MM Story Teller

👻Chapter 5

Viewers 1k

👻Chapter 5

နောက်တစ်နေ့မနက်ခင်းတွင် အစ်ကိုရှန်းမှာ ရှီကျားကို နယ်ဆေးရုံထံကားမောင်းကာ လိုက်ပို့ပေးခဲ့လေသည်။ သူတို့ရောက်ချိန်တွင် ချန်းထောင်မှာ နိုးနေခဲ့ပြီဖြစ်သည်။ သူသည်ကား ခြေထောက်တစ်ဖက်နှင့် နံရိုးတချို့ကျိုးထားသော လူနာမှန်း သိသာလှသည်။ သို့သော် ရှီကျားကိုမြင်သည်နှင့် ချန်းထောင်မှာ ပျော်ရွှင်စွာဆိုလာခဲ့လေသည်။

"ဟေး အစ်ကိုကျားလာပါ့မလားလို့မျှော်နေတာ..နောက်ဆုံးတော့ စကားပြောဖော်ရပြီ..ပျင်းလို့သေတော့မယ်"

ရှီကျား"..."

အစ်ကိုရှန်းမှာ နေ့လည်ခင်းတွင် ရိုက်ကူးရေးသို့ပြန်သွားခဲ့ကာ ရှီကျားအား ဆေးရုံကုတင်ဘေးတွင်ထိုင်လျက် ပျင်းနေသောသူငယ်ချင်းလေး၏စကားပြောဖော်အဖြစ်ချန်ထားရစ်ခဲ့လေသည်။

ထိုညမှ အဖြစ်အပျက်ကိုပြောချိန်တွင် ချန်းထောင်မှာ အကြောက်မပြေသေးချေ။

"ငါကတော့ အဖြူရောင်ဂါ၀န်၀တ်ထားပြီးကွာ တော်တော်လေးလှတဲ့ကောင်မလေးကိုတွေ့လိုက်တယ်ထင်တာပေါ့...သူကအဲနားလေးမှာ ငုတ်တုတ်လေးထိုင်ပြီး ဒီအတိုင်းငိုနေတာကွာ..ပြီးတော့ငါကလည်း အားနည်းတဲ့အမျိုးသမီးတွေကို တန်ဖိုးတားရကောင်းမှန်း မသိတဲ့မင်းလိုမှမဟုတ်တာ..အလှလေးကငိုနေမှတော့ သေချာပေါက်အကျိုးအကြောင်းမေးပြီး နှစ်သိမ့်ပေးရမှာပေါ့..ဒါပေမယ့် ခြေတစ်လှမ်းပဲလှမ်းလိုက်ကာရှိသေး ပြုတ်ကျသွားမယ်လို့ ဘယ်လိုထင်ထားမှာလဲ..ဘယ်လိုဖြစ်နိုင်မလဲ မင်းပြောစမ်းပါကွာ..ငါ့အရှေ့မှ အလှလေးတစ်ယောက်ကို ကျိန်းသေမြင်ခဲ့ရဲ့သားနဲ့ ဘာလို့ရုတ်တရက်ချောက်ကမ်းပါးကြီးဖြစ်သွားတာလဲ"

သူ၏သူငယ်ချင်းဖြစ်သူ၏အာလာပသလာပများကို တနေကုန်ထိုင်နားထောင်နေရပြီးနောက် ရှီကျား၏ စိတ်တို့လွတ်နေခဲ့ပြီဖြစ်သည်။ သူကခေါင်းကိုငုံ့လျက် သူ့မိသားစုစုန့်စုန့်လေး၏ ပုံများကိုသာကြည့်နေပြီး တစ်ခွန်းစနှစ်ခွန်းစသာ အလိုက်သင့်ဖြေပေးနေခဲ့လေသည်။

ချန်းထောင်ကတံတွေးကိုမြိုချလိုက်လေသည်။

"အစ်ကိုကျား..ပြောစမ်းပါ..ငါသရဲနဲ့တိုးမိတာလား"

ဓါတ်ပုံများကို တစ်ပုံပြီးတစ်ပုံရွေ့ကြည့်နေသည့်လက်တို့တန့်သွားလျက် ရှီကျားခေါင်းကိုမော့ကြည့်လိုက်လေသည်။ သူ့မိသားစုသူငယ်ချင်းကောင်းလေးကို ပြုံးလျက်ကြည့်ကာ သူကအလွန်လေးနက်သောလေသံဖြင့်ဆိုလိုက်သည်။

"ငါ့အထင်တော့မင်းမိန်းမအာရုံကြောင့် မျက်စိကန်းသွားတာပဲ..မင်းအမြင်မှားတာပါ..ဒီကမ္ဘာကြီးမှာ သရဲတွေဘယ်လိုရှိမှာလဲ...ဒီလူ့ဘုံလောကစတည်ထောင်ထဲက မိစ္ဆာနဲ့ သရဲတွေမ၀င်ရဘူးတားထား ပြီးသား ကိုယ့်စည်းနဲ့ကိုယ်ပဲ..မသိဘူးလား"

"ဒီကမ္ဘာကြီးမှာ သရဲတွေမရှိဘူးပေါ့လေ.."

အပြင်လျှောက်လမ်းဆီမှ ရယ်သံတစ်ခုကိုကြားလိုက်ရလေသည်။

ရှီကျားနှင့် ချန်းထောင်လည်း ခေါင်းကိုလှည့်လျက် အသံလာရာကို ကြည့်လိုက်မိလေသည်။

အရပ်ရှည်ရှည် စတိုင်လ်ကျကျ၀တ်ထားသော လူငယ်လေးမှာ တံခါးဘောင်တွင် မှီလျက် သူတို့ကိုအပြုံးလေးနှင့်ကြည့်နေခဲ့လေသည်။ အခန်းထဲမှ လူ၂ဦးကသူ့ကိုလှည့်ကြည့်လာသည်ကို မြင့်သော် လက်ကိုမြှောက်လျက် သူ၏နေကာမျက်မှန်ကို ပင့်တင်လိုက်ပြီး ပြုံးရိပ်သန်းနေသော မျက်လုံးများကိုထုတ်ဖော်လာခဲ့လေသည်။

"အဖြူရောင်၀တ်ထားတဲ့သူငယ်ချင်းလေး အခုမင်းပေါင်ပေါ်မှာ သရဲလေးငုတ်တုတ်ထိုင်နေတယ်ပြောရင် ယုံမလား မယုံဘူးလား.."

အဖြူရောင်၀တ်ထားသော ရှီကျားမှာ ဖြူစင်ရိုးသားစွာပြုံးလျက် ဆိုလိုက်သည်။

"မယုံဘူး"

ရှီကျား၏တုန့်ပြန်မှုကိုမြင်လျှင် တံခါးဘောင်တွင်မှီနေသော လူရွယ်လေးမှာချက်ချင်းတန့်သွားမိလေသည်။ ထိုအဖြူရောင်၀တ်ထားသော လူရွယ်လေးက 'မယုံဘူး'ဟူ၍ ၂လုံးတည်း(တရုတ်လိုဆို ၂လုံးထဲဖြစ်မှာပါ) နှင့်ခပ်ပြတ်ပြတ်တုန့်ပြန်လာလိမ့်မည်ဟု ထင်မထားခဲ့ချေ။ ထိုတုန့်ပြန်မှုမှာ လျင်မြန်ကာ အနည်းငယ်မျှတွန့်ဆုတ်နေခြင်းမရှိသလို စဥ်းစားခဲ့ပုံပင်မပေါ်ချေ။

လူရွယ်လေးမှာ အစက တစ်ခွန်းနှစ်ခွန်းမျှစနောက်ချင်ခဲ့သော်လည်း ယခုရှီကျား၏ တစက်လေးမှဂရုမစိုက်သည့်အသွင်ကိုမြင်သော် ပို၍ အတည်အတန့်ဖြစ်လာခဲ့လေသည်။

ထို့နောက် အခန်းပိုင်ရှင်လူနာလေး ချန်းထောင်မှာတော့ သူ့ဘ၀တွင်တသက်မမေ့နိုင်စရာမြင်ကွင်းမျိုးကို မြင်လိုက်ရလေသည်။

ထိုစတိုင်ကျကျ၀တ်စားထားသော ပေါ့ပျက်ပျက်လူရွယ်လေးမှာ အပြုံးတစ်ပွင့်ဖြင့် ပျော်ရွှင်စွာဆိုလာခဲ့လေသည်။

"ဆေးရုံလိုနေရာမျိုးမှာ ချီတွေက ယင်ချီတွေပဲရှိတာ..သရဲတွေအတွက်အားဖြည့်ဓါတ်စာလိုပဲလေ..သူငယ်ချင်းလေး..သူငယ်ချင်းလေးရဲ့ပေါင်ပေါ်မှ အခုသရဲလေးတစ်ကောင်တကယ်ရှိနေတာနော်..ပုံစံကိုကြည့်ရတာတော့ မီးဖွားရခက်ခဲလို့ အသက်မရှင်လိုက်တဲ့ အငြိုးကြီးသန္ဓေသားတစ္ဆေထင်တယ်.. သူကမင်းရင်ဘတ်ကိုမှီထားပြီး လက်တစ်ဖက်က ပုခုံးကိုချိတ်ထားတာနော်..."

ဘယ်သူမျှမမြင်နိုင်သောနေရာထံ ထိုလူရွယ်လေး၏ လက်ချောင်းတို့လှုပ်ရှားသွားခဲ့လေသည်။

"မင်းပုခုံးက နည်းနည်းအေးနေတယ်လို့မခံစားရဘူးလား"

ရှီကျားမှာ သူ၏ပုခုံးပေါ်မှ ရုတ်ချည်းအေးစိမ့်စိမ့်ခံစားချက်တစ်ခုရောက်ရှိလာသည်ကို သတိထားမိသော်လည်း တည်ငြိမ်စွာဆိုလာခဲ့သည်။

"ဟုတ်လား..."

နေကာမျက်မှန်နှင့် လူရွယ်လေးမှာ ဆွံ့အနေခဲ့လေသည်။ ထို့နောက် သူ၏နောက်ကျောတွင်ကွယ်ထားသော လက်ချောင်းတို့ကိုလှုပ်ရှားလိုက်ကာ သတိထားမိရန်ခက်ခဲသော လေပွေလေးတစ်ခုမှာရုတ်ချည်းသူ၏လက်ချောင်းထိပ်မှပျံထွက်သွားပြီး ရှီကျား၏ ဘယ်ဘက်ပုခုံးထံဦးတည်သွားခဲ့လေသည်။

လူရွယ်လေးကထပ်မေးလာသည်။

"မအေးဘူးပေါ့"

"နည်းနည်းတောင်ပူသလိုပဲ..အခုတလောရာသီဥတုပူလာတာများလား"

“……”

ရှီကျားပြုံးလိုက်သည်။

"ဒီက လူကြီးမင်း...ခင်များပြောတဲ့ သရဲလေးကဘယ်လိုပုံလေးလဲ"

ချန်းထောင်၏မျက်လုံးတို့ပြူးကျယ်သွားခဲ့လေသည်။

"အစ်ကိုကျား..ဘာတွေအဲလောက် စိတ်၀င်တစားမေးနေရတာလဲ"

လူရွယ်လေးကမျက်ခုံးကိုပင့်လိုက်လေသည်။

"မီးမဖွားနိုင်လို့သေသွားရတဲ့ အငြိုးကြီး သန္ဓေသားတစ္ဆေဆိုတော့...သူ့အသားအရောင်ကအစိမ်းရောင်..မျက်လုံးတွေကတစ်ခုလုံးမည်းနေတာ..သူ့အမေရေမွှာအိတ်ကအသားစတွေက သူ့လက်သည်းကြားမှညပ်နေတာ..ခေါင်းမှာလည်းသူ့အမေဆီကသွေးတွေနဲ့..အိုးဟုတ်သား..အဲဒီသရဲလေးက အခုမင်းသူငယ်ချင်းရဲ ကုတင်ပေါ်တက်သွားပြီ..သူငယ်ချင်းဖက်တီးလေး..မင်းခြေထောက်ကနည်းနည်းအေးလာသလိုမခံစားရဘူးလား..အခုမင်းခြေထောက်ပေါ်တက်နေပြီနော် .."

ချန်းထောင်၏တစ်ကိုယ်လုံးတုန်ယင်သွားခဲ့လေသည်။ သူ၏ကျိုးနေသောခြေထောက်နှင့် နံရိုးများကိုပင် ဂရုစိုက်မနေတော့ပဲ ရှီကျားထံချက်ချင်းပြေး၀င်သွားတော့သည်။

"အစ်ကိုကျား..အစ်ကိုကျား..ငါ့ခြေထောက်ကအေးတယ်..ငါ့ခြေထောက်တကယ်အေးနေတာလို့..ရုတ်တရက်ကြီးအေးလာတာ.."

ရှီကျားမှာ သူ့ကိုတွယ်နေသော ၀က်ကိုရိုက်ထုတ်လိုက်သည်။

"မင်းသူ့ရဲ့အရည်မရအဖတ်မရတွေကို နားယောင်နေတာပဲ"

ချန်းထောင် "တကယ်ပြောနေတာ..အေးတယ်လို့..ငါ့ခြေထောက်မွှေးတွေတောင်ထောင်နေတယ် ကြည့်ပါလား"

ရှီကျားမှာ သူငယ်ချင်းကောင်း၏ ခြေထောက်ကို တွန်းဖယ်လိုက်ကာ ဆွံ့အစွာဆ်ုလာခဲ့သည်။

"အဲတံခါးနားက လူကြီးမင်းက မင်းကိုစနေတာ..မင်းမယုံရင်မေးလိုက်ပါလား..ဒီအခန်းထဲမှာ သရဲတကယ်မရှိရင် သူ့တစ်ဘ၀လုံး စင်ဂယ်ဖြစ်လိမ့်မယ်လို့..သူကျိန်ရဲလား"

ချန်းထောင်မှာ တံခါး၀မှ လူရွယ်လေးကို မျှော်လင့်ချက်အပြည့်ဖြင့်ကြည့်လိုက်လေသည်။

"လူကြီးမင်း..."

ဖေးယွီ"..."

မင်းနဲ့ဒီရှုံးမယ့်ပွဲကိုလောင်းမိတာကိုက ငါ့အမှားပဲ..

ဖေးယွီမှာ သူအနိုင်ကျင့်ခံလိုက်ရသလိုခံစားရလေသည်။

လက်ရှိရွှမ်းရွယ်ကမ္ဘာကြီး၏ ခေါင်းဆောင်လက်သစ်လေးများထဲမှ တစ်ဦးအနေနှင့် သူဖေးယွီ ဘယ်နေရာပင်သွားသွား သူ့အားရိုရိုကျိုးကျိုးနှင့် ဆရာသခင်ဖေးလို့ခေါ်သူများအပုံကြီးပင်။ ဒါရိုက်တာ၀မ်ကိုဥပမာထားလျှင် ထိုဒါရိုက်တာ၀မ်၏ဆွေမျိုးတော်စပ်သူကသာ သူ၏ဆရာဦးလေးဖြစ်မနေခဲ့လျှင် ဒါရိုက်တာ၀မ်၁၀ယောက်လာတောင်းဆိုလျှင်တောင် သူကဤကိစ္စလေးကိုလာကြည့်ပေးဖို့ပျင်းစရာကောင်းနေဦးမည်ဖြစ်သည်။

သို့သော်ယနေ့မနက်သူ ဒါရိုက်တာ၀မ်နှင့် ရိုက်ကူးရေးကိုလိုက်လာချိန်တွင်မူ ထိုနေရာတစ်ခုလုံးမှာ တော်ရုံပြိုကွဲမသွားနိုင်သည် ယင်စွမ်းအင်များဖုံးလွှမ်းနေခဲ့ကြောင်း တွေ့ခဲ့ရလေသည်။ သူလည်းသံလိုက်အိမ်မြှောင်ကိုထုတ်ယူလျက် မကောင်းဆိုးရွား၀ိဥာဥ်ကိုစတင်ရှာဖွေလိုက်လေသည်။ သို့သော် ၅နာရီမျှကြာသွားသည့်တိုင် မည်သည်ကိုမျှရှာမတွေ့ပဲရှိနေလိမ့်မည်ဟု မည်သူထင်ထားပါမည်နည်း။ ထို့ကြောင့်သူကလက်ညှိုးကိုမြှောက်ကာ တွက်ချက်ကြည့်လိုက်လေသည်။ ထိုပြင်းထန်သော အငြိုးအတေးစွမ်းအင်များမှာ အဝေးရှိရွာတစ်ရွာမှ ရေနစ်ကာသေသွားသော ကလေးတစ်ဦး၏ အငြိုးကြီး၀ိညာဥ်နှင့်ဆက်စပ်နေလေသည်။ သို့သော်ရိုက်ကူးရေးအဖွဲ့ထဲတွင်မူ သရဲတစ်ကောင်သော်မျှရှိမနေခဲ့ချေ။

ဘယ်လိုလုပ်ဖြစ်နိုင်မှာလဲ...

ဒီလောက်များတဲ့ယင်စွမ်းအင်တွေရှိနေတာကို သရဲကဘာလို့မရှိရတာလဲ...

မည်သို့မျှ အဖြေထုတ်မရနိုင်ဖြစ်နေစဥ် ဖေးယွီမှာ ဒါရိုက်တာ၀မ်ထံမှမနေ့ညက တောင်ပေါ်မှပြုတ်ကျခဲ့သော အဖွဲ့သားတစ်ဦးရှိကြောင်း သိခဲ့ရလေသည်။ ထို့ကြောင့်အဖြေကိုရရှိရန်အတွက် သူကဤနယ်ဆေးရုံအထိတမင်ပြေးလာခဲ့ရခြင်းဖြစ်လေသည်။ သူကချန်းထောင်အား ထိုအတွေ့အကြုံကိုမေးရန် စဥ်းစားထားခြင်းဖြစ်သည်။ သို့သော်သူကအခန်းထဲသို့ပင်မ၀င်ရသေးခင် ၀ိညာဥ်များနတ်ဆိုးများ၏တည်ရှိမှုကို အထင်တသေးငြင်းဆန်နေသော လူတစ်ဦး၏အသံကို အရင်ဆုံးကြားလိုက်ရလေသည်။ ထို့ကြောင့်သူကတွေးတောင်မတွေးလိုက်ပဲ ထိုလူကိုခြောက်လှန့်ရန် ပါးစပ်ထဲတွေ့ရာလျှောက်ပြောလိုက်ခြင်းဖြစ်လေသည်။

တကယ်တမ်းတွင် ဖေးယွီမှာ ကောင်းကင်နှင့်မြေကြီးမည်မျှနက်ရှိုင်းသည်ကိုနားမလည်သော သူငယ်ချင်းလေးကို သရဲတစ္ဆေများအမှန်တကယ်ရှိကြောင်းထိုးပြချင်ခဲ့ခြင်းဖြစ်သည်။ သို့သော် ဤအခန်းတွင်း၌သာမက အနီးအနားရှိကျန်အခန်းများအထိ သရဲတစ်ကောင်၏ အရိပ်အယောင်ကိုမျှမတွေ့ရပဲနေလိမ့်မည်ဟု မည်သူကမျှော်လင့်ထားပါလိမ့်မည်နည်း။ ထိုမျှသာမက ယင်စွမ်းအင်လေးတစ်မျှင်တောင်ရှိမနေခဲ့ချေ။

ဒါကြီးကသိပ္ပံနည်းလမ်းကျမနေဘူးနော်...

ဆေးရုံ ၊သင်္ချိုင်း၊ သင်္ဂြိုလ်စက်..

ထို၃နေရာမှာ ယင်စွမ်းအင်အထူထပ်ဆုံးနှင့် သရဲတစ္ဆေအများဆုံးနေရာများဖြစ်သည်။ အငြိုးကြီး၀ိဥာဥ်များကျိန်းသေပေါက်ရှိရမည်ဟုမဆိုလိုသော်လည်း ဘ၀မကူးနိုင်ပဲ လေလွင့်နေသော ၀ိညာဥ်များကတော့ ကျိန်းသေပေါက်ရှိရမှာပင်။

ဖေးယွီမှာ ဂါထာတစ်ချို့ကိုရွတ်လျက် ယင်ယန်မျက်လုံးကိုသုံး၍ ထိုဆေးရုံတစ်ခန်းလုံးကို ထောင့်အလပ်မကျန်အသေအချာရှာဖွေကြည့်လိုက်လေသည်။ သို့သော်နေရောင်ခြည်မှာ လွန်စွာတောက်ပနေကာ လေထုမှလည်း လွန်စွာသန့်စင်လတ်ဆတ်နေသည်ကိုသာတွေ့လိုက်ရလေသည်။ သရဲကိုတွေ့ဖို့မဆိုထားနှင့် ဤအခန်းထဲမှာနေရုံဖြင့် လူတစ်ယောက်မှာ စိတ်ချမ်းသာကိုယ်ကျန်းမာပင် အလျင်အမြန်နားလန်ပြန်ထူလာနိုင်လေသည်။

သောက်ပလုတ်တုတ်...

ဒီလူနာခန်းက မြို့ထဲကအဆောက်အဦးတွေထက်တောင် သန့်စင်နေသေးတယ်ဟ..ဆေးရုံတွေမှာ သရဲတွေအများဆုံးလို့မပြောခဲ့ဘူးလား...

ချန်းထောင်သည် ထိုလူကြီးမင်း၏ မျက်နှာက ဖြူလိုက်စိမ်းလိုက်ပြောင်းနေပြီး နှုတ်ခမ်းမှာလည်း ပိတ်လိုက်ဖွင့်လိုက်နှင့် ဘာမျှမဆိုနိုင်ဖြစ်နေသည်ကိုသာတွေ့လိုက်ရလေသည်။ ၄င်းကိုမြင်မှသာ တဖက်လူသည် ဒေါ်လာတပြားနှစ်ပြားညှစ်ထုတ်ရန်အကြံအဖန်ဆင်နေသော ဆရာသခင်အတုမှန်း နားလည်သွားခဲ့လေသည်။ ချန်းထောင်သက်ပြင်းချလိုက်လေသည်။

"အစ်ကိုကျားပြောတာမှန်တယ်..ဒီကမ္ဘာကြီးပေါ်မှာ သရဲတွေမကောင်းဆိုး၀ါးတွေကဘယ်လိုရှိမှာလဲ..မကောင်းဆိုး၀ါးဆိုတာလူတွေရဲ့ရင်ထဲမှာပဲရှိတာ"

ဖေးယွီ"...."

သူကငြင်းဆန်ချင်ပါသော်လည်း ဆွံ့အနေမိလေသည်။ သူကသရဲလေး၂ကောင်လောက်ကိုဆွဲပြီး ထို၂ယောက်ထံပစ်ထုတ်လို့မရချေ။ ထိုသို့လုပ်ခဲ့လျှင် တမင်လုပ်ကြံသလိုသာဖြစ်သွားလိမ့်မည်။ ချောင်း၂ကြိမ်ခန့်ဟန့်လိုက်ကာ ဖေးယွီမှာ ရှေ့သို့လျှောက်လာပြီး သူ၏သရုပ်မှန်ကိုထုတ်ဖော်လိုက်လေတော့သည်။ တဖက်လူမှာ ဒါရိုက်တာ၀မ်၏သူငယ်ချင်းမှန်း သိရပြီးသော် ချန်းထောင်က ဖေးယွီအား အကြိမ်အနည်းငယ်ကြည့်ကာ ဖြူဖျော့သွားခဲ့လေသည်။ သူ၏အကြည့်များကဆိုနေသည်မှာ 'သူကထူးဆန်းပြီး ကြောင်တောင်တောင်တွေပြောနေတာ မအံ့သြတော့ပါဘူး ဒါရိုက်တာ၀မ်ရဲ့သူငယ်ချင်းဖြစ်နေတာကိုး' ဟူ၍အဓိပ္ပါယ်ကိုရှင်းရှင်းလင်းလင်းဖော်ပြနေခဲ့လေသည်။

ထို့နောက်ထိုညကသူဘာဖြစ်ခဲ့သည်ကို စတင်ပြောပြလာခဲ့လေသည်။

အရာအားလုံးက သူယခင်ကပြောခဲ့သလိုတထေရာထဲပင်။ ချန်းထောင်မှာ ငုတ်တုတ်ထိုင်ပြီး ငိုနေသော အမျိုးသမီးတစ်ဦးကိုမြင်ခဲ့သည်။ သူကသွား၍နှစ်သိမ့်ပေးချင်ခဲ့သော်လည်း ချောက်ကိုနင်းမိကာ တောင်ပေါ်မှပြုတ်ကျသွားခဲ့လေသည်။

သူပြောပုံအရဆိုလျှင် ထိုမိန်းကလေးမှာ လေထဲတွင်ငိုနေခဲ့ခြင်းဖြစ်လေသည်။

ဖေးယွီက သူ၏နေရာမျက်မှန်ကြီးကိုချွတ်ကာ အင်္ကျီတွင်ချိတ်ထားလိုက်လေသည်။ ထို့နောက်လက်ပိုက်ကာရပ်နေပြီး သူ၏လက်ချောင်းတို့က လက်မောင်းကို တထပ်ထပ်ခေါက်နေခဲ့ကြသည်။ သူကမေးလိုက်သည်။

"အဲဒီမိန်းမကတကယ်သရဲဖြစ်မှာ..ရိုက်ကူးရေးကညဘက်အထိရှိတာကိုး..ဇစ်ရှီချိန်( ၁၁နာရီကနေ ၁နာရီ) ကိုရောက်တာနဲ့ ယင်စွမ်းအင်ကပိုသိပ်သည်းလာရော..ပင်းဟူသဘာ၀ရိပ်သာကလည်း ပင်လယ်လေတဖြူးဖြူးတိုက်နေတဲ့ဆိပ်ကမ်း၀မှာရှိတာ..တောင်ကြားကမြူတွေနဲ့အေးစက်စက်လေတွေရှိနေတော့ သရဲတွေကအခွင့်ကောင်းယူပြီး ထင်ယောင်ထင်မှားဖြစ်အောင် လုပ်လို့ရတယ်"

ချန်းထောင်ကသူ့ခေါင်းကိုကုတ်လိုက်လေသည်။

"မဟုတ်ဘူး..အာ..ကျွန်တော်ကတော့ အစ်ကိုကျားပြောသလိုပဲထင်တယ်..မိန်းမလှလေးတစ်ယောက်ကိုမမြင်ရတာကြာတော့မွှန်ပြီး ကန်းသွားတာပဲနေမှာ"

ဖေးယွီတန့်သွားမိလေသည်။

"ဒါပေမယ့် မင်းကိုယ်တိုင် သရဲကိုတပ်အပ်မြင်ခဲ့တာမဟုတ်ဘူးလား"

ချန်းထောင်ကခြောက်ကပ်ကပ်ရယ်လိုက်လေသည်။

"ကျွန်တော်မျက်လုံးတွေ၀ါးသွားတာနေမယ်..ဒီကသခင်လေး ကျွန်တော်တို့ရိုက်ကူးရေးကိုသွားပြီးပဲ တိုက်ရိုက်သွားကြည့်လိုက်ရင်ဘယ်လိုလဲ..သရဲသာတကယ်ရှိရင် အဲဒီမှာပဲရှိနေဦးမှာပေါ့"

ဖေးယွီ"...."

သရဲကအဲဒီမှာသာရှိနေသေးရင်ငါကဒီနေရာထိလာပြီး မင်းတို့ရဲ့ပြောပေါက်ဆိုပေါက်တွေကို သည်းခံနေရဦးမယ်ထင်နေလား...

ဖေးယွီက ချန်းထောင်အား နောက်ထပ်မေးခွန်းနည်းနည်းထပ်မေးလိုက်လေသည်။ ဖက်တီးလေးမှာ အလွန်ရိုးသားစွာပြန်ဖြေပေးလာသော်လည်း မည်သည့်ကွာခြားချက်မျှရှိမလာခဲ့ချေ။

ချန်းထောင်စကားပြောနေစဥ် ဖေးယွီမှာ သူ၏ညာလက်ကိုသုံးလျက် သူ၏နေကာမျက်မှန်ပေါ်တွင် အက္ခရာ၂ခုကိုရေးဆွဲလိုက်လေသည်။ အနက်ရောင်မှန်များပေါ်တွင် အရောင်ဖျော့ဖျော့၂ချက်တောက်ပသွားခဲ့လေသည်။ ချန်းထောင်မှာ သတိမထားမိလိုက်သော်လည်း ရှီကျားမှာ သူ့ကိုကြည့်ကာ အံ့အားသင့်သွားမိလေသည်။

ဖေးယွီက သူ၏နေကာမျက်မှန်ကို အသာပြန်တပ်လိုက်လေသည်။ သူကချန်းထောင်ကိုကြည့်လိုက်သော်ထို ဖက်တီးလေးမှာ အံ့အားသင့်စရာကောင်းစွာ ယန်စွမ်းအင်များကြွယ်၀သည်ကိုတွေ့လိုက်ရလေသည်။ သူ၏ကိုယ်မှ ယန်စွမ်းအင်များမှာ သာမာန်လူများထက် ၁၀ဆပင်ပို၍များပြားလေသည်။

သရဲများနှင့် မိစ္ဆာများမှာ ယန်စွမ်းအင်အားကောင်းသူကို တော်ရုံသွားမရှုပ်ရဲကြချေ။ ယင်နှင့်ယန်မှာ တစ်ခုနှင့်တစ်ခုဆန့်ကျင်ဖက်ဖြစ်ကာ ယန်စွမ်းအင်အားကောင်းလေ သရဲများကထိုလူကို ထိခိုက်အောင်မလုပ်နိုင်လေဖြစ်သည်။

နေကာမျက်မှန်ကိုမချွတ်ခင်တွင် ဖေးယွီမှာ နံဘေးတွင်ထိုင်နေသော ရှီကျားကို သာမာန်ကာလျှံကာတစ်ချက်မျှကြည့်လိုက်မိလေသည်။ သို့သော်တစ်ချက်ကြည့်ရုံမျှဖြင့်ပင် တဖက်လူမှာ အလွန်သာမာန်ဆန်ကာ ဘာထူးခြားချက်မျှမရှိချေ။ နေကာမျက်မှန်ကိုချွတ်လိုက်ကာ သူကဆိုလိုက်သည်။

"လောလောဆယ်တော့ သရဲကမင်းကိုဘာလို့တိုက်ခိုက်ခဲ့တာလဲဆိုတာ မပြောနိုင်သေးဘူး..ဒါပေမယ့်ဖက်တီးလေး အဲဒီရိုက်ကူးရေးကို ပြန်မသွားသေးနဲ့ဦး...ငါမင်းအတွက်ဒါရိုက်တာ၀မ်ကိုပြောပေးမယ်..သရဲကမင်းကိုအမြင်မှောက်အောင်လှည့်စားခဲ့မှတော့ မင်းကိုထိခိုက်အောင်လုပ်ချင်နေတာပဲ...ဒီတစ်ကြိမ်တော့လွတ်လာပေမယ့် နောက်တစ်ကြိမ်ဆိုပြောမရဘူး..သရဲကိုဖမ်းမိအောင်အရင်စောင့် ပြီးမှရိုက်ကူးရေးကိုပြန်သွားလည်းနောက်မကျသေးဘူး"

👻

Prev Next