Chapter 31

🎶 Chapter 31

ထိုသူမှာ ယဲ့ဇယ်ရှစ်ပင် ဖြစ်သည်။ 

ယဲ့ကျန့်ပင်း သူ့ကိုပေးသည့် RV မှာ Behemoth ဖြစ်နေမည်ကို ယဲ့ဇယ်ရှစ်ပင် မထင်ထားခဲ့မိပေ။

ကားအမျိုးအစားများနှင့် မရင်းနှီးသည့် သူများသာ ယခုRV ပါကင်ထိုးထားသည်ကိုမြင်လျှင် ဤကားက ကြောင်တောင်တောင်ပုံစံဖြင့် ဘတ်စ်ကားတစ်စီး ဟုသာထင်ကြပေလိမ့်မည်။

သေချာပေါက်ပင် ပုံမှန်ဘတ်စ်ကားနှင့် Behemoth ကြား ကွာခြားချက်မှာ အလွန်ကြီးမားသည်။ ကားအပြင်ပိုင်းရှိ နက်မှောင်သည့် သုတ်ဆေးမှာ အလွန်‌ဈေးကြီးပုံပေါ်ကာ တောက်ပြောင်နေသည့် မှန်များမှာ ကိုယ်လုံးပေါ်မှန်ကဲ့သို့ပင်။

RVအတွင်းပိုင်းတွင် အိပ်ခန်း၊ ဧည့်ခန်း၊ အနားယူခန်း၊ မီးဖိုချောင်အပြင် သီးခြားသန့်စင်ခန်းတစ်ခုတို့ပင် ပါဝင်သည်။ 

ထိုRV က အလွန်အာရုံစိုက်ချင်စရာ ကောင်းသည်ဟု ယဲ့ဇယ်ရှစ် အစ၌ ခံစားရသော်လည်း အတွင်းထဲရှိအိပ်ခန်းကိုမြင်သောအခါ 'ဒီကားက အဲ့ဒီလောက်လည်း မဆိုးပါဘူး' ဟု ရုတ်တရက် တွေးလိုက်မိသည်။ 

နားချိန်များတွင် အခြားသရုပ်ဆောင်များက ထိုင်ခုံအမှီပေါ်တွင်သာ နားနိုင်သော်လည်း သူက‌မူ ကားဆီပြန်လာ၍ တရေးတမော ကောင်းကောင်း မှေးနိုင်မည်ဖြစ်သည်။

ဒါ တော်တော်လန်းတာပဲ...

ထိုRV မောင်းလာသည်နှင့်တစ်ပြိုင်နက် လူထု၏ အာရုံကို ချက်ချင်း ဖမ်းယူလိုက်နိုင်သည်။ 

များစွာသော သတင်းထောက်များမှာ ထိုRVကိုသာ ကင်မရာများချိန်ကာ ကသုတ်ကရုတ် ဓာတ်ပုံရိုက်ရန် ပြင်ကြတော့သည်။ 

ကင်မရာရှက်တာခလုတ်သံ တရစပ်များကြားမှ အနက်ရောင်ကားတံခါးက ဖြည်းညှင်းစွာ ပွင့်လာလေသည်။ ထို့နောက် ‌ဦးဆုံးဆင်းလာသူမှာ ကောင်းရှူဖြစ်သည်။ 

ကောင်းရှူက အပြင်ဘက်ရှိ နေအပူချိန်နှင့် သူတို့ကိုချိန်ထားသော ကင်မရာများကို တစ်ချက်ကြည့်လိုက်ကာ အတွင်းထဲသို့ ပြန်ဝင်သွားပြီး လူတစ်ယောက်ကို စကားသွားပြောလေသည်။ 

စက္ကန့်အနည်းငယ်ကြာသောအခါ လက်ထောက်က ထီးတစ်ချောင်းကို ကမ်းလာခဲ့သည်။ ‌ကောင်းရှူ ထိုထီးကိုဖွင့်ပြီးသောအခါ ယဲ့ဇယ်ရှစ်က ဖြည်းညင်းစွာ လမ်းလျှောက်ထွက်လာခဲ့သည်။ 

ထိုမြင်ကွင်းကို မြင်လိုက်ရသောသူတို့၏ စိတ်ထဲတွင်: "လခွမ်း...မင်းက ရုပ်ရှင်ရိုက်ဖို့လာတာလား... ရုပ်ရှင်ရိုက်တာကို စောင့်ကြည့်ဖို့လာခဲ့တာလားဟ...အရမ်းရှိုးထုတ်တာပဲ..."

နောက်တစ်စက္ကန့်တွင် ထိုသူ၏မျက်နှာကို အားလုံး ရှင်းရှင်းလင်းလင်း မြင်လိုက်ရသည်။

အနက်ရောင်ထီးအောက်တွင် ယဲ့ဇယ်ရှစ်၏ ပန်းရောင်ဆံပင်မှာ တမူထူးခြားစွာ လင်းလက်နေကာ သူ့အသားအရည်မှာလည်း ပို၍ပင် ကြွေရောင်လဲ့နေခဲ့သည်။ ယဲ့ဇယ်ရှစ်က လန်းဆန်းပုံရသည့် သာမန် အဝတ်တို့ကို ဝတ်ဆင်ထားသောကြောင့် ငယ်ရွယ်မှုတို့ဖြင့် ပြည့်လျှန်းနေသည်။

ဘေးနားရှိ လူများက စိုက်ကြည့်နေသည်ကို သတိပြုမိသောအခါ ယဲ့ဇယ်ရှစ် သူတို့ကို ရက်ရက်ရောရော ပြုံးပြလိုက်သည်။

လူတိုင်း: "..."

ယဲ့ဇယ်ရှစ် ဖြစ်နေတာပဲ...ကိစ္စမရှိပါဘူး...

သတင်းထောက်များက မလှုပ်မယှက်ဖြင့် ဓာတ်ပုံအနည်းငယ် ရိုက်ယူလိုက်ကြသည်။ ယဲ့ဇယ်ရှစ်၏ ပုံစံမှာ အလွန် အံ့ဩဖွယ်ကောင်းနေသည်။

အချိန်အကြာကြီး စောင့်နေခဲ့ကြသော ဝန်ထမ်းများမှာ ယဲ့ဇယ်ရှစ်ကို မြင်သောအခါ အလျင်အမြန်ရှေ့ထွက်လာကြပြီး သူ့ကို လမ်းပြလိုက်ကြသည်။ 

ဟယ့်ကျင်းယွင်က ယဲ့ဇယ်ရှစ်ကို ကောင်းကောင်းဂရုစိုက်ပေးရန် သက်ဆိုင်သူများအား မှာကြားထားလေသည်။

ပွဲခင်းထဲသို့ ယဲ့ဇယ်ရှစ် ဝန်ထမ်းနှင့်အတူ လိုက်မသွားမီအထိ ဓာတ်ပုံရိုက်သံများက စဲမသွားပေ။ 

မည်သူ စလိုက်သည်ကို မသေချာသော်လည်း ဆွေးနွေးမှု အများအပြားရှိလာသည်။

"ဒီယဲ့ဇယ်ရှစ်က အတော်လေးချမ်းသာတာပဲ..."

"အဲဒါတင်မဟုတ်ဘူး...ပြောရရင် သူက ယဲ့မိသားစုက သားပဲလေ..."

"ဒီRV ရဲ့ တန်ဖိုးကတင် တခြားလူတွေအများကြီး မတတ်နိုင်တဲ့ပမာဏပဲ..."

"ဒါပေမဲ့လည်း ရုပ်ရှင်အဖွဲ့ထဲကို လာရတာ သူ့အတွက် ပထမဆုံးပဲလေ...ဒီလိုမျိုးကြီး ကြွားပြနေလို့ အဆင်ပြေပါ့မလား..."

"သူပျော်နေသရွေ့ ဆိုတာမျိုး ဖြစ်နေမလား...ဖြစ်နိုင်တာတော့ ငါးစက္ကန့်လောက်စာပဲ ပါမှာနေမှာပါ..."

"ဘာကိုပြောချင်တာလဲ..."

"ငါ တခြားသူတွေဆီက ကြားတာကတော့ ဒါရိုက်တာချန်က သူ့ကို စိတ်တိုင်းမကျဘူးလို့ ထင်ရတာပဲတဲ့..."

ထို့နောက် ထိုစကားဝိုင်းကို မည်သူမှ အဖြေမပေးခဲ့ဘဲ တစ်ယောက်နှင့်တစ်ယောက်သာ ကြည့်လိုက်ကြသည်။ မျက်လုံးထဲတွင် ရွှင်မြူးရိပ်တို့ ပါနေသည်ကိုလည်း တစ်ယောက်ကို တစ်ယောက် မြင်လိုက်ကြသည်။

ဟုတ်ပ...မင်းမှာပိုက်ဆံရှိတော့ရော ဘာတတ်နိုင်မှာလဲ...

ယဲ့ဇယ်ရှစ်အတွက် အရည်အချင်းကိုသာ အသိအမှတ်ပြုပြီး လူကြိုက်များသည်ကို မကြည့်သည့် ဒါရိုက်တာ ချန်နှင့် တွေ့ရသည်မှာ သနားစရာပင်။ 

များစွာသောလူတို့မှာ ထိုပွဲကြီးပွဲကောင်းကို စောင့်မျှော်ရန်သာ သူတို့စိတ်ထဲတွင် တွေးနေခဲ့ကြတော့သည်။

သူ ဒီနေ့ကြွားပြီး ပျော်ချင်ပျော်နိုင်နေပေမယ့် မောင်းထုတ်ခံလိုက်ရတဲ့အချိန်ကျရင်တော့ အရှက်ကွဲမှာပဲ...

သူတို့တွင် ပေါများစွာရှိနေသည်မှာ အချိန်ပင်ဖြစ်သောကြောင့် စောင့်ဆိုင်းပြီးကို သေချာကြည့်ကြမည်ဖြစ်သည်။

အပြင်ဘက်ရှိအခြေအနေက ဟယ့်ကျင်းယွင်နားသို့ ရောက်လာခဲ့သည်။

ထိုအကြောင်းကို ကြားသောအခါ ဟယ့်ကျင်းယွင် ပြုံးလိုက်သည်။

"ရုပ်ရှင်ရိုက်ရတာ တကယ်ကိုခက်ခဲတယ်...ဇယ်ရှစ်က အပူ‌ဒဏ်မခံနိုင်ဘူး... သက်ဆိုင်ရာဝန်ထမ်းကို ပြောပြီး သူ့အတွက် ရေခဲအိတ်တွေပြင်ထားခိုင်းပေး... ပြီးတော့ ပန်ကာတွေလည်း လုံလုံလောက်လောက်ရှိပါစေ..."

ဝန်ထမ်းက အလျင်အမြန်ပင် ပြုလုပ်ပေးလိုက်သည်။ 

နံဘေးရှိ ချန်ကျန့်ထျန်းကို ကြည့်လိုက်သောအခါ ထိုစကားကို ကြားသည့်ပုံမပေါ်ဘဲ သူ့လက်ထဲရှိ ဇာတ်ညွှန်းကိုသာ ငုံ့ကြည့်နေလေသည်။

နတ်ဆိုးအကြောင်း ပြောကာမှ ... 

ဝန်ထမ်းတစ်ယောက်က ယဲ့ဇယ်ရှစ်နှင့် သူ့အဖွဲ့ကို နေရာသို့ ခေါ်လာခဲ့သည်။

လူအများအပြားက ထိုအခြေအနေကို သတိပြုမိသောအခါ တိတ်ဆိတ်သွားကြပြီး နားစွင့်ထားကြသည်။

ဟယ့်ကျင်းယွင်က ဦးစွာ မတ်တတ်ရပ်လိုက်ကာ ပြုံးလျက် ပြောလိုက်သည်။

"ဇယ်ရှစ် ရောက်လာပြီပဲ..."

ယဲ့ဇယ်ရှစ် သာမာန်အတိုင်းပြုံးကာ ပြောလိုက်သည်။

"ဟယ့်လောင်ရှီး..."

[T/N - Time Idolမှာတုန်း‌ကတော့ ဟယ့်ကျင်းယွင်က နည်းပြလာလုပ်တာမို့ နည်းပြဟယ့်လို့ ခေါ်တာပါ၊ အပြင်မှာကျတော့ ဟယ့်ကျင်းယွင်က သူ့ထက် ဝါရော အသက်ရော ပိုကြီးလို့ လေးစားသမှုနဲ့ ဟယ့်လောင်ရှီးလို့ခေါ်တာပါ၊ နောက်ပိုင်းတွေလည်း ဟယ့်လောင်ရှီးလို့ပဲ သုံးသွားပါမယ် ]

ယဲ့ဇယ်ရှစ် ဤလူကို အလွန်မုန်းလေသည်။ သူအိမ်မှာ ငါးဆားနယ်ကဲ့သို့ မနေရသည်မှာ ဤလူက အဓိကအကြောင်းရင်းဖြစ်သည်။ 

ဟယ့်ကျင်းယွင် ခေါင်းညိတ်လိုက်ကာ ယဲ့ဇယ်ရှစ်၏ အပြုံးတုကို စိတ်ထဲမထားလိုက်ပေ။ သူပြုံးလိုက်ပြီး ယဲ့ဇယ်ရှစ်ကို သူ့နံဘေးရှိ ချန်ကျန့်ထျန်းနှင့် မိတ်ဆက်ပေးလိုက်သည်။ 

"ဒါက ဒါရိုက်တာချန်ပါ...ချန်ကျန့်ထျန်း..."

ယဲ့ဇယ်ရှစ် ချန်ကျန့်ထျန်းကို ပြုံးပြကာ နာမည်ခေါ်လိုက်ပြီး နှုတ်ဆက်လိုက်သည်။ ယခုအပြုံးမှာ စိတ်လိုလက်ရ ပြုံးခြင်းဖြစ်သည်။

ချန်ကျန့်ထျန်းတစ်‌ယောက် အစကည်းက ယဲ့ဇယ်ရှစ်ကို အသံတိတ်ကြည့်နေခဲ့လေသည်။ 

ယခင်ရက်များမှ ကြည့်ခဲ့ရသည့် ယဲ့ဇယ်ရှစ်၏ ဓာတ်ပုံများနှင့်ယှဉ်လျှင် အပြင်က ယဲ့ဇယ်ရှစ်၏ မျက်နှာသွင်ပြင်များက ပို၍ ကောင်းမွန်‌နေသည်။ သူက အရပ်ရှည်သောကြောင့် သူ့စိတ်ထဲရှိ အားဇီနှင့်ပင် တစ်နည်းတစ်ဖုံ ဆင်တူနေလေသည်။

ချန်ကျန့်ထျန်း အကဲဖြတ်ပြီးသွားသောအခါ ယဲ့ဇယ်ရှစ်ကို ပြုံးပြလိုက်သည်။ 

"ဒီနေ့က ပထမဆုံး ရိုက်ကွင်းဆိုတော့ ...အကောင်းဆုံးကြိုးစား‌ပေါ့ ကောင်လေး..."

ချန်ကျန့်ထျန်း၏ အပြုအမူကြောင့် စောင့်ကြည့်နေသူများ အံ့ဩသွားကြသည်။

ဒါပဲလား... ဒါရိုက်တာချန်က ယဲ့ဇယ်ရှစ်ကို စိတ်တိုင်းမကျဘူးဆို...

ဟယ့်ကျင်းယွင်‌ပင် မျက်ခုံးအနည်းငယ် ပင့်မိသွားကာ အံဩမှုအရိပ်အယောင်များက မျက်ဝန်းတစ်လျှောက် ဖြတ်ပြေးသွားသည်။

ယဲ့ဇယ်ရှစ်ကမူ အများကြီး တွေးမနေဘဲ ခေါင်းညိတ်ကာပြုံးလိုက်သည်။

"အကြံပေးဖို့အတွက် ဒါရိုက်တာချန်ကိုပဲ ဒုက္ခပေးရတော့မယ်..."

ချန်ကျန့်ထျန်း ခေါင်းညိတ်လိုက်သည်။

"ဖြစ်သင့်တာပါပဲ..."

ယဲ့ဇယ်ရှစ်နှင့် ကောင်းရှူ ထွက်သွားသောအခါ ဟယ့်ကျင်းယွင် ချန်ကျန့်ထျန်းကို ကြည့်လိုက်သည်။  

ဟယ့်ကျင်းယွင်၏ မျက်လုံးထဲရှိအပြုံးကို ချန်ကျန့်ထျန်း အလိုလို နားလည်လိုက်သည်။ ထိုအပြုံးမှာ သူ့ကို ခပ်ထေ့ထေ့ပြောင်နေသကဲ့သို့ ခံစားရသောကြောင့် မကျေမနပ်ဖြစ်စွာ ဆိုသည်။

 "ဘာလဲ...မင်းကရော ငါက လူချမ်းသာတွေကို မုန်းတယ်လို့ ထင်နေတာလား...အ‌ပျော်ကြည့်ဖို့စောင့်နေတုန်းပေါ့လေ..."

ဟယ့်ကျင်းယွင် ပြုံးလိုက်သည်။

"အဲဒီလိုဖြစ်စရာလား... ကျွန်တော်က ဒါရိုက်တာချန် ဇယ်ရှစ်ကို သဘောကျသွားတယ်လို့ ထင်လို့ပါ..."

ချန်ကျန့်ထျန်း ဇာတ်ညွှန်းကို ကောက်ကိုင်လိုက်ကာ ပြန်ဖတ်နေလိုက်သည်။ အသံမှာ မတိုးလွန်း မကျယ်လွန်းသော်လည်း လူများစွာမှာ ကြားနိုင်သေးလေသည်။ 

"မင်းကတော့ ဘယ်ထင်မှာတုန်း တခြားသူတွေကတော့ အဲ့ဒီလိုမထင်ဘူးလေ..."

ထိုသည်ကို ကြားသောအခါ ပွဲကြီးပွဲကောင်းကို နားစွင့်နေသည့်သူများ အလျင်အမြန် ရှောင်ထွက်သွားကြသည်။

ဟယ့်ကျင်းယွင် မျက်မှောင်ကြုတ်လိုက်သည်။ 

ချန်ကျန့်ထျန်း ဆက်ပြောလိုက်သည်။ 

"မင်းက ဝန်ထမ်းတွေကို သူ့ကို ဂရုစိုက်ပေးဖို့ အကြိမ်ကြိမ်မှာနေတဲ့ဟာကို သူတို့ပါးစပ်ကနေ ဘာမှထုတ်ပြောမှာ မဟုတ်ပေမယ့် သူတို့စိတ်ထဲမှာ တွေးနေတာတွေတော့ ရှိမှာပဲ အဖွဲ့ထဲမှာ တခြားသူတွေရဲ့ပါးစပ်ကို ပိတ်ဖို့လို့ဆိုရင် သူ့ကိုယ်ပိုင်အင်အားနဲ့ပဲ ပိတ်လို့ရမယ်..."

ဟယ့်ကျင်းယွင် ခေတ္တမျှစဉ်းစားပြီးနောက် ပြောလိုက်သည်။

"ကြည့်ရတာ ရိုက်ကွင်းအဖွဲ့ စီမံခန့်ခွဲမှုကို ကျွန်တော် ဒါရိုက်တာချန်ဆီကနေ သင်ယူရဦးမယ့်ပုံပဲ..."

ချန်ကျန့်ထျန်း သူ့ကိုစောင်းကြည့်လိုက်သည်။

"ငါကပြောပြရုံပဲ... အဖွဲ့ထဲမှာ သရုပ်ဆောင်တစ်ယောက်ကို ထွေထူးပြီး ဂရုစိုက်မပြနဲ့ အဲ့ဒါက ‌တခြားသူတွေအတွက် ကောလာဟလ လုပ်ဖို့လွယ်ရုံတင်မကဘူး အဲ့ဒီကလေးအတွက်ပါ ခက်ခဲစေလိမ့်မယ်... ငါက အကျိုးအကြောင်းမညီညွတ်တဲ့ ခေါင်းမာတဲ့ လူအိုကြီးမဟလား..."

ထိုစကားကို ဟယ့်ကျင်းယွင် ထောက်ခံရမည်လား မသေချာသောကြောင့် ဘာမှပြန်မပြောရန်သာ ဆုံးဖြတ်လိုက်သည်။

လုပ်ဆောင်ချက်တွေကသာ သက်သေပြချက်ပဲ...

ဒါရိုက်တာချန်က သူသဘောမကျသည့် သရုပ်ဆောင်ကို မျက်နှာသာမပေးသည်မှာ ပထမဆုံးမဟုတ်သောကြောင့် သူကသာ လေထုကို ပေါ့‌ပါးအောင်လုပ်ပေးရမည်သာဖြစ်သည်။

ချန်ကျန့်ထျန်းက အလျင်လိုနေသောကြောင့် ဟယ့်ကျင်းယွင်နှင့် အလုပ်ရှုပ်ခံကာ စကားမပြောတော့ပေ။ သူ့လက်ထဲရှိ ဇာတ်ညွှန်းကိုသာ ပြန်ဖတ်နေတော့သည်။

များမကြာမီတွင် ရုပ်ရှင်ဖွင့်ပွဲကို စတင်လိုက်လေသည်။

နေလည်ပိုင်းတွင် ထိုနယ်ပယ်၌ လူသိများသည့် ရေတပ် အကောင့်တစ်ခုက Weibo ပို့စ်တစ်ခုတင်လိုက်သည်။

"ဒီနေ့ 'ကျော်ကြားသော စစ်သူကြီး' ရိုက်ကူးရေးကို စနေပြီပြောတယ်...ငါကြားတာတော့ မျက်နှာသစ် သရုပ်ဆောင်တစ်ယောက်က ဆယ်သန်းတန်တဲ့ RVနဲ့ ရောက်ချလာတယ်ဆိုပဲ..."

ထိုWeiboက လူအများ၏ အာရုံကို ဆွဲဆောင်လိုက်နိုင်သည်။

[ဆယ်သန်းဟုတ်လား...]

[လူချမ်းသာတွေပဲ... တစ်ယောက်ယောက်များ အဲ့ဒီRVပုံကို တင်မထားဘူးလား...]

[ဒီမှာ#ဓာတ်ပုံ# ကြည့်ကြည့်လိုက်... ဒီလိုပုံစံမျိုးပဲဖြစ်လောက်တယ်... အပေါ်ထပ်နဲ့ အောက်ထပ်ဆိုပြီးတောင် နှစ်ထပ်ခွဲထားသေးတယ်...အတွင်းထဲမှာ အိပ်ခန်း၊ ရေချိုးခန်းတွေရော အကုန်ပါပြီးသား...နှစ်လွှာတိုက်ခန်းနဲ့တောင် တူသေးတယ်...]

ထိုပုံကို မြင်လိုက်ရသော အင်တာနက်အသုံးပြုသူများမှာ အော်ဟစ်လိုက်ကြသည်။ 

[လခွမ်း...မြို့လယ်က ငါ့တိုက်ခန်းတောင် အဲ့ဒီလောက်ဈေးမကြီးဘူး...]

[သေစမ်း...အဲဒီကားသာ ငါ့ကို ပေးလိုက်ရင် ငါ့မွေးရပ်မြေမှာ အိမ်ဆယ်လုံးတောင် ဝယ်လို့ရတယ်...]

[ဒါက ကားဖြစ်နေတုန်းပဲ မလား...@ရည်းစားလေး ...ဘယ်အချိန်ကျမှ ကျွန်မအတွက် စီစဉ်ပေးမှာလဲလို့...ငါတို့တွေ အတူတူ ကမ္ဘာပတ်ကြတာပေါ့...]

ထိုသည်ကိုမြင်သောအခါ ရည်းစားကောင်လေးက အညှာအတာမဲ့စွာပြောလာသည်။

[ငါတို့က သိပ်ရင်းနှီးတဲ့ ဆက်ဆံရေးမဟုတ်ဘူးလေ...ခရီးထွက်ဖို့ဆိုတာကို ငါခံနိုင်မှာမဟုတ်ဘူး...ငါတို့လမ်းခွဲသင့်ပြီထင်တယ်...]

အင်တာနက်အသုံးပြုသူများ: "ဟားဟားဟားဟားဟားဟား..."

အများစုက မေးကြသည်။

[ဒီRVက ဘယ်သူပိုင်တာလဲဟ...]

မကြာမီ အင်တာနက်အသုံးပြုသူများက ရှင်းပြလာသည်။ 

["ကျော်ကြားသော စစ်သူကြီး"ရဲ့ သရုပ်ဆောင်တွေကို တရားဝင်မကြေညာရ‌သေးဘူးဆိုပေမယ့် ငါသိသလောက် အဲဒီလိုကားမျိုးကို မောင်းနိုင်တာက ဒုတိယမျိုးဆက်သူဌေးတွေပဲရှိတာ...]

သူတို့ ချက်ချင်းသိလိုက်ကြသည်။

ယဲ့ဇယ်ရှစ် ဖြစ်နေတာပေါ့လေ...

အမှန်ပဲ... သူ့မိသားစုက ချမ်းသာတယ်... 

ထိုအကြောင်းအရာနှင့် ပတ်သက်၍ ယဲ့ဇယ်ရှစ်ဖန်များက ပြောသည်။

"ရိုက်ကူးရေးအဖွဲ့ထဲကို ဝင်တာ ရှစ်ရှစ်အတွက် ဒါကပထမဆုံးပဲ... အာလုံးက အဆင်သင့်ပြင်ထားရမှာပေါ့... အဲဒါမှ မလုံလောက်သေးရင် ငါတို့ဖန်တွေက ရိုက်ကွင်းအထိလာပြီးတော့ ထပ်ပို့ပေးမယ်..."

ဖန်တစ်ယောက်က သူယခုအချိန်၌ ဟမ့်တျန်တွင် ခရီးထွက်နေသောကြောင့် ယဲ့ဇယ်ရှစ် အနေနှင့် လိုအပ်သည်များရှိပါက သူ့ကိုပြောနိုင်ပြီး သူ ထိုနေရာကို ဘယ်အချိန်မဆို လာပို့မည်ဟုပင်ပြောသည်။

ထိုသည်ကို များစွာသော အင်တာနက်အသုံးပြုသူများက မနာလိုကြောင်း ပြောလာကြသည်။

တစ်ချိန်တည်းမှာပင် "ကျော်ကြားသောစစ်သူကြီး"၏ ဖွင့်ပွဲကိုလည်း စတင်ကြေညာလိုက်ပြီ ဖြစ်သည်။ 

ကောင်းရှူ၏ မူလအကြံအရ ရိုက်ကွင်းမှ ထမင်းဘူးများတွင် အာဟာရ လုံလုံလောက်လောက် မပါဝင်ပေ။ ထို့အပြင် RVကလည်း ကျယ်ဝန်းလေရာ RVအတွင်းရှိ အသုံးအဆောင်များကို ကောင်းကောင်းအသုံးချရမည်ဖြစ်သည်။ ယဲ့ဇယ်ရှစ်အတွက် သီးသန့်စားဖိုမှူးပင် ငှား၍အဆင်ပြေနိုင်သည်ဟု တွေးလေသည်။

ထိုသည်ကိုကြားသောအခါ ယဲ့ဇယ်ရှစ် ချက်ချင်းပင် ငြင်းပယ်လိုက်သည်။

သူ အလွန်ဇီဇာမကြောင်ပေ။ ထို့အပြင် ရိုက်ကွင်းမှ ထမင်းဘူးများကလည်း အလွန်းဆိုးရွားလိမ့်မည် မဟုတ်ပေ။

ကောင်းရှူ ထိုသည်ကို အတင်းအကျပ် မတိုက်တွန်းခဲ့ပေ။ အထူးအလေးပေး ဆက်ဆံခံရသည်မှာလည်း မကောင်းလှပေ။ အကယ်၍ ရေတပ်အကောင့်တစ်ခုသာ ထိုသည်ကို ဖြန့်လိုက်ပါလျှင် အင်တာနက်ပေါ်တွင် ရှုပ်ထွေးနိုင်သည်။

ယဲ့ဇယ်ရှစ်အတွက်မူ ရိုက်ကူးရေးအဖွဲ့သို့ ဝင်ရသည်မှာ ယခုက ပထမဆုံးဖြစ်သောကြောင့် မည်သို့ပင်ဆိုပါစေ သူတို့ပုံရိပ်မှာ အဆင့်မြင့်သွားပြီ ဖြစ်လေသည်။

ကောင်းရှူက အလွန်စဉ်းစားပေးတတ်သည်။ ထိုနေ့က ဖွင့်ပွဲပြီးဆုံးသွားသောအခါ မနက်ပိုင်းတွင် ပြင်ဆင်ထားခဲ့သော အအေးတို့ကို လိုက်လံဝေငှပေးရန် သူ့အဖွဲ့ကိုညွှန်ကြားထားလေသည်။ အပြင်ဘက်ရှိ သတင်းထောက်များနှင့် ဖန်များပင်တစ်ဘူးစီ ရလိုက်ကြသည်။

နေ့လည်စာ လာပို့ပြီးသွားသောအခါ အားလုံး အချိုတည်းရန်အတွက် ယဲ့ဇယ်ရှစ်က သစ်သီးများကိုပြင်ထားပေးကြောင်း ဝန်ထမ်းတစ်ယောက်ထံမှ သူတို့သိလိုက်ရသည်။ 

 "သူများပစ္စည်းယူတဲ့လက်က တိုတတ်သလို သူများကျွေးတာ စားထားတဲ့ပါးစပ်က ချိုသာတယ်" ဟူသော စကားပုံကဲ့သို့ပင် အစ၌ ယဲ့ဇယ်ရှစ်ကို ဝေဖန်ရေး လုပ်နေသူများက ယခုအချိန်တွင် ပါးစပ်ပိတ်သွားကြသည်။ 

ယဲ့ဇယ်ရှစ် နေ့လည်စာစားပြီး သူ့ကားထဲ သွားအိပ်သည်ကို မြင်လိုက်ရသောအခါ သူတို့ အားကျမနာလိုဖြစ်သွားကြသည်။

နံနက်ခင်းတွင် ပြုလုပ်ခဲ့သော ရုပ်ရှင်ဖွင့်ပွဲမှာ ပြီးဆုံးသွားလေရာ မီဒီယာများနှင့် ဖန်များလည်း ထွက်သွားကြသည်။

နေ့လည်မှစ၍ ရုပ်ရှင်အဖွဲ့မှ စတင်ရိုက်ကူးပြီဖြစ်သည်။ ထို့အပြင် အဖွဲ့က ပါပါရာဇီများ ရိုက်ကွင်းဓာတ်ပုံများကို ရိုက်ကူးခြင်းမှ ကာကွယ်ရန်အတွက် မီဒီယာများနှင့် ဆိုရှယ်ပလပ်ဖေါင်းများကို ပိတ်ချထားလေသည်။

ယဲ့ဇယ်ရှစ် နေ့လည်ခင်း မိတ်ကပ်မလိမ်းမီအထိ RVထဲတွင် တစ်ရေးတစ်မောမှေးခဲ့သည်။

နေ့လည်တွင် ဟယ့်ကျင်းယွင်နှင့်အတူ သရုပ်ဆောင်ရမည့် ဇာတ်ဝင်ခန်းလည်းရှိလေသည်။

"ကျော်ကြားသော စစ်သူကြီး"ရုပ်ရှင်မှာ လိင်တူအချစ်သံယောဇဉ် ဇာတ်လမ်းဖြစ်သကဲ့သို့ ကိုယ်တိုင် ဇာတ်ကြောင်းပြန်သည့် ဇာတ်လမ်းမျိုးလည်းဖြစ်သည်။

ဤရုပ်ရှင်မှာ ရှန်ချန်ကျိုးနှင့် အားဇီတို့၏ အချစ်ဇာတ်လမ်းဟု ဆိုနိုင်သလို ရှန်ချန်ကျိုး၏ ကိုယ်တိုင်ဇာတ်ကြောင်းပြန်သည့် ဇာတ်လမ်းမျိုးဟုလည်း ဆိုနိုင်သည်။

ဇာတ်လမ်းထဲတွင် ရှန်ချန်ကျိုးက လူ‌ထောင်ပေါင်းများစွာက လေးစားခံရသည့် စစ်သူကြီးအဖြစ်သို့ တက်လှမ်းသွားနိုင်ခဲ့သည်။

လမ်းတစ်လျှောက်တွင် သူချစ်ခဲ့သည်၊ မုန်းခဲ့သည်၊ နောင်တရခဲ့ရသည်။ နောက်ဆုံးတွင် သူ့မိဘများ အလိုရှိသည့်နေရာတွင် တစ်ယောက်တည်း အထီးကျန်စွာ ရပ်တည်နေခဲ့ရသည်။

သူက ကမ္ဘာကြီးကို ငြိမ်းချမ်းမှုနှင့် အထီးကျန်မှုတို့ကို ပေးခဲ့‌သည်။

ယဲ့ဇယ်ရှစ် သရုပ်ဆောင်ရမည့် အားဇီဇာတ်ကောင်က ရှန်ချန်ကျိုးအတွက် သူ့မိဘများအပြင် နောက်ထပ် အရေးကြီးသည့် လူတစ်ယောက်ဖြစ်လေသည်။

ရှန်ချန်ကျိုးအတွက် အားဇီဆိုသည်မှာ သူငယ်ချင်းတစ်ယောက်၊ ချစ်သူတစ်ယောက်သာမက သူ့ကိုယ်ပိုင် ဝင်္ကပါထဲမှ လွတ်မြောက်စေခဲ့သည့် ရှေ့ဆောင်လမ်းပြတစ်ယောက်လည်း ဖြစ်လေသည်။ 

အားဇီ၏ မျိုးရိုးဇာတ်မှာ နိမ့်ကျသော်လည်း ဤကဲ့သို့ မောက်မာထောင်လွှားသည့် လောကကြီးထဲတွင် သူသာလျှင် မထောင်လွှားသည့် တစ်ဦးတည်းသောသူ ဖြစ်လေသည်။

နေ့လည်ခင်းတွင် ယဲ့ဇယ်ရှစ် သရုပ်ဆောင်ရမည့် အခန်းမှာ သူတို့နှစ်ဦး စတင်တွေ့ဆုံသည့်အခန်း ဖြစ်သည်။

စစ်တပ်စခန်းသို့ ဝင်ရောက်လာစ ကောင်လေးမှာ ပြဇာတ်ကြည့်ရန်အတွက်ဟု သူငယ်ချင်းတစ်သိုက်ထံမှာ ဆွဲခေါ်ခံလာရသည့်သူ ဖြစ်လေသည်။ 

ဇာတ်ဝင်ခန်းက များစွာမရှိသောကြောင့် ရိုးရှင်းသည်ဟုပင်ပြောနိုင်သည်။ ထိုဇာတ်ဝင်ခန်းကို ယဲ့ဇယ်ရှစ်၏ ပထမဆုံး သရုပ်ဆောင်အတွေ့အကြုံကို လိုက်၍ ပြင်ဆင်ထားသည်ဟုပင် ဆိုနိုင်သည်။ 

ရုပ်ရှင်စတင်ရိုက်ကူးသည်နှင့် ဒါရိုက်တာချန်က ဤသို့ပြောလာမည်ကိုတော့ မည်သူမျှ မထင်ထားခဲ့မိကြပေ။

"အခုရိုက်ရမယ့် ဇာတ်ဝင်ခန်းက လွယ်လွန်းမနေဘူးလား... နောက်တစ်ခန်းကို ပြောင်းလိုက်တာ ပိုကောင်းမယ်လို့ငါထင်တယ်...မင်း‌ရော ဘယ်လိုထင်လဲ..."

တည့်တိုးပြောတတ်သည့် ဒါရိုက်တာချန်ဆိုသကဲ့သို့ပင် လိုချင်သည့်အချက်ကိုသာ တိုက်ရိုက်ပြောကာ တုံ့ဆိုင်းမနေခဲ့ပေ။

သေချာပေါက်ကို သူ ယဲ့ဇယ်ရှစ်၏ သရုပ်ဆောင်စွမ်းရည်ကို ကြည့်ချင်နေသည်လည်း ပါသည်။ 

ယဲ့ဇယ်ရှစ်သာ သရုပ်ဆောင်ကောင်းလျှင် သူ့ကိုဖမ်းဆွဲထားမည်ဖြစ်ပြီး မကောင်းပါက အစားထိုးခံရမည်ဖြစ်သည်။

🎶🎶🎶