အပိုင်း ၁၈၆ ( Rich Second Generation 10 )

လုရွေ့ချွင်ဟာ လုကျင်းရှိူ့ကို အခြားသူများအား အနိုင်ကျင့်တတ်သည့် အစွန်းရောက်သော ကိုယ်ကျင့်စရိုက်များ ရှိသည့် လူတစ်ဦးအဖြစ် သရုပ်ဖော်ပြောဆိုခဲ့သည်။ 

ရိုးရိုးသားသား ပြောရမည်ဆိုလျှင် လုကျင်းရှိူ့ကို မသိသူများအတွက် လုကျင်းရှိူ့၏ အပြင်ပန်းသရုပ်အချို့ကိုသာ ကြည့်ခြင်းအားဖြင့် အမှန်တကယ်ပင် သူတို့က လုရွေ့ချွင်၏စကားများကို အလွယ်တကူ ယုံကြည်သွားနိုင်သည်။

လုကျင်းရှိူ့က အမှန်ပင် စိတ်တိုလွယ်ပြီး စိတ်အပြောင်းအလဲမြန်သည်။ ယန်ကျင်းဇီသည် သူ၏ကိုယ်ရေးလက်ထောက်အဖြစ် ယခုတလောမှ အလုပ်လုပ်ခဲ့သည်။ လုကျင်းရှိူ့က အချို့လက်အောက်ငယ်သားများကို မောင်းထုတ်ပြီးနောက် ဒေါသထွက်နေသည်ကို သူ ခဏခဏ မြင်တွေ့ရသည်။ တစ်ခါတစ်ရံတွင်မူ လုကျင်းရှိူ့က အထူးမှုန်ကုပ်နေတတ်သည်။

ထို့အပြင် လုကျင်းရှိူ့၏ဂုဏ်သတင်းကလည်း သိပ်မကောင်းချေ။

လုမိသားစုကို လွှဲပြောင်းရယူပြီးသည်နှင့်တပြိုင်နက် သူက လုမိသားစုကို တသီတတန်း ပြုပြင်မှုများ ပြင်းပြင်းထန်ထန် လုပ်ဆောင်ခဲ့သည်။ လုမိသားစု၏ လူကြီးများစွာကို သူက အကြင်နာမဲ့စွာ မောင်းထုတ်ခဲ့ပြီး တချို့ဆိုလျှင် သူ၏ ထောင်ထဲသို့ပို့ခြင်းကိုပင် ခံကြရသည်။

ထိုမျှတင်မက ထိုနောက်ပိုင်းတွင်လည်း သူက သူ့မိခင်နှင့် တူဖြစ်သူကို လုမိသားစု၏အိမ်မှ မောင်းထုတ်ခဲ့သည်။ 

ထိုအချိန်တွင် လူမည်မျှက နောက်ကွယ်၌ လုကျင်းရှိူ့ကို အတင်းတုပ်နေခဲ့ကြမှန်း မသိနိုင်‌ချေ။

ဆက်ရမည်ဆိုလျှင် နောက်ပိုင်း၌ လုကျင်းရှိူ့က သီးသန့်နေပြီး စီးပွားရေးနယ်ပယ်၌ ညစ်ပတ်သော လှည့်စားမှုများကို အားကိုးစရာမလိုစွာ သန်မာသောကြောင့်သာ တဖြည်းဖြည်းနှင့် လူတိုင်း၏အမြင်များမှာ ပြောင်းလဲလာသည်။

သူက လက်မထပ်သည့်အပြင် ကလေးလည်း မရှိဘဲ လုရွေ့ချွင်အပေါ်ကိုလည်း ကောင်းမွန်သည်ကို တွေ့ကြပြီးနောက် လူအများသည် လုရွေ့ချွင်က သူ၏အမွေဆက်ခံသူ ဖြစ်လာလိမ့်မည်ဟု စတင်ထင်လာကြတော့သည်။

“ သူက ငါ့ကိုရိုက်နေကြ... ဒါပေမယ့် အဲ့ဒါက ငါ သူ့ကို မပျော်မရွှင်ဖြစ်အောင် လုပ်မိလို့ပါ... ” လုရွေ့ချွင်က ဖုန်းထဲတွင် သက်ပြင်းချသည်။

ယန်ကျင်းဇီ : “ ... ” သူသည် လုကျင်းရှိူ့ လူတစ်ဦးကို ရိုက်နေသည်အား မြင်ဖူးသဖြင့် လုရွေ့ချွင်၏ စကားများကို တန်းယုံကြည်သော မူလပိုင်ရှင်နှင့် မတူပေ။ ယခု လုရွေ့ချွင်က သူ့ကို ဤစကားများပင် ပြောပြီး တစ်ခုခုကို စောင်းပါးရိပ်ခြည် ပြောဆိုရန် ကြိုးစားနေသည်...

လုကျင်းရှိူ့က လုရွေ့ချွင်ကို ရိုက်တယ်လား? ဒါမဖြစ်နိုင်ဘူး! လုကျင်းရှိူ့က သူ့ကိုယ်သူ ထိခိုက်စေသည်။ သူ ၎င်းကိုတော့ သေချာသိသည်။

“ ဒါဆို သူက မင်းကို ရိုက်တာလား? ” ယန်ကျင်းဇီတွင် လှောင်ပြောင်ခြင်းများ ပြည့်နှက်နေသော်ငြား ဖုန်းတစ်ဖက်ခြမ်းရှိ လုရွေ့ချွင်က မမြင်နိုင်သည်မှာ နှမြောစရာပင်။

“ တကယ်တော့ အဲ့ဒါ ဘာမှမဟုတ်ပါဘူး။ ငါ့မှာ ဂရုစိုက်ပေးမယ့် ငါ့အဘွား ရှိတယ်။ ” လုရွေ့ချွင်က ဆက်ပြောသည် : “ ကျင်းဇီ၊ မင်း အခု လုဗီလာမှာ နေနေတယ်လို့ ငါ ကြားထားတယ်၊ အဲ့ဒါ တကယ်လား? ”

လုရွေ့ချွင်သည် ယန်ကျင်းဇီကို အထူးတလည် ဆက်သွယ်ခဲ့သည်မှာ ယန်ကျင်းဇီအား သူ့ကို လုကျင်းရှိူ့နှင့်ပတ်သက်ပြီး တစ်ခုခုပြောပြစေရန်အတွက် ဖြစ်သည်။

ယန်ကျင်းဇီက လုကျင်းရှိူ့အတွက် ပြဿနာအချို့ ရှာနိုင်လျှင် ပို၍ပင်ကောင်းလိမ့်မည် – ယန်ကျင်းဇီက လုကျင်းရှိူ့၏ ကိုယ်ရေးလက်ထောက်အဖြစ် အလုပ်လုပ်ပြီး နေ့တိုင်း အတူရှိနေရာ သူ လုကျင်းရှိူ့အတွက် ပြဿနာရှာနိုင်သည့် နေရာများမှာ အများအပြားပင်။

“ ဟုတ်တယ် ” ယန်ကျင်းဇီက ဖြေသည်။

အချိန်အနည်းငယ်ကြာအောင် လုရွေ့ချွင်နှင့် ဟန်ဆောင်ပန်ဆောင် စကားပြောပြီးနောက် သူသည် သူ ယခင်က မသိခဲ့သော လုကျင်းရှိူ့အကြောင်း အမှန်အမှား သတင်းများစွာကို သိလိုက်ရသည်။

လုကျင်းရှိူ့ကို အိုးမဲသုတ်သည့် လုရွေ့ချွင်၏စကားများကိုမူ တိုက်ရိုက်လျစ်လျူရှုနိုင်သည်။ ထို့အပြင် လုရွေ့ချွင်၏စကားများအရ လုကျင်းရှိူ့၏ကျန်းမာရေးမှာ အလွန်ညံ့ဖျင်းပြီး ပြင်းထန်သော စိတ်ပိုင်းဆိုင်ရာပြဿနာများ ရှိနေကာ တချိန်လုံး အိပ်မပျော်နိုင်သည့်ရောဂါကိုလည်း ခံစားနေရသည်။

ယန်ကျင်းဇီ အသက်မရှူနိုင်အောင်ပင် ခံစားရသည်။

ပြီးခဲ့တဲ့နှစ်အနည်းငယ်တွေမှာ လုကျင်းရှိူ့အတွက် ဘယ်လောက်တောင် ခက်ခဲခဲ့လိုက်မလဲ?

အခု သူ လုကျင်းရှိူ့ကို ကူညီနိုင်ပြီလား?

ယန်ကျင်းဇီသည် ၎င်းကို တွေးမိကာ သူ ဘာကိုမှ မကူညီပေးနိုင်မှန်း သဘောပေါက်သွားရသည်... ခဏလေး၊ သူ ကူညီပေးခဲ့ဖူးပုံပေါ်သည်။

လုကျင်းရှိူ့တွင် အိပ်မပျော်နိုင်သည့်ရောဂါ ရှိသော်လည်း ဤရက်များတွင် သူ သူ့ကို နှိပ်ပေးခဲ့ပြီး လုကျင်းရှိူ့က အမြဲတမ်း လျင်လျင်မြန်မြန် အိပ်ပျော်သွားနိုင်ခဲ့သည်။

ဒါကြောင့်မို့ လုကျင်းရှိူ့က သူ ညတိုင်း အိပ်ရာထဲကို တက်လာတာကို သည်းခံနိုင်တာလား? 

လုကျင်းရှိူ့အကြောင်း ယန်ကျင်းဇီ စဉ်းစားနေစဉ် တစ်ဖက်တွင်မူ ဖုန်းချ‌ပြီးနောက် လုရွေ့ချွင်က အနည်းငယ် မျက်မှောင်ကြုံ့သွားသည်။

ယန်ကျင်းဇီ၏ လေသံက သိပ်မမှန်ဟု သူ ခံစားနေရသည်။

သူ မှားကြားတာပဲဖြစ်ရမယ် ဟုတ်တယ်မလား? ယန်ကျင်းဇီက အမြဲဦးနှောက်မရှိဘဲ သူ့ကို အလွန်ချစ်ကာ သစ္စာရှိသည်။ ‌အစောက လေသံမှားနေသည်။ ယင်းကား သူ့ကို လုကျင်းရှိူ့ ရိုက်သည်ဟု သိရသောကြောင့် အလွန်စိတ်တိုသွား၍ဖြစ်နိုင်သည်။

လုကျင်းရှိူ့၏ အစည်းအဝေးက မနက်ခင်းတစ်ခင်းလုံး ကြာမြင့်နေခဲ့သည်။

ယန်ကျင်းဇီသည် လုရွေ့ချွင်နှင့် ဖုန်းပြောပြီး ခဏတာ စာအုပ်ဖတ်နေမှသာ လုကျင်းရှိူ့က လူအနည်းငယ်နှင့် ပြန်ရောက်လာသည်။

ယခင်က လုကျင်းရှိူ့ဟာ အနက်ရောင်ဝတ်စုံနှင့် ဆောင်းရာသီတွင် အပြင်ထွက်သောအခါ အနက်ရောင်ဂျာကင်အရှည်ကိုသာ အမြဲဝတ်ခဲ့သော်ငြား တစ်နေ့က ယန်ကျင်းဇီသည် လုကျင်းရှိူ့ကို ခေါ်ပြီး အဝတ်တချို့ကို ရွေးလာခဲ့သည်။

ဥပမာအားဖြင့် ယနေ့တွင် တုတ်ကောက်နှင့် ရုံးခန်းထဲသို့ လမ်းလျှောက်ဝင်လာသော လုကျင်းရှိူ့က မီးခိုးရောင်အဖျော့ဝတ်စုံကို ဝတ်ဆင်ထားသည်။

သူက အနည်းငယ် မှုန်ကုပ်နေပုံပေါ်နေသေးသော်လည်း သူ၏ မှုန်ကုပ်သော အသွင်အပြင်ကို တော်တော်ကလေး လျော့ပါးသွားစေသည်။

“ ဥက္ကဌလု၊ ပြန်လာပြီပဲ! ” ယန်ကျင်းဇီသည် tablet ကို ချပြီး မတ်တပ်ရပ်ကာ လုကျင်းရှိူ့ကို အပြုံးကြီးကြီး ပြုံးပြသည်။

“ အင်း ” ယန်ကျင်းဇီကို တွေ့ရသောအခါ လုကျင်းရှိူ့ များစွာ ခံစားချက်ပိုကောင်းသွားသည်။ သူသည် မည်သို့ဖော်ပြရမည်ကို မသိဘဲ နောက်ဆုံးတွင် အေးစက်သော မျက်နှာထားဖြင့် ပြောလိုက်သည် : “ မင်း စာဆက်ဖတ်နေ။ ”

သူ့တွင် ကိုယ်ရေးလက်ထောက် ရှိပြီး ယန်ကျင်းဇီက သူ့အတွက် ဘာမှလုပ်စရာမလိုချေ။ ရိုးရိုးသားသား ပြောရလျှင် ယန်ကျင်းဇီ သူနှင့်အတူရှိနေသရွေ့ သူသည် အလွန်ပျော်ရွှင်နေပြီးဖြစ်သည်။

ယန်ကျင်းဇီသည် စာဆက်မဖတ်ဘဲ လုကျင်းရှိူ့အတွက် ရေတစ်ခွက် ထည့်ပေးသည်။

လုကျင်းရှိူ့က ရေသောက်ရသည်ကို မကြိုက်သော်လည်း သူ ရေ‌ထည့်ပေးသောအခါ လုကျင်းရှိူ့က အနည်းနှင့်အများ သောက်လိမ့်မည်ကို သူ ရှာတွေ့ထားသည်။

လုကျင်းရှိူ့သည် အစည်းအဝေး ပြီး‌သွားသော်ငြား သူ့တွင် လူများကို ပြောစရာတစ်ခု ရှိသေးသည်။ မကြာမီ သူသည် သူတို့နှင့် ကိစ္စဆွေးနွေးနေတော့သည်။ ယန်ကျင်းဇီသည် အခွင့်ကောင်းယူ၍ ကန်တင်းသို့သွားကာ လုကျင်းရှိူ့နှင့်သူ၏ နေ့လယ်စာကို ယူလာသည်။

ယခုအခါတွင် သူသည် အာဟာရသိပ္ပံပညာပါရဂူတစ်ဦးနှင့် ဆွေးနွေးပြီးမှ လုကျင်းရှိူ့၏နေ့လယ်စာကို ပြုလုပ်သည်။ သူသည် စားသောက်ဖွယ်စာရင်းတစ်ခုကို ပြုလုပ်ပြီး ပါဝင်ပစ္စည်းများကို ပြင်ဆင်ကာ ကန်တင်းသို့ ပို့၍ ကန်တင်းရှိ စားဖိုမှူးကို ချက်ပြုတ်ပေးရန် အကူအညီတောင်းသည်။ လတ်ဆတ်ပြီး အာဟာရပြည့်ဝတာ သေချာဖို့လေ!

သေချာ‌တာပေါ့၊ အရသာမှာ မကောင်းလောက်ချေ။ သို့သော် လုကျင်းရှိူ့က ဂရုမစိုက်ပေ။

ယန်ကျင်းဇီ စားစရာများနှင့် ပြန်ရောက်လာသောအခါ လုကျင်းရှိူ့၏ရုံးခန်းထဲတွင် လုကျင်းရှိူ့တစ်ဦးတည်းသာ ရှိတော့သည်။ ယန်ကျင်းဇီသည် စားစရာများကို စားပွဲပေါ်တွင် တင်လိုက်သည် : “ ကျင်းရှိူ့၊ စားချိန်ရောက်ပြီ။ ”

“ နောင်ကျ သူတို့ကိုပဲ ဒီကိုယူလာခိုင်းလိုက်လေ။ ” လုကျင်းရှိူ့က ပြောသည် — ယန်ကျင်းဇီ ကိုယ်တိုင်ကိုယ်ကျ သွားယူဖို့ ဘယ်မှာလိုလို့လဲ?

“ ဘာမှလုပ်စရာမရှိတော့ ဒီတိုင်းပဲ လျှောက်သွားနေတာပါ။ ” ယန်ကျင်းဇီက ရယ်မောပြီး လုကျင်းရှိူ့ရှေ့တွင် စားစရာကို ချသည်။

သူတို့နှစ်ဦး ခုတင်တစ်ခုတည်းကို မျှဝေသည့်အချိန်မှစ၍ လုကျင်းရှိူ့၏ သူ့ထံသို့ သဘောထားမှာ များစွာပို၍ကြည်သာလာခဲ့သည်။ ယန်ကျင်းဇီသည် ဤသို့နေထိုင်ရသည်ကို အထူးသဘောကျသည်။

လုကျင်းရှိူ့သည်လည်း ဤသို့နေထိုင်ရသည်ကို သဘောကျသည်။ ဤရက်များတွင် ယန်ကျင်းဇီက သူ့အနားတွင် ‌ရှိနေပြီး မခွဲမခွာဘဲ ယန်ကျင်းဇီက သူ့ကို တကယ် ကြိုက်နေသည်ဟုပင် သူ့ကို ခံစားရစေသည်။

ဒီခံစားချက်က မှန်တာ ဖြစ်နိုင်သလား?

လုကျင်းရှိူ့သည် ယန်ကျင်းဇီကို မော့ကြည့်ပြီး ဆက်စားနေသည်။

သူ့ခံစားချက်က စစ်မှန်သည်ဖြစ်စေ သို့မဟုတ် ပုံရိပ်ယောင်တစ်ခုသာဖြစ်စေ ဂရုမစိုက်ဘဲ သူသည် ဤအရာကို အလွန်တန်ဖိုးထားပြီး ထိန်းသိမ်းထားချင်မိသည်။

လွန်ခဲ့သော ရက်အနည်းငယ်၌ သူသည် အသက်ရှင်နေရခြင်းက အလွန်ပျင်းစရာကောင်းသည်ဟု ခံစားခဲ့ရပြီး တစ်ခုခုလုပ်ရန်ပင် အားမရှိခဲ့ပေ။ ဘာကြောင့် သူ အသက်ရှင်ချင်ရကြောင်းကိုပင် သူ နားမလည်နိုင်ခဲ့။

သူ ကုမ္ပဏီကို အလေးအနက် ဂရုစိုက်ခြင်းမှာလည်း သူ ဤသို့လုပ်သင့်သည်ဟု ခံစားရသောကြောင့်သာ ဖြစ်ပြီး သူ လုပ်နိုင်သည့် အခြားတစ်ခုခု မရှိသောကြောင့်လည်း ဖြစ်သည်။ သို့ရာတွင် ယခုမူ သူသည် အနာဂတ်နှင့်ပတ်သက်ပြီး မျှော်လင့်ချက်ထားတတ်လာသည်။

လုရွေ့ချွင်ကို ရှင်းလင်းရန်ပင် သူ စတင်စိုးရိမ်လာ၏ — သူ ဤလူကို ဟိုးအဝေးသို့ မောင်းထုတ်ချင်သည်။

ဤသို့စဉ်းစားရင်း လုကျင်းရှိူ့သည် နေ့လယ်ခင်းတွင် ယန်ကျင်းဇီကို ရှောင်ရှားရန် အချိန်ရှာပြီး လူအနည်းငယ်ကို ဆက်သွယ်ကာ သူ့အစား လုရွေ့ချွင်ကို စောင့်ကြည့်ခိုင်းခဲ့သည်။ သူသည် လုရွေ့ချွင်ကို ရုံးခွဲတွင်သာ ဆက်နေပြီး ပြန်မလာအောင် လုပ်နိုင်မည့်နည်းကိုလည်း စတင်လေ့လာသည်။

အလုပ်ဆင်းချိန် ရောက်သောအခါ ယန်ကျင်းဇီနှင့် လုကျင်းရှိူ့တို့သည် ပုံမှန်အတိုင်း ကုမ္ပဏီမှ အချိန်မှန် ထွက်ခွာသွားကြသည်။

တုတ်ကောက်ကို အမှီပြုလျက် ယန်ကျင်းဇီနှင့် အတူတူ ဖြည်းညှင်းစွာ ထွက်ခွာသွားသော လုကျင်းရှိူ့ကို တွေ့ရသော် သူ၏ အတွင်းရေးမှူးများနှင့် လက်ထောက်များ အသင်းမှ လူအားလုံးတို့သည် ချက်ချင်း ခုံမှထပြီး သူတို့၏ ပစ္စည်းများကို စတင်သိမ်းဆည်းကြသည်။

“ ဥက္ကဌလုက အခုတလော တကယ် ထူးဆန်းနေတယ်။ အံ့ဩစရာကောင်းလောက်အောင်ပဲ သူ နေ့တိုင်း အချိန်မှန် အလုပ်ဆင်းနေတာ! ”

“ သူရဲ့ဒေါသထွက်တာကလည်း အများကြီး တိုးတက်လာတယ်။ သူ ပစ္စည်းတွေ မခွဲတာ ရက်တော်တော်ကြာပြီ။ ”

“ ဒုတိယသခင်လေးယန် ရောက်လာတော့ နေ့တိုင်း ပြင်းထန်တဲ့ မုန်တိုင်းနဲ့ ရင်ဆိုင်ရလိမ့်မယ်လို့ အရင်က ငါ တွေးခဲ့တာ။ ဒါပေမယ့် ပြောင်းပြန်ဖြစ်လိမ့်မယ်လို့ ငါ မထင်ထားခဲ့ဘူး။ ”

လူတိုင်းက စကားပြောနေကြပြီး တစ်စုံတစ်ဦးက ရုတ်တရက် ပြောလာသည် : “ ဥက္ကဌလုက ယန်မိသားစုရဲ့ ဒုတိယသခင်လေးအပေါ် တော်တော်ကောင်းတယ်လို့... ဘာလို့ ငါ ခံစားရတာလဲ? ”

ဤလူ၏စကားများ ထွက်လာပြီးနောက် အခြားသူများလည်း တွေးမိကာ ပြောကြသည် : “ ငါလည်း အဲ့လိုပဲထင်တယ်။ ”

“ စစချင်းတုန်းကတော့ ဥက္ကဌလုက ဒုတိယသခင်လေးယန်ကို မျက်နှာသာမပေးခဲ့ဘူး။ ဒါပေမယ့် အခုတလော သူ ဒုတိယသခင်လေးယန်နဲ့ အများကြီး ပိုအဆင်ပြေလာတယ်။ ”

“ ဘာပဲဖြစ်ဖြစ် သူက ယန်မိသားစုရဲ့ ဒုတိယသခင်လေးယန်ပဲဟာ။ ဥက္ကဌလုလည်း သူများတွေကို မျက်နှာသာပေးချင်မှာပဲ။ ”

“ ဒုတိယသခင်လေးယန်ကို မုန်းဖို့ တကယ် ခက်တယ်။ သူက သင်ယူတဲ့နေရာမှာ မတော်ဘဲ အရည်အချင်းမရှိပေမယ့် သူ့စေ့စပ်ထားသူရဲ့ ဦးလေး ဥက္ကဌလုအပေါ်တော့ တကယ် ကောင်းတာ။ ”

“ အဲ့လိုမျိုး ဂရုစိုက်တတ်တဲ့ ချောချောမောမော ယောက်ျားတစ်ယောက် အနားမှာ သွားလာနေတာကို ဘယ်သူက မုန်းမှာလဲ? ”

…

လူတိုင်းဟာ စကားပြောဆိုပြီး‌နောက် တစ်ဦးပြီးတစ်ဦး အလုပ်ဆင်းသွားကြသည်။ ကုမ္ပဏီမှ ထွက်လာပြီးနောက် သူတို့ထဲမှတစ်ဦးက လုရွေ့ချွင်ကို ဖုန်းဆက်ခဲ့သည်။

လုရွေ့ချွင် အံ့အားသင့်သွားသည်။

သူသည် ယန်ကျင်းဇီကို ဤမနက်မှသာ ဖုန်းခေါ်ထားသော်လည်း ယန်ကျင်းဇီက လုကျင်းရှိူ့ထံမှ တမူထူးစွာ ဆက်ဆံခံရလိမ့်မည်ဟု သူ ထိုအချိန်တွင် တကယ် မထင်ထားခဲ့ပေ။

သို့သော် သူ သေချာတွေးကြည့်မိကာ ၎င်းက မထူးဆန်းဟု သတိထားမိသွားသည်။

သူ လုကျင်းရှိူ့ကို အမြင်မကြည်သော်ငြား လုကျင်းရှိူ့က သနားစရာကောင်းသည်ဟု သူ ဝန်ခံရမည်ဖြစ်သည်။

အခြားကိစ္စများထက် မထင်မှတ်စွာ လုကျင်းရှိူ့၏မိခင် ဖြစ်သော သူ၏ သွေးမတော်စပ်သည့် အဘွားက သူ(မ)၏သားအရင်း လုကျင်းရှိူ့ထက်ပင် သူ့အပေါ်သို့ ပိုမိုကောင်းမွန်စွာ ဆက်ဆံပေးသည်။

လုကျင်းရှိူ့က ချမ်းသာသော်လည်း ထူးခြားပြီး မသန်စွမ်းချေ။ သူ့အနားတွင် သူ့ကို စိတ်ရင်းစစ်မှန်စွာ ဆက်ဆံပေးသူ လုံးဝ မရှိပေ။ အယုံကြည်ရဆုံး အိမ်တော်ထိန်းကပင် သူ့ကို သစ္စာဖောက်သွားခဲ့သည်...

ယန်ကျင်းဇီကရော? လုရွေ့ချွင်သည် တွေးကြည့်ပြီးနောက် ယန်ကျင်းဇီက သူ့ကြောင့် သူ့ဦးလေးကို လေးစားပြီး လုကျင်းရှိူ့ကို စိတ်ကျေနပ်အောင် စိတ်ရင်းစစ်မှန်စွာ ဆောင်ရွက်ချင်နေမှန်း ရှာတွေ့သွားသည်။

ထိုသို့သော အခြေအနေများအောက်တွင် လုကျင်းရှိူ့က ယန်ကျင်းဇီကို တမူထူးစွာ ဆက်ဆံသည်မှာ အံ့ဩစရာမကောင်းတော့ချေ။

သို့သော်ငြား သူက ဤမနက်တွင် ဖုန်းဆက်ခဲ့ပြီး လုကျင်းရှိူ့က သူ့ကို ရိုက်ဖူးကြောင်း ယန်ကျင်းဇီကို ပြောပြလိုက်သည်... ယန်ကျင်းဇီ လုကျင်းရှိူ့နဲ့ ရန်ဖြစ်‌ထားလောက်ပြီ! 

ဒီအချိန်မှာ ယန်ကျင်းဇီက လုကျင်းရှိူ့နဲ့ ပြဿနာတက်ရင် သူ့ကို ဘာကောင်းတာမှ မဖြစ်စေနိုင်ဘူး!

လုရွေ့ချွင်သည် ခဏတာ တွေးကာ ယန်ကျင်းဇီကို ဖုန်းဆက်သည်။

ယန်ကျင်းဇီဟာ အိမ်အပြန်လမ်းတွင် ဖြစ်သည်။

လုကျင်းရှိူ့နှင့် စကားပြောနေစဉ် ရုတ်တရက် ဖုန်းသံမြည်လာသည်... ယန်ကျင်းဇီသည် ဖုန်းယူပြီး ကြည့်လိုက်သည်။ သူသည် လုရွေ့ချွင် ဖြစ်ကြောင်း တွေ့ပြီး တွေးပင်မတွေးဘဲ ဖုန်းချလိုက်၏။

လုကျင်းရှိူ့သည် ယန်ကျင်းဇီဘေးတွင် ထိုင်နေပြီး ယန်ကျင်းဇီကို အာရုံစိုက်နေသည်။ ယန်ကျင်းဇီ ဖုန်းထုတ်သောအခါ သူလည်း လှမ်းကြည့်လိုက်သည်။

ခေါ်သူမှာ “A လုရွေ့ချွင်” ဖြစ်သည်။

ဤနာမည်ကို သူ တွေ့သောအခါ သူ့နှလုံးက “ဒုတ်ခနဲ” ခုန်သွားသည်။

ယန်ကျင်းဇီက လုရွေ့ချွင်၏နာမည်ကို သိမ်းထားသည်။ ၎င်းက “အချစ်လေး” မဟုတ်ချေ။ သူသည် အလွန်ပျော်ရွှင်မိသော်ငြား လုရွေ့ချွင်နာမည်ရှေ့တွင် “A” ရှိနေသည်... ဤသည်မှာ ဤနာမည်ကို address book ၏ ထိပ်ဆုံးတွင် ထားချင်သောကြောင့် ဖြစ်သည်။ ဟုတ်တယ်မလား?

လုကျင်းရှိူ့၏မျက်ခုံးများ တွန့်ချိုးသွားသော်လည်း ကံကောင်းစွာဖြင့် ယန်ကျင်းဇီက မဖြေဘဲ ဖုန်းချခဲ့ရာ သူ၏ မသက်မသာ ခံစားချက်မှာ အနည်းငယ် လျော့ပါးသွားရသည်။

“ လုရွေ့ချွင် ခေါ်တာ။ သူက ငါ့ကို လျစ်လျူရှုနေကျ။ ဒီအတောအတွင်းမှာ ငါ သူ့ကို လျစ်လျူရှုထားတော့ သူက ငါ့ကို ဖုန်းဆက်လာတယ်။ ” ယန်ကျင်းဇီက ရှင်းပြသည်။

“ အင်း ” လုကျင်းရှိူ့ စိတ်သက်သာရာရစွာ သက်ပြင်းချလိုက်သည်။

ယန်ကျင်းဇီသည် စစ်ဆေးပြီးဖြစ်သည်။ လုကျင်းရှိူ့၏ ကိုယ်ရေးလက်ထောက်က ယုံကြည်စိတ်ချရသည် — ဤကိုယ်ရေးလက်ထောက်ကိုလည်း လုကျင်းရှိူ့က နိုင်ငံခြားမှ ပြန်ခေါ်လာခဲ့သည်။ သူက နိုင်ငံရပ်ခြားတွင် မွေးဖွားကြီးပြင်းခဲ့သော တရုတ်လူမျိုး ဖြစ်သည်။ ယခင်က သူ ကောင်းကောင်းမနေခဲ့ရချေ။ လုကျင်းရှိူ့နှင့် တွေ့ဆုံပြီးနောက် သူက တော်တော်လေး တော်ပြီး လုကျင်းရှိူ့၏စကားကို အမြဲနားထောင်သည်။

သို့သော် မူလဇာတ်ကြောင်းတွင် အကြောင်းအရင်းမသိရဘဲ သူက နောက်ပိုင်း၌ လုကျင်းရှိူ့နောက်သို့ မလိုက်တော့ပေ။

ဤနေရာတွင် အပြင်လူများ မရှိရာ ယန်ကျင်းဇီ ပြောပြလိုက်သည် : “ စိတ်မပူပါနဲ့။ ငါ ပုဂ္ဂလိကစုံထောက်ကို သူ ဖောက်ပြန်နေတဲ့ သက်သေ ရှာခိုင်းထားပြီးပြီ။ သူတို့ ရှာတွေ့တာနဲ့ ငါ လက်ထပ်ပွဲကို ချက်ချင်း ဖျက်သိမ်းမှာပါ! ”

လုကျင်းရှိူ့က ဆိုသည် : “ မင်း ဖျက်သိမ်းတာ၊ မဖျက်သိမ်းတာက ငါနဲ့ ဘာမှမဆိုင်ဘူး။ ” သူ့ကို မရေမရာ ဖွင့်ဟဝန်ခံထားသော်ငြား သူက ဘာမှပြန်မပြောထားပေ။

ယန်ကျင်းဇီ ပြုံးလိုက်သည် : “ ဘယ်လိုလုပ် မင်းနဲ့မဆိုင်ဘဲနေမှာလဲ? ငါ လက်ထပ်ပွဲကို ဖျက်သိမ်းပြီးရင် မင်းကို ပွင့်ပွင့်လင်းလင်းနဲ့ ရိုးရိုးသားသား ပိုးပန်းနိုင်လိမ့်မယ်။ ”

လုကျင်းရှိူ့၏ဘက်လက်မှာ တုန်ယင်သွားပြီး လုကျင်းရှိူ့က အေးစက်စွာ နှာမှုတ်ခဲ့သည်။

ယန်ကျင်းဇီနှင့် လုကျင်းရှိူ့တို့ အိမ်ပြန်ရောက်သောအခါ လုမိသားစုဗီလာတွင် လူအများအပြား ရှိနေသည်။

အပတ်တိုင်းတွင် သန့်ရှင်းရေးကုမ္ပဏီက ဗီလာကို လာပြီး သန့်ရှင်းရေးလုပ်သည်။ မကြာသေးမီကမှ ပူပြင်းလာသော ရာသီဥတုကြောင့် ယနေ့တွင် သန့်ရှင်းရေးကုမ္ပဏီသည် ဗီလာကို လာပြီး သန့်ရှင်းရေး ကြီးကြီးမားမား ပြုလုပ်ကာ ဥယျာဉ်ကို မြက်ရိတ်၍ ရေကူးကန်ကို ‌သန့်ရှင်းရေးလုပ်သူများပင် ရှိနေသည်။

ယန်ကျင်းဇီ အထဲဝင်သောအခါ ဗီလာ၏ ပြတင်းပေါက်များ ပွင့်နေပြီး လူအချို့က ဥယျာဉ်ထဲရှိ ပန်းပင်များကို ပြန်လည်စိုက်ပျိုးနေကာ အခြားသူများက အိမ်နောက်ဖေးခြံတွင် အလုပ်များနေသည်ကို သူ တွေ့လိုက်ရသည်။

“ သခင်ကြီး၊ ဒီနေ့ အလုပ်များနေတော့ စားဖို့ မချက်ရသေးဘူး... ” နာနီက လုကျင်းရှိူ့ကို ရှက်ရွံ့စွာ ကြည့်သည်။

“ အတတ်နိုင်ဆုံးသာ အမြန်ပြင်ဆင်လိုက်ပါ။ ” လုကျင်းရှိူ့က ပြောပြီးနောက် ဆိုဖာတွင် ထိုင်ချလိုက်သည်။ 

ယန်ကျင်းဇီကမူ... ယန်ကျင်းဇီ၏အကြည့်များမှာ ‌ပွင့်နေသော အနောက်တံခါးကို ကျော်ကာ ဗီလာ၏အနောက်ရှိ ရေကူးကန်သို့ ‌ကျရောက်သွားသည်။

ယခင်ဘဝတွင် လုကျင်းရှိူ့ဟာ မူလပိုင်ရှင်၏ ရေကူးကန်ထဲသို့ တွန်းချခြင်းကို ခံရပြီး ရေကူးကန်ထဲတွင် ရေနစ်သေဆုံးသွားခဲ့သည်...

သူ လောလောလတ်လတ် သိထားရသော လုကျင်းရှိူ့၏ ခန္ဓာကိုယ်အခြေအနေကို တွေးမိပြီး ဤဖြစ်ရပ်ကို ဆက်တွေးမိသောအခါ ယန်ကျင်းဇီသည် ကျောက်တုံးတစ်တုံးဖြင့် အဖိခံထားရသကဲ့သို့ ခံစားလိုက်ရသည်... သူသည် အသက်ပြင်းပြင်း ရှူကာ နောက်ဖေးသို့ ထွက်သွားသည်။

ဤဗီလာ၏နောက်ဖေးရှိ ရေကူးကန်မှာ အတော်လေး ကြီးမားပြီး ရေတိမ်နှင့် ရေနက်သော ဧရိယာများကိုပင် ခွဲခြားထားသည်...

ဖုန်းအကြောင်း နောက်တစ်ကြိမ် တွေးမိပြီးနောက် ယန်ကျင်းဇီသည် ဖုန်းဖွင့်ကြည့်မိပြီး လုရွေ့ချွင် ဖုန်းခေါ်နေသည်ကို တွေ့လိုက်ရသည်။

သူ မကိုင်ချင်သော်ငြား စဉ်းစားကြည့်ပြီးနောက် သူ ဖုန်းကိုင်လိုက်သည် – လုရွေ့ချွင် သူ့ကို ဖုန်းခေါ်ပြန်သည်မှာ သူ့ကို လုကျင်းရှိူ့အား ထိခိုက်လိုစေနေခြင်း ဖြစ်လောက်ပြီး တပြန်တလှည့်အားဖြင့် သူလည်း လုရွေ့ချွင်ထံမှ တစ်ခုခုသိရနိုင်သည်။

သို့သော် ယန်ကျင်းဇီ မှားသွားခဲ့သည်။

လုရွေ့ချွင် သူ့ကို ဖုန်းဆက်သည်မှာ သူ့ကို လုကျင်းရှိူ့နှင့် ရန်မဖြစ်ဘဲ လုကျင်းရှိူ့အနားတွင် နေရန် ပြောဖို့ဖြစ်သည်။

ယန်ကျင်းဇီသည် လုရွေ့ချွင်ကို စကားပြောရန် သိပ်ပြီး အာရုံမရှိပေ။ ထွေရာလေးပါး စကားအနည်းငယ် ပြောပြီးနောက် သူ ဖုန်းချလိုက်ကာ ရေကူးကန်ကို ထပ်ကြည့်မိပြန်သည်။

ခဏကြည့်ပြီးနောက် ယန်ကျင်းဇီသည် သူ့မျက်နှာကို ပွတ်ပြီး အပြုံးကြီးကြီးတစ်ခုကို ထုတ်ဖော်လိုက်သည်။ သူသည် ဧည့်ခန်းသို့ ပြန်ပြီး ဆိုဖာပေါ်တွင် ထိုင်နေရင်း ညစာစောင့်နေသော လုကျင်းရှိူ့ကို ကြည့်လိုက်၏ : “ ကျင်းရှိူ့၊ အိမ်မှာ ဘယ်သူမှ ရေမကူးဘူး။ အိမ်မှာ ဒီလောက်ကြီးတဲ့ရေကူးကန် ရှိနေတာ အရမ်းကို အချည်းနှီးဖြစ်နေတယ်မလား? ”

ဒီလိုရေကူးကန်မျိုးဆို ဖို့ပစ်လိုက်တာ ပိုကောင်းတယ်!

လုကျင်းရှိူ့ ယန်ကျင်းဇီကို လှမ်းကြည့်သည် : “ မင်း ရေကူးတတ်လား? ”

ယန်ကျင်းဇီက ဖြေသည် : “ မကူးတတ်ဘူး။ ”

လုကျင်းရှိူ့ : “ နွေရာသီရောက်ရင်... ငါ မင်းကို ရေကူးနည်း သင်ပေးလို့ရတယ်။ ” ထိုအချိန်တွင် ယန်ကျင်းဇီက သူ့အနား၌ ရှိနေဦးမည်ဟု သူ မျှော်လင့်သည်။

“ မင်း ရေကူးတတ်လား? ” ယန်ကျင်းဇီ အံ့အားသင့်သွားသည်။

“ ငါ ရေကူးတတ်တယ်။ ” လုကျင်းရှိူ့က ‌ပြန်ဖြေသည်။

သူ နိုင်ငံခြားသို့ ပထမဆုံးရောက်ရောက်ချင်း သူ့ကျန်းမာရေးမှာ ညံ့ဖျင်းနေခဲ့ပြီး ဆရာဝန်က သူ့ကို လေ့ကျင့်ခန်းများများလုပ်ရန် အကြံပေးခဲ့သည်။

သူသည် ဤခန္ဓာကိုယ်ဖြင့် အားကစားများစွာကို မလုပ်နိုင်သဖြင့် ရေသာ ကူးနို

င်ခဲ့၏။

သို့သော် သူ ရေမကူးသည်မှာ ကြာလှပြီဖြစ်သည်။

လုကျင်းရှိူ့က ရေကူးနိုင်တယ်လား?

သို့သော် လုကျင်းရှိူ့က မူလပိုင်ရှင်ထံမှ ရေထဲသို့ တွန်းချခံရပြီးနောက် ရေနစ်သွားခဲ့သည်။

ဘာလို့ သူ ရေနစ်သွားတာလဲ? သူ... အသက်မရှင်ချင်တော့လို့လား?