေမှုကြီးအား ကျန်းရန် ကြည့်‌နေလိုက်သည်။ သူ ရှေ့ဆက်ကြုံရမည်တို့အား စောင့်ကြည့်ရန်သာ စိတ်လှုပ်ရှားနေမိတော့သည်။

ယဲ့ဇယ်ရှစ်ရဲ့ စိတ်အေးလက်အေး လေ့ကျင့်မှု‌တွေကိုသာ ထန်ကျင့်တွေ့လိုက်ရင် ဘယ်လိုအမူအရာမျိုးဖြစ်သွားမှာပါလိမ့်...ငါ တွေးကြည့်ရုံနဲ့တင်ကို စိတ်လှုပ်ရှားနေမိပြီ...

ယခုပြိုင်ပွဲတွင် ပြိုင်ပွဲဝင်တို့အား လေ့ကျင့်ရန် ရက်အနည်းငယ်သာပေးထားလေသည်။ ၅ရက်အတွင်းမှာပင် အဖွဲ့တိုင်းက ကကွက်တစ်ခုနှင့် သီချင်းတစ်ပုဒ်အားကြိုတင် တင်ဆက်ပြရန် လိုလေသည်။

အဖွဲ့လိုက် လေ့ကျင့်မှုများမှာ တစ်ဦးတည်း လေ့ကျင့်မှုထက် ပို၍ ခက်ခဲလေသည်။ အဆုံးတွင် အဖွဲ့ဝင်တစ်ယောက်ချင်းစီတိုင်း၏ အခြေအနေတို့မှာ မတူသောကြောင့် တိုးတက်မှုအခြေအနေမှာ တန်းတူဖြစ်မည်ဟု မည်သူမှအာမ မခံနိုင်ပေ။

လေ့ကျင့်ရေး၏ ပထမနေ့တွင် ယဲ့ဇယ်ရှစ်မှာ နေ့တစ်ဝက်ခန့်အား ဆိုဖာပေါ်တွင်လှဲ၍သာ ကုန်ဆုံးခဲ့လေသည်။ 

ထန်ကျင့်မှာ သူ၏ ကကွက်များကိုပင် မမှတ်မိနိုင်သေးပေ။ သို့သော် ယဲ့ဇယ်ရှစ်မှာ သူ့ကကွက်များကိုသာမက အခြားသူများ၏ ကကွက်များကိုပါ အကုန်မှတ်ထားပြီးဖြစ်လေသည်။ လှုပ်ရှားမှုများမှာ သူ့ထက်ပင် ပို၍ ချောမွေ့နေလေသေးသည်။

ထန်ကျင့် မျက်ဖြူလှန်မိသည်။ ကိစ္စများမှာ သူထင်ထားသည့် အတိုင်းဖြစ်မလာပေ ဟုသူခံစားလိုက်ရသည်။

လေ့ကျင့်ရေး၏ ဒုတိယမြောက်ရက်တွင် အခြားပြိုင်ပွဲဝင်များမှာ သီချင်းကို စတင်လေ့ကျင့်နေကြပြီဖြစ်သော်လည်း ယဲ့ဇယ်ရှစ်မှာ တစ်ပုဒ်လုံးအား ပြီးပြည့်စုံစွာပင် ဆိုနိုင်လေပြီဖြစ်သည်။ ထို့အပြင် သီချင်းတစ်ပုဒ်လုံးအား လုံးဝကီးမကြောင်ဘဲ ဆိုသွားခြင်း ဖြစ်လေသည်။ သူ၏ သံလိုက်ဓာတ်အပြည့်နှင့် အသံမှာ အလွန်ကောင်းလေရာ ကြေးများသည့် နည်းပြယွမ်မင်ကပါ ချီးကျူးလာလေသည်။ 

အဖွဲ့ထဲရှိ ကျန်ရှိသော လေးယောက်မှာ အသည်းအသန် လေ့ကျင့်ရေးဆင်းနေရလေသည်။ ယဲ့ဇယ်ရှစ်ကမူ သူ၏နေကြာစေ့ထုပ်ကို ထုတ်ယူလိုက်ကာ သူတို့လေ့ကျင့်နေသည်အား နေကြာစေ့ဝါးရင်းဖြင့် ကြည့်နေခဲ့သည်။

သူက ကြီးကြပ်သူတစ်ယောက်ကဲ့သို့ တစ်ခါတရံတွင် တစ်ယောက်ချင်းစီအတွက် ကကွက်များနှင့် အမှားများကိုပင် ထောက်ပြတတ်လေသေးသည်။

လေ့ကျင့်ရေး တတိယမြောက်ရက်တွင် ယဲ့ဇယ်ရှစ်မှာ တစ်နေ့လုံးတွင်တစ်နာရီသာ လေ့ကျင့်တော့သည်။

ထိုတစ်နာရီတွင် သူရှိနေရသည့်အကြောင်းမှာ ထိုအချိန်တွင် နည်းပြများက သူတို့၏ လေ့ကျင့်ရေးအားလာရောက်စစ်ဆေးသည့် အချိန်ဖြစ်သောကြောင့်ပင် ဖြစ်သည်။

ငါ လေ့ကျင့်ဖို့ တွန်းအားပေးခံနေရပါတယ်လို့...

ထိုနေ့က လေ့ကျင့်ရေး ပြီးဆုံးသွားသောအခါ ယဲ့ဇယ်ရှစ်မှာ လေ့ကျင့်ရေးအခန်းထဲမှ ပထမဦးဆုံးထွက်သွားသူ ဖြစ်လေသည်။

မတ်တပ်ရပ်ကျန်နေခဲ့သူ ထန်ကျင့်မှာ လည်ချောင်းများပင် တင်းကျပ်လာ‌လေသည်။

ကျန်းရန် သူ့ခေါင်းအား တိတ်ဆိတ်စွာပင် ခါမိသည်။ ထိုအခါမှ သူ အရှေ့ကိုထွက်ကာ ထန်ကျင့်၏ပခုံးပေါ်သို့ ပုတ်လိုက်ကာနားလည်မှုအပြည့်ဖြင့် ပြောလိုက်‌လေသည်။

"ဒီလိုမျိုးကို ငါအရင်ကကြုံခဲ့ရပြီးပြီကွ ကျင့်သားရအောင်သာ ကြိုးစားလိုက်တော့..."

ထန်ကျင့် အံတင်းတင်းကြိတ်ထားမိသည်။ ပထမဦးဆုံးအကြိမ်အဖြစ် သူ အင်အားမဲ့ရခြင်း၏ လေးနက်သောအဓိပ္ပါယ်ကို သိလိုက်ရလေသည်။ 

ထန်ကျင့် သူ့မျက်နှာရှိ အမူအရာတို့အား ထိန်းချုပ်လိုက်ကာ အေးစက်စွာပြောလာသည်။ 

"ငါ ဆက်လေ့ကျင့်လိုက်ဦးမယ် မင်းတို့သွားချင်ရင် သွားလိုက်တော့..."

ကျန်းရန်နှင့် ယုယန်တို့မှာ တစ်ယောက်နှင့်တစ်ယောက် ကြည့်ကာ သူတို့စိတ်တွင်းမှာပင် သက်ပြင်းချမိသည်။

တစ်ဦးတစ်ယောက်က ကိုယ့်ထက် သာသည်ဟု ဝန်ခံရမည်က အလွန်ကို ခက်ခဲလေသည်။

ဤကဲ့သို့ ကူကယ်ရာမဲ့ခြင်းကို ကြုံတွေ့ခဲ့ဖူးသော ကျန်းရန်မှာတည်ငြိမ်စွာပင် လက်ခံလိုက်နိုင်ပြီးဖြစ်လေသည်။

ကြာသာပတေးနေ့တွင် "Time Idol" ၏ တရားဝင်Weiboစာမျက်နှာ၌ ထရေလာအသစ်အား ထုတ်လွှင့်လေသည်။

ထရေလာအသစ်မှာ ပြိုင်ပွဲဝင်တို့၏ တစ်ပတ်တာလုံး လေ့ကျင့်ခဲ့သော လေ့ကျင့်ရေးဗီဒီယိုဖိုင် ဖြစ်လေသည်။ ပရိသတ်များမှာ မှန်ဘီလူးများကိုဆောင်ထားကြပြီး သူတို့၏အိုင်‌ဒေါများအား တစ်ကွက်ချင်း လိုက်ရှာကြတော့သည်။

ယဲ့ဇယ်ရှစ်၏ ပရိသတ်များမှာလည်း ထိုသတင်းကိုကြားလေသည်။ သို့သော် နှစ်မိနစ်ကြာသည့် ဗီဒီယိုတွင် တစ်မိနစ်နှင့် ၅၀စက္ကန့်အထိ ရောက်လာသော်လည်း ယဲ့ဇယ်ရှစ်၏ ပုံရိပ်အား သူတို့ ရှာမတွေ့ကြသေးပေ။

ပရိသတ်များ စိုးရိမ်နေစဉ်မှာပင် ထန်ကျင့်၏မျက်နှာမှာ ဖန်သားပြင်ပေါ်တွင်ပေါ်ထွက်လာကာ သူ၏ တည်ငြိမ်စွာပြောလိုက်သော စကားတို့အား ကြားလိုက်ရလေသည်။

"ယဲ့ဇယ်ရှစ်... ဒီတစ်ခေါက် C နေရာအတွက် မင်းနဲ့ပြိုင်ချင်တယ်..."

တစ်ဆက်တည်းတွင် ကင်မရာမြင်ကွင်းက ယဲ့ဇယ်ရှစ်ကို ပြလာကာ သူ၏စိတ်ရှုပ်ထွေးနေသောမျက်လုံးတို့ကို အသားပေးပြလိုက်သည်။

ဗီဒီယိုမှာ ထိုနေရာ၌ပင် ရုတ်ချည်း ပြီးဆုံးသွားသည်။

ယဲ့ဇယ်ရှစ်၏ပရိသတ်များမှာ ချက်ချင်း‌ ထိတ်လန့်သွားကြ‌လေသည်။

[ဒီအခြေအနေက ဘယ်လိုကြီးလဲဟ...]

[ယဲ့ဇယ်ရှစ်နဲ့ ထန်ကျင့်ကတဖွဲ့တည်းမဟုတ်ဘူးလား...]

[အဆက်ဟောင်းနဲ့ အတူရှိရတာ နည်းနည်းတော့ စိတ်လှုပ်ရှားဖို့ မကောင်းဘူးလား...]

"[ပရိုဂရမ် အဖွဲ့က တကယ်ကို တည်းဖြတ်တဲ့နေရာမှာ တော်တာပဲ... နောက်ဘာဆက်ဖြစ်မှာလဲဆိုတာ သူတို့တွေဆက်မပြနိုင်တော့ဘူးလား...]

ထန်ကျင့်၏ ပရိသတ်များမှာလည်း သူတို့နည်းတူ အံ့အားသင့်နေခဲ့ကြသည်။

[မဖြစ်နိုင်တာ ငါတို့ထန်ထန်က တကယ်ကြီး ယဲ့ဇယ်ရှစ်နဲ့ အသင်းဖွဲ့တယ်တဲ့လား...]

[ယဲ့ဇယ်ရှစ်က ခွေးသားရေကပ်ခွာလို သူ့အပေါ်ကပ်တွယ်နေတာ မဟုတ်ဘူးလား...]

ထိတ်လန့်သွားသော ပရိသတ်တို့နှင့် ယှဉ်လျှင် ဖြတ်သွားဖြတ်လာတို့မှာ ပို၍ပင် စိတ်လှုပ်ရှားနေကြသည်။

[ယဲ့ဇယ်ရှစ်နဲ့ ထန်ကျင့်တို့က တစ်ဖွဲ့တည်း...စိတ်ဝင်စားဖို့ကောင်းတဲ့ အတွဲဖြစ်ရုံမကဘူး အဆက်ဟောင်းတွေကြားက တိုက်ပွဲပဲ အဟေး...ဟေး...]

များစွာသော ပရိသတ်တို့မှာ သူတို့နှစ်ဦး စင်မြင့်ပေါ်သို့ ယူဆောင်ပေးလာမည့် ရင်ဖိုဖွယ်ပွဲကို မျှော်လင့် စောင့်စားနေကြ‌လေတော့သည်။

ပူပူနွေးနွေး ဖွဲ့စည်းထားသော ရှီးထန် CP ဖန်ဒမ်းမှာလည်း အလွန်စိတ်လှုပ်ရှားနေကြသည်။ 

ဒီ cp ကိုစ ship ကာစရှိသေးတယ် သူတို့နှစ်ယောက်ပေါင်းပြီး ဒီလိုမျိုးအချိုကျွေးလိမ့်မယ်လို့ ဘယ်သူကမျှော်လင့်ထားမှာတဲ့လဲလို့...

အချို့သူများမှာ အလွန်ပျော်နေကြပြီး အချို့မှာ စိုးရိမ်နေကြလေသည်။ မည်သို့ပင်ဆိုစေကာမူ တရားဝင် Weiboအကောင့်မှ ကြေညာလိုက်သောထိုဗီဒီယိုမှာ လူတိုင်း၏သိချင်စိတ်အား လှုံ့ဆော်ပေးလိုက်နိုင်လေသည်။

အချို့ကြည့်ရှုသူများမှာ တိုက်ရိုက်ကြည့်ရှူရန် အစီစဉ်မရှိသော်လည်း "Time Idol" ၏ သုံးခုမြောက်အပိုင်းပေါ်သို့ လူထု၏ ဆွေးနွေးမှုများမှာ ပို၍များပြားသောကြောင့် ထိုသူများမှာ တိုက်ရိုက်ထုတ်လွှင့်မှု စင်မြင့်ရှိရာ ခန်းမသို့ပင် ထိုင်ခုံနေရာများ လျှို့ဝှက်စွာ ဝယ်ယူထားကြလေတော့သည်။

"Time Idol" ၏ သုံးပွဲမြောက် ယှဉ်ပြိုင်မှု၏ ထိုင်ခုံ‌နေရာ ကြိုတင်ဝယ်ယူမှုတို့မှာ အထွတ်အထိပ်သို့ ရောက်ရှိခဲ့လေသည်။

🎶🎶🎶