အပိုင်း ၆၇

🐹အခန်း ၆၇

 ဝူယိလေး၏ အပြန်ခရီးစဉ်

ကမ်းခြေသို့ ဦးတည်နေသော ထရပ်ကားပေါ်တွင် ထိုင်နေသည့်တိုင် အဝေးမှ နှုတ်ဆက်သံများအား ကြားနေရဆဲ ဖြစ်သည်။ ခွဲခွာရခြင်း၏ ဝမ်းနည်းမှုမှာ ထရပ်ကားပေါ်ရှိ လေထုအား မွန်းကြပ်လာစေသည်။

နင်ဖုန်း၏ မျက်လုံးများ အနည်းငယ် နီရဲနေသော်လည်း တိတ်ဆိတ်မှုအား ဖြိုခွင်းရန် ရယ်မောရင်း ပြောလိုက်သည်။

“သူတို့အဲလိုအော်နေမှတော့ အနီးအနားမှာရှိတဲ့ ဇွန်ဘီတွေကို ဆွဲဆောင်မိမှာ သေချာတယ်..”

သွမ့်ဝမ်ယွီသည် နင်ဖုန်း၏ ခေါင်းလေးအား လက်ဖြင့်အသာပွတ်လိုက်ပြီးနောက် ပြောလိုက်သည်။

“ကျီးကန်းပါးစပ် မဖြစ်စေနဲ့ကွ..”

တဖြည်းဖြည်း ဝေးကွာလာသော ဟိုင်ချန်အခြေစိုက်စခန်းအားကြည့်ကာ မော့ယန်နှင့် ပိုဆီယာသည်လည်း ပုံမှန်မဟုတ်သော စိတ်ဓါတ်ကျမှုနှင့် မသက်မသာဖြစ်မှုအား ခံစားရလေသည်။

ယနေ့တွင် ရှောင်ဝူယိသည် ဟမ်းစတားအသွင်သဏ္ဌာန်ဖြင့် နျဲ့ရှောင်၏ အိတ်ကပ်အတွင်းဝင်ကာ လူတိုင်းအား ကြည့်နေလေသည်။ ဒေါက်တာ ဝေ့ဟန်မင်၊ ပိုင်ယွဲ့နှင့် အခြားသိပ္ပံပညာရှင်များသည် ရှောင်ဝူယိ၏ နတ်သားလေးဟူသော အထောက်အထားကြောင့် အံ့အားသင့်သွားကြသော်လည်း ရေသူမျိုးနွယ်နှင့် သွေးစုပ်ဖုတ်ကောင်မျိုးနွယ်တို့၏ တည်ရှိမှုအား သိရှိထားပြီးနောက်တွင် သိပ္ပံနည်းကျ မဟုတ်သော မှော်မျိုးနွယ်များ၏ တည်ရှိမှုအားလည်း လက်ခံလာနိုင်ကြသည်။

ယခုအချိန်တွင် လူများစုသည် သိပ္ပံပညာရပ်အား စူးစမ်းလေ့လာလိုသော စိတ်ဝိညာဉ်အား လက်ကိုင်ထား၍ ဇွန်ဘီများအား မောင်းထုတ်နိုင်သော ဆစ်စလို၏ အသံလှိုင်းစွမ်းရည်အား အပြင်းအထန် လေ့လာလျက်ရှိသည်။

ဆစ်စလို၏ အသံလှိုင်းအား တုပနိုင်မည်ဆိုလျှင် လူသားများအတွက် အဓိကအခက်အခဲအား ဖြေရှင်းနိုင်မည် ဖြစ်သောကြောင့် အကျိုးကျေးဇူး များပေမည်။

ဆစ်စလိုမှာ လူပေါင်းများစွာ၏ ဝိုင်းရံထားခံရသောကြောင့် ငိုချင်လာသော်လည်း မျက်ရည်ကျမလာသဖြင့် သူ၏ ခန္ဓာကိုယ်လေးကိုသာ တင်းတင်းကြပ်ကြပ် ဖက်တွယ်ထားလိုက်သည်။

“ခင်ဗျားတို့ ငါ့ကို စမ်းသပ်ခန်းထဲက ဝက်တစ်ကောင်လို့ ဆက်ဆံလို့မရဘူးကွ.. အသိဉာဏ်ရှိတဲ့ သက်ရှိတွေကို စမ်းသပ်တာ တရားမဝင်တဲ့အပြင် ရာဇဝတ်မှု ကျူးလွန်နေတာပဲ.. မျိုးနွယ်တိုင်းမှာ ညီမျှမှုဆိုတာ ရှိတယ်.. သွေးစုပ်ဖုတ်ကောင်တွေမှာလည်း လူ့အခွင့်အရေး ရှိတယ်လို့.. ငါ့ရဲ့ အသံလှိုင်းကို စမ်းသပ်ဖို့ ခင်ဗျားတို့နဲ့ ပူးပေါင်းပေးနိုင်တယ်.. ဒါပေမဲ့ ငါ့ကို အသက်အန္တရာယ် မပြုရဘူး..”

ပိုင်ယွဲ့သည် ထိုကလေးလေးအားကြည့်ကာ သဘောတကျ ရယ်မောမိသည်။ 

“စိတ်မပူပါနဲ့.. ငါတို့က လူမဆန်ဘဲ သိပ္ပံကြောင် ကြောင်နေတဲ့သူတွေ မဟုတ်ပါဘူး.. မင်းကို နာကျင်အောင် မလုပ်ဘူးနော်.. ဒါပေမဲ့ မင်းက ရုပ်ရှင်တွေထဲက သွေးစုပ်ဖုတ်ကောင်တွေနဲ့ နည်းနည်းလေးတောင် မတူဘူးဘဲ.. အရမ်းချစ်စရာကောင်းတယ်.. ဟားဟားဟား..”

“ဟွန့် သေချာတာပေါ့.. အဲဒါတွေက မင်းတို့လူသားတွေ အကြားသက်သက်နဲ့ လျှောက်ပြောထားတဲ့ ယုံတမ်းစကားတွေပဲကို..”

ဆစ်စလိုသည် သူ၏ပါးစပ်သေးသေးလေးဖြင့် တတွတ်တွတ် ချေပလေသည်။

“ဒီလိုပြောတော့ မင်းတို့မှာ တခြားမျိုးနွယ်တွေ ရှိနေသေးတာလား..”

နင်ဖုန်းသည် မော့ယန်နှင့် ပိုဆီယာအား ကြည့်လိုက်ပြီးနောက် သိချင်စိတ်အပြည့်ဖြင့် မေးလေသည်။

ဆစ်စလိုသည် မည်သို့ဖြေရမည်အား မသိချေ။ မဝံ့မရဲဖြင့် ပြောလေသည်။

“ရှိတယ်.. ဒါပေမဲ့ ခင်ဗျားတို့က သူတို့ကို မမြင်ရဘူး.. ငါလည်းပဲ သူတို့ကို အခု မမြင်ရဘူး..”

ထိုစကားအား ကြားသည့်အခါ နင်ဖုန်းသည် ဆစ်စလို၏ ဝမ်းနည်းဖွယ် အမှတ်တရအား ထိလိုက်မိသည်ဟု တွေးမိပြီးနောက် တောင်းပန်စကားဆိုလိုက်သည်။ ထို့နောက် ရှက်ရွံ့စွာဖြင့် ပါးစပ်ပိတ်ပြီး မေးမြန်နေမှုအား ရပ်တန့်လိုက်သည်။

လူသားမျိုးနွယ်သည် ယခုအချိန်၌ အလွန်အခက်ကြုံနေရသည်။ ကမ္ဘာပေါ်တွင် ပုန်းအောင်းနေသော အခြားမျိုးစိတ်အနည်းငယ် ရှိနိုင်သော်လည်း ကမ္ဘာပျက်ကပ်ကပင် ၎င်းတို့အပေါ် ကြီးမားသော အကျိုးသက်ရောက်မှု ဖြစ်စေနိုင်သည်။

ဆစ်စလိုသည် အတွေးနယ်ချဲ့နေကြသူများအား မြင်သည့်အခါ ချက်ချင်းပင် တစ်ခုခု ပြောချင်လာမိသော်လည်း ရပ်တန့်လိုက်သည်။ သူ၏ မိဘများမှာ သွေးစုပ်ဖုတ်ကောင် ဂြိုလ်ပေါ်တွင် အလွန်ပျော်ရွှင်စွာ ရှိနေကြကြောင်း ပြောချင်မိသည်။

တောင်းပန်ပါတယ် ပါပါးနဲ့ မာမား.. အခုလက်ရှိမှာတော့ သားကိုယ်သား မိဘမဲ့လို့ပဲ ခံယူလိုက်ပါတော့မယ်..

မော့ယန်နှင့် အခြားသူများသည်လည်း “မျိုးနွယ်များ ရှင်းလင်းသုတ်သင်ခံရ” သကဲ့သို့ ဟန်ဆောင်ရင်း သက်ဆိုင်ရာဂြိုလ်အသီးသီးအား “တောင်းပန်ပါတယ်” ဟု စိတ်ထဲမှ အကြိမ်ကြိမ် ရေရွတ်နေမိကြသည်။

ဟမ်းစတားလေးသည် အပြစ်ရှိစိတ် ဖြစ်ပေါ်နေကြသူများအား မြင်သည့်အခါ မျက်တောင်ခတ်လိုက်ပြီး ပျော်ရွှင်မှုကိုသာ ခံစားမိသည်။ လူတိုင်း ဝမ်းနည်းနေသည်မှာ သိသာထင်ရှားသော်လည်း သူ မည်သိုမျှ မခံစားရပေ။

****

ထိုအချိန်တွင် ကျယ်ပြန့်သော ကြယ်ပင်လယ်ကြီးထဲ၌ သေးငယ်ပြီး ကွဲပြားခြားနားသော အဆောင်အယောင်များရှိသည့် ခြေရာခံ စစ်သင်္ဘောများသည် တူညီသော ဂြိုလ်ပတ်လမ်းပေါ်တွင် မတော်တဆ တွေ့ဆုံမိကြသည်။

ကြယ်တာယာ၏ ကာကွယ်ခံနယ်မြေဖြစ်သာ ဤနေရာ၌ အမှတ်မထင် တွေ့ဆုံရခြင်းသည် သင်္ဘောပေါ်ရှိ ဂြိုလ်အသီးသီးမှလူများအား မကောင်းမှုကျူးလွန်နေစဉ် လက်ဝယ်ဖမ်းမိခံရသကဲ့သို့ အပြစ်ရှိစိတ် ဖြစ်ပေါ်လာစေသည်။

အကာအကွယ်ပြုထားသော ဤကြယ်နယ်မြေ၏ အစွန်အဖျား ဒေသအား ချဉ်းကပ်မလာနိုင်စေရန် မဟာမိတ်ဥပဒေဖြင့် တားမြစ်ထားသည်။

မျိုးနွယ်စု အမျိုးမျိုးမှ ပစ္စည်းဥစ္စာကြွယ်ဝကာ အစွမ်းထက် မိသားစုများမှ မင်းသားများနှင့် မိန်းမပျိုလေးများသည် နှစ်စဉ်နှစ်တိုင်း ကမ္ဘာမြေသို့ ခိုးဝင်လည်ပတ်လျက် ရှိကြသော်လည်း သူတို့၏ ကိုယ်ပိုင်လှုပ်ရှားမှုများအား သိုသိုသိပ်သိပ် ဖုံးဖိထားကြသဖြင့် မည်သူကမျှ မဖော်ထုတ်ဝံ့ကြပေ။ ပြဿနာကြီးကြီးမားမား ဖြစ်မလာသေးသရွေ့ ကြယ်မဟာမိတ်အဖွဲ့ဝင်နိုင်ငံများသည် ဤကိစ္စအား မမြင်ချင်ဟန်ဆောင်ကာ တိတ်တဆိတ် ခွင့်ပြုထားကြလေသည်။

ထိုအပြင် အချင်းချင်း တစ်ဦး၏ အားနည်းချက်အား ထုတ်ဖော်ပြောကြားခြင်း မရှိပေ။ သို့မဟုတ်လျှင် ဤလျှို့ဝှက်ခရီးသွားကိစ္စရပ်အား ဖော်ထုတ်မိသွားခဲ့မည် ဆိုပါက အဓိကဂြိုလ်ကြီးများမှ ဂုဏ်သရေရှိ မိသားစုများသည် ပြည်သူလူထု၏ ခွေးသွေးများဖြင့်ပက်ခြင်း ခံရလိမ့်မည်။

မည်မျှပင် တိတ်တဆိတ် လှုပ်ရှားစေကာမူ ဤကဲ့သို့ တစ်ဦးနှင့်တစ်ဦး မျက်နှာချင်းဆုံ တွေ့နေရခြင်းမှာ အတော်လေး မျက်နှာပူစရာပင်။

မော့ယန်၏ ဆက်သွယ်ရေးကိရိယာအား ရရှိပြီးနောက် ဝန်ကြီး အန်းယိသည် မော့ယန်၏ လက်ရှိအခြေအနေမှာ မကောင်းလှကြောင်း အလိုအလျောက် နားလည်လိုက်သည်။ သို့မဟုတ်လျှင် သူ၏ ဆက်သွယ်ရေးကိရိယာအား အရေးပေါ်အခြေအနေဖြင့် ပြန်လွှတ်လိုက်မည် မဟုတ်ပေ။ ထို့ကြောင့် အန်းယိ ချက်ချင်း ဆုံးဖြတ်ချက်ချကာ သူ၏ တာဝန်များအား တော်ဝင်မိသားစုမှ ယုံကြည်ရသည့် အကြီးအကဲများထံ လွှဲပြောင်းပေးခဲ့ပြီးနောက် ကိုယ်ပိုင်ခြေရာခံသင်္ဘောအား ယူဆောင်ကာ ကြယ်တာရာနယ်မြေသို့ တိတ်တဆိတ် လာရောက်ခဲ့ခြင်းပင်။

မော့ယန်၏ လက်ရှိအခြေအနေအား ထိခိုက်မည် စိုးသဖြင့် လူသိရှင်ကြား ကြေငြာချက် မထုတ်ပြန်ဝံ့ချေ။

သို့သော်လည်း ရေသူမျိုးနွယ်၊ သွေးစုပ်ဖုတ်ကောင်မျိုးနွယ်နှင့် ချီကျန်းမျိုးနွယ်တို့မှ ခြေရာခံသင်္ဘောများကိုပါ ကြယ်တာရာနယ်စပ်တွင် တွေ့ရလိမ့်မည်ဟု မျှော်လင့်မထားခဲ့ချေ။

ကံကောင်းထောက်မစွာဖြင့် မျိုးနွယ်လေးခုမှာ ကောင်းမွန်သော ဆက်ဆံရေးများ ရှိကြသည်။ လက်ရှိ အခြေအနေမှာ အနည်းငယ် ကိုးရို့ကားယား နိုင်သည့်တိုင်‌အောင် မင်္ဂလာပါဟု နှုတ်ဆက်နိုင်သေးသည်။

သက်ဆိုင်ရာ အချက်ပြမီးများ ဖွင့်ပြီးနောက် ရေသူတော်ဝင်မိသားစု၏ သင်္ဘောပေါ်တွင် စုဝေးလိုက်ကြသည်။

မိတ်ဟောင်းဆွေဟောင်းများနှင့် ရင်ဆိုင်ရသည့်အခါ ရှက်ကိုးရှက်ကန်းဖြင့် နှာခေါင်းအား လက်ဖြင့် ထိမိကြသည်။

“မင်းတို့လည်း ခရီးသွားမလို့ လာတာလား...”

အန်းယိ၏ ဆက်ဆံရေးမှာ အလွန်ပြေပြစ်လှသည်။ အေ ၅ လုံး အဆင့်ရှိ ခရီးသွားလည်ပတ်ရာ နေရာတွင် တွေ့ဆုံကြသကဲ့သို့ မျိုးနွယ် ၃ ခုအား တည်ငြိမ်စွာ မေးလာခြင်း ဖြစ်သည်။

အစည်းအဝေးခန်းထဲ၌ ပြင်ပလူမရှိသဖြင့် ဖုံးကွယ်နေရန် မလိုတော့ပေ။ သွေးစုပ်ဖုတ်ကောင် မျိုးနွယ်မှ အရှင်ရန့်ထ်သည် ဝန်ကြီး အန်းယိအားကြည့်လိုက်ပြီးနောက် ဦးစွာပြောလာသည်။ ချောမောခံ့ညားပြီး ဖြူဖျော့နေသော မျက်နှာတွင် စိုးရိမ်မှုများ အတိုင်းသားနှင့် သက်ပြင်းချလိုက်ပြီးနောက် ဖခင်အိုကြီးမှာ နှလုံးကွဲလုမတတ် နာကျင်နေပုံရသည်။

“ငါတို့အားလုံးက မိတ်ဆွေဟောင်းတွေဆိုတော့ ဖုံးကွယ်မနေတော့ဘူးကွာ.. အမှန်အတိုင်း ပြောရရင် ငါ့မိသားစုက အဆိုးအသွမ်းလေးကို လာရှာတာပဲ..”

“ငါလည်း ငါ့သားနှစ်ယောက်ကို ရှာဖို့ လာတာ..”

မျိုးနွယ်စုခေါင်းဆောင် ဖုန်း သက်ပြင်းချကာဖြင့် ပြောလိုက်သည်။ မိသားစု နှစ်ခု၏ ကောင်းမွန်သော ဆက်ဆံရေးကြောင့် သူနှင့် အရှင့် ရန့်ထ်တို့ အတူလာကြခြင်း ဖြစ်သည်။ သူတို့၏ သားများသည်လည်း အတူတကွ ပျောက်ဆုံးသွားခဲ့ကြသည်။

မြို့စားကြီး ဆိုင်ဒန်သည် ခေတ္တမျှ တိတ်ဆိတ်နေပြီးနောက် ကြင်ဖက်တွေ့ဆုံပွဲများအား ရှောင်ရှားရန် ထွက်ပြေးသွားသော သားဖြစ်သူအား အမှတ်ရမိလိုက်ပြီးနောက် စကား ၃ လုံးသာ ဆိုသည်။

“အပေါင်း တစ် (+၁)..”

ဝန်ကြီး အန်းယိသည် အစုလိုက် ပျောက်ဆုံးမှုအား ကြားသည့်အခါ အနည်းငယ် အံ့အားသင့်သွားမိသည်။ သူရောက်လာသည့် အကြောင်းမှာလည်း ထုတ်ဖော်ပြောရန်ပင် မလိုဘဲ မျိုးနွယ် ၃ ခုလုံး အလိုလို သိရှိသွားကြသည်။ နီမိုတော်ဝင်မျိုးနွယ်မှ မင်းသားလေး၏ ပျောက်ဆုံးမှုအကြောင်းအား ကြယ်ကွန်ယက်တွင် ယခုထိတိုင် ဆွေးနွေးပြောဆိုနေကြဆဲ ဖြစ်သည်။

အစည်းအဝေးခန်းတစ်ခုလုံး ခေတ္တမျှ တိတ်ဆိတ်သွားလေးသည်။ မိဘများ သက်ပြင်းချပြီးနောက် လူရှာရန် ဤနေရာသို့ ရောက်လာကြခြင်းမှာ တိုက်ဆိုင်မှု တစ်ခုမျှသာ ဖြစ်လေသည်။

“ဆိုတော့ မင်းတို့ရဲ့ ကလေးတွေကကော ကာကွယ်ထားတဲ့နေရာ (ကမ္ဘာ)မှာလား..”

အန်းယိ မေးလိုက်သည်။

အရှင် ရန့်ထ် ခေါင်းညိတ်လိုက်သည်။

“ဟုတ်တယ်.. သွေးစုပ်ဖုတ်ကောင်တွေရဲ့ မွေးရာပါစွမ်းရည်ဖြစ်တဲ့ ခြေရာခံခြင်းကိုသုံးပြီး ရှာဖွေလိုက်တာ ဒီနေရာနား နီလာလေလေ တုံ့ပြန်မှုအား ကောင်းလေလေပဲ.. မျိုးနွယ်စုခေါင်းဆောင် ဖုန်း ရဲ့ သားတွေကတော့ ငါ့သားနဲ့ အတူရှိနေမှာ သေချာတယ်..”

မျိုးနွယ်စုခေါင်းဆောင် ဖုန်း ခေါင်းညိတ်လိုက်သည်။

"ဟုတ်တယ် သူတို့အားလုံး အတူတူ ထွက်ပြေးသွားတာ.."

အန်းယိသည် သူ၏ဘေးရှိ မြို့စားကြီး ဆိုင်ဒန်အား ကြည့်လိုက်သည်။ မြို့စားကြီး ဆိုင်ဒန်သည်လည်း ဖုံးကွယ်ခြင်း မပြုပေ။ သားဖြစ်သူအား ဖမ်းမိသည်နှင့် သေအောင်ရိုက်ပစ်မည်ဟု ဆိုလေသည်။

“ပိုဆီယာရဲ့ လက်အောက်ငယ်သားတွေကို မေးခဲ့တယ်.. ပိုဆီယာက ကြင်ဖက်တွေ့ဖို့ မလိုလားဘူးဆိုရင် ငါသူ့ကို လိုက်လျောပေးပြီး တစ်ယောက်တည်း နေခိုင်းမှာပေါ့.. ဒါပေမဲ့ အဲဒီကောင်က ခေါင်းကြောမာပြီး အိမ်မှာမနေချင်တဲ့အပြင် မိတ်လိုက်ကာလမှာတောင် ခိုးထွက်သွားလိုက်သေးတယ်လေ.. ပြန်တွေ့တာနဲ့ အသေပဲ..”

ဆိုင်ဒန်၏ ဒေါသတကြီး အမူအရာအား မြင်သည့်အခါ အခြားသူများသည် ကိုယ့်လက်မောင်းကိုယ် ပြန်ပွတ်လိုက်မိသည်။

“စိတ်တိုမနေနဲ့.. ဒီခေတ် ကလေးတွေက လွတ်လပ်မှုကို မြတ်နိုးပြီး လိုချင်ကြတယ်..”

မြို့စားကြီး ဆိုင်ဒွန် လှောင်ရယ်လိုက်သည်။

“ငါက သူ့ကို ဘာဖြစ်လို့ လွတ်လွတ်လပ်လပ် ချစ်ခွင့်မပေးခဲ့တာလဲ သိလား.. အဲဒီကောင် အရင်က ပလေး‌ရေသူပုံစံ လုပ်ခဲ့လို့ နာမည်ဆိုးထွက်နေတာလေ.. တခြားငါးတွေက သူနဲ့ ကြင်ဖက်တွေ့ဖို့ လက်ခံလိုက်ရင် အဲဒါ သူ့ကို မျက်နှာသာပေးတယ်လို့ ပြောရမှာကွ..”

လူတိုင်း :"..."

သူတို့အားလုံး ဆွံ့အသွားကြသည်။ ထိုအချိန်မှာပင် ရေသူမျိုးနွယ်မှ ငယ်သားတစ်ယောက် တံခါးခေါက်ကာ အစည်းအဝေးခန်းအတွင်းသို့ ဝင်လာပြီး ယခုလေးတင် ရှာတွေ့ခဲ့သော အရေးကြီးသည့် အချက်အလက်အား မြို့စားကြီး ဆိုင်ဒွန်ထံ တင်ပြလေသည်။

“မြို့စားကြီး ခင်ဗျား.. ကျွန်တော်တို့ ဂြိုလ်ပတ်လမ်းကြောင်းမှာ ဖုံးကွယ်ထားတဲ့ ယာဉ်တစ်စီးကို တွေ့ခဲ့ပါတယ်.. ယာဉ်ပေါ်က အမှတ်တံဆိပ်အရ နီမိုတော်ဝင်မျိုးနွယ်က ယာဉ်ဖြစ်လိမ့်မယ်လို့ ကောက်ချက်ချမိပါတယ်..”

ထိုစကားအား ကြားသည့်အခါ ဝန်ကြီး အန်းယိ စိတ်လှုပ်ရှားစွာဖြင့် မတ်တတ်ရပ်လိုက်သဖြင့် ထိုင်ခုံ ကျယ်လောင်စွာ လဲကျသွားသည်။ ထို့နောက် အလျင်စလို ပြောလေသည်။

“ငါကြည့်ဖို့ ခေါ်သွားပေး..”

အခန်းအတွင်းရှိ အာဏာရှိ ပုဂ္ဂိုလ်ကြီးများအားလုံး အချင်းချင်း အပြန်အလှန် ကြည့်လိုက်ကြပြီးနောက် ဂြိုလ်ပတ်လမ်းကြောင်းတွင် ဖုံးဝှက်ထားသော ယာဉ်အားကြည့်ရန် အပြင်သို့ ထွက်သွားကြသည်။

ယာဉ်၏အပြင်ဘက် အနက်ရောင်ကိုယ်ထည်အား မြင်လိုက်သည်နှင့် မော့ယန်၏ အာကာသယာဉ်ဖြစ်ကြောင်း အန်းယိ ချက်ချင်းသိလိုက်သည်။ အဆိုပါယာဉ်အား သူကိုယ်တိုင် စိတ်ကြိုက်ပြင်ဆင်ပြီးမှ မော့ယန်အား လက်ဆောင်ပေးခဲ့ခြင်း ဖြစ်သည်။

အန်းယိသည် လျှို့ဝှက်နံပါတ် ရိုက်ထည့်ပြီးနောက် ယာဉ်၏ မောင်းနှင်ခန်း အပျက်အစီးမရှိဘဲ ပွင့်လာပြီး အထဲသို့ ဝင်လိုက်သည်။

“တကယ်ပဲ တစ်ခုခု ဖြစ်သွားပုံရတယ်..”

ထိုသို့ပြောရင်း အန်းယိ၏ မျက်နှာမှာ ဝမ်းနည်းညှိုးလျော်နေသည်။

စစ်ဆေးပြီးနောက် ယာဉ်တစ်ခုလုံး အကောင်းအတိုင်း ရှိနေဆဲဖြစ်သည်ကို သိလိုက်ရသည်။ ထိုသို့ဆိုလျှင် မော့ယန်သည် သူ၏ ဆက်သွယ်ရေးကိရိယာအား ပြန်လွှတ်လိုက်ခြင်းမှာ သူ၏ယာဉ်အား ဆင့်ခေါ်မှု မပြုရခင်မှာပင် ကြီးမားသော အဖြစ်အပျက်တစ်ခုခုနှင့် ရင်ဆိုင်ကြုံတွေ့လိုက်ရခြင်း ဖြစ်ပေမည်။

အရှင် ရန့်ထ်နှင့် အခြားသူများသည် အန်းယိ၏ သုံးသပ်ချက်အား နားထောင်ပြီးနောက် ပိုမိုလေးနက်လာသည်။ သူတို့၏ ကလေးများနှင့် အဆက်အသွယ်ပြတ်သွားခြင်းသည်လည်း ယခုကိစ္စနှင့် ဆက်စပ်နေနိုင်သည်။ မဟာစစ်သူကြီး မော့ယန် ကဲ့သို့သော အတိုက်အခိုက် ကျွမ်းကျင်သည်ဟု နာမည်ကျော်ကြားသူပင် အန္တရာယ်ရှိနေမည်ဆိုပါက ကိစ္စမှာ အသေးအဖွဲ မဖြစ်နိုင်‌တော့ပေ။

သက်ဆိုင်ရာ မျိုးနွယ်များမှ အရေးကြီး ပုဂ္ဂိုလ်ကြီးများသည် အဝေးတွင် တောက်ပနေသော ကြယ်အစုအဝေးအား ရုတ်တရက် ကြည့်လိုက်ကြပြီးနောက် သူတို့၏ အမူအရာများ လေးနက်လာလေသည်။ မကောင်းသည့် နိမိတ်တစ်ခုလည်း ရင်ထဲ၌ ပေါ်ပေါက်လာသည်။ ကာကွယ်ထားခြင်း ခံရသောနယ်မြေ (ကမ္ဘာ) ပေါ်တွင် ကိစ္စတစ်ခုခု ဖြစ်သွားပုံပင်။

*****

ထိုအချိန်တွင် ဟမ်းစတားလေးတို့အဖွဲ့သည် သင်္ဘောပေါ်သို့ရောက်ရှိနေကြပြီး ပြည်မသို့ မရပ်မနား ရွက်လွှင့်နေကြလေသည်။ အလာခရီးနှင့် နှိုင်းစာလျှင် အပြန်ခရီးမှာ လွန်စွာချောမွေ့လျက်ရှိပြီး ပင်လယ်ပြင်မှာလည်း မျှော်လင့်မထားလောက်အောင် ငြိမ်သက်နေလေသည်။

ဇွန်ဘီငါးလေးများမှလွဲ၍ ပင်လယ်အောက်ရှိ ဇွန်ဘီငါးကြီးများမှာ သင်္ဘောအနီးသို့ပင် ကပ်မလာခဲ့ချေ။ ထိုအခြင်းအရာနှင့် စပ်လျဉ်း၍ ဝေ့ဟန်မင်၊ ပိုင်ယွဲ့နှင့် အခြားသူများသည် အခြေအနေအား လွန်စွာသိချင်လာမိကြသည်။

အဆုံးတွင် ဝေ့ဟန်မင် မမေးဘဲ မနေနိုင်တော့ချေ။

“မင်းတို့ အလာတုန်းက အခက်အခဲ ကြုံခဲ့သေးလား..”

နင်ဖုန်းသည် တောင်ပူစာလေးများသဖွယ်ရှိသည့် ဧရာမ ဇွန်ဘီငါးကြီးများအား အမှတ်ရမိချိန်တွင် မျက်နှာအား လက်ဖြင့်ပွတ်လိုက်မိသည်။

“ခင်ဗျားတို့ သိချင်မှာ မဟုတ်ပါဘူး.. မသိတာက ပိုကောင်းလိမ့်မယ်..”

ဆစ်စလို ထောက်ခံသည့်အနေဖြင့် ခေါင်းညိတ်လိုက်သည်။

“အဲဒါတွေက ပိုဆီယာတို့ ရေသူမျိုးနွယ်ထက် ပိုကြောက်ဖို့ကောင်းတယ်..”

ပိုဆီယာ : "...... မင်းသေပြီပဲ.. အို့.."

“ဒါက ငါတို့ရဲ့ အပြန်ခရီး ဖြစ်တာကြောင့်နေမယ်.. ဘုရားသခင်က ငါတို့ကို လုံလုံခြုံခြုံ ဘေးကင်းကင်းနဲ့ ပြန်စေချင်တာ ဖြစ်မှာပေါ့..”

ပိုင်ယွဲ့သည် သူ၏မေ့စေ့အား ထိကာ စဉ်းစားပြီးနောက် အလွန်လေးနက်စွာ ပြောလေသည်။

“ငါတို့ သိပ္ပံပညာရှင်တွေရဲ့ ထိပ်တန်းအကာအကွယ် ရောင်ခြည်စက်ဝန်း နေမှာ..”

“ဟားဟားဟား.. တကယ့်ကောင်ကွာ.. ဒါနဲ့များ သိပ္ပံပညာရှင်တဲ့လား.. လူရှေ့သူရှေ့မှာတောင် ပဒေသရာဇ် အယူတွေကို အော်ကြီးဟစ်ကျယ် ပြောလိုက်သေးတယ်..”

နင်ဖုန်းရယ်မောကာ ပိုင်ယွဲ့၏ ပခုံးပေါ် လက်တင်ရင်း ကြိမ်းမောင်းလိုက်သည်။

“ဟားဟားဟား..”

ပိုင်မေ့သည် ကုန်းပတ်ပေါ်၌ ရပ်နေရင်း လက်ရန်းအားမှီကာ အခြားသူများ၏ စကားဝိုင်းအား နားထောင်နေသည်။ သူ၏ နှုတ်ခမ်းများအား ကွေးတက်သွားပြီးနောက် မျက်လုံးမှိတ်ကာ ပင်လယ်လေညင်းအား ခံစားနေမိသည်။

အမြဲတမ်း ဒီလိုလေးဆို အရမ်းကောင်းမှာပဲ..

ဟမ်းစတားလေးသည် တစ်ယောက်နှင့်တစ်ယောက် စနောက်ရယ်မောနေကြသူများအားကြည့်ကာ “ချိ ချိ” အသံလေးများဖြင့် ရယ်မောရင်း နျဲ့ရှောင်၏ အိတ်ကပ်အတွင်းသို့ ဝင်သွားလေသည်။ သို့သော်လည်း များမကြာမီမှာပင် အကောင်ပေါက်လေးသည် သူ၏ မျက်နှာလေးအား လက်ဖဝါးလေးနှစ်ဖက်ဖြင့် ပွတ်သပ်လိုက်သည်။ မှေးစင်းလာသော မျက်လုံးများအား တောင့်မခံနိုင်တော့ပုံပင်။

“ချိ~” ဒယ်ဒီ.. ပေါင်ပေါင်း အိပ်ချင်ပြီ..

အကောင်ပေါက်လေးမှာ အနည်းငယ် ထူးဆန်းနေသည်ကို နျဲ့ရှောင် သတိပြုမိသည်။ သူ၏ အိတ်ကပ်အတွင်းရှိ ဆန်မုန့်လုံးလေးအားကြည့်ကာ နူးညံ့ညင်သာစွာ ပြောလေသည်။

“ဒါဆိုလည်း သွားအိပ်ကြမယ်လေ.. ပေါင်ပေါင်းက ဒီရက်ပိုင်း ဘာလို့များ ခဏခဏ အိပ်ချင်နေတာလဲ ဒယ်ဒီ သိချင်လာပြီ..”

မော့ယန်၏ မှတ်ဉာဏ်များ ပြန်လည်ရရှိလာပြီးသည့် အချိန်မှစကာ သူ၏ ဆန်မုန့်လုံးလေး၏ အိပ်ချိန် ပိုများလာသည်။ သို့သော်လည်း ဤသည်မှာ မော့ယန်၏ ခိုးကြောင်ခိုးဝှက် လှုပ်ရှားမှု ဖြစ်ပုံမရချေ။ တစ်ဖက်သူသည် အကောင်ပေါက်လေး အလွန်အကျူး အိပ်စက်နေခြင်းအား ယခုထိတိုင် သတိပြုမိသေးဟန် မရှိပေ။

နျဲ့ရှောင်သည် ဖောင်းနေသော အိတ်ကပ်လေးအားကြည့်ကာ စဉ်းစားခန်းဝင်နေမိတော့သည်။

🐹🐹🐹🐹🐹