အခန်း(၅၂) - လက်ဖက်ရည်၏ အသုံးပြုပုံ

ယန်ယန်အပါအဝင် လူအများအပြားသည် ထိုမှတ်ချက်ကို မြင်လိုက်ရသောအခါတွင် မရယ်မောပဲ မနေနိုင်ခဲ့ပါ။

ဒီလက်ဖက်ရည်ကို နှင်းဆီပန်းများဖြင့် ပြုလုပ်ထားခြင်းဖြစ်သည်။ နှင်းဆီပန်းရဲ့ မွှေးရနံ့မရှိလျှင် မည်သည့်ရနံ့ရှိနိုင်မှာလဲ။

ယန်ယန်သည် အိုးအတွင်းရှိ လက်ဖက်ရည်များကို ပန်းကန်လုံးကြီးတစ်ခုထဲသို့ သေသေချာချာ လောင်းထည့်ပြီးနောက် အကြည်ရောင် ဖန်ပုလင်း ၃လုံးကို ယူကာ ပန်းကန်လုံးအတွင်းရှိ လက်ဖက်ရည်များကို ပုလင်းများ တစ်လုံးပြီးတစ်လုံးထဲသို့ လောင်းထည့်ခဲ့သည်။

ကြည်လင်ပြီး အရောင်ဖျော့ဖျော့လေးရှိသော လက်ဖက်ရည်ကို အကြည်ရောင် ဖန်ပုလင်းထဲတွင် ညင်သာစွာ မွှေပေးလိုက်သည့်အခါတွင် နှင်းဆီရနံ့လေး ထုတ်လွှင့်ပေးပြီး အမျိုးသမီး ကြည့်ရှုသူများ၏ စိတ်နှလုံးကို ချက်ချင်း ဖမ်းစားလိုက်နိုင်သည်။

“ဒီလက်ဖက်ရည်ကြမ်းထဲမှာ ယိမူချောင်ကို ပမာဏများများ အသုံးပြုထားသည့်အတွက်ကြောင့် ဒါက ဓမ္မတာလာခါနီး သွေးလည်ပတ်မှု နှေးကွေးနေတဲ့သူတွေအတွက် အသင့်တော်ဆုံးဖြစ်ပြီး ဓမ္မတာလာခါနီး သွေးလည်ပတ်မှုကို ကောင်းမွန်စေပါတယ်။ ဓမ္မတာလာချိန် နာကျင်ကိုက်ခဲမှု ဝေဒနာကို လျှော့ချပေးရုံသာမက ခန္ဓာကိုယ်တွင်း မလိုလားအပ်တဲ့ အဆိပ်အတောက်များကိုလည်း တစ်ခါတည်း ဖယ်ရှားပေးပါတယ်။ သတိထားရမယ့်အချက်ကတော့ ဓမ္မတာလာနေတဲ့သူတွေနဲ့ ကိုယ်ဝန်ဆောင်တွေ ဒါကို သောက်သုံးဖို့ မသင့်တော်ပါဘူး။”

စုယန်ယန် ဤသို့ရှင်းပြပြောဆိုပြီးသည့်‌နောက်တွင် အချို့က ဝမ်းသာသွားကြပြီး အချို့ကတော့ စိတ်ပျက်သွားကြသည်။

သို့သော် လက်ဖက်ရည် အသုံးပြုပုံကို သိပြီးတဲ့နောက်မှာ စွပ်ပြုတ်ကို လူအများ ပိုမိုစိတ်ဝင်စားလာကြသည်။

ယန်ယန်က သူတို့ကို အကြာကြီး မစောင့်ဆိုင်းစေခဲ့ပါဘူး။ နှင်းဆီလက်ဖက်ရည်ကြမ်းကို ပုလင်းတွေထဲ ထည့်ပြီးတာနဲ့ ဘေးနားက ဟင်းအိုးအဖုံးကို ဖွင့်လိုက်သည်။

တစ်နာရီကျော်ကြာအောင် ချက်ပြုတ်ထားသည့် ဝက်သားကျောရိုးနဲ့ ရေနဂါးက တော်တော်လေး အရသာစိမ့်ဝင်နေပါပြီ။ သူမ အဖုံးကိုဖွင့်လိုက်တာနဲ့ စွပ်ပြုတ်ထဲမှာ ရောနှောပါဝင်သည့် ပင်လယ်အစားအစာရဲ့ ပြိုင်ဖက်ကင်း မွှေးရနံ့နှင့် ဝက်သားကျောရိုးတို့၏ မွှေးရနံ့ဟာ လေထုထဲ ပျံ့နှံ့သွားကာ အနီးအနားရှိ လူတိုင်းကို သွားရည်ယိုစေခဲ့သည်။

[အို... အို့... အိုး... ဒီစွပ်ပြုတ်ရဲ့အနံ့က အရမ်းကောင်းတာပဲ။ ငါ့အိမ်ဘေးက အထူးစားသောက်ဆိုင်က ဝက်ရိုးစွပ်ပြုတ်ရဲ့ မွှေးရနံ့ထက်တောင် ပိုမွှေးသေးတယ်။ နောက်ထပ် အာဟာရပျော်ရည် နှစ်ထုပ်မသောက်ခင် ငါ ဒီအနံ့လေးကို ရှုရုံပဲလိုတယ်။]

[အာဟာရပျော်ရည်ကို သောက်သုံးနိုင်တဲ့ ဒီဆင်းရဲမွဲတေသူလေးက အခုလောလောဆယ် ငိုနေပါပြီ။ သာမန်ဝက်ရိုးတစ်ချောင်းကိုပင် ယွမ်တစ်ထောင်ဝန်းကျင် ကုန်ကျလေ့ရှိပြီး အထူးစားသောက်ဆိုင်တစ်ဆိုင်တွင် ကျသင့်သည့် စျေးနှုန်းတွေက လူတစ်ဦး၏ တစ်လလုံးစာ အသုံးစရိတ်ရဲ့ သုံး လေးဆလောက် ပိုမြင့်မားသည်။ ပြီးတော့ ဒီစွပ်ပြုတ်ထဲမှာ ရောနှောချက်ပြုတ်ထားသည့် အခြောက်အခြမ်း ပါဝင်ပစ္စည်းကို ထည့်သွင်းတွက်ချက်ထားခြင်း မရှိသေးပါ။ သို့သော်လည်း ငါ အရင်က ရခဲ့ဖူးတဲ့ အနံ့အရသာအားလုံးကို တင်ဆက်သူ ချက်ပြုတ်ထားတာရဲ့ တဝက်လောက်တောင် အနံ့အရသာမကောင်းဘူး။ ဧကရာဇ်မင်းက ငါ့ကို မျက်နှာသာပေးပြီး ငါ ကံထူးရှင်ဖြစ်ပါစေ၊ ပြီးတော့ ငါ ဒါကို စားသုံးဖို့ အခွင့်အရေးရပါစေ။]

လူတော်တော်များများက တူညီတဲ့ စိတ်ခံစားချက်များကို မျှဝေကြသည်။ စွပ်ပြုတ်၏ အာနိသင်ကို ထည့်မစဥ်းစားသေးပဲ စွပ်ပြုတ်ထဲက ပါဝင်ပစ္စည်းများနှင့် မွှေးရနံ့သည်ပင် သူတို့၏ အမိုက်ဆုံး အိမ်မက်များကို ဖြည့်ဆည်းပေးနိုင်လောက်အောင် စွမ်းဆောင်နိုင်သည်။

စုယန်ယန်သည် စွပ်ပြုတ်အတွက် နောက်ဆုံး ဟင်းခတ်အမွှေးအကြိုင်များကို ခတ်ပြီးနောက် ခေါင်းမော့ကြည့်သည့်အခါတွင် ဒီစွပ်ပြုတ်ကို စမ်းသောက်ချင်နေကြသည့် ကြည့်ရှုသူများ၏ သူတို့ ကံထူးရှင်ဖြစ်ရန် ဆုတောင်းထားသော မှတ်ချက်များကို မြင်တွေ့လိုက်ရသည်။

စုယန်ယန်ဟာ ကြက်သေ သေသွားပြီးနောက် ရယ်မောကာ စကားဆိုသည်။ “ကျွန်မ ဒါကို အရင်က ပြောခဲ့ဖူးတယ်လေ။ ဒီစွပ်ပြုတ်က အမျိုးသားတွေရဲ့ ဖော်ပြခြင်းငှာ မစွမ်းသာတဲ့ ရောဂါဝေဒနာတွေကို သက်သာပျောက်ကင်းစေတဲ့ စွပ်ပြုတ်ပဲဖြစ်တယ်။ ရေနဂါးတွေက ရောင်ရမ်းနာကျင်မှုတွေကို သက်သာစေပြီး ကျောက်ကပ်အားကို တိုးပွားစေကာ ယန်စွမ်းအင်ကို တိုးမြှင့်စေတယ်။ ဝက်ရိုးနဲ့ပတ်သက်ပြီး ရှင်းပြရရင် ဝက်ရိုးရဲ့ ရိုးတွင်းခြင်ဆီက ခန္ဓာကိုယ်အတွင်းမှာရှိတဲ့ ရိုးတွင်းခြင်ဆီကို ပြန်လည်ဖြည့်တင်းပေးပြီး ကျောက်ကပ်နဲ့ ယန်စွမ်းအင်ကို အာဟာရဖြည့်ပေးနိုင်တယ်။”

ဘဝနှစ်ခုလုံး စုယန်ယန်သည် အိမ်ထောင်မကျသေးသော မိန်းကလေးတစ်ဦးဖြစ်ပြီး ထိုသို့သော ကိစ္စများကို ရှင်းပြရသောအခါတွင် သူမ အနည်းငယ် ရှက်ရွံ့သွားခဲ့ရသည်။

သို့ရာတွင် လူအများသည် စွပ်ပြုတ်၏ အကျိုးအာနိသင်အား ရှင်းပြနေမှုအပေါ် အာရုံစူးစိုက်ထားသောကြောင့် သူမရဲ့ ရှက်ရွံ့မှုကို သတိမပြုမိကြပေ။

စုယန်ယန် ထိုသို့ရှင်းပြပြီးသောအခါတွင် သူမ၏ တိုက်ရိုက်ထုတ်လွှင့်မှုအခန်းမှ အချိန်နှင့်တစ်ပြေးညီ မှတ်ချက်များဟာ ထက်ဝက်ခန့် လျော့ကျသွားသည်ကို မြင်လိုက်ရသည်။ သူမသည် ထိတ်လန့်သွားပြီး ညာဖက် အပေါ်ထောင့်ရှိ ကြည့်ရှုသူ အရေအတွက်ကို စစ်ကြည့်လိုက်ရာ ပရိတ်သတ်အရေအတွက်သည် လျော့နည်းမသွားသည့်အပြင် လျင်မြန်စွာ မြင့်တက်လာခဲ့ကြောင်းကို သတိပြုမိခဲ့သည်။

ဒါဆို ဒီလူတွေက သူမပြောစကားတွေကြောင့် ကြက်သေ သေသွားလား... ရဲရင့်ပြီး ပြတ်သားလွန်းတဲ့ စကားလုံးတွေကို ရွေးချယ်နေတာလား။

ဆယ်စက္ကန့်လောက် ကြာမြင့်ပြီးနောက် စုယန်ယန်သည် အချိန်နှင့်တစ်ပြေးညီ မှတ်ချက်များထဲတွင် အမြင်ဖမ်းစားနိုင်သည့် မှတ်ချက်တစ်ခုကို တွေ့လိုက်ရသည်။

[ကာမအားတိုးဆေးလား။ အရွယ်မတိုင်မီ သုတ်လွှတ်ခြင်းလား။ ဟားဟား... ငါ ဒီလိုပစ္စည်းမျိုး မလိုအပ်ဘူး။ ငါက ငယ်ရွယ်ပြီး စွမ်းအင်ပြည့်ဝတယ်။]

[ဟုတ်တယ်၊ အဲ့တာ အမှန်ပဲ။ ငါတို့အားလုံးအဆင်ပြေတယ်။ တစ်ညမှာ ခုနစ်ကြိမ်ဆိုရင်‌တောင် ငါတို့အတွက် ပြဿနာမရှိဘူး။ ငါတို့ ဒီလိုပစ္စည်းမျိုး မလိုအပ်ဘူး။]

စုယန်ယန်သည် မျက်တောင်ခတ်လိုက်ပြီး သူမဘာသာသူမ မှင်သက်စွာ တွေးလိုက်မိသည်။ ‘တစ်ညလျှင် ခုနစ်ကြိမ်လား။ ဒီနေ့ခေတ်လူငယ်တွေအားလုံး အစွမ်းထက်ကြပါလား။ ချန်ဟွမ်း ပြန်ကောင်းလာပြီးရင် သူလည်း ဒီလိုမျိုး …’

Prev Next