အပိုင်း ၄၄ ( The Star 5 )

ယန်ကျင်းဇီ၏ပရိသတ်များနှင့် ကျွမ်းကျင်သော ကြေးစား ရေတပ်အမည်းရောင်အဖွဲ့၏ ကျေးဇူးများကြောင့် ဤရသစုံရှိုးသည် ပို၍ပင် လူကြိုက်များလာသည်။

ရသစုံရှိုး "Dream Back to the Ancient" သည် တော်တော်လေး ဆန်းသစ်တီထွင်ထားသည့် ရသစုံရှိုး ဖြစ်သော်လည်း အဆုံးမှာတော့ ၎င်းသည် ထုတ်ဝေမှုနှစ်ကြိမ်သာ ရိုက်ကူးရသေးပြီး လူအများအပြားသည် ယခင်က ဤရသစုံရှိုး ရှိလို့ရှိမှန်းပင် မသိခဲ့ကြပေ။

ရှိုးက ယန်ကျင်းဇီကို ဖိတ်ခေါ်ရာတွင် ငွေအမြောက်အများ သုံးစွဲခဲ့သည်မှာ ရှိုးကို ကြော်ငြာပြီး လူအသွားအလာကို ဆွဲဆောင်ရန်လည်း ဖြစ်သည်။

ထို့ကြောင့် ယခုအခါ ဤရသစုံရှိုးသည် အင်တာနက်ပေါ်တွင် လူသိများသွားပြီဖြစ်သည်။

ပရိုဂရမ်အသင်းသည် ကြီးမားသော လူအသွားအလာများကို မြင်ပြီး အံ့ဩဝမ်းသာဖြစ်သွားခဲ့ကြသည်။ သူတို့သည် ယန်ကျင်းဇီနှင့်ကျီချန်းရှိူ့တို့ကို အချင်းချင်း ခပ်ဝေးဝေးနေရန် သတိသွားမပေးခဲ့ကြဘဲ အဲ့အစား အခြေအနေကို အခွင့်ကောင်းယူကာ ကြော်ငြာအချို့ကို လက်ခံလိုက်သည်။

အမှန်ဆို သူတို့နှစ်ယောက်က နီးနီးကပ်ကပ် နေ နေကြပေမယ့်လည်း သူတို့ ကင်မရာအောက်မှာ မလုပ်သင့်တဲ့ အရာတွေကို တကယ် မလုပ်လောက်ကြပါဘူးနော်...ဟုတ်တယ်မလား?

ရှိုးသည် ဧည့်သည်များကို နောက်ကွယ်မှာ သီးသန့်ဂရုစိုက်သော်လည်း လူမြင်ကွင်းမှာ သူတို့ကို လူးလှိမ့်ခံစားခိုင်းသည့်နေရာတွင်တော့ အရမ်းတော်နေသေးသည်။

ဧည့်သည်များက သူတို့ ချက်ထားသော ဟင်းများကို မစားဘဲ နေ၍ရသော်လည်း သူတို့ ချက်ပြုတ်နေရဆဲ ဖြစ်သည်ဟုသာ ဆိုကြပါစို့။

ရွှံ့မီးဖို၊ သံအိုးကြီးကြီးများ၊ ဖျော့တော့မှေးမှိန်စွာ လောင်ကျွမ်းနေသော ထင်းမီး...

ငယ်ငယ်လေးကတည်းက လယ်အလုပ် လုပ်လာခဲ့သည်ဟု အမြဲပြောသော မာဟုန်ရှင်းတောင်မှ ဒါကို သည်းမခံနိုင်ပေ။

ဒါပေမယ့် ကျီချန်းရှိူ့က အချိန်မဖြုန်းဘဲ မီးစမွှေးသည်။

" ဆရာကျီက ဒါကိုလည်း လုပ်တတ်တာပဲလား? " ယန်ကျင်းဇီက ကျီချန်းရှိူ့ဘေးတွင် ထိုင်နေရင်း မေးသည်။

" တစ်ခါ ငါတို့ တောင်ထူထပ်တဲ့ဒေသမှာ ရုပ်ရှင်ရိုက်တုန်းက ငါတို့အားလုံး ဟင်းချက်ဖို့အတွက် ဒီလိုမြေမီးဖိုတွေကို အသုံးပြုခဲ့ရတာဆိုတော့ ငါ နည်းနည်း သင်ထားခဲ့တာ။ " ကျီချန်းရှိူ့က ဖြေသည်။

" အဲ့တာ 'The Outreach' ရိုက်တုန်းကလား? " ယန်ကျင်းဇီက ထပ်မေးသည်။

ကျီချန်းရှိူ့ကို စိတ်ကျေနပ်စေရန်အတွက် မူလပိုင်ရှင်သည် ကျီချန်းရှိူ့၏ ရုပ်ရှင်အားလုံးကို ကြည့်ပြီးသားဖြစ်သည်။

" ဟုတ်တယ်။ " ကျီချန်းရှိူ့က ပြန်‌ဖြေသည်။

" စီနီယာက ခြေထောက်တစ်ဖက် ဒဏ်ရာရနေရင်းနဲ့တောင် စီနီယာရဲ့ကျောင်းသားတစ်ယောက်ကို သယ်ပြီး မြစ်ကိုဖြတ်ကူးတဲ့အခန်းကို ကျွန်တော် အကြိုက်ဆုံးပဲ။ ဆရာကျီ အဲ့အခန်းမှာ တော်တော်လေး သရုပ်ဆောင်အရမ်းကောင်းတယ်! " ယန်ကျင်းဇီက ချီးကျူးခဲ့သည်။

ကျီချန်းရှိူ့က ရယ်သည် : " တကယ်တော့ အဲ့တုန်းက ငါ ခြေထောက်တကယ်နာနေတာ။ "

မြေသားမီးဖိုနောက်တွင် စုတ်ပြတ်နေသော တပ်ဝတ်စုံများ ဝတ်ဆင်ထားသော အမျိုးသားနှစ်ဦးသည် တည်တည်ငြိမ်ငြိမ် စကားပြောနေကြပြီး အသက်ပိုငယ်သော တစ်‌ယောက်က အကြီးဖြစ်သူကို တစ်စုံတစ်ရာသော ကြင်နာမှုဖြင့် သေချာကြည့်နေသည်။

မှတ်ချက်များကို ပိတ်ထားသူများမှာ မနေနိုင်ဘဲ သူတို့၏အတွေးများကို မှတ်ချက်နေရာတွင် လာရောက်ဖော်ပြကြသည် : "သူတို့ကို ကြည့်ရတာ အရမ်းနွေးထွေးတယ်။"

"ငါ ဆရာတစ်ယောက်ရဲ့ လေ့ကျင့်ရေးကျောင်းကို သွားခဲ့ဖူးပြီး ငါတို့ The Outreach ဆိုတဲ့ အဲ့ဒီ့ရုပ်ရှင်ကားကို ကြည့်ခဲ့ကြတယ်။ ရုပ်ရှင်ကြည့်ရင်း ငါ ကလေးတစ်‌ယောက်လို ငိုခဲ့သေးတယ်။ ငါ့ကျောင်းက တခြားလူတွေ တော်တော်များများ အဲ့ရုပ်ရှင်ကိုကြည့်ပြီး ဒေသပြောင်းပရဟိတ‌အစီအစဉ်မှာ ပါဝင်ဖို့ အရမ်းတက်ကြွခဲ့ကြတာ... ကံ‌မကောင်းတာက ငါက တစ်ကိုယ်ကောင်းဆန်တဲ့လူ ဆိုတော့ ငိုပဲ ငိုရဲပြီး မသွားရဲခဲ့ဘူး။"

"ငါ The Outreach ကို ကြည့်ဖူးတယ်... ကျီချန်းရှိူ့ သရုပ်ဆောင်တာ တကယ်ကောင်းတယ်။"

"သူ့ရဲ့ လူသစ်တွေနဲ့ မပြောနိုင်တဲ့ စည်းမျဉ်းတွေ ဆိုတာ မှန်ပါ့မလား ငါ မသိဘူး..."

…

လူတိုင်း စကားပြောနေကြစဉ် တိုက်ရိုက်ကင်မရာသည် အခြားတစ်ယောက်စီသို့ လှည့်သွားခဲ့သည်။

"!!!" နောက်ထပ်တိုက်ရိုက်ထုတ်လွှင့်ချက်တွေအတွက်၊ နောက်ထပ်တိုက်ရိုက်ထုတ်လွှင့်မှုအခန်းတွေအတွက် ဒူးထောက်တောင်းဆိုပါတယ်!

မီးဖိုချောင်တွင် ဟင်းချက်ရာ၌ အသုံးပြုနိုင်သော ပစ္စည်းများမှာ ဆား၊ ဂျုံမှုန့်၊ ပဲပိစပ်တစ်ဗူးတို့သာ ဖြစ်ပြီး အသီးအရွက် စားချင်လျှင် အသီးအရွက်များကို ကိုယ့်ဘာသာကိုယ် ခူးယူတူးဆွရမည်ဖြစ်သည်။

" ခေါင်းဆောင် စားစရာက မနည်းလွန်းဘူးလား? " ဧည့်သည်များက အစီအစဉ်တင်ဆက်သူကို အားကိုးရာမဲ့စွာ ကြည့်သည်။

အစီအစဉ်တင်ဆက်သူက ပါးစပ်ထဲတွင် ကောက်ရိုးတစ်စကို ကိုက်ဝါးနေဆဲပင် : " ငါ မင်းတို့အတွက် ပိုက်ကွန်လည်း ဖွင့်ပေးထားပြီးပြီ။ မင်းတို့ကို ဆားလည်း ပေးပြီးပြီ။ ငါတို့တပ်တန်းလျားမှာ အရင်က ဆား ခဏအဖြတ်ခံရသေးတယ်! "

" ဆားကို ဖြတ်ပစ်မှာလား? " ဧည့်သည်များ အံ့ဩသွားကြသည်။

တရားဝင်ဆားသည် ခေါင်းပုံဖြတ်မှု အဆင့်ဆင့်ကို ဖြတ်သန်းပြီးနောက် အရမ်းဈေးကြီးလွန်းသဖြင့် ရှေးခေတ်ကာလ အချို့နေရာများတွင် ပြည်သူများက ဆားကို ဝယ်မစားနိုင်ကြချေ။ ဒါပေမယ့် တပ်စခန်းတွေမှာတော့ လုံလောက်သင့်တယ် မဟုတ်ဘူးလား?

" ရောင်းဖို့ ဗိုလ်ကြီးက ယူသွားပြီ။ " အစီအစဉ်တင်ဆက်သူက အေးဆေးစွာ ပြောသည်။

ဧည့်သည်များ : " ... "

အိုကေ၊ သူတို့မှာ ဆားကျန်သေးတာ ကံကောင်းတာပဲ။

သို့သော် ဆားတစ်ခုတည်းနှင့် ချက်၍ရသည်က ဝက်စာ ဖြစ်နေဆဲ... ဧည့်သည်များသည် သနားစရာကောင်းစွာ စားလိုက်ရသည်။

အစီအစဉ်တင်ဆက်သူက ဆိုသည် : " မင်းတို့ ဗိုက်ပြည့်အောင် စား။ မင်းတို့ဗိုက်ဝသွားရင် အကျန်တွေကို ယူပြီး ဝက်တွေကို ကျွေးလိုက်ကြဦး! "

" ဘာ? " လူတိုင်း အံ့ဩသွားကြသည်။

" အကျန်တွေကို ဝက်တွေကို ကျွေးလိုက်ကြဦး။ " အစီအစဉ်တင်ဆက်သူက ထပ်ပြောသည်။

" ငါတို့က ဝက်စာကျွေးရမယ်? ဝက်တွေက ငါတို့နဲ့ အစာတစ်ခုတည်း စားတာလား?! "

" ဝက်တွေက မင်းတို့ထက် တန်ဖိုးရှိတယ်။ အထက်လူကြီးတွေက မင်းတို့သေသွားတဲ့အခါ မလိုလားအပ်တဲ့ မေးခွန်းတွေ ထပ်မမေးဘူး။ ဒါပေမယ့် သူတို့က ဝက်တွေ သေရင်တော့ မေးတယ်! ငါတို့တန်းလျားမှာ ရှိတာမှ ဝက်ငါးကောင်တည်း ရှိတာ။ "

ဧည့်သည်များ : " ... "

ရသစုံရှိုးကို ကြည့်နေကြသူများ : " ဟားဟားဟားဟားဟားဟား! "

ကြည့်ရှုသူများသည် နောက်ထပ်ဇာတ်ကွက်အသစ်ကို အထူးတလည် စောင့်မျှော်နေကြပြီး ရလဒ်ကတော့... တိုက်ရိုက်ထုတ်လွှင့်မှုက ပြီးသွားသည်။

"!!!" ကြည့်ရှူသူထောင်ပေါင်းများစွာက နောက်ထပ်တိုက်ရိုက်ထုတ်လွှင့်ချိန်အတွက် တောင်းဆိုပါတယ်!

ဤရှိုးက ပို၍ပင် နာမည်ကြီးလာသည်။

လူတစ်စုက ယန်ကျင်းဇီသည် သရုပ်ဆောင်စွမ်းရည် ညံ့ဖျင်းကာ လိင်တူချင်းစိတ်ဝင်စားသူဟု ပြောရင်း ယန်ကျင်းဇီကို ပြင်းပြင်းထန်ထန် မကောင်းပြောကြသည်။

ယန်ကျင်းဇီ၏ပရိသတ်များက ဤလူများကို ပြန်ဆွဲဆိတ်ကြသည်။ သူတို့ကိုကိုက အလုပ်တအားကြိုးစားတာ အရမ်းသိသာတယ်!

အခြားဧည့်သည်များ၏ ပရိသတ်များနှင့် ရသစုံရှိုးများ၏ ပရိသတ်များသည် ရှိုးကို နေရာတိုင်းတွင် ကြော်ငြာကြလေသည်။

…

ရှိုးသည် hot search တွင် ချိတ်နေပြီး ကျ‌မသွားတော့ပေ။

ဒါရိုက်တာသည် တက်ကြွပျော်ရွှင်နေကာ ယန်ကျင်းဇီ၏ ရင်းနှီးမြှုပ်နှံမှုကို ရထားခါစ ဖြစ်၍ တိုက်ရိုက်ထုတ်လွှင့်ချိန်နှင့် တိုက်ရိုက်ထုတ်လွှင့်မှုများကို တိုးမြှင့်ရန် ချက်ချင်း ဆုံးဖြတ်လိုက်သည်။

ဒီနေ့လယ်ကစပြီး ဧည့်သည်နှစ်ယောက်က တိုက်ရိုက်ထုတ်လွှင့်ခန်းတစ်ခန်းကို မျှသုံးရမယ် ပြီးရင် တိုက်ရိုက်ထုတ်လွှင့်ခန်းသုံးခန်းကို တချိန်တည်း တိုက်ရိုက်ထုတ်လွှင့်မယ်!

သံသယရှိစရာမလိုစွာပင် ယန်ကျင်းဇီနှင့်ကျီချန်းရှိူ့တို့က တိုက်ရိုက်ထုတ်လွှင့်ခန်းတစ်ခန်းထဲ အတူကျသည်။ ကျန်းချင်းချင်းနှင့်ဟောင်မေ့တို့လည်း တိုက်ရိုက်ထုတ်လွှင့်ခန်းတစ်ခန်းတည်း အတူသုံးရပြီး လော့ချန်နှင့်မာဟုန်ရှင်းတို့သာ ကျန်ခဲ့သည်...

လော့ချန် : " အိုး! " ပရိုဂရမ်အသင်းက တအားဆိုးတယ်မလား? သာမန်မျက်စိဖြင့်ပင် သူတို့က ဒီမှာ လူကြိုက်အနည်းဆုံးဖြစ်ကြောင်း မြင်နိုင်သည်။

မာဟုန်ရှင်း : " အိုး! " လောင်ဇူက မကြောက်ဘူး။ လောင်ဇူက တခြားဧည့်သည်တွေကို လိုက်ရှာပြီး သူတို့ကို အံ့အားသင့်စေမယ်! တခြားတိုက်ရိုက်ထုတ်လွှင့်ခန်းကို ဝင်ပစ်မယ်!

ဧည့်သည်များသည် သူတို့၏ "ဝက်စာ"ကို ဝက်များအား ကျွေးသည့် ဗီဒီယိုကို ရိုက်ကူးပြီးနောက် ပရိုဂရမ်အသင်းက ပြင်ဆင်ပေးသော နေ့လယ်စာကို စားသောက်ကြသည်။

နေ့လယ်စာသည် အရသာသိပ်မကောင်းသော နေ့လယ်စာထမင်းဗူး ဖြစ်သော်လည်း မဆိုးရွားပါချေ။ ဗိုက်ပြည့်သွားကြသောအခါ အားလုံးက နေ့လယ်ခင်း တိုက်ရိုက်ထုတ်လွှင့်မှုကို စတင်ကြသည်။

သို့သော် သူတို့ ဤရှိုးတွင် ပါဝင်ရန် ဤနေရာအထိ ရောက်လာပြီးပြီဖြစ်ရာ သူတို့ စိတ်နှစ်ပြီး ကြိုးစားရပေမည်... တိုက်ရိုက်ထုတ်လွှင့်မှု စတင်သောအခါ ဧည့်သည်များမှာ ဗိုက်ဆာပုံပေါ်နေကြသည်။

ယန်ကျင်းဇီသည် သူ့စိတ်ကို ပြင်ဆင်ပြီးသွားပြီဖြစ်သဖြင့် သူ ကောင်းမွန်စွာ သရုပ်ဆောင်နိုင်လိမ့်မည်... သူက ကျီချန်းရှိူ့ကို ကြည့်လိုက်သည် : " အစ်ကိုကျီ ကျွန်တော် ဗိုက်ဆာတယ်... "

ကျီချန်းရှိူ့ : "!!!" 'အစ်ကိုကျီ' ဆိုတဲ့ အခေါ်အဝေါ်က သူ့ကို သူ့တည်ငြိမ်မှုပါ ဆုံးရှုံးစေတော့မလို့!

သူ ကောင်းကောင်းတောင် မထိုင်နိုင်တော့ဘူး... ကျီချန်းရှိူ့က ဆိုသည် : " ငါ မင်းကို စားစရာအချို့ လုပ်ပေးမယ်။ "

" လုပ်နိုင်တာ တစ်ခုခု ရှိလား? " ယန်ကျင်းဇီက မေးသည်။

" ပဲပိစပ်ကြော်? " ကျီချန်းရှိူ့က တုံ့ဆိုင်းနေသည်။

" ဆီမပါဘဲ ဘယ်လိုကြော်မလဲ? "

" တကယ်ဆို ဆီမပါဘဲ ကြော်လို့ရတယ်။ " ကျီချန်းရှိူ့က ဆိုသည်။ သူသည် မီးဖိုချောင်ထဲမှ ပဲပိစပ်များကို ထုတ်လာကာ ရေဆေးသည်၊ မီးမွှေးပြီး ဒယ်အိုးအလွတ်တစ်လုံးထဲ ထည့်ကာ အခြောက်ကြော်သည်။ ခဏတစ်ဖြုတ် ကြာပြီးနောက် ပဲပိစပ်များ၏ မျက်နှာပြင်မှာ အနည်းငယ် တူးချစ်သွားပြီး အနံ့ထွက်လာသောအခါ သူက ဆားရည်အချို့ကို လောင်းထည့်လိုက်သည်။

ပဲပိစပ်များ အခြောက်ကြော်ဖြစ်သွားသည့်အထိ ဆက်လက်ပြီး မွှေကြော် ကြော်ပေးပြီးလျှင် သူတို့ကို စားသုံးနိုင်ပါပြီ။

" ပဲပိစပ်ကို အလွန်အကျွံ စားတာက မင်း ဗိုက်ကို လေပွစေတယ်။ ဒါကြောင့် မင်း လျှော့စားပါ။ " ကျီချန်းရှိူ့က ယန်ကျင်းဇီအား ပဲပိစပ်ကြော်တစ်ပန်းကန် ပေးသည်။

အခြားဧည့်သည်များသည် အခန်းထဲသို့ ပြေးဝင်ကာ ပဲပိစပ်များကို စတင်လုယူကြပြီး နောက်ထပ် ဒရမ်မာများပါ ထပ်ထည့်ကြသည်။

အစီအစဉ်တင်ဆက်သူပင်လျှင် ရောက်လာပြီး ပဲပိစပ်တစ်ပန်းကန်စာ ခပ်ယူပြီး စားနေသည် : " ဒါနဲ့ မင်းတို့ တောင်ပေါ် ကင်းလှည့်သွားရမယ့်အချိန် ရောက်ပြီ! သွားရအောင်! "

" ခေါင်းဆောင် ခဏနေရင် ညစာ စားရတော့မယ်။ ဒီအချိန်မှာ ဘာလို့ ကျွန်တော်တို့ကို တောင်ပေါ်မှာ ကင်းလှည့်ခိုင်းရတာလဲ? "

အစီအစဉ်တင်ဆက်သူက ရှင်းပြသည် : " တကယ်တော့ မင်းတို့ စောစောကတည်းက ကင်းလှည့်ရမှာ။ ဒါပေမယ့် မင်းတို့နောက်လိုက်နိုင်တဲ့ ကင်မရာသမားက အခုမှ ရောက်လာတာ။ "

" အိုကေ... " ဧည့်သည်များသည် ပဲပိစပ်များကို ကိုင်ထားရင်း တောင်ပေါ် ကင်းလှည့်ရန် ထလာကြသည်။

အစီအစဉ်တင်ဆက်သူသည် အလွန်စိတ်မကျေမနပ် ဖြစ်သွားသည် : " မင်းတို့က ဘာဖြစ်နေတာလဲ? တောင်ပေါ် ကင်းလှည့်သွားတာ စားစရာတွေ ယူလာတယ်! ကြိမ်ဒဏ်ပေးခံရမှာ သတိထားကြ! "

" အရိုက်ခံရမယ်ဆိုရင်တောင်မှ စားစရာယူသွားမှာ! " မကြာသေးမီက ညံ့ဖျင်းသော အလုပ်ကြောင့် အဝတ်အစားတစ်ခုလုံး အရှိုးရာများနှင့် ခြယ်သခံထားရသော ကျန်းချင်းချင်းက လုံးဝ မကြောက်ပေ။

" ကျွန်တော်တို့တပ်စခန်းက တော်တော်လေး ‌ဗရုတ်သုတ်ခ ဖြစ်နေပြီကို ခေါင်းဆောင်က ကျွန်တော်တို့ကို စည်းမျဉ်းတွေအကြောင်း ပြောနေတုန်းပဲလား? " မာဟုန်ရှင်းက ထေ့ငေါ့စွာ ပြောသည်။

" ခေါင်းဆောင်လည်း ပဲပိစပ်တွေ စားနေတာပဲလေ။ " ယန်ကျင်းဇီက ပြုံးသည်။

နောက်ဆုံးတော့ လူများသည် သူတို့၏ ပဲပိစပ်များနှင့်အတူ ကင်းလှည့်ကြသည်။

ကျီချန်းရှိူ့တစ်ယောက်တည်းသာ ပဲပိစပ်များ ယူမလာဘဲ တံစဉ်တစ်ချောင်းကို ယူလာသည်။

ဖြစ်ရပ်များက သူ၏ချဉ်းကပ်မှုမှာ အလွန်မှန်ကန်ကြောင်း သက်သေပြခဲ့သည်။ တောင်တက်လမ်းများသည် သွားလာရမလွယ်ကူဘဲ သူတို့ကဲ့သို့သော လူများမှာ လမ်းမလျှောက်နိုင်ပေ။ တံစဉ်တစ်ချောင်း ရှိသည်က ပိုအဆင်ပြေသည်။

" ဆရာကျီ၊ ဘာလို့ တံစဉ်ယူလာဖို့ စဉ်းစားခဲ့တာလဲ? " လော့ချန်က မေးသည်။

" ရုပ်ရှင်ရိုက်ရင်းနဲ့ သူ ဒီလိုအခြေအနေမျိုး ကြုံဖူးခဲ့တာ ဖြစ်မယ်။ " ယန်ကျင်းဇီက ကူဖြေပေးသည်။

ကျီချန်းရှိူ့ ပြုံးသွားသည်။ တကယ်လည်း ထိုအကြောင်းအရင်းကြောင့် ဖြစ်သည်။

တိုက်ရိုက်ထုတ်လွှင့်မှုမှာ ဆက်လက်ထုတ်လွှင့်နေပြီး ပိုပိုများသော လူများ ရောက်လာကြသည်။

"ဒီရသစုံရှိုးက တော်တော်ကောင်းတယ်။"

"ရုတ်တရက် ငါ ယန်ကျင်းဇီရဲ့ ချောမောတဲ့ ပုံစံကို မြင်လိုက်ရတယ်။"

"စောစောက ယန်ကျင်းဇီက သူ ဗိုက်ဆာတယ်လို့ အော်နေတယ်။ သူ မြှူဆွယ်နေတာလား?"

"ကျီချန်းရှိူ့က ယန်ကျင်းဇီကို တကယ် အလိုလိုက်နေတာပဲ!"

"ငါ၊ ငါ အရင်က ယန်ကျင်းဇီကို မကြိုက်ဘူး။ ဒါပေမယ့် ငါ အခု သူနဲ့ ကျီချန်းရှိူ့တို့ရဲ့ CP ပရိသတ် ဖြစ်နေပြီ!"

"barrage နဲ့ ကောမန့်တွေက ဘာဖြစ်နေကြတာလဲ! လူတွေအများကြီးက ကြိမ်းမောင်းနေကြတာဟ!"

"လူတွေအများကြီးက ယန်ကျင်းဇီကို ကြိမ်းမောင်းနေတာကို မြင်ရတော့ ငါ သူ့ကို နည်းနည်းသနားမိတယ်။ ဒါပေမယ့် သူ့ပရိသတ်တွေ ကျိန်ဆဲနေတာကို မြင်ရတော့ အာ... ငါ့မှာ သနားစိတ် လုံးဝ မရှိတော့ဘူး!"

"ညီအစ်ကိုတို့၊ ညီအစ်မတို့ရေ! ကောမန့်နေရာကို မကြည့်ကြနဲ့တော့!"

"ယန်ကျင်းဇီကို အာရုံစိုက်နေကြတာ ရပ်လိုက်ရအောင်။ ကျန်းချင်းချင်းနဲ့ဟောင်မေ့တို့က အရမ်းလှတာပဲ!"

…

ပထမဆုံး တိုက်ရိုက်ထုတ်လွှင့်မှုတွင် ယန်ကျင်းဇီသည် ကျီချန်းရှိူ့နှင့် တွင်းတစ်ခုတည်းတွင် အိပ်ခဲ့သည်။ နောက်ထပ် တိုက်ရိုက်ထုတ်လွှင့်မှုတွင် သူသည် ကျီချန်းရှိူ့၏အနားကိုလည်း ‌လျှောက်လိုက်သည်။

ပြောစရာပင်မလို၊ ကျီချန်းရှိူ့က သူ့ကို အရမ်းဂရုစိုက်သည်။

သူတို့နှစ်ဦး၏ CP ပရိသတ်များသည် တိတ်ဆိတ်စွာ ပေါ်လာသည်။

ရှိုးကို တစ်ပတ်ကြာ ရိုက်ကူးခဲ့ပြီး မျက်စိတစ်မှိတ်အတွင်း ငါးရက် ကုန်ဆုံးသွားခဲ့သည်။ ဤအချိန်တွင် ကျီချန်းရှိူ့သည် သူ့အဖေထံမှ ဖုန်းကို လက်ခံရရှိခဲ့ပြန်သည်။

" ချန်းရှိူ့ မင်းနဲ့ယန်ကျင်းဇီတို့ရဲ့ ဓာတ်ပုံတွေကို ဘယ်သူ ထုတ်တာလဲ ငါ ရှာတွေ့ပြီ။ " အဖေကျီက ပြောသည်။

ကျီချန်းရှိူ့က မေးသည် : " ဘယ်သူလဲ? "

ဓာတ်ပုံများ ပထမဆုံး ထွက်လာသောအခါ ကျီချန်းရှိူ့သည် အရမ်းဂရုမစိုက်ခဲ့ပေ။ သူကိုယ်တိုင်လည်း သူ၏ လိင်စိတ်တမ်းညွှတ်မှုအကြောင်းကို အများပြည်သူ မသိအောင် ဖုံးကွယ်ထားရန် ရည်ရွယ်ချက် မရှိသော်ငြား ယန်ကျင်းဇီ ထိခိုက်မည်ကို သူ စိုးရိမ်သဖြင့် သူ လူများကို ရှာခိုင်းထားခဲ့သည်။

ဘယ်သူက သူ့ကို ကိုင်တွယ်ဖြေရှင်းချင်နေမှန်း သူ သိထားရမည်။

" အဲ့ဒါ ယန်ကျင်းဇီ။ " အဖေကျီက ဆိုသည်။

တကယ်ဆိုလျှင် အဖေကျီသည် ယခုအခါ အလွန်ရှက်ရွံ့နေသည်။

သူသည် ဤရက်များအတွင်း အင်တာနက်ပေါ်ရှိ သတင်းများကို အာရုံစိုက်နေခဲ့ပြီး တိုက်ရိုက်ထုတ်လွှင့်မှုကို ကြည့်ခဲ့သည်။ ထို့‌နောက် သူသည် ယန်ကျင်းဇီက '‌ဆရာကျီ' ဟု တစာစာ ပါးစပ်အပြည့် ခေါ်ရင်း သူ့သားနောက်ကို တနေကုန် လိုက်နေသည်ကို သူ တွေ့လိုက်ရသည်။

ယန်ကျင်းဇီက တော်တော်ချောသည်။ ထိုသို့သော ရည်းစားကို ရှာထားသော သူ့သားမှာ အကျိုးမရှိခြင်းတော့ မဟုတ်ပါချေ။

အလွန်ဆိုးရွားစွာ ကြိမ်းမောင်းခံရသော ယန်ကျင်းဇီကို ကြည့်ကြဦး... သူ ယန်ကျင်းဇီကို အနည်းငယ် သနားမိပြီး သူ၏ ယန်ကျင်းဇီအပေါ် အမြင်မှာလည်း တိုးတက်ကောင်းမွန်လာသည်။

သို့သော် ဤအချိန်တွင် နမ်းနေသော ဓာတ်ပုံများကို ယန်ကျင်းဇီ ပို့လိုက်မှန်း သူ တကယ်ကြီး သိလိုက်ရသည်။

နမ်းတာ ဒါမှမဟုတ် လက်ကိုင်ထားတာ ဘယ်လိုဓာတ်ပုံတွေပဲဖြစ်ဖြစ် ဘယ်လိုလုပ် သူ့သားရဲ့မျက်နှာပဲ ရှင်းရှင်းလင်းလင်း ဓာတ်ပုံအရိုက်ခံထားရတော့ အဲ့ဓာတ်ပုံတွေနဲ့ပတ်သက်ပြီး တစ်ခုခု မူမမှန်ဘူးလို့ သူ ပြောနေတုန်းပဲရှိသေးတယ်!

လုပ်တဲ့သူက ယန်ကျင်းဇီတဲ့လေ!

သို့သော် ယခု... တစ်ခုခုတော့ မှားနေပြန်ပြီ။

ယန်ကျင်းဇီက သူ့သားကို အခြောက်လို့ နာမည်ဖျက်ပြီး ဘာလို့ ရှိုးမှာ သူ့သားနဲ့ တအား နီးနီးကပ်ကပ် နေ နေတာလဲ?

တကယ်ပဲ သူ ဘာလုပ်ဖို့ ကြိုးစားနေတာပါလိမ့်?