Chapter 30

🎶 Chapter 30

ယဲ့ဇယ်ရှစ် ဤကဲ့သို့ ပုံစံမျိုးကို ပရိသတ်ရှေ့ချပြသည်မှာ ယခုက ပထမဆုံးဖြစ်လေသည်။

သူ၏ နဂိုမူလ ပန်းရောင်ဆံပင်မှာ အနက်ရောင်ဆံပင်ရှည်တို့ဖြင့် အစားထိုးခံလိုက်ရပြီး ထိုဆံနွယ်များမှာ အနီရောင်ဝတ်ရုံပေါ်တွင် ဖြန့်ကျဲလျက်ရှိနေသည်။ ထိုဖြန့်ချထားသော ဆံနွယ်‌တို့ကြောင့် ဝတ်ရုံမှာ ပို၍ပင် အနီရင့်လာပြီး ဆံနွယ်တို့မှာလည်း မှင်ကဲ့သို့ မဲနက်နေပုံပေါ်နေသည်။

ကျောက်စိမ်းဖြူကဲ့သို့သော မျက်နှာထက်တွင် မိတ်ကပ်ပါးပါးသာ ခြယ်သထားသောကြောင့် ပါးနှစ်ဖက်မှာ နူးညံ့ချော‌မွတ်နေလေကာ မက်မွန်ပွင့် မျက်ဝန်းများက အိပ်မက်ဆန်လှသည်။

သို့ရာတွင် အကြည့်လွှဲရက်စရာမရှိသည်မှာ ဖြူ‌ဝင်းကာ အချိုးအစားကျလှသော ရင်ဘတ်ပိုင်းလေးသာဖြစ်သည်။

ဖြူဝင်းသည့် အသားအရေနှင့် အနီရောင် ပိုးသားဝတ်ရုံ၊ တစ်ဝက်သာချည်ထားသော အင်္ကျီတို့မှာ ညာဖက်ရင်ဘတ်ပိုင်းဆီသို့သာ ချောင်းကြည့်စေချင်သည့် သဖွယ်ပင်။

ဓာတ်ပုံကိုမြင်လိုက်ရသူတို့မှာ သူတို့စိတ်ထဲတွင် စကားလုံးအနည်းငယ်သာလျှင် ပေါ်ထွက်လာခဲ့သည်။

စွဲမက်ဖွယ်ကောင်းလွန်းခြင်း...

ယဲ့ဇယ်ရှစ်က ဘယ်လိုတောင် ညှို့ယူနိုင်စွမ်း ရှိနေရတာလဲ...

နှလုံးခုန်သံများ အရိုင်းဆန်လာကြသည်။ သွေးခုန်နှုန်းများလည်း တရကြမ်း ထိုးတက်လာသည်။

Bulgari ၏တရားဝင် Weiboတွင် အင်တာနက်အသုံးပြုသူများနှင့် ဖန်များ၏ အော်သံတို့ဖြင့်သာ ဖုံးလွှမ်းနေခဲ့သည်။

[ငါနှာခေါင်းသွေးလျှံနေပြီ...]

[သေစမ်း... ဓာတ်ပုံလေးတစ်ပုံကြောင့်နဲ့ ငါ့ဘောင်းဘီတွေ ကျွတ်သွားတယ်တဲ့လား...]

[အသေချော၊ အရမ်းချော၊ တကယ်ကြီးကို ချော‌မောခံ့ညားနေရောပဲ...]

[ညီအစ်ကိုရေ...ငါ့ကို ဖက်ထားပေးပါ...]

[ဘုရားရေ...ယဲ့ဇယ်ရှစ်ရဲ့ ဝတ်စုံနဲ့ ပုံက ငါ့ကိုတော်တော် ‌အကျိုးပေးသွားတာပဲ...ငါ့နှာခေါင်းတော့ သွေးယိုသွားပြီ...]

[ယဲ့ဇယ်ရှစ်က ငါ့ကို သက်သက်ဖြားယောင်းနေတာလို့တောင် ငါသံသယဝင်လာပြီ...]

[မဖြစ်နိုင်တော့ဘူး...အရင်က house dance ကို ငါသည်းခံနိုင်သေးတယ်... ဒီတစ်ခါတော့ ငါတကယ် သည်းမခံနိုင်တော့ဘူး...ငါကွေးသွားပြီ...]

[လောင်ကုန်းရေ...]

[နေပါဦး...အပေါ်ထပ်ရေ နင်ကယောကျာ်းကြီးဆိုတာလည်း သတိရဦးနော်...]

ထိုလူက ချက်ချင်း စာပြန်လိုက်သည်။

[အဲ့ဒါ အရင်က ငါ...အခုငါက ယဲ့ဇယ်ရှစ်ရဲ့ ဇီးရိုးပဲ...]

[ဖာ့ခ်...သူ တော်တော်ဖြစ်နေတာပဲ...]

[ဟားဟားဟားဟားဟား...]

ဓာတ်ပုံလေးတစ်ပုံနှင့်ပင် ယဲ့ဇယ်ရှစ်မှာ hot search ပေါ်ပြန်လည်ရောက်လာလိမ့်မည်ဟု မည်သူမျှတွေးနိုင်လိမ့်မည် မထင်ပေ။

ထိုကြော်ငြာဓာတ်ပုံများမှာ ပိုမိုကျယ်ပြန့်စွာ ပြန့်နှံ့သွားလေရာ ထိုပုံများကို မြင်‌လိုက်ရသောသူတို့မှာ အော်ဟစ်ရုံတင်အားမရဘဲ သူတို့ဘောင်းဘီများကိုပင် ချွတ်ပေးချင်သည် ဟုပင်ဆိုကြလေသည်။

ဖန်ဂဲလ်များမှာ ရင်ခုန်နှုန်း မြန်လာသောကြောင့် ပါးအို့များ နီရဲနေကြပြီး ဖန်ဘွိုင်းများက သူ့အတွက်ဆို ကွေးပေးနိုင်သည်ဟုပင်။

သူတို့အထဲတွင် အချို့ အင်တာနက်အသုံးပြုသူများမှာ ပို၍ပင် တစ်တစ်ခွခွ ရေးသားကြရာ ထိုသူတို့မှာ စိတ်လှုပ်ရှားမှုလေးတစ်ခုကြောင့်နှင့် အကောင့်များ အပိတ်ခံလိုက်ရသည်။ 

ဟယ့်ကျင်းယွင်လည်း ထိုညတွင် ထိုဓာတ်ပုံများနှင့်တကွ ရိုးရိုးရှင်းရှင်း တည်းဖြတ်ထားသော ကြော်ငြာဗီဒီယိုတစ်ခုကို ရရှိခဲ့သည်။

ဒါရိုက်တာမှာ ဆက်လက်ထိန်းမထားနိုင်တော့သောကြောင့် ဟယ့်ကျင်းယွင်ထံသို့ နှစ်မိနစ်မျှ ရှည်လျားသည့် အသံဖိုင်တစ်ခုကို ပို့လာခဲ့သည်။ ထိုအသံဖိုင်တစ်ခုလုံးမှာ ယဲ့ဇယ်ရှစ် အကြောင်းကို ချီးကျူးပြောဆိုထားမှုများသာဖြစ်သည်။

ဟယ့်ကျင်းယွင် ပြုံးနေကာ ဓာတ်ပုံများကို တစ်ပုံပြီးတစ်ပုံ ကြည့်လိုက်သည်။ ထို့နောက် ဒါရိုက်တာထံ စာပြန်လိုက်သည်။

"ကြည့်ရတာ သူ့ကို အတော်လေးသဘောကျပုံပဲ..."

ဒါရိုက်တာမှာ ယဲ့ဇယ်ရှစ်အပေါ် သဘောကျမှုကို ဖုံးကွယ်မထားပေ။

"သေချာတာပေါ့... ငါက ကြော်ငြာဗီဒီယိုတွေဘဲ ရိုက်တယ်ဆို‌ပေမယ့် အဲ့ဒီကလေးက မျိုးစေ့ကောင်းလေးဆိုတာ မြင်နေရတယ်... မင်းနဲ့ ရုပ်ရှင်အတူတွဲရိုက်ရင်လည်း သူ့ကိုကောင်းကောင်းလေး ဂရုစိုက်ပေးလိုက်‌ပါ...ငါသူနဲ့ပတ်သက်ပြီး အမြင်မဆိုးဘူး..."

ဟယ့်ကျင်းယွင် ပြုံးလိုက်ကာ ပြန်ပြောလိုက်သည်။ 

"ဟုတ်ကဲ့ပါ...စိတ်မပူပါနဲ့..."

ဖုန်းခေါ်ဆိုမှု ပြီးသွားသောအခါ ဟယ့်ကျင်းယွင် မျက်ခုံးပင့်လိုက်ကာ ဆိုဖာပေါ်ရှိ ချန်ကျန့်ထျန်းကို ပြောလိုက်သည်။

"ဒါရိုက်တာယန် အသိအမှတ်ပြုတာနဲ့ဆို ဒါရိုက်တာချန်လည်း စိတ်သက်သာရာ ရမယ်ထင်ပါတယ်..."

ချန်ကျန့်ထျန်း သူ့ကို မျက်စောင်းထိုးကြည့်လိုက်သည်။

"ငါက ဘယ်လိုလုပ် ယုံရဲမှာလဲ... တစ်ရက်လောက် ရိုက်ကူး‌ရေးမလုပ်ကြည့်ရသေးဘဲ ငါစိတ်အေးနိုင်မှာမဟုတ်ဘူး....ပြီးတော့ မင်း ရုပ်ရှင်မရိုက်ဖူးတာလည်း မဟုတ်ဘဲနဲ့ ကြော်ငြာရိုက်တာနဲ့ ရုပ်ရှင်ရိုက်တာကြားက ကွာခြားချက်ကို မင်းသိသေးရဲ့လား..."

ချန်ကျန့်ထျန်း ဆက်ပြောလိုက်သည်။

"အားဇီရဲ့ဇာတ်ကောင်နေရာက 'ကျော်ကြားတဲ့ စစ်သူကြီး' ရဲ့ဇာတ်လမ်းကို မြှင့်တင်ပေးမယ့်နေရာကွ...မင်း ယဲ့ဇယ်ရှစ်ကို လက်မှတ်ထိုးလိုက်တာ အရမ်းလော‌တယ်လို့ ငါထင်နေတုန်းပဲ... မျက်နှာသစ် အိုင်ဒေါတစ်ယောက်အနေနဲ့ သူဘယ်လိုလုပ် ကောင်းကောင်း သရုပ်ဆောင်နိုင်မှာလဲ..."

ချန်ကျန့်ထျန်းမှာ ကမ္ဘာကျော် ဒါရိုက်တာတစ်ယောက် ဖြစ်သည်။ သူက များစွာသောပြည်တွင်းဆုများနှင့် နိုင်ငံတကာဆုများကို ရရှိထားလေသည်။ ဟယ့်ကျင်းယွင်နှင့်လည်း အကြိမ်များစွာ ပူးပေါင်းခဲ့သည်လည်းဖြစ်သည်။ သူတို့နှစ်ယောက်ကို နှစ်ပေါင်းများစွာ ခင်မင်လာသည့် သူငယ်ချင်းများဟုပင် သတ်မှတ်နိုင်သည်။

ဒါရိုက်တာချန်ကျန့်ထျန်းနှင့် အလုပ်အတူတူလုပ်ဖူးသည့် သရုပ်ဆောင်တိုင်းက ဒါရိုက်တာချန်မှာ အချိန်တိုင်းနီးပါး သဘောကောင်း‌သောသူတစ်ယောက် ဖြစ်သော်လည်း သရုပ်ဆောင်ရွေးချယ်ရာတွင် အနည်းငယ် ရှေးရိုးဆန်သည်ဟု သိကြလေသည်။

သူသာ ဝါရင့်သရုပ်ဆောင်ကိုရွေးချယ်နိုင်မည်ဆိုလျှင် ဝါရင့်သရုပ်ဆောင်ဖြင့်သာ ရိုက်ကူးမည်ဖြစ်ပြီး အရည်အချင်းရှိသည့် သရုပ်ဆောင်နှင့် ရိုက်ကူးနိုင်မည်ဆိုလျှင် ကျော်ကြားသည့် သရုပ်ဆောင်ကို ရွေးချယ်မည်မဟုတ်လိမ့်ပေ။ 

ယခင်က သတင်းထောက်များ ချန်ကျန့်ထျန်းကို အင်တာဗျူးဖူးသည်။ ထိုသည်မှာ သူသာ ‌ကျော်ကြားသည့် သရုပ်ဆောင်များအား အထင်သေးသည်ဆိုလျှင် လူရွေးပွဲလုပ်သည့်အခါတိုင်း 'အဲဒီသရုပ်‌ဆောင်တွေကို အရင်ဖြုတ်ချရမှာမလား' ဟုပင်။

ဒါရိုက်တာ ချန်ကျန့်ထျန်းက သဘာဝကျစွာပင် ပြန်ဖြေခဲ့သည်။

"သူတို့မှာ သရုပ်ဆောင်စွမ်းရည် ကောင်းကောင်းရှိနေသရွေ့ သေချာပေါက် သူတို့ကို ရွေးမှာပါ..."

အနုပညာလောကအတွင်းရှိ ဖျော်ဖြေသူ တစ်ဝက်ခန့်မှာ ချန်ကျန့်ထျန်း၏ ထိုစကားကြောင့် မကျေမနပ်ဖြစ်ခဲ့ကြသည်။  

ဟယ့်ကျင်းယွင်နှင့် ချန်ကျန့်ထျန်းမှာ တစ်ယောက်နှင့်တစ်ယောက် ကောင်းကောင်းသိကြသောကြောင့် ဟယ့်ကျင်းယွင် သူ့သူငယ်ချင်း၏ ခေါင်းမာသော အတွေးကို သိလေသည်။

သူက လူတစ်ယောက်ကို အလျှော့ပေးမည်ထက် မကျေမနပ်ဖြစ်အောင်သာ လုပ်ပေလိမ့်မည်။ လူတစ်ယောက်ကို သူ မကြိုက်လျှင် သူ့ဆန္ဒကိုဆန့်ကျင်၍ ထိုသူကို အကောင်းပြောမည်မဟုတ်ပေ။ 

ဟယ့်ကျင်းယွင် ယဲ့ဇယ်ရှစ်ဖက်မှ ပြန်ပြာပေးရန် အလျင်မလိုပေ။ သို့သော် သူပြုံးလိုက်ကာ ပြောလိုက်သည်။ 

"ဒီလိုလုပ်ပါလား...ယဲ့ဇယ်ရှစ် သရုပ်ဆောင်တာကို ဒါရိုက်တာချန် အရင်ကြည့်လိုက်ပေါ့...အဲ့ဒါကိုမှ စိတ်မကျေနပ်ရင် ခင်ဗျားကြိုက်ရာလူကို ပြန်ရွေးလိုက်ပါ..."

ချန်ကျန့်ထျန်း၏ အမူအရာက ယခုမှ ပို၍ကြည့်ကောင်းလာကာ ခေါင်းညိတ်လိုက်ပြီးမှ အတော်အတန်ကြာမှ ရှားပါးသော စကားအကောင်း ပြောလာသည်။

"ယဲ့ဇယ်ရှစ်ကို သဘောကျတာက မကောင်းတာတော့ မဟုတ်ပါဘူး... အနည်းဆုံးတော့ သူက ကြည့်ကောင်းပြီးတော့ ရှေးခေတ်ဝတ်စုံနဲ့ဆို အားဇီနဲ့တောင် နည်းနည်းဆင်ပေမယ့် သူ့သရုပ်ဆောင်စွမ်းရည်ကို မသိရသေးတာကတော့... မင်းသိပါတယ်...ငါက အဲ့ဒီလို ဟန်များတဲ့ သရုပ်ဆောင်တွေကို မကြိုက်ဘူးဆိုတာကို..."

ဟယ့်ကျင်းယွင် ဘေးဖက်သို့ လှည့်လိုက်ကာ တစ်ဝက်တစ်ပျက်သာ အချောသတ်ရသေးသည့် ကြော်ငြာဗီဒီယိုကို ကြည့်လိုက်သည်။

အဖြူရောင်ဝတ်စုံဖြင့် ယဲ့ဇယ်ရှစ်မှာ အနောက်ဘက်သို့ အသာငဲ့ကြည့်လိုက်သည်။ သူ၏မျက်ဝန်းများတွင် ခံစားချက် မျိုးစုံ စီးဆင်းနေသည်မှာ သူ့အကြည့်ထဲတွင် စိတ်ခံစားချက်မျိုးစုံအား ရေးချထားသကဲ့သို့ပင်။ 

ဟယ့်ကျင်းယွင်၏ လည်စလုတ် အပေါ်အောက်ရွေ့လျားသွားကာ သူ့နှလုံးသားပင် အနည်းငယ် လှုပ်ရှားသွားရသည်။

"မင်းပဲ... မမှားနိုင်ဘူး..." 

ဟယ့်ကျင်းယွင် တွေးလိုက်သည်။

ယဲ့ဇယ်ရှစ်မှလွဲ၍ အားဇီဇာတ်ကောင်နှင့် အသင့်တော်ဆုံးဖြစ်မည့်သူကို သူလုံးဝရှာမတွေ့နိုင်ပေ။

Bulgari ၏တရားဝင် Weiboမှာ

ဤသို့ ရိုးရှင်းသည့် ဓာတ်ပုံများက အင်တာနက်ပေါ်တွင် ထိုမျှအထိ အကြီးအကျယ် ပျံ့နှံ့သွားလိမ့်မည်ဟု သူတို့ မထင်ထားခဲ့မိပေ။

ဓာတ်ပုံများကိုကြည့်ပြီးသွားသောအခါ များစွာသော ဖန်များနှင့် အင်တာနက်အသုံးပြုသူများမှာ မကျေနပ်‌ကြောင်း ပြောဆိုလာခဲ့သည်။ 

အဘယ်ကြောင့်ဆိုသော် ထိုဓာတ်ပုံများမှာ နည်းလွန်းလှသည်။

ဒီလို ကြည့်ကောင်းတဲ့ အချောလေးကို... တရားဝင်စာမျက်နှာက ဘယ်လိုတောင် မစဉ်းစားတတ်ရတာလဲ... အနည်းဆုံးတော့ ဒီထုတ်ကုန်နဲ့ ပတ်သက်ပြီး ဓာတ်ပုံနည်းနည်းလောက် ထပ်တင်ဖို့ကောင်းတာပေါ့လို့...

အချို့မှာ တရားဝင် စာမျက်နှာမှ ဓာတ်ပုံထပ်မတင်ပေးလျှင် 'ထုတ်ကုန်အသစ်ကို မဝယ်ဘူး'ဟုပင် ခြိမ်းခြောက်လာကြသည်။

Bulgari ၏တရားဝင် Weibo မှာ အလိုက်သိလှသည်။ သူတို့ ဒါရိုက်တာယန်ကို ဆက်သွယ်ပြီး ဓာတ်ပုံများကို တောင်းခဲ့သည်။ တစ်ချိန်တည်းမှာပင် ရိုက်ကွင်းနေ့ရက်မှ gif တစ်ခုကိုပင် ပြုလုပ်ခဲ့သေးသည်။ အားလုံး၏ စောင့်ကြည့်မှုအောက်မှာပင် တရားဝင်Weibo မှာ နောက်ထပ် ဓာတ်ပုံနှစ်ပုံနှင့် gifတစ်ခုကို တင်ပေးခဲ့သည်။ 

ကပ်ပရှင်: "ရင်ခုန်သံတွေ ပိုမြန်လာပြီလား...ပုံစံအတူတူကို လိုချင်လား..."

ထို ဓာတ်ပုံနှစ်ပုံမှာ ဝတ်စုံပုံစံမတူညီသည့် စီးရီးထဲမှ ဖြစ်သောကြောင့် လူတိုင်းအား မတူညီသည့် ခံစားမှုနှစ်ခုကို ပေးစွမ်းလေသည်။

တစ်ပုံတွင် ယဲ့ဇယ်ရှစ်က အဖြူရောင်ဝတ်ထားသည်မှာ သိမ်မွေ့သည့် ကျောက်စိမ်းကဲ့သို့ပင်။

နောက်တစ်ပုံတွင် ယဲ့ဇယ်ရှစ်က မင်္ဂလာရှိသော ခရမ်းရောင် တိမ်အဆင်ပါသော ဘရိုကိတ်ဝတ်ရုံကို ဝတ်ဆင်ထားလေရာ ထိုဝတ်စုံမှာ သူ၏ စိတ်နေသဘောထားကိုပါ ပြောင်းလဲသွားစေသကဲ့သို့ ဖြစ်သောကြောင့် သူ့ကို ပို၍ပင် တင့်တယ်သည့် ခံစားချက်မျိုးပေးလေသည်။

လူတစ်ယောက်တည်းဆိုသော်ငြား မတူညီသည့် ပုံစံ သုံးမျိုးဖြင့်ဖြစ်သည်။

အင်တာနက်အသုံးပြုသူများမှာ ထပ်မံ ပေါက်ကွဲထွက်လာကြသည်။

[ဒီခရမ်းရောင် ဝတ်စုံနဲ့ကို ငါသဘောကျတယ်... ငါ့ကို‌သွေးဆောင်နေတဲ့ ရိုမန့်တစ်လူဆိုးလေးကနေ လွှမ်းမိုးချုပ်ကိုင်ချင်နေတဲ့ မင်းသားအဖြစ်ကို ပြောင်းသွားတဲ့ ခံစားချက်မျိုးပဲ...အရမ်း...အရမ်း ချောတာပဲ...]

[ငါကတော့ အဖြူရောင်ဝတ်စုံနဲ့ကို ပိုကြိုက်တယ်... ကျောက်စိမ်းလို သန့်စင်သိမ်မွေ့တဲ့ သခင်လေး...တကယ်ကြီးကို အောက်ကို ဖိချပြစ်လိုက်ချင်တယ်...]

[ယဲ့ဇယ်ရှစ်က ဘယ်ပုံစံနဲ့မဆို လိုက်ဖက်နေတာပဲနော်... အရမ်းကို ခံ့ညားချောမောနေသောပဲ...]

[ရှစ်ရှစ်က ဘယ်လောက်တောင် ငါတို့ကို အံ့ဩအောင်လုပ်ဦးမှာလဲ... ငါအရမ်းကို စောင့်ကြည့်ချင်နေပြီ...]

မကြာမီပင် ထိုအံ့ဩစရာက ရောက်ချလာသည်။

မှတ်ချက်ဦးစွာလာပေးကြသည့် အင်တာနက်အသုံးပြုသူများမှာ ပထမဆုံး ဓာတ်ပုံနှစ်ပုံကိုသာကြည့်ပြီး နောက်ဆုံး gif ဖြစ်သည့် အန်နီမေးရှင်းကိုမူ မကြည့်လိုက်ကြပေ။

ထိုအန်နီမေးရှင်း gifမှာ ဤတစ်ခေါက်၏ စိတ်ဝင်စားဖွယ်အ‌ကောင်းဆုံးဖြစ်သည်။

ထို gifကို နှိပ်ကြည့်လိုက်သောအခါ အစပိုင်းတွင် ယဲ့ဇယ်ရှစ်က ပြုံးနေလေသည်။ ထို့နောက် ကင်မရာက လူငယ်လေး၏ ရင်ဘတ်ပိုင်းအား ဖြတ်သန်းကာ တဖြည်းဖြည်း အောက်သို့ ရွေ့သွားလေသည်။ ထိုစဉ် ‌ရေစင်သံတစ်သံကို ကြားလိုက်ရကာ ဖြူဖွေးသော ခြေဖဝါးတစ်စုံက ကင်မရာကို ဖြတ်ကျော်သွားသည်ကို မြင်လိုက်ရသည်။ အဆုံးသတ်မှာ နောက်ကျောတစ်ခု၏ ဝိုးတဝါးပုံရိပ်ပင် ဖြစ်သည်။

ထိုသည်မှာ အဓိကအချက် မဟုတ်ပေ။ အဓိကအချက်မှာ ယဲ့ဇယ်ရှစ်က အင်္ကျီဝတ်မထားခြင်းပင် ဖြစ်သည်။

ထိုအန်နီမေးရှင်းမှာ တိုတောင်းပြီး ဝိုးတဝါးနိုင်လှသော်လည်း ယဲ့ဇယ်ရှစ်၏ ခါးတစ်ဝိုက်လိုင်းများနှင့် လှပသော ပုခုံးသားတို့ကိုမူ လူတိုင်းမြင်လိုက်ကြရသည်။ 

ရေစိုနေသောဆံပင်မှာ နောက်ကျောတွင် ကပ်တွယ်နေပြီး ရေစက်လေးများက ခန္ဓာကိုယ်တစ်လျှောက် ဖြည်းညှင်းစွာ စီးဆင်းသွားကာ အောက်ဖက်ရှိ ရေထဲသို့ကျဆင်းသွားသောကြောင့် ရေပွက်လေးများ ဖြစ်ပေါ်သွားလေသည်။

ကြည့်ရှုခဲ့ကြသည့် ပရိသတ်များ၏ နှလုံးသားထဲတွင်မူ ထိုရေစက်များက လှိုင်းဂယက် အထပ်ထပ်ဖြင့် ရိုက်ခတ်နေပြီဖြစ်သည်။ 

ထိုအခါမှပင် သူတို့ Bulgari ၏ ကပ်ပရှင် "ရင်ခုန်သံတွေ ပိုမြန်လာပြီလား" ဆိုသည်ကို ဖတ်မိလိုက်ကြသည်။ 

ဖန်များ: "မြန်တာမှ မြန်မှမြန် အသေမြန်နေတာ..."

တရားဝင်Weibo: "ပုံစံအတူတူကို လိုချင်လား..."

ဖန်များ: "လိုချင်တာပေါ့...ဝယ်မယ်...ဝယ်မှာ...ငါအခုကို ဝယ်ပစ်မှာ...အခုချက်ချင်း...ယဲ့ဇယ်ရှစ်က သူ့ညှို့ချက်တွေနဲ့ ဆွဲဆောင်နေတာလေ..."

ဓာတ်ပုံသုံးပုံ ထွက်လာသည်နှင့် ဖန်များ အလွန်စိတ်လှုပ်ရှားနေခဲ့ကြသည်။

အချို့ ချမ်းသာသည့်ဖန်များဆိုလျှင် စီးရီးအသစ် ထုတ်သည်နှင့် ချက်ချင်းပင် တစ်ဆက်လုံး ဝယ်ပြစ်မည်ဟူ၍ပင် ပြောကြသည်။

ထိုဖန်များထဲတွင် ဖန်ဘွိုင်းများလည်းပါသည်ကို အာရုံစိုက်တတ်သည့် ဖန်များက မြင်လိုက်ကြသည်။

ယဲ့ဇယ်ရှစ်၏ ဖန်ဘွိုင်းအင်အားမှာလည်း မခေလှပေ။

အကောင့်တစ်ခုက အဆင်သင့်ပြင်ထားသကဲ့သို့ ပြောလာသည်။ 

"ယဲ့ဇယ်ရှစ်က 0နေနေ 1နေနေ ဘယ်သူမဆို ချစ်မှာပဲ..."

ထိုညတွင် Bulgari၏ ယဲ့ဇယ်ရှစ်နှင့်ပတ်သတ်သမျှ ပို့စ်အားလုံးမှာ hot search ပေါ်တွင် အချိန်အတန်ကြာရှိနေခဲ့သည်။ ဖန်များ၏ စာသားများကို ကိုးကားရပါလျှင် ထိုသည်မှာ "အ‌လှလေးတွေကို ကြည့်ရတာ ဘယ်သူကမကြိုက်ဘဲ နေမှာလဲ" ဟူ၍ပင်။

ငါတို့အားလုံးက ခပ်ညစ်ညစ်လူအိုကြီး‌တွေပဲ‌လေ...ဘာကိစ္စ ဖြူစင်ချင်ယောင်ဆောင်နေရမှာတုန်း...

ထိုကိစ္စကို အားလုံးက နက်နက်ရှိုင်းရှိုင်းကို သဘောတူကြလေသည်။

ထိုသဘောတူသည့် လူများထဲတွင် ထန်ကျင့်လည်းပါသည်။

ထန်ကျင့် "Time Idol"မှ နှုတ်ထွက်ပြီးသွားသောအခါ များစွာသော အရင်းအမြစ်များမှာ သူ့ထံ ဆိုက်ရောက်လာကြသည်။ ယခု အချိန်အတောအတွင်း ထန်ကျင့် အလွန်အလုပ်များနေခဲ့ရာ အလုပ်၌မဟုတ်လျှင် အလုပ်သွားသည့် လမ်းပေါ်မှာပင် ဖြစ်နေခဲ့သည်။

ယနေ့ သူ လေယာဉ်စောင့်နေချိန်မှသာ ထန်ကျင့် အသက်ရှူချိန် ရလိုက်သည်။ သူ Weibo ကိုဖွင့်လိုက်သည်နှင့် ယဲ့ဇယ်ရှစ်၏ ထိုဓာတ်ပုံများကို မြင်လိုက်ရသည်။ 

ထန်ကျင့် သေချာဝင်ဖတ်ကြည့်ပြီးသောအခါ အချိန်အတော်ကြာ ကြက်သေသေနေခဲ့သည်။ 

ယဲ့ဇယ်ရှစ် အလွန်ချောမောနေသည်ကို သူဝန်ခံရပေမည်။ လူ‌ဆိုးပုံစံ ချောမောနေသည်မဟုတ်ဘဲ မျက်နှာသွင်ပြင်ကို တစ်ချက်ကြည့်လိုက်ရုံနှင့်ပင် အံ့ဩသွားစေသည့် အလှမျိုးဖြစ်သည်။ 

ယခင်က ယဲ့ဇယ်ရှစ်မှာ ကောင်းကောင်းမွန်မွန်ဝတ်စားရကောင်းမှန်း မသိခဲ့ခြင်း ဖြစ်ရမည်။ သူက မကြာခဏဆိုသလို အရောင်တောက်တောက်အဝတ်အစားတို့ကိုသာ ဝတ်ဆင်လေ့ရှိသည်။ ထိုကဲ့သို့အဝတ်အစားများနှင့် ပန်းရောင်‌တောက်တောက် ဆံပင်တို့ကြောင့် သူ့ကိုကြည့်လိုက်လျှင် လွန်လွန်ကဲကဲ ပြင်ဆင်ထားသကဲ့သို့ ခံစားရသည်။

သို့သော် ယဲ့ဇယ်ရှစ် "Time Idol"တွင် ပါဝင်ကတည်းက ထိုကဲ့သို့ တောက်တောက်ပြောင်ပြောင် အဝတ်အစားများ ဝတ်သည်ကို တွေ့ရခဲလေသည်။ အမြဲတမ်း သူဝတ်သည်မှာ အဖြူရောင်တီရှပ် သို့မဟုတ် အပြေးလေ့ကျင့်ရာတွင် ဝတ်သည့် ဝတ်စုံတို့သာဖြစ်သည်။ 

ထိုပန်းရောင်တောက်တောက်ဆံပင်မှာ ရှိနေသေးသော်လည်း ထိုဆံပင်က သူမျက်နှာသွင်ပြင်များကို ရင့်မသွားစေပေ။

ယခုက ယဲ့ဇယ်ရှစ်အား ဆံပင်အနက်ရောင်ဖြင့် မြင်ဖူးသည်မှာ ထန်ကျင့်အတွက် ပထမဆုံးဖြစ်သည်။

ဖန်များ၏ တင်စားမှုများက ကွက်တိကျပေသည်။ သန့်စင်ခြင်းနှင့် ညှို့ယူဆွဲဆောင်ခြင်း စသည့် စကားလုံးတို့မှာ ယဲ့ဇယ်ရှစ်အတွက် အလွန်သင့်တော်လှသည်။

သူ့ရင်ခုန်သံ နှစ်စက္ကန့်မျှ လျင်မြန်သွားရသည်။ ထန်ကျင့် ထိုဓာတ်ပုံများကို ခဏခဏ စိုက်မကြည့်ဘဲ မနေနိုင်ပေ။

ဒီလို ယဲ့ဇယ်ရှစ်က အရမ်း ချောတာပဲ...

"ရှောင်ကျင့် သွားကြစို့..."

အေးဂျင့်၏အသံက ထန်ကျင့်အတွေးကို နှောင့်ယှက်လိုက်သည်။

ထန်ကျင့် ထိတ်လန့်သွားကာ ကယောင်ကတမ်း ဖုန်းကို ဖွက်လိုက်သည်။ သို့သော် စက္ကန့်အနည်းမှာပင် သူသတိပြန်လည်လာသည်။

ငါဘာတွေ လုပ်မိနေတာလဲ...

ထန်ကျင့် နေရာတွင် မလှုပ်မယှက် ထိုင်နေသည်ကို မြင်သောအခါ အေးဂျင့်က စိုးရိမ်သွားပြီး မေးလိုက်သည်။

"ဘာဖြစ်လို့လဲ နေလို့မကောင်းဘူးလား..."

ထန်ကျင့် သူရင်တုန်နေသည်ကို ဖိနှိပ်ထားလိုက်ပြီး ခေါင်းအသာရမ်းလိုက်သည်။ 

"အဆင်ပြေပါတယ် နည်းနည်း အိပ်ငိုက်နေလို့ပါ... လေယာဉ်ပေါ်ရောက်ရင် ခဏအိပ်လိုက်မယ်..."

အေးဂျင့် သက်ပြင်းချလိုက်သည်။

"ဟုတ်ပြီ... မင်းလည်း ဒီတလော အလုပ်တွေရှုပ်နေတာ...ဒါပေမယ့် မင်းက နာမည်ကြီးလာတော့မှာဆိုတော့ သေချာပေါက် ငါတို့က သူများတွေထက် အလုပ်ကြိုးစားရမှာပေါ့..."

ထန်ကျင့် ခေါင်းညိတ်လိုက်ကာ ဘာမှမပြောပေ။

သူ အဝေးကိုသာ ငေးကြည့်နေပြီး တစ်ခုခုကို တွေးနေခဲ့သည်။

တစ်ပတ်ကြာသောအခါ ကောင်းရှူက လက်ထောက်နှင့် ဒရိုင်ဘာကိုခေါ်ကာ ယဲ့ဇယ်ရှစ်၏ဗီလာကို လာခဲ့သည်။

ဤတစ်ခေါက်မှာ ကြော်ငြာအတွက် မဟုတ်ပေ။ သို့သော် ယဲ့ဇယ်ရှစ်က ရုပ်ရှင်ရိုက်ကူးရေးအဖွဲ့သို့ ပါဝင်ရတော့မည် ဖြစ်သောကြောင့်ပင်။

"ကျော်ကြားသော စစ်သူကြီး"၏ စတင်ရိုက်ကူးမည့်ရက်ကို ဂျူလိုင်လတစ်ရက်နေ့ဟု သတ်မှတ်ထားလေသည်။ သရုပ်ဆောင်အားလုံးမှာ ရုပ်ရှင်ရိုက်ကူးရေးနေရာသို့ နှစ်ရက် ကြိုတင်ရောက်လာရန် လိုအပ်လေသည်။

ဤသည်မှာ ယဲ့ဇယ်ရှစ်အဖို့ ရိုက်ကူးရေးအဖွဲ့သို့ ပထမဦးဆုံးအကြိမ် ပါဝင်ရခြင်း ဖြစ်သောကြောင့် ကောင်းရှူ ဤကိစ္စကို အထူးအလေးပေး ဆောင်ရွက်လေသည်။ အစောကတည်းက သူ လိုအပ်သည်တို့ကို ကြိုတင်ပြင်ဆင်ထားပြီး ဖြစ်သည်။

ယဲ့ဇယ်ရှစ်မှာ ဟမ့်တျန်သို့ မရောက်ရှိသေးပေ။ သို့သော် ကောင်းရှူက လိုအပ်သည့်ပစ္စည်းတို့ကို ထိုနေရာသို့ ပို့ထားပြီးဖြစ်သည်။ အသစ်စက်စက် RVတစ်စီးပင် ပါသေးသည်။ 

ကောင်းရှူ ပြောစကားအရ ထိုသည်ကို ယဲ့ကျန့်ပင်းမှ စပွန်ဆာပေးရန် အစပြုသည်ဟု ဆိုသည်။ 

ကားက အလွန် အထက်တန်းကျကာ ဇိမ်ရှိလှသည်။

ယဲ့ဇယ်ရှစ် ဟမ့်တျန်သို့ ရိုက်ကူးရေးသွားရောက်ရမည်ဟု ယဲ့ကျန့်ပင်း သိသောအခါ မသွားမီ တစ်ရက်အလိုတွင် ယဲ့ဇယ်ရှစ်ကို ညစာစားရန် ခေါ်လိုက်သည်။

ယဲ့ဇယ်ရှစ်က ညစာပြန်စားရန် အစီအစဉ်မရှိပေ။ သူ ရိုက်ကူးရေးအတွက် လိုအပ်သည့် အဝတ်အစားများကို ထုတ်ပိုးရန် စီစဉ်ထားလေသည်။

သို့သော် အနောက်မှ ယန်မန်က ပြောလိုက်သည်။ 

"ပြန်မလာဘူးလား... ဒီနေ့ ငါး‌လေးခြောက်တွေတောင် ကြော်ထားတာကို..." 

ယဲ့ဇယ်ရှစ် ချက်ချင်း သူ့စိတ်ကို ပြောင်းလိုက်သည်။

"အင်္ကျီတွေက ညမှ ပြင်လို့ရတယ်... အခုလာခဲ့လိုက်မယ်..."

ယဲ့ဇယ်ရှစ် ထိုညက အိမ်မှထွက်မလာမီ အဝအပြဲ စားခဲ့ရုံသာမက ‌ငါးလေးခြောက်ကြော် ဘူးကြီးနှစ်ဘူးပင် ပါလာခဲ့သေးသည်။

ဤတစ်ကြိမ်တွင် ယန်မန်က သူ့ကို မမေးတော့ဘဲ သူမကိုယ်တိုင် ထည့်ပေးလိုက်ခြင်းဖြစ်သည်။

ယဲ့ဇယ်ရှစ် အလွန် စိတ်‌ကျေနပ်သွားသည်။

ဂျူလိုင်တစ်ရက်နေ့၊ ရုပ်ရှင်ရိုက်ကူးမည်နေ့မှာ နေအလွန်ပူပြင်းလှသည်။

နံနက်ခင်း ခုနစ်နာရီသာ ရှိသေးသော်လည်း နေအရှိန်ကြောင့် မြေပြင်ပင် ပူနေပြီဖြစ်သည်။

ရိုးရာအရ ရိုက်ကူးရေးမစတင်မီ အဖွင့်ပွဲ တစ်ခုလုပ်ရမည်ဖြစ်သည်။ 

"ကျော်ကြားသော စစ်သူကြီး"တွင် ဟယ့်ကျင်းယွင်က ပထမဆုံး ဒါရိုက်တာလုပ်သည့်အပြင် သူကိုယ်တိုင် ပါဝင်သရုပ်ဆောင်ခြင်း ဖြစ်သောကြောင့် စတင်ပြင်ဆင်ကတည်းကပင် အာရုံစိုက်မှုများစွာ ရရှိထားလေသည်။

ထိုဖွင့်ပွဲမှာ ဖန်များကိုသာ ဆွဲဆောင်လိုက်သည်သာမက မီဒီယာများကိုပင် ဖိတ်ခေါ်ထားသေးသည်။

နံနက်ရှစ်နာရီတွင် ဝန်ထမ်းများနှင့် သရုပ်ဆောင်များ တစ်ယောက်ပြီးတစ်ယောက် ရောက်ရှိလာကြသည်။

ကြီးမားသည့် အနက်ရောင် RVတစ်စီး ရောက်ရှိလာသောအခါ ထိုကားက ထိုနေရာရှိ လူအားလုံး၏ အာရုံအား ဆွဲဆောင်လိုက်လေသည်။

တစ်ယောက်ကမူ မနေနိုင်တော့ဘဲ တီးတိုးရေရွတ်မိသည်။

"ဘယ်အိမ်က သခင်လေးလဲဟ...သူတို့ ဗီလာတစ်ခုလုံးကိုများ မောင်းချလာတာလား..."

🎶🎶🎶