အခန်း (၃၃၂)

- ဘုရင်မအား ကယ်တင်ရန် တပ်သားကိုစတေးခြင်း

စုယန်ယန်သည် ဟောက်ချန်ဟွမ်း၏ စကားကို ကြားပြီး‌နောက် အချိန်အတော်ကြာ တိတ်ဆိတ်နေ၏။

ဟောက်ချန်ဟွမ်းသည် သူမ၏အမူအရာကို သတိထားမိသွားကာ သူ့မျက်လုံးများ မည်းမှောင်လာခဲ့သည်။ “မင်း .... ကိုယ်က အရမ်းရက်စက်လွန်းတယ်လို့ မင်းထင်လား။”

စုယန်ယန် သူ့ကို မော့ကြည့်လိုက်သည်။ “ရက်စက်တယ်လား။”

ထို့နောက် သူမသည် ဟာသတစ်ခုကြားလိုက်ရသလိုမျိုး မထိန်းနိုင်ဘဲ ရယ်ချလိုက်သည်။ “ဘာဖြစ်လို့ အဲဒီလို ကျွန်မက ထင်ရမှာလဲ။ ဟောက်ချီဟန်နဲ့ သူ့မိသားစုက ဘယ်လိုလူမျိုးတွေလဲဆိုတာ ကျွန်မ မသိဘူးလို့ ရှင်ထင်နေတာလား။ ကျွန်မက သူတော်စင်တစ်ယောက် မဟုတ်ပေမယ့် အင်း၊ ဒီတစ်ခေါက်မှာတော့ သူတို့ကို သနားမိနေတုန်းပဲ ပြီးတော့ …”

“ပြီးတော့...”

စုယန်ယန်သည် ရုတ်တရက်ဆိုသလိုပင် ဟောက်ချန်ဟွမ်း အနားသို့ ကပ်သွားကာ သူ့မျက်လုံးများကို စိုက်ကြည့်လိုက်သည်။ “ကျွန်မ ရှင့်ကိုယုံတယ်။ ရှင်လုပ်သမျှ အရာအားလုံးက အကြောင်းပြချက်ရှိလို့ပဲ။ ရှင့်အတွက်ရှင်လုပ်တာပဲဖြစ်ဖြစ် တခြားအကြောင်းတစ်ခုခုကြောင့်ပဲဖြစ်ဖြစ် ကျွန်မက ရှင့်ကို ခြွင်းချက်မရှိ ယုံကြည်ပြီး ပံ့ပိုးပေးနေမှာ”

ဟောက်ချန်ဟွမ်းမှာ စုယန်ယန်၏ စကားကိုကြားပြီး နောက်ဆုံးတွင် စိတ်သက်သာရာရသွားသည်။ သူ၏မျက်လုံးများတွင် နွေးထွေးမှုအပြည့်ရှိနေသည်။

“ဒီကိစ္စကို ကျွန်မတို့ ဘယ်လိုကိုင်တွယ်ကြမလဲ။”

“ဒါကသ တစ်ခုတည်းသော ကိစ္စဆိုရင် ဟောက်ချီဟန်က ဘူမိဗေဒပညာရှင်တွေနဲ့ စကားကောင်းကောင်းပြောပြီး ကုမ္ပဏီရဲ့ ဆုံးရှုံးမှုအတွက် လျော်ကြေးငွေအချို့ ရယူပြီး ပြန်ပြင်ဆင်နိုင်လိမ့်မယ်။”

စုယန်ယန်သည် ဟောက်ချန်ဟွမ်း ပြောချင်တာကို နားလည်သွားပြီး သိချင်စိတ်ပြင်းပျစွာ မေးလိုက်၏။

“ကျွန်မတို့ အဲ့ဒါကို အခု မလုပ်နိုင်ဘူးမလား။”

“မင်း ဟောက်ရှောက်ဖုန်းနဲ့ အဲ့ဒီအမျိုးသမီးအကြောင်း မင်းဖော်ထုတ်ခဲ့တာကို မေ့သွားပြီလား။”

စုယန်ယန်သည် စိတ်ရှုပ်ထွေးစွာဖြင့် မျက်တောင်ခတ်လိုက်၏။ “ဒီကိစ္စနှစ်ခုက ဆက်စပ်နေလို့လား။”

“မင်းဝယ်ခဲ့တဲ့ ရေတပ်အုပ်စုက ဟောက်ရှောက်ဖုန်းနဲ့ အဲ့ဒီအမျိုးသမီးကို ဆဲဆိုရုံမကဘူး၊ ဟောက်ရှောက်ဖုန်းရဲ့ ကြီးပြင်းလာပုံနဲ့ ဟောက်ကော်ပိုရေးရှင်းကိုပါ ဆဲဆိုပြစ်တင်ခဲ့ကြတယ်။”

စုယန်ယန်သည် ဟောက်ချန်ဟွမ်းတစ်ယောက် သူမ ရေတပ်တွေအား ငှားရမ်းထားကြောင်းကို သိနေမည်ဟု မမျှော်လင့်ခဲ့ပေ။ စုယန်ယန်သည် ရှက်ရွံ့စွာဖြင့် ရေရွတ်လိုက်သည်။ “ရှင်က ဘယ်လိုလုပ်ပြီး အကုန်လုံးကို သိနေတာလဲ။”

“မင်း အမှားလုပ်မိတယ်လို့ ခံစားရမှာစိုးလို့ ကိုယ်က အရာအားလုံးကို စောင့်ကြည့်ပေးနေတာလေ။”

ဟောက်ချန်ဟွမ်း၏ အသံသည် လေးနက်နေသော်ငြား စုယန်ယန်မှာ သူ့စကားထဲက ချိုမြိန်မှုကို ခံစားနေရ၏။ သူမ၏ အပြုံးတို့မှာ ပို၍ပို၍ ပီပြင်လာခဲ့သည်။

“ဟမ့်၊ သူတို့ ကျွန်မကို ပြဿနာရှာလာတုန်းက သူ့အဖေက ဟောက်ကော်ပိုရေးရှင်းရဲ့ မဏ္ဍိုင်ကြီးဆိုပြီး သူ့ကို ဘယ်သူက ကြွားလုံးထုတ်ခိုင်းလို့လဲ။ သူတို့ကို သင်ခန်းစာပေးဖို့ ကျွန်မတို့ကုမ္ပဏီလုံခြုံရေးကိုတောင် ခေါ်ခဲ့ရတယ်။ သူတို့ကို တကယ်သင်ခန်းစာပေးမယ့်သူက ဘယ်သူလဲဆိုတာ ကျွန်မ စောင့်ကြည့်ချင်သေးတယ်။”

ဟောက်ချန်ဟွမ်းသည် စုယန်ယန်၏ မာနကြီးတဲ့ သဘောထားကို သဘောကျစွာဖြင့် အပြုံးလေးတစ်ခုနှင့် ပြန်ပြောလိုက်သည်။ “အစကတော့ ဒီကိစ္စနှစ်ခုက ဘာမှမဆိုင်ဘူး။ ဒါပေမယ့် အွန်လိုင်းကီးဘုတ်စစ်သည်တော်တွေနဲ့ မင်းပြောခဲ့သလိုပဲ ဟောက်ရှောက်ဖုန်းက မင်းကို ခြိမ်းခြောက်တဲ့ ဗီဒီယိုမှာ ဟောက်ကော်ပိုရေးရှင်းနဲ့ ဟောက်ချီဟန်ရဲ့နာမည်ကို အသုံးပြုခဲ့တယ်။ ဒါက ဟောက်မိသားစုရဲ့ အတွင်းရေးစိတ်ဓာတ်ကို လူအများအား သံသယဖြစ်စေပြီး ဟောက်ကော်ပိုရေးရှင်းရဲ့ ဂုဏ်သိက္ခာကိုလည်း ထိခိုက်စေခဲ့တယ်။”

“ဒီလိုအချိန်မှာ ဟောက်မိသားစုရဲ့ ဖွံဖြိုးရေးဇုန် တည်ဆောက်ရေးနေရာကနေ တူးဖော်ရရှိတဲ့ ရှေးဟောင်းရုပ်ကြွင်းတွေကို ဖော်ထုတ်ဖို့ကို ဟောက်မိသားစုက အခုအချိန်မှာ လျော်ကြေးအများကြီးတောင်းရင် ဘာဖြစ်မယ်လို့ မင်းထင်လဲ။”

စုယန်ယန်တစ်ယောက် ဉာဏ်အလင်းပွင့်သွား၏။ “အင်တာနက်ပေါ်မှာ ဖြောင့်မတ်သူလေးတွေက သူတို့ကို အရမ်းအရမ်း လောဘကြီးတဲ့ အရင်းရှင်တွေလို့ ပြောမှာ သေချာတယ်။”

“ကုမ္ပဏီက ကြီးလေလေ သူတို့ရဲ့ နာမည်ဂုဏ်သတင်းကို ပိုတန်ဖိုးထားလေပဲ။ ဟောက်ချီဟန်က အစကတော့ ဒီအမှားကို ပြင်ဆင်ဖို့ အခွင့်အရေးရှိခဲ့ပေမယ့် အခု ဟောက်ရှောက်ဖုန်းရဲ့ လွှမ်းမိုးမှုကြောင့် သူ့ရှေ့မှာ လမ်းတစ်လမ်းပဲ ရှိတော့တယ်။”

“အဲ့ဒါ ဘာလဲ။”

“ကုမ္ပဏီရဲ့ ဂုဏ်သိက္ခာကို ကာကွယ်ဖို့ အဲဒီမြေကို သေချာပေါက် လှူဒါန်းရတော့မှာပေါ့။”

ဘုရင်မကို ကယ်တင်ဖို့ တပ်သားတွေကို စတေးတာက တကယ်ကို အခုလောလောဆယ် ပြုလုပ်လို့ရမယ့် တစ်ခုတည်းသော နည်းလမ်းဆိုပေမယ့် ...

“သူက အဲ့လိုလုပ်ပါ့မလား။”

“သူ့မှာ ရွေးချယ်စရာမရှိဘူး။ အဲ့လိုမလုပ်ဘူးဆိုရင် ဟောက်မိသားစုရဲ့ အခြေခံအုတ်မြစ်ကို ဖျက်ဆီးလိုက်တာပဲ။ သူ မကျေနပ်ဘူးဆိုရင်တောင် တစ်စုံတစ်ယောက်က သူ့ကို အဲ့လိုလုပ်ဖို့ ဖိအားပေးလိမ့်မယ်။”

“ဒါပေမယ့် ကုမ္ပဏီရဲ့ အကြီးပိုင်းတွေက သူ့ကို ဒီလို ဆုံးဖြတ်ချက်ချခွင့်ပေးပါ့မလား။”

ဟောက်ချန်ဟွမ်းသည် မျက်လုံးကို မှိတ်ပြီး ရယ်မောလိုက်သည်။ “သူတို့လုပ်ရမှာပဲ။ ဒါက တစ်ခုတည်းသော နည်းလမ်းပဲဆိုတာ သူတို့သိတယ်။ ဒါပေမယ့် သူတို့သိနေတယ်ဆိုရင်တောင် ဒေါသမထွက်ဘဲတော့ ‌နေနိုင်မှာမဟုတ်ဘူး။”

Prev Next