အပိုင်း (၁၀)

ချွီးဟယ်ချင်းက ရက်အနည်းငယ်ကြာအောင် အစားအသောက် ပို့ဆောင်သူ လုပ်နေခဲ့ပြီး ချီရှောင်နင်သည်လည်း လတ်တလော အလုပ်များနေပေသည်။

အစက သူသည် ဟာသတစ်ခု ကြည့်ချင်ရုံသာ ဖြစ်သော်လည်း သူ့ကိုယ်သူပင် မသိလိုက်ခင် သူက ချွီးဟယ်ချင်း၏ အလုပ်သမား ဖြစ်လာခဲ့လေသည်။ 

သူက နေ့တိုင်း ချက်ပြုတ်ရန် အစားအသောက်များ သွားဝယ်ပေးရပြီး နေ့လယ်စာဘူးအတွက်  ထုပ်ပိုးပေးရသည်။ ယခုဆိုလျှင် သူက အသီးအရွက်များ မည်သို့ ဆေးကြောရမည်ကိုပင် သိနေပြီ ဖြစ်သည်။ 

ချီရှောင်နင် : “…”

သူက ချွီးဟယ်ချင်း သူ့ကို မှော်စွပ်ပြုတ် တိုက်ထားသလားဆိုတာ အနှေးနဲ့အမြန် ရှာဖွေဖော်ထုတ်ရတော့မည် ဖြစ်၏။ 

ခုနစ်ရက်မြောက်နေ့တွင် ချီရှောင်နင်က ထပ်ပြီး သည်းမခံနိုင်တော့ပေ။ 

ချီရှောင်နင်က မျက်လုံးကို လှိမ့်ကာ ချွီးဟယ်ချင်းအား ပြောလိုက်သည်။ "ချွီးဟယ်ချင်း  မင်း တကယ်ပဲ အလုပ်အကိုင်ကို ပြောင်းချင်နေတာတော့ မဟုတ်ဘူးမလား။ အသီးအရွက်ရောင်းတာကနေ မင်း ပိုက်ဆံ ဘယ်လောက်ရှာနိုင်မှာမို့လို့လဲ။ မင်း ရူးနေတာလား။" 

ချွီးဟယ်ချင်းက အပြုံးနှင့် ပြောလိုက်သည်။ "အဲဒါ ငါ ဒီတလော အရမ်း အလုပ်ရှုပ်နေတော့ မင်းကို အမြတ်ဝေစုပေးဖို့ မေ့သွားလို့ပါကွာ။" ထို့နောက်တွင် သူက ချီရှောင်နင်၏ ဝီချက်ပရိုဖိုင်ကို ဖွင့်ကာ ယွမ်သုံးထောင် လွှဲပေးလိုက်သည်။

"ဒါက ဘာလဲ။" ချီရှောင်နင်က သူ့ဖုန်းကို မယုံကြည်နိုင်သလို ကြည့်ရင်း ပြောလိုက်သည်။ "မင်း ဒီတစ်ပတ်ထဲမှာ ဒီလောက် ပိုက်ဆံအများကြီး ရှာနိုင်ခဲ့တယ်လို့ မပြောနဲ့နော်။" 

ချွီးဟယ်ချင်းက ခေါင်းညိတ်လိုက်သည်။ "မင်းက ငါ ပိုက်ဆံ ဘယ်လောက် ရှာနိုင်လဲလို့ မေးချင်တာဆိုရင် အဲဒီလောက်နီးပါးပါပဲ။" 

ချီရှောင်နင်က အံ့သြမှင်တက်သွားလေသည်။ တစ်ပတ်ကို ယွမ်သုံးထောင်ရှာနိုင်တယ် ဆိုတဲ့ အဓိပ္ပါယ်က ဘာလဲ။ အဲဒါက တစ်လကို ဝင်ငွေက ယွမ်တစ်သောင်းကျော်မယ်လို့ ပြောတာ မဟုတ်ဘူးလား။ 

သူက ထိုမျှ ပိုက်ဆံနည်းနည်း​လေးကို ပြတ်လပ်မနေသော်လည်း ချွီးဟယ်ချင်း၏ ပိုက်ဆံရှာသည့် အရှိန်နှုန်းကို အံ့သြမိပေသည်။

သို့သော် သူသည် ချွီးဟယ်ချင်းက ဤကဲ့သို့ လုပ်ဆောင်နိုင်လိမ့်မည်ဟု အမှန်တကယ် ထင်မထားခဲ့ပေ။ 

အသီးအရွက်တွေ ရောင်းတာကနေ ပိုက်ဆံ ဘယ်လောက်ရှာနိုင်မှာမို့လို့လဲ။ ရိုက်ကူးရေးအဖွဲ့က နေ့လယ်စာဘူး အမြဲဝယ်နေမှာမို့လို့လား။

သူက အများကြီး ရှာနိုင်လျှင်ပင် ၎င်းက ပမာဏသေးသေးလေးသာဖြစ်ပြီး လေးလေးနက်နက် သရုပ်ဆောင် လုပ်တာနှင့် ယှဥ်နိုင်လိမ့်မည် မဟုတ်ပေ။ 

ချီရှောင်နင်က ပြောလိုက်သည်။ "ရက်နည်းနည်းတော့ လုပ်လို့ရပေမယ့် ဒါကို အကြာကြီး ဆက်မလုပ်နဲ့။"

သူ စကားပြောပြီးပြီးချင်း ချွီးဟယ်ချင်းက ​ခေါင်းမော့လာပြီး သူ့မျက်နှာ အမူအရာတစ်ခုလုံးက ပြောင်းလဲနေသည်။ 

"ဘာဖြစ်လို့လဲ။" ချီရှောင်နင်က မေးလိုက်သည်။ 

သူ ပြောလိုက်တဲ့ စကားက ရန်စသလို ဖြစ်သွားလို့များလား။ ချီရှောင်နင်က တွေးကြည့်ပြီးနောက် နည်းနည်းလောက် အပြစ်ရှိသလို ခံစားလိုက်ရသည်။ 

ချွီးဟယ်ချင်းက ပိုက်ဆံ ပြတ်လပ်နေသောကြောင့် သူက တစ်ဖက်လူ၏ ပိုက်ဆံရှာမည့် လမ်းကို ပိတ်ပင်နေခြင်းက မဖြစ်သင့်ပေ။ အဆုံးမှာတော့ ပိုက်ဆံပမာဏ နည်းနည်းလေးကလည်း ပိုက်ဆံ ဖြစ်နေဆဲပင်။ 

ချီရှောင်နင်က စိတ်ရှုပ်သွားရသော်လည်း ချွီးဟယ်ချင်းက လက်ကို ဆန့်ထုတ်ကာ ဖုန်းကို သူ့ရှေ့သို့ ထိုးပြလိုက်သည်။ 

သူ အနားတိုးကြည့်လိုက်သည့်အခါ ဝီချက်စာမျက်နှာတွင် မက်ဆေ့ချ် အသစ်တစ်စောင် ဝင်လာသည်ကို မြင်လိုက်ရ၏။ 

——ဝမ်ပင်း (ရိုက်ကွင်းတာဝန်ခံ): [ရှောင်ချွီး မင်း နေ့လယ်စာဘူး ပမာဏများများ အော်ဒါလက်ခံနိုင်လား။ ငါ နေ့လယ်စာရော ညစာအတွက်ပါ ဘူးတစ်ရာကျော်လောက် မှာချင်တယ်။ တကယ်လို့ အဆင်ပြေတယ်ဆိုရင် ငါတို့ ကာလရှည်ပူးပေါင်းလို့ရတယ်။]  

"..." ချီရှောင်နင်က တိတ်ဆိတ်သွားသည်။ 

သူ မှားသွားသည်။ ချွီးဟယ်ချင်းက အစားအသောက် ပို့ဆောင်သူလေးသာ မဟုတ်ပေ။ သူက ရှင်းရှင်းလင်းလင်းပင် သူဌေးပေါက်စလေး ဖြစ်လာမည့် လမ်းကြောင်းပေါ် ရောက်နေတာ ဖြစ်၏။

******

ဝမ်ပင်းသည် အမှန်တကယ် အကူအညီမဲ့နေလေသည်။ သူ နေ့လယ်စာစားနေစဥ် ဒါရိုက်တာက သူစားနေသည့်အရာကို မြင်သွားလိမ့်မည်ဟု မည်သူက ထင်ပါမည်နည်း။ 

ဒါရိုက်တာနှင့် ထုတ်လုပ်သူက ဆယ့်ငါးယွမ်သာ ကျသင့်သော ဝက်သားမွှေကြော် တစ်ဘူးကို မျှစားလိုက်ကြပြီးနောက် သူတို့က ဆယ်ယွမ်ကျသင့်ပြီး လက်ခံနိုင်ဖွယ် မရှိသော ဂေါ်ဖီထုပ်နှင့် တို့ဖူးတုံးတို့ကို ထပ်စားချင်စိတ် မရှိကြတော့ပေ။ 

သူသည်လည်း ဤနည်းလမ်းဖြင့် အရသာရှိသော အစားအသောက်ကို ရိုက်ကူးရေးအဖွဲ့၏ ပိုက်ဆံဖြင့် စားနိုင်တော့မည်အား တွေးမိသည့်အခါ ချွီးဟယ်ချင်းထံ ဝီချက်မက်ဆေ့ချ်တစ်စောင် ပို့လိုက်တော့သည်။

ပိုက်ဆံကိစ္စအတွက်မူ စီမံရေးဌာနက ကိုင်တွယ်ရန်သာ အပ်ထားလိုက်တော့မည် ဖြစ်သည်။ 

ထို့ပြင် ဝမ်ပင်းသည် ရက်အနည်းငယ်အတွင်း အဖွဲ့ထဲတွင် ချွီးဟယ်ချင်းအတွက် ဇာတ်ကောင်သေးသေးလေး တစ်နေရာလောက် ရှာပေးရန် စီစဥ်ထားသည်။ 

အဆုံးမှာတော့ သူက အရူးမဟုတ်ပေ။ နေ့တိုင်း သူ သွားဝယ်စားသည့်အခါ သူ့အတွက် အစားအသောက်က အများကြီး ရက်ရက်ရောရော ထည့်ပေးထားတတ်ကာ တစ်ခါတစ်ရံ၌ ချွီးဟယ်ချင်းသည် သူ သောက်ရန်အတွက် သောက်စရာ တစ်ဘူးပင် အလကားပေးတတ်သေးသည်။ ၎င်းက တန်ဖိုးအများကြီး မရှိသော်လည်း သူ၏ စိတ်ကျေနပ်တန်ဖိုးထားမှုကို ရစေသည့် အဓိကအကြောင်းရင်း ဖြစ်သည်။

ဘဝတွင် အပြန်အလှန်ဟူသည်မှာ အရေးကြီးပေသည်။ သူက အနာဂတ်တွင် ချွီးဟယ်ချင်း နာမည်ကြီးလာမလား သေချာမသိသော်လည်း အစေခံကဲ့သို့သော ဇာတ်ကောင်သေးသေးလေး နေရာကို ချွီးဟယ်ချင်း ရရှိအောင် ကူညီပေးခြင်းက သူ့အတွက် ခက်ခဲသည့်အရာ မဟုတ်ပေ။ သို့ဆိုလျှင် မည်သည့်အတွက် မကူညီဘဲ နေရမည်နည်း။ 

သို့သော် ဝမ်ပင်းသည် သူတို့၏ ဒါရိုက်တာ နေ့လယ်စာဘူးအပေါ် ထိုမျှ ပြင်းပြင်းပြပြ စွဲလမ်းသွားမည်ဟု ထင်မှတ်မထားခဲ့ပေ။ 

ထိုသို့ဖြစ်လျှင် ချွီးဟယ်ချင်းက နေ့လယ်စာဘူး ပြင်ဆင်ရန် အချိန်အများကြီး အသုံးပြုရလိမ့်မည် ဖြစ်ကာ သူက သေချာပေါက် သရုပ်ဆောင်ရန် အချိန်မရှိလောက်ပေ။ ထို့ကြောင့် အစေခံဇာတ်ကောင်လေးအဖြစ် သရုပ်ဆောင်ရန် ကိစ္စအား အချိန်တစ်ခုလောက်ထိ မပြောတော့ဘဲ နေရန် ဆုံးဖြတ်လိုက်သည်။ 

******

အိပ်ရာပေါ်တွင် လှဲနေရင်း ချွီးဟယ်ချင်းက နှာချေလိုက်သည်။ 

အကြောင်းတချို့ကြောင့် သူသည် ကောင်းမွန်သည့်အရာများ ဖြစ်လာတော့မည်ဟု ခံစားလိုက်ရသည်။ 

ကျစ်! သူ အနာဂတ်မှာ ချမ်းသာလာရင် ခွိုင်ငါး​လေးတစ်ကောင် မွေးပြီး နေ့တိုင်း ကိုးကွယ်ဆည်းကပ်ရမယ်။ 

******