MM Story Teller

အပိုင်း ၁၃ (Can We Be More Honest End)

Viewers 9k

#honest

Chapter ( 13 ) End

အခန်း ( ၁၃ ) : သဘောကျနှစ်သက်ခြင်း

ရှုရှုအားမြင်သည့်နှင့်တစ်ပြိုင်နက် စုန့်ယွမ်ယွမ်အကဲခတ်မိသည်မှာ သူမ၏ လက်မှလက်ထပ်လက်စွပ်ကိုပင် ။ ရှုရှု၏ လက်တွင်၀တ်ဆင်ထားသည့် လက်စွပ်မှာရိုးရှင်းပါသော်လည်း အလယ်ရှိစိန်တစ်ပွင့်ကမူ အဆင့်အတန်းရှိရှိအလွန်စျေးကြီးမည့်ပုံပေါ်၏ ။

သူမ၏ ရင်ဘတ်ပေါ်တွင်လက်တင်၍ ရှုရှုအားလက်ညိုးထိုးကာ အမေအိုကြီးတစ်ယောက်ပမာဆူပူတော့သည် ။

" ငါ့အိမ်ကဂေါ်ဖီထုပ်လေးကိုငါ့မှာတော့အနှစ်နှစ်အလလကြည့်ရှုစောင့်ရှောက်လိုက်ရတာ ... ဂေါ်ဖီထုပ်ကတော့ကျေးဇူးမသိတတ်တဲ့အပြင် ၀က်နောက်တောင်ကောက်ကောက်ပါအောင်လိုက်သွားသေးတယ် ... ငါနှစ်ယောက်စလုံးကိုရဲတိုင်ပစ်မှာ"

ရှုရှု ရယ်မောပြီးနောက် သူမ၏လက်ညှိုးကိုဆွဲကိုင်၍

" အဲဒီ၀က်ကောင်က လူပေါင်းများစွာထဲကနေငါသေသေချာချာစီစစ်ရွေးချယ်ထားရတာပါနော် "

" လပ်ထပ်ထားတာသိပ်မကြာသေးတာတောင်မှဒီက နင့်ကိုအစစအရာရာဂရုစိုက်ပေးခဲ့တဲ့မိန်းမကိုမေ့နေပြီပေါ့လေ ... ငါတစ်ကယ်ငိုချမိတော့မှာ "

ရှုရှုက စုန့်ယွမ်ယွမ်၏ မပြီးနိုင်မစီးနိုင်ငိုချင်းချနေမှုကြီးကိုသည်းမခံနိုင်‌ေတာ့ သောကြောင့် သူမ၏ လက်ကိုဆွဲ၍ စားပွဲ၀ိုင်း၌ ထိုင်ကာ အအေးများကိုစတင်မှာယူလိုက်သည် ။ စုန့်ယွမ်ယွမ်၏ အကြည့်များမှာမူ အင်္ကျီအောက်မှတစ်စွန်းတစ်စထွက်ပေါ်နေသည့် စတော်ဘယ်ရီအမှတ်ရာများသို့အကြည့်ရောက်သွားလေ၏ ။

ရှုရှုက ရှက်ကိုးရှက်ကန်းနှင့်ဖုံးကွယ်နေသောကြောင့်

" ဖုံးမနေစမ်းပါနဲ့ ... နင်၀င်လာတဲ့အချိန်ကတည်းကငါမြင်ပြီးသား ... ရင်ဘတ်လိုနေရာမျိုးမှာတောင်ရှိတယ်ဆိုမှတော့ နင့်လူကအရမ်းကြမ်းတမ်းတယ်မလား "

ရှုရှု နားရွက်ထိပ်လေးများမှာသွေးထွက်တော့မတတ်နီရဲလာသောကြောင့် စုန့်ယွမ်ယွမ်ကရယ်မောကာ

" ဘယ်လိုလဲ အိမ်ထောင်သည်ဘ၀ကြီးကပျော်ဖို့မှကောင်းရဲ့လား "

ရှုရှုကခဏမျှစဥ်းစားပြီးနော်အမှန်အတိုင်းပြောပြလာ၏ ။

" ငါတကယ်ကိုပျော်နေရပါတယ် "

ထို့နောက်အသံတိုးတိုးလေးနှင့်ဆက်မေးလာလေသည်။

" ငါနင့်ကိုမေးစရာတစ်ခုရှိတယ်..."

စုန့်ယွမ်ယွမ်၏ မျက်၀န်းများဘလင်းလင်းဖြစ်၍သွားပြီး နားထောင်ရန်အလွန်တက်ကြွနေလေသည် ။

" ဘာလဲ ... ဘာလဲ ... ဘယ်လိုလျှို့၀ှက်ချက်ကိုပြောပြမလို့လဲ ..."

ရှုရှု : " ထားလိုက်ပါတော့ "

" ဟေး ...တို့လို့တန်းလန်းကြီး မလုပ်စမ်းပါနဲ့ ငါတကယ်ကိုလေးလေးနက်နက်သေသေချာချာအကြံပေးမှာပါ "

အချိန်ယူ၍စဥ်းစားပြီးသည့်နောက်၌ အိပ်ရာပေါ်ကအတွင်းရေးကိစ္စများကိုအပြင်လူတစ်ယောက်နှင့်တိုင်ပင်ရသည်မှာ မသင့်တော်ဟုသာဆုံးဖြတ်လိုက်ပြီးဆက်မပြောတော့ချေ ။ စုန့်ယွမ်ယွမ်၏ အာရုံမှာမူအခြားတစ်ဖက်သို့ချက်ချင်းပြောင်းသွားလေ၏ ။

" ဒါနဲ့နင့်အမေနဲ့နင့်ပထွေးရော လက်ထပ်တဲ့အကြောင်းကိုသိပြီးပြီလား ... သူတို့ဒေါသထွက်လွန်းလို့မေ့လဲမသွားကြဘူးလား "

" ငါသူတို့ကိုမပြောပြရသေးဘူး "

" အမ် ... ဒီလိုဆို နင့်ယောက်ျားကနင့်အိမ်ရဲ့အကြောင်းကိုမသိသေးဘူးပေါ့ ..."

လုထန်အကြောင်းပါလာသောအခါမှသာ ရှုရှုကတွန့်ဆုတ်တွန့်ဆုတ်ဖြင့်

" ငါသူ့ကိုပြောပြမှာပါ ..."

ထိုနေ့ညတွင်ပင် လုထန်နှင့်အတူတူငွေကြေးဆိုင်ရာသတင်းများကြည့်နေသည့်အချိန်တွင် သတင်းထဲ၌ သူမနှင့်နှစ်အတော်ကြာမတွေ့ဖြစ်ခဲ့သူတစ်ဦး၏ ပုံပေါ်လာလေသည် ။ ထိုသူ၏ဘေးတွင်ခြေတံရှည်ရှည်နှင့်မော်ဒယ်ဖြစ်ပုံရသည့်မိန်းကလေးတစ်ဦးကကပ်နေပြီး ဘေးရှိနေရာပိုင်ရှင်မှာသူမ၏ မိခင်မဟုတ်ပေ ။

သူမက ခဏမျှကြောင်ကြည့်နေပြီးနောက်လုထန်ထံမှ ရီမုတ်ကိုယူ၍ လိုင်းပြောင်းလိုက်လေသည် ။ သတင်းချန်နယ်မှရှေးဟောင်းဒရမ်မာစိီးရီးတစ်ခုသို့ကူးပြောင်းသွားသောကြောင့် လုထန်ကမေးလာ၏ ။

" ဘာဖြစ်လို့လဲ "

ရှုရှုက လုထန်၏ ဆံပင်ကိုပွတ်၍

" အဲဒီလူကအရမ်းရုပ်ဆိုးလွန်းတယ် ... ရုပ်ဆိုးတဲ့အရာတွေကိုမကြည့်ချင်ဘူး "

လုထန်မှာ ရှုရှု၏ အပြုအမူများကအနည်းငယ်မူမမှန်ဖြစ်နေသည်ကိုသတိထားမိသောကြောင့် ဆက်လက်မေးမြန်းခြင်းမပြုတော့ပေ ။ နှစ်ယောက်လက်ထပ်ပြီးချိန်မှစ၍ လုထန်ဘက်မှ ရှုရှု၏ မိသားစုနှင့်တွေ့ဆုံရန်မတောင်းဆိုခဲ့သဖြင့် လုထန်တစ်ခုခုသိထားကြောင်း ရှုရှုသဘောပေါက်သွားသည် ။

×××

နေ့လည်ခင်း ရှုရှုနှင့်စုန့်ယွမ်ယွမ်တွေ့ဆုံသည့်အချိန်တွင် စုန့်ယွမ်ယွမ်တစ်ယောက်ရှုရှုအားဆွဲ၍ ကုန်တိုက်တစ်ခုလုံးအနှံ့စျေး၀ယ်ထွက်လေသည် ။ ရှုရှုအားလည်းအိမ်ထောင်ရှိအမျိုးသမီးနှင့်အတူတူစျေး၀ယ်ထွက်ရန်ချိန်းဆိုရသည်မှာ လပေါင်းများစွာကြာမြင့်ကြောင်းလည်း ပွစိပွစိပြောဆိုနေသေး၏ ။

စိတ်ကျေနပ်အားရအောင်စျေး၀ယ်ထွက်ပြီးသောအခါမှသာ ကော်ဖီဆိုင်တစ်ခုထဲရှိဆိုဖာပေါ်တွက်မှီ၍ အားရပါးရအပန်းဖြေကြလေသည် ။

" နေလို့ထိုင်လို့အရမ်းကောင်းသွားပြီ "

မိန်းမများအတွက်ပျော်ရွှင်စွာနေထိုင်ရန်မှာ စျေး၀ယ်ခြင်းကအဓိကကျလေ၏ ။ နှစ်ဦးသား၏ ဘဏ်ကဒ်ထဲမှလက်ကျန်ပိုက်ဆံမပြောင်ရုံတမယ်သုံးစွဲပြီးသောအခါမှသာ ပေါ့ပါးသွားသလိုခံစားလိုက်ကြရသည် ။

စုန့်ယွမ်ယွမ်က စကားပြောရန်အတွက်ခေါင်းလှည့်လိုက်သောအခါ ရှုရှုတစ်ယောက် လုထန်နှင့်စာပို့ရင်းပြုံးရွှင်နေသည်ကိုတွေ့လိုက်ရသည် ။

အိမ်း ... အိမ်ထောင်ရှိသွားတဲ့လူတွေနဲ့လူလွတ်တွေရဲ့အခြေအနေကအရမ်းကွာခြားတာပဲကိုး ...

စုန့်ယွမ်ယွမ်မှာ နှလုံးသားထဲပင်မျက်ရည်တတောက်တောက်ကျနေရရှာ၏ ။

တကယ်ပဲ ... ငါ့ဂေါ်ဖီထုပ်လေးက၀က်နောက်လိုက်သွားပြီ...

×××

နှစ်ယောက်သားလျှောက်လည်နေသည်မှာအချိန်အတော်ကြာပြီဖြစ်သည့်အပြင် စုန့်ယွမ်ယွမ်ကလည်း အမူသည်တစ်ဦးနှင့်ညစာစားရန်ချိန်းဆိုထားသောကြောင့် ရှုရှုကအိမ်ပြန်ရမည်ဖြစ်ပြီး စုန့်ယွမ်ယွမ်ကမူ ညစာစားရန်ပြင်ဆင်ရမည်ဖြစ်သည် ။

ရှုရှုက လုထန်နှင့်အတူညစာချက်စားရန်အတွက်မားကတ်တွင်စျေး၀င်၀ယ်ရန်ဆုံးဖြတ်လိုက်ပြီး ကုန်တိုက်အနီးတွင်အငှားကားရပ်စောင့်နေလိုက်သည် ။ ထိုအချိန်တွင် ကားတစ်စီးသူမ၏ အနားသို့လာရောက်ရပ်လာပြီး အမျိုးသားတစ်ဦး၏ လက်တစ်ဖက်က သူမကိုကားပေါ်တက်ရန်အချက်ပြလာ၏ ။ ထိုသူ၏ လက်တွင် နာမည်ကြီးဘရန်းတစ်ခုမှငွေရောင်နာရီတစ်လုံးကိုပတ်ထားပြီး အကြည့်တစ်ချက်ဖြင့်ပင်အလွန်စျေးကြီးမည့်ပုံပေါ်၏ ။

ရှုရှုက ကားမှန်ချထားသည့်နားသို့သွား၍ စကားတစ်ခွန်းပြောလိုက်သောအခါ ထိုအမျိုးသားကသူမ၏ဆံနွယ်များကိုညင်ညင်သာသာပွတ်သပ်ပေးလာသည် ။

ရှုရှုကပြုံးပြပြီးနောက် ဘေးရှိခရီးသည်ထိုင်ခုံတွင်၀င်ထိုင်လိုက်လေသည် ။

…

မူလက လုထန်မှာ စားသောက်ဆိုင်တစ်ဆိုင်ဆိုင်တွင် ညစာစားရန်စဥ်းစားထားပါသော်လည်း ရှုရှုက အတူတူချက်စားရန်တိုက်တွန်းသည့်အပြင်အိမ်တွင်လည်း ပန်းကန်ဆေးစက်အသစ်၀ယ်ထားသောကြောင့် ပန်းကန်ဆေးရန်ပျင်းသည့်သူတို့နှစ်ယောက်အတွက် အဆင့်သင့်ဖြစ်နေလေသည် ။

ထို့ကြောင့် နှစ်‌ေယာက်သားစူပါမားကတ်တွင်စျေး၀ယ်ရန်သွားရောက်ကြသည် ။ ရှုရှုကအရှေ့မှဟင်းသီးဟင်းရွက်များကိုရွေးချယ်၀ယ်ယူနေပြီး လုထန်ကမူသူမ၏ နောက်မှစျေး၀ယ်ခြင်းကိုတွန်း၍ ဖြည်းဖြည်းချင်းလိုက်နေလေ၏ ။

စုန့်ယွမ်ယွမ်နှင့်တွေ့ဆုံရန်အတွက် ချိန်းဆိုထားသောနေရာသို့အလောတကြီးသွားခဲ့ရသဖြင့် နို့နှစ်ရောင်ဆွယ်တာနှင့်အရောင်အနည်းငယ်ရင့်သောစကတ်ကိုတွဲဖက်၀တ်ဆင်ထားသည့် သူမ၏ အသွင်အပြင်မှာ မြင်သူတိုင်းမျက်စိအေးလှ၏ ။

လုထန်က မျက်မှောင်ကျုံ့၍ နေ့လည်ကသူ့ထံလာခဲ့သည့် ရှုရှုနှင့်အလွန်ဆင်တူသောအမျိုးသမီးကြီးအကြောင်းကိုတွေးမိသွားသည် ။ သူမတို့နှစ်ဦးမှာ ရုပ်ရည်သွင်ပြင်ဆင်တူပါသော်ငြားလည်း လုထန်ကမူ ထိုအမျိုးသမီးကြီးအားမနှစ်သက်ချေ ။

နေ့လည်က ထိုအမျိုးသမီးကြီးမှာ တံခါးကိုအကြမ်းပတမ်းတွန်း၍ အိမ်ထဲသို့၀င်လာခဲ့သည် ။ သူမ၏ အကြည့်များမှာအိမ်နေရာအနှံ့ဝေ့ဝဲကျရောက်သွားပြီး တောက်တောက်ပပပြုံးနေသည့် ရှုရှု၏ ဓာတ်ပုံကိုတွေ့သောအခါရပ်တန့်သွား၏ ။

ရှုရှု၏ အပြုံးမှာ အလွန်အသက်၀င်ပျော်ရွှင်နေပုံရပြီး ထိုကဲ့သို့သောအပြုံးမျိုးကို အမျိုးသမီးကြီးတစ်ခါမှမမြင်ဖူးခဲ့ချေ ။

အမျိုးသမီးကြီးကအိမ်ထဲသို့၀င်လာပြီးနောက် ဆိုဖာပေါ်တွင်၀င်ထိုင်လိုက်ကာ

" ငါကရှုရှုရဲ့အမေ "

လုထန်ကစိတ်ငြိမ်ငြိမ်ထား၍ အမျိုးသမီးကြီးအတွက်လက်ဖက်ရည်ပြင်ပေးပြီးနောက် မျက်နှာချင်းဆိုင်တွင်၀င်ထိုင်လိုက်သည် ။

" ရှုရှုကိုပြောစရာလေးတွေရှိမယ်ဆိုတာကျွန်တော်သိပါတယ် "

" ငါ့ဆီကနေနှစ်၀က်ကျော်လောက်ပုန်းနေပြီးလက်ထပ်ထားတာတဲ့လား "

အမျိုးသမီး၏ အေးစက်စက်မျက်၀န်းများမှာ လုထန်အား စုန်ချည်ဆန်ချည်ကြည့်ကာ

" မင်းတို့လက်ထပ်တာဘယ်လောက်ကြာပြီလဲ "

လုထန်ကအမှန်အတိုင်းပြောလိုက်သည် ။

" နှစ်လကျော်ပါပြီ "

အမျိုးသမီးကြီးကမျက်ခုံးပင့်၍

" သူမတကယ်ကိုအလျင်လိုနေတာပဲ "

လုထန် အတွေးနွံနစ်နေသည့်အချိန်တွင် ရှုရှုကမူ ပင်လယ်စာများရောင်းချသည့်နေရာသို့ရောက်နေပြီး သူ့အားလက်ပြ၍ မေးမြန်းလာသည် ။

" ရှင်ဂဏန်းစားတယ်မဟုတ်လား"

လုထန်က စျေးခြင်းကိုတွန်းကာသူမနားသို့သွားလိုက်ပြီး ပုံးထဲရှိဂဏန်းများကိုတစ်ချက်ကြည့်ကာ

" မင်းဘယ်လိုချက်ရမလဲသိလို့လား "

" ကျွန်မတစ်ခါချက်ဖို့ကြိုးစားဖူးတယ် ဒါပေမဲ့ လက်မနဲ့အညှပ်ခံလိုက်ရပြီး သွေးတွေထွက်လိုက်တာမှ "

ထိုစဥ်မှတ်ဥာဏ်များကိုပြန်တွေးမိကာ ရှုရှုကပြုံး၍

" အဲဒီအချိန်တုန်းက ကျွန်မကအထက်တန်းကျောင်းသူလေးပဲရှိသေးတာလေ အင်တာနက်ပေါ်မှာရှာကြည့်တော့ ဂဏန်းညှပ်ခံရရင် ကူးစက်ရောဂါဖြစ်နိုင်တယ်ဆိုလို့တစ်နေကုန်ငိုနေခဲ့ရသေးတယ် "

လုထန်က သူမ၏ သေးသွယ်ဖြူဖျော့သည့်လက်ချောင်းများကိုစိုက်ကြည့်၍ ၁၄နှစ်အရွယ်ကောင်မလေးတစ်ယောက် ဂဏန်းဟင်းချက်ရန်ကြိုးစားနေပုံကိုပုံဖော်မြင်ယောင်နေမိသည် ။ လုထန်က ပြုံး၍ ရှုရှု၏ ခေါင်းကိုပွတ်သပ်ကာ အသားရောင်းချသည့်ကောင်တာသို့ဆွဲခေါ်သွား၏ ။

" မချက်နဲ့တော့ ကိုယ်မင်းငိုမှာကိုမကြည့်ရက်ဘူး "

ရှုရှုက လုထန်အားမော့ကြည့်၍

" ဒါပေမဲ့အခုထိ ..."

ရှုရှု၏ စကားတစ်၀က်မှာတင် လုထန်ကကြားဖြတ်၍

" မင်းစားချင်လို့လား "

သူမ၏ အသံမှာတိုးတိုးလေးဖြစ်နေသဖြင့် လုထန်သေသေချာချာမကြားရဘဲ အာရုံစိုက်နားထောင်နေရ၏ ။ သူမပြောချင်သည့်စကားကိုသဘောပေါက်ပြီးသည့်နောက်လုထန်က အသာမျက်မှောင်ကျုံ့၍

" မနေ့ညကဘာဖြစ်ခဲ့လို့လဲ "

ရှုရှု နားရွက်တစ်ခုလုံးနီရဲသွားရပြီး လုထန်၏ လက်ထဲမှစျေးခြင်းကိုလု၍ မျက်စိရှေ့တွင်မြင်မြင်သမျှအရာအားလုံးကိုပစ်ထည့်နေတော့သည် ။ လုထန်ကမူ သူမရှက်သွားပုံလေးကိုကြည့်၍ နှုတ်ခမ်းသပ်လိုက်ပြီးနောက် ပြုံးကာနောက်မှလိုက်လာလေ၏ ။

သူမဘာတွေကိုများတွေးနေတာပါလိမ့်...

…

ဟင်းသီးဟင်းရွက်နှင့်အသားများ၀ယ်ယူပြီးနောက် ရှုရှုက အဆာပြေမုန့်များ၀ယ်ယူခဲ့သည့်အပြင် လုထန်မွေးထားသည့်ခွေးလေးအတွက်လည်းခွေးစာများ၀ယ်ယူရန်ရွေးချယ်နေလေသည် ။ သူမ၏ လက်ထဲတွင်အမျိုးအစားမတူညီသည့်ခွေးစာသုံးထုပ်ကိုကိုင်၍ ရွေးချယ်ရန်ခက်ခဲနေ၏ ။

သူမငယ်စဥ်အခါတုန်းကသာကြောင်တစ်ကောင်မွေးခဲ့ဖူးပြီး ခွေးမမွေးခဲ့ဖူးသောကြောင့် မည်သည့်အစာအမျိုးအစားကခွေးများအတွက်သင့်လျှော်လောက်မည်ကိုမသိချေ ။ ဖုန်းထုတ်၍ ဘိုင်ဒူတွင်ရှာဖွေတော့မည့်အချိန်မှာပင် လုထန်က သူမ၏ လက်ထဲမှခွေးစာတစ်ထုပ်ကိုယူ၍

" ဒီတံဆိပ်ကအစာကိုပဲကျွေးနေကျ "

ထို့နောက် ထိုတံဆိပ်ထဲမှအရသာနှစ်မျိုးကိုထပ်မံရွေးယူ၍

" အကောင်လည်းတဖြည်းဖြည်းကြီးလာပြီဆိုတော့ အစာအများကြီးပိုစားလာတယ် "

ရှုရှုက ထိုင်ချလိုက်ပြီး ခွေးစာများကိုအလေးအနက်ရွေးချယ်နေသည့် လုထန်အား အောက်မှမော့ကြည့်နေလေ၏ ။ သူမ လုထန်အားအမှန်ပင်သဘောကျပါ၏ ။ ရှုရှုက လုထန်အားအချိန်အတော်ကြာကြည့်နေပြီးနောက် လုထန်၏ ဘောင်းဘီအနားစကိုဆွဲလိုက်သည်။

လုထန်က ရှုရှုအားငုံ့ကြည့်၍ပြုံးပြပြီးနောက် သူမ၏ဘေးတွင်ထိုင်ချလိုက်သည့်အခါ သူမကသူ့အားအနမ်းဖွဖွတစ်ပွင့်ပေးလာသည် ။

လုထန်မှင်သက်သွားရသည် ။ ရှုရှုက စကားမပြောဘဲ ထိုင်နေရင်းဖြင့်သာလုထန်အား မျက်လုံးအ၀ိုင်းသားဖြင့်ကြည့်နေလေ၏ ။ သူမ၏ ပါးမို့မို့လေးများကပန်းနုရောင်သမ်းနေသည့်အပြင် လှပသည့်မျက်၀န်းတစ်စုံမှာလည်း ဆွဲဆောင်မှုရှိလှသည် ။

သူတို့နှစ်ဦး၏ အနေအထားမှာ အထက်တန်းကျောင်းသားလေးနှင့်ကျောင်းသူလေးတို့စုံတွဲနှစ်ယောက် သစ်တောလေးထဲရှိသစ်ပင်အောက်တွင် ခိုးနမ်းနေပုံနှင့်ဆင်တူနေ၏ ။ လုထန်ကအထက်တန်းတွင် မိန်းကလေးတစ်ဦးအားသစ်ပင်အောက်၌ မနမ်းခဲ့ဖူးသော်လည်း သူမနှင့်သာအတူတူဆိုလျှင် မည်သည့်အရာလုပ်ရသည်ဖြစ်စေ လုပ်ရန်ဆန္ဒရှိသည် ။

လုထန်၏ လည်စေ့မှာအထက်နှင့်အောက်လှုပ်ရှားသွားပြီးနောက် မျက်နှာပူပူနှင့်အကြည့်လွှဲလိုက်ရလေသည်။

ဟိုနေရာက အမှန်တစ်ကယ်ကြီး ထကြွလာသောကြောင့်ပင် ...

လုထန် ... သားရဲစိတ်ကိုထိန်းသိမ်းစမ်း ...

ရှုရှုမှာမူ လုထန်၏ စိတ်ထဲတွင်ခံစားနေရသည်များကိုမသိဘဲ ထရပ်ရန်ပြင်လိုက်သည် ။

" ရှုရှု "

စိတ်လှုပ်ရှားနေပုံရသောခေါ်သံတစ်ခုနောက်မှထွက်ပေါ်လာသည့်အချိန်တွင် ရှုရှုနှင့်လုထန်မှာထိုင်နေဆဲပင်ရှိသေးသည် ။ ထို့ကြောင့် လူမိခံလိုက်ရသဖြင့် လန့်သွားကြ၏ ။

ရှုရှုက လုထန်၏ လက်ကိုဆွဲဲ၍ ထရပ်လိုက်သည် ။ အချိန်အတော်ကြာထိုင်နေခဲ့သောကြောင့် သူမ၏ ခြေထောက်များမှာထုံကျဥ်နေပြီး သက်တောင့်သက်သာမရှိလှပေ ။ သူမလှည့်ကြည့်လ်ုက်သည့်အခါ စျေး၀ယ်ခြင်းကိုကိုင်ထားသည့် ပိန်ပိန်ပါးပါးအမျိုးသားတစ်ဦးသားတစ်ဦးအားတွေ့လိုက်ရသည် ။

" မင်းကိုဒီမှာတွေ့ရလိမ့်မယ်လို့ထင်မထားခဲ့ဘူး "

ထိုအမျိုးသားအားရှုရှု မမှတ်မိပါသော်လည်း ဘာမျှမပြောပေ ။ အမျိုးသားက ခေါင်းကုတ်ပြီးနောက် အနည်းငယ်ရှက်နေဟန်ဖြင့်

" လင်းချန်ပါ ... ကျွန်တော်တို့အရင်တုန်းကညစာအတူတူစားခဲ့ဖူးတယ်လေ "

ထိုအခါမှသာမှတ်မိသွားပြီး သူမနောက်မှ လုထန်အားလှည့်ကြည့်လိုက်သည့်အခါ မျက်နှာအမူအယာမကောင်းလှချေ ။

" အင်း ... မတွေ့ရတာကြာပြီ "

လင်းချန်က ရှုရှု၏ စျေး၀ယ်ခြင်းထဲမှ ခွေးစာထုပ်များကိုကြည့်၍

" မင်းမှာလည်းခွေးရှိတာလား "

ထိုသူကရှေ့ဆက်တိုးလာပြီးနောက်

" မင်းရွေးထားတဲ့တံဆိပ်ကအစာတွေကတကယ်ကောင်းတယ် ငါ့ခွေးလေးလည်းအဲ့တံဆိပ်ကအစာတွေကိုအကြိုက်ဆုံး "

ထိုအမျိုးသားက ခွေးမွေးမြူခြင်းနှင့်ပက်သက်သည့် အကြောင်းအရာမျိုးစုံကိုမရပ်မနားတရစပ်ပြောဆိုလာတော့၏ ။

ဆုံတွေ့ခဲ့ကြပုံမှာအနည်းငယ်ထူးဆန်းနေပါသော်ငြား လုထန်ကမူ ထိုသူက သူ၏ ပြိုင်ဖက်မဖြစ်နိုင်ကြောင်းသိသဖြင့် အဖတ်ပင်မလုပ်ချေ ။ ရှုရှုကမူ နှစ်ယောက်ကြားတွင် နေရခက်စွာဖြင့်ရပ်နေမိ၏ ။ သူမ၏ဘယ်လက်ကိုမူ လုထန်က ပိုင်ဆိုင်ကြောင်းသက်သေအဖြစ် ဆွဲကိုင်ကာ လူမြင်အောင်ပြသထားလေသည် ။

လင်းချန်မှာ တစ်ယောက်တည်းစကားပြောနေရင်းဖြင့် အသံမှာစိတ်မကောင်းဖြစ်နေပုံရလေ၏ ။

" ကျွန်တော်အရင်က မှားခဲ့တာပါ စောစောစီးစီးလက်ထပ်ရမယ်ဆိုတာနဲ့အရမ်းကြောက်ခဲ့တာလေ "

" နောက်တော့ မင်းနဲ့ထပ်တွေ့ချင်လို့ အေဂျင်စီကိုထပ်သွားခဲ့ပေမဲ့ သူတို့ကမင်းလက်ထပ်သွားပြီလို့ပြောတယ် "

" မင်းလိုကောင်းမွန်တဲ့မိန်းကလေးနဲ့ လွဲချော်သွားခဲ့ရတာပဲ "

"…"

လေထုအခြေအနေမှာ ရေခဲမှတ်အထိအေးစက်သွားလုမတတ်ပင် ။ ပတ်၀န်းကျင်အခြေအနေကိုအကဲမခတ်ဘဲ တစ်ယောက်တည်းသက်ပြင်းတချချနှင့်ကြေကွဲနေသည့် လင်းချန်မှာမူ လူထသတ်တော့မည့်ရုပ်ပေါက်နေသည့် လုထန်၏ အမူအယာကိုသတိမပြုမိပါချေ ။

ရှုရှု : "…"

ထမင်းလေးအတူတူစားခဲ့ရုံပဲလေ ရှင်ကဘာတွေများထပ်မျှော်လင့်နေရတာတုန်း ...

လင်းချန်နှင့်တဖြည်းဖြည်းဝေးကွာသွားသောအခါမှသာ လုထန်က ရှုရှု၏ ဘေးတွင်ရပ်၍ မကျေမနပ်ဖြစ်နေသည့်လေသံကြီးဖြင့်

" ဘယ်လိုလူမျိုးကများ တစ်ခါဘလိုင်းဒိတ်တွေ့ခဲ့ဖူးတဲ့လူကိုလိုက်ရှာလို့လဲ "

ရှုရှု၏ အသက်ရှင်သန်လိုသောဆန္ဒလေးကြောင့် ပြင်းပြင်းထန်ထန်ပင် ငြင်းဆို၍ ရိုးသားစွာပြောပြလာ၏ ။

" ညစာလေးတစ်ခါတည်းအတူတူစားခဲ့ဖူးတာပါ "

" ကျွန်မသူ့ကိုမကြိုက်ခဲ့ပါဘူး "

လုထန်က ' အိုး ' ဟုသာရေရွတ်လျှက် ခေါင်းငုံ့၍ နှုတ်ခမ်းတင်းတင်းစေ့ထားကာငွေရှင်းကောင်တာသို့လျှောက်သွားလေ၏ ။ အိမ်ပြန်သည့်လမ်းတစ်လျှောက်လုံးတွင် လုထန်၏ အမူအယာမှာ အေးခဲသွားလုမတတ်အေးစက်နေပြီး မျက်လုံးများမှာလည်း ရှေ့သို့သာတည့်တည့်စိုက်ကြည့်နေလေသည် ။

ရှုရှုမှာသူမကိုယ်သူမ အနိုင်ကျင့်ဆိုးသွမ်းသည့် မိထွေးတစ်ဦးကဲ့သို့ခံစားလိုက်ရကာ လုထန်မှာမူ ခေါင်းငုံ့၍ ပြောချင်သည်များကိုမြိုသိပ်နေရသည့် လင်ပါသမီးလေးတစ်ယောက်ကဲ့သို့ပင် ။

တစ်ပတ်လျှင်ဘလိုင်းဒိတ်တစ်ယောက်တွေ့ခဲ့ပြီး နှစ်လကျော်သည်အထိသင့်တော်သည့်သူတစ်ယောက်မှမတွေ့ခဲ့သည့် ထိုအချိန်များမှာ ရှုရှုအတွက်လည်းခေါင်းကိုက်ခဲ့ရသည့်အချိန်များဖြစ်သည် ။ တံခါးဖွင့်၍ အိမ်ထဲသို့၀င်သည့်အချိန်အထိ လုထန်ကစကားတစ်ခွန်းမှမပြောခဲ့ချေ ။

သူမအိမ်ထဲသို့၀င်လိုက်လျှင်၀င်လိုက်ခြင်းအမျိုးသမီးသုံးရေမွှေးရနံ့ဖျော့ဖျော့ကိုရလိုက်၏ ။ ရှုရှု၏ မိခင်မှာရေမွှေးသိပ်စွတ်လေ့မရှိသော်ငြားလည်း သူမကမူထိုရနံ့အားသေသည်အထိကွဲကွဲပြားပြားမှတ်မိနိုင်သည် ။

စျေးကြီးပုံရပြီး အထက်တန်းကျကျဆွဲဆောင်မှုရှိသည် ။ ဤ ရနံ့မှာ သူမအိမ်သို့လာသွားကြောင်းသက်သေပင် ။ ရှုရှုက လုထန်၏ အင်္ကျီလက်ကိုဆွဲ၍

" ကျွန်မအမေဒီကိုလာသွားသေးလား "

" အင်း ."

" ရှင့်ကိုဘာတွေပြောသွားလဲ "

လုထန်က သူမကိုအေးစက်စက်ကြည့်လာပြီး သူ၏ အသံမှာမူ အရေးမပါသည့်ကိစ္စတစ်ခုကိုပြောနေသကဲ့သို့ ခံစားချက်မပါပေ ။

" ဘာမှမဟုတ်ပါဘူး မင်းရဲ့မိသားစုအကြောင်းကိုပြောပြပြီး မင်းမှာစေ့စပ်ထားတဲ့လူရှိတယ်တဲ့လေ "

လုထန်က ခဏမျှရပ်၍

" အိုး ... ပြီးတော့ ကိုယ့်ကို ဂဏန်းရှစ်လုံးကျော်တဲ့ ချက်လက်မှတ်ကြီးလည်းပေးခဲ့သေးတယ် "

ဤကဲ့သို့သောအဖြစ်အပျက်မျိုးမှာ လုထန်အတွက် တစ်သက်မှတစ်ခါသာကြုံတွေ့ရသည့်ထူးခြားဆန်းပြားအဖြစ်အပျက်တစ်ခုပင် ။ ရှုရှုက နှုတ်ခမ်းကိုက်၍ လုထန်၏ မျက်နှာကိုကိုင်ကာမေးလိုက်သည် ။

" ရှင်ယူထားလိုက်လား "

လုထန်က မလှုပ်ရှားဘဲသူမကိုသာစိုက်ကြည့်နေ၏ အချိန်အတော်ကြာသောအခါမှသာ တဖြည်းဖြည်းချင်းဖြင့်

" သူမက မင်းနဲ့မင်းရဲ့စေ့စပ်ထားတဲ့လူတို့နဲ့ ဓာတ်ပုံကိုပြသွားတယ်လေ ...ကိုယ့်နေရာကမင်းအတွက် ဘယ်လိုဆက်နွယ်မှုမျိုးမှာလဲ "

ရှုရှု၏ အတွေးထဲတွင်မူ မျက်နှာချင်းဆိုင်တွင်ထိုင်၍ ဒေါသထွက်နေမည့်အမျိုးသမီးနှင့် အားသာချက်တစ်ခုကိုဆုပ်ကိုင်ထားရသဖြင့်မော်ချီနေမည့်လုထန်တို့၏ မျက်နှာကိုသာမြင်နေလေသည် ။ လုထန်က လက်ထပ်စာချုပ်ကိုပစ်ချ၍ သူသည်သာရှုရှု၏ တရား၀င်ခင်ပွန်းဖြစ်ကာ ကျန်သောသူများကအမှိုက်သရိုက်များသာဖြစ်ကြောင်း စိတ်ဆိုးစွာဖြင့်ပြောလိမ့်မည်ပင် ။

အလွန်ချစ်ဖို့ကောင်းလောက်သည် ။

လုထန်မှာ သူမ၏ ရယ်ချင်စိတ်ကိုထိန်းချုပ်နေရသည့်အမူအရာကိုကြည့်ကာသည်းမခံနိုင်တော့သောကြောင့် စားပွဲခုံပေါ်ချီမတင်၍ သူမမေးစေ့ကိုလက်ဖြင့်ကိုင်၍ ခေါင်းမော့စေကာ တဖြည်းဖြည်းပြောလာ၏ ။

" ကိုယ်တို့ရဲ့လက်ထပ်စာချုပ်ကိုစားပွဲပေါ်ပစ်ချပြီးပြောလိုက်တယ်လေ ..."

" ဒီသခင်လေးကသာ ရှုရှုနဲ့တရား၀င်လက်ထပ်ထားတဲ့သူလို့ ... ကိုယ့်ကိုယ်ကိုစေ့စပ်ထားတဲ့သတို့သားလောင်းဆိုပြီးအရှက်မရှိပြောနေတဲ့လူကမှ ဘာမှဘောင်မ၀င်တဲ့အရူးကောင်လို့ပြောလိုက်တယ် "

ရှုရှုက လုထန်အားပြုံးပြကာ

" ရှင်တကယ်ကိုသတ္တိရှိတာပဲ "

လုထန်မှာ ရယ်မောမိသွားပြီး ရှုရှု၏ မျက်လုံးကိုလက်ဖြင့်အုပ်၍ နှုတ်ခမ်းပါးလေးကို လက်မဖြင့်ပွတ်သပ်နေလေသည် ။

" ကိုယ်မင်းကိုဘယ်လိုနည်းနဲ့မှမစွန့်လွှတ်နိုင်ဘူး "

အသက်ရှုသံများကမောက်ကမဖြစ်သွားရ၏ ။ လုထန်က ရှုရှုအားရေချိုးခန်းသို့ချီသွားသည့်အချိန်တွင် ရှုရှုက လုထန်၏ လည်တိုင်ကိုဖက်၍ အလေးအနက်ပြောလာ၏ ။

" လုထန် ကျွန်မရှင့်ကိုအများကြီးသဘောကျတယ် ... ဒီလိုမျိုးလေးပဲ ရှင်နဲ့အတူတူတစ်သက်လုံးနေသွားချင်တာ "

လုထန်မှာ သူ၏ ပျော်ရွှင်နေသည့်အပြုံးကိုမဖုံးဖိနိုင်တော့ပေ ။

" ကိုယ်လည်းမင်းနဲ့ထပ်တူပါပဲကွာ "

🐳

The End❤️

Translate by Mori Sue🥰

Prev Next