အခန်း (၁၀၆)

ရုတ်တရက် ဖြစ်သွားခဲ့သည့် အစားအသောက်ရှိုး

[ဟမ်... အဲ့တာ ဘာလဲ။ သူ့ကြည့်ရတာ မုန်လာဥဖြူလို ဖြူဖျော့ပြီး ဖောင်းဖောင်းလေး၊ ဒါပေမယ့် သူ့မှာ အမွှေးအမျှင်တွေ ပိုများတယ်နော်။ မုန်လာဥဖြူမှာတော့ ‘အမွှေးမျှင်မျှင်လေး’တွေ ပါမယ်လို့ ငါမထင်ဘူး။]

[အပေါ်ထပ်ကလူရေ မင်းပြောတာ မှားနေတယ်။ မုန်လာဥဖြူမှာ ‘အမွှေးမျှင်မျှင်လေး’တွေ ရှိတယ်၊ သူတို့ကို မြေကြီးထဲကနေ ဆွဲထုတ်လိုက်တဲ့ အချိန်မှာ ‘အမွှေးမျှင်မျှင်လေး’တွေကို ဆုံးရှုံးသွားတယ်။ ဒီအကြောင်းကို ငါ ဘယ်လိုသိလဲလို့ မမေးပါနဲ့၊ လွန်ခဲ့တဲ့ နှစ်တုန်းက မုန်လာဥဖြူတွေကို ကူတူးပေးဖို့ ငါ့သူငယ်ချင်းကို ငါ အကူအညီပေးဖူးလို့ သိနေတာပဲ။

[အပေါ်ထပ်က လူရေ၊ နင် အဲ့တာကို နုတ်ခဲ့ဖူးတာလား။ ဒါဆို အဲ့တာက မုန်လာဥဖြူလား။ အဲ့တာဆို မုန်လာဥဖြူနဲ့ ပင်လယ်ခရုစတူးလို့ ခေါ်ရမှာလား။ တစ်ခုခုတော့ မှားနေတယ်လို့ ထင်နေတယ်။]

စုယန်ယန်သည် သူမ လက်ထဲမှာရှိတဲ့ ပါဝင်ပစ္စည်းကို မုန်လာဥဖြူလို့ အဖြေထုတ်နေကြတဲ့ ကြည့်ရှုသူများကို ကြည့်ရင်း သူမ၏ နှုတ်ခမ်းထောင့်စွန်းလေးများ ကွေးညွှတ် သွားခဲ့ကြသည်။ သူမက အသက်ပြင်းပြင်း ရှူလိုက်ပြီးတော့ ပြောခဲ့သည်။

“ဒါက မုန်လာဥဖြူ မဟုတ်ပါဘူး။ ဒါက ဂျင်ဆင်းပါ။ ဂျင်ဆင်းက အလွန် အဖိုးတန်သော တရုတ်ဆေးဖက်ဝင် အပင်ဖြစ်ပြီး ဂျင်ဆင်းရဲ့ အစိတ်အပိုင်းတိုင်းကို ဆေးဝါးအဖြစ် အသုံးပြုနိုင်ပြီးတော့ အာနိသင် အမျိုးမျိုး သက်ရောက်မှု ရှိပါတယ်။ ဒီနေ့ ကျွန်မတို့ သူ့ရဲ့အသားကို အသုံးပြုပါ့မယ်”

စုယန်ယန်သည် မုန်လာဥဖြူဟု အထင်မှားခံရသော ဖြူဖျော့ဖျော့ ဂျင်ဆင်း၏ အသားကို ညွှန်ပြခဲ့သည်။

“ဂျင်ဆင်းမှာ အလွန် အကျိုးသက်ရောက်တဲ့ အာနိသင်ရှိပြီး ခါးသက်တဲ့ အရသာရှိတာကြောင့် များသောအားဖြင့် သူ့ကို နည်းနည်းလေး အသုံးပြုရုံနဲ့ လုံလောက်ပါတယ်”

သူမ ရှင်းပြပြီးသည့် နောက၌ စုယန်ယန်ဟာ အလွန်ကြီးမားသော ဂျင်ဆင်းကို ဘေးမှာချထားကာ ကြိုတင် လှီးဖြတ်ထားသော ဂျင်ဆင်းပြားအချို့ကို ထုတ်ယူကာ အိုးထဲသို့ ထည့်လိုက်သည်။

“ကောင်းပြီ၊ ကျွန်မတို့ ဒီအိုးကို မီးအေးအေးနဲ့ တည်ထား လိုက်ပါမယ်။ ပြီးတော့ ကျွန်မတို့ နောက်ထပ် စွပ်ပြုတ်တစ်ခုဖြစ်တဲ့ ကြာစေ့၊ တရုတ်ဆီးသီးနဲ့ ဘဲသားစွပ်ပြုတ်ကို ပြင်ဆင်ကြရအောင်။ ကျွန်မရဲ့ အရင် တိုက်ရိုက် ထုတ်လွှင့်မှုတွေကို ကြည့်ရှုဖူးတဲ့ သူတွေကတော့ တရုတ်ဆီးသီးကို သိကြမယ် ထင်ပါတယ်။ မသိသေးတဲ့ သူတွေကတော့ ဒီအကြောင်းကို ပိုသိချင်ရင် အရင်က တိုက်ရိုက် ထုတ်လွှင့်မှုတွေကို သွားကြည့်နိုင်ပါတယ်။ အခုတော့ ကြာစေ့တွေ အကြောင်းကို ရှင်းပြပါ့မယ်...”

စုယန်ယန်သည် ပန်းကန်တစ်လုံးထဲသို့ ပုလဲလို ဖြူဖွေး လတ်ဆတ်နေသော ကြာခွက်တစ်စည်းကို လောင်းထည့်ကာ ကြာစေ့ကို အခွံနွှာပြပြီး ရှင်းပြခဲ့သည်။

“ဒါက ကြာစေ့တွေပါ။ ကြာစေ့တွေကို ကြာခွက်ကနေ ထုတ်ယူထားပြီး မွှေးကြိုင်တဲ့ အနံ့ရှိတယ်။ ကြာစေ့က အာဟာရ လိုအပ်ချက်များကို ပြန်လည် ဖြည့်တင်းစေပြီး စိတ်ငြိမ်စေသော အာနိသင်လည်း ရှိပါတယ်။ ဒါကို စားသုံးရင် သရက်ရွက်နဲ့ အစာအိမ်ကို အားကောင်းစေတယ်။ အပူကိုလျှော့ချပေးပြီး အိပ်စက်မှု အရည်အသွေးကို ကောင်းမွန်စေတယ်။ အိပ်စက်ခြင်းဆိုင်ရာ ပြဿနာတွေကို ကြုံတွေ့နေရတဲ့ သက်ကြီး ရွယ်အိုတွေဟာ ဒါကို စားသုံးပေးမယ်ဆိုရင် အိပ်စက်ခြင်းဆိုင်ရာ ပြဿနာတွေကို သက်သာပျောက်ကင်း သွားစေနိုင်ပါတယ်”

“မှတ်ထားစရာ တစ်ခုရှိပါတယ်၊ ဒါက ကြာစေ့ရဲ့ အလယ်ခေါင်မှာ အစိမ်းရောင်လေး ရှိနေတာကို တွေ့ရလိမ့်မယ်။ အဲ့တာလေးက ခါးသက်တဲ့ အရသာရှိတဲ့အတွက် အဲဒီအရသာကို မကြိုက်နှစ်သက်တဲ့ မိတ်ဆွေတွေက အဲ့တာကို ဖယ်ရှားနိုင်ပါတယ်၊ ဒါပေမယ့် အဲ့တာကို လွှတ်ပစ်စရာ မလိုအပ်ပါဘူး။ အဲ့တာကို နေပြလို့ ခြောက်သွေ့တဲ့ အခါကျရင် ရေနွေးကြမ်းထဲ ထည့်သောက်နိုင်ပါတယ်။ သူက အပူဒဏ်ကို လျှော့ချပေးနိုင်စွမ်းရှိပါတယ်”

[... မင်း သိသမျှ အကုန်လုံးကို ပြောပြပေးပေမယ့် ငါတို့က အဲ့တာတွေကို ဘယ်နေရာမှာ ရှာဖွေရမှန်းကိုတောင် မသိကြဘူး၊ မစားရမှာကို စိုးရိမ်တယ်...]

[ရှာဖွေမှုအရှင်သခင်ရေ၊ စျေးဝယ်ကွန်ရက်မှာ ဂျင်ဆင်းနဲ့ ကြာစေ့တွေကို ရှာဖွေဖို့ ကြိုးစားခဲ့ပေမယ့် ဘာမှ မပေါ်လာခဲ့ဘူး။ TAT]

[ဂျင်ဆင်းနဲ့ ကြာစေ့တွေအပြင် တင်ဆက်သူ အသုံးပြုပြီး ချက်ပြုတ်ပြတဲ့ တရုတ်ဆီးသီး၊ ရေနဂါးနဲ့ တခြား ပါဝင်ပစ္စည်းတွေကို အွန်လိုင်းပေါ်က စျေးဆိုင်တွေမှာ ရောင်းချနေခြင်းမျိုး မတွေ့ရှိဘူး။ QAQ!]

[ဟုတ်တယ် ဟုတ်တယ်။ တင်ဆက်သူရေ ဒီဆေးဖက်ဝင် ပစ္စည်းများကို ငါတို့ကို မိတ်ဆက်ပေးနိုင်ရင် သူတို့ကို ဘယ်နေရာမှာ ဝယ်ယူနိုင်မလဲ ဆိုတာကိုပါ ငါတို့ ပြောပြပေးပါ။ အခုတော့ ငါလေး ဝမ်းနည်းပက်လက် ငိုကြွေးနေမိပြီ။]

စုယန်ယန်သည် ဒီညည်းသံ အားလုံးကို မြင်တွေ့လိုက်ရသော အခါတွင် သူမ လုပ်ကိုင်နေသမျှကို ရပ်တန့်လိုက်ပြီး စဉ်းစားလိုက်သည်။

သူမ၏ ဆေးဖက်ဝင် ပါဝင်ပစ္စည်းတွေကို ဝယ်ယူနိုင်မယ့် အရင်းအမြစ်ကို ကြော်ငြာပြီး သူမ၏ ပရိသတ်တွေ ဝယ်ယူအားပေးနိုင်ဖို့ ကြော်ငြာသည့် အနေဖြင့် သူမ၏ ဖြူဖွေးသွယ်လျသော လက်ချောင်းများဖြင့် ကြာစေ့ လက်တစ်ဆုပ်စာ ကောက်ကိုင်လိုက်ကာ တိုက်ရိုက် ထုတ်လွှင့်မှု ဧရိယာမှာ စားပြခဲ့သည်။

တိုးသဲ့တဲ့ တကျွတ်ကျွတ် ဝါးသံနှင့်အတူ စိတ်ကျေနပ်နေသည့် အသံလေးကို ကြားလိုက်ရသည်။ “အင်း... ချိုပြီးကြွပ်ရွတယ်၊ အရသာက တော်တော် စားကောင်းတာပဲ”

ကြည့်ရှုသူများ “???”

သူမ၏ ပရိသတ်တွေက ဘာဖြစ်သွားတာလဲ ဆိုတာကို မရိပ်မိခင်မှာ စုယန်ယန်၏ လက်တွေက ကြာစေ့ ပန်းကန်လုံးဆီသို့ နောက်တစ်ခေါက် ထပ်ရောက်သွားကာ ထပ်ကာထပ်ကာ စားသောက်ပြခဲ့သည်။ ထို့နောက် စုယန်ယန်သည် ထိုပန်းကန်ဘေးရှိ တရုတ်ဆီးသီးဆီသို့ လက်လှမ်းခဲ့သည်။

ကြည့်ရှုသူများသည် နောက်ဆုံး၌ သူတို့၏ သောင်းကျန်းတတ်သော တင်ဆက်သူက သူတို့ရှေ့မှောက်တွင် ပါဝင်ပစ္စည်းများကို စားသောက်ပြနေမှန်းကို သိလိုက်ရသဖြင့် သူတို့ စိတ်ရှုပ်ထွေးနေရာမှ နိုးထလာခဲ့ကြသည်။

ခဏနေပါဦး၊ ဒါက အချက်အပြုတ် ထုတ်လွှင့် တင်ဆက်မှု ဖြစ်ပြီးတော့ အစားအသောက် စားပြတဲ့ အစီအစဉ် မဟုတ်ဘူးလေ။ အခု ငါတို့ကို ပါဝင်ပစ္စည်းတွေ ဘယ်နေရာမှာ ဝယ်ယူနိုင်မလဲ ဆိုတာကိုပဲ ပြောပြပေးပါ။

***

Prev Next