MM Story Teller

👻Chapter 6

Viewers 1k

👻Chapter 6

ချန်းထောင်က ထိုကိစ္စကိုသိပ်ဂရုစိုက်နေပုံမပေါ်ပဲ သာမာန်ကာလျှံကာသာကျော်ချလိုက်လေသည်။

မေးလိုသည်တို့ကိုလည်းမေးပြီးနောက် ဖေးယွီ ထပြန်ရန်ပြင်လိုက်လေသည်။ မတ်လထဲတွင်ဖြစ်သော်လည်း သူကအအေးဒဏ်ကိုမကြောက်သည့်အလား ရိုးရှင်းသောတီရှပ်နှင့်ဘောင်းဘီရှည်များကိုသာ၀တ်ဆင်ထားလေသည်။ တံခါး၀သို့အရောက်တွင် သူ၏ခြေလှမ်းတို့ရပ်တန့်သွားခဲ့လေသည်။ လက်တစ်ဖက်ကို တံခါးဘောင်ပေါ်တင်လျက်နောက်ကိုလှည့်ကြည့်လာခဲ့လေသည်။ ထိုသို့မော်ဒယ်ဆန်ဆန် ပို့စ်ပေးလျက်အနေအထားနှင့် သူကလျှို့၀ှက်ဆန်းကြယ်သောဆရာသခင်အသွင်နှင့် လေးနက်စွာဆိုလာခဲ့သည်။

"မင်းယုံရင်ရှိတယ် မင်းမယုံရင်မရှိဘူး ဆိုပေမယ်...ဒီကအဖြူရောင်သူငယ်ချင်းလေး မင်းသူငယ်ချင်းကို ရိုက်ကူးရေးကို ရူးကြောင်ကြောင်နဲ့ပြန်မသွားအောင်တားထားလိုက်ဦး"

ထို့နောက်စကားသံမှာရပ်တန့်သွားပြီး ဖေးယွီမှာ သူ၏နေကာမျက်မှန်ကို နှာရိုးပေါ်ဆွဲချလိုက်သည်။
ရှီကျားကို အပြုံးမမည်သော အပြုံးဖြင့်ကြည့်ကာဆိုလာခဲ့လေသည်။

"ဒီကမ္ဘာကြီးမှာ သရဲတွေဆိုတာရှိတယ်..အငြိုးကြီး၀ိဥာဥ်တွေတောင်ရှိသေးတယ်..အငြိုးကြီး၀ိဥာဥ်တွေကမင်းကို ကောင်းခြင်းဆိုးခြင်းတွေပြောနေမှာမဟုတ်ဘူး...အတုန့်အပြန်၀ဋ်ဆိုတာရှိတယ်"

နွေးထွေးသောနေရောင်ခြည်မှာ ပြတင်းပေါက်မှဖြတ်လျက် လိုလူရွယ်၏ သန့်စင်ကြည်လင်သောမျက်နှာလေးပေါ်ဖြာကျလျက် ယင်နှင့်ယန်ယှဥ်တွဲတည်ရှိနေခြင်းနှယ် ပသာဒဖြစ်စေသည်။ ချန်းထောင်ရင်ထဲမဆိုစလောက်လေး တုန်လှုပ်သွားမိရသည်။ သူသည် ထိုလူရွယ်လေးမှာ ဆရာသခင်အတုမှန်းသိပြီးသော်လည်း တဖက်လူကထိုသို့စကားမျိုးကိုပြောလာသောအခါ ချန်းထောင်ထပ်မတွေးပဲမနေနိုင်ခဲ့ချေ။ ဤကမ္ဘာကြီးမှာ သူထင်ထားသလိုမရိုးရှင်းသည်လည်းဖြစ်နိုင်လေသည်။

ဖေးယွီ၏ တည်ကြည်သော်လည်း ခပ်မိုက်မိုက်အသွင်ကိုကြည့်လျက် ရှီကျား၏နှုတ်ခမ်းထောင့်တို့မြင့်တက်သွားခဲ့သည်။ သူကထရပ်လိုက်ရင်းဆိုလိုက်လေသည်။

"လူကြီးမင်းပြောတာသာအမှန်ဆို ကျွန်တော်တို့ဘာလုပ်ရမယ်လို့ထင်လဲဗျ"

၄င်းကိုကြားသော်ဖေးယွီမှာ ဤသေရမှာမကြောက်သော သူငယ်ချင်းလေးကို ယုံကြည်အောင်သိမ်းသွင်းနိုင်ပြီဟု ရုတ်ချည်းခံစားလိုက်ရလေသည်။ သူကသူ၏မျက်နှာပေါ်မှ ကျေနပ်မှုကို ကြိုးစား၍ဖုံးကွယ်ထားလိုက်သည်။ သူကအခန်းထဲပြန်လျှောက်လာပြီး လေးနက်သောအသံနေအသံထားဖြင့်ဆိုလာခဲ့သည်။

"ဒီလိုဆို ငါနဲ့ဆွေးနွေးတိုင်ပင်သင့်တာပေါ့..လူတစ်ယောက်မှာ တတ်နိုင်စွမ်းများလေ တာ၀န်ပိုကြီးလေပဲ...ထူးကဲတဲ့စွမ်းရည်တွေလက်ခံထားရတဲ့ငါလိုလူက အမြဲကူညီချင်စိတ်အပြည့်ရှိပါတယ်ကွာ...ဒီတစ်ကြိမ်ငါ့ကိုယုံဖို့ဆုံးဖြတ်လိုက်မှတော့ငါက မင်းနဲ့ ဒီကသူငယ်ချင်းလေးကို အဆောင်လက်ဖွဲ့တစ်ခုအလကား လက်ဆောင်ပေးခဲ့မယ်..ဒါကို၀တ်ထားရင် သရဲတွေအနားမကပ်နိုင်..နိုင်...၀ူ..၀ူ.၀ူ..၀ူရှန်းချင်းလီ"

ဆရာသခင်အတုလေး၏မျက်နှာပေါ်မှ ဘ၀င်ခိုက်နေသော အမူအရာမှာ တုန်လှုပ်ခြောက်ခြားခြင်းအဖြစ်စက္ကန့်ပိုင်းအတွင်းပြောင်းလဲသွားခဲ့လေသည်။ သူ၏တစ်ကိုယ်လုံးနောက်ကို ဗြန်းခနဲခုန်ဆုတ်သွားခဲ့လေသည်။ ထို့နောက်သူသည် ချန်းထောင်၏ လက်ညှိုးလုံးလောက် IV dripတိုင်လေးနောက်တွင် သူ့ကိုယ်လုံးကိုဖုံးကွယ်ရန်ကြိုးစားလိုက်လေသည်။

ထိုလက်ညှိုးအရွယ်IV standလေးမှာ ဖေးယွီ၏ကိုယ်လုံးကိုအနည်းငယ်မျှဖုံးကွယ်မပေးနိုင်သော်လည်း သူ၏တစ်ကိုယ်လုံးမှာ တုန်လှုပ်နေခဲ့လေသည်။ အခန်းထဲမှ လူ၂ယောက်မှာ ထိုIV standကြီးကိုဆွဲကာပြေးနေသော သူ့အားကြောင်အစွာကြည့်နေခဲ့ကြလေသည်။ ချန်းထောင်မှာ အရင်ဆုံးသတိ၀င်လာသူဖြစ်ကာ နာကျင်စွာ အော်မြည်လိုက်လေသည်။

"အား..လက်မှာဆေးသွင်းထားတုန်းလို့..IV standကိုပြန်ပေးလို့"

ထိုအခိုက်အတန့်တွင် ဖေးယွီမှာ အခန်းထောင့်တွင် ကုပ်နေနှင့်ပြီဖြစ်လေသည်။ IV standကြီးတွင် သူ၏မျက်နှာကိုကွယ်လျက် အခန်းလယ်မှ ရှီကျားကို သတိဖြင့်ကြည့်နေခဲ့လေသည်။

ကျော့ရှင်းလှပသော လူရွယ်လေးမှာ သူ၏ခေါင်းကိုဖြည်းညှင်းစွာငုံ့ကြည့်လိုက်လေသည်။ ထိုအခါမှ သူထရပ်လိုက်သည့်အချိန် သူ၏လည်ပင်းတွင်ဆွဲထားသော ကြေးအံစာတုံးလေးကအ၀တ်ထဲမှထွက်ကျလာမှန်း သတိထားမိလိုက်လေသည်။ သူကခေါင်းကိုတဖန်မော့လျက် မလှမ်းမကမ်းတွင် ငြိမ်ကုပ်နေသော ဆရာသခင်အတုလေးကိုကြည့်လိုက်ပြန်သည်။ ထိုထူးဆန်းပြီး အတုအယောင်ဆန်ကာ အရည်မရအဖတ်မရများပြောပြီးလိမ်ညာတတ်သည့် ဆရာသခင်အတုလေးမှာ လောလောဆယ်တွင် IV standနောက်တွင် တစ်ကိုယ်လုံးတုန်ရီစွာပုန်းနေခဲ့သည်ကိုတွေ့လိုက်ရလေသည်။

"မင်း..မင်း..မင်း..ကငရဲဘုရင်ယဲ့ရဲ့ ဘာလဲ.."

ရှီကျားမှာ သူနာပြုတစ်ဦးကိုခေါ်လျက် ချန်းထောင်၏အပ်ကိုလဲကာ IV dripအသစ်တစ်ခုလဲစေလိုက်လေသည်။

သူနာပြုမှာ ဤသို့လူနာမျိုးကို မကြုံဖူးခဲ့ချေ။

IV dripက သူ့ဟာသူအဆင်ပြေနေတဲ့ဟာကို အပ်ကဘာလို့သူ့အလိုလိုပြုတ်သွားရတာလဲ...

အပ်အသစ်ကိုပြန်ထိုးပေးနေရင်း သူနာပြုမှာ ငြီးငြူလိုက်လေသည်။ ထို့နောက် ချန်းထောင်မှာ စိတ်နှင့်ကိုယ်နှင့်မကပ်ပဲ အပ်ကိုထပ်ဆွဲနှုတ်မိမည်ကို စိုးရိမ်နေပုံပင်။

ချန်းထောင်က သူ၏ဖြူစင်မှုကိုသက်သေမပြနိုင်ခဲ့ချေ။

တဖက်တွင်တော့ ရှီကျားနှင့် ဆရာသခင်အတုလေးမှာ အခန်းထဲမှထွက်ခွာသွားခဲ့ပြီဖြစ်လေသည်။

အစကတော့ ထိုလူငယ်လေးမှာ ပါးစပ်ကိုဖွင့်လိုက်တိုင်း သရဲရှိသည်ချည်းပြောနေခဲ့လေရာ ရှီကျားက တဖက်လူကို ဆရာသခင်အတုဟုသာ ထင်ခဲ့မိလေသည်။ သို့သော် ထိုတဖက်လူမှာ အစစ်အမှန်ကောင်းကင်ဘုံဆရာသခင်တစ်ဦးဖြစ်နေလိမ့်မည်ဟုထင်မထားခဲ့ချေ။ ထိုနေကာမျက်မှန်ပေါ်ဆွဲလိုက်သော အက္ခရာ၂ခုကိုမြင်ပြီးပြီးနောက်တွင် ရှီကျားက တဖက်လူ၏ သရုပ်မှန်ကိုနားလည်လိုက်လေသည်။ သို့သော် ဤလူရွယ်က ဆရာသခင်ယဲ့ကို အမှန်တကယ်သိနေလိမ့်မည်ဟုထင်မထားခဲ့ချေ။

တိတ်ဆိတ်၍ငြိမ်းချမ်းသော ဆေးရုံကော်ရစ်တာတွင် ကျော့ရှင်းလှပသော လူရွယ်လေးမှာ တဖြည်းဖြည်းနှင့်ရှေ့ကိုလျှောက်နေခဲ့လေသည်။ သူ၏နောက်တွင်မှု ဆရာသခင်အတုလေးမှာ ၃မီတာအကွာမှ ခပ်ကုပ်ကုပ်နှင့်လိုက်လာခဲ့လေသည်။ ပန်းခြံအ၀င်၀သို့ရောက်လျှင် ရှီကျားမှာနောက်ကိုလှည့်လျက် မဆိုပဲမနေနိုင်ခဲ့ချေ။

"ဆရာယဲ့နဲ့ငါက တစ်ခါပဲဆုံဖူးတာ..သူကကြင်နာတတ်တဲ့လူမို့လို့ ငါ့ယင်စွမ်းအင်ကိုဖုံးကွယ်ဖို့ သူ့မှော်လက်နက်ကိုငှားပေးခဲ့တာ"

ဖေးယွီမှာ ၄င်းကိုကြားသော် တစက်လေးမှ မယုံကြည်ခဲ့ချေ။

"ဒါ..ဒါပေမယ့် အဲဒါက၀ူရှန်းချင်းလီလေ..သူကမင်းကိုဘာလို့ငှားရမှာလဲ..."

ပြီးတော့ ငရဲမင်းယဲ့က ကြင်နာတတ်တဲ့သူဟုတ်လား...ငရဲမင်းယဲ့က လူစိမ်းတစ်ယောက်ကို သူ့မှော်လက်နက်ကြီးဒီတိုင်းငှားမှာတဲ့လား..အရူးတွေပဲယုံလိမ့်မယ်..

တဖက်လူ၏တုန့်ပြန်မှုကိုမြင်လျှင် ရှီကျားရုတ်ချည်းမေးလိုက်မိသည်။

"ဒီအံစာတုံးကအဲလောက်တောင်စွမ်းတာလား"

ဖေးယွီ၏မျက်လုံးတို့ကျယ်သွားခဲ့သည်။

"စွမ်းတာဟုတ်လား..စွမ်းတယ်ဆိုရုံစကားလေးက ဘယ်လိုလုပ်လုံလောက်မှာလဲ..မင်း ငရဲဘုရင်ယဲ့ဆိုတာ ဘယ်သူမှန်းတောင်မသိဘူးလား..မင်းကရွှမ်းရွှယ်ကမ္ဘာထဲကလူမဟုတ်လို့လား..ရွှမ်းရွှယ်ကမ္ဘာထဲမှာ ငရဲဘုရင်ယဲ့ကိုမသိတဲ့သူမျိုး ဘယ်လိုလုပ်ရှိနေတာလဲ"

ရှီကျားမှာတစ်ခုခုလွဲနေသလိုခံစားရလေသည်။ ခတ္တမျှတွေးကြည့်ပြီးနောက် သူ့အခြေအနေကို ဤယုံကြည်ကိုးစားမရပုံပေါ်သော ဆရာသခင်လေးကိုပြောပြလိုက်သည်မှာ ပိုကောင်းသည်ဟုခံစားလိုက်ရလေသည်။ သူ၏စကားများကိုနားထောင်ပြီးနောက် ဖေးယွီမှာ ပြုံးလိုက်လေသည်။

"ဒါပေါ့ သာမာန်လူတွေမှာ ယင်နဲ့ယန်တွေရှိတာပေါ့..မင်းသူငယ်ချင်းဆိုယန်စွမ်းအင်တွေပေါချက်လေ...မင်းယင်စွမ်းအင်ကဘယ်လောက်များတယ်ပြောပြော ဘယ်လောက်တောင်များနိုင်မှာမို့လဲ"

ရှီကျားမှာ မျက်ခုံးကိုအသာကျုံ့လျက် သူ၏လည်တိုင်တွင်ဆွဲထားသော ၀ူရှန်းရှင်းလီကို အသာချွတ်လိုက်လေသည်။ ယင်စွမ်းအင်များက ရုတ်ချည်း ကောင်းကင်ပေါ်ဆန်တက်တော့မည့်အလား လျှံကျလာခဲ့လေသည်။ အေးစိမ့်သောလေပြင်းတစ်ချက်မှာ တိုးဝှေ့လာပြီး ကြက်သီးမွှေးညှင်းများထသွားစေသည်။ ပန်းခြံထဲမှ မြက်ပြင်များမှာ ပြားပြား၀ပ်သွားကာ သူတို့အားလုံးက ရှီကျား၏ဦးတည်ရာကိုလှည့်လာခဲ့ကြသည်။

ဤတစ်ကြိမ်တွင် ဖေးယွီမှာလည်းတစ်ခုခုမူမမှန်သည်ကို ခံစားလိုက်ရလေသည်။

ရှီကျားကမေးလိုက်သည်။

"ဒီက..လူကြီးမင်းဖေး ကျွန်တော့်ယင်စွမ်းအင်ကိုမြင်ရပြီလား"

ဖေးယွီမှာ လက်ကိုဝေ့လျက် သာမာန်ကာလျှံကာဆိုလိုက်လေသည်။

"ခဏလေး..မင်းကိုကြည့်ပေးဖို့ အက္ခရာဆွဲပြီး ယင်ယန်မျက်လုံးဖွင့်လိုက်ဦးမယ်"

ရှီကျားမှာ အံ့သြသွားခဲ့သည်။

"ဆရာယဲ့တုန်းက အက္ခရာဆွဲစရာမလိုဘူးနော်"

ဖေးယွီ၏အကြည့်တို့ကဒိုင်းခနဲရောက်လာပြီး ယုံကြည်မှုရှိရှိကြေညာလာခဲ့လေသည်။

" ငရဲဘုရင်ယဲ့ကဘယ်သူမို့လို့လဲ...ငါကရောဘယ်သူမို့လဲ..ငါကသူ့ကိုဘယ်လိုများယှဥ်နိုင်မှာတုန်း..သူကယင်စွမ်းအင်ကို မြင်နိုင်တဲ့အစွမ်းနဲ့မွေးလာတာ...ရွှမ်းရွှယ်ကမ္ဘာကြီးတစ်ခုလုံးမှာ သူတစ်ယောက်ပဲရှိတယ်"

ပြောရင်းဆိုရင်းပင် ဖေးယွီမှာ သူ၏နေကာမျက်မှန်ပေါ်တွင် အက္ခရာတစ်ခုစီရေးဆွဲလိုက်လေသည်။ ထို့နောက်နေကာမျက်မှန်ကိုပြန်တပ်ရင်းဆိုလာခဲ့သည်။

"မင်းရဲ့ယင်စွမ်းအင်က ဘယ်လောက်တောင်များနိုင်မှာတဲ့တုန်း...အလွန်ဆုံးမှ သာမာန်လူထက် အဆတစ်ရာ..မဟုတ်လည်းအဆတစ်ထောင်.."

"အယ်..သောက်ပလုတ်တုတ်"

ထိုတက်ကြွကာ အထိန်းအကွပ်မဲ့သော ကျိန်ဆဲသံကြောင့် ပန်းခြံထဲတွင် အညောင်းအညာပြေလမ်းလျှောက်နေကြသော လူနာများမှာ ခေါင်းကိုကိုယ်စီလှည့်ကာကြည့်လာခဲ့ကြလေသည်။

ရှီကျားမှာ တည်ငြိမ်စွာပင် ၀ူရှန်းချင်းလီကိုသူ၏လည်ပင်းတွင် ပြန်ဆွဲလိုက်လေသည်။ ဖေးယွီမှာနေကာမျက်မှန်ကိုချွတ်လိုက်ပြီး သူ့ထံဗြုန်းဆိုရောက်ရှိလာခဲ့လေသည်။ သူ၏အမူအရာမှာ မယုံကြည်နိုင်မှုတို့ပြည့်နှက်လျက် ထိုရှင်းသန့်ကာနူးညံ့သောမျက်နှာလေးကိုအပေါ်အောက်အစုန်အဆန်ကြည့်ရှုနေသည်က အတွင်းနှင့်အပြင်ကို လှန်ကြည့်ပစ်ချင်သည့်နှယ်။

"မ..မဖြစ်နိုင်ဘူး..မင်းရဲ့ယင်စွမ်းအင်က ဘာလို့ဒီလောက်တောင်မှသန်မာရတာလဲ..ငါယင်ယန်မျက်လုံးနဲ့ကြည့်လိုက်တာ မင်းက အနက်ရောင်အလုံးကြီးလိုပဲ..အင်္ကျီတောင်မမြင်ရတော့ဘူး..မင်းကလူလား..သရဲလားကွာ..အာ..ကိုယ်အပူချိန်တော့ရှိသားပဲ တကယ့်လူအစစ်ပေါ့နော်.."

ရှီကျားမှာ သူ၏လက်မောင်းကို ဂရုတစိုက်လာထိသော လက်တဖက်ကို မပျော်ရွှင်စွာ ခါထုတ်လိုက်လေသည်။

"မင်းတို့သရဲဖမ်းတဲ့ ဆရာသခင်တွေကလည်း သရဲဟုတ်မဟုတ်ခွဲဖို့ ကိုယ်အပူချိန်စမ်းဖို့လည်းလိုသေးတာလား"

ဖေးယွီမှာ မှားယွင်းခံရသလိုခံစားရလေသည်။

"ငါတို့ကယင်စွမ်းအင်ကိုပဲအခြေခံပြီး ခွဲခြားတာပေါ့..ဒါပေမယ့်ငါ့ဘ၀မှာ မင်းထက်ယင်စွမ်းအင်ပိုသန်မာတဲ့ သရဲတစ်ကောင်မှတောင်မတိုးဖူးဘူးလေ.."

ရှီကျား"..."

ဤဆရာသခင်လေးဖေးမှာ ကြောင်တောင်တောင်နိုင်ကာ အားကိုးမရပုံပေါ်သော်လည်း ရှီကျားနားလည်နိုင်ပါသေးသည်။ ဆရာသခင်ယဲ့ကိုအိမ်ပေါက်၀တွင်တွေ့ခဲ့စဥ်က တဖက်လူပင်လျှင် သူ့ကိုကြည့်လျက်တုန်လှုပ်သွားခဲ့ဖူးသည်။ သူကိုယ်တိုင်မှာတော့ သူစိမ်းတစ်ဦးက သူ့အိမ်တံခါးကိုခေါက်သဖြင့် အံ့သြသွားခြင်းဖြစ်သော်လည်း ယင်စွမ်းအင်ကို သာမာန်မျက်စိနှင့်မြင်နိုင်သောစွမ်းရည်နှင့်မွေးဖွားလာသော ဆရာသခင်ယဲ့အံ့အားသင့်သွားရခြင်းမှာတော့ ထိုတံခါးကိုလာဖွင့်သူမှာ အနက်ရောင်ယင်ချီအလုံးအထွေးကြီးဖြစ်နေလိမ့်မည်ဟုထင်မထား၍ပင်။

သို့သော်ရှီကျား၏ ကြောက်ခမန်းလိလိများပြားသော ယင်စွမ်းအင်များကိုမြင်ပြီးနောက်တွင် ဖေးယွီမှာ တစ်ခုကိုတော့နားလည်သွားခဲ့လေသည်။

"ငရဲဘုရင်ယဲ့က မင်းကို၀ူရှန်းချင်းလီငှားခဲ့တယ်ဆိုတာ ၀ူရှန်းချင်းလီကလွဲလို့တခြားဘာကမှမင်းရဲ့ ယင်စွမ်းအင်ကို မဖုံးပေးနိုင်လို့ထင်တယ်"

ထိုအချက်ကိုပြန်လည်ရောက်ရှိလာပြီးနောက်တွင် ရှီကျားမှာ မျက်ခုံးကိုအသာကျုံ့လိုက်မိလေသည်။

"ဒီ၀ူရှန်းချင်းလီက အရမ်းအရေးကြီးတဲ့ မှော်လက်နက်လား"

ဖေးယွီမှာ ရှီကျား၏လည်တိုင်တွင်တွဲလွဲလေးရှိနေသော ၀ူရှန်းချင်းလီကို အားတုံ့အားနာအမူအရာနှင့်ကြည့်လာခဲ့လေသည်။ အဖြေကိုတိုက်ရိုက်ပေးရမည့်အစား သူကမေးလာခဲ့သည်။

"မင်းမှာ wechatရှိလား"

ရှီကျားက ပြန်ကြည့်လိုက်သည်။

"wechatလား"

"ဒီခေတ်ဒီအချိန်မှာ wechatမသုံးတဲ့သူရှိသေးလို့လား...အာ..လာ..လာ..လာ လာစမ်းပါ..ငါ့wechatကို scanဖတ်လိုက်...ငါမင်းအတွက် official accတစ်ခုပို့ပေးလိုက်မယ်..မင်းတစ်ခါကြည့်လိုက်တာနဲ့နားလည်သွားလိမ့်မယ်"

ဆရာသခင်အတုလေးမှာ သူ၏ဘောင်းဘီတင်ပါးအိတ်ကပ်ထဲမှ ပန်းသီးတံဆိပ်ဖုန်းတစ်လုံးကို ရုတ်ချည်းဆွဲထုတ်လိုက်ကာ ကျွမ်းကျွမ်းကျင်ကျင်ဖွင့်လျက် wechatထဲ၀င်လိုက်လေသည်။

၁၉နှစ်အတွင်း ကောင်းကင်ဘုံဆရာသခင်တစ်ဦးကိုမျှထပ်မတွေ့ခဲ့ရသော ရှီကျားမှာ ဤရက်ပိုင်းအတွင်း အားထုတ်စရာပင်မလိုအပ်ပဲ တိုက်ရိုက်တွေ့ဆုံခဲ့ရကာ ၄င်းမှာလည်း ၂ယောက်တောင်ဖြစ်သည်။ ထိုအထဲမှတစ်ယောက်မှာ wechat ပင်သုံးလေသည်။ သူ တွန့်ဆုတ်စွာနှင့် ဖေးယွီကိုသူငယ်ချင်းအဖြစ်အပ်လိုက်လေသည်။ လျင်မြန်စွာပင် ဖေးယွီမှာ သူ့ထံအကောင့်တစ်ခုကိုရှယ်ပေးလာခဲ့သည်။

"ငါဘာကြုံခဲ့ရလဲ သရဲတွေပဲသိတယ်..?"

ဖေးယွီ" မင်း အမြန် followလိုက် အမြန်လုပ်"

ရှီကျား ဖုန်းစခရင်ပေါ်မှ ဖြူဖျော့ဖျော့သရဲမပုံကိုကြည့်ကာ ခတ္တမျှတွန့်ဆုတ်နေခဲ့သော်လည်း followခလုတ်ကိုနှိပ်လိုက်ဆဲဖြစ်သည်။

『ချစ်ခင်လေးစားရပါတဲ့တာအိုမိတ်ဆွေ..ရောက်ရှိလာတဲ့အတွက်၀မ်းသာပါတယ်...'ငါဘာကြုံခဲ့ရလဲ သရဲတွေပဲသိတယ်(Ghosts know what i experienced)ရဲ့တရား၀င်အကောင့်ကို followလုပ်ဖို့ဖိတ်ခေါ်လိုက်ပါတယ်နော်..သရဲသိတယ်..တို့တွေသိတယ်..မင်းမသိတဲ့အရာတွေအားလုံး တစ်ချက်လောက်ကြည့်လိုက်တာနဲ့သိသွားမယ်...အခုfollowလုပ်လိုက်မယ်ဆိုရင် ထျန်းကုန်းပွဲကြည့်စင်ကထုတ်တဲ့ စိတ်ချယုံကြည်ရမှုမှာ ထိပ်တန်း ကံကောင်းခြင်းအဆောင်တစ်ခုကိုလည်းရမှာနော်..』

ရှီကျား"....."

ဖေးယွီက ထိုတရား၀င်အကောင့်၏အောက်မှ "ထျန်းကုန်း အဆင့်သတ်မှတ်ချက်" linkကိုလျင်မြန်စွာ ဖွင့်လိုက်လေသည်။ ထို့နောက်ရှီကျား၏ဖုန်းမျက်နှာပြင်ပေါ်တွင် wechat သတင်း linkတစ်ခုပေါ်လာခဲ့လေသည်။ ထိုသတင်း၏ ခေါင်းစဥ်မှာ 《 ၃၁၆ကြိမ်မြောက် ထျန်းကုန်းအဆင့်သတ်မှတ်ချက်ဇယားအပြည့်အစုံ》 ဟူ၍ပင်။ ထို့အပြင်ထိုသတင်းအတွက်သုံးထားသော မျက်နှာဖုံးဓါတ်ပုံမှာ သူ၏လည်ပင်းတွင်ဆွဲထားသော ၀ူရှန်းချင်းလီ၏ပုံဖြစ်နေခဲ့လေသည်။

ဖေးယွီကအလျင်စလိုတိုက်တွန်းလာခဲ့သည်။

"မင်းရုတ်တရက် အသွားတာများလား..ဖွင့်ကြည့်လိုက်လေ..အာ..ငါမင်းကိုနောက်ဆုံးထွက် ထျန်းကုန်းအဆင့်သတ်မှတ်ချက်ကိုပို့ပေးထားတာနော်"

ရှီကျားသူ့ကိုလှည့်ကြည့်လိုက်မိသည်။

"မင်းတို့သရဲဖမ်းတဲ့ ကောင်းကင်ဘုံဆရာသခင်တွေကလည်း wechatနဲ့ ဘယ်လိုကစား(သုံး)ရမလဲသိတာပဲလား"

ဖေးယွီကမေးလိုက်သည်။

"ငါတို့က wechatနဲ့မကစား(သုံး)ရဘူးလား...အာ..ဘာလို့တိတ်သွားရပြန်တာတုန်း"

ရှီကျားမှာ အမူအယာမဲ့စွာဆိုလိုက်သည်။

"ငါ့ရဲ့ကမ္ဘာကြီးအပေါ်အမြင်ကို ပြန်ပြင်ဖို့အချိန်နည်းနည်းလိုသေးတယ်"

ရှီကျားမှာ 'ဤခေတ်မီဆန်းသစ်သော မော်ဒန်သရဲဖမ်းဆရာသခင်များအုပ်စု'ကို သူ၏စိတ်မှလက်ခံနိုင်လောက်သည့်အချိန်အထိစောင့်ပြီးနောက် ထိုသတင်းlinkကိုနှိပ်ကာ ၀င်ကြည့်လိုက်လေသည်။ သူဖွင့်လိုက်သည်နှင့် မျက်လုံးထဲပထမဆုံး၀င်လာသည်က သွေးနီရောင်စာလုံးများနှင့်ရေးထားသော...

『၀ူ ရှန်း ချင်း လီ』

ထိုပို့စ်တစ်ခုလုံးမှာ သာမာန်official accပို့စ်များနှင့်သိပ်မကွာလှပဲ စာလုံးအရွယ်အစား၁၄ စာကြောင်းအကွာအဝေး ၁.၅x စည်းကမ်းချက်များနှင့် လှပစွာရေးဖွဲ့ထားခြင်းဖြစ်သည်။ ထို့အပြင် မှတ်ချက်များအတွက် မီးခိုးရောင်စာလုံးအသေးလေးများကို အသုံးပြုထားသေးသည်။ ၄င်းမှာ အလွန်အတွေ့အကြုံကြွယ်၀သော marketing ဆရာကြီးတစ်ဦး၏ လက်ရာနှယ်။

သူသည်ထိုသတင်းတစ်ပုဒ်လုံးတွင်ဖော်ပြထားသော စာကြောင်းတစ်ကြောင်းချင်းစီကို ဖတ်ကြည့်လိုက်လေသည်။

ရှီကျားသည် ပထမနေရာမှ '၀ူရှန်းချင်းလီ'ကိုသာမှတ်မိကာ ကျန်သည်တို့မှာ ထူးထူးဆန်းဆန်း ဓါးများ လှံများနှင့် သူတစ်ခါမျှမကြားဖူးမမြင်ဖူးသော ပုဆိန်ပုံစံများဖြစ်လေသည်။ သို့သော်ဤသတင်းအဆင့်ဇယားထဲတွင် ၀ူရှန်းရှင်းလီတစ်ခုတည်းကိုသာ အလွန်တောက်ပကာ မျက်စိဖမ်းစားနိုင်သော သွေးနီရောင်စာလုံးများကိုသုံးပေးထားခြင်းဖြစ်လေသည်။ ထို့အပြင် သရဲကားများထဲကသို့ သွေးများတစက်စက်စီးကျနေသလိုမျိုး effectကိုလည်း လှိုင်လှိုင်သုံးပေးထားသေးသည်။ ကျန်မှော်လက်နက်များ၏ အမည်ကိုမူ သည်အတိုင်းရိုးရိုးအနက်ရောင်Fontနှင့်သာရေးထားခြင်းဖြစ်လေသည်။

👻

Prev Next