အခန်း (၁၀၅)

သူမက ရွှေတွင်းတစ်တွင်း ပိုင်ဆိုင်ထားတာပဲ

စုယန်ယန်က ရုတ်တရက် တစ်စုံတစ်ခုကို တွေးမိသွားပုံရပြီး ဤသို့ ပြောလိုက်သည်။

“ကျွန်မတို့ စည်းမျဉ်းဟောင်း အတိုင်း ကစားကြမယ်။ ကျွန်မတို့ရဲ့ တိုက်ရိုက် ထုတ်လွှင့်မှု အခန်းထဲမှာ အမုန်းစကား ဆိုသူတွေ ဒါမှမဟုတ် ဆူပူသောင်းကျန်းတဲ့ ဘယ်သူ့ကိုမှ ကံစမ်းမဲ အစီအစဉ်တွေမှာ ပါဝင်ယှဉ်ပြိုင်ခွင့် မပေးနိုင်ဘူး”

ထိုအချိန်၌ ဟောက်ချန်ဟွမ်း ချမှတ်ထားသော ဒီစည်းမျဉ်း စည်းကမ်းများသည် စုယန်ယန်အား အလွန်ဆိုးရွားစွာ ဆဲဆိုခဲ့ဖူးသူများကို မည်မျှ ထိခိုက်သွားစေမည်ကို ထိုအချိန်က ကြည့်ရှုသူတွေက မသိနားမလည်ခဲ့ကြပေ။

သင် လူတစ်ဦး ဖြစ်နေသ‌ရွေ့ အို၊ နာ၊ သေဘေးမှ မလွတ်မြောက်နိုင်ဘူး ဆိုတာ သင် သိပါတယ်။ မနက်ဖြန်တွင် ရှင်းမပြနိုင်လောက်သည့် ရောဂါတစ်ခုခုဖြင့်လည်း ဘဝတစ်ပါးသို့ မကူးပြောင်း သွားနိုင်ဘူးဟု မည်သူမှ အာမခံနိုင်မည် မဟုတ်ပါ။

ထို့ကြောင့် မည်မျှ ချမ်းသာပြီး အာဏာရှိသည့် သူတွေ ဖြစ်နေပါစေ သူတို့က ဆရာဝန်တွေကို အလွယ်တကူ စော်ကားဝံ့ခြင်း မရှိကြပါ။

တစ်နေ့ သင် သူတို့လက်ထဲသို့ ရောက်သွားနိုင်ပြီး သင့်ကို ကယ်တင်မည် မကယ်တင်မည် ဆိုတာကို သူတို့စိတ်ကြိုက် ရွေးချယ်နိုင်သည်။ ဒါက အသက် ရှင်ခြင်းနှင့် သေခြင်းတို့နှင့် သက်ဆိုင်သော ကိစ္စရပ်ဖြစ်သည်။

ကျန်သည့် ပရိသတ်များက အများကြီး မတွေးကြဘူး။ ပြဿနာ ဖြစ်စေသော ကီးဘုတ်ဖိုက်တာများကို ထုတ်ပယ်ပြီးနောက် သူတို့ ကံစမ်းမဲပေါက်နိုင်သော အခွင့်အလမ်း ကြီးမားလာသည်ကိုသာ သူတို့ သိကြသည်။ ဒါက တကယ့်ကို စိတ်လှုပ်ရှားစရာ ကောင်းသော သတင်းတစ်ခုပါပဲ။

သို့သော်လည်း သူတို့ကြည့်လိုက်သော အခါတွင် ကြည့်ရှုသူ ပရိသတ်များ များပြားလာသည်ကို တွေ့လိုက်ရချိန်ဝယ် လူတိုင်းသည် သူတို့၏ ခေါင်းပေါ်ကို ရေအေးဖြင့် လောင်းချ ခံလိုက်ရသလိုမျိုး ခံစားလိုက်ရသည်။

“...” အများကြီး ထပ်တိုးလာသည့်ပုံ မပေါ်ပါဘူး။

စွပ်ပြုတ်ကျက်ရန် အချိန်ယူရမည်ကို စဉ်းစားနေရင်း စုယန်ယန်သည် စွပ်ပြုတ်အတွက် အိုးနှစ်လုံးကို အရင်ထုတ်ယူ လိုက်သည်။

“ဒီနေ့ ကျွန်မတို့ စွပ်ပြုတ်နှစ်မျိုး ချက်ပြုတ်မယ်။ ပထမဆုံး ချက်ပြုတ်မယ့် စွပ်ပြုတ်က မင်းတို့ကို ပိုပြီး စိတ်ဝင်စားစေမယ့် ဂျင်ဆင်း ပင်လယ်ခရု စွပ်ပြုတ်ပါ။ ဒီစွပ်ပြုတ်က အမျိုးသမီးတွေ မမျိုးဥအိမ်မှ သားဥ အကြွေစောခြင်းကို သက်သာ ကောင်းမွန်စေတဲ့ အကျိုးသက်ရောက်မှုတွေ ရှိပါတယ်”

စုယန်ယန်၏ စကားမဆုံးခင်မှာပင် ဖန်သားပြင်ပေါ်တွင် အကျိုးအကြောင်း မေးမြန်းထားသည့် မှတ်ချက် အများအပြား ပေါ်ထွက်လာခဲ့သည်။

“မမျိုးဥအိမ်မှ သားဥအကြွေစောခြင်းဆိုတာက ဘာလဲ”

“မမျိုးဥအိမ်မှ သားဥ အကြွေစောခြင်းလား။ ဒါက သူရဲ့ မူရင်းအဓိပ္ပါယ် အတိုင်းပါပဲ။ မမျိုးဥအိမ်မှ သားဥအကြွေစောခြင်းက ဓမ္မတာ မမှန်ခြင်းနဲ့ ရာသီသွေး ဆင်းတာမျိုးတို့ကို ထင်ရှားစေတယ်။ ရိုးရိုးရှင်းရှင်း ပြောရရင် မမျိုးဥအိမ်မှ သားဥအကြွေစောခြင်း ဒါမှမဟုတ် မီးယပ် သွေးဆုံးခြင်းတို့ကို ဆိုလိုတယ်။ ပုံမှန်အတိုင်း သားဥမကြွေဘူးဆိုရင် သဘာဝအတိုင်း ကိုယ်ဝန်ရဖို့ မလွယ်ပါဘူး”

စုယန်ယန်က ထိုသို့ ရှင်းပြနေစဉ် အတွင်းမှာပင် ပင်လယ်ခရုအချို့ကို ထုတ်ယူကာ သေသေသပ်သပ် သန့်စင်လိုက်သည်။

ဒီပင်လယ်ခရုတွေ ပေါ်လာသည်နှင့် တစ်ပြိုင်နက် တိုက်ရိုက် ထုတ်လွှင့်မှု အခန်းရှိ ပရိသတ်များက စည်းစိမ်ဥစ္စာများ၏ စွမ်းအားကို သွယ်ဝိုက်ပြီး ခံစားလိုက်ရသည်။

[အင်း... ငါ ဒီဟာတွေကို မြင်ဖူးတယ်။ ငါ အလုပ်ကိစ္စကြောင့် သူဌေးနဲ့ အတူလိုက်သွားတဲ့ အခါက ဒီဟာတွေကို အဝေးကနေ မြင်ဖူးတယ်။ သူတို့ကို အဆင့်မြင့် စားသောက်ဆိုင်တွေရဲ့ အမှတ်အသား ဟင်းလျာ တစ်မျိုးလို့ ဆိုကြတယ်။ သူတို့ကို တစ်နေ့လျှင် ငါးပွဲအထိပဲ ကန့်သတ်ထားပြီး ဟင်းလျာ တစ်ပွဲမှာ ခြောက်ခုလောက်ပဲ ပါဝင်တယ်။ ဒါ့အပြင် အဲဒီအချိန်တုန်းက ငါ မြင်ခဲ့ရတာက ပန်းကန်ပြားပေါ်မှာ သေးသေးလေးပဲ၊ တင်ဆင်သူ အခုပြင်ဆင်နေတဲ့ ပင်လယ်ခရုလောက် မကြီးဘူး။]

[တကယ်တော့ တိုက်ရိုက် ထုတ်လွှင့်မှု အခန်းမှာ အသုံးပြုနေတဲ့ ပါဝင်ပစ္စည်း အများစုဟာ စျေးကွက်ထဲမှာ မြင်တွေ့ရတဲ့ ထုတ်ကုန်တွေထက် အများကြီး ပိုကောင်းတယ် ဆိုတာကို ငါ ပြောချင်ပါတယ်။ ‌စျေးကွက်ထဲမှာ သဘာဝထုတ်ကုန်တွေက ဘယ်လောက် စျေးကြီးတယ် ဆိုတာကို လူတိုင်း သိကြမယ်လို့ ထင်ပါတယ်။ ဒီလိုမျိုး အရည်အသွေးမြင့် ထုတ်ကုန်တွေကို ဝယ်ယူနိုင်တဲ့ တင်ဆက်သူအတွက် စျေးနှုန်းက ဖြစ်နိုင်…]

[ပြီးခဲ့တဲ့ တိုက်ရိုက် ထုတ်လွှင့်မှု ကတည်းက အဲ့တာကို ငါ သိခဲ့တယ်။ တခြား သဘာဝ ထုတ်ကုန်တွေကိုတောင် ငါ မပြောသေးဘူး၊ ပင်လယ်စာ တစ်မျိုးတည်းကိုပဲ ပြောကြရအောင်။ မမှန်ကန်စွာ ချက်ပြုတ်ထားပြီး အရသာက မကောင်းမွန်ပေမယ့် ကာလပေါက်စျေးက မြင့်မားလွန်းတယ်။ နောက်ဆုံး တိုက်ရိုက် ထုတ်လွှင့်မှုမှာ တင်ဆက်သူ အသုံးပြုခဲ့တဲ့ မြက်ငါးကြင်းနဲ့ ကျောက်ပုစွန်တွေကို အားလုံးသိကြမှာပါ…]

[ငါလေးက သနားဖို့ကောင်းတယ်။ ငါ့ရဲ့ စျေးပေါတဲ့ အာဟာရ ပျော်ရည်လေးကိုပဲ တင်းတင်းကြပ်ကြပ် ဖက်ထားနိုင်တယ်။ တင်ဆက်သူက တိုက်ရိုက် ထုတ်လွှင့်မှု တစ်ခုအတွက် အလွန် စျေးကြီးတဲ့ ပါဝင်ပစ္စည်းများကို ပေါ့ပေါ့ပါးပါး ထုတ်ယူ နိုင်တာကြောင့် သူမက အခုမှ ကြွားလုံး ထုတ်နေတာ မဟုတ်ဘူး။ သူမအိမ်က ရွှေတွင်းတစ်တွင်းကို တကယ်ပဲ ပိုင်ဆိုင်ထားတာ ဖြစ်နိုင်တယ်။ သူမက ငွေကြေး ပြတ်လပ်မှု မရှိတာ လုံးဝသေချာတယ်။]

စုယန်ယန်သည် ပင်လယ်ခရုကို သန့်စင်ပြီး၍ သူမခေါင်းကို မော့ကြည့်လိုက်သော အခါဝယ် သူမသည် ထိုမှတ်ချက်များကို မြင်တွေ့လိုက်ရသည်။

ဖန်သားပြင် မှတစ်ဆင့် ထိုလူများသည် သူမလက်ထဲမှ ပင်လယ်ခရုကို ရွှေတုံးရွှေခဲကဲ့သို့ စူးစိုက်ကြည့်နေမှန်းကို စုယန်ယန် ခံစားမိနိုင်သည်။

စုယန်ယန်သည် သူမ၏ အတွေးများက သူမကို ရယ်မောစေခဲ့သည်။ သူမက ပင်လယ်ခရုကို သန့်စင်ပြီး အဆီနည်းသည့် အသားပိုင်းကို လှီးဖြတ်ကာ အိုးထဲသို့ ထည့်ပြီးနောက် ကိုချီဘယ်ရီကိုပါ ထပ်ထည့် လိုက်သည်။

အဆုံး၌ စုယန်ယန်သည် “ကြီးမားသော” ငွေကြေး ပမာဏ အမြောက်အမြား တန်ကြေးရှိသော ဂျင်ဆင်း တစ်ပိုင်းကို ထုတ်ယူလိုက်သည်။

စုယန်ယန်သည် ဂျင်ဆင်း၏ ဆေးဖက်ဝင် ဂုဏ်သတ္တိများကို တိုက်ရိုက် ထုတ်လွှင့်မှု အခန်းရှိ ပရိသတ်များအား မျှဝေရန် အဆင့်သင့်ဖြစ်နေပြီ ဖြစ်သော်လည်း ဖန်သားပြင်ပေါ်ရှိ မှတ်ချက်များကို မြင်လိုက်ရပြီး နောက်တွင် သူမရဲ့ ရှင်းပြချက်များကို ရပ်တန့်လိုက်သည်။

***

Prev Next