Welcome To MM Storyteller
LOGIN
အခန်း(၅) - နှစ်သက်မှု
လုချန်ကို အလုပ်ခန်းထဲ ထည့်ပိတ်လှောင်လိုက်ပြီးနောက် မီကျား နှစ်သက်မှုအကြောင်းကို စတင်စဉ်းစားခဲ့သည်။
“စနစ် ၀၀၇... မင်းရှိလား”
[ရှိပါတယ်။]
မီကျား ခဏစဉ်းစားပြီးနောက် “မင်းနဲ့ ဆက်သွယ်ဖို့ စကားလုံးတွေ ဘာတွေ ရှိလား” ဟု မေးလိုက်သည်။
[မလိုပါဘူး။ မင်းအသိစိတ်နဲ့ တိုက်ရိုက်ဆက်သွယ်လို့ ရပါတယ်။]
မီကျားသည် ခေါင်းထဲ၌ မေးခွန်းများ မေးကြည့်သည်။
ဘီလူးတစ်ကောင်ရဲ့ နှစ်သက်မှုကို ဘယ်လို မြှင့်တင်ရမလဲ....
[အိမ်ရှင်က ကိုယ့်ဘာသာ ရှာဖွေရမှာပါ။]
သူ အတွေးကို ပြောင်းလိုက်သည်။
ဒါဆို အချစ်ပျိုးထောင်ရေးစွမ်းရည်ကို ဘယ်လို အဆင့်မြှင့်ရမလဲ.....
[အိမ်ရှင်က ကိုယ့်ဘာသာ ရှာဖွေရမှာပါ။]
ထိုအဖြေနှစ်ခုကို ကြားလိုက်ရသောအခါ မီကျား မျက်လုံးကို လှန်ပစ်လိုက်သည်။
ဒီစနစ်က တကယ်ကို အသုံးမကျဘူး။ စတင်သူဇုန်ထဲ ရောက်လာကတည်းက သိပ်မပေါ်လာဘဲ မေးခွန်းမေးတော့လည်း ဘာမှမပြောတတ်သလိုမျိုးတွေသာ ပြန်ဖြေနေသည်။
သို့သော် စနစ်က သူ့အတွေးများကို ကြားလိုက်ရဟန်တူသည်။
[ကျွန်တော်က တိုက်ရိုက်ထုတ်လွှင့်မှုကို ကူညီပေးတဲ့ စနစ်တစ်ခုပါ။ စည်းမျဉ်းတွေနဲ့ အခြေခံဂိမ်းအကြောင်းအရာတွေကို ပြောပြဖို့သာ တာဝန်ရှိပါတယ်။ ဂိမ်းကို ဘယ်လို ရှင်းလင်းရမယ်ဆိုတာကို ကိုယ့်ဘာသာ ရှာဖွေရမှာပါ။ ဘာကြောင့်လဲဆိုတော့ ဂိမ်းကစားနေတာက ကျွန်တော်မဟုတ်ဘဲ ခင်ဗျား ဖြစ်နေလို့ပါပဲ။]
“ကောင်းပြီ၊ ကောင်းပြီ၊ ဒါဆို မင်းနဲ့ မဆိုင်တော့ဘူးပေါ့။ မင်းသွားချင်တဲ့နေရာသွားတော့” မီကျားက လက်ဝှေ့ယမ်းပြီးနောက် ဘာလုပ်ရမလဲဆိုသည်ကိုစဉ်းစားရင်း မေးစေ့ကို ကိုင်လိုက်သည်။
အရမ်းကို ရှုပ်ထွေးတာပဲ။ သူ ဦးနှောက်ကို အသုံးချပြီး စဉ်းစားရတာ တကယ်ကို မလိုချင်ဘူး။ ဥပဒေမချိုးဖောက်ဘဲ အကြမ်းဖက်နည်းနှင့် ဖြေရှင်းလို့ရရင် ဦးနှောက်ကို ဘယ်တော့မှ မသုံးဘူးဆိုတာက သူ့ရဲ့ ပုံမှန်ကျင့်ဝတ်ပဲ....
သူ စစ်သုံးဓားကို ထုတ်လိုက်သည်။ အဲ့ဒီဘီလူးကို အပြီးသတ် သတ်ပစ်လိုက်တာ ပိုကောင်းမယ်။ ဘာပဲဖြစ်ဖြစ် သူက ဖုတ်ကောင်ဖြစ်နေပြီ၊ ဒါကြောင့် သေပြီလို့ ယူဆနိုင်ပြီး ဥပဒေချိုးဖောက်ရာလည်း မရောက်ဘူး.....
ဒါပေမဲ့ ဒီလိုလုပ်ရင် သူ့ရဲ့ စွမ်းရည်ကို အဆင့်မြှင့်ဖို့ အခွင့်အရေးကို လွဲချော်သွားနိုင်တယ်။ အဆင့်မမြှင့်ဘဲဆိုရင် သူ့ရဲ့ ဘီလူးအသွင်ပြောင်းမှုက အများဆုံး ငါးမိနစ်ပဲ ခံမယ်....
သူ အသွင်ပြောင်းထားတဲ့ အချိန်ကို ပိုကြာစေချင်တယ်...
မီကျားသည် ချီတုံချတုံဖြစ်နေပြီး စစ်သုံးဓားကို ထုတ်လိုက်ပြီးနောက် ဖြတ်ခနဲ မြည်အောင် ပြန်ပိတ်လိုက်သည်။ အလုပ်ခန်းထဲမှ တဒုံးဒုံး မြည်သံများ ဆက်လက်ထွက်ပေါ်နေသည်။ သူ၏ ဖုတ်ကောင်ဖြစ်နေသောအိမ်နီးချင်းသည် ရုန်းကန်ပြီး လွတ်မြောက်ရန် အားထုတ်နေဆဲပင်ဖြစ်သည်။
အချိန်အတော်ကြာပြီးမှ သူ ရုတ်တရက် သတိရလိုက်သည်။ သူအရင်က ဖန်တီးခဲ့တဲ့ဂိမ်းက အချစ်ကိုပျိုးထောင်သည့်ဂိမ်း မဟုတ်လား။ သူ နှစ်သက်မှုကို ဘယ်လိုရနိုင်မလဲဆိုတာ စမ်းသပ်ဖို့ အဲဒီဂိမ်းရဲ့ အဆင့်တွေကို လိုက်နာလိုက်ရုံသာ။ စမ်းသပ်ဖို့ အခန်းထဲမှာ အသင့်ရှိနေသည့် ပစ်မှတ်လည်း ရှိနေပြီ။
သူ အသက်နှစ်ဆယ်ကျော်အထိ တစ်ကိုယ်တည်းသမားဖြစ်ခဲ့ပေမဲ့၊ သူ့ဂိမ်းအတွက် သုတေသနလုပ်သောအချိန်က ချိန်းတွေ့ခြင်းဆိုင်ရာ ဂိမ်းဆယ်ခုကျော်ကို တစ်ပတ်အတွင်း ရှင်းလင်းခဲ့ဖူးသောကြောင့် အတွေ့အကြုံများစွာ ရှိခဲ့သည်။
“ငါက တကယ်ကို ပါရမီရှင်ပဲ!” မီကျားက သူ့ကိုယ်သူ စိတ်အားထက်သန်စွာ ချီးကျူးလိုက်သည်။
သူ ချက်ချင်း မှတ်စုစာအုပ်တစ်အုပ်ကို ယူပြီး စိတ်ကူးများကို အလျင်အမြန် ချရေးကာ အစီအစဉ်အချို့ကို ရေးဆွဲလိုက်သည်။
ပထမဆုံးအနေနဲ့ ၊ သူ ပစ်မှတ်ကို ချိုသာတဲ့စကားများ ပြောရန် လိုအပ်သည်။ ဒါက အရမ်းလွယ်တယ်။ သူ့မှာ အလွယ်တကူရနိုင်တဲ့ အချစ်နှင့်ဆိုင်တဲ့စကားစုလေးတွေ စုထားတာရှိတယ်....
နောက်တစ်ခုက အချိန်အခါအားလျော်စွာ လက်ဆောင်လေးတွေ ပေးဖို့ပင်။ ဒါလည်း ပြဿနာမရှိဘူး။ သူ့ပြတင်းပေါက်ဘောင်မှာ အဖိုးမတန်တဲ့ ပစ္စည်းအမျိုးမျိုး ပြည့်နေသည်။ သူ နေ့တိုင်း မတူတာ တစ်ခု ပေးနိုင်ဖို့ အာမခံနိုင်တယ်....
နောက်ဆုံးအနေနဲ့ ပစ်မှတ်ကို အပြင်ထွက် လေညှင်းခံခေါ်သွားခြင်းက နှစ်သက်မှုကို သဘာဝအတိုင်း မြှင့်တင်ပေးနိုင်သည်။ ဒါကလည်း လုပ်လို့ရပါတယ်။ ရပ်ကွက်ထဲမှာ နေရာကောင်းတစ်ခု ဖြစ်စေမယ့် ဥယျာဉ်ငယ်လေး တစ်ခု ရှိနေသည်။
သူ့အစီအစဉ်များမှာ အဆင်သင့်ဖြစ်နေပြီမို့၊ မီကျားသည် အလုပ်ခန်းတံခါးကို ဖွင့်ပြီး ဝင်သွားကာ လုချန်နှင့် မျက်နှာချင်းဆိုင်လိုက်သည်။ လုချန်က အခုဆိုလျှင် လုံးလုံးလျားလျား ဖုတ်ကောင် တစ်ကောင်လို ဖြစ်နေသည်။
လုချန်သည် အလွန် စိတ်ဆိုးနေပြီး ဆာလောင်နေသည်။ သူ့ကို အခန်းထဲ ပိတ်ထားသည့်လူကို အစိတ်စိတ်အမြွှာမြွှာ ဆုတ်ဖြဲပစ်ချင်နေသည်။ သို့ပေမဲ့ ကြိုးက သူ့ကို မီကျားနှင့် တစ်မီတာအကွာတွင် ချုပ်ထားသောကြောင့် ရှေ့ဆက်သွားလို့ မရတော့ပေ။
မီကျားက သူ့ဆီ လျှောက်သွားပြီး နှစ်ပတ် ပတ်လိုက်ကာ ရုတ်တရက် သူ့ဆံပင်ကို ပင့်တင်လိုက်ပြီး အနီးနားက ရုပ်တုတစ်ခုကို မှီလိုက်သည်။ သူက အရမ်းမိုက်တယ်ဟု ထင်နေသော ပုံစံမျိုးနှင့် ပြောသည် : “ခင်ဗျားကို ကျွန်တော် မသင်္ကာမှုနဲ့ ဖမ်းလိုက်ပြီ”
“…” အပြင်းအထန် ရုန်းကန်နေသည့် လုချန် ခဏတာ ရပ်တန့်သွားသည်။ သူ မည်သည်ကိုကြားလိုက်မှန်း မသိသလို ရှုပ်ထွေးနေဟန်ဖြင့် ခေါင်းကို စောင်းလိုက်သည်။
(နှစ်သက်မှု +၁)
သူ့ခေါင်းပေါ်၌ စာသားဖြူဖြူလေးတစ်ကြောင်း ခဏတာပေါ်လာပြီး လေထဲ ပျောက်ကွယ်သွားသည်။
မီကျား သူ့ရင်ဘတ်ပေါ်ရှိ နှလုံးပုံ သင်္ကေတကို ကြည့်လိုက်သည်-
[အမည်: လုချန်]
[အထောက်အထား: အမှတ် ၃၀၇၃ စတင်သူဇုန် ကမ္ဘာ့ဘော့စ်]
[အခြေအနေ: ဖမ်းဆီးနိုင်သည်]
[နှစ်သက်မှု: ၁၁/၂၀၀ (ရန်လိုမှု အခြေအနေ ကိုဖယ်ရှားရန် ၅၀ ရောက်ရမည်၊ ဘီလူးဒေတာကတ် ဖွင့်ရန် ၁၀၀ ရောက်ရမည်၊ လိုက်လံဖမ်းဆီးမှု ပြီးမြောက်ပြီး အထူးဆုများရရန် ၂၀၀ ရောက်ရမည်။)]
တကယ်ပဲ အလုပ်ဖြစ်တယ်....
မီကျားက ဝမ်းမြောက်စွာ ပုံစံပြောင်းလိုက်ပြီး ချိုသာသည့် ချစ်စကားများကို မရပ်မနား ပြောလိုက်သည်။
“မင်းက ဒီရက်ပိုင်း အရမ်း စိတ်ရှုပ်စရာ ကောင်းနေတယ်။ စိတ်ရှုပ်စရာကောင်းလောက်အောင် ချစ်စရာကောင်းလို့ ငါ ဘယ်တော့မှ ကြည့်လို့ မဝဘူး....”
လုချန်က သိမ်မွေ့သည့် အမူအရာပြနေပေမဲ့ စာသားဖြူတစ်ကြောင်းက သူ့ခေါင်းပေါ်တွင် ပေါ်လာနေဆဲပင် ။
(နှစ်သက်မှု +၁)
“မင်းနဲ့ တူတူပုန်းတမ်းကစားရင် ငါ သေချာပေါက် ရှုံးလိမ့်မယ်၊ ဘာလို့လဲဆိုတော့ တစ်ယောက်ယောက်ကို ချစ်မိရင် ဖုံးကွယ်ထားလို့ မရဘူးလေ....”
“…”
(နှစ်သက်မှု +၁)
မီကျားက သူ့ကို အသည်းပုံလက်ဟန်ပြပြီး မျက်စိတစ်ဖက်မှိတ်ပြလိုက်သည်။ “ကမ္ဘာကြီးက နေ့တိုင်း ပြောင်းလဲနေပေမဲ့ မပြောင်းလဲတာက မင်းအပေါ်ထားတဲ့ ငါ့ခံစားချက်တွေနဲ့ မင်းကို အမြဲတမ်း ချစ်နေမယ့် ငါ့နှလုံးသားပဲ....”
“အား...” လုချန်က သူ့ကို လက်သည်းများ ပြန်ပြသည်။
သူ စတုတ္ထမြောက် စကားကို ပြောလိုက်သောအခါ အေးစက်သည့် အီလက်ထရွန်းနစ်အသံ ထွက်ပေါ်လာသည်။
[ဖော်ရွေသော သတိပေးချက်: နေ့တိုင်း အချစ်စကားများ အလွန်အကျွံကြားရခြင်းက စိတ်ကုန်စေနိုင်ပါသည်။ လိုက်လံဖမ်းဆီးရမည့် ပစ်မှတ်သည် ယနေ့အတွက် အချစ်စကားများ၏ အများဆုံး ကန့်သတ်ချက်ကို ရောက်ရှိသွားပါပြီ။ ကျော်လွန်သော အပိုင်းကို နှစ်သက်မှုအဖြစ် သတ်မှတ်မည်မဟုတ်ပါ။]
ကောင်းပြီ၊ နှစ်သက်မှုကို လွယ်လွယ်ကူကူ မြှင့်တင်နိုင်မှာ မဟုတ်ဘူးဆိုတာ သူ သိလိုက်ပါပြီ...
သူ့စကားတွေနဲ့ တစ်နေ့ကို ၃ မှတ်ပဲ ရနိုင်မယ်ဆိုရင်၊ ကမ္ဘာ့ဘော့စ်ကို အလုပ်ခန်းထဲ ပိတ်ထားပြီး နေ့တိုင်း အချစ်စကားသုံးခွန်း ပြောရင်တောင် ပထမနေ့က အမှတ်တွေ မပါဘဲ အများဆုံး ၈၇ မှတ်ပဲ ရနိုင်မှာ။
အမှတ်ပြည့်ရဖို့က ၁၉၀ မှတ် လိုအပ်တာ။ ကျန်တဲ့ ၁၀၃ မှတ်ကို ဘယ်လိုရအောင် လုပ်ရမလဲ?
လက်ဆောင်လေးတွေ ပေးရမလား?
မီကျား ခဏစဉ်းစားပြီးနောက် သူ့ပြတင်းပေါက်မှ သံလိုက်အိမ်မြှောင် ဆွဲသီး တစ်ခုကို အလွယ်တကူ ထုတ်ယူလိုက်သည်။
သူ ဤကဲ့သို့ အသုံးမဝင်သည့် အလှဆင်ပစ္စည်းလေးများကို ပျော်ပျော်ပါးပါး စုဆောင်းထားခဲ့သည်။
သူသည် ဆွဲသီးကို ယူပြီး အလုပ်ခန်းထဲ ပြန်ဝင်သွားသည်။
သူ ချဉ်းကပ်လာသည်ကို မြင်သောအခါ လုချန် နောက်ဆုတ်သွားသော်ြငားလည်း ၊ ထိုအချိန်တွင် ထိုလူသားက သူ့ကို ခြိမ်းခြောက်ခြင်းမရှိပေ။
မီကျားသည် သံလိုက်အိမ်မြှောင် ဆွဲသီးကို လုချန်၏ လည်ပင်းတွင် ချိတ်ပေးလိုက်သည်။ “မင်းကို ငါ ဂရုစိုက်နေတုန်း လမ်းမပျောက်အောင်လို့ အိမ်မြှောင်တစ်ခု ပေးလိုက်မယ်နော်”
ပြီးတော့ သူ လုချန်၏ ရင်ဘတ်ပေါ်မှ သင်္ကေတကို စိတ်အားထက်သန်စွာ ကြည့်လိုက်သည်။ သို့သော် နှစ်သက်မှုသည် ၁၃ မှတ်သာ ရှိနေပြီး မတိုးလာသေးပေ ။
လက်ဆောင်ပေးတာက သိပ်အထောက်အကူမပြုဘူး၊ ဒါမှမဟုတ် လုချန်က ဒီလက်ဆောင်ကို မကြိုက်ဘူး ဖြစ်နိုင်တယ်...
မီကျား စိတ်ပျက်စွာ သက်ပြင်းချပြီး ခဏစဉ်းစားပြီးနောက် နှစ်သက်မှုအကြောင်းကို ခဏထားပြီး ချစ်ခြင်းပျိုးထောင်ရေးစွမ်းရည်နှင့် ပါလာသည့် နေ့စဉ် ၅ မိနစ်စာ ဘီလူးအသွင်ပြောင်းခြင်း အင်္ဂါရပ်ကို အာရုံစိုက်ဖို့ ဆုံးဖြတ်လိုက်သည်။
သူ သူ့မျက်နှာပေါ်ရှိ လက်ဝါးကပ်တိုင်ပုံ အမှတ်အသားကို ထိလိုက်ရာ သူ့ရှေ့၌ ကပ်ပြားချပ်နှစ်ခု ပေါ်လာသည်။
တစ်ခုက သူအရင်က မြင်ဖူးသည့် သူ့ကိုယ်ရေးအကျဉ်းကတ် ဖြစ်ပြီး စွမ်းရည်ဘားက အနီရောင်ခလုတ်တစ်ခု ဖြစ်နေသည်။ နောက်တစ်ခုသည် တိုက်ရိုက်ထုတ်လွှင့်မှုပြင်ချပ်ဖြစ်၏ ။ ညာဘက်အပေါ်ထောင့်တွင် ထို တိုက်ရိုက်ထုတ်လွှင့်မှုကို လိုက်ပါကြည့်ရှုနေသူ နှစ်ဦး ရှိသည်ဟု ဖော်ပြထားသည်။ ကြည့်ရှုသူဦးရေက ၀၊ Like အရေအတွက်က ၁၊ Dislike အရေအတွက်က ၁၂ ဖြစ်သည်။ တိုက်ရိုက်ထုတ်လွှင့်မှုအောက်တွင် မှတ်ချက်အပိုင်း ရှိပြီး တစ်ကြောင်းတည်းသာ ရှိသည်။ [ပရိသတ် ဆက်သွယ်ရေး နေရာ၊ ကြည့်ရှုသူများသာ မြင်နိုင်ပါသည်။]
သူက တိုက်ရိုက်ထုတ်လွှင့်မှုခန်းကို စိတ်မဝင်စားဘဲ ထိုစွမ်းရည်ဘားပေါ်မှ အနီရောင်ခလုတ်ကို နှိပ်လိုက်သည်။
သို့သော် နှိပ်လိုက်ပြီးနောက် သူ ဘီလူးအဖြစ် အသွင်မပြောင်းဘဲ သတိပေးချက်တစ်ခု ပေါ်လာသည်။
[လက်ရှိ စုဆောင်းထားသော ဘီလူးဒေတာကတ်များ: ၀။ အသွင်ပြောင်း၍ မရပါ။]
ကောင်းပြီ၊ နှစ်သက်မှုကို တဖြည်းဖြည်း မြှင့်တင်ရတာတင် မလုံလောက်သေးဘဲ အသွင်ပြောင်းဖို့အတွက် ဘီလူးဒေတာကတ်တွေအရင် စုဆောင်းရမယ်ပေါ့...ဒီစွမ်းရည်က လွန်စွာမှ ရှုပ်ထွေးပေတယ်။ အဆင့်နည်းနည်းနဲ့ ပိုရိုးရှင်းအောင် လုပ်လို့မရဘူးလား...
သို့သော် သူ သေဆုံးသွားပြီးနောက် စုဆောင်းလိုစိတ် ရှိကြောင်းကို ဂိမ်းက ကောင်းကောင်းသိပြီး ယင်းအင်္ဂါရပ်ကို ပေးထားသည်ကို ဝန်ခံရပေမည်။ အခုချိန်တွင် သူ ကတ်စုဆောင်းရေးထဲမှ ဗလာနေရာများကို ကြည့်ကာ မသက်မသာနှင့် စိတ်ပူပန်မှု ခံစားနေရသည်။
သူ မသေခင် အမျိုးမျိုးသော ဂိမ်းကတ်များ စုဆောင်းခဲ့ရပြီး အခု သေပြီးနောက်မှာလည်း ဘီလူးကတ်များ စုဆောင်းရဦးမည်…
ယုတ်မာလိုက်တာ၊ တကယ်ကို ယုတ်မာလိုက်တာ!
မီကျား နှုတ်ခမ်းကို လျက်ပြီး ဒေတာကတ်ကို ပိတ်ကာ တိုက်ရိုက်ထုတ်လွှင့်မှု ပြင်ချပ်ကို ကြည့်လိုက်သည်။
တိုက်ရိုက်ရုပ်ပုံကို အလုံးပုံ ကင်မရာမှ ထုတ်လွှင့်နေခြင်းဖြစ်ပြီး တိုက်ရိုက်ထုတ်လွှင့်မှုထဲမှ သူ့ပုံရိပ်သည် ဘာလုပ်ရမှန်းမသိဘဲ လေဟာနယ်တစ်ခုကို ကြည့်နေသလို ဖြစ်နေသည်။
ပြင်ချပ်နှင့် စွမ်းရည်ဘားကို ပရိသတ်အမြင်မှ မြင်ရခြင်း မရှိဟု ထင်ရသည်။ ထို့အပြင် ကင်မရာ၏ အမြင်ကို ရှောင်တိမ်းပြီး ကိုယ့်ကိုယ်ကိုယ် ဖျောက်ထားနိုင်သော်လည်း ကင်မရာက သေးငယ်ပြီး မြန်သောကြောင့် အဆက်မပြတ် ရှောင်တိမ်းဖို့ ခက်ခဲပေသည်။
ခဏစဉ်းစားပြီးနောက် မီကျားသည် ကိုယ်ကို ငြိမ်ထားပြီး နောက်ကျောဘက်သို့ လက်ကို ဆန့်ထုတ်လိုက်သည်။ တိုက်ရိုက်ထုတ်လွှင့်မှုမှာ ပြသထားသည့် ထောင့်အရ သူ ကင်မရာဆီ လက်လှမ်းလိုက်ပြီး လက်ထဲ ဆုပ်ကိုင်လိုက်သည်။ သို့ရာတွင် ဤကင်မရာသည် သူ့လက်ထဲမှ အလျင်အမြန် ပျောက်ကွယ်သွားပြီး တစ်ဖက်၌ ချက်ချင်းပင် ပြန်ပေါ်လာသည်။ ရင်းနှီးနေသော အီလက်ထရွန်းနစ်အသံ သူ့နားထဲ မြည်လာသည်။
[သတိပေးချက်! အိမ်ရှင်၊ တိုက်ရိုက်ထုတ်လွှင့်မှုစနစ်ကို ဖျက်ဆီးရန် မကြိုးစားပါနှင့်။ မဟုတ်ပါက ပင်မစနစ်မှ သင့်အား တိုက်ရိုက်ဖျက်ပစ်ပါလိမ့်မည်။]
မီကျားသည် ကင်မရာကို ဖြူစင်စွာ မျက်တောင်ခတ်ပြပြီး “ငါ မင်းကို ဖျက်ဆီးချင်တာ မဟုတ်ပါဘူး။ ငါ မင်းနဲ့ ဆော့ချင်ရုံလေးပါ”
၃ရက်မြောက်နေ့
အဆင့်မြင့် ကမ္ဘာ့ကြည့်ရှုသူ အများစုသည် အပြာရောင်ဖန်သားပြင်ရှိ အသက်ရှင်ကျန်ရစ်သူများ၏ တိုက်ရိုက်ထုတ်လွှင့်မှုများကို ကြည့်ရှုရန် နှစ်သက်ကြပြီး၊ အနည်းငယ်သော အစိတ်အပိုင်းကသာ အနီရောင်ဖန်သားပြင် ကို အထူးတလည် လာရောက်ကြည့်ရှုကြသည်။
ဤကြည့်ရှုသူ အများစုသည်လည်း မကောင်းသော ရည်ရွယ်ချက်များ ရှိကြပြီး အသက်ရှင်ကျန်ရစ်သူများ ဆက်တိုက်ရုန်းကန်နေရသော်လည်း ဆိုးရွားစွာ သေဆုံးရသည့် မြင်ကွင်းများကို ကြည့်ရှုရန် နှစ်သက်ကြသည်။
ဟော့ဂျ်သည် ထိုသို့သော ဖျော်ဖြေရေးမျိုးကို အထူးနှစ်သက်သော အဆင့်မြင့် ကမ္ဘာ့ကြည့်ရှုသူတစ်ဦး ဖြစ်သည်။
အလုပ်မှ ပြန်လာပြီးနောက် သူ အကြိုက်ဆုံးအရာမှာ အဆင့်နိမ့်ကမ္ဘာများမှ အဆင့်နိမ့်သတ္တဝါများ ကမ္ဘာပျက်မှုထဲမှ အသက်ရှင်ရန် ရုန်းကန်နေသည်ကို ကြည့်ရှုခြင်းဖြစ်ပြီး၊ ယင်းက သူ၏ ငြီးငွေ့စရာကောင်းပြီး စိတ်မဝင်စားဖွယ်ကောင်းသော ဘဝအတွက် ပျော်စရာများစွာ ပေးသည်။
စတင်သူဇုန်၏ ပထမ သုံးရက်တွင် ကြည့်စရာများစွာ မရှိခဲ့ပေ။ ၎င်းသည် အသက်ရှင်ကျန်ရစ်သူများအတွက် ပစ္စည်းများ စုဆောင်းရန်နှင့် ကာကွယ်ရေး လက်နက်များအတွက် အခြေစိုက်စခန်း ရှာဖွေရန် သတ်မှတ်ထားသော ရွှေရောင် ပြင်ဆင်ချိန် ဖြစ်သည်။ အခြေခံအားဖြင့် အန္တရာယ်မရှိဘဲ စတုတ္ထနေ့ အရုဏ်မတက်မီ အချိန်မှသာ ကမ္ဘာပျက်ခြင်း စတင်မည်ဖြစ်သည်။
သူ အမြဲလုပ်နေကျအတိုင်း [အဆုံးမဲ့ ကမ္ဘာပျက် စတင်သူဇုန်] ကို နှိပ်ပြီး အနီရောင်ဖန်သားပြင်မှ တိုက်ရိုက်ခန်းတစ်ခုကို ကျပန်းရွေးကာ ဝင်လိုက်သည်။
ထို တိုက်ရိုက်ခန်းသည် အနီရောင်ဖန်သားပြင်၏ အလယ်တွင်ရှိပြီး ထူးခြားချက်မရှိပါ။
သို့သော် ထို တိုက်ရိုက်ထုတ်လွှင့်မှုခန်း၏ ကြိုက် မကြိုက် အချိုးကို မြင်သောအခါ သူ အနည်းငယ် အံ့သြသွားသည်။
အနီရောင်ဖန်သားပြင်ပေါ်ရှိ အခြား တိုက်ရိုက်ထုတ်လွှင့်မှုများက ကြိုက်သည်ထက် မကြိုက်သည်က အနည်းငယ်သာ ပိုများပြီး ထို့ကြောင့် ၎င်းတို့ကို အနီရောင်ဇုန်သို့ ပို့ထားခြင်းဖြစ်သည်။ သို့သော် ဤ တိုက်ရိုက်ထုတ်လွှင့်မှုမှာ ထူးခြားနေသည်- ကြိုက်သည်က အနည်းငယ်သာရှိပြီး မကြိုက်သည့် အရေအတွက်မှာကား အံ့မခန်း များပြားနေသည်။
ပရိသတ်များကို ဤမျှ စိတ်အနှောင့်အယှက်ပေးနိုင်သည့် အသက်ရှင်ကျန်ရစ်သူက မည်သူလဲဆိုသည်က သူ့အား စူးစမ်းချင်စိတ် ဖြစ်လာစေသည်။
သူ တိုက်ရိုက်ထုတ်လွှင့်မှုခန်းအောက်ရှိ ပရိသတ် ဆွေးနွေးမှုနေရာကို တစ်ချက်ကြည့်လိုက်ရာ မမျှော်လင့်ဘဲ မှတ်ချက်များစွာ ရှိနေသည်။
၅ လိုင်း- ဘာမှ မပြောတတ်ဘူး။ ဒီ အသက်ရှင်ကျန်ရစ်သူရဲ့ ကိုယ်ရေးအကျဉ်းကတ်မှာ ဉာဏ်ရည် ၀ ဖြစ်နေတယ်။ ဒီလောက် နှစ်ပေါင်းများစွာအတွင်း ဉာဏ်ရည် ၀ နဲ့ အသက်ရှင်ကျန်ရစ်သူကို ပထမဆုံး မြင်ဖူးတာပဲ။
၆ လိုင်း- ဟားဟားဟားဟား ဉာဏ်ရည် ၀။ အံ့သြစရာမရှိပါဘူး၊ ကျွန်တော် လာကြည့်တိုင်း သူက ဘာမှ မလုပ်ဘဲ ဆားငန်ငါး လိုမျိုး ငြိမ်နေတယ်။ ဒါက ရုပ်ချောတဲ့ အရူးလေးတစ်ယောက် မဟုတ်ဘူးလား!
၇ လိုင်း- ဒီလောက်တုံးတဲ့သူက စတုတ္ထနေ့ရဲ့ ပထမဆုံး ဆယ်မိနစ်တောင် မခံနိုင်ဘူး။ မဟုတ်ဘူး၊ ပထမဆုံး သုံးမိနစ်ပဲ...။
…
ဟော့ဂျ်သည် တိုက်ရိုက်ထုတ်လွှင့်မှု ဖန်သားပြင်ပေါ်တွင် ပျော်ရွှင်စွာ ဂိမ်းကစားနေသော ဆံပင်နီ လူငယ်ကို ကြည့်ပြီး နှုတ်ခမ်းထောင့်များ အနည်းငယ် တွန့်သွားသည်။
ကမ္ဘာပျက်နေတာတောင် ဘာလို့ ဂိမ်းကစားနေရတာလဲ....
ဒါက အရှုံးပေးဖို့ စတင်နေပြီဖြစ်တဲ့ အသက်ရှင်ကျန်ရစ်သူ ဖြစ်နေတာ မဟုတ်ဘူးလား....
ဘဝကို စွဲလမ်းမှုမရှိသည့် စတင်သူ အသက်ရှင်ကျန်ရစ်သူ အုပ်စုတစ်ခုကတော့ တကယ်ရှိမှာပင် ဖြစ်သည် ။ ထိုသူများသည် အသက်ရှင်ရန် ကြိုးစားအားထုတ်မှုပင် မလုပ်ဘဲ ကမ္ဘာပျက်မှု အစမှာပင် မကြာခဏ သေဆုံးကြသည်။
၎င်းက သူ မြင်ချင်သလိုမျိုး မဟုတ်ပေ ။ အသက်ရှင်ကျန်ရစ်သူများက မျှော်လင့်ချက်ကို မြင်ပြီးနောက် အသက်ရှင်ရန် ကြိုးစားလာပေမဲ့ နောက်ဆုံးမှာ စိတ်ပျက်အားငယ်မှုက လွှမ်းမိုးသွားသည့် အနက်ရောင်ဆန်ဆန်ဟာသမျိုးကိုသာ သူ မြင်ချင်သည်။
ထို့ကြောင့် ဂိမ်းကစားနေသည့် မီကျားရှေ့တွင် စာလုံးဖြူတစ်ကြောင်း ရုတ်တရက် ပေါ်လာသည်။
“အသက်ရှင်ချင်လား....ငါ မင်းကို ကူညီနိုင်တယ်”
မီကျား၏ လက်က တုန်သွားပြီး ကွန်ပျူတာဖန်သားပြင်ပေါ်တွင် ပြင်းထန်စွာ တိုက်ပွဲဝင်နေသော လူပုလေးကို တစ်ဖက်လူက သတ်လိုက်သည်။ “နှစ်ယောက်ဆက်တိုက် သတ်လိုက်ပြီ...”
တိုက်ရိုက်ထုတ်လွှင့်မှု ဖန်သားပြင်ပေါ်ရှိ ဆံပင်နီ လူငယ်၏ မျက်နှာ အနည်းငယ် ပြောင်းလဲသွားသည်ကို မြင်သော ဟော့ဂျ်က သူ့နှုတ်ခမ်းထောင့်များကို ထောင်လိုက်ပြီး အောင်ပွဲခံသည့် အနေဖြင့် ပေါ့ပ်အပ်များကို ဆက်ပို့လိုက်သည်။
မီကျား၏ မျက်လုံးရှေ့တွင် စာသားဖြူ နောက်တစ်ကြောင်း ပေါ်လာသည်။
“ငါ မင်းကို တူညီတဲ့ ဧရိယာထဲက တခြား အသက်ရှင်ကျန်ရစ်သူတွေရဲ့ တည်နေရာကိုလည်း ပြောပြနိုင်တယ်…”
ဖန်သားပြင်ပေါ်ရှိ လူငယ်က ရှည်လျားစွာ အသက်ရှူသွင်းပြီး အသံကို နှိမ့်ကာ “ကမ္ဘာကြီးက ဒီလောက်ကျယ်တာ၊ မင်း တခြားနေရာ သွားကြည့်ပါလား” ဟု ပြောလိုက်သည်။
သူ ရုတ်တရက် ဘာလို့ ဒီလိုပြောလဲဆိုတာ ဟော့ဂျ် မသိလိုက်။ “ဘာလဲ?”
“နားမလည်ဘူးလား? ငါ စာလုံးပေါင်းပြီး ပြောပြရမှာလား... ငါ မင်းကို ငါ့ရဲ့ တိုက်ရိုက်ထုတ်လွှင့်မှုကနေ ကျက်သရေရှိရှိနဲ့ သိမ်မွေ့စွာ ထွက်သွားဖို့ တောင်းဆိုနေတာ။” မီကျား ပြုံးလိုက်ပြီး ကင်မရာကို လက်ခလယ် ထောင်ပြလိုက်သည်။ “ရှင်းရှင်းပြောရရင် ထွက်သွားလိုက် ”
Welcome To MM Storyteller
LOGIN
Welcome To MM Storyteller
REGISTER