အပိုင်း ၁၉၉ ( Demon Sect Leader 1 )

နတ်ဆိုးဂိုဏ်းချုပ်

ငရဲတောင်တန်း၊ နတ်ဆိုးဂိုဏ်းဌာနချုပ်။

ငရဲတောင်တန်းဟာ ကြီးကျယ်ခမ်းနားလှသည်။ တောင်တန်း၏ ထိပ်အမြင့်ဆုံးနေရာတွင် မြူခိုးဝေတိမ်တိုက်များဖြင့် တစ်နှစ်ပတ်လုံး ဖုံးလွှမ်းနေသည်။ တောင်တန်းပေါ်တွင် မရေမတွက်နိုင်သော ရှေးဟောင်းသစ်ပင်များ ပေါက်ရောက်နေ၏။ သဘာဝရှုခင်းမှာ သူမတူထူးကဲစွာ ကောင်းမွန်လှပြီး ၎င်းဟာ ၎င်း၏နာမည် “ငရဲ” နှင့် လုံးဝ မလိုက်ဖက်လှချေ။ 

ဒါပေမယ့် ဘယ်သူက နတ်ဆိုးဂိုဏ်းဌာနချုပ်ကို တောင်ခြေရင်းမှာ နေခိုင်းလို့လဲ? ဤတောင်တန်းဟာလည်း “ငရဲတောင်တန်း” ဖြစ်လာခဲ့၏။ 

နတ်ဆိုးဂိုဏ်းမှာ သိုင်းလောကတွင် လူတိုင်း ကြားဖူးသည့် နတ်ဆိုးဂိုဏ်းတစ်ဂိုဏ်း ဖြစ်ပြီး ဤနေရာရှိလူများမှာ အမှန်တကယ်ပင် ကောင်းမွန်သည့်အရာများ မဟုတ်ကြချေ။

သိုင်းလောကမှာ သင်က ပြစ်မှုတစ်ခု ကျူးလွန်ခဲ့ပြီး သွားစရာနေရာ မရှိဘူးဆိုရင် သရဲတောင်တန်းကို သွားပြီး နတ်ဆိုးဂိုဏ်းမှာ ခိုလှုံလို့ရတယ်ဆိုတာ ဘယ်သူက မသိလို့လဲ? အချိန်ကြာလာသည်နှင့်အမျှ နတ်ဆိုးဂိုဏ်းဟာ ဂိုဏ်းချုပ်အတွက် စေလွှတ်စရာ လူယုတ်မာများ အုပ်စုကြီးတစ်စုကို စုဆောင်းခဲ့မိပြီး သိုင်းလောကတစ်ခုလုံးကို ဒုက္ခဖြစ်စေခဲ့သည်။ 

လွန်ခဲ့သော ဆယ်စုနှစ်အနည်းငယ်အတွင်း၌ နတ်ဆိုးဂိုဏ်းဟာ ပို၍ပင် သောင်းကျန်းလာသည်။

သိုင်းလောကရှိ များစွာသော မျိုးနွယ်စုများနှင့် ဂိုဏ်းများမှာ နတ်ဆိုးဂိုဏ်း၏ အမြစ်ပြတ်သုတ်သင်ခြင်းကို ခံခဲ့ကြရပြီး ဖြောင့်မတ်မှန်ကန်သော သိုင်းလောကသားများသည် နတ်ဆိုးဂိုဏ်းကို အကြိမ်ပေါင်းများစွာ ဆန့်ကျင်တိုက်ခိုက်ခဲ့ကြသော်ငြား သူတို့အားလုံးကို နတ်ဆိုးဂိုဏ်းက သတ်ပစ်ခဲ့သည်။ ပြီးနောက် နတ်ဆိုးဂိုဏ်းဟာ သူတို့က “သိုင်းလောကကို တညီတညွတ်တည်းဖြစ်အောင် ပေါင်းစည်းပေးချင်သည်” ဟု ကြွေးကြော်နေဆဲဖြစ်သည်။

အချိန်အတိုင်းအတာတစ်ခုအထိ သိုင်းလောကရှိ လူတိုင်းသည် အန္တရာယ်ရှိနေခဲ့ကြသည်။ ဂိုဏ်းများစွာသည် တိတ်တဆိတ်ဖြင့် မဟာမိတ်များကို ဖွဲ့စည်းခဲ့ပြီး နတ်ဆိုးဂိုဏ်းကို ဖျက်ဆီးချင်ခဲ့သည်။ သူတို့သည် ကိစ္စဆွေးနွေးရန် သိုင်းလောကအစည်းအဝေးတစ်ခုကိုလည်း ကျင်းပခဲ့ကြသည်။ ရလဒ်ကမူ သိုင်းလောကအစည်းအဝေးတွင် အမည်မသိကလေးတစ်ဦးက ရုတ်တရက် ပေါ်လာပြီး ထိတ်လန့်တုန်လှုပ်ဖွယ်ကိစ္စတချို့ကို ထုတ်ဖော်ပြောဆိုခဲ့သည်။

လွန်ခဲ့သော ဆယ်နှစ်ကျော်က ဂိုဏ်းများ ရွေးကောက်တင်မြှောက်ထားသည့် သိုင်းလောကခေါင်းဆောင်မှာ အမှန်တကယ်တော့ နတ်ဆိုးဂိုဏ်းနှင့် ပူးပေါင်းလက်တွဲထားခဲ့သည်တဲ့။ ယခင်က ဂိုဏ်းများစွာ ဖျက်ဆီးခံခဲ့ရသည်မှာ သူက သဘောထားကွဲလွဲသူများကို အမြစ်ပါမချန် ဖယ်ရှားနေခဲ့ခြင်း ဖြစ်ပေ၏။

ဤသိုင်းလောကခေါင်းဆောင်က နတ်ဆိုးဂိုဏ်းနှင့် တိတ်တိတ်လေး အဆက်အသွယ်ပြုလုပ်ခဲ့ပြီး သူ့ပြိုင်ဘက်များ အားလုံးကို သတ်ပစ်ခဲ့သည်။ ထို့အပြင် သူက ထိုပြိုင်ဘက်များ၏ ပိုင်ဆိုင်မှုများနှင့် သိုင်းပညာလျှို့ဝှက်ချက်များကိုလည်း ရရှိပိုင်ဆိုင်သွားသည်။ ဤအမည်မသိကောင်ကလေး ပေါ်မလာခင်အထိ ဆယ်နှစ်ကျော်ကြာအောင် သူက မည်မျှသက်တောင့်သက်သာ နေထိုင်ခဲ့မှန်း မသိနိုင်ချေ။ သူ့ဂုဏ်သတင်းမှာ ပျက်စီးသွားခဲ့ပြီး နောက်ဆုံးတွင် သူဟာ ဤအညတြ၏လက်ထဲ၌ သေဆုံးသွားခဲ့သည်။

ဤအညတြ၏နာမည်မှာ ကျူးလျန်ယင်း ဖြစ်သည်။ သူဟာ လွန်ခဲ့သော ဆယ့်နှစ်နှစ်က သိုင်းလောကခေါင်းဆောင်နှင့် နတ်ဆိုးဂိုဏ်းတို့၏ “အမြစ်ပြတ်သုတ်သင်ခြင်း”ကို ခံခဲ့ရသည့် ကျူးမိသားစုမှ တစ်ဦးတည်းသော သား ဖြစ်သည်။ ထိုအချိန်တွင် သူ့ဖခင်က နတ်ဆိုးဂိုဏ်း၏ လက်ဝဲရံကို ကယ်တင်ခဲ့ဖူးပြီး ထို့နောက်တွင် လက်ဝဲရံက သူ့ကို ကယ်တင်ခဲ့ကာ သူ့ကို တိတ်တဆိတ် ပျိုးထောင်ခဲ့သည်။

ယခုမူ သိုင်းပညာကျွမ်းကျင်သူတစ်ဦး ဖြစ်သော ကျူးလျန်ယင်းသည် သူ၏ သင်ကြားလေ့လာမှုတွင် အောင်မြင်မှုကို ရရှိခဲ့သည်။ သူ လက်စားချေဖို့ ထွက်လာခဲ့ပြီ!

သို့သော် ကျူးလျန်ယင်းသည် သိုင်းလောကခေါင်းဆောင် ဖြစ်ခါစဖြစ်၏။ သူသည် သူ့ခွန်အားကို မြှင့်တင်ရန် ပြင်ဆင်နေပြီး သူ၏စွမ်းရည်များကို အဆင့်တိုးမြှင့်ရန် ပြင်းထန်စွာ ကြိုးစားသည်။ ထို့နောက်တွင် သူသည် သူ့မိသားစုအတွက် လက်စားချေရန် နတ်ဆိုးဂိုဏ်းသို့ သွားဖို့ စီစဉ်ထားသည်။ သို့ရာတွင် မမျှော်လင့်ထားစွာဖြင့် နတ်ဆိုးဂိုဏ်း ဂိုဏ်းခေါင်းဆောင်က ကျူးလျန်ယင်း၏ ချစ်လှစွာသော ဂိုဏ်းတူညီလေး လျိုကျိချင်းကို အမှန်တကယ် ပြန်ပေးဆွဲသွားခဲ့သည်။

ဤသတင်းကို ကြားရသောအခါ ကျူးလျန်ယင်း၏မျက်လုံးများမှာ ဒေါသများကြောင့် တောက်ပလာခဲ့သည်။ သူသည် နတ်ဆိုးဂိုဏ်းထဲသို့ တိတ်တိတ်လေး ခိုးဝင်ခဲ့သော်ငြား တစ်ချိန်လုံး မျက်နှာဖုံးတပ်၍ မျက်နှာအစစ်ကို မပြသော နတ်ဆိုးဂိုဏ်းခေါင်းဆောင်က အမှန်တကယ်တော့ လျိုကျိချင်းကို ချစ်မိသွားကာ လျိုကျိချင်းကို အချစ်ဆေး ပေးရန် စီစဉ်နေသည်ကို ရှာတွေ့ခဲ့ရသည်။ လူက ဆေးသုံးပြီးနောက် အပြင်သို့မထုတ်လျှင် ပေါက်ကွဲကာ သေဆုံးသွားမည်ဖြစ်ရာ လျိုကျိချင်းကို ဖိအားပေးခြင်းဖြစ်သည်။

ကျူးလျန်ယင်းသည် လက်ဝဲရံနှင့် အခြားသော နတ်ဆိုးဂိုဏ်းသားအချို့၏ အကူအညီနှင့် ဆေးကို တိတ်တဆိတ် လဲလှယ်ကာ ဆေးအား နတ်ဆိုးဂိုဏ်းခေါင်းဆောင်ကိုသာ သုံးစေပြီး ထို့နောက် လျိုကျိချင်းနှင့် ထွက်လာခဲ့သည်။ ဒီအချိန်မှာ သူ တစ်နေ့ နတ်ဆိုးဂိုဏ်းကို ချေမှုန်းပစ်မယ်လို့ တိတ်တိတ်လေး သစ္စာဆိုခဲ့တယ်!

——

ယန်ကျင်းဇီသည် နိုးလာချိန်တွင် သူ အလွန်ပူသည်ဟု ခံစားနေရသည်။

သူ၏ အသိစိတ်တစ်ခုလုံးမှာ မနိုးကြားသေးဘဲ ဤအခိုက်အတန့်တွင် သူသည် လူတစ်ဦးဦးကိုသာ ဖမ်းဆွဲပြီး တစ်စုံတစ်ရာကိုသာ အဆောတလျင် လုပ်ဆောင်ချင်မိသည်။

သူသည် အမှန်တကယ်ပင် လူတစ်ဦးကို ဖမ်းဆွဲခဲ့ပြီး ထိုလူကို သူ့အောက်တွင် ဖိထားကာ ထိုလူ၏ အဝတ်အစားများကို အကြမ်းပတမ်း ဆွဲဖြဲလျက် တစ်ခုခုလုပ်တော့မည်ဖြစ်သည်။

သူ့ရင်ခွင်ထဲရှိ လူ၏ ခန္ဓာကိုယ်မှာ အေးစက်နေပြီး သူ့လက်များမှာ တစ်ဖက်လူ၏ ပြဲနေသော အဝတ်အစားများကို ဆုပ်ကိုင်ထားလျက် သူသည် ထိုလူအပေါ်တွင် မလှုပ်မယှက်ဖြင့် ဖိထားသည်။

ယန်ကျင်းဇီ ကြက်သေသေသွားသည်။

ဒါဘာလဲ? သူ ကူးပြောင်းလာတာလား?

ကူးပြောင်းလာတာကို မေ့လိုက်ဦး၊ တကယ်ပဲ သူ ကူးပြောင်းလာတာက... လူတွေကို မသင့်တော်တာ တစ်ခုခု လုပ်ဖို့ ကြံရွယ်နေတဲ့ လူတစ်ယောက်ယောက်ရဲ့ ခန္ဓာကိုယ်လား?

ခန္ဓာကိုယ်ထဲမှ ခံစားချက်မှာ ပြင်းထန်လွန်းလှပြီး ၎င်းကို ထိန်းချုပ်ရန်မှာ မဖြစ်နိုင်လုနီးပါး ဖြစ်သောကြောင့် ယန်ကျင်းဇီ၏အမြင်ပင် ဝေဝါးနေ၏။ 

သို့သော် သူသည် သားရဲတစ်ကောင် အဖြစ်မခံနိုင်ပေ။

ယန်ကျင်းဇီသည် ခေါင်းလှည့်ပြီး သူ့ကိုယ်သူ ပြင်းပြင်းထန်ထန် ဆွဲစိတ်လိုက်ရာ နောက်ဆုံးတွင်တော့ သူ၏အမြင်မှာ ပိုမိုကြည်လင်လာသည်။

သူသည် တုနှိုင်းမရစွာ ပြောင်ရှင်းနေသော ရှေးဟောင်းအခန်းလွတ်တစ်ခန်းထဲတွင် သူ ရောက်ရှိနေကြောင်း တွေ့လိုက်ရပြီး ဤအခိုက်အတန့်တွင် သူဟာ ကျယ်ဝန်းသော ခုတင်ကြီးတစ်လုံးပေါ်၌ အမျိုးသားတစ်ဦးကို ဖိချထားသည်။ 

ခုတင်ပေါ်မှ အိပ်ရာခင်းများနှင့် စောင်ထည်များ အားလုံးမှာ အနီရောင်ဖြစ်ပြီး မင်္ဂလာဆောင်ပြီးစ ဇနီးမောင်နှံ၏ အခန်းကဲ့သို့ အလှဆင်စီစဉ်ထားကာ သူ့အောက်တွင် လှဲနေသော အမျိုးသားမှာ...

ယန်ကျင်းဇီသည် ဤလူကို တွေ့လိုက်ရသည့် အခိုက်အတန့်မှစ၍ မှင်တက်သွားရပြီး သူ့မျက်လုံးထဲတွင် တခြားတစ်ခုခုကို မမြင်နိုင်တော့ပေ။

သူ မြင်မြင်ချင်း ချစ်မိသွားပြီ။

သူ ကူးပြောင်းလာသော အခိုက်အတန့်၌ သူ အဓမ္မပြုကျင့်တော့မည့် သူ့အိပ်ရာထဲတွင် လှဲနေသော လူကို သူ မြင်မြင်ချင်း ချစ်မိသွားသည်။

ဤလူသည် နေရာတိုင်းတွင် သူ့အကြိုက်နှင့် အမှန်တကယ် ကိုက်‌ညီနေပြီး သူ့ခန္ဓာကိုယ်ထဲရှိ သန်မာ‌အားကောင်းသော ခံစားချက်မှာ တဟုန်ထိုး များပြားလာနေကာ ဆက်လက်၍ ချုပ်တည်းထားရန်မှာ မဖြစ်နိုင်သလောက်ပင်။

သို့ရာတွင် သူ့အောက်မှ လူ၏ အဝတ်အစားများမှာ အပိုင်းပိုင်းအစစ စုတ်ပြဲနေသည်။ ဤအချိန်တွင် ထိုလူက သူ့ကို အမူအရာမဲ့စွာ ကြည့်နေပြီး ပျော်ရွှင်နေသည့်ပုံ မပေါ်ချေ။

ယန်ကျင်းဇီသည် သူ့ဘေးကို ‌လှည့်ပြီး လူကို လွှတ်ပေးလိုက်သည်။ သူ့ကိုယ်သူ ထိန်းချုပ်ရန်အတွက် သူသည် သူ့အောက်ရှိ ခုတင်ကို သူ့ခေါင်းနှင့် ပြင်းထန်စွာ ဝင်တိုက်လိုက်၏။

ဘန်းခနဲဖြင့် ချက်ချင်းပင် ခုတင်ပြိုကျသွားတော့သည်။

ယန်ကျင်းဇီနှင့် သူ့ဘေးရှိလူတို့သည် ခုတင်အခင်းပြားနှင့်အတူ ကြမ်းပြင်ပေါ်သို့ ပြုတ်ကျသွားကြလေသည်။ 

ယန်ကျင်းဇီ : “ ... ” သူ့ခေါင်းက အားကောင်းလှချည်လား?

သို့သော် ရလဒ်အားဖြင့် သူသည် အနည်းငယ် ပိုပြီးနိုးကြားသွားကာ သူ့ဘေးရှိလူကို ပြောလိုက်သည် : “ အပြင်ထွက်သွားတော့ ”

ဤခန္ဓာကိုယ်၏မူလပိုင်ရှင်က ဆေးတစ်မျိုး သောက်ထားပုံရပြီး ဤသို့ဖြစ်လျှင်တောင်မှ သူသည် သူ သဘောကျရသော လူကို ထိခိုက်နာကျင်အောင် မလုပ်နိုင်ပေ။ 

အဲ့ဒါက လူ့တိရစ္ဆာန်ပဲလေ!

ယန်ကျင်းဇီ၏အမြင်မှာ ထပ်မံဝေဝါးလာပြန်ပြီး သူ့လက်များက ခုတင်ဘေးရှိ လက်ရန်းကို တင်းတင်းဆုပ်ကိုင်လိုက်သည်။ ထို့နောက် အားနည်းနည်းလေးနှင့်တင် ခုတင်လက်ရန်းမှာ သူ့လက်ထဲတွင် အမှုန့်များအဖြစ် ပြောင်းလဲသွားခဲ့သည်။

သူ့ခန္ဓာကိုယ်ထဲတွင် သောင်းကျန်းနေသော စွမ်းအင်တစ်ခု ရှိနေဆဲဖြစ်ပြီး ၎င်းက သူ့ခန္ဓာကိုယ်ကို ကျိုးကြေစေတော့မည်ပင်...

သူ၏ စိတ်ဆန္ဒထိန်းချုပ်မှုမှာ တကယ် ကောင်းသည်။ သူ မဟုတ်ဘဲ သာမန်လူတွေသာဆိုရင် ဒီအချိန်မှာ သည်းမခံနိုင်လောက်တော့ဘူး!

သူ့အမြင်မှာ ထပ်မံဝေဝါးသွားပြန်ပြီး ယန်ကျင်းဇီသည် ပါးစပ်ဖွင့်၍ သွေးတစ်လုတ် ထွေးထုတ်လိုက်သည်။

ဒီလိုဆေးမျိုးလေးနဲ့ ဘာလို့ သူ သေတော့မလိုမျိုး ပုံစံတူနေတာလဲ? ယန်ကျင်းဇီသည် တစ်စုံတစ်ခုကို သူ့ခေါင်းနှင့် ထပ်တိုက်ရန် တွေးလိုက်သော်ငြား ထိုအခိုက်အတန့်တွင် အေးစက်သော ခန္ဓာကိုယ်တစ်ခုက သူ့‌ကို ဖိကပ်လာခဲ့သည်။ 

သူ၏ မြင်မြင်ချင်း ချစ်ရသူမှာ လုံးဝ ထွက်မသွားသည့်အပြင် သူ့ကို ဖက်ပါဖက်လာခဲ့၏။

ယန်ကျင်းဇီသည် ခဏတာ အလွန်စိတ်လှုပ်ရှားသွားပြီး သူ့စိတ်ထဲတွင် မီးရှူးမီးပန်းများ ပွင့်လန်းပေါက်ကွဲသွားသည်ကိုသာ ခံစားလိုက်ရသည်။

သူက ဆန္ဒရှိတယ်! သူရော သူ့ကို ကြိုက်တာလား?

ဒါက တကယ့်အံ့ဩပျော်ရွှင်စရာပဲ!

ယန်ကျင်းဇီသည် ထပ်ပြီး ဖိနှိပ်မထားနိုင်တော့ဘဲ သူ့‌အနားရှိလူကို ပွေ့ဖက်ရင်း တစ်ဖက်လူ၏ နှုတ်ခမ်းကို ကိုက်ခဲလိုက်သည်...

သို့ရာတွင် ဤအချိန်၌ ယန်ကျင်းဇီသည် သူ့မျက်နှာပေါ်တွင် မျက်နှာဖုံးတစ်ခု ဝတ်ဆင်ထားမှန်း သဘောပေါက်သွားရသည်။

ဒီသံမျက်နှာဖုံးက သူ့အပြုအမူတွေကို တကယ်ပဲ အရမ်းအနှောင့်အယှက်ပေးတယ်၊ ပြီးတော့ ဒါက သူ့အချစ်လေးရဲ့နှာခေါင်းကို တိုက်မိသွားတယ်!

မျက်နှာဖုံးကို ချွတ်ပြီး အဝေးသို့လွှတ်ပစ်လိုက်ကာ ယန်ကျင်းဇီသည် “ဝူး”ခနဲ အသံထွက်၍ လူတစ်ကိုယ်လုံးက ထိုအေးစက်နေသော ခန္ဓာကိုယ်ထံသို့ နစ်ဝင်သွားသည်။

ညတာဟာ ပူလောင်ကာ တိုတောင်းသော အချိန်ခဏတာလေးဖြင့် ကောင်းကင်မှာ တောက်ပနေပြီးဖြစ်သည်။

အရာရာ ပြီးဆုံးပြီးနောက် ယန်ကျင်းဇီသည် အိပ်ပျော်သွားသည်။ သို့သော် သူသည် အိပ်ပျော်သွားလျှင်တောင်မှ သူ့ဘေးရှိလူကို တင်းတင်းကြပ်ကြပ် ပွေ့ဖက်ထားဆဲဖြစ်သည်။

အရိပ်တစ်သည် သူ့ခေါင်းကို ဘေးဖက်သို့ လှည့်ပြီး သူ့ဘေးရှိ ယန်ကျင်းဇီကို ကြည့်လိုက်သည်။

သူ့သခင်ဟာ တစ်နှစ်ပတ်လုံး မျက်နှာဖုံးတစ်ခုကို ဝတ်ဆင်ထားသည်။ သခင့်ကို အနီးကပ် ကာကွယ်နေသော သူပင် မျက်နှာဖုံး မပါသော သခင့်ကို အဝေးမှသာ မြင်ဖူးခဲ့ကာ ၎င်းကို ဆက်မကြည့်ရဲခဲ့ပေ။ ယခုအခါမူ သူသည် သခင့်၏ မျက်နှာသွင်ပြင်ကို ရှင်းလင်းပြတ်သားစွာ မြင်နိုင်နေသည်။

သခင့်၏မျက်နှာမှာ သူ စိတ်ကူးဖူးသည်နှင့် လုံးဝလုံးဝ ကွဲပြားသည်။

သူ့သခင်တွင် ကလေးမျက်နှာလေး ရှိပြီး အလွန်ချစ်စရာကောင်း၍ အလွန်နှစ်သက်ဖွယ်ကောင်းသည်။ သူ့သခင်ဟာ အသက်နှစ်ဆယ့်လေး သို့မဟုတ် နှစ်ဆယ့်ငါးနှစ်ခန့် ရှိနေပြီဖြစ်သော်ငြား ဆယ်ကျော်သက်တစ်ဦးနှင့် တူနေဆဲဖြစ်သည်။

သူသည် သူ့နှလုံးသားထဲတွင် ထူးဆန်းသော တစ်စုံတစ်ရာကို ခံစားမိလိုက်သော်လည်း မကြာမီ သူသည် ဤထူးဆန်းမှုကို မသိကျိုးကျွန်ပြုခဲ့သည်။

သူ့သခင်၏ရင်ခွင်ထဲမှ ဂရုတစိုက် ထွက်လာပြီး အရိပ်တစ်သည် ကျိုး‌သွား၍ ကြမ်းပြင်ပေါ်တွင် ခုတင်အခင်းပြားသာ ရှိတော့သော ခုတင်မှ ထွက်လာခဲ့သည်။

တံခါးအပြင်ဘက်တွင် ခပ်ဖွဖွ တံခါးခေါက်သံ ထွက်ပေါ်လာသည်။ တခြားသော အရိပ်သက်တော်စောင့်များထဲမှ တစ်ဦးက သူ အကူအညီလိုသလားဟု သူ့ကို မေးမြန်းလာ၏။

အရိပ်တစ်သည် သူ အကူအညီမလိုအပ်ကြောင်း ပြသသည့်အနေဖြင့် ပြန်လည်မတုံ့ပြန်ခဲ့ပေ။

သူသည် ပထမဦးစွာ သခင့်ကို ကူညီသန့်ရှင်းပေးပြီးနောက် သူ့ကိုယ်သူ စတင်၍ သန့်ရှင်းရေးလုပ်ခဲ့သည်။ သူသည် သန့်ရှင်းရေးလုပ်ပြီး အဝတ်အစားဝတ်ဆင်ပြီးသောအခါ ခုတင်ရှေ့တွင် သူ ဒူးထောက်ချလိုက်သည်။

သခင်က သူ့ကို “အပြင်ထွက်သွားရန်” ယခင်က ပြောခဲ့သော်ငြား သူက အပြင်မထွက်သွားခဲ့ချေ။ သူသည် သခင့်၏အမိန့်ကို လွန်ဆန်ခဲ့ပြီး သခင့်ထံမှ အပြစ်ဒဏ်ကို စောင့်ဆိုင်းရမည်ဖြစ်သည်။

သို့သော်ငြား သူ ဒူးထောက်လိုက်သည့်အချိန်မှာပင် ခုတင်ပေါ်မှ သခင်က မျက်လုံးဖွင့်ပြီး သူ့ကို စူးစိုက်ကြည့်နေသည်ကို သူ ရုတ်တရက် တွေ့လိုက်ရသည်။

ယန်ကျင်းဇီသည် သူ့ဘေးရှိလူ လှုပ်ရှားသောအခါ သတိနိုးကြားလျက် အိပ်ရာနိုးလာခဲ့သည်။ ထို့နောက် သူသည် သူ့ဘေးရှိလူက သူ့ရင်ခွင်ထဲမှ တွားသွားထွက်သွားကာ သူ့ကို အနည်းငယ် ကူညီသန့်ရှင်းပေးသည်အား ခံစားလိုက်ရ၏။

သူသည် မနေ့ည၌ ဆေးအရှိန်အောက်တွင် ရောက်ရှိနေခဲ့ပြီး အမှန်တကယ် အနည်းငယ် လွန်သွားခဲ့သော်လည်း ကောင်းမွန်သည်မှာ သူ သဘောကျသော လူက နာကျင်ပုံမပေါ်ဘဲ လွတ်လွတ်လပ်လပ် လှုပ်ရှားသွားလာနေဆဲဖြစ်ပြီး သူ့ကိုပင် ကူညီသန့်ရှင်းပေးချင်သေးသည်... 

ဆိုတော့ သူတို့က တစ်ယောက်နဲ့တစ်ယောက် ချစ်နေကြတာလား?

ယန်ကျင်းဇီသည် စိတ်လှုပ်ရှားနေပြီး လူကို ခဏတာ ထွေးပွေ့ထားမည်အပြု၊ သူ့စိတ်ထဲတွင် မူလပိုင်ရှင်၏ မှတ်ဉာဏ် ရုတ်တရက် ပေါ်လာခဲ့သည်။

သူ့ခန္ဓာကိုယ်၏ မူလပိုင်ရှင်ကိုလည်း ယန်ကျင်းဇီဟုပင် ခေါ်သော်ငြား လူအနည်းငယ်ကသာ သူ့နာမည်ကို သိကြသည်။

မူလပိုင်ရှင်အနားရှိ လူများက သူ့ကို သခင် သို့မဟုတ် ခေါင်းဆောင်ဟု ခေါ်ကြ၏။

ပြင်ပရှိ သူစိမ်းများအတွက်မူ သူဟာ အများအခေါ်အရ နတ်ဆိုးဂိုဏ်းခေါင်းဆောင် ဖြစ်သည်။ 

သူသည် ယခင်နတ်ဆိုးဂိုဏ်းခေါင်းဆောင်၏ သား ဖြစ်ပြီး များမကြာမီ ယခုမှသာ နတ်ဆိုးဂိုဏ်း၏ ခေါင်းဆောင်အဖြစ် ရာထူးရရှိထားသည်။ နောက်ဆုံး သူ အာဏာရသောအခါ ပထမဆုံး သူ ပြုလုပ်သည့် ကိစ္စမှာ လူလွှတ်၍ လျိုကျိချင်းကို ပြန်ပေးဆွဲစေခြင်း ဖြစ်သည်။ 

မူလပိုင်ရှင်က လျိုကျိချင်းကို ကြိုက်သည်။

မူလပိုင်ရှင်သည် နတ်ဆိုးဂိုဏ်းခေါင်းဆောင်၏ သား ဖြစ်ပြီး ငယ်စဉ်ကလေးအရွယ်ကတည်းက နားရက်တစ်ရက်ပင် မရှိဘဲ သိုင်းပညာကို လေ့ကျင့်ရန် ဖိအားပေးခံခဲ့ရသည်။ သူ အသက်နှစ်ဆယ့်နှစ်နှစ် ရောက်မှသာလျှင် သူသည် အပြင်ထွက်၍ လေ့ကျင့်ရန် ခွင့်ပြုချက်ရရှိခဲ့သည်။

ရလဒ်ကမူ မူလပိုင်ရှင်သည် သူ၏ ကိုယ်ပိုင်အရိပ်အစောင့်များကို ခေါ်၍ အပြင်ထွက်သွားခဲ့သော်လည်း သူပုန်အုပ်စု၏ တိုက်ခိုက်ခြင်းကို ခံခဲ့ရသည်။ သူ၏ အရိပ်အစောင့်များက သူ့ကို အသည်းအသန် ကာကွယ်ခဲ့ပြီး သူ့ကို ထွက်ပြေးလွတ်မြောက်စေခဲ့၏။

ထို့နောက် ကလေးဘဝကတည်းက သိုင်းလေ့ကျင့်ရုံမှလွဲ၍ ဘာမှမလုပ်တတ်ခဲ့သော မူလပိုင်ရှင်သည် တောထဲတွင် လမ်းပျောက်ပြီး ဗိုက်ဆာ၍ သတိလစ်မေ့မျောသွားခဲ့သည်။

လျိုကျိချင်းက သူ့ကို တွေ့ရှိပြီး သူ့ကို စားရန် ထမင်းတစ်ပန်းကန် ပေးခဲ့၏။

ထိုအချိန်မှစ၍ သူသည် လျိုကျိချင်းကို စွဲလမ်းနေခဲ့သည်။ သို့ရာတွင် ထိုအချိန်၌ သူ့ဖခင်က ရှိနေဆဲဖြစ်သည်။ သူသည် လျိုကျိချင်းကို သဘောကျလျှင်တောင်မှ သူ့ဖခင် ဒေါသထွက်မည်ကို စိုးရိမ်ပြီး ၎င်းကို ထုတ်မပြောရဲခဲ့ချေ။ သူ့ဖခင် ဆုံးပါးပြီးနောက် သူ ခေါင်းဆောင်ဖြစ်လာပြီးမှသာ နောက်ဆုံးတွင် သူသည် လူလွှတ်၍ လျိုကျိချင်းကို ဖမ်းဆီးစေခဲ့သည်။

သို့ရာတွင်မူ မူလပိုင်ရှင်က လျိုကျိချင်းကို ကြိုက်သော်လည်း လျိုကျိချင်းက မူလပိုင်ရှင်ကို မကြိုက်ချေ။ သူက ကျူးလျန်ယင်းကို ကြိုက်သည်။

ကောင်းပြီ၊ မူလပိုင်ရှင်တွင် သဘောကျစရာ တစ်ခုမှ မရှိပေ။ သူ၏ သဘောကျသူကို ပြန်ပေးဆွဲသော အပြုအမူက လုံးဝ သဘောကျဖွယ်မကောင်းချေ။

ပိုမိုကြောက်လန့်စရာကောင်းသည်မှာမူ လျိုကျိချင်းက မူလပိုင်ရှင်ကို မကြိုက်ဘဲ ထိတွေ့ခံရမည်ကို ရှောင်ရှားရန်အတွက် သူ့ကိုယ်ပိုင်အသက်နှင့်ပင် မူလပိုင်ရှင်ကို ခြိမ်းခြောက်ခဲ့သည်။ မမျှော်လင့်ထားစွာဖြင့် မူလပိုင်ရှင်က လျိုကျိချင်းကို ဆေးပေးရန် ဆုံးဖြတ်ခဲ့၏။

ကံကောင်းတာကတော့ အဲ့ဒါ အလုပ်မဖြစ်သွားတာပဲ!

လျိုကျိချင်း၏ချစ်သူက နတ်ဆိုးဂိုဏ်းထဲသို့ ခိုးဝင်ပြီး မူလပိုင်ရှင်နှင့် လျိုကျိချင်း၏ စွပ်ပြုတ်တို့ကို တိတ်တဆိတ် လဲလှယ်ခဲ့ကာ မူလပိုင်ရှင်ကို ဆေးသောက်စေခဲ့သည်။ ဆေးကြောင့် မူလပိုင်ရှင် အဆင်မပြေဖြစ်နေမှုကို အခွင့်ကောင်းယူလျက် သူက လျိုကျိချင်းကို ခေါ်သွားခဲ့၏။

မူလပိုင်ရှင်က အလွန်စိတ်ဆိုးပြီး ဆေးကို မရပ်တန့်နိုင်သောကြောင့် သူက သူ၏ အရိပ်အစောင့်ကို ဆွဲဖမ်းကာ သူ့ဆေးကို ဖြေရှင်းရန် ပြင်ဆင်ခဲ့သည်...

ဤအချိန်၌ကား ဤခန္ဓာကိုယ်သို့ သူ ကူးပြောင်းလာခဲ့၏။ 

ဤမှတ်ဉာဏ်ကြောင့် ယန်ကျင်းဇီသည် ဒေါသထွက်ပြီး သွေးအန်လုမတတ် ဖြစ်သွားရသည်။

မူလပိုင်ရှင်က နတ်ဆိုးဖြစ်ရုံတင်မကဘဲ သူနဲ့ သူ့ရဲ့ မြင်မြင်ချင်း ချစ်ရသူတို့ကြားမှာလည်း အချစ်ဆက်ဆံရေးမျိုး မရှိဘူး!

သူ အိပ်ခဲ့သူမှာ မူလပိုင်ရှင်၏ အရိပ်အစောင့် ဖြစ်ပြီး အရိပ်တစ်ဟု အမည်ရှိသည်။ မနေ့ညက အရိပ်တစ် မငြင်း၊မခုခံခဲ့တဲ့ အကြောင်းအရင်းက မူလပိုင်ရှင်က သူ့သခင် ဖြစ်နေလို့ပဲ! 

သူ ကြိုက်တဲ့လူက သူ့ကို လုံးဝ မကြိုက်ဘူး!

ယန်ကျင်းဇီ၏စိတ်ထဲတွင် သူသာ မကူးပြောင်းလာခဲ့ပါက ဤကမ္ဘာတွင် ဆက်လက်ဖြစ်ပျက်မည့် အကြောင်းအရာများလည်း တည်ရှိနေသည်။

မူလပိုင်ရှင်သည် ဆေးဖြေရန် အရိပ်တစ်ကို အသုံးချခဲ့ပြီး အရိပ်တစ်ကို ကျေးဇူးမတင်သည့်အပြင် အရိပ်တစ်က အခွင့်အရေးကို အသုံးချ၍ အိပ်ရာထဲသို့တက်လာသည်ဟုလည်း သူ ခံစားခဲ့ရသည်။ ၎င်းက သူ့ကို ရွံရှာစေပြီး အရိပ်တစ်ကို ရိုက်နှက်စေခဲ့သည်။

ရိုက်နှက်ပြီးနောက် ပထမဆုံးအကြိမ် နွေဦးအရသာ ခံစားဖူးသည့် မူလပိုင်ရှင်သည် ၎င်းကို နောက်တစ်ကြိမ် ထပ်မံစဉ်းစားမိသဖြင့် သူက အရိပ်တစ်ကို ဖမ်းပြီး နောက်တစ်ကြိမ် ထပ်အိပ်ခဲ့သည်။ ဤအချိန်တွင် မူလပိုင်ရှင်သည် အရိပ်တစ်နှင့် လျိုကျိချင်းတို့တွင် ရုပ်ဆင်တူမှုအချို့ ရှိသည်ကို ရှာတွေ့ခဲ့၏။

မူလပိုင်ရှင်သည် ရိုးရှင်းစွာပင် အရိပ်တစ်ကို သူ့ဘေးတွင် ထားပြီး သူနှင့် ဆက်အိပ်ခဲ့သည်။

သူ စိတ်အခြေအနေကောင်းသောအခါ အရိပ်တစ်ဟာ လျိုကျိချင်းအဖြစ် ဆက်ဆံခံရနိုင်ပြီး သူက သူ့ကို မျက်နှာသာပေးနိုင်သည်။ သူ စိတ်အခြေအနေ ဆိုးသောအခါတွင်မူ အရိပ်တစ်ဟာ ဒေါသဖြေစရာအဖြစ် ကြိမ်ဒဏ်ပေးခံရမည်ဖြစ်သည်။

အဘယ့်ကြောင့်ဆိုသော် သူ့မျက်လုံးထဲတွင် အရိပ်တစ်က ခွေးတစ်ကောင်၊ အသတ်ခံရလျှင် လွှတ်ပစ်နိုင်သည့် ခွေးတစ်ကောင်သာ ဖြစ်သောကြောင့်ပင်။

မူလပိုင်ရှင်က တကယ့် ဆန်ကုန်မြေလေးကောင်ပဲ!

ယန်ကျင်းဇီသည် ဒေါသအလွန်ထွက်မိရာ သူ့ရင်ဘတ်ပင် နာလာသည်။ သူ့ကို ဒေါသအဖြစ်စေဆုံးမှာ အရိပ်တစ်က မည်မျှအနိုင်ကျင့်ခံရပါစေ မူလပိုင်ရှင်ကို တစ်ခါမှ မစွန့်ခွာသွားခြင်းပင်။

ဤမဆုတ်မနစ်တည်ရှိမှုမှာ ခံစားချက်များကြောင့် မဟုတ်ဘဲ အရိပ်တစ်တွင် မိမိကိုယ်ကို အလေးထားမှု ဟူသော အာရုံခံစားမှု မရှိသောကြောင့် ဖြစ်သည်။

ရိုးရှင်းစွာပင် အရိပ်တစ်က လူများကို မည်သို့ချစ်ခင်ရမည်အား မသိချေ။ သူက သူ့ကိုယ်သူပင် မချစ်တတ်ပေ။

နောက်ပိုင်းတွင် မူလပိုင်ရှင်က သူ့ကို ခေါ်ပြီး လျိုကျိချင်းကို ရှာရန် နတ်ဆိုးဂိုဏ်းမှ ထွက်လာသည်။ အရိပ်တစ်သည် ထိုနေ့မတိုင်မီညကတင် မူလပိုင်ရှင်၏ လူးလှိမ့်ခြင်းကို ခံခဲ့ရပြီး နောက်တစ်နေ့တွင် သူက မူလပိုင်ရှင်၏ လျိုကျိချင်းကို ဖမ်းဆီးရန် အမိန့်အား နာခံခဲ့သည်။ 

တစ်စုံတစ်ဦးက လျိုကျိချင်းကို ကာကွယ်နေသောကြောင့် အရိပ်တစ်သည် သူ့ကို မဖမ်းနိုင်ခဲ့ချေ။ ထို့ကြောင့် သူဟာ မူလပိုင်ရှင်ထံမှ ထပ်မံရိုက်နှက်ခံရပြန်သည်။

မူလပိုင်ရှင်က သိုင်းလောကသားများ၏ စိတ်မကျေနပ်မှုကို တုံ့ပြန်ဖြစ်ပေါ်စေခဲ့ပြီး အရိပ်တစ်က မူလပိုင်ရှင်ကို အသည်းအသန် ကာကွယ်ခဲ့သည်...

သူဟာ မူလပိုင်ရှင်ကို ကာကွယ်နေစဉ် သေဆုံးသွားခဲ့ပြီး သိုင်းပညာရှင်အချို့၏သတ်ခြင်းကို ခံခဲ့ရသည်။

သူသေသည့်တိုင် သူက မူလပိုင်ရှင်အတွက် အသက်ရှင်နေခဲ့ပြီး သူ့အတွက်သူ တစ်ရက်ပင် အသက်ရှင်မနေထိုင်ခဲ့ပေ။ သူ သေဆုံးချိန်တွင် မူလပိုင်ရှင်၏ ထပ်တလဲလဲ နှိပ်စက်မှုကြောင့် ဟိုးယခင်ကတည်းက သူသည် ထိခိုက်ဒဏ်ရာရပြီး သေအံ့ဆဲဆဲဖြစ်နေခဲ့သည်ပင်။

ထို့အပြင် သူ သေသောအခါ မူလပိုင်ရှင်က သူ့ကို ဒုတိယအကြည့်တစ်ချက်ပင် မပေးခဲ့ချေ။

ဤသည်မှာ သည်းမခံနိုင်စရာကောင်းလွန်းသည်။

ယန်ကျင်းဇီကို နှစ်သိမ့်မှုပေးသည့် တစ်ခုတည်းသော ကိစ္စမှာ မူလပိုင်ရှင်အတွက် သစ္စာရှိအရိပ်တစ်နှင့် အခြားသော အရိပ်အစောင့်များ သေဆုံးပြီးနောက် မူလပိုင်ရှင်လည်း ကောင်းမွန်စွာ အဆုံးမသတ်ခဲ့ခြင်း ဖြစ်သည်။ သူဟာလည်း “နတ်ဆိုးများကို သတ်ဖြတ်ပြီး မကောင်းဆိုးဝါးများကို ရှင်းလင်းသုတ်သင်နေသော” သိုင်းပညာရှင်များ၏ သတ်ဖြတ်ခြင်းကို ခံခဲ့ရသည်။

သေသွားတာ ကောင်းတယ်!

ယန်ကျင်းဇီသည် မူလပိုင်ရှင်၏မှတ်ဉာဏ်ကို လက်ခံရရှိပြီး မသက်မသာခံစားခဲ့ရသည်။ ရလဒ်ကမူ သူ သူ့

မျက်လုံးများကို ဖွင့်လိုက်သည်နှင့်တပြိုင်နက် သူ့အနှစ်သက်ရဆုံးလူက သူ့ကို ဒူးထောက်နေသည်အား အချိန်မီ တွေ့မြင်လိုက်ရ၏။

အရိပ်တစ်၏အမူအရာမှာ တည်ငြိမ်နေပြီး ရေသေကန်တစ်ကန်အတိုင်း သူ့မျက်လုံးများထဲတွင် လှိုင်းငယ်ထမှုတစ်ခုပင် မရှိချေ။