အခန်း (၁၃) အစိမ်းရောင် အလင်းတန်း

ရှယန်က ရှေ့ဆုံးမှ ဦးဆောင်ပြီး ဟန်ကျန်းရွှယ်နှင့် ကျန်းရှောင်တို့က အလယ်တွင် နေကာ၊ ဖီကဲချိုးက နောက်ဆုံးမှ ကပ်လိုက်ပါလာသည်။ 

လေးယောက်သားအဖွဲ့သည် တစ်ဦးနှင့်တစ်ဦး တစ်မီတာထက်မပိုသော အကွာအဝေးတွင် စုစုစည်းစည်းဖြင့် ဖြည်းညှင်းစွာ ရွေ့လျားနေကြသည်။ 

နာရီဝက်ခန့် ခက်ခက်ခဲခဲ လျှောက်လှမ်းပြီးနောက်တွင်မှ ကျန်းရှောင်သည် အဝေးတစ်နေရာတွင် မြင့်မားစွာ ချိတ်ဆွဲထားသော အလံတစ်ခုကို နောက်ဆုံးတွင် မြင်တွေ့လိုက်ရ၏။

ဤကဲ့သို့ အခြေအနေဆိုးဝါးပြီး လူသူကင်းမဲ့သော သီးခြားကမ္ဘာ ဟင်းလင်ပြင် ထဲတွင် ရည်မှန်းချက်မရှိဘဲ နာရီဝက်ခန့် လျှောက်လှမ်းပြီးနောက် လူသားယဉ်ကျေးမှု၏ အမှတ်အသားကို မြင်တွေ့ရခြင်းက မည်သူ့ကိုမဆို စိတ်လှုပ်ရှားသွားစေမည်မှာ အသေအချာပင်။

ဟန်ကျန်းရွှယ်က သူ့ကို အဘယ်ကြောင့် မနက်စောစောထပြီး လေ့ကျင့်ခန်း မလုပ်ခိုင်းသနည်းဆိုသည်ကို ကျန်းရှောင် အခုမှ နားလည်သွားတော့သည်။ 

ဤခရီးစဉ်အတွင်း သူသည် အင်အားအမြောက်အမြား အသုံးပြုရမည်ကို သူမက ကြိုတင်တွက်ဆထားပုံရ၏။

အမည်မသိ ပစ္စည်းတစ်ခုဖြင့် ပြုလုပ်ထားသော အနီရောင်အလံသည် ကောင်းကင်ယံတွင် မြင့်မားစွာ လွင့်ပျံနေပြီး၊ မှောင်မိုက်သော ညယံတွင် အိမ်အပြန်လမ်းကို လမ်းညွှန်ပေးနေသည့် မီးပြတိုက်တစ်ခုကဲ့သို့ တောက်ပသော အနီရောင်အလင်းတန်းများကို ထုတ်လွှတ်နေသည်။

ရှယန်က ခြေလှမ်းရပ်ပြီး လှည့်ကြည့်ကာ "နင်တို့ အထဲဝင်ပြီး အနားယူဖို့ လိုသေးလား" ဟု အော်မေးလိုက်သည်။

ကျန်းရှောင်နှင့် ဖီကဲချိုးတို့တွင် ဆုံးဖြတ်ပိုင်ခွင့်မရှိသဖြင့် ဟန်ကျန်းရွှယ်၏ ဆုံးဖြတ်ချက်ကိုသာ စောင့်နေကြသည်။

ဟန်ကျန်းရွှယ်က ခေါင်းခါပြပြီး သူမ၏ နှာခေါင်းနှင့် ပါးစပ်ကို အုပ်ထားရင်း "ငါတို့ ဒီကို ရောက်ခဲ့တာ လွန်ခဲ့တဲ့ ရက်ပိုင်းကတင်ပဲ"

"အပြောင်းအလဲ အများကြီး မရှိနိုင်ဘူးလို့ ယုံကြည်တယ်၊ အနောက်မြောက်ဘက်ကို ဆက်သွားရအောင်"

"အဲ့ဒီမှာ လူတွေ ပိုများပြီး ငါတို့အဖွဲ့ရဲ့ လက်ရှိပန်းတိုင်အတွက် ပိုသင့်တော်လိမ့်မယ်" ဟု အသံကျယ်ကျယ်ဖြင့် ပြန်ဖြေသည်။

လမ်းတလျှောက်တွင် ကျန်းရှောင်က အချို့အချက်များကို တွေးတောမိသည်။ 

သူတို့အဖွဲ့ နာရီဝက်ခန့် လမ်းလျှောက်ခဲ့သော်လည်း သီးခြားကမ္ဘာမှ သက်ရှိလှုပ်ရှားမှု အမှတ်အသားများကို မတွေ့ရသေးပေ။ 

သေချာစဉ်းစားကြည့်လျှင် နယ်မြေစောင့်ရှောက်သူများက အရာအားလုံးကို ရှင်းလင်းထားပြီးဖြစ်နိုင်သည်ဟု သူ တွက်ဆမိသည်။ 

အနီရောင်အလံအောက်တွင် လူသားအဖွဲ့များအတွက် ခေတ္တနားခိုရန်၊ အစားအစာ ရရှိရန်နှင့် သတင်းအချက်အလက် မျှဝေရန် သဘာဝလိုဏ်ဂူတစ်ခု ရှိသည်။ 

နှင်းတော၏ အတွင်းပိုင်းထဲသို့ နက်နက်ရှိုင်းရှိုင်း ရောက်ရှိမှသာ သီးခြားကမ္ဘာသတ္တဝါများနှင့် တွေ့ဆုံနိုင်မည်ဖြစ်သည်။

အနောက်မြောက်ဘက် လမ်းကြောင်းသည် လူသား နိုးထသူများ အသုံးများသော လမ်းကြောင်းဖြစ်သည်။ 

သီးခြားကမ္ဘာမှ သတ္တဝါများ ပေါများသော်လည်း အဖွဲ့ကို အန္တရာယ်ဖြစ်စေလောက်သည်အထိတော့ မဟုတ်ပေ။

"ကောင်းပြီ၊ မြန်မြန်သွားရအောင်"

"ငါတို့ သွားတာ နှေးလွန်းတယ်၊ ငါ့ခြေထောက်တွေ ခဲနေပြီ" ဟု ရှယန်က အော်ပြောကာ ရှေ့သို့ ဆက်လျှောက်သွားသည်။

ကျန်းရှောင်၏ ရင်ခုန်သံ မြန်လာပြီး ဟန်ကျန်းရွှယ်ကို အကဲခတ်သည့် အကြည့်ဖြင့် ကြည့်လိုက်သည်။ 

သူမသည် အပြာရောင် မျက်မှန်အနက်ကြီးကို တပ်ထားသဖြင့် ကျန်းရှောင် ဘာကိုဆိုလိုမှန်း နားလည်နိုင်မည် မဟုတ်ပေ။

ကျန်းရှောင်က အသံကျယ်ကျယ်ဖြင့် "ကျွန်တော် ခင်ဗျားတို့ကို နွေးထွေးအောင် လုပ်ပေးနိုင်မယ် ထင်တယ်၊ အနည်းဆုံးတော့ သွေးလည်ပတ်မှု ကောင်းအောင်ပေါ့" ဟု ပြောလိုက်သည်။

ဟန်ကျန်းရွှယ်က ခဏမျှ ဝေခွဲမရဖြစ်နေပြီးမှ ကျန်းရှောင်အနေဖြင့် အဖွဲ့အတွက် တစ်ခုခု ကူညီပေးခြင်းက ကောင်းသည်ဟု တွေးကာ ခေါင်းငြိမ့်ပြလိုက်၏။

နောက်တစ်စက္ကန့်တွင် ရှယန်၏ ခန္ဓာကိုယ်ပေါ်သို့ ဖြူစင်သော အလင်းတန်းတစ်ခု ကျရောက်သွားသည်။ 

ရှယန်က ရုတ်တရက် ခြေလှမ်းရပ်သွားပြီး လေပြင်းများ တိုက်ခတ်နေသည့်ကြားမှ "အား" ဟု အော်ဟစ်လိုက်သည်။

ကျန်းရှောင် တစ်ကိုယ်လုံး တုန်တက်သွား၏။

"ကောင်းပြီ...အရမ်းအေးတာပဲ"

"အအေးဒဏ်ကြောင့် ငါ တုန်သွားတာ ဖြစ်ရမယ်"

ဖြူစင်သော အလင်းတန်းများ အဆက်မပြတ် ကျရောက်လာပြီး ဟန်ကျန်းရွှယ်က အသံမထွက်စေရန် သွားကို တင်းတင်းကြိတ်ထားသည်။ 

သို့သော် ဖီကဲချိုးကမူ အသံကျယ်ကျယ်ဖြင့် ညည်းညူလိုက်သည်။ 

ထိုမြင်ကွင်းသည် အလွန်ပင် ထူးဆန်းနေတော့၏။

"ဟေး... ရှောင်ဖီ၊ နင့်အစ်မက နင့်ကို ဆေးဘက်ဆိုင်ရာ နိုးထသူ လို့ ပြောဖူးတယ်"

"ဒါပေမဲ့ နင့်ရဲ့ ကြယ်တာရာ အတတ်ပညာက ဒီလောက်အထိ သန့်စင်လိမ့်မယ်လို့ ငါ မမျှော်လင့်ထားဘူး" ဟု ရှယန်က နောက်သို့ လှည့်မကြည့်ဘဲ အံ့ဩတကြီး ပြောလိုက်သည်။

"ဩော်..." ဟု ကျန်းရှောင်က ယဉ်ကျေးစွာ ပြန်ဖြေသည်။

ရှယန်က နောက်ပြောင်ချင်သော အမူအရာဖြင့်...

"ငါ အခု အရမ်းနွေးသွားပြီ...ဒီစွန့်စားခန်း ပြီးသွားရင် ငါ့ခြေထောက်တွေ နွေးအောင် လုပ်ပေးဖို့ နင့်ကို အိမ်ခေါ်သွားလို့ ရမလား" ဟု မေးလိုက်သည်။

ကျန်းရှောင် ကြောင်အသွားသည်။ 

'ငါက ကမ္ဘာကြီးကို အောင်နိုင်မယ့်သူ ဖြစ်လာမှာကို... မင်းက မင်းရဲ့ ခြေထောက်နွေးဖို့ ငါ့ကို အိမ်ခေါ်သွားချင်တာလား...ငါ့ကို'

'တစ်ခုခု မှားနေပြီထင်တယ်' ဟု သူ တွေးလိုက်သည်။

ဖီကဲချိုးက ကျန်းရှောင်ကို မနာလိုသော အကြည့်ဖြင့် တိတ်တဆိတ် ကြည့်လိုက်၏။

ဆေးဘက်ဆိုင်ရာ နိုးထသူများမှာ အလွန်ရှားပါးလှ၏။

ကျန်းရှောင်က အနိမ့်ဆုံးအဆင့်ဖြစ်သော ကြေးဝါအဆင့် ဆေးဘက်ဆိုင်ရာ ကြယ်တာရာ အတတ်ပညာဖြင့်ပင် သူ့ကို သိသိသာသာ နွေးထွေးသွားစေခဲ့သည်။ 

အကယ်၍ ကျန်းရှောင်သာ ပိုမိုမြင့်မားသော ကြယ်တာရာ အတတ်ပညာများကို ရရှိခဲ့လျှင် သူသည် အလွန်ပင် ရေပန်းစားလာလိမ့်မည်။

ဖီကဲချိုးသည် ကျန်းရှောင်ကို သူ၏ စစ်တပ်ထဲသို့ ခေါ်ယူနိုင်လျှင် အလွန်ကောင်းမည်ဟု တွေးမိသည်။ 

သူ၏ စကားတိုလေးတစ်ခွန်းက အခြေအနေကို ပြောင်းလဲပေးလိုက်သည်။ 

၁၅ မိနစ်ခန့်အကြာတွင် လေပြင်းများ တဖြည်းဖြည်း ငြိမ်သက်သွားပြီး အားလုံးသည် နှင်းတော၏ အစပ်သို့ ရောက်ရှိလာကြသည်။

"၁၁ နာရီ အနားမှာ" 

ဟု ရှယန်က ရုတ်တရက် ပြောလိုက်သည်။

အားလုံးက လမ်းလျှောက်ရင်း ရှေ့သို့ ကြည့်လိုက်ရာ နှင်းတော၏ အဆုံးတွင် မမှတ်မိနိုင်သော အရာဝတ္ထု အချို့ လဲလျောင်းနေသည်ကို တွေ့လိုက်ရ၏။

အနားသို့ ဖြည်းဖြည်းချင်း ချဉ်းကပ်သွားသောအခါ ကျန်းရှောင်သည် ထိုအရာက ဘာလဲဆိုသည်ကို ရှင်းရှင်းလင်းလင်း မြင်လိုက်ရသည်။

အလောင်းတစ်ခု။

၎င်းသည် လူသားအလောင်း မဟုတ်ဘဲ ဘီလူးဖြူတစ်ကောင်၏ အလောင်းပင်။

ပထမဆုံးအကြိမ် လာရောက်လည်ပတ်မှုတွင်ပင် သီးခြားကမ္ဘာမှ သတ္တဝါအလောင်း သုံးခုကို တွေ့ရလိမ့်မည်ဟု သူ မမျှော်လင့်ထားပေ။

ရှယန်က အေးခဲနေသော ဘီလူးဖြူများဆီသို့ ဦးဆောင်သွားသည်။ 

သူမက ဆောင့်ကြောင့်ထိုင်ချကာ ဝတ်ထားသော လက်အိတ်ကို ပါးစပ်ဖြင့် ကိုက်ချွတ်လိုက်ပြီး လက်တစ်ဖက်ကို နှင်းထဲသို့ ထိုးသွင်းကာ အေးခဲနေသော သွေးများကို စမ်းသပ်ကြည့်သည်။

"အလောင်းရဲ့ ခေါင်းကို မဖြတ်ရသေးဘူး...ဒါက တခြားအဖွဲ့တွေ သတ်သွားပြီး ပစ္စည်းတွေ အချိန်မီ မသိမ်းနိုင်ခဲ့တဲ့ သားကောင်တွေ ဖြစ်လိမ့်မယ်"

ပြောရင်းနှင့်ပင် ရှယန်က သူမ၏ ခါးမှ ဓားမြှောင်ကို ထုတ်ယူကာ ဘီလူးဖြူ၏ ဦးခေါင်းကို ကျွမ်းကျင်စွာ ဖြတ်တောက်တော့သည်။

ရှယန်က ၎င်းတို့မှာ အခြားအဖွဲ့၏ သားကောင်များဖြစ်ကြောင်း ပြောသော်လည်း သူမ၏ လုပ်ရပ်ကမူ ၎င်းတို့၏ သားမွေးများကို ခွာယူရန် ပြင်ဆင်နေခြင်း။

လေနှင့်နှင်းများ စဲသွားသဖြင့် ကျန်းရှောင်သည် သူ၏ မျက်မှန်ကို ပင့်တင်လိုက်ပြီး သူမအနားသို့ အမြန်လျှောက်သွားကာ သီးခြားကမ္ဘာမှ မှော်ဆန်သော သတ္တဝါများကို စတင်လေ့လာတော့သည်။

၎င်းတို့တွင် နွေးထွေးမှုကို ပေးစွမ်းနိုင်သော ထူထဲသည့် အဖြူရောင် သားမွေးများ ရှိ၏။

အလောင်းများသည် ၁၇၀ စင်တီမီတာခန့် ရှည်လျားပြီး ကိုယ်လုံးကိုယ်ထည် တောင့်တင်းသည်။

၎င်းတို့တွင် စွယ်များ၊ လက်သည်းများနှင့် ခြေဖဝါးကြီးများ ရှိသည်။

၎င်းတို့၏ သားမွေးများမှာ အလွန်လှပသော်လည်း မျက်နှာမှာ မည်းမှောင်နေပြီး နှာခေါင်းမှာ အနည်းငယ် ချိုင့်ဝင်နေကာ အလွန်အရုပ်ဆိုးလှ၏။

"ကံကောင်းတာပဲ၊ ကြယ်တာရာ ပုတီးစေ့တစ်ခု ကျန်သေးတယ်" ဟု ရှယန်က သွေးစွန်းနေသော ပုတီးစေ့တစ်ခုကို ဘီလူးဖြူခေါင်းထဲမှ ဆွဲထုတ်ကာ ကျန်းရှောင်ထံ ပစ်ပေးလိုက်သည်။ 

"ဒါ နင့်အတွက်"

"အာ..." ကျန်းရှောင်သည် ဘီလူးဖြူကို အသေအချာ ကြည့်နေဆဲဖြစ်သဖြင့် ရုတ်တရက် ပစ်ပေးလိုက်သော ပုတီးစေ့ကို အတင်းဖမ်းလိုက်ရ၏။

ထိုအခါ သတင်းအချက်အလက်များစွာ သူ၏ စိတ်ထဲသို့ စီးဝင်လာသည်။

ဘီလူးဖြူ ကြယ်တာရာ ပုတီးစေ့ : ကြေးဝါအဆင့်

ကြယ်တာရာ အတတ်ပညာ :

၁။ အစိမ်းရောင်အလင်းတန်း : ရန်သူကို ပြင်းထန်စွာ ရိုက်ခတ်ပြီး ပစ်မှတ်ထားသော နေရာကို ပျက်စီးမှု တိုးစေကာ အနည်းငယ် နောက်သို့ လွင့်စဉ်သွားစေသည် (ကြေးဝါအဆင့် - အဆင့်မြှင့်တင်နိုင်သည်)

၂။ခံနိုင်ရည် : မိမိကိုယ်ကိုယ် ခုခံကာကွယ်နိုင်စွမ်းကို တိုးမြှင့်ပေးသည် (ကြေးဝါအဆင့် - အဆင့်မြှင့်တင်နိုင်သည်)

၎င်းတို့ကို ပေါင်းစပ်စုပ်ယူလိုပါသလား။

"ရှယန်...သူက ကြယ်တာရာ နေရာ ကိုးခုပဲ ရှိတာ နင်သိပါတယ်" ဟု ဟန်ကျန်းရွှယ်က ဝေခွဲမရဖြစ်စွာ ပြောသည်။

ရှယန်က ပြုံးပြီး လက်ကာပြကာ "နင်ပဲ သူ့ကို ကြယ်တာရာ ပုတီးစေ့ သုံးခု ပေးခဲ့တာ မဟုတ်ဘူးလား" ဟု ပြန်မေးသည်။

ဟန်ကျန်းရွှယ်က "အဲ့တုန်းက သူက ဆေးဘက်ဆိုင်ရာ နိုးထသူ ဖြစ်လာမယ့် အလားအလာရှိမှန်း ငါ မသိသေးလို့လေ"

ရှယန်က အပြုံးကို ဖျောက်ပစ်လိုက်ပြီး "သူ့မှာ နေရာနည်းတာ ငါ သိပါတယ်၊ ဒါပေမဲ့ ပေကျန်းနယ်မြေမှာ ဘီလူးဖြူ ကြယ်တာရာ ပုတီးစေ့တွေက အခြေခံ ကြယ်တာရာ အတတ်ပညာတွေအတွက် အကောင်းဆုံးပဲ"

"ဒါတွေက ရှောင်ဖီရဲ့ အနာဂတ် တိုက်ခိုက်ရေးတွေမှာ အသုံးအများဆုံး ဖြစ်လာလိမ့်မယ်"

ဟန်ကျန်းရွှယ် ပြန်မပြောဘဲ တိတ်ဆိတ်သွားသည်။ 

ကျန်းရှောင်၏ ကြယ်တာရာနေရာများကို အရည်အသွေးမြင့် ကြယ်တာရာ အတတ်ပညာများနှင့်သာ ဖြည့်လိုသည်မှာ အမှန်ပင်။ 

သို့သော် ရှယန် ပြောသည်မှာလည်း ကျိုးကြောင်းဆီလျော်လှ၏။

ဘီလူးဖြူ၏ ကြယ်တာရာ အတတ်ပညာများမှာ အနိမ့်ဆုံးအဆင့် ကြေးဝါအဆင့် ဖြစ်သော်လည်း အလွန် လက်တွေ့ကျသည်။ 

အထူးသဖြင့် အစိမ်းရောင်အလင်းတန်းသည် လေ့ကျင့်ရေးနှင့် တိုက်ခိုက်ရေးတွင် မရှိမဖြစ် နည်းစနစ်တစ်ခု ဖြစ်သည်။

ဟွားရှပြည်ကြီးသည် ကျယ်ပြောလှသော်လည်း၊ အနည်းဆုံး ပေကျန်းနယ်မြေတွင် လူအဆက်ဆက်သည် အစိမ်းရောင်အလင်းတန်းကို အသုံးပြုပြီး ရှင်သန်အောင်မြင်လာခဲ့ကြ၏။

၎င်းတွင် ကျွမ်းကျင်သော ရှယန်၊ ဟန်ကျန်းရွှယ် နှင့် စစ်သား ဖီကဲချိုးတို့လည်း ပါဝင်သည်။ 

သူတို့၏ ကြယ်တာရာနေရာများတွင် အစိမ်းရောင်အလင်းတန်း နှင့် ခံနိုင်ရည် တို့ ပါဝင်နေကြသည်။

"ရှောင်ဖီအနေနဲ့ ရှေ့လျှောက် ကျောင်းတက်တဲ့အခါမှာ ဘီလူးဖြူတွေနဲ့ပဲ အများဆုံး တွေ့ရမှာ"

"သူ မလိုချင်ရင်တောင် ဒါကို လက်ခံရမယ်၊ ဘာလို့လဲဆိုတော့ ငါတို့က ကြယ်တာရာ စွမ်းအားမြှင့်တင်ဖို့ ဘီလူးဖြူ ကြယ်တာရာပုတီးစေ့တွေ လိုအပ်လို့ပဲ" ဟု ရှယန်က ရှင်းပြလေ၏။

"ဒါက ကြီးထွားမှု ဖြစ်စဉ်မှာ တကယ်ပဲ စရိတ်အသက်သာဆုံး စွမ်းရည်ပါပဲ" ဟု ဟန်ကျန်းရွှယ်က သက်ပြင်းချရင်း ခေါင်းညိမ့်လိုက်သည်။ 

သူမသည် ကျန်းရှောင်၏ ကျန်ရှိသော နေရာရှစ်ခုကို ငွေ သို့မဟုတ် ရွှေအဆင့် ဆေးဘက်ဆိုင်ရာ နည်းစနစ်များနှင့်သာ ဖြည့်ချင်နေမိဆဲပင်။

သို့သော် လူသားများမှာ ရှင်သန်ရန်အတွက် ကြီးထွားလာရမည်။

ကြေးဝါအဆင့်ဖြစ်သော အစိမ်းရောင်အလင်းတန်းသည် မည်မျှအထိ အစွမ်းထက်ကြောင်း လူအဆက်ဆက် သက်သေပြခဲ့ပြီးဖြစ်၏။

ဟန်ကျန်းရွှယ် စိတ်ပူနေချိန်တွင် ကျန်းရှောင်၏ လက်ထဲတွင် စွမ်းအင်များ စီးဆင်းလာပြီး ဖြူစင်သော အလင်းတန်းများ ထွက်ပေါ်လာသည်။ 

သူ၏ နက္ခတ်ခုနစ်လုံး ကြယ်တာရာ မြေပုံရှိ ဒုတိယမြောက်ကြယ်သည် လင်းထိန်သွားတော့

သည်။

အရည်အသွေးက ကျန်းရှောင်အတွက် အရေးမကြီးပါ။

အရေးကြီးဆုံးမှာ... ဘာမှ အရေးမကြီးခြင်းပင်။

'ကြေးဝါအဆင့်က ဘယ်လောက်ပဲ ညံ့ပါစေ၊ ငါ အဲ့ဒါကို စိန်အဆင့်အထိ မြှင့်တင်ပစ်မယ်' ဟု သူ တွေးလိုက်သည်။