Chapter 9.2
ရုန်ယီ နောက်ဆုံး အိမ်ပြန်ရောက်လာသောအခါ သူထင်ထားသည်ထက် အများကြီး စောနေသည်ကို တွေ့လိုက်ရ၏။
နောက်ဆုံးတွင် သူတို့ ရုပ်ရှင်လည်း အပြီးအထိ မကြည့်ခဲ့ရသလို အပြန်တွင် ညစာလည်း အတူ မစားခဲ့ကြပေ။ ရုန်ယီမှာ စစ်မြေပြင်မှ လွတ်မြောက်ရန်သာ စိတ်အားထက်သန်နေသောကြောင့် အိမ်ပြန်ရောက်၍ အိပ်ယာပေါ် မလဲလျောင်းမချင်း သူ ဗိုက်ဆာနေမှန်း မသိခဲ့ပေ။
ဤကဲ့သို့ လူကျချိန်၌ ညစာအတွက် delivery စနစ်များမှာ နှေးကွေးလွန်းသောကြောင့် အစာခြောက်ဗီရိုထဲတွင် အသင့်စားခေါက်ဆွဲခြောက်ထုပ်ကို ရှာတွေ့ကာ မီးဖိုပေါ်တွင် ပြုတ်လိုက်သည်။
ရုန်ယီမှာ ဟင်းချက်ရာတွင် အလွန် တော်ပါသည်။ သို့သော်လည်း သူ၏နေ့စဉ် လုပ်ငန်းဆောင်တာများက အလွန် အလုပ်များကာ အိမ်ပြန်ချိန် အများစုမှာလည်း နောက်ကျသည့်အတွက် ညစာကို အဆင်ပြေသလို စတိုးဆိုင်တွင် သွားစားခြင်းဖြစ်စေ မှာစားခြင်းများဖြစ်စေ လုပ်လေ့ရှိပြီး တစ်ခါတရံ အပြောင်းအလဲ ဖြစ်ရန် ခေါက်ဆွဲပြုတ် သောက်လေ့ရှိသည်။
စနေ၊တနင်္ဂနွေ ပိတ်ရက်များတွင် ဟင်းချက်စားရန် အချိန် ပေါပေါများများ ရှိသော်လည်း သူတစ်ယောက်တည်း ချက်ပြုတ်ရန် သိပ်ပြီး စိတ်မပါလှချေ။
မကြာခင်၌ သူ သဘောကျသည့်လူအတွက် ချက်ပြုတ်ပေးရန် အခွင့်အရေး ရလာလိမ့်မည်ဟု ထင်ထားခဲ့သော်လည်း...
ချန်းခယ့်ယောင်က တကယ်ကို အကုသိုလ်ကောင်ပင်။ ရုတ်တရက် သူ ခေါင်းကို ထပ်မံ ခါလိုက်သည်။ အကယ်၍ ဦးနှောက်အတွင်းရှိ အမှတ်တရများကို မိုဘိုင်းဖုန်းလမ်းညွှန်ထဲမှ နံပါတ်များကဲ့သို့ အလွယ်တကူ ဖျက်ပစ်နိုင်လျှင် သိပ်ကောင်းမည်။ ထို ခွေးကောင်အယ်လ်ဖာသည် သူ့အား ပျော်ရွှင်မှုအားလုံးကို ခေတ္တ ချေးပေးထားသည့် ပျော်ရွှင်ခြင်းချေးယူဝန်ဆောင်မှုနှင့် တူညီပြီး ယခုအခါ သူ အတိုးရော အရင်းပါ ပြန်ဆပ်နေရပြီ ဖြစ်သည်။
သို့သော် အတိုးနှုန်းက အဆမတန် များလွန်းသည်။ သူ ဘယ်တော့မှ အကျေ ပြန်မဆပ်နိုင်မည့် အဆုံးမရှိသော အကြွေးတစ်ခုလိုပင်။ ရုန်ယီသည် တန်ဖိုးကြီးကြီးမားမားတစ်ခုကို ဆုံးရှုံးခဲ့ရသလို ခံစားမိ၏။
မီးဖိုရှေ့တွင် ခေါင်းထဲဝင်လာသည့် ကြုံရာအတွေးများကို တွေးနေရင်း သူ၏လက်ကိုင်ဖုန်းက အသံမြည်လာသည်။
ရုန်ယီသည် ဖုန်းကိုင်ရန် အပြေးအလွှား သွားခဲ့သော်လည်း spam ခေါ်ဆိုမှု ဖြစ်ကြောင်းသာ တွေ့ရှိလိုက်ရသည်။ ထိုနံပါတ်ကို block လိုက်ပြီးနောက်တွင် မဖတ်ရသေးသော မက်ဆေ့ချ်အသစ်တစ်ခုကို တွေ့လိုက်ရ၏။
ပေးပို့သူမှာ ကျိုးလီ ဖြစ်ပြီး မက်ဆေ့ချ်ထဲတွင် ပုံတစ်ပုံသာ ပါဝင်သည်။
ရုန်ယီသည် မက်ဆေ့ကို ဖွင့်ကြည့်လိုက်သောအခါ ရယ်ရခက် ငိုရခက် ဖြစ်သွားသည်။ ၎င်းက တက္ကသိုလ်အားကစားပွဲတစ်ခုတွင် သူ့ကို တစ်စုံတစ်ယောက် ရိုက်သွားသည့်ပုံ ဖြစ်သည်။ ကျိုးလီ၏ပုံထဲတွင် ကျောင်းသားဖိုရမ်ရှိ မှတ်ချက်အချို့၏ စခရင်ရှော့တစ်ခုလည်း ပါဝင်ပြီး ၎င်းတို့အားလုံးမှာ သူသည် လိင်ပိုင်းဆိုင်ရာ အချက်အလက်များကို အတုအပ ပြုလုပ်ထားခြင်းရှိမရှိ ဆွေးနွေးထားကြခြင်း ဖြစ်သည်။
ရုန်ယီသည် ထိုပို့စ်ကို သူတို့၏ကျောင်း BBS ပေါ်တွင် တင်ခဲ့ခြင်းအား သတိရမိသွားပြီး နောက်ဆုံး ပြဿနာများ၏ အဆုံးသတ်အဖြစ် သူ၏ ကျောင်းသားကတ်ပုံကို သူကိုယ်တိုင်ကိုယ်ကျ တင်ခဲ့သည်။
ကျိုးလီသည် အိမ်ပြန်ရောက်ပြီးနောက်တွင် ရှာဖွေမှုအချို့ ပြုလုပ်ခဲ့ပုံရသည်။
"အခု မင်း ငါ့ကို ယုံပြီလား"
သူက စာပြန်ပို့လိုက်သည်။
ကျိုးလီက ဗီဒီယိုကောခေါ်ဆိုမှု တောင်းဆိုချက်ကို ပေးပို့လာသည်။ ဗီဒီယိုချိတ်ဆက်ပြီးသည်နှင့် ရုန်ယီသည် သူ၏ငိုခါနီးအသံကို ချက်ချင်း ကြားလိုက်ရလေသည်။
“ကျွန်တော် အရမ်း စိတ်ဓာတ်ကျနေသလို ခံစားရတယ်”
သူက ပြောသည်။
ရုန်ယီသည် အပြစ်ရှိသလို ခံစားလိုက်ရပြီး
"...တောင်းပန်ပါတယ်"
"ဒါပေမယ့်... နှစ်သိမ့်ပေးရာတော့ ရောက်ပါတယ်"
ကျိုးလီက ပြောသည်။
“ဒီလို အကြောင်းပြချက်မျိုးနဲ့ အငြင်းခံရတယ် ဆိုပေမယ့် ရင်ဘတ်ထဲမှာ နာကျင်နေသေးတယ် ဆိုပေမယ့် အသဲကွဲတဲ့ဒဏ်ကို ဒီထပ်ပိုပြီး မခံစားရတော့ဘူး”
"မင်းက တကယ် ကောင်းမွန်တဲ့လူတစ်ယောက်ပါ"
ရုန်ယီက သူ့ကို နှစ်သိမ့်ရန် ကြိုးစားသည်။
"မင်းကို ငါ ဘယ်လောက်တောင် အားကျနေမှန်း မင်း မသိပါဘူး။ တကယ်တော့ မင်းလို အိုမီဂါတစ်ယောက်အတွက် တစ်ယောက်ယောက်နဲ့ တွဲဖို့ဆိုတာက အရမ်း လွယ်လွန်းတာ မဟုတ်ဘူးလား"
"ကျွန်တော် ဘယ်သူနဲ့မှ တွဲဖို့ အစီအစဉ်မရှိပါဘူး..."
ကျိုးလီက ပြောသည် ။
တစ်နည်းအားဖြင့် သူသည် ရုန်ယီနှင့် ဆန့်ကျင်ဘက်ဖြစ်၏။
ချစ်စရာကောင်းသော်လည်း ကိုယ်တိုင် ထိန်းချုပ်နိုင်စွမ်းရှိပြီး သူ့နားတွင် ဝိုင်းနေသော အယ်လ်ဖာတော်တော်များများကိုလည်း စိတ်မဝင်စားပေ။ ဘွဲ့မရသေးမီကပင် သူ၏အသက်မွေးဝမ်းကြောင်းအတွက် အစီအစဉ် ဆွဲထားပြီးဖြစ်ရာ သူ့ဘဝ၏ အစွန်ဆုံးတွင်သာ ထားရှိထားသည့် 'မိသားစု' ဟူသော စကားလုံးကို အချိန်မရွေး ဖျက်ပစ်နိုင်သည့် အနေအထားတွင် ရှိသည်။
သို့သော် ကျောင်း သို့မဟုတ် တက္ကသိုလ်တက်စဉ်က သူ၏ ကလေးမျက်နှာလေးမှာ ပြဿနာ မဟုတ်သော်လည်း အလုပ်ခွင်ရောက်သည့်အချိန်တွင် နေရာတိုင်းမှ အထင်သေးသည့်အကြည့်ဖြင့် အကြည့်ခံခဲ့ရသည်။ အများစုကတော့ အန္တရာယ်ပြုလိုသည့်သဘော မရှိကြသော်လည်း အချို့ကမူ "ဂရုစိုက်ခြင်း" ဟူသည့် ခေါင်းစဉ်အောက်တွင် ကျိုးလီကဲ့သို့ မိမိကိုယ်ကို လေးစားမှုကြီးမားသူအတွက် သိပ်ပြီး လက်ခံလိုစိတ်မရှိပေ။
သူသည် သန်မာ၍ အမှီအခိုကင်းသူဖြစ်ရန် ကြိုးစားနေသော်လည်း သူ့လို အိုမီဂါတစ်အတွက် အိမ်ထောင်ပြု၍ ကလေးယူခြင်းကသာ တစ်ခုတည်းသော နည်းလမ်းမှန် ဖြစ်သည် ဟု သူ၏ မိသားစုတစ်ခုလုံးက ယုံကြည်ကြသည်။ ထို့ကြောင့် သူ့အတွက် ဘလိုင်းဒိတ်များ ဆက်တိုက် စီစဉ်ခဲ့ကြသည်။
"ကျွန်တော့်ဦးလေးက တကယ် စိတ်ပျက်ဖို့ကောင်းတယ်"
သူက ရုန်ယီထံတွင် ညည်းညူလိုက်သည်။
"သူက ကျွန်တော့်ကို ပုံမှန်လူမျိုးတွေနဲ့ ဘယ်တော့မှ မိတ်မဆက်ပေးဘူး။ အိုး... ကျွန်တော် အစ်ကို့ကို ပုံမှန် မဟုတ်ဘူးလို့ ပြောတာမဟုတ်ဘူးနော်။ ဒါပေမယ့် အစ်ကိုက တကယ်လည်း ပုံမှန်တော့ မဟုတ်ဘူးမလား"
၎င်းကို ကြားသောအခါ ရုန်ယီ နည်းနည်းလေးမှ စိတ်မဆိုးပေ။ အဆုံးသတ်တွင် ထိုစကားက သူ ဤအကျပ်အတည်းကို ချောချောမွေ့မွေ့ ဖြေရှင်းနိုင်ခဲ့ပြီ ဆိုသည့် သဘော ဖြစ်သည်။ ကျိုးလီသည် သူနှင့်ပတ်သက်ပြီး သေချာပေါက် သွားပုပ်လေလွင့် ပြောမည် မဟုတ်ဘဲ ထိပ်ပြောင်ဦးလေးကိုလည်း အလုပ်တွင် သူ့အပေါ် ကောင်းကောင်းမွန်မွန် ဆက်ဆံခိုင်းမည်မှာ သေချာသည်။ ထို့အပြင် သူက တကယ်ကို စိတ်ဝင်စားစရာကောင်းသော သူငယ်ချင်းတစ်ယောက် ဖြစ်ပုံပေါ်၏။
သူတို့တွင် ဒုက္ခကိုယ်စီ ရှိကြသည်။ ရုန်ယီကလည်း အကြောင်းအရာတချို့ကို ညီးညူပြောဆိုခဲ့သည်။
ကျိုးလီနှင့် ဆန့်ကျင်ဘက်အားဖြင့် သူသည် အသက်မွေးဝမ်းကြောင်းပိုင်းနှင့်ပတ်သက်၍ ရည်မှန်းချက် ပြင်းပြင်းထန်ထန် သတ်မှတ်ထားသူတော့ မဟုတ်ပေ။ သို့သော် အချစ်ရေးလမ်းကြောင်းတွင် အကြီးအကျယ် ထိခိုက်ခဲ့ပြီး ၎င်းအတွက် အချိန်ဖြုန်းရန် ဝါသနာမရှိတော့ခြင်းကြောင့် သူ၏ဘဝမှာ အသက်မွေးဝမ်းကြောင်းအပေါ်တွင်သာ အလိုအလျောက် အလေးပေးခဲ့ရသည်။ သူ ငယ်ငယ်ရွယ်ရွယ်နှင့် ပရောဂျက်မန်နေဂျာ ဖြစ်လာခဲ့သည်။ တာဝန်များက ပို၍ လေးလံလာပြီး သူ၏အားလပ်ချိန်များကို ပိုမို သိမ်းပိုက်လာကာ ဘဝလက်တွဲဖော်ရှာရန် အလားအလာပင် နည်းလာခဲ့ရသည်။
သူ၏မိဘများက သူ့ကို ယခုထက်တိုင် လက်မထပ်နိုင်သေး၍ လှောင်ပြောင်နေကြသော်လည်း သူ ထိုကိစ္စကို အလွန်အမင်း စိတ်မပူခဲ့ပေ။ သူသည် စီစဉ်ပေးထားသော ဘလိုင်းဒိတ်များကို မကြာခဏ သွားရန် ပြဿနာ မရှိကြောင်း အကြိမ်ကြိမ်အခါခါ ယဉ်ကျေးစွာဖြင့် အရိပ်အမြွက်ပြောခဲ့ဖူးသော်လည်း သူ အမြဲ ရရှိခဲ့သော တုံ့ပြန်မှုမှာ
"မင်းရဲ့အရပ်အမြင့်ကို ကြားတာနဲ့ တစ်ဖက် ပါတနာက ကြောက်ပြီး ထွက်ပြေးသွားလိမ့်မယ်"
နှစ်ယောက်သား တစ်ဦးကိုတစ်ဦး တခဏခန့် နှစ်သိမ့်ပေးလိုက်ကြသည်။ သူတို့၏ အကျင့်စရိုက်လက္ခဏာများက ကွာခြားသော်လည်း တစ်ဦးနှင့်တစ်ဦး ပို၍ ရင်းနှီးလာသလို ခံစားရပြီး ခင်မင်မှုဆက်ဆံရေးမှာလည်း တဖြည်းဖြည်း နွေးထွေးလာခဲ့သည်။
ကျိုးလီက ရုတ်တရက် တစ်ခုခုကို တွေးမိသွားပုံရကာ သက်ပြင်း အထပ်ထပ် ချနေသည်။
“အဲ… ကျွန်တော် ရုတ်တရက် အကြံတစ်ခု ရတယ်။ အစ်ကို လုပ်ချင်ပါ့မလားတော့ မသိဘူး…”
"ပြောကြည့်လေ"
"အစ်ကို ကျွန်တော့်ရည်းစားလို ဟန်ဆောင်ပေးနိုင်မလား"
ကျိုးလီက ပြောသည်။
“……”
“ကျွန်တော့်ဦးလေးက အစ်ကို့ကို အိုမီဂါမှန်း မသိတာ သေချာတယ်”
သူက ဆက်ပြောသည်။
“ကျွန်တော်တို့ အတူ ရှိနေစရာ မလိုပါဘူး။ တစ်ယောက်နဲ့တစ်ယောက် ကောင်းမွန်တဲ့ ဆက်ဆံရေးတွေရှိပြီး အဆက်အသွယ်မပြတ် လေ့လာသွားချင်တယ် လို့သာ ပြောလိုက်။ အဆုံးမရှိတဲ့ ဘလိုင်းဒိတ်တွေကို ကျွန်တော် တကယ် ငြီးငွေ့နေပြီ"
“အာ…”
"ဘာပဲဖြစ်ဖြစ် ကျွန်တော်တို့ရဲ့သူငယ်ချင်းအသိုင်းအဝိုင်းကလည်း ထပ်တူကျနေတာမှ မဟုတ်တာ ဟုတ်တယ်မလား"
ကျိုးလီက ပြောသည်။
"ကျွန်တော် အစ်ကို့ကို ဒုက္ခမပေးမိအောင် ကြိုးစားပါ့မယ်"
ရုန်ယီ တွေဝေသွားသည်။
တစ်စုံတစ်ယောက်က သူ့ကို ဤကဲ့သို့ အကူအညီမျိုး တောင်းဆိုခြင်းမှာ ဒါ ပထမဆုံးအကြိမ်တော့ မဟုတ်ပေ။ အရင်က တစ်စုံတစ်ယောက်အတွက် ဤသို့ ဟန်ဆောင်တွဲပေးရန် သဘောတူခဲ့ပြီးနောက် ထိုလူက သူ့ကို ချစ်မိသွားခြင်းနှင့်သာ အဆုံးသတ်ကာ မလိုလားအပ်သည့် ပြဿနာများစွာကို ဖြစ်ပေါ်စေခဲ့သည်။
ထို့ကြောင့် ကျိုးလီ၏ တောင်းဆိုချက်ကို နှစ်ခါပြန်မစဉ်းစားဘဲမနေနိုင်ချေ။
“… လုပ်အားခတော့ တောင်းလို့ရပါတယ်။ ဒါပေမယ့် ကျွန်တော်က အရမ်း ဆင်းရဲနေသေးတော့ အစ်ကိုက အရမ်း ဈေးကြီးနေရင် မတတ်နိုင်ဘူး”
ဘယ်လို အဓိပ္ပါယ်မရှိတာကြီးလဲ။
ရုန်ယီမှာ ရယ်ရမည်လား ဒေါသထွက်ရမည်လားပင် မသိ။ သူ ၎င်းကို လုပ်ရန် သဘောတူဖို့ ဆုံးဖြတ်ခါနီးဆဲဆဲတွင် ရုတ်တရက် အလွန် ပြင်းသည့် ညှော်နံ့ကို ရလိုက်ရလေသည်။
Xxxxxx
