Ch 9

🔥 Chapter 9

အမှားတစ်ခု

မြို့တော်A ၏ အစည်ကားဆုံးသော ဒေသများထဲမှ တစ်ခုတွင် I.S ဖျော်ဖြေရေးကုမ္ပဏီ၏ ကော်ပိုရိတ်အဆောက်အအုံက တည်ရှိသည်။ အဓိက အဆောက်အအုံကြီးသည် မြို့ကို လွှမ်းမိုးထား၏။ နာနီဗန်ကားက ကုမ္ပဏီအနီးရှိ ကားလမ်းသို့ ချိုးဝင်လိုက်သည်နှင့် သစ်ပင်ကြီးများ၏ မည်းမှောင်သော အရိပ်ထုကြားမှ ခမ်းနားထည်ဝါသော ထိုအဆောက်အုံကြီးက မြို့၏ အထင်ကရနေရာတစ်ခုပမာ ထင်ထင်ရှားရှား ပေါ်ထွက်နေလေသည်။

အဆောက်အအုံ၏ အီလက်ထရောနစ်ဖန်သားပြင်တွင် I.S ၏ လူကြိုက်အများဆုံး အိုင်ဒေါအဖွဲ့များ၏ သီချင်းဗီဒီယိုများ စီတန်းကာပြသနေပြီး ဖန်သားပြင်၏ ဘေးဘက်များတွင်မူ ဂန္တဝင်အမည်များကို တစ်ခုပြီးတစ်ခု ဖော်ပြထားသည်။ ဤအိုင်ဒေါများက I.S ဖျော်ဖြေရေးကုမ္ပဏီ၏ အမှတ်သင်္ကေတဖြစ်ပြီး ၎င်း၏ ကမ္ဘာတစ်ဝန်း ကျော်ကြားမှုအတွက် အဓိကအားထားရာများပင် ဖြစ်ကြသည်။

အာရှ၏ အကြီးဆုံးသော အိုင်ဒေါမွေးထုတ်ရေးဌာနက ၎င်း၏ ဂုဏ်ပုဒ်နှင့်အညီပင် ဂုဏ်သတင်းထင်ရှားနေပေသည်။

သို့သော် အိုင်ဒေါဈေးကွက် ပြည့်လျှံလာခြင်းနှင့် ရုပ်ရှင်နှင့် ရုပ်မြင်သံကြား ဈေးကွက် ကြီးထွားလာခြင်းတို့ကြောင့် I.S က လွန်ခဲ့သော နှစ်နှစ်အတွင်း ၎င်း၏ အာရုံစူးစိုက်မှုကို ရုပ်ရှင်နှင့် ရုပ်မြင်သံကြား ကဏ္ဍဘက်သို့ ရှင်းရှင်းလင်းလင်း ပြောင်းလဲခဲ့သည်။ ၎င်းက နိုင်ငံတကာမှ နာမည်ကျော်ကြားသော ဒါရိုက်တာများကို စာချုပ်ချုပ်ဆိုခဲ့ရုံသာမက နိုင်ငံအတွင်း လူကြိုက်အများဆုံး တီဗီဒရာမာများစွာကို ထုတ်လုပ်ခဲ့သည့် အထူးချွန်ဆုံးသော တီဗီဒရာမာ ထုတ်လုပ်ရေးအဖွဲ့ကိုပါ ခေါ်ယူခဲ့ပြီး ယခုအခါ ဤကဏ္ဍတွင် ခြေချရပ်တည်ရန် အသင့်ဖြစ်နေပြီ ဖြစ်သည်။

သို့သော်လည်း အရာရာတိုင်းက စတင်ရာ၌ ခက်ခဲလေ့ရှိရာ ခေါ်ယူခဲ့သော နာမည်ကြီး သရုပ်ဆောင်အချို့မှအပ ယခုအချိန်အထိ I.S ဖျော်ဖြေရေးကုမ္ပဏီမှ ကိုယ်တိုင် မွေးထုတ်ပျိုးထောင်နိုင်ခဲ့သော သရုပ်ဆောင်များမှာ အိမ်ရှေ့စံမင်းသားလေးကျီချန် နှင့် လူကြိုက်များသော မျိုးဆက်သစ်လူငယ်သရုပ်ဆောင် ယန်ယင်းယိတို့သာ ရှိသေးသည်။ ဤနှစ်ဦး၏ လူကြိုက်များမှုသည်သာ ပြင်းထန်စွာ ယှဉ်ပြိုင်နေကြသော ဖျော်ဖြေရေးလောကတွင် ထင်ရှားစွာ အမှတ်သညာပြုဖွယ်ရာ ရှိသည်။

နာနီကားက ကုမ္ပဏီ၏ အဓိကတံခါးဝတွင် ရပ်တန့်လိုက်ပြီး ကျိုးယွီဟယ်က အောက်သို့ ဆင်းလာကာ ဧရာမ I.S အဆောက်အအုံကြီးကို မော့ကြည့်လိုက်သည်။ မြေပြင်ပေါ်တွင် ရပ်နေသော သူ၏ပုံစံမှာ အလွန်ပင် သေးငယ်နေခဲ့သည်။

သရုပ်ဆောင်ဌာနက အနုပညာရှင်လုပ်ငန်းနှင့် ရုပ်ရှင်နှင့် ရုပ်မြင်သံကြား ရင်းနှီးမြှုပ်နှံမှုအပိုင်းတွင် ဌာနသစ်တစ်ခု ဖြစ်နေပြီး နာမည်ကြီး ရုပ်ရှင်မင်းသားများ၊ မင်းသမီးကြီးများ မရှိသေးသော်ငြားလည်း ဂီတဈေးကွက်နှင့် အိုင်‌ဒေါဈေးကွက်တွင်မူ စူပါစတားများဖြင့် ပြည့်နှက်နေသည်။ I.S. ဖျော်ဖြေရေးကုမ္ပဏီတစ်ခုလုံးနှင့် နှိုင်းယှဉ်လျှင် သူက အလွန်ပင် သေးငယ်လှသည်။

ဤအဆောက်အအုံအတွင်း ဝင်ထွက်သွားလာနေကြသော ရုံးဝန်ထမ်းများနှင့်လည်း မခြားနားပေ။

ယခုအချိန်တွင်မူ သူက ဘယ်သူမှ မဟုတ်သူ (မထင်မရှား) တစ်ယောက်သာ ဖြစ်သည်။

" ရှောင်ကျိုး… ဘာတွေကြည့်နေတာလဲ…"

စူးစူးက ခေါင်းမော့ကြည့်လိုက်သည်။

"ဘာမှ မဟုတ်ပါဘူး…"

ကျိုးယွီဟယ်က အေးစက်စွာပြောပြီးနောက် အဆောက်အအုံအတွင်းသို့ လျှောက်ဝင်သွားရာ အနည်းငယ် နှေးကွေးနေသော စူးစူးက ထိုမြင်ကွင်းကို မြင်သည်နှင့် တစ်ပြိုင်နက် နောက်မှ အလျင်အမြန် လိုက်ပါသွားတော့သည်။

ကျိုးယွီဟယ် ဓာတ်လှေကားတံခါးကို နှိပ်လိုက်သည်နှင့် ယန်ယွီက ဓာတ်လှေကားထဲမှ ထွက်လာသည်ကို တွေ့လိုက်ရသည်။

သူက လိမ္မာပါးနပ်ကာ သတိကြီးသူဖြစ်သော်လည်း ဆင်ခြင်တုံတရားရှိကာ လျစ်လျူရှု့တတ်သော စီးပွားရေးပညာရှင် တစ်ယောက်နှင့်လည်းတူသည်။

သူ၏ စူးစမ်းထိုးထွင်းကြည့်တတ်သည့် မျက်လုံးများက ကျိုးယွီဟယ်ဆီသို့ ပြင်းထန်စွာ ရောက်ရှိသွားသည။ သူက ကျိုးယွီဟယ်နှင့် ရုတ်တရက် ဆုံသွားသော်လည်း စကားအများကြီး မပြောဘဲ သူ့နှုတ်ခမ်းကို တင်းတင်းစေ့ပြီး ဓာတ်လှေကားထဲမှ ထွက်လာခဲ့သည်။

"အတော်ပဲ ငါနဲ့ လိုက်ခဲ့…"

ယန်ယွီက မလိုအပ်သော စကားများကို မပြောဘဲ ထိုသို့ဆိုလိုက်ရာ ဤမြင်ကွင်းကို မြင်သူများက ထိုနှစ်ဦးသည် တစ်စုံတစ်ရာ လုပ်ဆောင်ရန် ကြိုတင်ချိန်းဆိုထားပြီးပြီဟု ထင်မှတ်ကြပေမည်။ သို့သော် အမှန်တကယ်တွင် ကျိုးယွီဟယ်က ယန်ယွီကို မတွေ့ခဲ့ရသည်မှာ တစ်လနီးပါး ကြာပြီဖြစ်သည်။

နောက်ဆုံးတွေ့ဆုံခဲ့စဉ်က သူက ပြန်လည်နုပျိုခြင်းအတွက် ဇာတ်ညွှန်းစိစစ်ရမည့် စာမူကို ကျိုးယွီဟယ်နှင့် စန်အန်းထံ ပို့ပေးရန် စူးစူးအား ညွှန်ကြားခဲ့သည်။ ထိုစဉ်ကလည်း ကုမ္ပဏီရှေ့တွင် ယန်ယွီ၏ ကျောပြင်ကိုသာ မြင်လိုက်ရပြီး နောက်တစ်စက္ကန့်တွင် ထိုကြောက်ခမန်းလိလိ အေးဂျင့်က လုပ်ငန်းသုံးယာဉ်ဖြင့် အလျင်အမြန် ထွက်ခွာသွားခဲ့သည်။

အသုံးမကျသူတစ်ဦးအတွက် သူ၏အချိန်ကို အနည်းငယ်မျှ ပိုပေးရန်ပင် မထိုက်တန်ပေ။

ယန်ယွီက အမှန်တကယ်တွင် ထူးချွန်သော အရည်အချင်းရှိသည့် ရွှေတံဆိပ်ရမန်နေဂျာတစ်ဦး ဖြစ်သည်။ ပါရမီရှင်များ ပြည့်နှက်နေသည့် I.S ကုမ္ပဏီအတွင်း၌ပင် သူက ရေပန်းစားသည့် ပေါင်းစပ်မှု(လူကြိုက်များသော ခေတ်ရေစီးကြောင်းကို ဦးဆောင်သူ)အဖြစ် အမြဲတမ်း ရှိနေခဲ့သည်။ ကုမ္ပဏီ၏ အတွင်းရေးပဋိပက္ခများ မရှိခဲ့လျှင် သူသည် သရုပ်ဆောင်ဌာနသို့ "အဆင့်လျှော့ချခံရ" မည် မဟုတ်ပေ။ ကျိုးယွီဟယ် အပါအဝင် သူတို့၏ မင်းသားသစ် အချို့တို့က အေးဂျင့်ယန်ယွီ၏ "ဖောက်သည်များ" ဖြစ်ခွင့်ရမည့် ဤဂုဏ်ကို ရရှိမည် မဟုတ်ပေ။

သို့သော် အဆုံးတွင်မူ သူက အရင်းအမြစ်များကို ပိုင်ဆိုင်ထားသည်မှာ မှန်ကန်ခဲ့သည်။

ကျိုးယွီဟယ် ပထမဆုံးအကြိမ် ပွဲဦးထွက်လာချိန်တွင် သူ့အတွက် ပရိသတ်အမြောက်အမြားနှင့် အလွန်မြင့်မားသော စိတ်ဝင်စားမှု (အာရုံစိုက်မှု) များကို အချိန်တိုလေးအတွင်း စုဆောင်းနိုင်ခဲ့သည်။ သို့သော် ကျိုးယွီဟယ်၏ စရိုက်ချို့ယွင်းချက်များကို ရှာဖွေတွေ့ရှိပြီးနောက် ဖျော်ဖြေရေးလောကတွင် လမ်းရှည်ရှည် ဆက်လျှောက်နိုင်တော့မည် မဟုတ်ကြောင်း သိရှိခဲ့ရာ ယန်ယွီက သူ့ကို ပြတ်ပြတ်သားသား စွန့်လွှတ်ပြီး ယန်ယင်းယိဘက်သို့ ပြောင်းလဲခဲ့သည်။ ယခုအခါ I.S. ကုမ္ပဏီတွင် ယန်ယင်းယိ၏ နာမည်က ဘုရားသခင်ကဲ့သို့သော မင်းသားကျိီချန်၏နောက်တွင်  တွဲလျက်ပါဝင်လာနိုင်သည့် အနေအထားကို ရောက်လာခဲ့သည်။ လွန်ခဲ့သောနှစ်က အလွန်အောင်မြင်ခဲ့သော သူလျှိုဒရာမာ (Spy 2) ရုပ်ရှင်၏ ဒုတိယပိုင်းတွင် အရေးပါသော ဂျပန်အရာရှိနေရာအတွက်ပင် သူက ထိုဇာတ်ကားထုတ်လုပ်သူများနှင့် ဇာတ်ပို့နေရာ အတွက် ဆက်သွယ် ပြောဆိုခဲ့ဖူးသည်။

မှတ်သားစရာမှာ ယန်ယင်းယိက ဤလောကထဲသို့ ဝင်ရောက်လာသည်မှာ တစ်နှစ်ပင် မပြည့်သေးခြင်းနှင့် ယန်ယွီသည်လည်း သရုပ်ဆောင်တစ်ဦးကို စီမံခန့်ခွဲခြင်းမှာ ပထမဆုံးအကြိမ် ဖြစ်နေခြင်းပင်ဖြစ်သည်။

သူတို့က ယန်ယွီနောက်သို့ လိုက်၍ ကားပေါ်သို့ တက်လိုက်ကြသည်။

"ရုပ်ရှင်မြို့တော်ကို သွားမယ်…"

ထိုသို့ပြောပြီးနောက် ယန်ယွီက နောက်သို့ လှည့်ကာ အခြေအနေကို နားမလည်သေးသော လူနှစ်ယောက်ကို ကြည့်လိုက်သည်။

ကျိုးယွီဟယ်က သူတို့ မည်သည့်နေရာသို့ သွားရမလဲဟု မေးခွန်းထုတ်ရန်ပင် အချိန်မရလိုက်မီ ယန်ယွီက စတင်ပြောဆိုလိုက်သည်။

"ရှုချန့်ရဲ့ ဇာတ်ကောင်နေရာယူဖို့ကိစ္စ ဘာလို့ ငါ့ကို အချိန်မီ အသိမပေးခဲ့တာလဲ…"

ယန်ယွီက မျက်ခုံးပင့်လိုက်ပြီး စန်အန်းနှင့်သူ၏ မပတ်သက်သင့်သော ဆက်ဆံရေး ပျက်ပြားသွားခြင်းကို ကျေနပ်ခြင်းမရှိသေးပုံ ပေါ်နေသည်။ ထို့ကြောင့် အခွင့်အရေးကိုအသုံးချ၍ ဒေါသပေါက်ကွဲလိုက်ပုံရသည်။

ကျိုးယွီဟယ်က အေးဆေးတည်ငြိမ်စွာ ပြန်ပြောလိုက်သည်။

 "ယန်ကော လုပ်ထုံးလုပ်နည်းအရဆိုရင် 'ပြန်လည်နုပျိုခြင်း' ဇာတ်လမ်းအဖွဲ့က စာချုပ်ကို ဒီနေ့ နေ့လယ် ၁၂ နာရီ မတိုင်ခင် ကောရဲ့ လုပ်ငန်းသုံး အီးမေးလ်ကို ပို့ပေးမှာပါ… နောက်မှ ကျန်တဲ့ကိစ္စတွေကို ဆွေးနွေးဖို့ ကောကို ဆက်သွယ်ပါလိမ့်မယ်…"

၎င်း၏ဆိုလိုရင်းမှာ သူ့ကို အကြောင်းကြားရမည့် ကိစ္စက ဇာတ်လမ်းအဖွဲ့၏ လုပ်ဆောင်ရမည့်အရာဖြစ်ပြီး ကျိုးယွီဟယ်၏ လုပ်ငန်းနယ်ပယ်အတွင်း မပါဝင် ဟူ၍ ဖြစ်သည်။

ယန်ယွီက သူ(ကျိုးယွီဟယ်)၏ စိတ်နေစိတ်ထားမှာအနည်းငယ် ပေါ့ပေါ့ဆဆ ရှိနေသည်ကို တွေ့ရသော်လည်း သူ့စကားလုံးများမှာမူ အလွန်သင့်တင့်မျှတနေသည်ကို သတိပြုမိလိုက်သည်။ သူက ကိုယ့်ကိုယ်ကိုယ် ကာကွယ်ခြင်း သို့မဟုတ် မကျေနပ်မှုကို ဖော်ပြခြင်းမျိုး မရှိဘဲ မကျိုးနွံလွန်း မမာနကြီးလွန်းဘဲ အချက်အလက်ကိုသာ ပေါ့ပေါ့တန်တန် ထုတ်ဖော်လိုက်ရာ၊ ယန်ယွီက သူ့အား အသိပေးရန် ပျက်ကွက်မှုအတွက် အပြစ်တင်ရန် ကြံရွယ်ထားသော ကျန်ရှိသည့် စကားလုံးများမှာ ပိတ်ဆို့ခံလိုက်ရတော့သည်။

ယန်ယွီက သူ့ကို တစ်မျိုးတစ်မည် ကွဲပြားစွာ မကြည့်မိဘဲ မနေနိုင်ခဲ့ပေ။

သူ့ကို နောက်ဆုံးတွေ့ခဲ့သည်မှာ တစ်လခန့် ရှိပြီဖြစ်ရာ ထိုကောင်လေးတွင် တစ်စုံတစ်ရာ ပြောင်းလဲသွားဟန် ပေါ်သည်။

အတွေ့အကြုံများပြီး လောကဓံကို မြင်ဖူးသည့်ယန်ယွီက ထူးခြားသည့် အခြေအနေကို လျင်မြန်စွာ သိရှိလိုက်ပြီး ကျိုးယွီဟယ်က သူ့မျက်နှာအမူအရာကို မြင်လိုက်သောအခါ ဤအေးဂျင့်က အလွယ်တကူ လှည့်စား၍ရသော လက်ထောက်များကဲ့သို့ မဟုတ်ကြောင်း သတိရလိုက်သည်။ ထို့ကြောင့် သူက သူ့ပုံစံကို အနည်းငယ် ပြင်ဆင်လိုက်ပြီး မိမိကိုယ်ကို တည်ငြိမ်ပြီး လူကြီးဆန်လွန်းပုံ မပေါ်စေရန် ဖန်တီးလိုက်သည်။

" ယန်ကော ကျွန်တော်တို့ ဘာလုပ်ကြမလို့လဲ…"

ကျိုးယွီဟယ်က မေးလိုက်သည်။

ဤအရာသည် သူ၏ လက်ရှိစိုးရိမ်ပူပန်မှု ဖြစ်သည်။ ယန်ယွီက သူ့အား ကုမ္ပဏီသို့ အရေးတကြီး ခေါ်ရခြင်းမှာ တစ်စုံတစ်ရာ ဆွေးနွေးစရာ ရှိသည်ဟု ထင်ခဲ့သော်လည်း ကုမ္ပဏီသို့ ရောက်သည်နှင့် အခြားတစ်နေရာသို့ ခေါ်ဆောင်သွားခြင်းခံရသည်မှာ နားမလည်နိုင်ဖွယ်ရာ ဖြစ်နေသည်။

သို့သော် ယန်ယွီ၏ အကြောင်းပြချက်မှာမူ တိုတောင်းလှသည်။

"ရိုက်ကွင်းကို သွားလည်တာ…"

ကျိုးယွီဟယ်: "ရိုက်ကွင်းကို သွားလည်တာလား…"

ယန်ယွီက သူ့အား မော့ကြည့်လိုက်သည်။

"ဒါမှမဟုတ်ရင် ဘာလဲ… I.S က မင်းကြောင့် အရှက်ရတာမျိုး အဖြစ်မခံနိုင်ဘူး…"

ကျိုးယွီဟယ်က ယန်ယွီ၏ စကားကြောင့် သူ့နှာခေါင်းကို တို့ထိလိုက်သည်။ သူ၏ ယခင်ဘဝတွင် ကျိုးယွီဟယ်သည် ထိုအချိန်က ကြည့်ရှုသူ အနည်းငယ်သာရှိသော အိုင်ဒေါဒရာမာများအားလုံးကို အမှန်တကယ်ပင် ရိုက်ကူးခဲ့ရသည်။ နာမည်ကြီး ဒါရိုက်တာများပင် မပြောနှင့်၊ ထင်ရှားသော သရုပ်ဆောင်ကြီးများကိုပင် သူ များများစားစားမတွေ့ခဲ့ဖူးပေ။

'ပြန်လည်နုပျိုခြင်း' သည်လည်း လူငယ်ဆန်သော ဇာတ်အိမ်ရှိသော်လည်း ဒါရိုက်တာချိုက်က နိုင်ငံတကာဆုရ ဒါရိုက်တာ တစ်ဦးဖြစ်သည်။ 'ပြန်လည်နုပျိုခြင်း' က သူ၏ ပထမဆုံး ဒရာမာထုတ်လုပ်မှုဖြစ်ပြီး၊ ဖြစ်နိုင်သည်မှာ သူ၏ နောက်ဆုံးဒရာမာလည်း ဖြစ်ကောင်း ဖြစ်နိုင်သည်။ အဘယ်ကြောင့်ဆိုသော် ရုပ်ရှင်ကြီးများတွင် လုပ်ကိုင်ဖူးသည့် ဒါရိုက်တာများက ရုပ်သံလိုင်းများ(small screen)ဘက်သို့ ပြန်လာခဲသောကြောင့်ပင်။ ထို့ကြောင့် ၎င်း၏ ပြင်းထန်မှုကို စဉ်းစားကြည့်နိုင်သည်။

[ T/N - Movieပဲ ရိုက်နေကျ ဒါရိုက်တာတွေက drama seriesတွေ သိပ်မရိုက်ဖြစ်တာမျိုးကို ဆိုလိုချင်တာပါ ]

ကျိုးယွီဟယ်က ဇာတ်လမ်းထဲတွင် သေးငယ်သော ဇာတ်ကောင်နေရာကို သရုပ်ဆောင်ရခြင်းမဟုတ်ဘဲ ဇာတ်ဝင်ခန်းများပြားသော ဒုတိယဇာတ်လိုက် ဖြစ်သည့် ရှုချန့်ကို သရုပ်ဆောင်ရခြင်း ဖြစ်သည်။ အကယ်၍ သူသာ အဖွဲ့ထဲသို့ ဝင်ရောက်သွားပါက မည်သူကမျှ သူသည် ဒုတိယဇာတ်လိုက်နေရာကို ပထမဆုံး သရုပ်ဆောင်ဖူးခြင်း ဟုတ်မဟုတ်ကို ထည့်သွင်းစဉ်းစားမည်မဟုတ်ပေ။ လူများက သူ၏အဆင့်နှင့် I.S. ၏ အနုပညာရှင်များကို လေ့ကျင့်ပေးနိုင်မှု စွမ်းရည်ကိုသာ မေးခွန်းထုတ်ကြပေလိမ့်မည်။

အထူးသဖြင့် ယန်ယွီ၏ အမြင်တွင် ကျိုးယွီဟယ်နှင့် ဤဒုတိယဇာတ်လိုက်နေရာက လုံးဝ ရှုပ်ထွေးအံ့အားသင့်စရာ ဖြစ်သည်။ 

ငါက သူ့အေးဂျင့်ဖြစ်ပေမဲ့ မသိရသေးတဲ့ကိစ္စတွေ ရှိနေသေးတာလား…

သူ၏အဆင့်ကို အားထားစရာ မရှိသည့်တိုင်၊ ကျန်သည့် အပိုင်းများမှာလည်း အမြင့်ဆုံး မဖြစ်သည့်တိုင် အနည်းဆုံးတော့ အသင့်အတင့် ကောင်းမွန်စွာ လုပ်ဆောင်နိုင်ရပေမည်။ ထို့ကြောင့် ယနေ့တွင် သူက ရိုက်ကွင်းသို့ သွားရောက်လည်ပတ်ရန် စီစဉ်ထားသည့်အတွက် ကျိုးယွီဟယ်ကိုလည်း အတူပါလာစေရန် ဆွဲခေါ်လာခြင်း ဖြစ်သည်။

ဟုတ်ပေသည်။ အခြေအနေအရ ပါလာခြင်းမျှသာ။

'ပြန်လည်နုပျိုခြင်း' ဇာတ်ကားတွင် ဒုတိယ ဇာတ်လိုက်နေရာ ရခဲ့သည်မှာ ကောင်းသော်ငြားလည်း ကျိုးယွီဟယ်က သူ့အတွက် အားထုတ်စရာ လိုအပ်သည့်အဆင့်ထိ မဟုတ်သေးပေ။ ယန်ယွီ၏အာရုံစိုက်မှုက ယခုထက်တိုင် ယန်ယင်းယိအပေါ်တွင်သာ ရှိနေဆဲဖြစ်သည်။

မည်သို့ပင်ဆိုစေ လူများက ဤဘဝ၌ ကံဆိုးမှုများနှင့် ကြုံတွေ့ရပြီးနောက် ကြီးမားသော ကံကောင်းခြင်းတစ်ခု ပြန်လည်ရောက်ရှိလာစမြဲ ဖြစ်သည်။

ထို့ပြင် ဤဖျော်ဖြေရေးနယ်ပယ်တွင် အံ့မခန်းလှပသော မျက်နှာတစ်ခု ပိုင်ဆိုင်ထားသရွေ့၊ ထိုသူက အနှစ်သာရ မရှိခဲ့လျှင်ပင် ဘုရားသခင်၏ မျက်နှာသာပေးမှုကို တစ်ကြိမ်ခန့် ရရှိလိမ့်မည်သာ ဖြစ်သည်။

ယန်ယွီ၏ စိတ်ထဲတွင် မကောင်းသော အဓိပ္ပာယ်သက်ရောက်မှုမှလွဲ၍ ဘာတစ်ခုမှ မရှိခဲ့ပေ။ ထို့ပြင် ရွှေရတနာသဖွယ် တန်ဖိုးရှိသူများထဲမှ တစ်ဦးဖြစ်သည့် ကျိုးယွီဟယ်က ထိုသို့သော အခြေအနေမျိုး ဖြစ်နေရသည်ကိုလည်း သူ လက်မခံနိုင်ခဲ့ပေ။

သို့သော် သုံးနာရီကြာပြီးနောက်—

ယန်ယွီက ကင်မရာနောက်တွင် ရပ်နေကာ  လက်ပိုက်၍ နှုတ်ခမ်းကို တင်းတင်းစေ့ထားလျက် ရိုက်ကွင်း၌ ယန်ယင်းယိနှင့် မူလက သက်ဆိုင်သော ဂျပန်စစ်ယူနီဖောင်းကို ဝတ်ဆင်ထားပြီး ညှဉ်းပန်းနှိပ်စက်သည့် ထိုင်ခုံပေါ်တွင် ထိုင်နေသော ထိုကလေးကို သေသေချာချာ စိုက်ကြည့်နေသည်။

ဖြစ်နိုင်တာက… သူ့ကို လူငယ်လို့ရော ခေါ်လို့ရပါ့မလား…

ရင့်ကျက်ပြီး ခွန်အားကြီးသော စစ်ရေးအရှိန်အဝါက အသက် ၁၉ နှစ်အရွယ် လူငယ်တစ်ဦးဆီမှ ထွက်ပေါ်လာသည်နှင့် လုံးဝ မတူညီခဲ့ပေ။

သပ်ရပ်သော ဆံပင်နက်များ၊ ရွှေရောင်ခါးပတ်၊ တွန့်ကြေမှုမရှိသော စစ်ယူနီဖောင်း၊ သားရေ စစ်လက်အိတ်၊ လက်ရာမြောက်သော အိတ်ဆောင်နာရီ...

ထိုသို့သော  အာသီသကင်းမဲ့၊ ဖြူဖျော့ပြီး အနည်းငယ် ဝေဒနာခံစားနေရပုံ ပေါက်နေသည့် မျက်နှာနှင့်ဆိုလျှင် သူက ပန်းပုရုပ်တစ်ရုပ်နှယ် ပြည့်စုံနေခဲ့သည်။

ခံ့ညားချောမောပြီး အကျိုးအကြောင်း နားမလည်တတ်သည့် အကျဉ်းသားရှေ့တွင်ဖြစ်သော်လည်း "Spy 2" ဇာတ်ကားမှ အမျိုးသားဇာတ်လိုက်ဖြစ်သူ၊ အတုအယောင်အစိုးရ၏ အရေးပါသော အဖွဲ့ဝင်တစ်ဦးဖြစ်သူ ကုဝူရှီးက မိမိ၏မျက်နှာ၌ မည်သည့် မသက်မသာဖြစ်မှု သို့မဟုတ် စိတ်မရှည်မှု အရိပ်အယောင်မှ မပြခဲ့ပေ။ သူက ထိုလူကို လှောင်ပြောင်နေရုံသာ ဖြစ်သည်။ ထို့နောက်တွင် သူက အိတ်ဆောင်နာရီကို ရုတ်တရက် ဖွင့်လိုက်ပြီး သူ၏ ကျဉ်းမြောင်းသောမျက်လုံးများကို အနည်းငယ် ကွေးညွှတ်လိုက်သည်။

"ဆယ်နာရီ လေးဆယ့်သုံးမိနစ်…မင်း သုံးမိနစ် နောက်ကျတယ်…"

အေးစက်ပြီး စက်ယန္တရားဆန်သော အသံက နာရီအဟောင်းသံကဲ့သို့ ထွက်ပေါ်လာပြီးအချိန်ကို ခဏတာမျှ ရပ်တန့်သွားစေခဲ့သည်။

ထိုအရာရှိက ခေါင်းမော့လိုက်ရာ သူ၏ ချောမောခံ့ညားသောမျက်နှာက မော်နီတာထဲတွင် ပိုမိုကျယ်ပြန့်စွာ ပေါ်လွင်နေပြီး သူက သွေးစွန်းနေမှုနှင့် ရက်စက်ကြမ်းကြုတ်မှု အရိပ်အမြွက် ပါဝင်သည့် လှောင်ပြောင်သော အပြုံးဖြင့် ခပ်ဖျော့ဖျော့ ပြုံးလိုက်သည်။

ထို လှောင်ပြုံးက အဓိကဇာတ်လိုက်၏ နှုတ်ခမ်းထောင့်မှ မာနကြီးသော အပြုံးနှင့် လုံးဝ ကွဲပြားခြားနားနေသည်။ တစ်ဦးက ပေါ့‌ပါးချောမွေ့ပြီး ကောက်ကျစ်စ‌ဥ်းလဲသူ ဖြစ်ကာ နောက်တစ်ဦးကမူ သံမျက်နှာ(မျက်နှာသေဖြင့်) ရက်စက်လှသူ ဖြစ်သည်။ သူတို့ ရင်ဆိုင်တွေ့ဆုံခြင်း၏ တင်းမာမှုက မြင်ကွင်းတစ်ခုလုံးမှ ချက်ချင်းဆိုသလို လျှံကျလာခဲ့သည်။

ယန်ယွီ၏ရင်ထဲတွင် ဒိန်းခနဲ ဖြစ်သွားသည်။

သူက ကျိုးယွီဟယ်ကြောင့် တစ်ချိန်ချိန်၌  ထိတ်လန့်အံ့အားသင့်သွားရလိမ့်မည်ဟု လုံးဝ မထင်မှတ်ထားခဲ့မိချေ။

🔥🔥🔥