MM Story Teller

Chapter 1

Viewers 77

🦋Chapter 1

- မတော်တဆ မှားသွားခဲ့ခြင်း

ည၇နာရီတွင် အသစ်စက်စက် ဝယ်ထားသည့် ကုတ်အင်္ကျီလေး ဝတ်ထားသော ပိုင်ရှီးက ကိုကိုးပူပူလေး တစ်ခွက် ကိုင်ထားရင်း ထိုင်ခုံတန်းတွင် ထိုင်လိုက်ကာ လမ်းမပေါ် ဖျော်ဖြေနေသည့် ဂီတသံစဥ်ကို ခံစားနားဆင်နေမိသည်။

သူက ကြည့်ကောင်းပြီး ဖြူစင်သည့် မျက်လုံးလေးများကို ပိုင်ဆိုင်ထားလေသည်။ သူ့ပုံစံက နူးညံ့ပြီး မာနကြီးပုံမရ၍ အနားကပ်ရလွယ်သည့်ပုံမျိုး ပေါက်နေသည်။ ထိုင်နေသည့် ဆယ်မိနစ်အတွင်း သူ့ကို စကားလာပြောသည့်သူများ ပေါ်လာတော့သည်။

“ဟယ်လို...မင်းက Mတက္ကသိုလ်က ကျောင်းသားများလား..."

ပိုင်ရှီးက မော့ကြည့်လိုက်ရာ ငယ်ငယ်ချောချော ကောင်လေးကို တွေ့လိုက်ရသည်။ သူက အရပ်ရှည်ပြီး မျက်နှာထက် အနည်းငယ် ရှက်ရိပ်သန်းနေသည်။ တစ်ချက်ကြည့်ရုံနှင့် ထိုလူစိမ်းက သဘောရိုးနှင့် လာသည်မဟုတ်မှန်း သူသိသွားရသည်။

" ငါလည်း Mတက္ကသိုလ်က ကျောင်းသားပါ...မင်းကို ရင်းနှီးနေသလို ခံစားရလို့..." ထိုလူက သူ့နှုတ်က ထွက်သည့် စကားကို သူကိုယ်တိုင်တောင် မယုံမိသည့်အလား အပြောရပ်သွားရင်း တည့်တည့်ပြောလာတော့သည်

" မင်းကို ဝီချက်မှာ အပ်လို့ရမလား..."

ပိုင်ရှီးက အံ့သြသွားမိသည်။ သူ့မျက်နှာမှာ 'ဂေး' လို့ ရေးထားလို့လား...။ သူက ယဥ်ယဥ်ကျေးကျေး ပြုံးပြလိုက်ရင်း ပြန်ဖြေလိုက်သည်။

" ဆောရီးပါ...မရပါဘူး...ကျွန်တော်က ကျောင်းသား မဟုတ်ပါဘူး...လူတစ်ယောက်ကို လာစောင့်နေတာပါ..."

ထိုလူက လက်မလျှော့ချင်သေးသလို သူစိတ်ဝင်စားနိုင်လောက်မည့် ခေါင်းစဥ်မျိုး ပြောင်းမေးလာသည်။

" မင်း ဘယ်သူ့ကို စောင့်နေတာလဲ...သူငယ်ချင်းလား..."

ပိုင်ရှီးက မျက်မှောင်ကြုတ်လိုက်မိသည်။ သူက ခေါင်းလှည့်ပြီး ထိုလူ့ကို ထွက်သွားပေးဖို့ ပြောရန်ပြင်လိုက်စဥ် သူစောင့်နေသည့်သူက ဆယ်မီတာအကွာကနေ လမ်းလျှောက်လာနေသည်ကို တွေ့လိုက်ရသည်။

ဆယ်မီတာအကွာမှ ချီရွှင့်က ယနေ့တွင်လည်း အနက်ရောင် ဝတ်ထားလေသည်။ သူက ခါးသွယ်ပြီး ခြေတံရှည်ကြီးများ ရှိသည်။ သူ့လမ်းလျှောက်ပုံက မော်ဒယ်အလားပင်။ မက်မွန်ပွင့်ပုံ မျက်လုံးတစ်စုံနှင့် နှာတံချွန်ချွန် နှုတ်ခမ်းပါးပါးများက ပျားနှင့်လိပ်ပြာတို့ကို ဆွဲဆောင်နိုင်လောက်သော်လည်း သူ၏ အေးစက်စက်အမူအရာကြောင့် ရှိန်ကြရသည်။

ပိုင်ရှီးက ချီရွှင့်ကို မြင်သွားသည်နှင့် အလိုလိုပြုံးမိသွားကာ စကားပြောဖို့ မေ့နေမိသည်။

သူက ထိုကျောင်းသားဘက် တစ်ချက်လေးတောင် မကြည့်ပဲ ခွက်အကုန်ကို အမှိုက်ပုံးထဲ ထည့်လိုက်ကာ ထိုင်ရာမှထ၍ ချီရွှင့်ဆီ ပြေးသွားလိုက်သည်။

ထိုကောင်လေးက သူ့ကို မတားနိုင်တော့၍ အရပ်ရှည်ရှည် ရုပ်ချောချောလူဆီ ပြေးသွားသည့်သူ့ကို ရပ်ကြည့်နေရသည်။ သူလုံးဝ ကံဆိုးသွားမှန်း သိလိုက်၍ နှာခေါင်းပွတ်ပြီး မတတ်နိုင်ပဲ ထွက်သွားရတော့သည်။

ချီရွှင့်က ပိုင်ရှီး သူ့ဆီ ပြေးလာသည်ကို မြင်သောအခါ ရှေ့ဆက်မသွားတော့ပေ။ သူက နေရာမှာတင် ရပ်နေရင်း တစ်ဖက်လူအလာကို စောင့်နေလိုက်သည်။ သူတို့က ယနေ့ည ညစာအတူတူစားဖို့ သဘောတူထားသော်လည်း သူ့မှာ အလုပ်ကိစ္စ တာဝန်ယူစရာလေး ရှိနေ၍ ပိုင်ရှီးက သူ့ကုမ္ပဏီဘေးကရင်ပြင်တွင် စောင့်နေရသည်။

ပိုင်ရှီး ရောက်လာသည့်အချိန် သူက တစ်ဖက်လူ၏ လက်မောင်းကို အသာအယာ ထူပေးလိုက်ရင်း မေးလိုက်သည်

" စောင့်ရတာ ကြာသွားပြီလား..."

“မကြာသေးပါဘူး...ရောက်တာ ဆယ်မိနစ်ပဲ ရှိပါသေးတယ်..."

ပိုင်ရှီးက တောက်တောက်ပပ ပြုံးပြလာသည်။ သူ့မာဖလာက မျက်နှာတစ်ခုလုံးနီးပါး ဖုံးနေ၍ သူ၏ မျက်လုံးကော့ကော့လေးများကိုသာ မြင်ရသည်။

နှစ်ယောက်သား ရင်ပြင်ထဲမှ အတူတူထွက်သွားကြသည်။

ချီရွှင့်၏ကားက ကုမ္ပဏီ၏ မြေအောက်ကားပါကင်တွင် ရပ်ထား၍ ပိုင်ရှီးကို သူ့ကားနှင့် စားသောက်ဆိုင်ဆီ လိုက်ပို့ပေးခဲ့သည်။ ကားမောင်းနေရင်း ချီရွှင့်က နားကြပ်တပ်ပြီး လက်ထောက်အား နောက်ပိုင်းအလုပ်များကို ရှင်းပြပေးနေသည်။

ပိုင်ရှီးက ကားမောင်းနေသည်ကိုသာ အာရုံထားနေပုံရသော်လည်း မကြာမကြာ ချီရွှင့်ဆီ အကြည့်ရောက်နေမိသည်။

နောက်ဆုံးတစ်ခေါက် သူနှင့်တွေ့ခဲ့သည်က လွန်ခဲ့သောလက ဖြစ်သည်။ ချီရွှင့်က အလုပ်အရမ်းများသည့်သူဖြစ်၍ သူ့ကို အနှောင့်အယှက် မပေးချင်မိပေ။ ချီရွှင့်၏ အချိန်ဇယားအားမှသာ သူက ညစာစားဖို့ ဖိတ်ခဲ့ခြင်းဖြစ်သည်။

ချီရွှင့်ကို မမြင်ရခင်က ပိုင်ရှီး၏ဘဝမှာ အေးအေးသက်သာနှင့် တည်ငြိမ်အေးချမ်းနေခဲ့သည်။ သို့သော်လည်း သူ့ကို တွေ့လိုက်ရကာမှ ချီရွှင့်ကို သူတော်တော်လေး လွမ်းနေခဲ့မှန်း နားလည်သွားသည်။

မီးစိမ်းဖို့ စောင့်နေရင်း သူက တစ်ဖက်လူ မျက်မှန်းတန်းမိအောင် ပတ်ပတ်လည်ကို စစ်ဆေးဟန် ပြုလိုက်သည်။

ချီရွှင့်က စကားပြောနေဆဲပင်။ သူက အလုပ်လုပ်လျှင် အနည်းငယ်ပိုပြီး အေးစက်သွားကာ နဂိုထက်ပိုပြီး ရှိန်သွားစေသည်။ သို့သော်လည်း သူ၏ ထက်မြက်သည့် ကိုယ်ဟန် ကော့ညွတ်သည့် မျက်တောင်ဖျားများနှင့် လှပသေသပ်သည့် နှုတ်ခမ်းသားတို့က ပိုင်ရှီး၏ အမြင်တွင် သေလောက်အောင် ဆွဲဆောင်မှုရှိနေ၍ သူ့မျက်နှာကို အတော်လေး ထိန်းထားရသည်။

ဤအကြောင်း တွေးရင်း ဆွဲဆောင်ခံနေရ၍ သူ့ကိုယ်သူ အပြစ်တင်မိသည်။

သူက ချီရွှင့်ကို ဆယ်နှစ်ကျော်ကြာ သိလာပြီး ခြောက်နှစ်လောက် သဘောကျခဲ့ရသည်။ သူက သူငယ်ချင်းအဆင့်ကနေ မတက်ရဲပေ။ အချိန်ကြာလာလျှင် ချီရွှင့်ကို ချစ်သည့်အချစ်က တဖြေးဖြေး ပျောက်ကွယ်သွားလိမ့်မည်ဟု သူ အစက တွေးခဲ့မိသည်။ သို့သော်လည်း ချစ်ရသူ၏ မျက်နှာကို ကြည့်လိုက်မိချိန် သူ့ဘက်က မျှော်လင့်ချက်လေးများကို မဖယ်ထားနိုင်မိပေ။

မီးစိမ်းသွားသောအခါ ငြိမ်သက်နေသည့် ယာဥ်ကြောက တစ်ဖန်ပြန်ပြီး လှုပ်ရှားလာသည်။

သူ၏ တောင်စဥ်ရေမရ အတွေးတို့က ချီရွှင့်ကို တိတ်တခိုး သဘောကျခဲ့ရသည့် ထိုနှစ်များဆီ လည်ပတ်သွားလေသည်။

သူနှင့် ချီရွှင့်၏ ဆက်ဆံရေးက ရိုးရှင်းလှသည်။ သူတို့မိဘများက စီးပွားရေးပါတနာများ ဖြစ်၍ သူတို့က ငယ်ငယ်လေးကတည်းက သိကျွမ်းခဲ့ကြသည်။ ချီရွှင့်က ကလေးကတည်းက ထူးချွန်ပြီး ဥာဏ်ကောင်းသည့်သူ ဖြစ်သည်။ တစ်ဖက်တွင်လည်း ချီရွှင့်ထက် နှစ်နှစ်ငယ်သည့် ပိုင်ရှီးက ကလေးဘဝကို ပျင်းပျင်းရိရိ ကုန်ဆုံးခဲ့ပြီး အပြင်လောကကြီးကိုလည်း စိတ်ဝင်စားမှု မရှိခဲ့ပါချေ။

သူသာ ချီရွှင့်ကို အထက်တန်းတုန်းက သဘောမကျမိခဲ့လျှင် သူတို့က ဤအတိုင်း ဆက်ရှိနေပေလိမ့်မည်။ သူတို့က သူငယ်ချင်းမဟုတ်ဘဲ အသိအကျွမ်းအနေနှင့်သာ သတ်မှတ်လို့ရနိုင်မည်။

သို့သော်လည်း အကြောင်းတစ်ချို့ကြောင့် သူ့အသက်ဆယ့်ရှစ်နှစ်တွင် သူ ချီရွှင့်ကို သဘောကျနေမှန်း သိသွားခဲ့သည်။

ထိုခံစားချက်က နွေလယ်က နှင်းဆီပန်းရိုင်းလို အမှောင်ထဲတွင် အရိုင်းဆန်ဆန် ပွင့်လန်းလာခဲ့သည်။

သူက ချီရွှင့်၏ တက္ကသိုလ်ကို ရွေးတက်ခဲ့ပြီး ထိုသူနှင့် နှစ်နှစ်ခန့် အနီးကပ်နေခဲ့ပြီးနောက် သိပ်မရင်းနှီးသည့် မိတ်ဆွေအဆင့်ကနေ အပြင်အတူတူသွား ရုပ်ရှင်အတူတူကြည့်သည့် သူငယ်ချင်းအဖြစ် အောင်အောင်မြင်မြင် အဆင့်တက်နိုင်ခဲ့သည်။ တစ်ခါတစ်ရံ သူက ချီရွှင့်အိမ်ကိုပါ ရောက်သွားပြီး မွေးနေ့လက်ဆောင်များ ဖလှယ်ဖူးလေသည်။

သို့သော်လည်း ထိုအရာက သူလုပ်နိုင်သည့် ဘောင်အတွင်းမှာပဲ ရှိနေသည်။

သူနှင့် ချီရွှင့်၏ ဆက်ဆံရေးက ထိုထက်မပိုခဲ့ပေ။

သူဘွဲ့ရသည့်အချိန်ကဆို နှစ်နှစ်ကြာသွားပြီဖြစ်သော်လည်း ချီရွှင့်ကို ဖွင့်မပြောရဲသေးသလို သူကြိုက်နေမှန်းပင် မသိစေရဲပေ။ သူက ချီရွှင့်ကို သတ္တိမရှိပဲ တိတ်တိတ်လေး သဘောကျနေမိရုံသာ ဖြစ်သည်။

သူ့ ငယ်သူငယ်ချင်း လျန်စုန့် ပြောတဲ့အတိုင်း ပြောရရင် သူက သူ့ရဲ့ ကြည့်ကောင်းတဲ့ ရုပ်ရည်ကို ဖြုန်းတီးနေတဲ့သူတဲ့။

သူက သက်ပြင်းချလိုက်ရင်း သူ အမြဲတမ်း ကြောက်နေမိမှန်း ဝန်ခံမိသည်။ ချီရွှင့်ကို ဖွင့်ပြောကြသည့်သူ အများစုက ရက်ရက်စက်စက် ကျရှုံးသွားခဲ့ကြ၍ သူ့ကို လိုက်ဖို့က တော်တော်ခက်လှသည်။

ပိုင်ရှီးက သူဖွင့်ပြောလည်း ဘာမှရမလာနိုင်လောက်ဟု ခံစားမိလေသည်။ သူက နောက်ဆုံးမှ ချီရွှင့်၏ ဘဝထဲ နေရာတစ်နေရာ ရလာခဲ့ခြင်းဖြစ်သည်။ ဘယ်လိုလုပ်ပြီး ဒီဆက်ဆံရေးကို အလွယ်တကူ လောင်းကြေးထပ်နိုင်ရမှာလဲ။

ကားရပ်မည့် နေရာရှာနေသည့်အချိန် ပိုင်ရှီးက သူ့ဘဝအောင်မြင်ပြီး ကောင်းကောင်း လက်ထပ်ခွင့်ရဖို့ ဘုရားတွင် ဆုတောင်းသင့်လား တွေးမိသည်။ သူရုံးက အမျိုးသမီးတစ်ယောက်က တော်တော်လေး ထိရောက်မှုရှိသည်ဟု ပြောသံကြားခဲ့သည်။ အရှင်ဘုရားက သူ့ကို သနားသွားပြီး သူ့ဆန္ဒကို ကြင်ကြင်နာနာ ဖြည့်ဆည်းပေးနိုင်လောက်သည်။

သူက စဥ်းစားရင်း မသိလိုက်စွာ အလိုလိုပြုံးမိသွားသည်။ ရက်စက်သည့်အရာ ဖြစ်နေလျှင်လည်း စိတ်ကူးယဥ်ရသည်က ပျော်စရာကောင်းလေသည်။ ကိုယ့်လွတ်လပ်ခွင့်နှင့်ကိုယ် ဖြစ်ပြီး မည်သည့်ဥပဒေမှ ချိုးဖောက်မနေပေ။

သူသတိမထားမိသည့် အချိန်မှာပင် သူ့ဘက်က မိုးကောင်းကင်ကို ဆုမတောင်းခဲ့သော်လည်း သူ့အချစ်က နက်ရှိုင်း၍ထင် ကောင်းကင်ဘုံက သူ့ကို ကောင်းချီးပေးခဲ့လေသည်။

နောက်ငါးနာရီအတွင်း သူ့ဆန္ဒပြည့်ဝသွားခဲ့ရသည်။

ချီရွှင့်နှင့် ညစာအတူတူ စားပြီးနောက် သူက ချီရွှင့်အိမ်ကို ဘောလုံးပွဲအတူတူကြည့်ရန် သွားခဲ့သည်။ ပွဲက ဘယ်ဘက်က နိုင်နိုင်ရှုံးရှုံး ကိစ္စမရှိပေ။ အရေးကြီးသည့်အရာက သူက အရက်သောက်များပြီး ခြောက်နှစ်ကျော် သဘောကျခဲ့ရသည့်သူနှင့် အိပ်မိသွားခဲ့လေသည်။

ပိုင်ရှီးက မှုန်ဝါးဝါးနှင့် အိပ်ယာနိုးလာခဲ့သည်။ အခန်းက မီးရောင်မှိန်နေ၍ ဘာဖြစ်ခဲ့လဲ သိရဖို့ အချိန်ယူလိုက်ရသည်။ သူမျက်လုံးဖွင့်လိုက်သည်နှင့် သူ့ရှေ့က မီးခိုးရောင်နံရံကြီးကို တွေ့လိုက်ရသည်။ ဖန်မီးအိမ်များရှိနေပြီး သစ်သားဗီရိုပေါ်တွင်လည်း အပြာရောင်မှန်များနှင့် အလှဆင်ထားသည်။

သူက မျက်တောင်ပုတ်ခတ်ပုတ်ခတ် လုပ်နေရင်း နည်းနည်း ခေါင်းကိုက်ချင်လာသည်။ သို့သော်လည်း ဗီရိုပေါ်အလှဆင်ထားသည့် ပစ္စည်းက သူ ချီရွှင့်ကို လက်ဆောင်ပေးခဲ့သည့် ပစ္စည်းမှန်း အမှတ်ရသွားသည်။

သူက ချီရွှင့်အခန်းထဲမှာပဲ။

သူ နားလည်သွားသည့်အချိန် ချက်ချင်း ခေါင်းထဲ ကြည်သွားရသည်။

သူက ကုတင်ပေါ်က ထထိုင်လိုက်ပြီး အကျယ်ကြီး အသက်ရှူထုတ်မိ၏။ သူ့ခါးကြွက်သားများကို မလှုပ်နိုင်သလို မပြောအပ်သည့်နေရာကလည်း နာကျင်နေသည့်အပြင် ပေါင်များကလည်း...

အိပ်ရာပေါ်တွင် သူတစ်ယောက်တည်းသာ ရှိမှန်း တွေ့သွားသောအခါ သူ့မျက်နှာက ဖြူဖျော့သွားရသည်။

သူက မနေ့ညက အဖြစ်အပျက်ကို ထိတ်ထိတ်ပျာပျာ ပြန်စဥ်းစားမိသည်။ သူက ချီရွှင့်နှင့် ညစာအတူစားခဲ့ပြီး ချီရွှင့်အိမ်ကိုလာ၍ ဘောလုံးပွဲအတူတူ ကြည့်ခဲ့သည်ကိုသာ မသဲမကွဲ မှတ်မိတော့သည်။ ပွဲကြည့်နေရင်း သူတို့က သောက်ခဲ့သော်လည်း အစပိုင်းက နည်းနည်းသာ သောက်ခဲ့သည်။ သို့သော်လည်း ကောလိပ်တုန်းက အကြောင်းများ ပြောကြရင်း တစ်စတစ်စ အသောက်များသွားသောအခါ...

သူက အရက်၏ လွှမ်းမိုးမှုအောက် ရောက်နေရင်း ချီရွှင့်ကို ဖက်ထားခဲ့ပုံပင်။

ထိုနေရာအရောက် သူ့မှတ်ဥာဏ်က ပြတ်တိပြတ်တောင်း အဆုံးသတ်သွားလေသည်။

သူက နောက်ပိုင်း ဘာဖြစ်ခဲ့လဲ မမှတ်မိနိုင်တော့ပေ။ သူ့မှတ်ဥာဏ်များ ပျက်ပြယ်သွား၍ သူက ယခုအခြေအနေထိ ဖြစ်ခဲ့သည့်အရာကို လုံးဝ အစရှာမရဖြစ်သွားခဲ့သည်။

သို့သော်လည်း မှတ်မိခြင်း မမှတ်မိခြင်းက အရေးကြီးသည် မဟုတ်။ သူက စောင်ထဲမှ ထွက်လိုက်ရာ သူ့လည်ပင်းရှိ ကိုက်ရာများနှင့် ခါးက လက်ရာများကို တွေ့လိုက်ရသည်။ မနေ့ညက ဘာဖြစ်ခဲ့မှန်း အရွယ်ရောက်ပြီးသူတိုင်း ခန့်မှန်းနိုင်သည်။

သူက အရက်မူးပြီး ချီရွှင့်နှင့် အိပ်ခဲ့မိသည်။

သူက မနေ့ညက သူဘာလုပ်ခဲ့မိလဲ မသိသော်လည်း ချီရွှင့်လို ထိန်းထိန်းသိမ်းသိမ်း နေတတ်သည့်သူမျိုးက သူ့ဘက်က စပြီး မလုပ်လောက်ဟု တွေးမိသည်။

သူကပဲ စိတ်ရူးပေါက်ပြီး မူးနေသည့် ချီရွှင့်ကို တွန်းပို့ခဲ့ခြင်း ဖြစ်လောက်သည်။ ပြီးနောက် သူတို့က အိပ်ရာပေါ် ရောက်သွားခဲ့ကြပုံပင်။

ပိုင်ရှီးက အိပ်ရာပေါ် တွေတွေကြီး ထိုင်နေမိသည်။ သူ့ဆံပင်များက ရှုပ်ပွနေသည်။ စက္ကန့်အနည်းငယ် ကြာပြီးနောက် သူက အော်လိုက်ရင်း မျက်နှာကို လက်နှင့်အုပ်ထားမိသည်။

ဘယ်လိုလုပ်ပြီး ဒီလို ဖြစ်သွားရတာလဲ။

သူက အိပ်ချင်ယောင်ဆောင်သင့်လား ချီရွှင့်မရှိခိုက် ထွက်ပြေးသွားသင့်လား စဥ်းစားနေမိသည်။

သူက ဆုံးဖြတ်ချက်မချနိုင်ခင် အိပ်ခန်းနှင့်တွဲလျက်ပါသည့် ရေချိုးခန်းတံခါးက ပွင့်လာသည်။ ချီရွှင့်က ခေါင်းသုတ်ရင်း ထွက်လာချိန် အိပ်ရာပေါ် ထိုင်နေသည့် ပိုင်ရှီးကို တွေ့လိုက်ရသည်။

ချီရွှင့်က အနက်ရောင် ညအိပ်ဝတ်စုံကို ဝတ်ထားပြီး သူ့အပေါ်ပိုင်းက ဘာမှမကွယ်ထား၍ လှပသည့် ကြွက်သားအမြှောင်းကြီးများကို မြင်နေရသည်။ သူ့ရင်ဘတ်တွင် ကုတ်ရာများရှိနေကာ ပုခုံးရိုးတွင်လည်း သွားရာများ ထင်ထင်ရှားရှား ရှိနေသည်။

ပိုင်ရှီး၏ နှလုံးသားက ပြင်းပြင်းထန်ထန် ခုန်သွားရင်း တွင်းတူးပြီး ပြေးပုန်းချင်စိတ်ပေါက်လာမိသည်။ ချီရွှင့်ကိုယ်ပေါ် အမှတ်အသားများ ချန်ခဲ့သည့် လက်သည်က သူဖြစ်နေမှန်း အကြာကြီး စဥ်းစားနေဖို့မလိုချေ။

ချီရွှင့်က အပြင်ထွက်မသွားပဲ ရေချိုးနေခဲ့လိမ့်မည်ဟု သူမထင်ထားခဲ့ပေ။

ကောင်းရော...အခု အိပ်ချင်ယောင်ဆောင်လို့လည်း မရတော့ဘူး...ထွက်ပြေးလို့လည်း မရတော့ဘူး...

သူက ချီရွှင့် အနားကပ်လာပြီး သူဘေးလာထိုင်သည်ကို ကြည့်နေရုံသာ တတ်နိုင်သည်။

ချီရွှင့်လာထိုင်သောအခါ ချီရွှင့်နှုတ်ခမ်းက အကိုက်ခံထားရသလို ပေါက်နေမှန်း သတိထားမိသွားသည်။

ပိုင်ရှီးက ပြောစရာမရှိဖြစ်သွားရသည်။ သူက စောင်ကို အနီးဆုံးထိ ဆွဲယူလိုက်ရင်း မနက်စောစော ဘာပြောရမလဲမသိ ဖြစ်နေမိသည်။

သူ မပြောနိုင်ခင် ချီရွှင့်က စပြောလာသည်

" မင်းနိုးနေပြီဆိုတော့ နာနေသေးလား..."

သူက ပိုင်ရှီးကို အကဲခတ်လိုက်ရင်း ထပ်ပြောလာသည် " မနေ့ညကအတွက် ကိုယ်တောင်းပန်ပါတယ်...အရာအားလုံးက ရုတ်တရက် ဖြစ်သွားတော့ အကာအကွယ် မသုံးလိုက်ရဘူး...မင်း ရပ်နိုင်ရဲ့လား...ရေချိုးခန်းထဲ ကိုယ်သယ်သွားပေးဖို့ လိုလား..."

ပိုင်ရှီးက သူ့မေးခွန်းကြောင့် ချောင်းထဆိုးမိသွားသည်။ သူက ချီရွှင့်ကို အလန့်တကြားကြည့်လိုက်ရင်း သူက "အကာအကွယ် မသုံးလိုက်ရဘူး" ဆိုသည့် စကားကို ဘယ်လိုများ တည့်တိုးပြောနိုင်ရလဲ စဥ်းစားမရဖြစ်သွားရသည်။

ချီရွှင့်က သူ့ကို တည်တည်ငြိမ်ငြိမ် ကြည့်နေရင်း သယ်သွားပေးချင်ဟန် လက်ဆန့်လာသည်။

ပိုင်ရှီးက အလင်းလိုအရှိန်နှင့် နောက်ပြန်ဆုတ်လိုက်ရင်း အစော်ကားခံရမှာစိုးသည့် အပျိုဖြန်းလို လက်ကာပြီး တားလာသည် " မလိုပါဘူး..."

သူက စိတ်လှုပ်ရှားနေ၍ အသံကပါ အနည်းငယ် အက်သွားသည် " ကျွန်တော့်ဘာသာ သွားနိုင်ပါတယ်..."

ချီရွှင့်က ရပ်သွားသည်။

သူက ပိုင်ရှီး၏ ထိတ်ထိတ်လန့်လန့် အမူအရာကို သတိထားကြည့်လိုက်ရင်း သံသယဝင်လာသလို မျက်ခုံးပင့်မိသွားသော်လည်း လက်ပြန်ရုတ်လိုက်ပြီး မတ်မတ်ပြန်ထိုင်လိုက်သည်။

တိတ်ဆိတ်မှုက မွန်းကြပ်စရာကောင်းပြီး လေထုကို လေးလံစေသည်။

စက္ကန့်အနည်းငယ် ကြာပြီးနောက် ချီရွှင့်က စကားထပ်ပြောလာသည် " ကောင်းပြီလေ... မင်း ရေချိုးခန်းကို လွတ်လွတ်လပ်လပ် သုံးလို့ရတယ်...ဗီရိုထဲမှာ ရေချိုးခန်းဝတ်စုံ ရှိတယ်...ကိုယ် မနက်စာ ပြင်ထားလိုက်မယ်....လိုတာရှိရင် ခေါ်လိုက်ပါ..."

ပြောပြီးသည်နှင့် သူက ထွက်သွားရင်း ပိုင်ရှီးကို အိပ်ခန်းထဲတွင် တစ်ယောက်တည်း ချန်ထားခဲ့သည်။

ပိုင်ရှီးက အိပ်ရာထက် တစ်ခဏမျှ ငြိမ်နေရင်း အဖြစ်အပျက်ကို လိုက်မမှီနိုင်တော့ပေ။

ချီရွှင့်က စိတ်မဆိုးဘူးဆိုရင် အနည်းဆုံး ထူးမခြားသလိုပုံစံနဲ့ ရှိနေရမှာ...မဟုတ်လည်း ပြန်ရုတ်သိမ်းသွားရမှာ။ သူက အသန့်ကြိုက်လွန်းလို့ သူများတွေ သူ့ကို ထိတာလည်း မကြိုက်လောက်ဘူးလေ...။ သူ့ရဲ့ သဘောကျရတဲ့သူ ဆိုရင်တောင် သူ့လက်ကို ရေစိုဝတ်နဲ့ သုတ်ထားရမယ်။

ယခုဆို ပိုင်ရှီးက ချီရွှင့်နှင့် မနေ့ညက အဖြစ်အပျက်ကို ဆက်စပ်ကြည့်လို့ရသွားပြီ ဖြစ်သည်။ ချီရွှင့်က ပုံမှန်အတိုင်း ပြုမူနေပြီး သူ အိပ်ရာထဲက ထွက်နိုင်လားကို ရာသီဥတုအကြောင်း မေးသလို ပေါ့ပေါ့ပါးပါး မေးသွားသေးသည်။

သူက နားထင်ကို နှိပ်လိုက်ရင်း ဘယ်သူက ထူးဆန်းနေမှန်း မသိတော့ပေ။ သူလား....ချီရွှင့်လား...

အိပ်ရာပေါ် ခဏထိုင်နေပြီးနောက် တောင့်တင်းနေသော ခါးကို မြောက်ကာ အိပ်ရာပေါ်က ဂရုတစိုက် ဆင်းရင်း ရေချိုးခန်းဆီ ဖြေးဖြေးလေး ဝင်သွားမိသည်။

သူက ရေကန်ထဲ စိမ်လိုက်ရင်း ရေနွေးနွေးလေးနှင့် သက်သာအောင် လုပ်နေလိုက်သည်။

သူက မျက်လုံးပိတ်လိုက်ရင်း ခေါင်းမော့ကာ ပျော်စရာကောင်းသည့် အတွေးများ တွေးနေမိသည်။ သူတို့နှစ်ယောက်၏ မိတ်ဆွေဆက်ဆံရေးက ခိုင်မာသည့်အပေါ် ဝမ်းသာနေမိခြင်းလည်း ဖြစ်နိုင်သည်။ ထိုကိစ္စဖြစ်ခဲ့သည်ကိုပင် ချီရွှင့်က သူ့အပေါ် ဆိုးဆိုးဝါးဝါး မဆက်ဆံလာခဲ့ပေ။

သို့သော်လည်း သူက မနေ့ကအချိန်ကို ပြန်သွားလို့ရနိုင်ခဲ့လျှင် ထိုပုလင်းကို လုံးဝ ထိခဲ့မိမှာမဟုတ်ပေ။

🦋🦋