Chapter 33

Chapter 33

အနုပညာလောကအတွင်းရှိ ချန်ကျန့်ထျန်းနာမည်ကို ကြားဖူးသူတိုင်း ဒါရိုက်တာချန်က မည်သို့သောလူမျိုးဖြစ်သည်ကို သိကြလေသည်။

ဒါရိုက်တာချန်က စည်းကမ်းတင်းကျပ်ကာ အလေးအနက်ထားသောသူ တစ်ဦးဖြစ်သည်။ သူရိုက်သည့် ရုပ်ရှင်တိုင်းတွင် အချစ်အ‌ကြောင်း၊ လွတ်လပ်မှူ၊ နားလည်လွယ်မှု စသည်ဖြင့် သူ့ကိုယ်ပိုင်ဟန်ရှိလေသည်။ သူ ဆုတစ်ဆုမှ မရခဲ့လျှင်သော်မှ သူ့ရုပ်ရှင်၏ ဇာတ်လိုက်တစ်ဦးက ထိုနှစ်ရုပ်ရှင်ပွဲ‌တော်တွင် အနည်းဆုံး အကောင်းဆုံး သရုပ်ဆောင်ဆုတစ်ဆုကို ရရှိလေသည်။ 

ဒါရိုက်တာချန်၏ သင်ကြားပေးခြင်းခံရသော မည်သည့်သရုပ်ဆောင်မဆို သူတို့၏ သရုပ်ဆောင်အရည်အချင်းများမှာ မယုံနိုင်စရာကောင်းလောက်အောင် တိုးတက်သွားလေသည်။

ထိုအချက်ကြောင့်ပင် ဒါရိုက်တာချန်က သရုပ်ဆောင်များ၏ အရည်အချင်းကို နေ့တိုင်းအပြစ်ပြောနေသော်လည်း သူ့ရုပ်ရှင်တွင် ပါဝင်လိုသည့် သရုပ်ဆောင်များမှာ ဒုနှင့်ဒေးပင်။

သို့သော် ဒါရိုက်တာချန်က သရုပ်ဆောင်ရွေးချယ်ရာတွင် အလွန် စည်းမျဉ်းတင်းကျပ်လေသည်။ လူတစ်ယောက်က သရုပ်ဆောင်အရည်အချင်း မကောင်းလျှင် ထိုသူကို ရွေးချယ်မည်မဟုတ်ပေ။ မည်မျှပင် ပိုက်ဆံပုံပေးပါစေ ထိုသူကို ဒုတိယတစ်ခေါက်ပြန်လှည့်မကြည့်ပေ။

အနုပညာလောကအတွင်းရှိ ဒါရိုက်တာချန်ဆီမှ ချီးကျူးခံရသောသူများမှာ ဝါရင့်သရုပ်ဆောင်များမှလွဲလျှင် သူ၏အသိအမှတ်ပြုမှုဖြင့် အစောပိုင်းကာလများတွင် နာမည်ရလာခဲ့သော မျိုးဆက်သစ်ဖြစ်သည့် ဟယ့်ကျင်းယွင် တစ်ယောက်သာရှိသည်။ 

ဒီနေ့ကျမှ ဒါရိုက်တာချန်က ဘာဖြစ်လို့ အပျံသင်စ မျက်နှာသစ်သရုပ်ဆောင်ပေါက်စလေးကို ချီးကျူးရတာလဲ...

အမှန်ပြင်ရလျှင် သူ့ကို သရုပ်ဆောင်ဟုပင် ခေါ်၍မရပေ။ အဘယ့်ကြောင့်ဆိုသော် ယဲ့ဇယ်ရှစ်က ရသစုံရှိုးတစ်ခုဖြစ်သည့် "Time Idol"မှ ပွဲဦးထွက်လာခဲ့သောကြောင့် ဖြစ်သည်။ သူ့တွင် ရုပ်ရှင်၊တီဗီနှင့် ပတ်သက်သည့် အလုပ်များမရှိပေ။ ထို့ကြောင့် သူ့ကို အိုင်ဒေါအနုပညာရှင် ဟူ၍သာ ခေါ်ရပေမည်။

များစွာသော အင်တာနက်အသုံးပြုသူများက ပြောကြသည်။

"ဒါရိုက်တာချန်... ရှင် ပြန်ပေးဆွဲခံထားရတယ်ဆိုရင် မျက်တောင်တစ်ချက်ခတ်ပြပါ..."

ချန်ကျန့်ထျန်း၏ စကားများက ပရိသတ်များကို အတွေးလွန်စေသည်မှာ မလွဲဧကန်ပင်ဖြစ်သည်။

များစွာသော ဈေးကွက်အကောင့်များမှာ စုံစမ်းရှာဖွေမှုများလုပ်ကြလေရာ ဒါရိုက်တာချန်က ယဲ့ဇယ်ရှစ်အား ထိုသို့ ပြောသည်မှာ အကြောင်းအရင်း နှစ်ချက်သာ ရှိ‌လိမ့်မည်ဟု ကောက်ချက်ချလာသည်။ 

ပထမတစ်ချက်မှာ ယဲ့ဇယ်ရှစ်က သရုပ်ဆောင် အမှန်တကယ်ကောင်းသောကြောင့် ဖြစ်သည်။

ထိုအချက်မှလွဲ၍ အခြားရှင်းပြစရာမရှိပေ။ ယဲ့ဇယ်ရှစ်က မကြာသေးမီကမှ ပွဲဦးထွက်ထားခဲ့သည်။ ဟယ့်ကျင်းယွင်ကလည်း သူ့ကို ရုပ်ရှင်အသစ်တွင်ပါဝင်ရန် လူကိုယ်တိုင် ဖိတ်ခေါ်ထားသေးသည်။

ဒုတိယအချက်မှာ ဒါရိုက်တာချန်က ပိုက်ဆံအတွက် ခါးကိုင်းလိုက်ပြီဖြစ်သည်။ 

သို့သော် ထိုသို့ဖြစ်နိုင်ချေမှာ သုညပင်။

ဒါရိုက်တာချန်သာ ပိုက်ဆံနောက်လိုက်ပါက သူအစောပိုင်းနှစ်များကတည်းကပင် ရင်းနှီးမြှုပ်နှံသူများစွာဖြင့် ထိုသို့လုပ်ခဲ့မည်ဖြစ်သည်။ 

အဆုံးတွင်မူ ထိုကောက်ချက်ချမှုကို ယဲ့ဇယ်ရှစ်က 'တကယ်သရုပ်ဆောင်ကောင်းလို့' ဟူ၍ဖြင့်သာ အနှစ်ချုပ်လိုက်သည်။ 

[ဒီလိုသာဆို ယဲ့ဇယ်ရှစ်ရဲ့ သရုပ်ဆောင်နိုင်စွမ်းက တော်တော်ကောင်းမယ့်ပုံပဲ... ငါမျှော်နေမိပြီ ...]

[ဟုတ်ပ... ဒီနှစ်တွေအတွင်း အဖိုးလေး ဒါရိုက်တာချန်ဆီကနေ ချီးကျူးခံရတယ်ဆိုတဲ့သူက ရှိမှမရှိခဲ့ဘဲလေ...]

[ဒါဆို ယဲ့ဇယ်ရှစ်က ရုပ်ရှင်ဧကရာဇ်ဟယ့်ကလွဲရင် အငယ်တန်းမျိုးဆက်ထဲက ချီးကျူးခံရတဲ့ တစ်ယောက်တည်းသောသူလို့ သတ်မှတ်လို့ရတာပေါ့...]

[ငါတကယ်ကို မျှော်လင့်နေမိပြီ... ဒါပေမဲ့ 'ကျော်ကြားသော စစ်သူကြီး' ရဲ့ အကြောင်းတွေက အတော်လေးနှုတ်လုံတာ... ပြောရရင် စပွိုင်လာကို မရှိသလောက်ပဲ... ယဲ့ဇယ်ရှစ်က သူ ဘယ်ဇာတ်ကောင်နေရာမှာ သရုပ်ဆောင်မယ် ဆိုတာကိုလည်း မပြောထားဘူး...]

[ဟုတ်တယ်... တရားဝင် ပြောထားတဲ့ အချက်အလက်တွေအရဆိုရင် အဓိကသရုပ်ဆောင်က ရုပ်ရှင်ဧကရာဇ်ဟယ့်ပဲ... အဲ့ဒီနောက် ယဲ့ဇယ်ရှစ်ကို ပေါင်းထည့်လိုက်တယ်... တခြားသရုပ်ဆောင်တွေကိုတောင် တရားဝင် မကြေညာထားဘူးနော်...]

[ငါကြားတာကတော့ ဒါရိုက်တာချန်က ယဲ့ဇယ်ရှစ်ကို 'ကျော်ကြားသော စစ်သူကြီး' မရိုက်ခင်တုန်းက သဘောမကျဘူးဆိုပဲ... အခုကြည့်ရတာ သူ့နေရာကို အစားမထိုးချင်တော့တဲ့ပုံပဲ...တစ်ခုခုတော့ ရှိရမယ်...]

[ဟုတ်တယ်... ရုပ်ရှင်ဧကရာဇ်ဟယ့်က ဘယ်လိုပဲ အဓိကဒါရိုက်တာ ဖြစ်နေပါဦးတော့ ဒါရိုက်တာချန်ကသာ ယဲ့ဇယ်ရှစ်ကို သဘောမကျရင် သူလည်း ဘာမှပြောလို့မရဘူးလေ...အခုဟာကို ကြည့်ရတာ ယဲ့ဇယ်ရှစ်က တကယ်သရုပ်ဆောင်ကောင်းမယ့်ပုံပဲ...]

ထိုမှတ်ချက်များနဲ့အတူ ယဲ့ဇယ်ရှစ်ဖန်များက တစ်ယောက်ပြီး တစ်ယောက်ပြောလာကြသည်။ 

[ရှစ်ရှစ်က ဝီရိယရှိပြီး တက်ကြွတယ်ထင်လို့ ဒါရိုက်တာချန်က သာမန်မှတ်ချက်ပေးလိုက်တာရော မဖြစ်နိုင်ဘူးလား...ယဲ့ဇယ်ရှစ်က ဒီရုပ်ရှင်မှာ သူ အစွမ်းကုန်ကြိုးစားမှာပါ...ငါတို့မျှော်လင့်တာကတော့ အင်တာနက်အသုံးပြုသူတွေ သူ့ကို အရမ်းကြီး မချီးကျူးကြစေချင်တာပါပဲ...]

အင်တာနက်ပေါ်တွင် ဆွေးနွေးမှုများမှာ အမျိုးမျိုးရှိနေကြသည်။ သို့သော် ထိုဆွေးနွေးမှုတို့၏ အချက်အချာဖြစ်သည့် ယဲ့ဇယ်ရှစ်ကမူ ထိုသည်ကို လုံးဝဂရုမစိုက်ချေ။

ယခုအချိန်တွင် နေအလွန်ပူနေလေသည်။ ယဲ့ဇယ်ရှစ် အရိပ်အောက်က ထိုင်ခုံပေါ်တွင် ထိုင်နေသည်။ သူ့ဘယ်ဘက်လက်တွင် လျှပ်စစ်ပန်ကာကို ကိုင်ထားကာ ညာဘက်လက်တွင် ရေခဲမုန့်ကို ကိုင်ထားလေသည်။ သူ မသက်မသာဖြင့် ဒရာမာတစ်ပုဒ်ကို ကြည့်နေခဲ့သည်။

ယဲ့ဇယ်ရှစ်နှင့် မနီးမဝေးတွင် ဇာတ်လမ်းစာသားများကို ရွတ်နေကြသော အခြားသရုပ်ဆောင်များ ရှိလေသည်။

ထိုသည်မှာ သက်တောင့်သက်သာ ဖြစ်နေသော ယဲ့ဇယ်ရှစ်နှင့်ယှဉ်လျှင် အပြတ်အသတ် ကွဲပြားခြားနားသော မြင်ကွင်းပင်ဖြစ်လေသည်။

ဟယ့်ကျင်းယွင် အလုပ်ပြီးပြီဖြစ်သောကြောင့် လမ်းလျှောက်ပြန်လာရာတွင် ထိုမြင်ကွင်းကို မြင်လိုက်ရသောအခါ သူ မပြုံးဘဲမနေနိုင်ပေ။

ယဲ့ဇယ်ရှစ်၏ ယခုကဲ့သို့ ‌အေးအေးဆေးဆေးနေပုံမှာ "Time Idol"တွင် သူနေခဲ့သည့်ပုံနှင့် မည်သို့မျှ မခြားနားပေ။

ခြားနားသည့် တစ်ခုတည်းသောအချက်မှာ "Time Idol"၏ လေ့ကျင့်ရေးအခန်းတွင် လေအေးပေးစက်ရှိပြီး ရိုက်ကွင်းတွင်မူ လျှပ်စစ်ပန်ကာသာ ရှိနေခြင်းပင်ဖြစ်လိမ့်မည်။

ဟယ့်ကျင်းယွင် ရေခဲရေတစ်ဘူးယူသွားကာ ယဲ့ဇယ်ရှစ်ဘေးတွင် သဘာဝကျကျ ထိုင်ချလိုက်သည်။ ထို့နောက် မဖွင့်ရသေးသော ရေတစ်ဘူးကို ကမ်းပေးလိုက်သည်။ 

ယဲ့ဇယ်ရှစ်က ဟယ့်ကျင်းယွင် ထိုင်ချလာသောအခါ အနည်းငယ် ခပ်မတ်မတ်ထိုင်လိုက်သည်။ ထို့နောက် ရေဘူးကိုယူကာ ကျေးဇူးတင်စကားပြောလိုက်သည်။

"ကျေးဇူးတင်ပါတယ် ဟယ့်လောင်ရှီး..."

ဟယ့်ကျင်းယွင် ခေါင်းအသာညိတ်ပြလိုက်ကာ ယဲ့ဇယ်ရှစ်ကို စိတ်ဝင်တစားကြည့်လိုက်သည်။ 

ယဲ့ဇယ်ရှစ် ရေဘူးကို ဖွင့်လိုက်ပြီး တစ်ငုံသောက်လိုက်သည်။ သူ ဟယ့်ကျင်းယွင်ကို စူးစမ်းသလို ကြည့်လိုက်သည်။

ဟယ့်ကျင်းယွင် ရုတ်တရက် ပြောလိုက်သည်။

"မင်းကြည့်ရတာ ငါ့ကို သဘောမကျနေတဲ့ပုံပဲ..."

ယဲ့ဇယ်ရှစ်: "..."

မေး‌နေစရာလိုသေးလို့လား...

သူ၏ အားလပ်ရက်လေးကို အဆုံးတွင် ပျော်မြူးတော့မည် ကြံကာမှ ရုပ်ရှင်အဖွဲ့တွင် ပါဝင်ရန် ဆွဲထည့်ခံလိုက်ရပြီး အလုပ်ပြန်လုပ်ခဲ့ရသည်။ တစ်ဖက်လူကို သဘောကျနေသည်ကမှ ထူးဆန်းနေဦးမည်။ 

သေချာပေါက်ပင် ထိုသည်ကို သူ ထုတ်ပြောမည်မဟုတ်ပေ။ ယဲ့ဇယ်ရှစ် သာမန်ပင်ပြုံးပြလိုက်သည်။

"ဘာဖြစ်လို့လဲဟင်...ဟယ့်‌လောင်ရှီးကို ဘယ်ဟာကများ အဲ့လို တွေးမိစေတာလဲမသိဘူး..."

"အိုး..."

ဟယ့်ကျင်းယွင် သူ့ကိုပြုံးကာ ဆက်ကြည့်လိုက်သည်။

ယဲ့ဇယ်ရှစ်၏ မျက်လုံးများက အလွန်ဖြူစင်လှသည်။

အတန်ကြာမှ ဟယ့်ကျင်းယွင် အကြည့်လွှဲလိုက်ကာ ပြုံးလိုက်လေသည်။ 

"မင်းမှာ လူတွေကို လှည့်ဖျားနိုင်တဲ့ သရုပ်ဆောင်စွမ်းရည် ကောင်းကောင်းရှိတာပဲ..."

ယဲ့ဇယ်ရှစ်: "ဟယ့်လောင်ရှီးကမှ သရုပ်ဆောင်တာ ပိုကောင်းတာပါ..."

အဆုံးတွင် တစ်ဖက်လူမှာ ဆုသုံးဆုရ သရုပ်ဆောင်ဖြစ်လေသည်။ သို့သော် သူကမူ သူမသေခင်အချိန်အထိ အကောင်းဆုံး သရုပ်ဆောင်ဆုတစ်ဆုသာ ရဖူးလေသည်။ သေခြင်းတရားက သူ့နာမည်ကို မခေါ်မီအထိ ငါးစက္ကန့်လောက်ပင် ထိတွေ့ခွင့်မရခဲ့သော ဆုပင်ဖြစ်သည်။

ဟယ့်ကျင်းယွင် စိတ်ပျော်သွားကာ ခေါင်းစဉ်ပြောင်းလိုက်သည်။ 

"မနေ့က ရှန်ဇယ်ယွီ ဆက်သွယ်လာတယ် သူtheme songကို ရေးလို့ပြီးပြီ ပြောတယ်...မင်းစိတ်ဝင်စားရင် အတူတူ အသံသွင်းလို့ရမလားလို့ သူမေးခိုင်းလိုက်တယ်..."

ယဲ့ဇယ်ရှစ် မတုံ့ဆိုင်းဘဲဖြေလိုက်သည်။

"စိတ်မဝင်စားပါဘူး..."

မျှော်လင့်ထားသည့် အဖြေဖြစ်သော်လည်း ဟယ့်ကျင်းယွင် ခေတ္တတိတ်ဆိတ်သွားရသည်။ 

"ဒီက ရုပ်ရှင်အဖွဲ့ရဲ့အချိန်ကို ညှိလို့ရတယ်ဆိုတော့ အချိန်နှောင့်နှေးစေမှာကို ပူစရာမလိုပါဘူး..."

ယဲ့ဇယ်ရှစ် လေးလေးစားစားပြန်ပြောလိုက်သည်။

"ဒါပေမယ့် စာသားတွေကို မှတ်ဖို့လို့က အချိန်မ‌လောက်ဘူး...ကျွန်‌တော့်မှာ အသံသွင်းဖို့ တကယ်အချိန်မရှိလို့ပါ..."

ဟယ့်ကျင်းယွင် ဖုန်းအောက်တွင် ဖိထားသော ယဲ့ဇယ်ရှစ်၏ ဇာတ်ညွှန်းကို ကြည့်လိုက်ပြီး တိတ်ဆိတ်သွားပြန်သည်။ 

ယဲ့ဇယ်ရှစ် သူ့ကို ကြည့်လိုက်သည်။ သူ လုံးဝ မရှက်ချေ။ သူ ဇာတ်ညွှန်းကို ခပ်တည်တည်ထုတ်လိုက်ကာ ဟယ့်ကျင်းယွင် အရှေ့၌ပင် ဖွင့်ဖတ်လေတော့သည်။

"ဟူး...စာသားတွေ မှတ်ရတာကလည်း တကယ်မလွယ်တဲ့ အလုပ်ပါလားနော်..."

ဟယ့်ကျင်းယွင် တကယ်လက်မြှောက်လိုက်ပေသည်။

ထားလိုက်တော့...သီချင်းက ရှန်ဇယ်ယွီရေးတာဆိုတော့ သူကိုယ်တိုင်ပဲ ကိုင်တွယ်သင့်တာပေါ့...

သူ့ကိုယ်သူ ထိုသို့ ပြောလိုက်သည်မှာ ရှန်ဇယ်ယွီကို သီချင်းရေးခိုင်းသည်မှာ သူ မဟုတ်သည့်အတိုင်းပင်။ 

ညနေခင်းတွင် လေထုထဲရှိ အပူများ လွင့်ပါးလေပြီဖြစ်သောကြောင့် ရိုက်ကူးရေးအဖွဲ့မှာ ယနေ့အတွက် အဓိကဇာတ်ဝင်ခန်းဖြစ်သည့် ဟယ့်ကျင်းယွင်နှင့် ယဲ့ဇယ်ရှစ် အတူသရုပ်ဆောင်ရမည့် ဇာတ်ဝင်ခန်းကို ပြင်ဆင်နိုင်ပြီ ဖြစ်လေသည်။

ရှန်ချန်ကျိုးနှင့် အားဇီပထမဆုံး စတွေ့သည့်အချိန်မှာ သွေးလွှမ်းစစ်ပွဲပြီးပြီးချင်း စစ်တပ်ထဲသို့ ရှန်ချန်ကျိုး ဝင်ရောက်လာစအချိန်ဖြစ်သည်။

ငယ်ရွယ်သော ရှန်ချန်ကျိုးမှာ စစ်ပွဲ၏ရက်စက်မှုကို ပထမဆုံးအကြိမ်မြင်တွေ့ခဲ့ရသည်။ သူ၏ ဆယ်ကျော်သက်အရွယ်လက်များမှာ ပထမဆုံးအကြိမ်အဖြစ် သွေးစွန်းခဲ့ရသည်။

သူ့အပေါ်သို့ သွေးစက်များက ဖြန်းပက်နေခဲ့သည်သာမက သူ့အပေါင်းအပါများလည်း တစ်ယောက်ပြီးတစ်ယောက် ကျဆုံးကုန်သည်။

ထိုအဖြစ်အပျက်က ခပ်ဆိတ်ဆိတ်သာနေတတ်သော ဆယ်ကျော်သက်လေးကို ပို၍ပြင်းထန်စွာ ငြိမ်သက်သွားစေခဲ့သည်။

သူ့စိတ်များ ရှုပ်ထွေးနေခဲ့ပြီး အဖြေရှာမရခဲ့ပေ။ သူ့နှလုံးသား၏ အနက်ရှိုင်းဆုံးတွင်မူ သူအနည်းငယ် ကြောက်လန့်နေခဲ့သည်။

မြေပေါ်ကိုလဲကျသွားမယ့် နောက်တစ်ယောက်က ငါ များဖြစ်နေမလား...

ရှန်ချန်ကျိုး စိတ်ထဲတွင် ထိုကဲ့သို့ ထပ်ခါထပ်ခါ မေးခွန်းထုတ်နေခဲ့သည်။ 

ရှန်ချန်ကျိုး၏အတွေးများကို သူ့ငယ်ချင်းများက ခန့်မှန်းမိပုံရခဲ့သည်။ အောင်ပွဲကြီး ရရှိပြီးသောအခါ သူ့သူငယ်ချင်းများက ရှန်ချန်ကျိုးကို ပြဇာတ်ကြည့်ရန် စစ်တပ်စခန်းမှ ဆွဲခေါ်လာခဲ့ကြသည်။ 

နဥ်ချန်၏ အားဇီမှာ မြို့တော်တွင် အကောင်းဆုံးအဆိုတော်ဟု ပြောကြသည်။

နဥ်ချန်၏ နံပါတ်တစ် အလှပဂေးပင် သူနှင့် မယှဉ်နိုင်ဟုလည်း ဆိုကြသည်။

နဥ်ချန်သို့ ရောက်လာသမျှ လူတိုင်းက အားဇီ သီချင်းဆိုသည်ကို လာ‌နားထောင်ကြစမြဲ ဖြစ်သည်။

ညပိုင်းက အနည်းငယ် အေးမြသော်လည်း တာကျင်း၏အစွန်ဖျားရှိ နဉ်ချန် ညစျေးတန်းမှာ အမြဲလိုပင် စည်ကား‌နေလေသည်။

သွားရာလမ်းတစ်လျှောက်တွင် ရှန်ချန်ကျိုးမှာ သွားချင်စိတ်မရှိသောကြောင့် စိတ်အလိုမကျဖြစ်နေခဲ့သည်။ 

ပြဇာတ်ရုံသို့ မရောက်မီ သူတို့ လူတစ်ယောက်ကို ဝင်တိုက်မိသည်။

"လမ်းကို ကြည့်မသွားတတ်ဘူးလား..."

ရှန်ချန်ကျိုး ဘာမှမပြောမီ သူဘေးရှိသူငယ်ချင်းက ဒေါသတကြီးဆိုသည်။

ထိုသူမှာ အပြာရောင်ဝတ်စုံကို ဝတ်ဆင်ထားကာ တစ်ဖက်လူနှင့် တိုက်မိသွားသော ပုခုံးကို ပွတ်နေလေသည်။ သူ စကားမဆိုဘဲ ဖီးနစ်မျက်ဝန်းအစုံက လူအနည်းငယ်ကို ဖျော့တော့စွာ ငဲ့ကြည့်လိုက်သည်။ 

ပတ်လည်တွင် အသက်ရှူသံများကိုသာ ကြားနေရကာ သူ့သူငယ်ချင်းများက တိတ်ဆိတ်နေခဲ့သည်။

ရှန်ချန်ကျိုး စိတ်ရှုပ်လာသောကြောင့် မျက်လုံးပင့်ကြည့်လိုက်ချိန်တွင် သူ အံ့ဩမှင်သက်မိသွားသည်။

ထိုမျက်နှာမှာ တစ်ချက်ကြည့်လိုက်ရုံနှင့်ပင် ရှောင်ဖယ်သွားရန် မဖြစ်နိုင်သည့် မှတ်မိလွယ်သော မျက်နှာမျိုးဖြစ်သည်။

ထိုသူမှာ အမျိုးသားတစ်ယောက် ဖြစ်သည်မှန်သော်လည်း သူ့ထံတွင် စွဲညှို့နိုင်သော မျက်ဝန်းအစုံရှိလေသည်။ နှာတံလေးမှာ လှပကာ နှုတ်ခမ်းသားများက နီ‌ရဲနေပြီး သွားလေးများက ဖြူဖွေးနေသည်။ မျက်ခုံးနှစ်ခုကြားရှိ ဟင်္သာပြဒါးရောင်မှည့်လေးက သူ့မျက်နှာသွင်ပြင်ကို ပို၍ ထင်ရှားပေါ်လွင်စေသည်။ 

ရှန်ချန်ကျိုးက ကြည့်နေ‌သည်ကို မြင်သောအခါ ထိုသူက သူ့ကိုတည်ငြိမ်စွာ ပြန်ကြည့်လိုက်သည်။

ခဏကြာသောအခါ ထိုသူက ဦးစွာပြောလိုက်သည်။

"ဒီကသခင်လေးတွေက ပြဇာတ်ကြည့်ဖို့ လာခဲ့ကြတာပါလား..."

ရှန်ချန်ကျိုး ဘာမှပြန်မပြောခဲ့ပေ။

ထိုသူက သူ့အဖြေကို တိတ်ဆိတ်စွာ စောင့်ဆိုင်းနေဆဲပင်။

ရှန်ချန်ကျိုးက စကားပြန်မပြောသည်ကို မြင်သောအခါ သူ့ဘေးရှိ သူငယ်ချင်းက အသိပြန်ဝင်လာသည်။ သူတို့၏ မဆင်မခြင်လုပ်မှုကြောင့် အနည်းငယ်စိတ်ရှုပ်သွားကာ ပြောလိုက်သည်။

"ဟုတ်ပ...ဟုတ်ပ...နဉ်ချန်မှာ နာမည်ကြီးတဲ့ အဆိုတော်တစ်ယောက်ရှိတယ်ကြားလို့ ငါတို့လာပြီးနားထောင်တာ..."

ထိုသူက ခပ်ရေးရေးပြုံးလိုက်သောကြောင့် သူ့မျက်နှာ အစိတ်အပိုင်းများမှာ ပို၍ပင် သက်ဝင်လှုပ်ရှားသွားသည်။ သို့သော် ထိုသူက အခြားသူများအပေါ် အကြည့်တစ်ချက် မစွန့်ကြဲဘဲ သူ့အရှေ့ရှိ ရှန်ချန်ကျိုးကိုသာ ကြည့်နေခဲ့သည်။ 

ရှန်ချန်ကျိုး မသိမသာ အကြည့်လွှဲလိုက်သည်။

သူ့ဘေးရှိ သူငယ်ချင်းက လက်ဆန့်လိုက်ပြီး ရှန်ချန်ကျိုးကိုပုတ်လိုက်ကာ ပုံမှန်နှင့် မတူဘဲ ပြုမူနေသည့် သူ့ကို အသံတိတ် ဆဲဆိုနေခဲ့သည်။ 

သူတို့လို လူကြမ်းကြီးများအတွက် ဤကဲ့သို့ ချောမောလှပသည့် အမျိုးသားတစ်ယောက်ကို တွေ့ရသည်မှာ ယခုက ပထမဆုံးဖြစ်လေသည်။ သို့သော် ရှန်ချန်ကျိုးက ထိုသူကို အထူးတလည် အမှတ်မထားပေ။

ထိုအပြာရောင်ဝတ်စုံနှင့်သူကလည်း စိတ်ဆိုးသည့်ပုံမပေါ်ပေ။ ထို့နောက် သူ အပြုံးရေးရေးဖြင့် ဆက်ပြောလိုက်သည်။

"အဲ့ဒီလိုဆိုရင် ကျွန်တော်နဲ့အတူအထဲကို လိုက်ဝင်ပါ့လား..."

ထိုသူ၏ဦးဆောင်မှုဖြင့် ရှန်ချန်ကျိုးနှင့်သူ့အဖွဲ့ ပြဇာတ်ရုံထဲသို့ ဝင်သွားခဲ့သည်။ ထို့နောက် ထိုသူက သူတို့ကို ဒုတိယထပ်ရှိ သီးသန့်ခန်းသို့ ခေါ်ဆောင်သွားခဲ့သည်။

ထိုသို့သွားရာတစ်လျှောက်တွင် ရှန်ချန်ကျိုး တိတ်တိတ်သာနေခဲ့သည်။ အင်္ကျီအပြာနှင့် အမျိုးသားမှာ သူ့ကို ခဏခဏ လှည့်ကြည့်နေခဲ့သော်လည်း သူ မမြင်ချင်ယောင်သာဆောင်လိုက်သည်။ 

ထိုသူထွက်သွားသောအခါမှ ရှန်ချန်ကျိုး ခေါင်းမော့လိုက်ကာ သူထွက်သွားရာဖက်ကို ကြည့်လိုက်သည်။

ထွက်သွားသောထိုသူမှာ သူ့ကိုကြည့်နေသည်ကို ခံစားမိလိုက်ပုံရသည်။ သူ ရုတ်တရက် ရပ်လိုက်ကာ ခေါင်းလှည့်ပြီး ရှန်ချန်ကျိုးကို ခပ်ဖွဖွပြုံးပြလိုက်သည်။

ရှန်ချန်ကျိုး နေရာမှာပင် တောင့်တင်းသွားသည်။

"ကတ်..." 

ဒါရိုက်တာချန် အော်လိုက်ပြီး မတ်တပ်ရပ်လိုက်သည်။

"ဒီအပိုင်းအတွက် ပြီးပြီ..."

ရိုက်ကွင်းနေရာတွင် အသက်ရှူသံမျှင်းမျှင်းပင် မကြားရပေ။

ပြီးပြီဟုတ်လား...ဒီလိုမျိုးနဲ့လေ...

အခုမှ ပထမဆုံးရိုက်ချက်ပဲ ရှိသေးတာမဟုတ်ဘူးလား...

ချန်ကျန့်ထျန်းပင် အနည်းငယ်အံ့ဩသွားသည်။ ထိုရိုက်ချက်တွင် သူ လုံးဝကို အပြစ်ရှာမရခဲ့ပေ။ 

ဇာတ်ဆောင်နှစ်ယောက်၏ စိတ်ခံစားချက်များမှာ အလွန်ကောင်းခဲ့သည်။ စာသားပြောရာတွင် ချိန်သားကိုက်သည်မှအစ သူ ပြစ်ချက်တစ်ခုမှ ရှာမရခဲ့ပေ။

အထူးသဖြင့် ယဲ့ဇယ်ရှစ်...သူက တော်တော်လေး အံ့ဩဖို့ကောင်းတာပဲ...

ချန်ကျန့်ထျန်း သူ့မျက်လုံးထဲမှ စိတ်လှုပ်ရှားမှုတို့ကို မဖုံးကွယ်ထားနိုင်ပေ။ ဟယ့်ကျင်းယွင်၏ အလွှမ်းမိုးမခံရဘဲ ဟယ့်ကျင်းယွင်နှင့်အပြိုင် သရုပ်ဆောင်နိုင်သည့် သရုပ်ဆောင်ငယ်လေးကို တွေ့ရသည်မှာ သူ့အတွက် ပထမဆုံးပင်ဖြစ်သည်။

ဟယ့်ကျင်းယွင်က သူတွေ့ဖူးသမျှလူများတွင် အရည်အချင်းအရှိဆုံးသူဖြစ်သည်။

ဝါရင့်သရုပ်ဆောင်များပင် သူနှင့်အတူ သရုပ်ဆောင်ရာတွင် ရံဖန်ရံခါဆိုသလို ဟယ့်ကျင်းယွင်၏ လွှမ်းမိုးသည်ကို ခံရသေးသည်။ 

ထိုသို့ဖြစ်လျှင် ပရိသတ်က ဟယ့်ကျင်းယွင်ကိုသာ အလုံးစုံ အာရုံစိုက်မိ‌သွားကာ သူ့ဘေးနားရှိ သရုပ်ဆောင်ကို လျစ်လျူရှုသွားကြပြီး ဇာတ်ဆောင်၏ တည်ရှိမှုကို လျော့ကျသွားစေသည်။

သို့သော် ယဲ့ဇယ်ရှစ်ကမူ ထိုသို့ မဟုတ်ပေ။

သူ့သရုပ်ဆောင်မှုက ကွက်တိကျသည်။

ယနေ့ နှစ်ဦးသားတွေ့ဆုံမှုအတွက် ရိုက်ကူးချိန်ကို တစ်နာရီကြာသည်အထိ ဒါရိုက်တာချန်က အစီအစဉ် ဆွဲထားခဲ့လေသည်။

ယဲ့ဇယ်ရှစ်က သူ့သရုပ်ဆောင်စွမ်းရည်ကို သက်သေပြခဲ့သော်လည်း ယနေ့ တွေ့ဆုံသည့်ဇာတ်ဝင်ခန်းကို သူလိုချင်သည့်အတိုင်း ယဲ့ဇယ်ရှစ်က သရုပ်ဆောင်နိုင်မည် မဆောင်နိုင်မည်ကို ချန်ကျန့်ထျန်း မသေချာခဲ့ပေ။

သို့သော် သူ မမျှော်လင့်ခဲ့သည်မှာ ယဲ့ဇယ်ရှစ်က သူလိုချင်သည့်အတိုင်း သရုပ်ဆောင်နိုင်ခဲ့ရုံသာမက ထိုသည်က လုံးဝပြီးပြည့်စုံသည်ဟုပင် ပြောနိုင်သည်။

အပြုအမူ၊ သရုပ်ဆောင်ချက် အဆင့်တိုင်းက မှန်ကန်နေသည်။

ဤသို့ အချိန်မျိုးတွင် ချန်ကျန့်ထျန်း 'သံကိုပူတုန်း နာနာသာထု'လိုက်သည်။ သူ ရိုက်ကွင်းပြင်ဆင်ရေးအဖွဲ့ကို နောက်ဇာတ်ဝင်ခန်းအတွက် ပြင်ဆင်ရန် ပြောပြီးနောက် အခြားဇာတ်ဝင်ခန်းကို ရိုက်ရန် ထွက်သွားသည်။

မိတ်ကပ်ပညာရှင်က ယဲ့ဇယ်ရှစ်ကို မိတ်ကပ်ပြန်ပြင်ပေးနေသည်။ ထိုသည်ကို အခွင့်ကောင်းယူ၍ ကောင်းရှူ ရောက်လာပြီး ယဲ့ဇယ်ရှစ်ကို ရေတစ်ဘူး ပေးလိုက်သည်။

ယဲ့ဇယ်ရှစ် တစ်ငုံသောက်လိုက်ပြီး ပြောလိုက်သည်။

"ဟယ့်လောင်ရှီး သရုပ်ဆောင်တာကတော့ ရှယ်ကောင်းတာပဲ..."

ရိုက်ကွင်းက အနည်းငယ်ဆူညံနေသည်။ ကောင်းရှူ အစ၌ သဲသဲကွဲကွဲ မကြားရပေ၊ ထို့နောက် ကြောင်သွားသည်။

"ဟမ်..."

ယဲ့ဇယ်ရှစ် ရေဘူးကို အဖုံးပြန်ပိတ်လိုက်ပြီး အညောင်းဆန့်ကာ ခေါင်းရမ်းပြလိုက်သည်။

"ဘာမှမဟုတ်တော့ဘူး..."

ဒါက အရမ်း အရေးကြီးတဲ့ကိစ္စလည်း မဟုတ်ပါဘူးလေ...

🎶🎶🎶