MM Story Teller

Chapter 2

Viewers 76

🦋Chapter 2

- ကိုယ်နဲ့ တွဲကြည့်မလား...

ရေကြာကြာလေး ချိုးလိုက်ပြီးနောက် ပိုင်ရှီးက ချီရွှင့်၏ ရေချိုးဝတ်စုံကို ဝတ်ကာ မှန်ရှေ့သွားရပ်ရင်း ခေါင်းသုတ်လိုက်သည်။ သိပ်မလုံ၍ သူ့လည်ပင်းနှင့် ရင်ဘတ်က ပေါ်နေသည်။

ပြောရလျှင် သူက ငယ်ရွယ်သေးသည့် အမျိုးသားတစ်ယောက် ဖြစ်သည်။ နီညိုရောင် မတိုမရှည်ဆံပင်နှင့် အသားဖြူပြီး မျက်နှာအစိတ်အပိုင်းများက ထင်ရှားကာ မျက်လုံးဝိုင်းဝိုင်းတောက်တောက်လေးများ ရှိသည်။ ပါးချိုင့်လေးနှစ်ဖက်က ပြုံးလိုက်တိုင်း ပေါ်လာ၍ ချစ်မွှေးပါသည့်သူလေး ဖြစ်သည်။

သူက ဤနှစ်များအတွင်း အမျိုးသားရော အမျိုးသမီးရော တွဲခဲ့သည်။ သူက ချီရွှင့်ဆိုသည့် သစ်ပင်ကြီးတွင်သာ တွယ်ကပ်မနေခဲ့ပေ။ အနည်းဆုံး ခုနစ်ကြိမ် ရှစ်ကြိမ်လောက် ရည်းစားထားခဲ့ဖူးလေသည်။

သို့သော်လည်း သူဘယ်လောက်ပဲ တွဲခဲ့ပါစေ တစ်ယောက်သောသူထက် ပိုပြီး သဘောမကျနိုင်ခဲ့ပေ။

သူက ဆံပင်အခြောက်ခံစက်ကို ချထားလိုက်ရင်း မှန်ရှေ့တွင် တော်တော်ကြာအောင် ရပ်နေမိသည်။ သူက အပြင်ထွက်သွားလိုက်ရင်း သူ့စိတ်ကို ထပ်ပြီး နှောင့်နှေးမနေဖို့ တွေးမိသည်။ သူ့ဘက်က ရင်ဆိုင်လိုက်ရုံသာ ရှိသည်။

မနက်ခင်းအလင်းရောင်တွင် ချီရွှင့်၏ ခန္ဓာကိုယ်တစ်ခုလုံးက နေခြည်နုနုတို့ လွှမ်းခြုံနေပြီး သူ၏ ခပ်ချောချော မျက်နှာက ပျင်းတိပျင်းရွဲ ကျားသစ်တစ်ကောင်လို စိတ်ကျေနပ်သွားပြီးနောက်ပိုင်း နူးညံ့မှုတို့ရှိနေသည်။

သူက ညစာစားခန်းထဲ ဝင်သွားချိန် ချီရွှင့်က မီးခိုးရောင် ပေါ့ပေါ့ပါးပါး ဝတ်စုံကို ဝတ်ထားပြီး စားပွဲတွင် ထိုင်စောင့်နေ၏။ မနက်ခင်းနေရောင်ခြည်က သူ၏ အပြစ်ကင်းသည့် ပယင်းရောင်မျက်လုံးများထက် ဖြာကျနေသည်။ သူ၏ မပြုံးမရယ်ပုံစံက အထက်တန်းဆင့် တရားသူကြီးတစ်ယောက်နှင့်ပင် နှိုင်းယှဥ်လို့ရလေသည်။

စားပွဲပေါ်တွင် ဟင်းခတ်အမွှေးအကြိုင်များပါသည့် ယာဂုဖြူဖြူလေး နှစ်ခွက်နှင့် အရန်ဟင်းများ စုံလင်စွာ ချထားလေသည်။ ပိုင်ရှီးက သူ့အကြိုက်ဆုံး ကန်တုံစားသောက်ဆိုင်မှ မှာထားမှန်း သတိထားမိသွားသည်။ သူက ထိုဆိုင်မှ ဟင်းလျာများက အားပြည့်စေသည့် အရသာရှိ၍ သဘောကျခြင်းဖြစ်သည်။

ပိုင်ရှီးက ချီရွှင့်နှင့် မျက်နှာချင်းဆိုင်ထိုင်ခုံတွင် ဝင်ထိုင်လိုက်သည်။ ထိုင်ခုံတွင် နောက်ခံကူရှင်လေးများပါ၍ သူ့အတွက် စဥ်းစားထားပေးပုံရသည်။

" အရင်ဆုံး မနက်စာ စားလိုက်ဦး..." ချီရွှင့်က သူ့ကို ကြည့်လာသည် " မဟုတ်ရင် အားမရှိပဲ နေလိမ့်မယ်..."

ပိုင်ရှီးက သူပြောသည်ကို လက်ခံလိုက်ပြီး ယာဂုကို ဇွန်းအပြည့် ခပ်လိုက်သည်။

သူက နည်းနည်းလေးမှ သတ္တိမရှိပေ။ ချီရွှင့်ရှေ့တွင် သူ့ဘက်စပြီး စကားစမပြောဖူး၍ အဆုံးအဖြတ်ကို စောင့်နေရုံသာရှိသည်။

ပိုင်ရှီးက စားစရာအားလုံး စားပြီးသွားသောအခါ ချီရွှင့်က ကိုင်ထားသည့်တူကို ချလိုက်ပြီး နှုတ်ခမ်းထောင့်ကို လက်ကိုင်ပဝါနှင့် သုတ်လိုက်သည်။

သူက မေးလာသည် " မနေ့ညက ကိစ္စနဲ့ပတ်သက်ပြီး မင်းကိုယ့်ကို ပြောချင်တာ ရှိလား..."

လာပြီ။ ပိုင်ရှီး ကြောက်နေတဲ့ ခေါင်းစဥ်ကြီး။

ချီရွှင့်က နောက်ဆုံးတွင် မေးလာခဲ့ပြီ။

ပိုင်ရှီးက ဇွန်းကို ချထားလိုက်ပြီး သူ့နှလုံးက ရင်ဝကို စုံကန်၍ အရှိန်ပြင်းပြင်းခုန်နေသည်။ သူက ချီရွှင့်မျက်လုံးကို မကြည့်ရဲ၍ စားပွဲခုံကို ငုံ့ကြည့်နေသည်။ စဥ်းစားရင်း သူက အဖြေထွက်အောင် ရုန်းကန်နေရသည်။

“မနေ့ညက ကိစ္စက မတော်တဆ ဖြစ်သွားတာပါ...ကျွန်တော်လည်း သောက်တာများသွားသလို ခင်ဗျားလည်း များသွားတယ်လေ...ဒီကိစ္စကို ဒီအတိုင်း ကျော်သွားလိုက်ရအောင်လား..." သူက နှုတ်ခမ်းကိုက်လိုက်ရင်း နောက်တစ်ကြောင်းကို တိုးတိုးလေး ပြောလိုက်သည်

" မနေ့ညက ဘာမှမဖြစ်ခဲ့သလို ဟန်ဆောင်လိုက်ကြတာပေါ့..."

ထိုကိစ္စက တစ်ဖက်သတ်ဆန်မှန်း သိသော်လည်း သူက ထိုကိစ္စကို မျက်ကွယ်ပြုနိုင်ဖို့ မျှော်လင့်မိသည်။ သူတို့နှစ်ယောက် အေးအေးချမ်းချမ်း နေနိုင်ဖို့ ချီရွှင့် ထိုကိစ္စကို မေ့ပေးစေချင်မိသည်။

ချီရွှင့်က ထူးဆန်းသလို မျက်ခုံးပင့်မိသွားသည်။

သူက ပိုင်ရှီးမှာ အမြဲတမ်း နာနာခံခံရှိမှန်း သိထား၍ ယခုလောက်ထိဖြစ်မည်ဟု ထင်မထားခဲ့ပေ။

သူ့မျက်လုံးများက ကောင်ငယ်လေး၏ လည်တိုင်အနီးရှိ အနမ်းရာများကို ကြည့်မိသည်။ မနေ့ညက သူ အမှတ်အသားပေးခဲ့သည့်အရာများ ဖြစ်နေသည်။

သူနှင့်ပိုင်ရှီးတို့ နှစ်ယောက်လုံး မူးနေခဲ့ကြသော်လည်း သူက ရှင်းရှင်းလင်းလင်း ဖြစ်နေ၏။ သူက ယနေ့မနက် နိုးလာသည့်အချိန် အဖြစ်အပျက်တော်တော်များများကို မှတ်မိနေသေးသည်။

ထိုကိစ္စက အကျပ်မကိုင်လျှင်တောင် နူးနူးညံ့ညံ့ ပြောနေလို့မရပေ။ သူက နူးညံ့မှုမရှိပဲ ကြမ်းတမ်းခဲ့မှန်း သိသည်။ သူ့ကို တာဝန်ယူခိုင်းဖို့ ပိုင်ရှီးဘက်က မေးပိုင်ခွင့်ရှိလေသည်။

ဤကလေးက ဘာမှမဖြစ်ခဲ့သလို ဟန်ဆောင်ချင်နေသေးပေမယ့်လည်း...

သူက ပိုင်ရှီးကို ကူကယ်ရာမဲ့စွာ ကြည့်မိသည်။

“ပိုင်ရှီး....အဲ့ဒီလို ခေါင်းငုံ့မထားနဲ့....ကိုယ့်ကိုကြည့်..." သူက ပြောလိုက်သည်။

ပိုင်ရှီးက နာမည်ခေါ်ခံလိုက်ရသည့် ကျောင်းသားလေးလို တွန့်ဆုတ်တွန့်ဆုတ် ခေါင်းမော့လာသည်။

ချီရွှင့်က ပိုင်ရှီးနှင့် မျက်လုံးချင်းဆုံလိုက်သည် " မနေ့ညက တကယ်ကို မတော်တဆဖြစ်သွားတာ...ကိုယ်တို့နှစ်ယောက်လုံးကလည်း မူးနေခဲ့တာဆိုပေမယ့် ကိုယ် တာဝန်မယူဘဲ ရှောင်နေမှာ မဟုတ်ဘူး..."

ပိုင်ရှီးက ထိုစကား ကြားသောအခါ ခေါင်းအမြန်ခါယမ်းလိုက်ရင်း သူက ဤကိစ္စအတွက် ပိုပြီး တာဝန်ရှိကြောင်း ပြောချင်မိသည်။ သူ ချီရွှင့်၏ ရုပ်ရည်အောက် ပျော်ဝင်နေရသူဖြစ်၍ သူ့ကို တာဝန်ယူပေးဖို့ မလိုပေ။

သို့သော်လည်း သူမပြောနိုင်ခင် ချီရွှင့်က သူ့လိပ်ပြာလွှင့်သွားစေနိုင်သည့် ဗုံးကို ပစ်ချလာသည်။

" မင်း မမှတ်မိနိုင်လောက်ပေမယ့် မင်း မနေ့ညက ကိုယ့်ကို ဖက်ထားတုန်းက ကိုယ့်ကိုချစ်တယ်လို့ ပြောခဲ့တာ...."

ချီရွှင့်က ထိုစကားပြောသောအခါ အရမ်းကို တည်ငြိမ်နေသည်။ သူ့အသံတွင် သံသယများလည်းမပါသလို မနှစ်မြို့သလို ပုံစံလည်း မရှိပေ။

ပိုင်ရှီးက လုံးဝ အံ့အားသင့်သွားရသည်။ သူ့နှုတ်ခမ်းများက အနည်းငယ်ဟသွားပြီး မျက်လုံးအစုံ ပြူးကျယ်သွားရသည်။

သူတကယ်ကို မမှတ်မိခဲ့တာပဲ။ အဲ့ဒီအချိန်တုန်းက သူ့သာ ဆင်ခြင်နိုင်သေးရင် အဲ့ဒီစကားတွေ မပြောမိအောင်လို့ မသောက်ပဲ နေခဲ့ရမှာ။

ဘာလို့ သူ့ရဲ့ နက်ရှိုင်းပြီး မှောင်မိုက်တဲ့ အတွေးတွေကို ဒီလိုမျိုး လွယ်လွယ်နဲ့ ပြောထွက်နိုင်သွားရတာလဲ။

အရက်က တကယ်ကို အန္တရာယ်ရှိတယ်။ ကျောက်ကပ်နဲ့ အစာအိမ်အတွက်တင်မကဘူး....ဦးနှောက်အတွက်ပါ အန္တရာယ်ရှိတယ်။

သူက အကြောင်းပြချက်ပေးရန် ရေရွတ်လိုက်သည် " မဟုတ်ပါဘူး...အဲ့ဒါက...ကျွန်တော် မူးနေ...."

သို့သော်လည်း ချီရွှင့်က သူ့ကို လိမ်ခွင့်မပေးပဲ ထပ်ပြောလာသည် " မင်းက အထက်တန်းကတည်းက ခြောက်နှစ်လောက်ထိ ကိုယ့်ကို ကြိုက်လာတာလို့ ပြောခဲ့တာ...ကိုယ်က ဘာလို့ မင်းခံစားချက်တွေကို သတိမထားမိခဲ့ရတာလဲလို့လည်း ပြောသေးတယ်..." ပြောနေရင်း ချီရွှင့်က အကြည့်မလွှဲသေးပေ။

" ဆောရီးပါ...ကိုယ် တကယ် သတိမထားမိခဲ့ဘူး..."

ပိုင်ရှီးက ကျင်းတစ်ကျင်းတူးပြီး မြုပ်နေရမလား တွေးနေမိတော့သည်။

သူ့ကိုယ်သူ ဖုံးဖို့အတွက် သစ်ရွက်လေးတစ်ရွက်တောင် သူ့မှာ ရှိမနေဘူး။ ချီရွှင့်ကို ကြိုက်နေတာက ရှက်စရာ မဟုတ်ပေမယ့် သူ့ရဲ့ လျှို့ဝှက်ချက်တွေအားလုံးကို နေရောင်ထဲ ချပြနေသလိုမျိုး စက္ကူပေါ် အပေါက်ဖြစ်အောင် ထိုးဖောက်နေတဲ့ ချီရွှင့်ကြောင့် သိက္ခာကျမိတယ်။

“ပိုင်ရှီး...မင်းကိုယ့်ကို တကယ် သဘောကျတာလား...ကိုယ်နဲ့ ဆက်ဆံရေးတစ်ခု တည်ဆောက်ချင်တဲ့ ပုံစံမျိုးလား..."

ထိုမေးခွန်းမျိုး အမေးခံရသည့် ပိုင်ရှီးအတွက်က ရင်နာစရာကောင်းမိသည်။

သူက ချီရွှင့်ကို ကြည့်လိုက်ရင်း နှုတ်ခမ်းတင်းတင်းစေ့မိသည်။ သူကသာ ရှက်ပြီး နေရခက်နေသော်လည်း ချီရွှင့်က အစကနေအဆုံးထိ ဘာအမူအရာမှ ပြမလာချေ။ သူက ဒေါသထွက်ခြင်းမရှိ စိတ်မသက်မသာဖြစ်နေခြင်းလည်း မရှိပဲ အေးအေးလူလူဖြစ်နေသည်။

သို့သော်လည်း ထို့အတွက်ကြောင့် သူပိုပြီး ရင်နာမိသည်။

ပိုင်ရှီးက တိတ်ဆိတ်နေပြီးနောက် ခေါင်းညိမ့်ပြလိုက်သည်။

ဒီအခြေအနေထိ ရောက်လာမှတော့ သူ့မှာ ဖုံးကွယ်စရာ မရှိတော့ပေ။ ချီရွှင့်က သူ့ကို ငြင်းခွင့်သေးသေးလေးတောင် မပေးခဲ့ဘူး။

" ဟုတ်တယ်...ကျွန်တော် ခင်ဗျားကို သဘောကျတယ်...."

ပိုင်ရှီးက အင်္ကျီစကို တင်းအောင်ကိုင်ထားရင်း ရုတ်တရက် ဖြေလျော့လိုက်သည်။ သူက ဝမ်းနည်းသွားသော်လည်း တစ်ချိန်တည်းမှာပင် စိတ်အေးသွားသလို ခံစားမိသည်။

နှစ်ပေါင်းများစွာကြာပြီးနောက် သူက ထိန်းသိမ်းလာခဲ့ရသည့်အရာကို ချပြနိုင်သွားပြီ ဖြစ်သည်။

သို့သော်လည်း ခြောက်နှစ်ဆိုသည့်အချိန်က ကြာနေပြီဖြစ်၍ သူဘယ်ကနေ စရမလဲ မသိတော့ပေ။

သူက အားတင်းပြုံးလိုက်ရင်း ပြောလာသည်

" သေချာပေါက် ခင်ဗျားနဲ့အတူ ရှိချင်မိတယ်...အဲ့ဒီကိစ္စနဲ့ ပတ်သတ်ပြီး ခဏခဏ အိပ်မက်မက်ခဲ့ရတာ...ခင်ဗျားကို ခြောက်နှစ်ကြာ သဘောကျလာခဲ့ရတယ်ဆိုတာ အမှန်ပါ....အထက်တန်းကတည်းက ခင်ဗျားကို ကြိုက်လာခဲ့တာ...ကျွန်တော် Sတက္ကသိုလ်ကို လျှောက်ပြီး တက်ခဲ့တာလည်း ခင်ဗျားကြောင့်ပဲ...ခင်ဗျားရဲ့နားမှာ နေချင်ခဲ့လို့လေ...ကျွန်တော် ခင်ဗျားကို တမင်သက်သက် မိတ်ဆွေဖွဲ့ခဲ့ပေမယ့် ခင်ဗျား လက်မခံနိုင်လောက်မှန်း သိနေလို့ နောက်တစ်ဆင့်တက်ဖို့ တစ်ခါမှ မစဥ်းစားခဲ့ဘူး....တစ်နေ့ကျရင် ခင်ဗျားကို သဘောမကျလောက်တော့ဘူးလို့ အကြာကြီး စဥ်းစားခဲ့ပေမယ့် အဲ့ဒီနေ့က ဘယ်အချိန်မှ ရောက်လာမလဲ ကျွန်တော်ကိုယ်တိုင်တောင် မသိဘူး...."

သူက နှုတ်ခမ်းတင်းတင်းစေ့လိုက်ရင်း ချီရွှင့်နှင့် မျက်လုံးချင်းဆုံအောင် အားခဲလိုက်သည်

" တောင်းပန်ပါတယ်...အခုလိုတွေ ဖြစ်လာဖို့ မရည်ရွယ်ခဲ့ပါဘူး...ကျွန်တော်...ကျွန်တော်က ဒီလို နည်းနဲ့လည်း ခင်ဗျားကို အရမယူချင်ခဲ့ဘူး..."

သူက ထိုစကားမျိုး ပြောဖို့ ရှက်နေသော်လည်း တစ်ဖက်လူက သူ၏ စိတ်ရင်းကို သိထားရမည်။

သူ တကယ်ကို မရည်ရွယ်ခဲ့သော်လည်း ချီရွှင့် သူ့ကို နားလည်မှုလွဲသွားပြီး တမင်သက်သက် အရက်မူးအောင်လုပ်ခဲ့သည်ဟု တွေးနေမှာ စိုးမိသည်။ သူက ထိုမျက်နှာချောချောထက် စိတ်ပျက်သလို အကြည့်မျိုး မြင်ရမှာကြောက်၍ စားပွဲခုံကိုသာ ကြည့်နေမိသည်။

ကံကောင်း၍ ချီရွှင့်က အမှန်တရားကို ကြားလိုက်ရချိန် အံ့သြသွားပုံပင်။

ပိုင်ရှီးက နှာခေါင်းရှုံ့လိုက်ရင်း ငိုချင်စိတ်ကို ထိန်းထားရသည်။ သူ့လျှို့ဝှက်ချက်က တစ်နေ့ ဖော်ထုတ်ခံရမည်မှန်း သိသော်လည်း ကြည်လင်သည့် ကောင်ကင်ကြီးနှင့် ပင်လယ်ပြာပြာတို့ရှိနေသည့် ရိုမန့်တစ်ဆန်ဆန် နေရာမျိုးမှာ ဖြစ်စေချင်မိသည်။ သူအငြင်းခံရမည်ဆိုလျှင်ပင် ကျေနပ်စရာကောင်းသည့် အဆုံးသတ်မျိုး ဖြစ်နေခဲ့လိမ့်မည်။

သူက တိုးတိုးလေး ပြောလာသည် " အခု ကျွန်တော့်ကို သဘောမကျတော့ဘူးလား..."

သူက "မုန်းသွားပြီလား" ဆိုသည့် စကားကို ခံနိုင်ရည်မရှိ၍ ပြောမထွက်နိုင်ခဲ့ပေ။

ချီရွှင့်က သူဘာကြောင့် ထိုမေးခွန်းမျိုး မေးလာရလဲ မသိဟန် ကြည့်လာသည်။

“မဟုတ်ပါဘူး..." သူက ခေါင်းယမ်းပြလာသည် " မင်းကိုယ့်ကို ကြိုက်တာ ဥပဒေကို ချိုးဖောက်နေတာမှ မဟုတ်တာ...."

ချီရွှင့်ပုံစံက အဖြေနှင့်တူနေ၍ ပိုင်ရှီးက ထိုစကားကြောင့် ရယ်မိမလို ဖြစ်သွားသည်။

သူက စားပွဲပေါ်က ရေခွက်ကို ကောက်ကိုင်လိုက်ရင်း သောက်လိုက်သည်။ သူ့လျှို့ဝှက်ချက်က ဖော်ထုတ်ခံလိုက်ရသော်လည်း ပိုပြီး စိတ်ငြိမ်လာမိသည်။

အဆိုးဆုံးမှ သူနဲ့ ချီရွှင့်တို့ မိတ်ဆွေ မဖြစ်နိုင်တာပဲ ရှိမှာပေါ့။

သူ ချီရွှင့်ကို ကြိုက်သွားခဲ့သည့် နေ့မှစ၍ စိတ်ပိုင်းဆိုင်ရာ ပြင်ဆင်ထားပြီးပြီ ဖြစ်သည်။ လူနည်းစုလောက်သာ သူတို့သဘောကျနေသည့်သူနှင့် ဆက်ဆံရေး တည်ဆောက်နိုင်ပြီး အများစုက ဝမ်းနည်းဖွယ် အဆုံးသတ်နှင့်သာ ပြီးသွားကြသည်။

အသည်းကွဲတာ ပျောက်ဖို့ တော်တော်လေးတော့ အချိန်ယူရဦးမှာပေါ့။

သူ့စိတ်က လေလွင့်နေပြီး အတွေးများက ရွေ့လျားနေသည်။ သူ စဥ်းစားလို့မပြီးသေးခင် ချီရွှင့်က သူ့ကို ထပ်ခေါ်လာသည်။

" ပိုင်ရှီး...."

သူက အသိစိတ်ပြန်ကပ်လာပြီး တစ်ဖက်လူ၏ အကြည့်များကို သတိထားမိသွားသည်။

အလင်းရောင်က ချီရွှင့်၏ ကိုယ်ကို နူးနူးညံ့ညံ့လေး တောက်ပစေသည်။ သူ၏ မျက်နှာအစိတ်အပိုင်းထင်းထင်းများက ပျင်းရိနေသည့်အရိပ်ရောင်တို့ ခိုဝင်နေသည်။ သူ စိတ်ကျေနပ်နေသည့်အချိန် နူးညံ့မှုတို့ ရှိနေသည်။

ရုတ်တရက် ချီရွှင့်က တည်တည်ငြိမ်ငြိမ် မေးလာသည် " မင်းကိုယ်နဲ့ ဆက်ဆံရေးတစ်ခု တည်ဆောက်ချင်လား...လက်ထပ်တဲ့အထိပေါ့...."

ခဏအကြာ ပိုင်ရှီးက သူ တစ်ခုခုကြားနေရသလို တွေးလိုက်မိသည်။

သူက ခေါင်းမူးသွားပြီး ယနေ့မနက် ကြုံလိုက်ရသည့် ကိစ္စက ကြီးလွန်း၍ စိတ်ကူးယဥ်အိပ်မက်များက အစစ်မှန်ဖြစ်လာသလား အောက်မေ့မိသည်။

သူက စဥ်းစား၍မရနိုင်စွာ မေးလာသည် " ခင်ဗျား တစ်ခုခု ပြောလိုက်တာလား..."

“အင်းလေ..." ချီရွှင့်က ထပ်ပြောပေးလာသည် " မင်း ကိုယ်နဲ့ တွဲကြည့်ချင်လားလို့ မေးနေတာ..."

ဧည့်ခန်းထဲ ခွပ်ခနဲ ကျိုးပဲ့သွားသည့်အသံ ထွက်လာသည်။

ပိုင်ရှီးလက်ထဲက ခွက်က မြေပြင်ပေါ် လွှတ်ကျပြီး အစိတ်စိတ်အမွှာမွှာ ကွဲအက်သွားသည်။ ရေများက သစ်သားကြမ်းခင်းပေါ် ပြန့်ကျဲပြီး စင်လာသည်။

သူက ပြင်းပြင်းထန်ထန် ချောင်းဆိုးလိုက်ပြီး မျက်နှာက နီရဲသွားရသည်။

လွန်ခဲ့သည့် ငါးစက္ကန့်က သူက ခါးသီးသည့် အဆုံးသတ်နှင့် ရင်ဆိုင်ရလိမ့်မည်ဟု ထင်ထားခဲ့သော်လည်း ယခု သူ့ရှေ့က မြင်ကွင်းက ထင်ထားသည်နှင့် ဆန့်ကျင်နေသည်။

ဒါက သူ အိပ်မက်မမက်မိလောက်အောင်ထိ ရယ်ချင်စရာကောင်းနေတာလေ။

🦋🦋

Prev Next