အပိုင်း ၉၃

Chapter 93

ချီမိသားစုမှာ အစဉ်အဆက်ချမ်းသာလာကြသောမိသားစုတစ်ခုဖြစ်ကာ အစပိုင်းတွင် အိမ်ခြံမြေဈေးကွက်နှင့်စတင်ခဲ့ပြီး နောက်ပိုင်းမှသာ အင်တာနက်ဈေးကွက်နှင့်အခြားသောနယ်ပယ်များအပေါ်ချဲ့ထွင်လာကြခြင်းဖြစ်သည်။ ချီရှောင်မင်မှာ ထိုကဲ့သို့ သားဆက်ခြားပစ္စည်းထုတ်လုပ်ရေးနယ်ပယ်မျိုးနှင့် မရင်းနှီးသည့်အတွက် မေးလိုက်မိသည် 

" ‌ဒါဆို အဲဒီကုမ္ပဏီကို ဘယ်လိုထင်လဲ… ဝယ်လို့တန်နိုင်လား…"

" မတန်ဘူး ကျွန်တော့်သူငယ်ချင်းတစ်ယောက်ကို မေးကြည့်ပြီးသွားပြီ… အဲဒီဝမ်မျိုးရိုးက တကယ့်အဆင့်မြင့်ပစ္စည်းတွေအဓိကထုတ်နေတာတဲ့….ကုန်ကြမ်းကိုတောင် အကောင်းတကာ့အကောင်းဆုံးရော်ဘာရှာသုံးတာ…ဈေးကွက်အတွင်း သုံးခုပါကွန်ဒုံးတစ်ဘူးရဲ့ဈေးက ၁၉၈ယွမ်နဲ့ ချောဆီတွေဆို ၃၉၉ယွမ်ကနေ ၆၉၉ယွမ်အကြားပဲ…ဒါကြောင့် ပစ္စည်းတွေ သာမန်ပဲ… ရောင်းအားကလည်း သာမန်ပဲရှိတယ်… ဈေးကွက်ကတော့ နိမ့်တယ်ပြောရမယ်…ကျွန်တော်ကတော့ အဲဒီကုမ္ပဏီရဲ့အကျိုးအမြတ်တွေအပေါ် အရမ်းအကောင်းမြင်မနေဘူး…"

ချီရှောင်မင်မှာ သူ့အကြီးဆုံးသား၏အမြင်များအပေါ် အမြဲယုံကြည်သူဖြစ်သောကြောင့် ခဏမျှတွေးကာ မေးလိုက်သည် " အကျိုးအမြတ်ကမကောင်းနိုင်ဘူးဆိုတော့လည်း မဝယ်ဘူးပေါ့…ဒီလိုပစ္စည်းတွေထုတ်တဲ့ကုမ္ပဏီမျိုးဆိုတာ နည်းနည်းတော့စိတ်ပူစရာပဲလေ…ဘယ်လိုပဲဖြစ်ဖြစ် ရှင်းရှင်းဘာကိုမှကြောက်နေစရာမလိုတော့ဘူးပေါ့… နည်းနည်းပြင်ဆင်ပြီးရင် အခုနွေဦးအကုန်ကြ ဝမ်ကုမ္ပဏီကို ဒေဝါလီခံခိုင်းကြတာပေါ့…"

" အဖေအသိပေးဖို့တောင်မလိုပါဘူး…" ချီယွမ်ရှောင် ပြုံးလျက် " ကျွန်တော်က ဘဏ္ဍာရေးလမ်းကြောင်းကိုရှာတွေ့ပြီးသွားလို့ ဝမ်ကုမ္ပဏီရဲ့အဓိကအဆက်အသွယ်ကို ဖြတ်တောက်ပြီးသွားပြီးပြီ…."

ချီယွီကျီးမှာ ငယ်စဉ်ကတည်းက မိသားစု၏လွှမ်းမိုးခံလာခဲ့ရသူဖြစ်လေရာ သူမက မိန်းကလေးတစ်ယောက်ဖြစ်နေသည့်တိုင် စီးပွားရေးအကြောင်းတစ်လုံးတစ်ပါဒမျှ နားမလည်သူမဟုတ်ချေ။

ကုမ္ပဏီတစ်ခုကို ဤကဲ့သို့ရက်အနည်းငယ်ဖြင့် ဖြုတ်ချနိုင်ခြင်းမှာ သူ၏ကိုယ်ပိုင်ပြသနာများနှင့် ပြိုလဲမည့်အခြေအနေသို့ရောက်နေနိုင်ခြင်းများ ပါ‌ဝင်နေ‌နိုင်သည့်တိုင် ချီယွမ်ရှောင်၏အားမှာ မည်မျှသန်မာကြောင်းကို ပြသနေခဲ့သည်။ ထို့ကြောင့် ချီယွီကျီး အစ်ကိုဖြစ်သူကို လေးစားသည့်အကြည့်များဖြင့် ခဏမျှကြည့်လိုက်ပြီးနောက် မေးလိုက်လေသည် 

" ဒေဝါလီခံဖို့ကကော ဘယ်လောက်လိုသေးလဲ… ပိုင်ဆိုင်မှုတွေကိုကော လေလံပစ်မှာလား…တကယ်လို့သာ ကောင်းတာရှိရင် ညီမအတွက်သိမ်းထားပေးပါဦး…ရှင်းရှင်းအတွက် မြို့တိုင်းမှာအိမ်ဝယ်ပေးမယ်ဆိုတဲ့အစီအစဉ်က အခုထိကိုအကောင်အထည်မပေါ်နိုင်သေးဘူးရယ်…"

" ပိုင်ဆိုင်မှုတွေကို ခွဲဝေမဲ့အကြောင်းတော့ မသိရသေးဘူး…ကုန်ပစ္စည်းတွေကိုတော့ ထုတ်ယူသွားဖို့ရှိတယ်… အဲဒီမှာ အခု၃သောင်းလောက်ရှိမှာဆိုတော့ အလုပ်ပြီးရင် မင်းကိုပြောမယ်လေ…"

" ကောင်းပြီ ကျေးဇူးနော် ကော…"

ချီယွီကျီး ပြုံးလျက် ကျေးဇူးတင်စကားဆိုလိုက်သည်။ ထို့နောက် သူမတစ်စုံတစ်ခုကို သတိရသွားသောကြောင့် နဖူးကိုရိုက်ကာ ပြောလိုက်မိသည် " အာ… ကော ညီမတို့ သားဆက်ခြားပစ္စည်းတွေလည်း သိမ်းယူလို့ရတယ်လေ…"

ချီရှောင်မင် သူမစကားကို ချက်ခြင်းပယ်ချလိုက်သည် " လျောက်နောက်မနေနဲ့…သားဆက်ခြားပစ္စည်းတွေဆိုတာ စိတ်ချရတာမဟုတ်ဘူး…ကိုယ့်ခန္ဓာကိုယ်ကိုဂရုစိုက်ရမယ်လေ… ယောင်္ကျားလေးတွေနဲ့ အမြဲလျောက်လည်မနေနဲ့…"

" ပါး… သမီးက အဲဒီဟာတွေသုံးချင်တဲ့သူမဟုတ်ပါဘူးနော်…" ချီယွီကျီး ရှက်သွားရသောကြောင့် ထအော်လိုက်မိသည် " ပြီးတော့ အရင်ကောင်လေးထဲက ဘာလိုချင်လဲဆိုတာ ကိုယ့်ဟာကိုယ်သိသွားပါပြီနော်…အဲဒီပစ္စည်းတွေက သမီးအတွက်မဟုတ်ဘူး… ရှင်းရှင်းအတွက်ပြောတာ…"

" ရှင်းရှင်း…." အဖေချီနှင့်ချီယွမ်ရှောင်တို့မှာ တပြိုက်နက်တည်း ထအော်မိသွားသည် 

" ရှင်းရှင်းမှာ ချစ်သူကောင်မလေးရှိနေပြီလား…"

ချီယွီကျီး သူတို့၏အမူအယာများကြောင့် လန့်သွားရသဖြင့် ရင်ဘတ်ကိုအသာပုတ်ကာ ပြန်ဖြေလိုက်ရသည် " ဟင့်အင်း မရသေးပါဘူး…ဒါပေမယ့် သူသဘောကျတဲ့သူတေ့ာ ရှိနေတဲ့ပုံပဲ… ဘယ်သူလဲလို့တော့ မမေးနဲ့နော် သမီးလည်းမသိဘူး… သူ့အပြုအမူတွေကနေပဲ ခန့်မှန်းမိတာ…"

မိန်းကလေးများမှာ ဤသို့သောနယ်ပယ်မျိုးတွင် ပို၍အာရုံခံနိုင်မိကြသောကြောင့် အဖေချီနှင့်ချီယွမ်ရှောင်တို့မှာ အနည်းငယ်ဆုံးရှုံးသွားသကဲ့သို့ ခံစားလိုက်ကြရသည်။

သူတို့ရဲ့ရှင်းရှင်းလေးက အခုမှမိသားစုနဲ့အနေနီးလာတာကို သူစိမ်းတစ်ယောက်မပြေးသွားတာ ခံရတော့မှာလား…

သူတို့ရဲ့ရတနာကို ခိုးပြေးတာဘယ်သူလဲကွ…

ချီယွမ်ရှောင် သတင်းကိုအနည်းငယ်ကြာသည်အထိ ခြေဖျက်လိုက်ရပြီးနောက် အသံနိမ့်နိမ့်ဖြင့် ပြောလိုက်သည်

 " ကောင်းပြီ မင်းပြောတာကိုနားထောင်မယ်… မနက်ဖြန်ကြရင် သူတို့ကိုဖုန်းခေါ်ပြီးတော့ ပစ္စည်းတွေချန်ထားဖို့ပြောလိုက်မယ်… အခု၃သောင်းလောက်ဆိုတော့ သူ့အတွက်အချိန်အတိုင်းအတာတစ်ခုထိတော့ လုံလောက်မှာပါလေ… သူပြန်လာမှပဲ သူနဲ့စကားပြောကြည့်ကြတာပေါ့…"

သနားစရာကောင်းသောရှင်းရှင်းလေးမှာ ထိုအချိန်တိုအတွင်း မည်သည့်အရာဖြစ်ပျက်ခဲ့သည်ကို မသိသေးပေ။

သူ အိမ်ဟူ၍မရှိခင်က အဆောင်မှာ သူ့အတွက်နေရန်နေရာတစ်ခုသာဖြစ်ခဲ့သည်။ ယခုအချိန်၌ သူ့ထံတွင်အိမ်ရှိနေပြီဖြစ်ရာ တံခါးဝကိုမြင်လိုက်ရသည်နှင့် ချီရှင်းချန်အမှန်တကယ် အိမ်ပြန်ရောက်လာပြီဟု ခံစားလိုက်ရသည်။

ချီရှင်းချန် သူ၏အဖေ၊ အစ်ကိုနှင့်အစ်မတို့ကို တွေ့ချင်နေပြီဖြစ်သည်။ သူတို့အားလုံး ကျန်းမာပျော်ရွှင်စွာရှိနေသည်ကို မြင်ချင်မိပြီး မိုးပျံပူဖောင်းကဲ့သို့ကောင်စုတ်လေး ဤနေရာတွင်ရှိလျှင်လည်း သူ့ကိုမြင်ချင်မိသည်။

ထို့နောက် တံခါးကိုဖွင့်လိုက်ချိန်တွင် အဖေနှင့်အစ်ကိုကြီးတို့၏လေးနက်နေသောအမူအရာများကို မြင်လိုက်ရသည်။

" ပါး.. ကော.. ကျဲ… ကျွန်တော်ပြန်ရောက်ပါပြီ…" ချီရှင်းချန် သူတို့၏လေးနက်နေသောအမူအယာများကြောင့် ဒေဝါလီခံရတော့မည်လားဟု တွေးမိသွားခဲ့သည် " ဘာပြသနာရှိလို့လဲ…"

" အားးး ရှင်းရှင်းပြန်ရောက်လာပြီ…" ချီယွီကျီးမှ ကပျာကယာထရပ်လာသည် " ကျဲရဲ့ဟင်းချိုကဆူနေတုန်းရှိသေးတယ်… ခဏလေးစောင့်ဦးနော်…"

အဖေချီမှာမူ သူ၏ချောမောပြီးချစ်စဖွယ်သားအငယ်ဆုံးကို မြင်လိုက်ရချိန်တွင် လေးနက်နေသောအမူအယာမှ ချစ်ခင်စိတ်များအပြည့်နှင့်အမူအယာအဖြစ်သို့ ပြောင်းလဲသွားပြီး " ဘာမှမဟုတ်ဘူး…ဒီအတိုင်းစီးပွားရေးကိစ္စအချို့ပြောနေကြတာပါ… လာပါဦး ဒီအဖေကြီးက တစ်ချက်ကြည့်ရအောင်…"

ချီရှင်းချန် ကျောပိုးအိတ်ကိုချကာ ချီရှောင်မင်၏ဘေးမှဆိုဖာပေါ်သို့ နာနာခံခံဖြင့်ထိုင်ချလိုက်သည်။ ချီရှောင်မင် သားငယ်ဖြစ်သူကို ခဏမျှစစ်ဆေးကြည့်လိုက်ပြီးနောက် နာကျင်နေသောနှလုံးသားဖြင့် ပြောလာသည်

 " ဝိတ်ကျသွားတာပဲ… ခဏနေကြရင် မင်းအစ်မရဲ့ဟင်းချိုကို မသောက်နဲ့နော်… တခြားဟာသာစားချည်…"

ချီရှောင်မင် ချီယွီကျီးအပေါ်နောက်ပြောင်နေသေးသည်ကို မြင်လိုက်ရချိန်မှသာ အိမ်တွင်မည်သည့်ပြသနာမှမရှိသည်ကို သိလိုက်ရသည့်အတွက် ချီရှင်းချန် ဖခင်ဖြစ်သူနှင့်အတူ လိုက်ပါနောက်ပြောင်လိုက်သည်။

ထို့နောက် ချီယွမ်ရှောင်မှ မေးလာသည် " ရှင်းရှင်း ပင်ပန်းနေပြီလား…"

" ဟင့်အင်း ကျွန်တော်လမ်းမှာတုန်းကအိပ်ခဲ့ပါသေးတယ်…"

ချီယွမ်ရှောင်ကဲ့သို့ အမြဲတစေတည်ငြိမ်နေတတ်သူပင် သူ၏ပူပင်မှုများကို ဖုံးဖိမထားနိုင်တော့သောကြောင့် ထရပ်ကာမေးလာသည် 

" မပင်ပန်းသေးဘူးဆိုရင် ကောနဲ့ခဏလိုက်ခဲ့ဦး… မေးစရာလေးရှိလို့…"

အစ်ကိုကြီးမှ ကယ်‌ဗင်၏အကြောင်း သို့မဟုတ် ပွဲတွင်ဖြစ်ပျက်ခဲ့သည်ကို မေးမည်ဟုတွေးမိသွားသည့်အတွက် ချီရှင်းချန် စာကြည့်ခန်းစီသို့ ပျော်ရွှင်စွာလိုက်သွားလိုက်သည်။

အဆုံး၌ ချီယွမ်ရှောင်၏စကားများမှာ သူ့ကိုမြေကြီးပေါ်သို့ တိုက်ရိုက်ကျဆင်းသွားစေခဲ့သည်။

" ရှင်းရှင်း မင်းသဘောကျတဲ့ကောင်မလေးရှိနေပြီလား…"

သူပိုင်ရဲ့ကိုသဘောကျနေမိကြောင်း ကူညီ၍အဖြေထုတ်ပေးခဲ့သူမှာ ချီယွီကျီးဖြစ်သည့်အတွက် ထိုအကြောင်းကိုလည်း ပြောပြလိုက်ပြီးပြီထင်သွားသောကြောင့် ချီရှင်းချန်၏မျက်နှာမှာ ကွက်ခနဲပျက်သွားခဲ့သည်။

ညီဖြစ်သူ၏တုံ့ပြန်မှုကြောင့် ချီယွမ်ရှောင် ချီယွီကျီးပြောပြသည်မှာ မှန်နေကြောင်းကို သိလိုက်ရကာ မနေနိုင်ဘဲ ဆက်မေးလိုက်မိသည် 

" အဲဒီကောင်မလေးက ဘယ်သူလဲ…ဘယ်လိုလုပ်ပြီးသိကြတာလဲ…သူငယ်ချင်းလား ဒါမှမဟုတ် အနုပညာလောကလုပ်ဖော်ကိုင်ဖက်ပဲလား…သူကကော မင်းကိုသဘောကျလား…"

များစွာပြောလိုက်ပြီးနောက် ချီယွမ်ရှောင် ခဏရပ်လိုက်သည်။ ထို့နောက် " ကောကိုမပြောပြချင်လည်း ရပါတယ်…ဒီအတိုင်းပဲမေးကြည့်တာပါ…တခြားအတွေးမရှိဘူး… ရှင်းရှင်းပျော်နေသရွေ့ ကောတို့ကဘာဖြစ်ဖြစ်အဆင်ပြေတယ်…"

" ကျွန်တော်သဘောကျတဲ့ကောင်မလေးမရှိပါဘူး…"

ချီရှင်းချန် မိသားစုအပေါ်ဖုံးကွယ်မထားချင်သော်လည်း သူတို့ဘက်မှ သူ၏လိင်တူနှစ်သက်မှုအား လက်ခံနိုင်မည်လားဆိုသည်ကို မသေချာနေသည့်အတွက် အစမ်းသဘောဖြင့် ပြောကြည့်လိုက်သည်

 " ဒါပေမယ့် ကျွန်တော်ထင်တာတော့… ကျွန်‌တော် ယောင်္ကျားလေးတွေကိုသဘောကျတယ်လို့ ထင်တယ်…"

"......"

ချီယွမ်ရှောင် တိတ်ဆိတ်သွားရသည်။

ချီရှင်းချန်၏နှလုံးမှာ တစ်ချက်ထခုန်သွားခဲ့သည်။ ယနေ့ခေတ်အထိပင် လူအများ၏မျက်လုံးထဲတွင် လိင်တူနှစ်သက်ခြင်းမှာ ပုံမှန်မဟုတ်သောအရာတစ်ခုအဖြစ် ရှိနေဆဲဖြစ်သည်။ များစွာသောလူများမှာ လိင်တူနှစ်သက်ခြင်းအား ရှက်စရာကောင်းကာ ညစ်ပတ်သောအရာတစ်ခုဟုပင် တွေးနေကြမြဲဖြစ်သည်။

အကယ်၍ သူ့မိသားစုမှလက်မခံလျှင်ကော ဘယ်လိုလုပ်ရမလဲ… မူလကိုယ်ကဲ့သို့ အိမ်ကထွက်ပြေးရမည်လား…ဒါပေမယ့်လည်း ဒီလိုဆိုရင် သူ့မိသားစုကဝမ်းနည်းမသွားနိုင်ဘူးလား … ဘယ်လိုပဲဖြစ်ဖြစ် သူပိုင်ရဲ့အပေါ်အမှန်တကယ် လက်မလျော့ချင်ပါ…ချီရှင်းချန် လက်သီးတင်းတင်းဆုပ်ထားပြီး သူ၏အတွေးများမှာ တောင်စဉ်ရေမရ လွင့်ပျံနေခဲ့သည်။

" ရှင်းရှင်း…" 

နှစ်မိနစ်အကြာတွင် ချီယွမ်ရှောင်မှ နူးညံ့စွာခေါ်လာသောကြောင့် ချီရှင်းချန် အစ်ကိုဖြစ်သူကို လှမ်းကြည့်လိုက်သည်။

" မင်းတကယ်… ယောင်္ကျားလေးတွေကိုကြိုက်တာသေချာလား…ဒါမှမဟုတ် တခဏတာရင်ခုန်သွားတာကြောင့်ပဲဖြစ်ဖြစ် အခြားသူတွေရဲ့လွှမ်းမိုးခံရတာကြောင့်ပဲဖြစ်ဖြစ် မင်းရဲ့လိင်စိတ်တိမ်းညွတ်မှုကို အမှတ်မှားနေတာမျိုးလား…"

ပုံမှန်လူ့အသိုင်းအဝိုင်းနှင့်ယှဉ်လျှင် အနုပညာလောကမှလူများမှာ ပို၍လိင်တူခြင်းကြိုက်နှစ်သက်တတ်ကြသည်။ ချီယွမ်ရှောင် စိုးရွံ့နေမိသည့်အချက်မှာ သူ၏ညီငယ်လေးသည် အများ၏လွှမ်းမိုးမှုကြောင့်သာ ခဏတာယိမ်းယိုင်သွားပြီး အမှန်တကယ်လိင်တူခြင်းနှစ်သက်မနေမည်ကိုပင်။

သို့သော်လည်း ချီရှင်းချန်မှ အခိုင်အမာခေါင်းငြိမ့်လာခဲ့သည် 

" ကျွန်တော့်ရဲ့လိင်စိတ်တိမ်းညွှတ်မှုအပေါ် မသေချာသေးပေမယ့် သူ့ကိုသဘောကျတယ်ဆိုတာတော့ သေချာပါတယ်…"

" သေချာတာပဲ ကောင်းပါတယ်လေ…" ချီယွမ်ရှောင် စိတ်သက်သာရာရသွားခဲ့သည်

 " မင်းရဲ့အစ်ကိုတစ်ယောက်အနေနဲ့ မင်းဖြစ်ချင်သမျှအားလုံးကို ပံ့ပိုးပေးသွားမှာပါ…ဒါပေမယ့် ဒါက မင်းသူ့ရဲ့အကျင့်စရိုက်အပေါ် ကောင်းကောင်းသိထားပြီးတော့ သူ့မှာ ကိုယ်ကျင့်တရားဖောက်ပြန်နေတာမျိုးတို့ ရောဂါတို့ လျှို့ဝှက်ဘဝတို့လည်း မရှိနေဖို့အပေါ် မူတည်နေသေးတယ်နော်…မဟုတ်ရင်တော့ အစ်ကိုတို့ မင်းသူနဲ့အတူရှိနေတာကို ခွင့်ပြုမှာမဟုတ်ဘူး…"

" သူ့မှာဒါမျိုးတွေမရှိဘူးဆိုတာ ကျွန်တော်လုံးဝသေချာပါတယ်…." ချီရှင်းချန် ပိုင်ရဲ့၏အကျင့်စရိုက်အပေါ် အပြည့်အဝယုံကြည်ချက်ရှိပါသည်။

ထိုစကားကိုကြားလိုက်ရချိန်မှသာ ချီယွမ်ရှောင် လုံးလုံးစိတ်ချသွားရသည်။ သို့သော်လည်း ၎င်း၏နောက်မှာလိုက်လာသည်မှာ သူ၏ပြင်းထန်စွာကိုက်ခဲနေသောနှလုံးသားပင်။ ဘယ်သူကများ ချီမိသားစုရဲ့ကောင်းကောင်းပျိုးထောင်ထားတဲ့ ဂေါ်ဖီထုတ်လေးကို တူးရဲရတာလဲ… အဲဒီလူရဲ့အသက်ကကော ဘယ်လောက်လဲ… ဘာအလုပ်လုပ်တဲ့လူလဲ…သူကကော လုံလောက်အောင်ကောင်းရဲ့လား… ရှင်းရှင်းအပေါ်ကော လုံလုံလောက်လောက်ကောင်းပေးပါ့မလား…

အစ်ကိုအကြီးဆုံးဟူသည်မှာ ဖခင်ကဲ့သို့လူမျိုးဖြစ်သည်။ ချီယွမ်ရှောင်၏ခေါင်းမှာ ကြီးသထက်ကြီးလာရသည်။ သူကြောက်နေမိသည်မှာ သူအချို့သောအရာများကို မတွေးမိလိုက်ဘဲ သူ၏ချစ်ရပါသောရှင်းရှင်းလေး မှားယွင်းစွာဆက်ဆံခံရမည်ကိုပင်။

" သခင်လေးနဲ့ဒုတိယသခင်လေးတို့ ညစာအသင့်ဖြစ်ပါပြီ…"

အတွေးလွန်နေစဉ် အိမ်တော်ထိန်း၏အသံမှာ တံခါးစီမှထွက်ပေါ်လာသည်။ ယခုအချိန်တွင် သူ၏အစာအိမ်မှာ ပို၍အရေးကြီးနေသည်ဖြစ်သောကြောင့် ချီယွမ်ရှောင် သူ၏ပူပန်မှုအားလုံးကို ဘေးချထားရန် ဆုံးဖြတ်လိုက်ပြီး  ညီငယ်ဖြစ်သူကိုသာ အောက်ထပ်သို့ ညစာစားရန် ခေါ်သွားလိုက်သည်။

ကံမကောင်းစွာဖြင့် ယခုတစ်ကြိမ်တွင်လည်း ချီရှင်းချန် ချီယွီကျီး၏နတ်ဆိုးဟင်းလျာများလက်မှ မလွတ်နိုင်သေးပေ။ ထမင်းစားစားပွဲပေါ်တွင် ဟင်းချိုတစ်ခွက်တည်ရှိနေပြီး အနက်ရောင်ဟင်းလျာ၏အနံ့မှာ သူ၏နှာခေါင်းဝတွက် ဝေ့ဝဲလာခဲ့သည်။

သို့သော်လည်း ပထမဆုံးအကြိမ်မြည်းစမ်းပြီးနောက် သူထိုအရာနှင့်အသားကျသွားခြင်းကြောင့် ဖြစ်နိုင်ပေမည်။ ချီရှင်းချန် အမှန်တကယ်ပင် ၎င်းကိုအလွန်အဝင်ဆိုးနေသည်ဟု မခံစားရတော့ချေ။ ဇွန်းအသေးကိုသာသုံးကာ တဖြည်းဖြည်းချင်းသောက်နေလိုက်သည်။ ထိုအချိန်၌ မည်သူကများသိနိုင်မည်နည်း… သူ၏မိသားစုဝင်များမှာမူ စားပွဲအောက်တွင်ဖွက်ကာ စာရိုက်နေကြသည်။

ချီယွီကျီးမှ လူသုံးယောက်ပါသောအဖွဲ့လိုက်စကားဝိုင်းကို တည်ထောင်လိုက်သည်။

မိုးရွာပြီးတော့နေသာလာတယ် : [ သာ့ကော ရှင်းရှင်းဘယ်သူ့ကိုသဘောကျနေလဲဆိုတာ သိလာပြီလား…"

ချီရှောင်မင် : [ . ]

ရှောင် : [ ငါရှင်းရှင်းကို ဖိအားမပေးချင်ဘူး… သူကပြောမဲ့ပုံမပေါ်တာနဲ့ ငါလည်းမမေးလိုက်တော့..]

မိုးရွာပြီးတော့နေသာလာတယ် : [ ဘာလို့မမေးခဲ့ရတာလဲလို့….]

ချီရှောင်မင် : [ . ]

ရှောင် : [ ယွီကျီး မင်းအမူအယာတွေကိုထိန်းစမ်း…ရှင်းရှင်း မင်းကိုကြည့်နေပြီ…]

မိုးရွာပြီးတော့နေသာလာတယ် : [ အင်းပါ ]

မိုးရွာပြီးတော့နေသာလာတယ် : [ တကယ်တော့ ညီမမှာခန့်မှန်းထားတယ် သိချင်ကြလား…]

ချီရှောင်မင် : [ . ]

ရှောင် : [ ပြောလေ…]

မိုးရွာပြီးတော့နေသာလာတယ် : [ သာ့ကော ရှင်းရှင်း အစ်ကို့ကို ယောင်္ကျားလေးတွေကိုသဘောကျတာလား မိန်းကလေးတွေကိုသဘောကျတာလား ‌ဆိုတာကိုကော ပြောပြသေးလား…]

ချီရှောင်မင် : [ ? ]

ရှောင် : [ ယောင်္ကျားလေးတဲ့…]

ချီရှောင်မင် : [ ! ]

မိုးရွာပြီးတော့နေသာလာတယ် : [ ပါးး မလန့်သွားနဲ့နော်… ရှင်းရှင်းဖြစ်ဖြစ် သမီးတို့ဖြစ်ဖြစ် ဘယ်သူမဆို ယောင်္ကျားလေးနဲ့အတူရှိမလား မိန်းကလေးနဲ့အတူရှိမလားဆိုတာကို ရွေးချယ်နိုင်တဲ့အခွင့်အရေးရှိတာပဲဟာ… ပြီးတော့ ဘယ်သူ့ကိုမှမရွေးဘဲ လွတ်လွတ်လပ်လပ်နေလို့လည်းရသေးတယ်…ပါးကတော့ ဝတ္ထုတွေထဲက အချစ်ငှက်လေးတွေကိုလိုက်ခွဲတဲ့မိဘမျိုး ဖြစ်လို့မရဘူးနော်…"

ရှောင် : [ ဟုတ်တယ်…]

ချီရှောင်မင် : [ . ]

မိုးရွာပြီးတော့နေသာလာတယ် : [ ပါးကိုနောက်မှပြောပြတော့မယ်… အခုတော့ သမီးခန့်မှန်းမိတာကိုပဲ အရင်ပြောပါရစေဦး… ဒီရက်ပိုင်း ဟိုဟိုဒီဒီလိုက်တူးကြည့်ပြီးသိလာတာ ရှင်းရှင်းကပိုင်ရဲ့လို့ခေါ်တဲ့ကြယ်ပွင့်တစ်ယောက်နဲ့ အရမ်းရင်းနှီးတယ်တဲ့…"

ရှောင် : [ ပိုင်ရဲ့ကိုကြားဖူးတယ်…]

ချီရှောင်မင် : [ ငါလည်းကြားဖူးတယ် ]

မိုးရွာပြီးတော့နေသာလာတယ် : [ ပါးး ဘယ်မှာကြားဖူးတာလဲ…]

ချီရှောင်မင် : [ နွေဦးပွဲတော်ပြပွဲမှာလေ…]

မိုးရွာပြီးတော့နေသာလာတယ် : [ အာ… နေဦးဆက်ပြောလိုက်ဦးမယ်…ကြားလာတာတော့ ရှင်းရှင်းက ပိုင်ရဲ့ရဲ့ရှိုးပွဲတွေဆိုရင် ကိုယ်တိုင်သွားကြည့်တယ်တဲ့… သူ့အတွက်ဆိုရင် ပုံမှန်နေ့လည်စာဘူးတွေကိုပဲ စားလေ့ရှိပေမယ့် ပိုင်ရဲ့အတွက်ဆိုရင်တော့ အကောင်းဆုံးအစားအသောက်ကိုမှ မှာပေးတာတဲ့…ပြီးတော့ ပိုင်ရဲ့ကိုညဘက်မှာငါးပြတိုက်ကိုလည်း လည်ဖို့ခေါ်သွားပေးသေးတယ်…ဘယ်လိုပဲဖြစ်ဖြစ် ရှင်းရှင်းက ပိုင်ရဲ့အပေါ်အရမ်းကိုကောင်းနေတာ…ဒါကြောင့် သမီးထင်တာတော့ သူပိုင်ရဲ့ကိုသဘောကျနေတာနေမယ်…]

အဖေချီနှင့် အစ်ကိုကြီးတို့မှာ ဆွံ့အသွားရသည်။

ငါနည်းနည်းတော့မနာလိုဖြစ်မိသလိုပဲ…

ချီရှောင်မင် : [ မျိုးရိုးပိုင်နဲ့ကလေးရဲ့အကျင့်စရိုက်ကဘယ်လိုမျိုးလဲ…]

မိုးရွာပြီးတော့နေသာလာတယ် : [ ဒါတော့သေချာမသိဘူး…]

ရှောင် : [ ကျွန်တော်လည်း မပြောတတ်ဘူး… သူ့ကိုအရင်တုန်းက ကုန်ပစ္စည်းကြော်ငြာပေးဖို့လုပ်ခဲ့ဖူးပေမယ့် အလုပ်မဖြစ်လိုက်ဘူး… ဘယ်လိုပဲဖြစ်ဖြစ် ရှင်းရှင်းရဲ့ဆုံးဖြတ်ချက်ကိုတော့ ယုံပါတယ်…]

ချီရှောင်မင်ခဏမျှတွေးလိုက်ပြီးနောက် စာရိုက်လိုက်သည် : [ ယုံကြည်တယ်ဆိုတာက ကမ္ဘာပေါ်မှာ အသုံးမဝင်ဆုံးခံစားချက်ပဲ…ငါကတော့ ကိုယ်မြင်ရတာကိုပဲယုံတာ… ဘာလို့များသူ့ကိုကိုယ်တိုင်သွားမကြည့်ရမှာလဲ…]

ချီယွီကျီး သူ့ကိုအလျင်အမြန်တားမြစ်လိုက်သည် : [ မသွားနဲ့နော် ပါး တော်ကြာသူ့ကိုခြောက်မိသွားဦးမယ်…]

ချီရှောင်မင်မှာ ပြည်တွင်းပြည်ပရှိစီးပွားရေးအသိုင်းအဝိုင်းများတွင် နှစ်ပေါင်းများစွာ ကျင်လည်ကျက်စား‌ခဲ့သူဖြစ်ပြီး စီးပွားရေးနှင့်နိုင်ငံရေးလောက၏ထိပ်သီးပေါင်းမျိုးစုံနှင့် ပေါင်းသင်းဆက်ဆံဖူးသူဖြစ်လေရာ သူ၏အမူအယာမှာ အလွန်ပင်လေးနက်နေသည်။

တကယ်ကိုပင် သူသည်အလေးအနက်ထားတတ်သောလူတစ်မျိုးဖြစ်ပြီး သူ၏ကလေးများကိုမူ အလွန်ကြင်နာတတ်လေသည်။ အကယ်၍သာ ချီရှောင်မင် ပိုင်ရဲ့ကို အလောတကြီးသွားတွေ့မိလိုက်ပါက သူ၏သမက်လောင်းလေးကို ခြောက်လှန့်မိသွားနိုင်သည်။

ရှောင် : [ ဘာလို့ကျွန်တော်မသွားရမှာလဲ…]

ရှောင် : [ ရှင်းရှင်း ရိုက်ကူးရေးကိုပြန်သွားရတဲ့အချိန်ကြရင် သူ့စီသွားလည်ပြီး ပိုင်ရဲ့ဘယ်လိုလဲဆိုတာပါ အကဲခတ်ခဲ့မယ်…]

ကျန်သူနှစ်ဦးမှာလည်း ၎င်းကိုအကြံကောင်းဟုထင်နေကြသည့်အတွက် အချင်းချင်းအကြည့်များဖလှယ်လိုက်ပြီးနောက် တိတ်တခို

းလက်မထောင်ပြလိုက်ကြသည်။

" ပါး.. ကော.. ကျဲ…" ချီရှင်းချန် သူတို့သုံးယောက်မစားသေးသည်ကို မြင်လိုက်ရသောကြောင့် သိချင်စိတ်ဖြင့်မေးလိုက်မိသည် " ဗိုက်မဆာကြလို့လား…"

" အိုက်ယိုးးး ဆာတာပေါ့ အခုစားကြရအောင်…"