အပိုင်း ၁၅၀ (End)

Chapter 150

END Of Bonus chapter

ရှန်းနန့်ထန်က ​စောင့်​စား​နေဆဲပင်။ "ပါးပါးနဲ့ မားမား မြန်မြန် စားကြည့်"

ရှန်းယွဲ့က အကြီးကြီးကိုက်ကာ မ​နေနိုင်ဘဲ ထပ်ချီးကျူးပြန်သည်။ "အရသာ ရှိလိုက်တာ... ချဥ်ချဥ် ချို​ချို​လေး... ပါးပါးရဲ့ ​တော်ဖီ​လေးက အရမ်း အံ့သြဖို့ ကာင်းတာပဲ"

ရှန်းနန့်ထန်က ပြုံးလိုက်သည်။ သူမက သူမ၏ အ​မေဘက်လှည့်ကာ ကြည့်လိုက်ပြီး ရုတ်တရက် ဗျာများ လာ​တော့သည်။ သူမအ​မေက အသီးအရွက် စိုက်သည့်​နေရာတွင် ဆရာသခင်တစ်​ယောက် ဖြစ်သည်​ကြောင့်ပင်။ သူမ၏မိခင်ဆီမှ ​ထောက်ခံချက်ကသာ စစ်​ဆေးမှုကို ​အောင်နိုင်ပြီး ​နောက်ထပ် အသီးအရွက်ခင်းတစ်ခု ထပ်ရနိုင်မှာ ဖြစ်သည်။

ထန်​​ချောင်း​ချောင်းက ခရမ်းချဥ်သီးကို အ​လေးအနက် ကြည့်လိုက်ပြီး​နောက် အကိုက်​သေး​သေး​လေးတစ်ခု ကိုက်ကာ ​သေချာ အရသာခံလိုက်သည်။

"အရမ်း ​ခြောက်လွန်းတယ်... အရည် အလုံအ​လောက် မရွှမ်းဘူး"

ရှန်းနန့်ထန်၏ မျက်နှာ​သေး​သေး​လေးက ချက်ချင်း ငိုက်စိုက်ကျသွားသည်။ သူမ​ခေါင်း​ပေါ်မှ ဆံပင်ဖွာဖွာ​လေးများပင် ငိုက်ကျသွား​လေသည်။

ရှန်းယွဲ့က သူမ​လေး ဝမ်းနည်း​နေသည်ကို ကြည့်မ​နေနိုင်​တော့​ပေ။ 

"အရမ်းကြီး မတင်းကြပ်လွန်းပါနဲ့... ​တော်ဖီ​လေးက အရမ်း ​တော်လွန်း​နေပြီးသားပါ" 

ရှန်းယွဲ့က သူ့သမီးအ​ပေါ်တွင် အလိုလိုက်လွန်းသဖြင့် ထန်​ချောင်း​ချောင်းကလည်း စည်းကမ်းတင်းကြပ်သည့်အ​မေ ဖြစ်ရသည်။

ထန်​ချောင်း​ချောင်း သူမ၏ သမီးကို ကြည့်လိုက်ပြီး အပြုံး​လေးတစ်ခုဖြင့် ​ပြောလိုက်သည်။

 "ဒါ​ပေမယ့်လည်း အချိုက​တော့ ပြည့်ပါတယ်"

ရှန်းနန့်ထန်က ထိုစကားကို ကြားလိုက်သည်နှင့် ကိုယ်မတ်သွားကာ ​ရွှင်မြူးသွားခဲ့သည်။

ထန်​ချောင်း​ချောင်း: "ဆက်ပြီး ကြိုးစား​နေ​နော်...သမီးအတွက် ​နောက်ထပ် စိုက်ခင်းတစ်ခု ထပ်ဖွင့်​ပေးမယ်"

"ဟုတ်"

ရှန်းနန့်ထန်က သူမနားရွက်​လေးများ နီရဲသွားသည်အထိ စိတ်လှုပ်ရှား​နေပြီး ရှန်းယွဲ့နှင့် လက်ဝါးချင်းရိုက်လိုက်​လေသည်။

ခရမ်းချဥ်သီးများကို နှစ်ကိုက်မျှစားပြီး​​နောက် ထန်​ချောင်း​ချောင်းက သူမသမီးကို ​မေးလိုက်သည်။ "​တော်ဖီ​လေး... မားမား တစ်ခု ​မေးမလို့... သမီး တီဗီမှာ ပါချင်လား"

"လမ်း​လျှောက်ခြင်း အနုပညာ" ၏ ဒါရိုက်တာက သူမကို ဆက်သွယ်လာပြီး ​နေ့လည်က ဖြစ်ပျက်ခဲ့သည်များကို ​ပြောပြခဲ့သည်။ သူက ​တော်ဖီ​​လေး သူ့ မှတ်တမ်းရုပ်ရှင်တွင် ပါဝင်ရန် လက်ခံမည်လားဟု ​မေးခဲ့သည်။ သူမသာ သ​ဘောမတူပါက ​နေ့လည်က ရိုက်ထား​သော ဗီဒီယိုများအားလုံးကို ဖျက်ပစ်လိုက်မည် ဖြစ်သည်။

ထန်​ချောင်း​ချောင်းနှင့် ရှန်းယွဲ့က သမီးဖြစ်သူကို ကာကွယ်လို​သော​ကြောင့် အပြင်ကို ထုတ်မပြခဲ့​ပေ။ သို့​သော်လည်း ယခုတွင်မူ သမီး​လေးက သုံးနှစ် ရှိ​နေပြီ ဖြစ်ပြီး ကိုယ်ပိုင်အ​တွေးအမြင်များလည်း ရှိ​နေ​ပေပြီ။သူမအ​နေဖြင့် သူမ​လေး၏ အမြင်ကိုလည်း ​မေးကြည့်ရမည်ပင်။

ရှန်းနန့်ထန်က တီဗီကို ထိုးပြလိုက်သည်။ "သမီးက မားမားလို တီဗီမှာ ပါရမှာလား"

ထန်​ချောင်း​ချောင်းက ​ခေါင်းငြိမ့်ပြလိုက်သည်။ "ဟုတ်တယ်"

ရှန်းနန့်ထန်က လက်ညှိုး​လေးကို ရစ်ပတ်​နေကာ ​မေးလိုက်သည်။ "တီဗီမှာပါရင် သမီးကို လူ​တွေအများကြီး သိကြမှာလား"

"ဒါ​ပေါ့... သမီးမားမားမှာ ဖန်​တွေအများကြီး ရှိသလို​ပေါ့" ရှန်းယွဲ့က နူးနူးညံ့ညံ့​ ပြောလိုက်သည်။

ရှန်းနန့်ထန်၏ မျက်လုံးများ ​တောက်ပသွားသည်။ "​တော်ဖီ​လေး သွားမယ်"

သူမကို လူ​တွေ ပိုသိလာကြပါက လူ​အများကြီးက သူမ၏ လယ်​တောဆီသို့ အသီးအရွက် ဝယ်ရန် လာကြမည်ဖြစ်ပြီး သူမသည်လည်း ပိုက်ဆံအများကြီး ရှိလာနိုင်သည်။

ထန်​ချောင်း​ချောင်းက သူမကို သတိ​ပေးလိုက်သည်။ "ဘာပဲဖြစ်ဖြစ် ​တော်ဖီ​လေးကို မကြိုက်ကြတဲ့ လူ​တွေလည်း ရှိလာနိုင်တယ်နော်"

ရှန်းနန့်ထန်က ခိုင်ခိုင်မာမာ ​ပြောလိုက်သည်။ 

"​တော်ဖီ​လေး မ​ကြောက်ဘူး... လူ​တွေ သမီးကို မကြိုက်ကြရင် ​တော်ဖီ​​လေးက သူတို့ကို လျစ်လျူရှုလိုက်မယ်"

ထန်​ချောင်း​ချောင်းနှင့် ရှန်းယွဲ့က အချင်းချင်း ကြည့်ကာ ပြုံးလိုက်ကြသည်။ သူတို့၏ သမီး​လေးက အူ​ကြောင်​ကြောင်နိုင်ကာ ချစ်စရာ ​ကောင်း​သော်လည်း သူမက​ အမှန်ကိုပဲ ပြော​နေခဲ့သည်။ သူမကို မကြိုက်ကြ​သော လူများကို လျစ်လျူရှုလိုက်ခြင်းက အဆင်​ပြေသည်ပင်။

ထိုစုံတွဲက သမီးဖြစ်သူကို တီဗီတွင် ပါရသည်က မည်ကဲ့သို့ ဖြစ်သည်အ​ကြောင်း ​နောက်တစ်​ခေါက် ထပ်ရှင်းပြလိုက်​သော်လည်း ​တော်ဖီ​လေးက ဆန္ဒရှိ​နေဆဲပင်။ ထ်ု့​ကြောင့် ထန်​ချောင်း​ချောင်းက ဒါရိုက်တာကို ဖုန်း​ခေါ်ကာ သမီးဖြစ်သူ မှတ်တမ်းရုပ်ရှင်တွင်ပါရန် သ​ဘောတူ​ကြောင်း ​ပြောပြခဲ့သည်။ သို့​သော်လည်း မထုတ်လွှင့်ခင်တွင် သူမက အရင်ကြည့်ထားမှ ဖြစ်သည်။

တစ်ပတ်ကြာ​သောအခါ ဒါရိုက်တာက မှတ်တမ်းရုပ်ရှင်၏ ​နောက်ဆုံးအပိုင်းမှ နမူနာများကို ထန်​ချောင်း​ချောင်းဆီ ပို့​ပေးလိုက်သည်။ မိသားစုသုံး​ယောက်က တီဗီ​ရှေ့ထ်ုင်ကာ ကြည့်လိုက်ကြသည်။

ပထမဆုံးအပိုင်းမှ ရိုက်ကွက်အများစုမှာ လယ်​တော အ​ကြောင်းသာ ဖြစ်ပြီး ၎င်းက လှပကာ ကဗျာဆန်လှသည်။ အလယ်ပိုင်းတွင် ​တော်ဖီ​လေး ​ပေါ်လာခဲ့သည်။

ရှန်းနန့်ထန်က သူမကိုယ်တိုင် တီဗီတွင် ပါလာသည်ကို ​တွေ့​သောအခါ သူမမျက်နှာက အံ့အားသင့်မှု အပြည့်ဖြစ်သွားခဲ့သည်။ ထို့​နောက် သူမက သူမ၏ ​ခွေး​ခြေ​သေး​သေး​လေးကို ဆွဲကာ တီဗီအနားသို့ အနီးကပ် သွားကြည့်လိုက်သည်။

ထန်​ချောင်း​ချောင်းနှင့် ရှန်းယွဲ့တို့က သူတို့၏ သမီးကို တီဗီမျက်နှာပြင်​ပေါ်တွင် ​တွေ့လိုက်ရ​သောအခါ နက်နက်နဲနဲ လှုပ်ရှားသွားကြသည်။

သို့​သော်လည်း "ပါးပါးက အလုပ် မရှိဘူး"၊ "ပါးပါးက ​ငွေမရှာနိုင်ဘူး"၊ "မားမားသာ အသက်ကြီးသွားရင် သမီးတို့ ပိုက်ဆံမရှိလို့ ဗိုက်ဆာပြီး ​သေသွားလိမ့်မယ်"နှင့် စသည်ဖြင့် စကားလုံးများ ​တော်ဖီ​လေး၏ နှုတ်ဖျားမှ ထွက်လာသည်ကို ကြားလိုက်​ရ​သောအခါ စုံတွဲ၏ စိတ်​လေးလက်​အေး ဖြစ်​နေ​သော အပြုံးများ ​တောင့်ခဲသွားသည်။

အထူးသဖြင့် ရှန်းယွဲ့ပင်။ သူ့အမူအယာက အ​တော်​လေး အက်ကွဲသွားသည်။

ဘုရား​ရေ... သူ့သမီးရဲ့ နှလုံးသားထဲမှာ သူက ဘယ်လို ပုံရိပ်မျိုး ဖြစ်​နေတာလဲ...

ရှန်းယွဲ့က ရှန်းနန့်ထန်ကို ​ပွေ့ချီကာ ဂရုတစိုက် ​မေးလိုက်သည်။ "​တော်ဖီ​လေး ပါးပါးကို​ပြော... ဘာလို့ ပါးပါးမှာ အလုပ်မရှိဘူးလို့ ​ပြောရတာလဲ"

ရှန်းနန့်ထန်က ရှန်းယွဲ့၏ ​ခေါင်းကိုပုတ်ကာ နှစ်သိမ့်​​ပေးလိုက်သည်။

"ပါးပါး... ပါးပါးမှာ အလုပ်မရှိလို့ ​​ငွေမရှာနိုင်ဘဲ မားမားရဲ့ ထမင်း​ပျော့ စား​နေ​ရေင်​တောင် ​တော်ဖီ​လေးက ပါးပါးကို မကြိုက်တာမျိုး မရှိဘူး​နော်... ​တော်ဖီ​လေး ကြီးလာရင် အသီးအရွက်​တွေ များများ စိုက်မယ်... ပိုက်ဆံ များများရလာရင် ပါးပါးကို ​ထောက်ပံ့​ပေးမယ်​​နော်"

'ထမင်း​​ပျော့စားတယ်လား'

'​တော်​တော်​လေး ထိသွားတဲ့ ​ဝေဖန်ချက်ပဲ'

[T/N ထမင်း​ပျော့စား​တယ်ဆိုတာ အသက်ရှင်ဖို့ မိန်းမ​​တွေအ​ပေါ်မှီခို​နေတဲ့ ​ယောကျ်ား​တွေပါတဲ့]

ထန်​ချောင်း​ချောင်းက လှုပ်ခါသွားသည်အထိ ရယ်​မောလိုက်သည်။ သူမက ဆိုဖာမှပင် ပြုတ်ကျသွား​လေသည်။

ရှန်းယွဲ့က မယုံနိုင်ခြင်းများစွာဖြင့် တတွတ်တွတ် ​ရေရွတ်​နေသည်။ "ငါက ထမင်း​ပျော့ စားတယ်တဲ့လား"

သူက ဂုဏ်သိက္ခါရှိ​၍ လူသိများ ​​ကျော်ကြား​သော အုပ်စုတစ်ခု၏ ဥက္ကဌ ဖြစ်ကာ စွန့်ဦးစီးပွား​ရေး လုပ်ငန်း၌ အ​ကျော်ကြားဆုံး အရည်အချင်းရှိသည့် လူငယ်တစ်​ယောက်အဖြစ် ချိုက်ကျင်း အပတ်စဥ်၏ မျက်နှာဖုံးတွင် ​ဖော်ပြခံခဲ့ရသည်။ သူက ထမင်း​ပျော့စားတဲ့ ​ယောကျ်ားမျိုး ဖြစ်သွားတယ်တဲ့လား...

ရှန်းနန့်ထန်က အ​လေးအနက်ထား​သော မျက်နှာဖြင့် ​ပြောလိုက်သည်။ 

"မားမားက ရုပ်ရှင် ရိုက်ရင်း အလုပ်များ​နေတာ... ပါးပါးက ​နေ့တိုင်း မားမား​နောက်မှာ ​ပြေးလွှာ​နေတာ... ​ဘေးအိမ်က ဖက်တီး​ပြောတာ အဲ့ဒါ ထမင်း​ပျော့ စားတာပဲတဲ့"

'​ဘေးအိမ်က ဖက်တီး'

​ကောင်းလိုက်တာ... ​နောက်ဆို အဲ့ဒီ ကပ်တွယ်တတ်တဲ့​​ကောင်ကို သူ့သမီးနဲ့ အဆက်အသွယ် မလုပ်ခိုင်းတော့ဘူး... ရှန်းယွဲ့က တိတ်တဆိတ် ​တေးမှတ်ထားလိုက်သည်။

ထန်​​ချောင်း​ချောင်းက အ​ဖေနှင့် သမီး၏ စကား​ပြော​နေကြ​သောအခါ ရယ်ရလွန်း၍ မျက်ရည်များပင် ကျလာခဲ့သည်။ ရှန်းနန့်ထန်က သူမမျက်နှာကိုလှည့်ကာ ​ပြောလိုက်သည်။

 "မားမား မငိုပါနဲ့... ​မားမားလို ပုလဲအိုကြီး ဆံပင်ဖြူလာလို့ ရုပ်ရှင် မရိုက်ရ​တော့ရင် အသီးအရွက်​တွေစိုက်ပြီး ပိုက်ဆံရှာ​ပေးမယ်​​လေ"

ထန်​ချောင်း​ချောင်း: 'ငါက ဆံပင်ဖြူ​တော့မယ့် ပုလဲအိုကြီးတဲ့လား'

သူမက နှစ်ဆယ့်ရှစ်နှစ်မှာ ဖူးသစ်စ ပန်း​လေးလိုပါပဲ​နော်... ဘယ်သူက အိုပြီး ဆံဖြူ​နေလို့လဲ...

ဤအကြိမ်၌ အရယ်မရပ်နိုင်သူမှာ ရှန်းယွဲ့ဖြစ်သည်။ 

ထန်​ချောင်း​ချောင်း နှုတ်ခမ်းတွန့်ချိတ်သွား​လေသည်။ "အဲ့ဒါကိုလည်း ​ဘေးအိမ်က ဖက်တီး ​ပြောတာပဲလား"

ရှန်းနန့်ထန် ​ခေါင်းငြိမ့်ပြလိုက်သည်။

​ကောင်းပြီ... ​ဘေးအိမ်က ဖက်တီးက​တော့ ရှန်းမိသားစုရဲ့ နာမည်ပျက်စာရင်းထဲ လုံးဝဝင်သွားခဲ့​လေပြီ...

​နောက်တွင် ရှန်းယွဲ့က အချိန်အကြာကြီး ယူကာ သူက ထမင်း​ပျော့စား​နေခြင်း မဟုတ်ဘဲ သူမ၏ မားမားကို ချစ်သည့်အတွက် သွား​လေရာ အမြဲတမ်းလိုက်​နေခြင်းဖြစ်​ကြောင်း သမီးဖြစ်သူကို ရှင်းပြခဲ့သည်။

သို့​သော်လည်း ​တော်ဖီ​လေးမှာ ယုံကြည်ဟန် မတူ​ပေ။ သူမက သူမ၏ အ​ဖေဖြစ်သူက သူမကို နှစ်သိမ့်​နေခြင်းသာ ဖြစ်​ကြောင်း ခံစား​နေရသည်။

ရှန်းယွဲ့က အလွန် ထိခိုက်သွားရ​လေသည်။ 

"လမ်း​လျှောက်ခြင်း အနုပညာ"၏ မှတ်တမ်းရုပ်ရှင် ထုတ်လွှင့်ရန် အချိန်အကြာကြီး မယူခဲ့ရ​ပေ။ ပြီး​တော့ ရှန်းနန့်ထန်၏ စကားလုံးများလည်း မဖြတ်ထုတ်ခဲ့။ ထန်​ချောင်း​ချောင်းက သမီးဖြစ်သူ၏ က​လေးဆန်သော စကားများမှာ အ​တော်​လေး စိတ်ဝင်စားဖွယ်​​ကောင်းသည်ဟု ထင်​နေခဲ့သည်။ သူမ ကြီးပြင်းလာပါက သူမ ၏သမိုင်းဆိုးအ​ကြောင်း ပြန်ကြည့်ပြီး မည်သို့ ဖြစ်မည်ကို ​သိချင်​နေခဲ့သည်။

ထန်​ချောင်း​ချောင်းနှင့် ရှန်းယွဲ့တို့၏ သမီးဖြစ်သူ တီဗီ​ပေါ်တွင် ပထမဆုံး ထွက်​ပေါ်လာသည်​ကြောင့် အင်တာနက်​ပေါ်တွင် လှုံ့​ဆော်မှုကြီး တစ်ရပ် ဖြစ်သွားခဲ့သည်။ 

ရှန်းနန့်ထန်၏ ချစ်စရာ​ကောင်းလှ​သော ပုံစံ​လေးက အလွန် ချစ်​မွှေးပါသည်။ လူများစွာက "​တော်ဖီ​လေးကို ခိုးမယ်"ဟူ​သော အဖွဲ့​ထောင်ရန်အတွက် မှတ်ချက်များ ချန်ထားခဲ့ကြသည်။

သူမ၏ အ​ဖေနှင့် အ​မေအ​ကြောင်း မှတ်ချက်များ ကြားကြ​သောအခါ သူတို့က ​မြေပြင်​ပေါ်တွင် လှိမ့်သည်အထိ ရယ်​မောကြ​လေသည်။ ထိုအချိန်၌ပင် အွန်လိုင်းပေါ်၌ ​ရေပန်းအစား​ဆုံး စကားစုလေး ဖြစ်သွားခဲ့သည်။

လယ်​တောထဲတွင် ရှန်းနန့်ထန် စိုက်ပျိုးထား​​သော အသီးအရွက်ခင်း​လေးကလည်း လူအများ လာကြည့်ကြသည့် ​ရေပန်းအစား​ဆုံး ​နေရာလေး ဖြစ်သွားခဲ့​လေသည်။

​နောက်ပိုင်းတွင် ထန်​ချောင်း​​ချောင်းက ရှန်းနန့်ထန် အပင်စိုက်ရန် အခြား​​နေရာတစ်ခု ရှာ​ပေးခဲ့ရသည်။

​တစ်နေ့လည်ခင်း၌ မိသားစု သုံး​ယောက်က တစ်ထပ်တည်းကျ​သော ​ရှေ့ဖုံးနှင့် ​ကောက်ရိုး ဦးထုပ်တို့ဖြင့် မိဘနှင့် က​လေး ဝတ်စုံတူဝတ်ကာ လယ်​တောတွင် အလုပ်ရှုပ်​နေခဲ့ကြသည်။

ထန်​ချောင်း​ချောင်းက ​အဝါ​ရောင် ရွှေဖရုံသီး အကြီးကြီးတစ်ခုကို လက်ညှိုးထိုးပြကာ ​ပြောလိုက်သည်။ 

"​တော်ဖီ​လေး... ဒီ​ရွှေဖရုံသီးကို ဘယ်လို လုပ်စားလို့ရလဲ"

ရှန်းနန့်ထန်က အ​​လေးအနက် ​ပြောလိုက်သည်။ "သမီးတို့ ပဲနီ​လေးအနှစ်နဲ့ ​ရွှေဖရုံသီး ပိုင်မုန့်​ကြော် လုပ်စားလို့ရတယ်... နူးနူးအိအိ ချိုချို​လေးနဲ့ အရသာ ရှိတယ်"

"ဒါပဲလား" ထန်​ချောင်း​ချောင်းက သူမကို စကား​ခေါ်လိုက်သည်။ 

"သမီးတို့..." ရှန်းနန့်ထန်က အ​သေအချာ ပြန်စဥ်းစားလိုက်သည်။ "​ရွှေဖရုံသီး ခရင်မ်စွပ်ပြုတ်လည်း လုပ်လို့ရတယ်"

ထန်​ချောင်း​ချောင်းက ပြုံးကာ ​ပြောလိုက်သည်။ "အ​ကောင်းဆုံး အ​ဖြေပဲ"

ရှန်းနန့်ထန်က ချက်ချင်း ​ပြောလိုက်သည်။ "သမီးတို့ ​ရွှေဖရုံသီး မီးအိမ်လည်း လုပ်လို့ရတယ်​လေ"

"​တော်တယ်" ထန်​ချောင်း​ချောင်းက သူမကို လက်မ​ထောင်ပြလိုက်သည်။

ရှန်းနန့်ထန်၏ နှုတ်ခမ်း​ထောင့်များ မြင့်တက်သွား​လေသည်။

"ဒါဆို ဒီ​ရွှေဖရုံသီးကို ခူးမယ်... မားမားတို့ အိမ်ပြန်ပြီး သမီး ညမှာ ရွှေဖရုံသီး အချို​ချောင်း​လေး​တွေ စားရ​အောင် ​ကြော်​ပေးမယ်​နော်"

ထန်​ချောင်း​ချောင်းက ​ရွှေဖရုံသီး အကြီးကြီးကို ​ကောက်ကာ သူမ​နောက်မှ လူဆီ လှမ်းပစ်​​ပေးလိုက်သည်။ "​နောက်တစ်ခု"

ရှန်းယွဲ့က အသက်ပြင်းပြင်းရှုကာ သူ့ကံတရားထံမှ နှုတ်ထွက်ချင်လာသည်။ သူက ​ရွှေဖရုံသီးကို ​ကောက်ကိုင်ကာ သူ့​နောက်မှ ခြင်း​လေးထဲသို့ ထည့်လိုက်သည်။

ထိုအ​မေနှင့်သမီးက အ​ရှေ့တွင် အသီးအရွက်များ ​ကောက်​နေကြပြီး အ​နောက်မှ သူက ကုန်ထမ်းသမားအဖြစ် အလုပ်လုပ်​နေရသည်။ သူ့​ကျော​ပေါ်မှ ခြင်း​တောင်းက ပြည့်လျှံ​နေ​လေပြီ။

ရှန်းနန့်ထန်က သူမအ​ဖေ​၏ ဝမ်းနည်းဖွယ်ရာ အသွင်အပြင်ကို ကြည့်ပြီး သူမ၏ လက်သီး​သေး​သေး​လေးဖြင့် တိုက်ကာ တွန်းအား​ပေးလိုက်သည်။ "ဆက်လုပ်ထား ပါးပါး"

ထန်​ချောင်း​ချောင်းက မညှာမတာ ​ပြောလိုက်သည်။ "ငါ့​လောင်ကုန်း​လေး... အလုပ် ကြိုးစား​နော်... အစာ​ပျော့ စား​နေတယ်ဆိုတဲ့ ပုံရိပ်​ကို တွန်းလှန်လိုက်စမ်းပါ"

​ထို့နောက်တွင်မူ သူမက သမီးဖြစ်သူကို ဦး​ဆောင်ကာ ​​ပျော်​ပျော်ရွှင်ရွှင်ဖြင့် ​ရှေ့ဆက်​လျှောက်သွား​တော့သည်။

ရှန်းယွဲ့:...

ထားလိုက်​တော့... ​ယောကျ်ား​ကောင်း​တွေက မိန်းမ​တွေနဲ့ ရန်မဖြစ်ဘူး...

ပြီး​တော့လည်း အဲ့ဒီနှစ်​ယောက်က ကမ္ဘာ​ပေါ်မှာ သူအချစ်ဆုံး မိန်းက​လေး နှစ်​ယောက်ပဲ​လေ...

(ပြီးပါပြီ)

❤️ကျေးဇူးတင်ပါတယ် ❤️

Translated by 

Nadi

May S

Imperial Meow ❤️ 

Xxxxxxx