MM Story Teller

Chapter 105

Viewers 9k

👻Chapter 105

ဟွာရှားမှသရဲများနှင့်ကွဲပြားစွာ ဤထိုင်းမှလာသော ကလေးသရဲမှာ ယင်နှင့်မိစ္ဆာစွမ်းအင်များနှင့်ဖွဲ့စည်းထားခြင်းဖြစ်လေသည်။

ဟွာရှားမှအထီးကျန်၀ိညာဥ်များမှာ သေဆုံးသွားပြီးနောက် ယင်နှင့်ယန်မှာပြောင်းပြန်လန်သွားလျက် ယင်စွမ်းအင်များကြွယ်၀လာကာ တချို့ကအငြိုးအတေးစွမ်းအင််များ၀င်ရောက်လာကြသည်။ ထို့ကြောင့် အသက်စွမ်းအင်နှင့်မိစ္ဆာစွမ်းအင်များမပါရှိချေ။ ယခင်ကဆိုရိုးပင်ရှိဖူးသည်။

ကြီးမြတ်သူမှာတော်၀င်စွမ်းအင်ရှိကာ ကောက်ကျစ်သူကအမှောင်စွမ်းအင်များရှိသည်ဟုပင်။

ယင်စွမ်းအင်နှင့် အငြိုးအတေးစွမ်းအင်တို့မှာ ကမ္ဘာပေါ်မှ သဘာ၀ဓါတ်၅မျိုးထဲအပါအ၀င်ဖြစ်သည်။

ရှီကျားတွင် ပြင်းထန်ယင်စွမ်းအင်ခန္ဓာကိုယ်ရှိကာ ယဲ့ကျင်းကျီတွင် မိစ္ဆာ၃ပါးခန္ဓာကိုယ်ရှိသည်။ 'ghosts know'မှာ သူတို့၂ဦး၏ ထူးခြားသောဖွဲ့စည်းပုံအကြောင်း တင်ပြလာသည်အခါ ရွှမ်းရွှယ်လောကတခွင်မှဆရာသခင်များ မနာလိုဖြစ်ကြရသည်။ မည်သူကမျှ သူတို့၂ဦးအား မကောင်းဆိုး၀ါးသို့မဟုတ် မိစ္ဆာများဟုမထင်ကြချေ။

ဟွာရှားတွင် လူသတ်ဖူးသောမကောင်းဆိုး၀ါးများပင်လျှင်၄င်းတို့၏ကိုယ်မှာ ရန်ငြိုးစွမ်းအင်များသာသက်ရောက်မှုခံရကာ မိစ္ဆာစွမ်းအင်များမဟုတ်ချေ။ အဘယ်ကြောင့်မူ မကောင်းဆိုး၀ါးတချို့မှာ မသေမီကမတရားမှုကိုကြီးစွာခံစားရဖူးကာ ၄င်းတို့သေဆုံးပြီးလျှင်တောင် အငြိုးအတေးစွမ်းအင်မှာပြင်းထန်နေ၍ဖြစ်သည်။ ၄င်းတို့သတ်သည်မှာ သူတို့အား မတရားအနိုင်ကျင့်ခဲ့သူများဖြစ်သည်။ တွေ့ကရာမသတ်တတ်ချေ။ လင်းရှောင်ထံမှအပြစ်ပေးခံရ၍ ၀ိညာဥ်ပြိုကွဲသွားခဲ့လျှင်ပင် ကျေနပ်မျှတစွာ၀ိညာဥ်ပြိုကွဲခံရခြင်းဖြစ်သည်။

သို့သော်ဤကုမန်သုန်ဆိုသည်မှာ မိစ္ဆာစွမ်းအင်မှဖြစ်ပေါ်လာသောအရာဖြစ်သည်။

ထိုင်းလူမျိုးများကိုးကွယ်ကြသော ကုမန်သုန်မှာ မိခင်၀မ်းဗိုက်ထဲတွင်သေဆုံးသွားသော သန္ဓေသားများဖြစ်သည်။ ကိုယ်၀န်ရှိနေစဥ် ၈လ ၉လအတွင်းဖျက်ချခံလိုက်ရသည့် သန္ဓေသားများမှာ အကောင်းဆုံးကုမန်သုန်များဖြစ်သည်။ ထိုင်းရိုးရာစုန်းအတတ်ကိုသုံးလျက် အဆိပ်ငါးမျိုးနှင့်ယင်စွမ်းအင်တို့နှင့်အတူ ထိုသေလုဆဲဆဲသန္ဓေသားလောင်းများမှာ ကိုယ်ထဲတစ်ခုထဲပိတ်ခံထားလိုက်ရတော့သည်။ ထို့နောက် ၉၉ရက်သို့မဟုတ် ၈၁ရက်အတွင်း ၄င်းတို့မှာကြောက်စရာအကောင်းဆုံးကုမန်သုန်များဖြစ်လာကြတော့သည်။

ကုမန်သုန်အားကောင်းကောင်းပျိုးထောင်တတ်လျှင် ၄င်းက တပါးသူထံမှကံတရားများကိုခိုးပေးကာ ၄င်း၏ပိုင်ရှင်၏ဘ၀မှာ တဖြည်းဖြည်းမြင့်တက်လာပြီး ချမ်းသာကြွယ်၀သောဘ၀တွင်နေထိုင်ရပေလိမ့်မည်။ သို့သော်ကောင်းစွာမပျိုးထောင်နိုင်ပါက မတော်တဆတစ်ခုခုရှိခဲ့လျှင် ပိုင်ရှင်မှာကုမန်သုန်ထံမှာ အသတ်ခံရနိုင်လေသည်။

ဤသည်မှာ ရှီကျားအတွက် ပထမဆုံးအကြိမ် ပြည်ပသရဲကိုဖမ်းဖူးခြင်းဖြစ်သည်။ အခန်းတစ်ခုလုံးမှာ သိပ်သည်းလှသော ယင်စွမ်းအင်များနှင့် ပိန်းပိတ်အောင်မှောင်မည်းနေခဲ့သည်။ သူဘာကိုမှမမြင်နိုင်ချေ။ သို့သော်သူ၏လက်မှခံစားနေရသော အေးစက်စက်ချွဲကျိကျိအထိအတွေ့ကြောင့် ထိုသရဲမှာအလွန်ရွံ့စရာကောင်းလှမည်မှန်း အလိုလိုသိနေခဲ့လေသည်။

ယဲ့ကျင်းကျီက ဒုတိယထောင့်တွင်ရပ်နေပြီး ရှီကျားနှင့်အနီးဆုံးဖြစ်သည်။ ရှီကျားမှာ ကုမန်သုန်ကိုဖမ်းမိသည်နှင့် သူကချက်ချင်းရောက်လာပြီး လက်ဖ၀ါးကိုတစ်ချက်လှန်လိုက်ကာ အဆောင်တစ်ခုကိုထုတ်လိုက်သည်။ ထို့နောက် မန္တာန်တစ်ခုကိုတိတ်တဆိတ်ရွတ်လျက် ထိုအဆောင်ကို ကုမန်သုန်ထံဖိကပ်လိုက်လေသည်။

ထိုအဆောင်ထံမှ ရွှေရောင်အလင်းတစ်ခုဖြာထွက်လာပြီး အခန်းတစ်ခုလုံးကိုဖုံးလွှမ်းထားသော ယင်စွမ်းအင်များမှာ မျက်စိဖြင့်မြင်နိုင်သောအလျင်ဖြင့်ပျောက်ကွယ်သွားကြလေသည်။

ရှီကျားမှာ သူ၏လက်ထဲမှအရာကိုမြင်လိုက်ရသည်နှင့်ချက်ချင်းဆိုသလို ရွံရှာစွာခါထုတ်လိုက်ကာ သူ၏လက်များကိုကြည့်လိုက်လေသည်။ သူ၏လက်များမှာ ပကတိသန့်ရှင်းနေခဲ့သည်။ ယင်နှင့်မိစ္ဆာစွမ်းအင်များမှာ သူ၏လက်ကိုမစွန်းထင်းနိုင်ချေ။ သို့သော်ထိုခံစားချက်နှင့်တင် ရွံ့ရှာဖွယ်ကောင်းနေခဲ့လေပြီ။

ရှီကျားနှင့်ယဲ့ကျင်းကျီမှာ ကုမန်သုန်ကိုငုံ့ကြည့်လိုက်ကြသည်။

၄င်းမှာ ယင်စွမ်းအင်များပြည့်နှက်နေသည့် သန္ဓေသားလောင်းတစ်ခုဖြစ်သည်။ အရွယ်အစားမှာမွေးကင်းစကလေးတစ်ဦးနှင့်မခြားချေ။ တကိုယ်လုံးမှာ ခရမ်းပုတ်ရောင်သန်းနေခဲ့သည်။ ၄င်း၏ကိုယ်ပေါ်တွင် ပြည်ပေါက်ရာများရှိနေခဲ့လေရာ သေပြီးသည်မှာ ၁၀ရက်လောက်ရှိပြီးပုံပေါ်လေသည်။ သူ၏တစ်ကိုယ်လုံးမှာလည်းဖောယောင်နေခဲ့သည်။

အခန်းထဲမှ ယင်စွမ်းအင်မှာ ပကတိပြိုကွဲသွားခဲ့ပြီဖြစ်ကာ အလင်းရောင်များ၀င်လာခဲ့လေသည်။ ကလေးသရဲမှာ ရှီကျားနှင့် ယဲ့ကျင်းကျီအား မုန်းတီးစွာစိုက်ကြည့်လျက် စူးစူးရှရှအော်ဟစ်ရုန်းကန်နေခဲ့လေသည်။ ခရမ်းပုပ်ရောင်မျက်နှာမှာ အဖုအပိန့်များတွားသွားနေသည့်အလား တလိမ့်လိမ့်ဖြစ်လာခဲ့ပြီး သွေးကြောများထောင်ထလာခဲ့လေသည်။

ယဲ့ကျင်းကျီမှာ ထိုအပြာရောင်အမှတ်များကိုလှမ်းကြည့်လျက်အေးစက်စွာဆိုလိုက်သည်။

"အဲဒါကုမန်သုန်ရဲ့မိစ္ဆာစွမ်းအင်တည်နေရာဖြစ်မယ်..ဗိုက်ထဲမှာသေသွားတဲ့ သန္ဓေသားကပြင်ပလောကကိုမထိတွေ့ဖူးဘူး သူ့ကိုယ်ထဲက ယင်စွမ်းအင်တွေက သူ့အမေဆီကပဲ..အဆိပ်၅မျိုးနဲ့ သန္ဓေသားကိုစိမ်တယ်..ပြီးတော့ ကုမန်သုန်အစစ်ဖြစ်လာတာပဲ"

ရှီကျား ကြက်သီးမွှေးညှင်းများထသွားလျက် ဤကုမန်သုန်မှာ သူယခင်ကတွေ့ဖူးသော ကိုယ်လက်အင်္ဂါမစုံသည့် မကောင်းဆိုး၀ါးများထက်ပင် ရွံစရာကောင်းသည်ဟုခံစားလိုက်ရလေသည်။ သို့သော် အဓိကအရေးကြီးသည့်အချက်မှာ ဒဏ်ရာရနေသည့်သူကိုအရင်ကုသရန်ပင်။

ယဲ့ကျင်းကျီမှာ မန္တာန်တစ်ခုကိုရွတ်လျက် ၀ူရှန်းချင်းလီ၏မျက်နှာပြင်ပေါ်မှ ရွှေရောင်ပုလင်းလေးတစ်ခုကို ထုတ်ယူလိုက်လေသည်။ သူကပုလင်းကိုဖွင့်လိုက်ပြီး အ၀ကိုကုမန်သုန်ဘက်လှည့်လိုက်လေသည်။ ကုမန်သုန်မှာနာနာကျင်ကျင်အော်မြည်လျက် သူ၏ကိုယ်မှာ ပုလင်းထဲစုပ်ယူခံလိုက်ရတော့သည်။

ရှီကျား စိတ်အေးလက်အေးပင် တံခါးကိုဖွင့်လိုက်တော့သည်။

ရိုက်ကူးရေးအဖွဲ့သားအများစုမှာ ပြန်သွားကြပြီးဖြစ်ကာ ဒါရိုက်တာနှင့် အဖွဲ့သားတချို့သာကျန်ရစ်လေတော့သည်။ ရှီကျားကိုမြင်လျှင် ဒါရိုက်တာနှင့် ဇာတ်ညွှန်းဆရာမှာ တပြိုင်နက်ထဲ အံ့အားသင့်သွားခဲ့ကြလေသည်။ ထို့နောက် ဖန်းမော့ထင်မှာ မန်နေဂျာထံမှာ အတွဲခံရပြီးထွက်လာသည်ကိုတွေ့သော် ဒါရိုက်တာနှင့် ကျန်လူများလည်း ပြေးလာကြပြီး ရုပ်ရှင်ဧကရာဇ်ဖန်းအား ဆေးရုံသို့လိုက်ပို့လိုက်ကြလေသည်။

ဆေးရုံသို့ရောက်ရှိပြီးနောက် ဖန်းမော့ထင်မှာ ဒဏ်ရာကိုချုပ်ရန်နှင့် သွေးသွင်းရန်အော်ပရေးရှင်းခန်းထဲသို့၀င်သွားခဲ့လေသည်။ ဒဏ်ရာမှာ ကြီးကြီးမားမားမဟုတ်ခဲ့ချေ။ မန်နေဂျာမှာ ဒါရိုက်တာအား ကလေးသရဲမှ တိုက်ခိုက်ခဲ့ခြင်းဖြစ်ကြောင်း မည်သို့ပြောနိုင်လိမ့်မည်နည်း။ ဤညတွင်သူသည်သေးထွက်ကျလုနီးပါးထိတ်လန့်ခဲ့ရပြီးဖြစ်သည်။ သူ၏တုန်ယင်နေသောခြေထောက်များကိုထိန်းချုပ်ရန်ခက်ခဲလေသည်။ သူကဆရာ၀န်ကိုပြောကာ ဒါရိုက်တာကိုလည်းရှင်းပြရလေသည်။

"နားနေခန်းထဲက ပန်းအိုးကွဲသွားတာလေ..အစ်ကိုဖန်းကိုမတော်တဆခိုက်မိသွားတာ..ကိစ္စကြီးမဟုတ်ပါဘူး"

အရေးအကြီးဆုံးမှာ လူအဆင်ပြေနေဖို့သာဖြစ်သည်။ ဒါရိုက်တာလည်းထပ်ကာမေးမလာခဲ့ချေ။ ဆေးရုံမှထွက်လာပြီးနောက် လက်ထောက်ဒါရိုက်တာချန်ကိုပြောလိုက်သည်။

"မနက်ဖြန်ကျရင် ဘုန်းကြီး၂ယောက်သွားရှာပြီး ရိုက်ကွင်းကိုပင့်လာစမ်းပါ..ပုံမှန်ဟုတ်မနေဘူး..၁၀ရက်အတွင်းမတော်တဆ၂ခုတောင်ဖြစ်သွားပြီး ဆေးရုံတောင်ရောက်တယ် ..တို့တွေအဖွဲ့က မစော်ကားသင့်တာကိုများစော်ကားမိလို့လားကွာ..ဆရာသခင်တစ်ယောက်လောက်ရှာပြီးလာကြည့်ခိုင်းစမ်းပါဦး"

လက်ထောက်ဒါရိုက်တာချန်လည်း အမြန်ခေါင်းညိတ်လိုက်လေသည်။

ညလယ်တွင် ရှီကျားနှင့်ယဲ့ကျင်းကျီမှာ ဆေးရုံသို့မောင်းလာခဲ့ကြသည်။ ဆရာယဲ့မှာ သူ၏ချန်ခွန်းအိတ်ထဲမှ ဆေးကတ်တစ်ကတ်ကိုထုတ်ယူလာခဲ့သည်။ ဖန်းမော့ထင်လည်း ဆေးတစ်လုံးသောက်လိုက်လေသည်။ ချက်ချင်းပင်သူလန်းဆန်းသွားသလိုခံစားလိုက်ရလေသည်။ လောင်ကျွမ်းနေသလိုစပ်ဖျင်းဖျင်းနာကျင်မှုအပြီး အမာရွတ်ပင်လျှင် မှိန်ဖျော့ပျောက်ကွယ်သွားခဲ့ကာ ယူပစ်သလိုပင်ပျောက်သွားတော့သည်။

မန်နေဂျာမှာ ဘေးမှကြည့်နေရင်း အံ့သြလွန်း၍ အသက်ပင်မရှူနိုင်တော့ပဲ ဆွံ့အနေခဲ့လေသည်။

ဖန်းမော့ထင်မှာလုံး၀ပြန်ကောင်းသွားခဲ့လေပြီ။ သူကသွေးများစွာဆုံးရှူံးထား၍သာ သူ၏ကိုယ်ကအနည်းငယ်အားနည်းနေရုံဖြစ်သည်။ သူကဆေးရုံကုတင်ပေါ်တွင်လှဲလျောင်းလျက် ရှီကျားနှင့် ယဲ့ကျင်းကျီကိုကြည့်ကာ အလေးအနက်ဆိုလိုက်သည်။

"ဆရာ့ကို သိပ်ကျေးဇူးတင်ပါတယ်..ရှီကျား ဒီတစ်ကြိမ်မင်းကူညီလို့သာမဟုတ်ရင် ငါအဲဒီကုမန်သုန်လက်ချက်ကြောင့်သေလောက်ပြီ"

ရှီကျားကဆိုလိုက်သည်။

"တကယ်တော့ ဆရာယဲ့ကိုပဲ ကျေးဇူးတင်သင့်တာပါ..ကျွန်တော်ကကုမန်သုန်ကိုဘယ်လိုရှာရမလဲ လုံး၀သိတာမဟုတ်ဘူး..ပြီးတော့ ခင်များဒဏ်ရာကလည်း ဆရာယဲ့ကြောင့်သာကောင်းသွားတာ"

ဖန်းမော့ထင်မှာ ယဲ့ကျင်းကျီကို တဖန်ကြည့်လိုက်လေသည်။

"ကျေးဇူးပါတယ် ဆရာယဲ့"

ယဲ့ကျင်းကျီလက်ခံသည့်အလား ခေါင်းသာညိတ်ပြလိုက်လေသည်။

ကုမန်သုန်ကိုဖမ်းမိသွားချေပြီ။ သို့သော် ဤကိစ္စ၏နောက်ကွယ်မှလက်သည်ကိုဖော်ထုတ်ရပေဦးမည်။

ဖန်းမော့ထင်မှာ ဆေးရုံကုတင်ပေါ်တွင် ထိုင်လျက်သား မှတ်ဥာဏ်များကိုပြန်လည်တူးဖော်နေခဲ့သည်။ သူကအေးစက်စွာဆိုလာသည်။

"အဲဒီကုမန်သုန်ကိုဘယ်သူမွေးထားတာလဲဆိုတာ နည်းနည်းတော့ ခန့်မှန်းမိသလိုပဲ..ဆရာယဲ့ပြောပုံအရဆို ကုမန်သုန်ကိုတစ်ယောက်ယောက်က မွေးထားမှရတာ လွန်ခဲ့တဲ့၃လ ထိုင်းမှာကြော်ညာသွားရိုက်တုန်းက ကျွန်တော်နဲ့အတူပါလာတဲ့သူတစ်ယောက်ရှိတယ်..ကျွန်တော်လည်း အဲဒီလကစပြီး ကံတွေညံ့နေတာ..သေချာတွေးကြည့်လိုက်တော့ သူပဲပြောစရာရှိတယ်"

တဖက်လူမှာ မည်သူဖြစ်ကြောင်း သတိရသွားသော မန်နေဂျာမှာ ဒေါသတကြီးဆိုလာခဲ့သည်။

"ထောက်ခံချက်ကို သူနဲ့ပြိုင်ပြီးရသွားတာလေးပဲမဟုတ်ဘူးလား..အဲလိုအောက်တန်းကျတဲ့နည်းလမ်းမျိုးသုံးပြီး အစ်ကိုဖန်းရဲ့အသက်ကိုတောင် ရန်ရှာရဲတယ်ပေါ့..တကယ်စိတ်ဓာတ်နိမ့်ပါးချက်"

ရှီကျားမှာ အင်တာတိန်းမန့်လောကထဲတွင် အဆင့်၁၈အောက်ထစ် လူသစ်လေးသာဖြစ်သည်။ ထိုလောက၏အကောက်အကွေ့များကိုနားမလည်ပါချေ။ သို့သော်ဖန်းမော့ထင်တွင် အကြံအစည်ရှိပြီးဖြစ်လေရာ သူ့ကိုယ်တိုင်သာဖြေရှင်းသင့်လေသည်။

၂ယောက်သားမှာ လွန်ခဲ့သောလများက ဖန်းမော့ထင်ကြုံခဲ့ရသောမတော်တဆမှုများအကြောင်းပြောနေခဲ့သည်။ ယဲ့ကျင်းကျီက ခတ္တမျှတွေးတောနေလျက်ဆိုလာခဲ့လေသည်။

"ရွှမ်းရွှယ်လောကမှာ ဒီလိုအမှုတွေကိုအဓိကကိုင်တ့ယ်နေတဲ့ အေဂျင်စီရှိတယ်..ဒီကိစ္စကိုအကြောင်းကြားလိုက်မယ်..၂ရက်လောက်နေရင် မင်းအတွက် အခြေအနေကိုအသေးစိတ်စုံစမ်းဖို့လူတစ်ယောက်ရောက်လာလိမ့်မယ်"

ဖန်းမော့ထင်၏မန်နေဂျာဖြစ်သူ၏လောကအမြင်မှာ ပြိုကျသွားပြီးဖြစ်ကာ တုန်လှုပ်နေခဲ့လေသည်။ ဖန်းမော့ထင်မှာမူ တည်ငြိမ်နေဆဲဖြစ်ကာ မေးလာခဲ့သည်။

"ရွှမ်းရွှယ်လောကလား"

ရှီကျားခေါင်းညိတ်လိုက်သည်။

"အင်း ဆရာယဲ့က ပရော်ဖက်ရှင်နယ် သရဲဖမ်းတဲ့ဆရာသခင်လေ..ရွှမ်းရွှယ်လောကရဲ့.."

ခတ္တမျှတန့်သွားပြီးနောက် ရှီကျားမှာ အတတ်နိုင်ဆုံးလေးလေးနက်နက်ဟန်ပန်ဖြင့်ဆိုလိုက်သည်။

"ရွှမ်းရွှယ်လောကကလည်း အတော်ယုံကြည်အားကိုးလို့ရတယ်လေ..ခင်များစိတ်ချထားလို့ရတယ်..သူတို့ဒီကိစ္စကိုဖြေရှင်းပေးမှာပါ"

ဖန်းမော့ထင်ခေါင်းညိတ်လိုက်လေသည်။

တကယ်တမ်းတွင် ဆေးရုံသို့မလာမီကပင် ယဲ့ကျင်းကျီမှာ ရွှမ်းရွှယ်လောက၏ သဘာ၀လွန်အမှုအခင်းဌာနကိုဆက်သွယ်ပြီးဖြစ်သည်။ သာမာန်လူများကြားမှ မှုခင်းများကို သာမာန်ရဲဌာနကိုတိုင်ကြား၍ရသည်။ သို့သော်ဤသို့သဘာ၀လွန်စွမ်းအားများပါဝင်နေသောအမှုအခင်းများကိုမူ သာမာန်ရဲတပ်ဖွဲ့၀င်များမကိုင်တွယ်နိုင်ချေ။

ရှီကျား ဆေးရုံအ၀တွင်အသီးတချို့၀ယ်ခဲ့သည်။ သူ ၎င်းတို့ကိုရေဖြင့်အသာအယာဆေးကြောလျက် စားပွဲပေါ်ဂရုတစိုက်တင်ပေးကာ ယဲ့ကျင်းကျီနှင့်အတူထွက်ခွာရန်ပြင်လိုက်လေသည်။ ဖန်းမော့ထင်မျက်ခုံးတစ်ချက်ပင့်လျက် သူ၏မန်နေဂျာကိုကြည့်လိုက်လေသည်။ မန်နေဂျာလည်းချက်ချင်းသတိ၀င်လာပြီး အလျင်အမြန်ထလာကာ ဘဏ်ကတ်တစ်ကတ်အားရှီကျားလက်ထဲသို့ထိုးပေးလာခဲ့သည်။

ရှီကျား ရှော့ခ်ရစွာဖန်းမော့ထင်ကို လှည့်ကြည့်လိုက်မိလေသည်။

ရုပ်ရှင်ဧကရာဇ်မှာ ပြုံးလျက်ဆိုသည်။

"ရွှမ်းရွှယ်လောကအကြောင်း ပထမဆုံးအကြိမ်ကြားဖူးတာဆိုပေမယ့် စည်းမျဥ်းတွေအကြောင်းကိုတော့ သိပါတယ်..ရှီကျား ဆရာယဲ့..အကူအညီအတွက်ကျေးဇူးတင်ပါတယ်"

အစ်ကိုကျားမှာ သရဲများစွာကိုရိုက်နှက်လာခဲ့ပြီး ပိုက်ဆံအစစ်ကို ပထမဆုံးအကြိမ်လက်ခံရခြင်းဖြစ်သည်။ သူကမသက်မသာခံစားရလျက် ထိုကတ်ကိုမန်နေဂျာထံပြန်ပေးလိုက်မိသည်။

"မလိုပါဘူး လမ်းကြုံလို့ကူညီရုံပါပဲ..ဒီလိုလောက၀တ်တွေမလိုဘူး"

သူနှင့်ဖန်းမော့ထင်မှာ အလွန်မရင်းနှီးလှသော်လည်း ပိုက်ဆံကိုလက်ခံရန်မူ မျက်နှာပူလှသည်။

ဖန်းမော့ထင်မှာ သူ၏မန်နေဂျာကို တစ်ချက်ကြည့်လိုက်သည်နှင့် မန်နေဂျာဖြစ်သူမှာ ထိုကတ်ကိုသူ၏လက်ထဲထပ်မံထိုးထည့်လာခဲ့ပြန်သည်။

ရှီကျားမှာ ငြင်းဆန်ချင်ခဲ့သော်လည်း ဖန်မော့ထင်မှာ သူ့ကိုကြည့်လျက် ခိုင်မာစွာဆိုခဲ့သည်။

"အသိုင်းအ၀ိုင်းထဲက စီနီယာတစ်ယောက်ဆီကနေကြားဖူးတယ် အနာဂါတ်ကိုဟောပြောဖို့ ဆရာသခင်တစ်ယောက်ကိုပင့်မယ်ဆို အနည်းဆုံး ၅သိန်းပေးရတယ်တဲ့..ရှီကျားမင်းတို့က ငါ့အသက်ကိုကယ်ပေးခဲ့တာပါ..အမှန်အတိုင်းပြောရရင် အစကတော့ငါမင်းကို အလုပ်ပါတနာသဘောပဲဆက်ဆံခဲ့ပေမယ့် အခုတော့..ဒါလေးကိုကျိန်းသေလက်ခံပေးပါ..ဒါကစည်းမျဥ်းပဲလေ..စည်းမျဥ်းအရလည်းလုပ်ပြီးပြီဆိုတော့ ."

ဖန်းမော့ထင်ကပြုံးလိုက်သည်။

"ငါတို့သူငယ်ချင်းတွေဖြစ်သွားပြီလား"

ထိုသို့စကားကြွယ်သောလူထံမှ လူမှုဆက်ဆံရေးအခက်အခဲရှိသော အစ်ကိုကျားမှာ အနိုင်ပိုင်းခံလိုက်ရလေသည်။ သူ ထပ်၍တစ်ခုခုဆိုချင်ခဲ့သေးသော်လည်းယဲ့ကျင်းကျီက ထိုကတ်ကိုယူကာ သူ၏အိတ်ကပ်ထဲထည့်ပေးလာခဲ့သည်။

ရှီကျားမှာ အံ့အားသင့်စွာကြည့်လိုက်မိလျှင် ဆရာယဲ့က ဆိုလာခဲ့သည်။

"တစ်ယောက်ကိုတစ်ယောက် ကံကြွေးမတင်တာက တကယ်လည်းစည်းမျဥ်းပါပဲ"

သို့နှင့် ရှီကျားမှာလက်ခံလိုက်ရုံသာတတ်နိုင်လေသည်။

ဆေးရုံမှထွက်လာသည်နှင့် မြေညီထပ်ရှိATMစက်ထံသွားကာ ရှီကျားမှာ ထိုကတ်ကိုအမြန်စစ်ကြည့်လိုက်လေသည်။ ကတ်ပေါ်မှ ဂဏန်များကိုကြည့်လျက်ရှီကျားမှာ ကြောင်သွားမိသည်။ သို့သော်ယဲ့ကျင်းကျီက မျက်မှောင်ကျုံ့လျက်ဆိုလာခဲ့သည်။

"မလုံလောက်ဘူး"

ရှီကျားမှာ မယုံနိုင်စွာလက်ညှိုးထိုးလျက်ဆိုလာခဲ့သည်။

"တစ်သန်းက မလောက်သေးဘူးတဲ့လား"

ဆရာယဲ့မှာ သူ့အားရှူပ်ထွေးစွာကြည့်လာခဲ့သည်။

အစ်ကိုကျား"....."

ဟုတ်သား ဆရာယဲ့က တစ်ကတ်ကို ၃သန်းလောက်ရနေကျဆိုတော့ ဘယ်လောက်မလဲ..

ဒါပေမယ့်ငွေတစ်သန်းက နည်းမနေပါဘူးနော်..

ရှီကျားမှာ လတ်တလောကား၂ကားရိုက်ထားကာ စုစုပေါင်းရရှိသော အခကြေးငွေမှာ ဂဏန်း၆လုံးကျော်သည်ဆိုရုံမျှသာ။ ယခုမူ ပြည်ပသရဲတစ်ကောင်ကိုဆွဲဖြဲလိုက်ရုံဖြင့် ချက်ချင်းငွေတစ်သန်းရလာခဲ့သည်။ ရုတ်ချည်းအစ်ကိုကျား၏ စိတ်တစ်ထောင့်တစ်နေရာမှ ဇာတ်ကားများရိုက်မနေချင်တော့ချေ။ သရဲဖမ်းခြင်းကိုဇောက်ချလုပ်ကိုင်ခြင်းမှာ ချက်ချင်းသူဌေးဖြစ်မည့်အရိပ်အယောင်ရှိလေသည်။

၄င်းမှာအတွေးမျှသာ။ ရှီကျား ကတ်ကိုပြန်နှုတ်လိုက်ပြီး ရှုပ်ထွေးစွာကြည့်နေခဲ့ပြန်သည်။

ယဲ့ကျင်းကျီမှာ ရှီကျားဘာကိုကြည့်နေမှန်းနားမလည်ခဲ့ချေ။ သူကဘေးတွင်သာတိတ်တဆိတ်ရပ်နေခဲ့လေသည်။ အတော်ကြာမှ ရှီကျားမှာ သက်ပြင်းချလျက်အကူအညီမဲ့သောအပြုံးလေးနှင့်ဆိုလာခဲ့သည်။

"ဆရာယဲ့ ကျွန်တော်နောက်ဆုံးတော့နားလည်သွားပြီ..ဒီလောက်ငယ်တဲ့သူက အနုပညာလောကရဲ့ထိပ်ဆုံးမှာရပ်နေနိုင်တာ..ကျွန်တော်တို့၂ယောက်ပေါင်းရင်တောင် ရုပ်ရှင်ဧကရာဇ်ဖန်းရဲ့ ပြိုင်ဘက်တွေမဟုတ်နိုင်ဘူး"

ယဲ့ကျင်းကျီ နှုတ်ခမ်းတို့ဖြောင့်တန့်သွားခဲ့သည်။

"သူက မင်းကိုထိခိုက်အောင်လုပ်ချင်တာလား.."

ပြောပြောဆိုဆိုနှင့်သူကအပေါ်ထပ်သို့ပြန်တက်ကာ ရှင်းရှင်းလင်းလင်းမေးရန်ပြင်လိုက်လေသည်။

ရှီကျားသူ့ကိုအမြန်တားလိုက်လေသည်။

ဆရာယဲ့မှာ သူ့ထက်ပို၍ ကမ္ဘာကြီးအကြောင်းနားလည်မနေချေ။ ဤရုပ်ရှင်ဧကရာဇ်မှာ တကယ်တမ်းတွင် အတွေ့အကြုံများကာ ထိုးထွင်းမြင်နိုင်သူဖြစ်သည်။ သူတို့လူချင်းခွဲသည်မှာ နာရီပိုင်းမျှသာရှိသေးသော်လည်း သူ၏မန်နေဂျာအား ဘဏ်ကတ်ကိုအသင့်ပြင်ခိုင်းထားပြီးဖြစ်သည်။ အပေါ်ယံတွင် ရွှမ်းရွှယ်လောက၏စည်းမျဥ်းကိုလိုက်နာပုံပေါ်သော်လည်း တကယ်တမ်းတွင် သူကရွှမ်းရွှယ်လောကမှ မိတ်ဆွေ၂ဦးကိုရရှိလိုက်ပြီးဖြစ်သည်။

ဤသည်မှာ ခဲတစ်လုံးနှင့် ငှက်၂ကောင်ပစ်ခြင်းဖြစ်လေသည်။

တွေးလေတွေးလေ ရှီကျားမှာ သူ၏မိသားစုဆရာယဲ့ကပိုကောင်းသည်ဟု ခံစားမိလေပင်။ ဆရာယဲ့ကအလွန်ကောင်းလှသည်။ အချက်အပြုတ်လည်းတော်သည်။ အိမ်သန့်ရှင်းရေးလည်းကောင်းစွာလုပ်နိုင်သည်။ နားလည်မှုရှိသည်။ စိတ်ထားကောင်းသည်။ မှော်အစွမ်းလည်းမြင့်သည်။ အလွန်လည်းချောသေးသည်။ သူနှင့်အတူရှိနေရချိန်တွင် စိတ်အေးချမ်းသာရသည်။ အနည်းဆုံးတော့သူသည်ဆရာယဲ့ထံမှ ဘယ်တော့မှာ သစ္စာဖောက်ခံရလိမ့်မည်မဟုတ်ချေ။

ရှီကျားဂရုတစိုက်တွေးလိုက်သည်။ တကယ်တမ်းတွင် သူသည်လည်းလူသားများ၏ ဆက်ဆံရေးများကိုနားလည်နိုင်ပေသည်။ သို့သော်သူကအလုံးစုံတော့နားမလည်ပါချေ။

၂ဦးသားမှာ ဟိုတယ်သို့ပြန်လာခဲ့ကြပြီး ယဲ့ကျင်းကျီမှာ ကုမန်သုန်အား ပုလင်းထဲမှ လွှတ်ပေးလိုက်လေသည်။

👻

ဇွတ်တွေနော် သူ့လူကို အတင်းကာရောတွေ ချီးကျူးတော့တာ ဘာမှလည်းမဆိုင်ဘူး 🤣

Prev Next