Chapter 13

🧜 အခန်း ၁၃

ဗိုလ်ချုပ်ယွဲ့နဲ့ မင်းသားလေးက လက်တွဲဖော်ကောင်းတွေလား…

ယီနျိုက တွေးလိုက်သည်။

ယွဲ့ကျန့်က ထိပ်သီးအစည်းအဝေး တက်ခိုင်းနေတာလား… သတင်းစာ ရှင်းလင်းပွဲ လုပ်ခိုင်းနေတာလား… 

သို့သော်လည်း အစည်းအဝေး၏ အဆုံးသတ်တွင် သတင်းသမားများအတွက် အမေးအဖြေကဏ္ဍကို ထည့်ထားသည်။ စစ်ပွဲအခြေအနေအကြောင်း အကျဉ်းချုပ် တင်ပြချက်အပြင် အချို့သော ကောလဟာလများကို ဖြေရှင်းရန်အတွက် လိုအပ်သည်။

ယီနျိုက ဤအမေးအဖြေကဏ္ဍသည် သူ့အတွက် အထူးပါဝင် ထည့်သွင်းပေးထားခြင်း ဖြစ်ကြောင်း ၈၀ရာခိုင်နှုန်း ယုံကြည်မှု ရှိသည်။ ဤသည်က ဘဝင်မြင့်နေခြင်း မဟုတ်ပေ။ ယွဲ့ကျန့်က စစ်ရေးသတင်းထောက်များနှင့် အမေးအဖြေ ပြုလုပ်ရန်ဆိုသည်ကို အသာထား၊ စစ်ပွဲပြီးဆုံးသွားတိုင်း ယခုကဲ့သို့ စီစဉ်ခဲ့သည်မျိုးပင် မရှိခဲ့ဖူးချေ။ ဤတစ်ကြိမ်က ပထမဆုံးဖြစ်သည်။

ယီနျိုက မနေနိုင်ဘဲ စိတ်ထဲတွင် တွေးမိသွားရသည်၊

ယွဲ့ကျန့်ဘက်က အရင်လက်ဦးပြီး မတိုက်ခိုက်တာ ကောင်းပေမဲ့ … သူ စပြီး တိုက်ခိုက်ပြီ ဆိုရင်တော့ … အရမ်းကို…

သူ့ဘက်ကနေ စပြီး နှုတ်ဆက်ခဲ့တဲ့အပြင် စိတ်ပူပန်နေကြောင်း ဖော်ပြခဲ့ပုံတွေ၊ လတ်လတ်ဆတ်ဆတ် ငါးဟင်းကို သုံးဆောင်ဖို့ ဖိတ်ခေါ်ခဲ့ပြီး ကောလဟာလတွေကို ကူညီဖြေရှင်းဖို့ သူ့ဖက်က စတင်ပြီး ကမ်းလှမ်းမှု လုပ်ခဲ့တာတွေက အရမ်းကို…

မဟုတ်ဘူး… မဟုတ်ဘူး… မဟုတ်ဘူး…

ဒီလူကတော့ အပုပ်ချခံရတော့မှာပဲ…

မှောင်မည်းနေတဲ့ အခန်းငယ်လေးအကြောင်း သတိပေးချက်… ငါးအမြီး သတိပေးချက်…

ဤကဲ့သို့ သတိပေးပြီးနောက်တွင် ယီနျိုက ယွဲ့ကျန့်ဆီမှ အလျင်အမြန် နောက်ဆုတ်လိုက်ကာ တိတ်တဆိတ်ဖြင့် အနောက်မှ လမ်းလျှောက်လိုက်လာလေသည်။

အစည်းအဝေးကျင်းပရာ ခန်းမသို့ ရောက်ရှိလာသောအခါတွင်လည်း ယီနျိုက ယွဲ့ကျန့်နှင့်အတူ မထိုင်ခဲ့ပေ။ ဘေးဖက်တွင် ရှိနေသော ကြုံရာခုံတစ်လုံး၌ ဝင်ထိုင်လိုက်လေသည်။

တိုက်ဆိုင်စွာဖြင့် ထိုင်ချလိုက်သည့်အချိန်မှာပင် ဘေးဖက်တွင် ရှိနေသော လူမှ မော့ကြည့်လာကာ သူ့အား အံ့အားသင့်စွာဖြင့် နှုတ်ဆက်လေတော့သည်။

“အရှင့်သား…”

ယီနျိုက ခေါင်းလေး လှည့်ကာ ကြည့်လိုက်သည့်နောက် ဟူယိချန်း ဖြစ်နေမှန်း သိလိုက်ရသည့်အခါ ကြောင်အသွားလေသည်။

ငါ မနေ့ကပဲ ဘာပြောခဲ့လဲ… အနာဂတ်က အကောင်ကြီးကြီးတွေကို ငါ့လက်အောက် ရောက်အောင် စည်းရုံးသိမ်းသွင်းမယ်လို့လေ...

ဘယ်လိုတောင် တိုက်ဆိုင်လိုက်လဲ… ငါ့ရှေ့ကလူက ငါသိမ်းသွင်းချင်ခဲ့တဲ့ လူတွေထဲက တစ်ယောက်ပဲ မဟုတ်ဘူးလား…

ဟူယိချန်းက ပို၍ စာလေ့လာနိုင်ရန်အတွက် အင်ပါယာကောလိပ်သို့ ဝင်ရောက်ခဲ့ချိန်မှ စတင်ပြီး နာမည်ကျော်ကြားလာခဲ့ခြင်းပင်။ သို့သော်လည်း အင်ပါယာကောလိပ်အတွင်းသို့ ဝင်ရောက်ရန် ဆိုသည်မှာ လွယ်ကူသည့်အရာ မဟုတ်ပေ။

ယီနျို၏အမေဖြစ်သူ ဘုရင်မဒဲလန်ကြောင့် ယီနျိုက အင်ပါယာကောလိပ်အတွင်းမှ မက်ခါနှင့်သက်ဆိုင်သော ဘာသာရပ်များတွင် နာမည်ကျော်သော ပရော်ဖက်ဆာများစွာနှင့် ဆက်ဆံရေး ကောင်းမွန်ခဲ့သည်။

ဒီလူတွေက ငါ့ရဲ့ နည်းပြတွေ ဖြစ်ခဲ့ဖူးတယ်လေ… ပြီးတော့ ငါ့အနေနဲ့ ဟူယိချန်းကို ပရော်ဖက်ဆာတွေဆီမှာ ထောက်ခံပေးလို့ ရတယ်… ဒီလိုသာဆိုရင် ဟူယိချန်းက ငါ့အပေါ်ကို ကျေးဇူးတင်နေမယ်မလား…

ထိုသို့ တွေးလိုက်ပြီးနောက် ယီနျိုက ဟူယိချန်းအား ပြုံးကြည့်နေမိသည်ကို မရပ်တန့်နိုင်တော့ချေ၊ သို့သော်လည်း သူ့ဖက်မှ စကားမဆိုရသေးမီမှာပင် ကြက်ပေါက်လေးတစ်ကောင်ကဲ့သို့ ရုတ်ချည်း ဆွဲမခံလိုက်ရတော့သည်။

ရဲတင်းလိုက်တာ… ငါ့ကို ပုသလို ထင်ရအောင် အင်္ကျီကော်လံကနေဆွဲရဲတဲ့အထိ ဘယ်သူကများ သတ္တိကောင်းပြီး ရိုင်းစိုင်းရဲရတာလဲ…

ယီနျိုက အေးစက်စွာ လှည့်ကြည့်လိုက်သည့်အခါတွင် မျက်နှာသေဖြင့် ယွဲ့ကျန့်အား တွေ့လိုက်ရသည်။

ယီနျို၏ အေးစက်နေသော အငွေ့အသက်က ချက်ချင်းဆိုသလို ၂စင်တီမီတာခန့် လျော့ကျသွားလေသည်။ သူက အသာ ချောင်းဟန့်လိုက်ပြီး ရုပ်တည်ကြီးဖြင့် ပြောလိုက်သည်။

“ဗိုလ်ချုပ်ယွဲ့ ဒီအပြုအမူက အရမ်း ရိုင်းတယ်နော်…”

ယီနျိုအား မတ်တတ်ရပ်ရအောင် ဆွဲမပြီးနောက် ယွဲ့ကျန့်က အင်္ကျီကော်လံအား အလျင်အမြန် လွှတ်လိုက်ကာ ဂရုတစိုက်ဖြင့် ဆန့်သွားအောင် လုပ်ပေးလိုက်သည်။ ပြီးသည့်နောက် သူက နူးညံ့စွာ ပြောလိုက်သည်။

“အရှင့်သားရဲ့ခုံက ဒီမှာ မဟုတ်ပါဘူး…”

ယီနျိုက သူလည်ပင်းအား အထိခံလိုက်ရသောအခါ ယားယံသွားပြီး ခန္ဓာကိုယ်မှာ တုန်ယင်သွားလေသည်။ သူ့အသံသည်လည်း ယခင်ကကဲ့သို့ တင်းမာမနေတော့ချေ၊ သို့သော်လည်း မသဲမကွဲဖြင့် ရေရွတ်လိုက်သေး၏။

“ဒါပေမဲ့ ငါက ဟူယိချန်းနဲ့ ထိုင်ချင်ရုံပါ…”

ယွဲ့ကျန့်၏ မျက်လုံးများက မှောင်မိုက်သွားကာ တိုက်ရိုက်ပင် ငြင်းဆန်လာခဲ့သည်၊

“မရပါဘူး…”

ယီနျိုက အနည်းငယ် ဒေါသထွက်သွားပြီး တွေးလိုက်သည်…

[တကယ်လို့ မင်းက မရဘူး ပြောရင် ငါက မထိုင်ရဘူးပေါ့… မင်းက ဘယ်လို ငါးခြောက်ကောင်မျိုးလဲ… ငါက ဘာလို့ မင်းပြောသမျှ နားထောင်ရမှာလဲ…]

ယွဲ့ကျန့် : “…” 

မင်းသားလေးက လူကြီးလေးလို ဟန်ဆောင်လေ့ ရှိသော်လည်း အမှန်တကယ်တွင် အလွန် ကလေးဆန်ကြောင်း ယွဲ့ကျန့်က သူ့စိတ်ထဲတွင် တိတ်တခိုး မှတ်ချက်ပေးလိုက်သည်။ 

သို့သော်လည်း ဟန်ဆောင်ခြင်းအတတ်ပညာ၌ သူက ယီနျိုထက် ပိုသာလေသည်။

ယွဲ့ကျန့်က မင်းသားလေးနှင့် ဟူယိချန်းတို့ အတူတကွ ဘေးချင်းယှဉ်လျက် ထိုင်နေကြသည်ကို မြင်လိုက်ရပြီးနောက် ရှင်းမပြတတ်အောင်ပင် သက်တောင့်သက်သာ မရှိခဲ့ပေ။ သူက ခိုင်မာသော အကြောင်းပြချက်တစ်ခုကို တွေးလိုက်ပြီး ပြောလိုက်သည်၊

“နောက်ပိုင်းကျရင် သတင်းထောက်နဲ့ အမေးအဖြေကဏ္ဍ ပါလာဦးမှာပါ… အရှင့်သားက ကိုယ်နဲ့ အဝေးကြီးမှာ နေမယ်ဆိုရင် ကိုယ်တို့တွေ ဆက်ဆံရေး မကောင်းကြဘူးဆိုပြီး သတင်းထွက်လာလိမ့်မယ်… အဲ့ဒီ့လိုဆိုရင် ဒီကိစ္စက တော်ဝင်မိသားစုနဲ့ အင်ပါယာစစ်တပ်တို့အကြား သဘောထားကွဲလွဲမှုတွေ ဖြစ်လာနိုင်တယ်…”

ယွဲ့ကျန့် ပြောပြီးသွားသည့်နောက် မင်းသားလေး၏ ခေါင်းလေးကို ကလေးငယ်လေးအား ချော့မြူနေသကဲ့သို့ ပုတ်ပေးလိုက်ပြီး ဆက်ပြောလိုက်သည်၊

“လိမ္မာလိုက်ပါကွာ…”

ဤသို့ဖြင့် ယီနျိုက တစ်နည်းတစ်ဖုံ ချော့မော့ခံလိုက်ရလေသည်။

ဟူယိချန်းက ကြောင်အလျက်သားပင် ထင်ယောင်ထင်မှား ဖြစ်နေသည်လားတော့ မသိသော်လည်း ဗိုလ်ချုပ်ယွဲ့ ထွက်သွားသည့်အချိန်တွင် ဗိုလ်ချုပ်မှ သူ့အား သတိပေးသည့် အကြည့်တစ်ချက် ကြည့်သွားသလို ခံစားလိုက်ရသည်။

ယွဲ့ကျန့်က အမှန်တကယ်ပင် သတိပေးသည့်အကြည့်တစ်ခု ပေးခဲ့သည်။ မင်းသားလေး ဟူယိချန်းအနားတွင် တွယ်ကပ်နေသည်က သူ၏ စိတ်ကယောင်ချောက်ချား ရောဂါကြောင့်ဟု ခံစားခဲ့ရသည်။ မင်းသားလေးက စိတ်ကူးယဉ် ဆက်ဆံရေးထဲသို့ ပို၍ နက်ရှိုင်းစွာ ကျရောက်သွားမည်ကို ကာကွယ်သည့်အနေဖြင့် ထိုနှစ်ယောက်အား ခွဲထားရန် လိုအပ်သည်။

သို့သော်လည်း သူ၏အလှည့်တွင်မူ ယွဲ့ကျန့်က မင်းသားလေး၏ ခုံအား အဓိကခုံနေရာများထဲမှ သူ့ဘေးဖက်တွင်သာ ထားရန် စီစဉ်ခဲ့လေသည်။

အခြားသူများက ဤစီစဉ်မှုအပေါ် ကန့်ကွက်မှု မရှိခဲ့ကြပေ။ မည်သို့ပင်ဖြစ်စေ ယွဲ့ကျန့်နှင့် မင်းသားလေးတို့က ယခုပွဲတွင် အမြင့်မားဆုံး အဆင့်အတန်းများ ရှိကြသည်။ 

ပွဲအလယ်မှာ သူတို့တွေသာ မထိုင်ရဘူးဆိုရင် ဘယ်သူတွေကများ ထိုင်ခွင့်ရှိမှာလဲ…

အစည်းအဝေး စတင်လိုက်သည်နှင့် တပြိုင်နက် ယီနျိုက တိတ်ဆိတ်နေခဲ့သည်။ သူက 'ကျားကို စားဖို့ ဝက်ယောင်ဆောင်ရသည့် အမှန်တရား' ကို ကောင်းစွာ နားလည်သည်။ အဓိကခုံတွင် ထိုင်နေရပြီး ဘာမှ မလုပ်နိုင်ကြောင်း ဟန်ဆောင်နေရသည်။

(T/N : အခြေအနေတစ်ခုမှာ ကိုယ်လိုချင်တဲ့ ရည်ရွယ်ချက်ကို ရရှိဖို့ ကိုယ့်ရဲ့ သရုပ်မှန်ကို ဖုံးကွယ်ထားတာကို ပြောတာပါ။)

ယွဲ့ကျန့်က သူ့ကို ဆန်ကုန်မြေလေးအဖြစ် ထင်နေပြီး သူ့အပေါ် သတိထားနေခဲ့သည့် အပြုအမူမှာ လျော့နည်းသွားလိမ့်မည်ဟု ထင်နေခဲ့သော်လည်း အမှန်တကယ်တော့ ယွဲ့ကျန့်က တိတ်တဆိတ်ဖြင့် စကားလုံးတစ်လုံးမှ မလွတ်စေရဘဲ နားစွင့်ထားခဲ့သည်။

[ကိုယ့်ကိုယ်ကိုယ်နဲ့ ကိုယ့်ရဲ့ ရန်သူအကြောင်း သိထားမှသာ တိုက်ပွဲပေါင်းတစ်ရာကို ရင်ဆိုင်နိုင်လိမ့်မယ်… အရင်ဆုံး ငါ ယွဲ့ကျန့်ရဲ့ အောက်ခြေမျဉ်းကို ရှာဖို့လိုတယ်… ဒါဆို နောက်ပိုင်းကျ သူ ပုန်ကန်ပြီး ငါ့ကို အကျဉ်းချချင်ရင်တောင် အရမ်း လွယ်ကူမှာ မဟုတ်တော့ဘူး…]

ယွဲ့ကျန့် : “…” 

စိတ်ကယောင်ချောက်ချား ဖြစ်တာက ပိုပိုပြီး ဆိုးလာတာပဲ…

အစည်းအဝေးက မကြာပေ။ စစ်ပွဲအတွင်းမှ ပြဿနာများကို အကျဉ်းချုပ်လိုက်ပြီး ကျုံးမင်ကို မည်သို့ ကိုင်တွယ်ရမည်အား ဆုံးဖြတ်ခြင်းနှင့် အခြားသက်ဆိုင်ရာ ပြဿနာများပြီးသည့်နောက်တွင် အမေးအဖြေကဏ္ဍ စတင်ခဲ့လေသည်။

သတင်းထောက်များ ခန်းမအတွင်းသို့ ဝင်ရောက်လာပြီးသည့်နောက်တွင် ဗိုလ်ချုပ်လင်းက အခြေစိုက်စခန်းမှ အခြေအနေအကြောင်း ပြောပြခဲ့ပြီး သတင်းထောက်များ၏ မေးခွန်းများအား ဖြေကြားပေးခဲ့သည်။

ကဏ္ဍ၏ အဆုံးသတ်ခါနီးတွင် သတင်းထောက်တစ်ယောက်က ထလာပြီး ယီနျိုအား မေးမြန်းခဲ့သည်၊

“တော်ဝင်အရှင့်သားအနေနဲ့ အခြေစိုက်စခန်းဆီ ကိုယ်စားလှယ်အဖွဲ့ကို ဦးဆောင်လာပြီးတဲ့နောက်မှာ ဘယ်လိုတာဝန်မျိုးကိုများ အဓိကဆောင်ရွက်နေပါသလဲ… နည်းပညာဌာနရဲ့ ခေါင်းဆောင်အင်ဂျင်နီယာဟောင်း ကျုံးမင် ရာထူးဖြုတ်ချခံရတဲ့အပေါ် ဘယ်လိုထင်ပါသလဲ… ရာထူးဖြုတ်ချခံရပြီးတဲ့နောက် အင်တာဗျူးခံရချိန်မှာ အရှင့်သားအပေါ် စကားအနည်းငယ် ပြောသွားပါတယ်… ဒီကိစ္စက အရှင့်သားနဲ့ တစ်ခုခုများ ပတ်သက်နေလားဆိုတာ မေးခွင့်ရနိုင်မလား…”

ဤအထိ ပြောပြီးသည့်နောက်၊ သတင်းထောက်က ရပ်တန့်သွားကာ ပါးနပ်သည့် နောက်ဆုံး မေးခွန်းကို ထုတ်မေးလာခဲ့သည်။

“မေးခွင့်ပြုပါ၊ အရှင့်သားက အရှင့်ရဲ့ ရာထူးကို အကျိုးအမြတ်ယူပြီး စစ်ပွဲမတိုင်ခင်မှာ မက်ခါစစ်သည်တွေကို ပြိုင်ပွဲအခမ်းအနား ကျင်းပပေးဖို့ အဓိပ္ပါယ်မရှိတဲ့ တောင်းဆိုချက်မျိုး ပြုလုပ်ခဲ့တယ်ဆိုတာ အမှန်တကယ်လား… ပြီးတော့ ဗိုလ်ချုပ်ယွဲ့ကလည်း ဒီကိစ္စကို သဘောတူခဲ့ပါသလား…”

ယီနျို ဒေါသထွက်နေလျှင်ပင် လူအများရှေ့တွင် ထုတ်ပြမည် မဟုတ်ပေ။

သူ့အစ်ကိုတော်များက ပြဿနာရှာရအောင် ဤသတင်းထောက်ကို စေလွှတ်လိုက်သလားဆိုသည်ကို အမှန်တကယ် သံသယဝင်ပါသော်လည်း သတင်းထောက်၏ အမေးစကားများကို အပြုံးမပျက် နားထောင်နေခဲ့သည်။ သတင်းထောက်ဖက်မှ မေးပြီးသွားသည်နှင့် ယီနျိုက မေးခွန်းများကို ပြန်ဖြေရန် ( နှင့် သတင်းထောက်အား ရိုးသားဖြောင့်မတ်စွာ ပြုမူတတ်ရန်အတွက် သင်ကြားပေးရန် ) အသင့်ဖြစ်နေခဲ့သည်။

ကံမကောင်းစွာပင် ယွဲ့ကျန့်မှ သူ့ထက် ခြေတစ်လှမ်း ဦးသွားကာ ပြောလိုက်သည်၊

“ဒီမေးခွန်းတွေကို ငါဖြေပေးနိုင်တယ်…”

ယွဲ့ကျန့်က သတင်းထောက်အား အေးစက်စွာ စိုက်ကြည့်လိုက်ပြီး အနည်းငယ် အေးစက်နေသော အသံဖြင့် ပြောလိုက်သည်။

“တော်ဝင်အရှင့်သား အခြေစိုက်စခန်းဆီကို ရောက်လာပြီးတဲ့နောက်မှာ ပြီးခဲ့တဲ့တစ်ကြိမ်က တိုက်ခိုက်ခံရပြီး ဒဏ်ရာရထားတာကိုတောင် လုံးဝ အနားမယူဘဲ မက်ခါစစ်အင်အားစုနဲ့ လက်နက်သိုလှောင်ရုံတွေကို စစ်ဆေးခဲ့ပြီး Z စီးရီး မက်ခါ ၇၀,၀၀၀ခန့်က စစ်ပွဲအတွင်း ထိန်းချုပ်နိုင်စွမ်း မရှိ ဖြစ်သွားနိုင်တာကို တွေ့ရှိခဲ့တာကြောင့်… ထောင်သောင်းမကတဲ့ မက်ခါစစ်သည်တွေရဲ့ အသက်ကို ကယ်တင်နိုင်ခဲ့ပါတယ်…”

“ဒီ့အတွက်ကြောင့် အခြေစိုက်စခန်းမှာရှိတဲ့ အရာရှိတွေနဲ့ စစ်သည်တွေက အရှင့်သားကို အတော်လေး ကျေးဇူးတင်နေခဲ့ပြီး လေးစားနေကြတာပါ…” 

ဤသို့ ပြောပြီးသည့်နောက် ယွဲ့ကျန့်က ခေတ္တ ရပ်တန့်သွားခဲ့ပြီး လူတိုင်းကို လျှို့ဝှက် အချက်ပြမှုတစ်ခု ပေးလိုက်သည်။

ချက်ချင်းပင် လက်ရှိ ရှိနေခဲ့သည့် အရာရှိများနှင့် ဟူယိချန်း ဦးဆောင်သော နည်းပညာဌာနမှ ဝန်ထမ်းများက စိတ်အားထက်သန်စွာဖြင့် လက်ခုပ်တီးပေးလိုက်ကြသည်။

ယီနျိုက အမှန်တကယ်ကို ရှက်ရွံ့မှုအား ခံစားလိုက်ရပြီး ရှက်သွေးဖြာလာခဲ့သည်။

ငါ တိုက်ခိုက်ခံရတုန်းက ဒဏ်ရာတော့ မရသွားပါဘူး… ဒါပေမဲ့လည်း ရေမရှိလို့ ငါးအမြီးကနေ ငါးအကြေးခွံနှစ်ခု ကွာကျသွားခဲ့ရတယ်…

နှစ်မိနစ်ခန့် လက်ခုပ်တီးပြီးသည့်နောက်တွင် ယွဲ့ကျန့်က လက်မြှောက်ကာ သူတို့အား ရပ်တန့်လိုက်ပြီး ဆက်ပြောလိုက်သည်၊

“အဲ့ဒီ့ 'မက်ခါပြိုင်ပွဲအခမ်းအနား' ဆိုတာ အတွက်ကတော့ မက်ခါစစ်သည်ပေါင်းများစွာက ညတောင် မအိပ်ဘဲ ပြိုင်ပွဲများစွာ တိုက်ခိုက်နေကြတာက Z စီးရီးမက်ခါတွေ ဘာကြောင့် ထိန်းချုပ်မှု လွတ်သွားနိုင်ရတာလဲဆိုတဲ့ အကြောင်းအရင်းကို အဖြေရှာနိုင်ဖို့အတွက်ပဲ... ဘာလို့ မင်းရဲ့ ပါးစပ်ထဲက ထွက်လာတဲ့ အချိန်မှာ 'ပြိုင်ပွဲအခမ်းအနား'ဆိုပြီး ဖြစ်သွားရတာလဲ..."

ဤစကားများကို ပြောနေခဲ့သည့် အချိန်အတွင်းမှာ ယွဲ့ကျန့်၏ မျက်လုံးများက သတင်းထောက်ကို စိုက်ကြည့်နေခဲ့ပြီး အလွန်အမင်း စိတ်ဖိစီးစရာ အခြေအနေ ဖြစ်စေခဲ့သည်။

သတင်းထောက်က သူ့ကိုပင် ပြန်မကြည့်ရဲခဲ့ပေ။ သို့သော်လည်း သူ၏ ရည်ရွယ်ချက်ကို တွေးလိုက်မိပြီးနောက် ကျည်ဆံကိုက်ကာ ပြောလိုက်သည်။

"ဒါပေမဲ့ မစ္စတာကျုံးမင် ပြောတာကတော့..."

သတင်းထောက်အား ဤမေးခွန်းမေးရန် ညွှန်ကြားခဲ့သူက ကျုံးမင်၏ ရာထူးချခံရခြင်းနှင့် ထိန်းသိမ်းခံရခြင်း၏ အကြောင်းပြချက် အစစ်အမှန်ကို သေချာပေါက် မသိပေ။

ယွဲ့ကျန့်က အမူအရာ မရှိသေးသော်လည်း သူ့မျက်လုံးများမှ အေးစက်မှုများ တိုးလာနေသည်။ ၎င်းက သတင်းထောက်ကြောင့် မဟုတ်ဘဲ ကျုံးမင်နှင့် ကျုံးမိသားစုကြောင့် ဖြစ်သည်။

ဤသည်ကို မြင်ပြီးနောက် ဗိုလ်ချုပ်လင်းက အလျင်အမြန် နေရာယူကာ ပြောလိုက်သည်၊

"ကျုံးမင်ရဲ့ အခြေအနေနဲ့ ပတ်သက်ပြီး ကျွန်တော်လည်း အကြမ်းဖျင်း ပြန်ပြောပြပါ့မယ်... မေလ 27ရက်နေ့ 3027 ခုနှစ်မှာ ကျုံးမင်က ကျုံးမိသားစုရဲ့ လှုံ့ဆော်မှုကြောင့် နည်းပညာဌာနရဲ့ ခေါင်းဆောင်အင်ဂျင်နီယာ ရာထူးကို အခွင့်ကောင်းယူပြီး ခွင့်ပြုချက် မပါရှိဘဲ Z စီးရီး မက်ခါ 70,000ကျော်ရဲ့ စနစ်တွေကို အဆင့်မြှင့်တင်ခဲ့ပါတယ်... ရလာဒ်အနေနဲ့ မက်ခါရဲ့ ထိန်းချုပ်မှု လွတ်သွားနိုင်ချေ 97.7ရာခိုင်နှုန်းအထိ ဖြစ်သွားစေခဲ့ပါတယ်..."

ရုတ်ချည်း ခန်းမအတွင်းမှ သတင်းထောက်များ အားလုံး ဆူညံသွားကြသည်။ မက်ခါ ထိန်းချုပ်မှု လွတ်သွားနိုင်ချေက 97.7ရာခိုင်နှုန်းအထိ ရှိသည်။ စစ်မြေပြင်တွင် ဤသို့ ဖြစ်ခဲ့ပါက ယခုတစ်ကြိမ်တွင် အင်ပါယာ ရှုံးနိမ့်သွားလိမ့်မည်။

အရာအားလုံး နာလန်ထူနိုင်မှာတောင် မဟုတ်တော့ဘူး…

ဘာလို့ ကျုံးမင်နဲ့ ကျုံးမိသားစုက ဒီလို လုပ်ရတာလဲ… သူတို့တွေ အင်ပါယာကို သစ္စာဖောက်ပြီး ရန်သူတွေနဲ့ ပူးပေါင်းသွားကြတာများလား…

သတင်းထောက်များက အာရုံစိုက်ကာ နားထောင်နေရင်းကပင် သတင်းများကို ချရေးနေခဲ့ပြီး ဖြစ်နိုင်သမျှ အမြန်ဆုံး တင်ပြနိုင်ရန် ဆန္ဒဖြစ်ပေါ်နေကြသည်။

“ဒီကိစ္စနဲ့ ပတ်သက်ပြီး ကျုံးမိသားစုက ဘယ်လိုတုံ့ပြန်ခဲ့သလဲဆိုတာ မေးလို့ရမလား…”

“အင်ပါယာမြို့တော်ဂြိုဟ်က ကျုံးမိသားစု ခေါင်းဆောင် အဖမ်းဆီးခံလိုက်ရပြီလား…”

“ကျုံးမိသားစုရဲ့ စံအိမ်က ကြယ်ပြာရဲ့ အရံဂြိုဟ်ပေါ်မှာ ရှိတာလေ…”

လူတိုင်းက ‘မင်းသားလေး နည်းပညာဌာနမှာ ပြဿနာရှာခြင်း’ ဆိုသည့် ကိစ္စရပ်နှင့်ယှဉ်လျှင် ကျုံးမိသားစုကသာ နာမည်ကြီးသတင်းဖြစ်ကြောင်း သိထားကြသည်။

ကျုံးမိသားစုက မျိုးရိုးမြင့်မိသားစု ဖြစ်သည်။ အင်ပါယာအတွင်း ဘဏ္ဍာရေးအတောင့်တင်းဆုံး အုပ်စု ၃ဖွဲ့ထဲကမှ 

တစ်ဖွဲ့ဖြစ်သည့် ကျုံးမိသားစုက ပုန်ကန်နေသည်ဟု သံသယဖြစ်ဖွယ် ရှိနေသည်။

ကျုံးမိသားစု ပြိုလဲသွားမှာလား… ဒီကိစ္စကြောင့် အင်ပါယာမြို့တော်မှာ ဖွဲ့စည်းပုံတွေ ပြောင်းလဲနိုင်မှာလား… ဧကရာဇ်က မျိုးရိုးမြင့်တွေနဲ့ လုပ်ငန်းကြီးတွေကို ရှင်းပစ်နိုင်တဲ့ ဒီအခွင့်အရေးကို လက်လွှတ်ခံမှာလား…

သူတို့ ထင်ထားသည့်အတိုင်းပင်၊ သတင်းထွက်ပေါ်လာသည်နှင့် အင်တာနက်တခွင်မှာ အပြိုင်အဆိုင် ငြင်းခုံမှုတွေ လျင်မြန်စွာ ဖြစ်ပေါ်လာခဲ့သည်။

မည်သို့ပင်ဖြစ်စေ၊ စစ်ပွဲကြီး ပြီးသွားပြီဖြစ်ပြီး ဖက်ဒရယ်ဖက်မှ နောက်တစ်ကြိမ် တိုက်ခိုက်လာမည်ကို စိုးရိမ်နေရန် မလိုအပ်ပေ၊ ထို့ကြောင့် လူတိုင်းက ဖရဲသီးစားချင်နေသည့် စိတ်များ ဖြစ်ပေါ်နေကြသည်။

[ဘုရား ဘုရား… အရင်က ကျုံးမင် မင်းသားလေးကို အရမ်းတွေ ဖြောင့်မတ်နေသလိုနဲ့ ဝေဖန်နေတုန်းကဆို ငါက သူကတော့ လူကောင်းတစ်ယောက်လို့ ထင်ခဲ့တာ… ငါ ဒီလို တစ်ခါမှ မတွေးမိခဲ့ဖူးဘူး…]

[ဒီအမှိုက်ကောင်က မက်ခါစစ်သည် အများကြီးကို တကယ် သတ်ပစ်ချင်နေခဲ့တာပဲ… ငရဲကိုသာ သွားလိုက်တော့… ဘာလို့ ဗိုလ်ချုပ်ယွဲ့က ဒီလူကို နေရာမှာတင် မကွပ်မျက်ခဲ့တာလဲ…]

[ဧကရာဇ်နဲ့ မျိုးရိုးမြင့်တွေကြား တင်းမာမှုတွေ ပြန်ပြီး စတင်တော့မှာလား… ဒီတစ်ကြိမ်တော့ ဘယ်ဖက်က နိုင်မယ်ထင်လဲ…]

[ကျုံးမိသားစု ပြိုလဲပြီလား… ငါတော့ ဖြစ်နိုင်မယ် မထင်ဘူး… သူတို့က အင်ပါယာမြို့တော်မှာ မျိုးရိုးမြင့် မိသားစုကြီးတွေထဲက တစ်ခုလေ… ခန့်မှန်းခြေအရ ကျုံးမိသားစု ပြန်ပြီး နာလန်ထူလာလိမ့်မယ်…]

မှန်ပေသည်၊ ထူးခြားသည့် သရုပ်ဖော်မှုများနှင့် လူများလည်း ရှိခဲ့သည်။

[ဘုရားရေ၊ မင်းသားလေးလည်း ရှိနေတာကို ငါတစ်ယောက်ပဲ သတိထားမိတာလား… ဒါက မင်းသားလေး ပထမဆုံးအကြိမ် လူရှေ့ထွက်လာတာမလား… သူက အရမ်းလှပြီး ချစ်စရာကောင်းလိုက်တာနော်… အား ပါးပါးပါး]

[ချီးကျူးတဲ့အတွက် ကျေးဇူးပဲ… မိတ်ဆက်ပေးပါရစေ… သူက ငါ့ယောကျ်ားပါ…]

[အပေါ်ထပ်က လူက တကယ်ကို အရှက်မရှိတာပဲ… သူက သေချာပေါက်ကို ငါ့ယောကျ်ားပဲ (ကျယ်လောင်စွာ အော်ဟစ်)…]

[သတင်းထောက်ရဲ့ စကားလုံးတွေက တကယ့်ကို စိတ်အနှောင့်အယှက် ဖြစ်စရာပဲ… မင်းသားလေးက အခုမှ အရွယ်ရောက်လာတာကို အခုတော့ တာဝန်ယူခြင်းရဲ့ ပြယုဂ် ဖြစ်တော့မှာပဲ… ဘယ်လိုလုပ်ပြီး အာဏာမရှိတဲ့မင်းသားလေးက ကျုံးမင်ကို ရာထူးကနေ ဖြုတ်ချနိုင်ရတာလဲ…]

[ဘုရားရေ မင်းရဲ့ စကားတွေက အပြောင်းအလဲ မြန်လိုက်တာနော်… ပြီးခဲ့တဲ့ ရက်တွေကပဲ မင်းသားလေးက ဝက်ဝံကလေးလေးလို့ ပြောနေခဲ့တာ မဟုတ်လား…]

[ငါကတော့ သတင်းထောက်က ပထမမင်းသားရဲ့ ရေတပ်ကလို့ ထင်တာပဲ ဟဟဟဟ]

[ငါတစ်ယောက်ပဲ မင်းသားလေးနဲ့ ဗိုလ်ချုပ်ယွဲ့တို့ အတူထိုင်နေပုံလေးက အရမ်း လိုက်ဖက်ညီတယ်လို့ တွေးနေမိတာလား… သူတို့တွေက ပြီးပြည့်စုံတဲ့ စုံတွဲပဲ…]

[စုံတွဲ စုံတွဲ… သူတို့ရဲ့ ချောမောနေမှုတွေကတောင် လိုက်ဖက်ညီနေကြရောပဲ…]

×××××

အင်ပါယာမြို့တော်၊ ရှီကျောက်နန်းတော်အတွင်းတွင်။

ဧကရာဇ်စကော့ထ်က ယွဲ့ကျန့် ရေးသားထားသည့် တင်ပြချက်ကို ချလိုက်ပြီး အင်တာနက်ပေါ်က သတင်းများကို ကြည့်လိုက်သည်။

ဖတ်ပြီးသည့်နောက် သူ၏ကိုယ်ပိုင် ဆက်သွယ်ရေးစက်ကို ပိတ်လိုက်သည်။ ထို့နောက်တွင် ဘေးနားမှာ ရှိနေသော ဝန်ကြီးချုပ်ဟားရစ်ကို အတက်အကျ မရှိသည့်လေသံဖြင့် ပြောလိုက်သည်။

“ယွဲ့ကျန့်က တကယ့်ကိုပဲ ယီနျိုအပေါ် နည်းနည်းလေး အကာအကွယ် ပိုနေတာပဲ…”

ဟားရစ်က ဧကရာဇ်၏ ဆိုလိုရင်းစကားကို မသေချာပေ။ သူက ပြန်ဖြေလိုက်သည်၊

“မှန်ပါတယ်…”

ထို့နောက် သေချာ တွေးကြည့်လိုက်ပြီး ဂရုတစိုက်ဖြင့် ပြန်ဖြေလိုက်သည်။

“အရှင့်သားက အမူအကျင့်ကောင်းမွန်ပြီး နှစ်လိုဖွယ် ကောင်းပါတယ်… တကယ့်ကို သဘောကျဖွယ်ကောင်းတဲ့ သူပါ…”

ဧကရာဇ်စကော့ထ်က စကားမဆိုပေ။ မျက်လုံးများက လက်ရေးတင်ပြချက်အပေါ်ကို ကြည့်နေခဲ့သည်။

ဧကရာဇ်က အသက်၅၀ ဝန်းကျင်မှာ ရှိနေသော်လည်း ပျှမ်းမျှလူ့သက်တမ်း ၂၅၀အထိ ရှိကြသည့် ကြယ်တာရာခေတ်တွင်မူ ဧကရာဇ်က ငယ်ရွယ်ပြီး ခံ့ညားနေသေးသည်ဟု ယူဆ၍ရသည်။ သူ၏ အမူအရာက ရံဖန်ရံခါတွင် အရှင်သခင်တစ်ပါး၏ ဂုဏ်သရေများ ပေါ်ထွက်နေတတ်သည်။

ဟားရစ်က ဧကရာဇ်ကို မျက်လုံးထောင့်နားမှ တိတ်တဆိတ် ကြည့်လိုက်ပြီး အလျင်အမြန် အကြည့်ကို ရုတ်သိမ်းလိုက်သည်။ ဧကရာဇ်၏ ဆိုလိုသည့် အဓိပ္ပါယ်ကိုလည်း မခန့်မှန်းရဲပေ။

နောက်ထပ် ၂မိနစ်ခန့် ကြာပြီးနောက် ဧကရာဇ်က ပြောလိုက်သည်၊

“ကျုံးမိသားစု မက်ခါပြဿနာကို စစ်ဆေးဖို့အတွက် စစ်ဆေးရေးအဖွဲ့ ဖွဲ့လိုက်ပါ… အင်ပါယာမြို့တော်နဲ့ ကြယ်ပြာမှာ ရှိတဲ့ ကျုံးမိသားစု အောက်ခြေကနေ စတင်ပြီး စစ်ဆေးရမယ်… ကျုံးချင်းရှု… သူ့ကို စောင့်ကြည့်ထားပြီး အချိန်တစ်ခုအထိ မဖမ်းဆီးသေးနဲ့…ယီနျိုနဲ့ ယွဲ့ကျန့်က ကြယ်ပြာက စစ်ဆေးရေးအဖွဲ့အတွက် တာဝန်ယူရမယ်…”

စကားပြောပြီးသည့်နောက်တွင် ဧကရာဇ်က သူ့ကိုယ်သူ တွေးလိုက်သည်။

ယီနျိုက ငါ့ရဲ့ သွေးသားရင်း မဟုတ်ပေမဲ့လည်း သူ့ကို အသုံးဝင်မယ်လို့ မထင်ထားခဲ့ဘူး… သူကသာ တကယ်ပဲ ယွဲ့ကျန့်ကို လက်ထပ်နိုင်ပြီး တော်ဝင်မိသားစုအတွက် ယွဲ့မိသားစုကို သိမ်းသွင်းပေးနိုင်မယ်ဆိုရင် ငါ ဦးထုပ်စိမ်းဆောင်းခဲ့ရတာ အလကား မဖြစ်တော့ဘူး…

ဝန်ကြီးချုပ်ဟားရစ်၏ စိတ်ထဲတွင် ဧကရာဇ်က ကျုံးမိသားစု ခေါင်းဆောင်အား မထိန်းသိမ်းသည့်အပေါ် သက်ပြင်းချရုံသာ တတ်နိုင်သည်။ ကြည့်ရသည်မှာ အရှင်မင်းကြီးက သေချာရေရာမှု မရှိသေးသည့်ပုံပင်။

ဧကရာဇ်စကော့ထ်က အမိန့်ပေးပြီးနောက်တွင် ဝန်ကြီးချုပ်အား ထွက်သွားခိုင်းလိုက်ပြီး အတွင်းခန်းထဲသို့ ဘီယာဗိုက်နှင့် ဝင်သွားခဲ့သည်။

အိပ်ခန်းအတွင်းသို့ ရောက်ရှိလာပြီးသည့်နောက်တွင် ဗိုက်ကို ကိုင်လိုက်ပြီး သခွားမွှေးသီး အသေးလေး အရွယ်ရှိသည့် ရေသူမဥကို ထိလိုက်သည်။ ဘီယာဗိုက်က ချက်ချင်းပင် ပျောက်ကွယ်သွားခဲ့သည်။

🧜🧜🧜