အပိုင်း ၄၄

Chapter 44

ရှစ်ဟိုင်ယွမ်မှာ အဘိုးတစ်ဦး ဖြစ်နှင့်နေပြီဖြစ်ကာ သူ၏ အကြီးဆုံးမြေးသည်ပင်လျှင် အသက် ၂၀ ဝန်းကျင်ခန့် ရှိနေပြီဖြစ်သည်။ 

ငယ်ရွယ်စဉ်က လွန်စွာ စိတ်ကူးယဉ်ဆန်တတ်သူ ဖြစ်ခဲ့သော်ငြား ယခုနှစ်ပိုင်းအတွင်း သူ၏ စိတ်ဆန္ဒတို့မှာ တစ်ဖြည်းဖြည်း လျော့နည်းလာခဲ့သည်။ အသက်အရွယ် အိုမင်းလာသည့် အလျောက် စွမ်းဆောင်ရည်မှာလည်း မကောင်းမွန်တော့။ 

သို့သော် ဤတစ်ခဏ၌ သူ့ခံစားချက်များ ရင့်မှည့်လာပြန်သည်။ သူ၏ ငယ်ရွယ်တက်ကြွသည့် စိတ်မာန်တို့ကို ပြန်လည်ရရှိလာသည်ဟုပင် ခံစားမိလာကာ မျက်နှာပေါ်တွင် အမာရွတ်အပြည့်နှင့် အမျိုးသားကို ချစ်မိသွားတော့သည်။ 

ထိုသူ၏ တင့်တယ်လှသော ကိုယ်နေဟန်ထားကြောင့် တစ်မဟုတ်ချင်း ယစ်မူးရီဝေသွားကာ ခံစားချက်ကို လုံးဝ မဟန့်တားနိုင်တော့ချေ။ 

သွေးတစ်စက်ချင်း၊ သွေးကြောတစ်မျှင်ချင်းစီကအစ ထိုအမျိုးသားကို ချစ်သည့်စိတ်များဖြင့် ပြည့်နှက်နေတော့သည်။ 

ရှေ့တွင် ရှိနေသည့် အမျိုးသားအား ငေးကြည့်နေစဉ်မှာပင် ရှစ်ဟိုင်ယွမ်သည် ဓားဖြင့် အခုတ်ခံလိုက်ရတော့သည်။ 

ပြတ်ရှဒဏ်ရာ ရသွားသည့်တိုင် ရင်ခုန်သံကို မထိန်းနိုင်သေးပေ။ 

သူ ဒီယောက်ျားကို အရမ်း ချစ်မိသွားတာ ... တကယ် တကယ်ကို အများကြီး ချစ်မိသွားတာလို့ ....

နောက်တစ်ကြိမ် အရိုက်ခံလိုက်ရပြန်သည်။

နေပါဦး ဘာတွေ ဖြစ်ကုန်တာလဲ ... ဒီလောက် အရိုက်ခံ၊ အခုတ်ခံရပြီး ဒဏ်ရာဗလပွ ဖြစ်နေတာတောင် ဘာလို့ သူ့စိတ်တွေက ထူးဆန်းတဲ့ အတွေးတွေနဲ့ ပြည့်နှက်နေရတာလဲ ...

ချက်ခြင်း အသိပြန်ဝင်လာပြီးသည့်နောက် တစ်ခုခု ထူးဆန်းနေသည်ကိုပါ သတိပြုမိလိုက်သည်။ 

သူ့လိုလူက ဘယ်လိုဖြစ်လို့ တိုက်ခိုက်နေရင်း တန်းလန်းကြီး အာရုံပျံ့လွင့်သွားရတာလဲ ...

သူက ... ရုပ်ဖျက်ထားတဲ့ တစ္ဆေဘုရင်မှာ ဇင်ယော်တောင် မျက်ခုံးတွေ၊ မျက်လုံးလှလှလေးတွေ ရှိတယ်လို့ ဘာလို့ တွေးမိသွားပါလိမ့် ...ပြီးတော့ ရင်တောင် ခုန်မိသွားသေးတယ် ...

သူ ရူးသွားတာများလား ...

မဟုတ်သေးဘူး .. ရူးသွားတာတော့ မဖြစ်နိုင်ဘူး .. ဒါ တစ္ဆေဘုရင် တစ်ခုခု လုပ်လိုက်လို့ပဲ ဖြစ်ရမယ် ...

ဒီကောင်က ကြောက်ဖို့ကောင်းလိုက်တာ ... အောက်လမ်းတွေပါ တတ်နေတာများလား ....

မြင့်မြတ်မြို့တော်လို နေရာမျိုးကိုတောင် ဘာအရိပ်အယောင်မှ မမြင်ရဘဲ ဝင်ချင်တိုင်းဝင် ထွက်ချင်တိုင်း ထွက်နေတာ မထူးဆန်းတော့ပါဘူး ပြီးတော့ နာမည်ကြီး တိုက်ခိုက်သူတွေ အများကြီး သူ့ကို တိုက်ခဲ့တာတောင် အကုန် အရှုံးနဲ့ပဲ ပြန်လာခဲ့ကြရတာရောပဲ ...

လက်စသတ်တော့ သူ့မှာ ဒီလို လှည့်ကွက်တွေ ရှိနေတာကိုး ...

သူသာ နှစ်ကြိမ်ဆက်တိုက် အရိုက်ခံလိုက်ရပြီး အသိစိတ် ပြန်မဝင်လာသေးရင် သေချာပေါက် ငေးကြည့်နေမိဦးမှာ ...

ရှစ်ဟိုင်ယွမ်မှာ ရွံရှာမိလာတော့၏။ သို့သော် ထိုရွံရှာစိတ်အပြင် . သူ့ရှေ့တွင် ရှိနေသူမှာ အမှန်တကယ်ပင် ရုပ်ရည်ချောမောလွန်းလှသည်ဟုလည်း ခံစားမိပြန်၏။ 

ထိုအခိုက်အတန့်၌ပင် တစ္ဆေဘုရင်၏ မျက်နှာကို မြင်လိုက်ရာ ရီဝေမှုတို့ ပြေပျောက်သွားတော့သည်။ 

ဒီလူက ရုပ်ဆိုးတဲ့အပြင် ယောကျ်ားကြီးလည်း ဖြစ်နေသေးတာကို .. သူက ဒီလို ယောကျ်ားမျိုးကို ချစ်မိသွားဖို့ဆိုတာ နည်းနည်းလေးမှ မဖြစ်နိုင်ပါဘူး ...

ဒါ သေချာပေါက်ကို တစ်ခုခု မှားနေတာပဲ ဖြစ်ရမယ် ...

ထူးဆန်းလှသည့် ခံစားချက်များအကြားတွင် အဆုံးမဲ့စွာ ရုန်းကန်လှုပ်ရှားနေရသည့်အတွက် ရှစ်ဟိုင်ယွမ်၏ တိုက်ခိုက်မှုတို့သည် အလိုလိုပင် အရှိန်နှေးကွေးလာတော့သည်။ 

ထို့နောက် တစ္ဆေဘုရင်၏ လက်သီးချက်ကို နောက်တစ်ကြိမ် မြည်းစမ်းလိုက်ရပြန်သည်။ 

နဝမအဆင့် တိုက်ခိုက်သူတစ်ဦး ဖြစ်သည့်အလျောက် သူ့ခန္ဓာကိုယ်မှာ သံမဏိအလား ထင်မှတ်ရပေသည်။ သာမန်သူများအနေဖြင့် သူ့ခန္ဓာကိုယ်ကို ခြစ်ရာရှရာတစ်ခုတစ်လေမျှပင် ဖြစ်အောင် လုပ်နိုင်မည် မဟုတ်ချေ။ သို့သော် တစ္ဆေဘုရင်သည်လည်း နဝမအဆင့် တိုက်ခိုက်သူ ဖြစ်နေပေ၏။

သုံးကြိမ်ဆက်တိုက် ထိုးနှက်ခံထားရသည့်တိုင် အတွေးများကြောင့် နှေးကွေးနေသည့် လှုုပ်ရှားမှုများနှင့် ဟောင်းလောင်းပွင့်နေသော ဒဏ်ရာများမှအပ ရှစ်ဟိုင်ယွမ်တွင် ကြီးကြီးမားမား ထိခိုက်မထားသေး။ 

သူသာ မလွတ်မြောက်နိုင်ပါလျှင် ဤနေရာတွင် သေလိုက်ရန်သာ ရှိတော့သည်။ 

သူက ဆက်ပြီး မတိုက်ခိုက်ရဲတော့။ ချက်ခြင်း လှည့်ကာ ထွက်ပြေးသွားတော့သည်။ 

တစ္ဆေဘုရင်ပင်လျှင် ချက်ခြင်း မတုန့်ပြန်နိုင်ခဲ့။ 

သူက ရှစ်ဟိုင်ယွမ်ကို သိထားပေသည်။ မြင့်မြတ်မြို့တော်တွင် ရှိခဲ့စဉ်က သူ၏ စီနီယာ ဖြစ်ခဲ့ဖူးကာ မိန်းမတစ်ဦး၏ နောက်တွင် ပုန်းနေတတ်သည့် စရိုက်ကြောင့် အထင်သေးခဲ့ဖူး၏။ ထိုသူ၏ အမျိုးသမီးမှာ ခင်ပွန်းကို ရွေးချယ်ရာတွင် မျက်နှာတစ်ခုတည်းကို အကဲခတ်၍ မရွေးခဲ့သင့်ဟုပင် တွေးခဲ့မိဖူးသေးသည်။ 

ဒီလူအိုကြီးက အတော်လေး အိုနေပြီဆိုတော့ သူ့ရဲ့ တိုက်ခိုက်ရေးစွမ်းရည်တွေလည်း နိမ့်ကျနေလောက်ပြီ ဆိုပေမယ့် တကယ်ကြီးကို ဒီလောက်အထိ အားနည်းတာလား ...

ဒါမှမဟုတ် သူတို့မိသားစုက ရှောင်ကျိုးရဲ့ အင်အားကပဲ ထပ်တိုးလာပြန်တာများလား ...

(ရှောင်ကျိုးက တစ္ဆေဘုရင်ရဲ့ အဖော်သားရဲကို ပြောတာပါ )

သူ့ရှောင်ကျိုးက တိုက်ခိုက်ရေးစွမ်းရည် သိပ်မကောင်းဘူး ဆိုပေမယ့် ပင်ကိုယ်ပါရမီက အရမ်းကို ထက်သန်ပြီး တစ်ခြားသူတွေကိုလည်း အာရုံထွေပြားအောင် လုပ်နိုင်တယ်လေ အခု ရှစ်ဟိုင်ယွမ်ကို ကြည့်ရတာလည်း စိတ်အာရုံတွေ ထွေပြားနေသလိုပဲ ....

ဒါမှမဟုတ် .. ရှောင်ကျိုးရဲ့ သက်ရောက်နိုင်စွမ်းတွေကပဲ အရင်ထက် ပိုကောင်းလာတာများလား ...စောစောတုန်းက ရှစ်ဟိုင်ယွမ်ရဲ့ အကြည့်တွေက သိပ်ပြီး ပုံမှန်မဟုတ်သလိုပဲ ...

ရှစ်ဟိုင်ယွမ် ထွက်ပြေးသွားသည်ကို မြင်လိုက်သည်နှင့် တစ်ပြိုင်နက် တစ္ဆေဘုရင်ကလည်း ချက်ခြင်း ပြေးလိုက်သွားလိုက်သည်။ 

ယခင်ကသာဆိုလျှင် သူ့တွင် ကာကွယ်ရမည့် ရှဲ့ယွင်နန် ရှိနေသည့်အတွက် ပြေးလိုက်သွားလိမ့်မည် မဟုတ်ချေ။ 

ဒါပေမယ့် အခုဆို ရှဲ့ယွင်နန်ရဲ့ဘေးမှာ နတ်ဘုရားအဆင့် တိုက်ခိုက်သူ တစ်ယောက်လုံးတောင် ရှိနေတာ မဟုတ်လား ...

သူက တုန့်ဆိုင်းမနေဘဲ ချက်ခြင်း ပြေးလိုက်သွားလိုက်သည်။ 

နောက်မှ လိုက်လာသည့် တစ္ဆေဘုရင်ကို တွေ့လိုက်သည့်အခါ ရှစ်ဟိုင်ယွမ်က ပြေးသည့်နှုန်းကို ပိုပြီး မြန်ဆန်စေလိုက်သည်။ ထို့နောက် မုန့်ယန်နှင့် အခြားသူများအား တွေ့လိုက်၏။ 

အက်ကွဲနေသည့် အသံဖြင့် ပြောလိုက်သည်။ 

“ပြေး !!! မြန်မြန်ပြေးကြတော့ ...”

သူ့တွင် ကောင်းမွန်သည့် သမာဓိ ရှိသည့်အပြင် တစ္ဆေဘုရင်၏ ဖမ်းစားမှုကို ခံနိုင်ရည်ရှိသည်အထိ အိုမင်းနေပြီ ဖြစ်သော်ငြား သူ့ရှေ့တွင် ရှိနေသူများသာ ခံနိုင်ရည် မရှိခဲ့ပါလျှင် .. ထိုသူများသည် သူ့ကို ချက်ခြင်း တိုက်ခိုက်လာကြမည်ဖြစ်သည်။ 

ရှစ်ဟိုင်ယွမ်၏ အချက်ပြမှုကြောင့် အပြေးရောက်လာသည့် မုန့်ယန်နှင့် အခြားသူများမှာ စိုက်ခင်းထဲသို့ ရောက်သည်နှင့် တစ်ပြိုင်နက် တစ်ဟုန်ထိုး ပြေးလာသော ရှစ်ဟိုင်ယွမ်ကို တွေ့လိုက်ရသည်။ 

ရှစ်ဟိုင်ယွမ်လို နဝမအဆင့် တိုက်ခိုက်သူကတောင် တစ်ကိုယ်လုံး သွေးတွေ အပြည့်နဲ့ ထွက်ပြေးလာရတယ် ...

သူ အချက်ပြပြီးတာမှ ဘယ်နှမိနစ်ပဲ ရှိသေးလို့လဲ .. ဒါတောင် ဒီလိုပုံစံမျိုး ဖြစ်နေပြီလား ...

မုန့်ယန်လည်း အံ့ဩတုန်လှုပ်သွားရတော့၏။ သူသည် သူ့ဘဝကို များစွာ တန်ဖိုးထားသူ ဖြစ်ရာ ... ချက်ခြင်း မတုန့်မဆိုင်းဘဲ လှည့်ပြေးသွားတော့သည်။ 

သူ့အနီးရှိ အဌမအဆင့် တိုက်ခိုက်သူများမှာလည်း ထိုမြင်ကွင်းကို မြင်သည့်အခါ တစ္ဆေဘုရင်ကို လုံးဝ မတိုက်ခိုက်ရဲကြတော့။ ချက်ခြင်း ခြေကုန်သုတ်ကာ ပြေးကြတော့သည်။ 

သူတို့က ရှစ်ဟိုင်ယွမ်ကိုတောင် အနိုင်မတိုက်နိုင်ကြတာ .. ရှစ်ဟိုင်ယွမ်လို လူမျိုးကိုတောင် အပြတ်တိုက်နိုင်တဲ့ တစ္ဆေဘုရင်ကိုဆို ပြောကို မနေနဲ့တော့ ...

သို့သော် .. တစ္ဆေဘုရင်နှင့် အကြည့်ချင်း ဆုံမိသွားသည့် တစ်ခဏ၌ ထိုသူမှာ ကြည့်ကောင်းချောမောလွန်းလှသည်ဟု ခံစားမိလာ၏။ 

သူတို့ရဲ့ အလှအပအပေါ်မှာ ခံစားနိုင်စွမ်းတွေကပဲ ထူးဆန်းကုန်တာများလား ...

သူတို့တွင် ထိုအကြောင်း တွေးနေရန်ပင် အချိန်မရှိ၊ အသားကုန် ပြေးထွက်သွားကြတော့သည်။ 

တစ္ဆေဘုရင် “???”

သူက တုန့်ခနဲ ရပ်လိုက်ကာ ဆက်မလိုက်ရဲတော့။ 

ရှစ်ဟိုင်ယွမ်တွင် တိုက်ခိုက်သူနှင့် ယဇ်ဆရာ နှစ်မျိုးစလုံး ရှိနေရာ သူ့အနေဖြင့် မည်သို့မျှ အနိုင်တိုက်နိုင်မည် မဟုတ်ချေ။ 

ရှစ်ဟိုင်ယွမ်နှင့် အခြားသူများ ထွက်ပြေးသွားသည်ကို ကြည့်ကာ စိုက်ခင်းသို့သာ ပြန်သွားလိုက်တော့သည်။ 

အစောပိုင်းက ရှစ်ဟိုင်ယွမ်ကို တွေ့လိုက်သည့်အခါ ပူပန်သွားသည့် ပမာဏနှင့် ယခု ပြောစရာမရှိ ဖြစ်နေသည့် ပမာဏတို့မှာ ထပ်တူနီးပါးလောက်ပင်။ 

ယနေ့ တိုက်ပွဲ ပြင်းထန်လိမ့်မည်ဟု တပ်အပ် တွေးထားခဲ့သော်ငြား ရှစ်ဟိုင်ယွမ်မှာ ခုခံခြင်းပင် မပြု။ သုံးကြိမ် အရိုက်ခံပြီးနောက် ထွက်ပြေးသွားခဲ့သည်။ 

သူ့အိမ်သို့ ပြန်ရောက်သည့်အခါ ရှချင်နှင့် အခြားငယ်သားနှစ်ဦးက သူ့အိမ်ကို စောင့်ကြပ်နေကြောင်း တွေ့လိုက်ရသည်။ 

“ဘော့စ် အဆင်ပြေရဲ့လား ...”

ရှချင်က သူ့ကို မြင်သည်နှင့် တစ်ပြိုင်နက် ချက်ခြင်း မေးလိုက်သည်။ 

ဘော့စ်က ဟိုးအရင်ကတည်းက သူတို့ကို အန္တရာယ်တစ်ခုခု ကြုံလာရင် ရှဲ့ယွင်နန်က အရေးအကြီးဆုံးလို့ ညွှန်ကြားထားခဲ့တာဆိုတော့ ... သူ ထွက်သွားတော့ လိုက်မသွားခဲ့မိဘူး ...

ဘော့စ်နဲ့ ရှစ်ဟိုင်ယွမ်ရဲ့ တိုက်ပွဲကိုတော့ သူတို့တွေလည်း သေချာ မမြင်လိုက်ရဘူး ...

တစ္ဆေဘုရင်က ပြောလိုက်သည်။ 

“အဆင်ပြေပါတယ် ...”

ရှချင်က ထပ်မေးလိုက်၏။

“ဘော့စ် သူက ဘယ်သူလဲ ...”

“ရှစ်ဟိုင်ယွမ် ...”

“ဪ ...”

ရှစ်ဟိုင်ယွမ်သည် နဝမအဆင့် တိုက်ခိုက်သူတစ်ဦး ဖြစ်၏။ အဆင့်တူများအကြားတွင် သူ့ကို အားနည်းသည်ဟု သတ်မှတ်၍ ရသည့်တိုင် နဝမအဆင့် တိုက်ခိုက်သူတစ်ဦး ဖြစ်နေဆဲပင်။ 

သူက ဘော့စ်ရဲ့ လက်ချက်နဲ့ ထွက်ပြေးသွားရတယ် ဟုတ်လား ...

ဘော့စ်က အရမ်းကို မိုက်တာပဲ ...

တစ္ဆေဘုရင်က ထပ်ပြောလိုက်ပြန်သည်။ 

“မုန့်ယန်နဲ့ နောက်ထပ် နှစ်ယောက်လည်း ပါသေးတယ် ... သတ္တမ ဒါမှမဟုတ်ရင် အဌမအဆင့်တွေပဲ ..."

ရှချင်နှင့် အခြားသူအားလုံး သက်ပြင်းမောများ ချလိုက်ကြသည်။ 

နဝမအဆင့် တိုက်ခိုက်သူရော ယဇ်ဆရာရောကပါ ဘော့စ် လိုက်ဖမ်းမှာကြောက်လို့ ထွက်ပြေးကြတယ်တဲ့ ခေါင်းဆောင်ကတော့ တကယ်ကို ခေါင်းဆောင်ဖြစ်ထိုက်ပါပေတယ် ...

“သူတို့က ထွက်ပြေးသွားကြပြီဆိုတော့ ဒီအတောအတွင်းတော့ ထပ်လာဦးမှာ မဟုတ်ဘူး မင်းတို့လည်း ပြန်ပြီး အနားယူကြတော့ ...”

သူက ထိုသို့ပြောကာ အခန်းထဲ ပြန်သွားလိုက်သည်။ 

ဤရက်ပိုင်းအတွင်း ခေါက်အိပ်ယာနှင့်သာ ညတိုင်း အိပ်နေရ၏။ 

ကျယ်ပြန့်ကြီးမားလှသည့် အိပ်ယာကို သားဖြစ်သူနှင့် သူ့အိမ်ထောင်ဖက်ထံ ပေးအပ်ကာ သူကိုယ်တိုင်က ခေါက်အိပ်ယာလေးထဲတွင် ကျဉ်းကြပ်စွာ အိပ်စက်ရသည့်တိုင် အကျိုးရလဒ်မှာမူ ကြီးမားလှပေသည်။ 

ဒဏ်ရာများ သက်သာလာသည်ကို မဆိုထားနှင့်၊ သွမ့်ချန်ချင်း၏ ကျင့်ကြံစဉ်အတိုင်း ကျင့်ကြံခြင်းကပင် အကျိုးထူးနေပြီဖြစ်သည်။ 

သားဖြစ်သူကြောင့် သူသည် ထိုနည်းလမ်းကို အရေးတကြီး သဘောထားကာ ချက်ခြင်း လေ့လာခဲ့ပြီး ... ရလဒ်မှာလည်း မမျှော်မှန်းထားလောက်အောင်ပင် ကောင်းမွန်လှပေသည်။ 

လေ့ကျင့်နေစဉ်အတွင်း ဒဏ်ရာများ ပိုသက်သာလာကာ အဖော်သားရဲနှင့် ဆက်သွယ်နိုင်စွမ်းမှာလည်း ပိုမို တိုးတက်လာခဲ့သည်။ 

ရှစ်ဟိုင်ယွမ်ကို အနိုင်တိုက်နိုင်ခဲ့ခြင်းမှာ သွမ့်ချန်ချင်း ပေးခဲ့သည့် ကျင့်ကြံစဉ်နှင့် များစွာ သက်ဆိုင်နေပေသည်။ 

သူက စိတ်လှုပ်ရှားမှု အပြည့်ဖြင့် အခန်းထဲသို့ ပြန်လာခဲ့သော်ငြား ရှဲ့ယွင်နန်မှာမူ အနည်းငယ် စိုးရိမ်နေသည့်ဟန်ဖြင့်မေးလာသည်။ 

“ဆရာ အဆင်ပြေရဲ့လား စောစောက ဘာဖြစ်သွားတာလဲ ...”

“အဆင်ပြေပါတယ် .. ဒီတိုင်း ရန်သူဟောင်းတွေ လာပြီး ပြဿနာ ရှာကြတာလေးပဲ ...စိတ်မပူပါနဲ့ ငါ အကုန်လုံးကို နှင်ထုတ်လိုက်ပြီ ...”

ထို့နောက် သူက သွမ့်ချန်ချင်းကို ဖျတ်ခနဲ လှမ်းကြည့်လိုက်သည်။ 

သူ့မှာ သွမ့်ချန်ချင်းကို ပြောချင်တာတွေ အများကြီး ရှိသေးတယ် .. ဒါပေမယ့် သားက အနားမှာ ရှိနေတော့ ...

သူနှင့် ရှစ်ဟိုင်ယွမ်၏ တိုက်ပွဲကို ရှဲ့ယွင်နန်နှင့် သွမ့်ချန်ချင်းတို့က အိမ်ထဲမှတစ်ဆင့် စောင့်ကြည့်နေခဲ့ကြသည်။ 

သွမ့်ချန်ချင်းက အနည်းငယ် ကရုဏာသက်မိသွား၏။ 

တစ္ဆေဘုရင်က ရုပ်ဆိုးဆိုး မျက်နှာဖုံးကြီး ဝတ်ပြီး သူ့ရန်သူကို ညှို့နိုင်စွမ်းတွေကို အသုံးချပြီး အချိန်တိုအတွင်းမှာ တိုက်ခိုက်ခဲ့တာပဲ အဲဒါကြောင့်လည်း တစ်ဖက်သူက ထွက်ပြေးသွားတာနေမှာ ...

ကျင့်ကြံရေးလောကမှာဆို ဒီလိုကျင့်စဉ်ကို သုံးတဲ့ ဘယ်မိစ္ဆာကများ လှလှပပ မဝတ်မစားဘဲ တိုက်ခိုက်ကြလို့လဲ ဒီလိုမှ အကျိုးရလဒ်က အများကြီး ဖြစ်လာမှာလေ ...

ဒါပေမယ့် ဒီလူကတော့... ရုပ်ဆိုးဆိုး မျက်နှာဖုံးကြီးကိုတောင် သုံးလိုက်သေးတယ် ... အဲဒါကြောင့် ထင်သလောက် မထိရောက်တာ ...

ဒီလိုဆိုရင်တောင်မှ တစ္ဆေဘုရင်ရဲ့ အောင်မြင်မှုက အမြီးကိုးချောင်း မြေခွေးနဲ့ အများကြီး သက်ဆိုင်နေတုန်းပဲ အမြီးကိုးချောင်း မြေခွေးရဲ့ ဗီဇကိုက ညှို့ဓာတ်ပါနေပြီးသားဆိုတော့ အလိုလိုကို ဖျားယောင်းသွေးဆောင်တတ်နေတာ ...

ဒါပေမယ့် ဒီလိုကြီးတော့ .. အရမ်း သိသာမနေပါဘူး ...

နောက်တစ်နေ့မနက် ရှဲ့ယွင်နန် အခြားနေရာသို့ သွားနေသည်ကို အခွင့်ကောင်းယူကာ တစ္ဆေဘုရင်က သူ့ကို လာမေးလိုက်သည်။ 

“မနေ့က ရှစ်ဟိုင်ယွမ် သုံးခါ အရိုက်ခံလိုက်ရတာ ငါ လေ့ကျင့်ထားတဲ့ ကျင့်စဉ်ကြောင့်လား အာနိသင်က ဒီလောက်တောင် ကောင်းတယ်လား ...”

“မျက်နှာကို ပြလိုက်ရင် အဲဒီ့ထက်တောင် ကောင်းလိမ့်ဦးမယ် ...”

သွမ့်ချန်ချင်းက ပြောလိုက်သည်။ 

တစ္ဆေဘုရင်သည် ရှဲ့ယွင်နန်လောက် ကြည့်မကောင်းသော်လည်း သူ့မျက်နှာမှာ တစ်နှစ်ပတ်လုံး နေရောင်နှင့် မထိတွေ့သည့်အတွက် ရှဲ့ယွင်နန်ထက်ပင် ပိုပြီး ဖြူနေသေးသည်။ ထို့အပြင် မျက်လုံးနှင့် မျက်ခုံးတို့မှာ ရှဲ့ယွင်နန်ထက်ပို၍ စွဲမက်ဖွယ်ကောင်းကာ ပိုပြီးလည်း ညှို့ဓာတ်ပြင်းလှသည်။ 

“ဘာလို့လဲ ...”

သူက ကြောင်အသွား၏။ 

“ငါ့အဖော်သားရဲရဲ့ မွေးရာပါစွမ်းရည်က တစ်ခြားသူတွေကို ထင်ယောင်ထင်မှား ဖြစ်စေတာလေ အဲဒါ ငါ့မျက်နှာနဲ့ ဘာဆိုင်လို့လဲ ...”

သွမ့်ချန်ချင်းက ပြန်မဖြေ၊ သူ့ကိုသာ နက်နက်နဲနဲ စိုက်ကြည့်နေလိုက်သည်။ 

စင်စစ်အားဖြင့် ဤသို့သော မျက်နှာမျိုးကို အသုံးပြုခြင်းမှာလည်း ကောင်းမွန်ပေသည်။ ၎င်းက ပျားပိတုန်းနှင့် လိပ်ပြာတို့၏ အန္တရာယ်ကို ကာဆီးနိုင်၏။ 

ထို့အပြင် သူ တိုက်ခိုက်သည့်အခါ အခြားသူများ၏ အတွေးကိုပါ သံသယ ထွေပြားစေနိုင်ပေသည်။ 

.......

ရှစ်ဟိုင်ယွမ်မှာ သံသယများဖြင့် ထွေပြားနေဆဲပင်။ 

သူက တကယ်ကြီးကို တစ္ဆေဘုရင်ကို ကြိုက်မိသွားတာလား ကြောက်စရာကောင်းလိုက်တာ ...

တစ္ဆေဘုရင်ရဲ့ အဖော်သားရဲက ထင်ယောင်ထင်မှားဖြစ်အောင် လုပ်နိုင်တယ်လို့ ပြောကြတာ တကယ်တမ်းတော့ လူတွေက သူ့ကို ကြိုက်သွားအောင် လုပ်နိုင်တာ ဖြစ်နေတာက်ိုး ...

အတိတ်က သူနဲ့ တိုက်ခိုက်ခဲ့တဲ့ သူတွေက တိုက်ပွဲအကြောင်း ကျကျနန ပြန်မပြောတော့တာ ပြီးတော့ သူ့အဖော်သားရဲက ဘာဆိုတာကို သေချာ မပြောပြတော့တာ .. မဟုတ်မှလွဲရော သူ့လိုမျိုးပဲ ကြုံခဲ့ကြလို့များလား ...

ရှစ်ဟိုင်ယွမ်က ကုသမှု ခံယူရင်း စိတ်ပျံ့လွင့်နေသည်။ သူရထားသည့် ဒဏ်ရာအားလုံးမှာ အပေါ်ယံ အရေပြားဒဏ်ရာများသာ ဖြစ်သည့်အတွက် မပြင်းထန်ရာ နောက်တစ်နေ့တွင်ပင် အခြားသူများနှင့် တွေ့ဆုံနိုင်နေပြီဖြစ်သည်။ 

မုန့်ယန်က အဌမအဆင့် တိုက်ခိုက်သူနှစ်ဦးနှင့်အတူ ရောက်လာချိန် စိတ်ဓာတ်ကျနေသည့် သူ့မျက်နှာကို မြင်သည့်အခါ မေးလိုက်၏။ 

“မနေ့က ဘာဖြစ်ခဲ့တာလဲ ...”

ရှစ်ဟိုင်ယွမ်မှာ ရှက်ရွံ့သွားရတော့သည်။ 

မုန့်ယန်က ထပ်မေးလိုက်သည်။ 

“တစ္ဆေဘုရင် ... သူက ကိုင်တွယ်ဖို့ ခက်လား ...”

ရှစ်ဟိုင်ယွမ်က သုန်မှုန်စွာဖြင့် ပြောလိုက်သည်။

“ငါ သူ့ကို နောက်တစ်ကြိမ် မျက်နှာချင်း မဆိုင်ချင်တော့ဘူး ...”

မုန့်ယန်က သူ ထိုသို့ ပြောလာမည်ဟု ထင်မထားသည့်အတွက် ကြောင်အသွားတော့သည်။ 

တစ္ဆေဘုရင်က ဒီလောက်တောင် အင်အားကြီးတာလား ရှစ်ဟိုင်ယွမ်လို နဝမအဆင့် တိုက်ခိုက်သူတောင် နောက်တစ်ခေါက် မတိုက်ရဲလောက်တော့တဲ့အထိလေ ...

သူတို့က အတော်လေး သတိလက်လွတ် လုပ်ခဲ့မိတာပဲ ...

ကျောက်ချင်းယွင်သည် ဟုန်ယဲ့မြို့တော်သို့ ရောက်လာသူ နှစ်ဦးအနက် ပိုအသက်ကြီးသည့် ယဇ်ဆရာဖြစ်သည်။ သူကလည်း အကြီးအကဲ၏ လက်ထဲရှိ ရတနာကို လိုချင်နေရာ မနေ့ညက မုန့်ယန်နှင့် အခြားသူများ လှုပ်ရှားသည့်အခါ သူက အမှောင်ထဲမှ အကဲခတ်နေခဲ့ပြီး အလစ်သုတ်ရန် စီစဉ်ထားခဲ့၏။ 

ရလဒ်အနေဖြ

င့် သူ စောင့်ကြည့်ပြီး မကြာမီမှာပင် မုန့်ယန်နှင့် အပေါင်းအပါများ ထွက်ပြေးလာကြသည်။ 

တစ္ဆေဘုရင်က ဒီလောက်တောင် အင်အားကြီးတာလား .. ဒါမှမဟုတ် စိုက်ခင်းက ထောင်ချောက် ဖြစ်နေတာလား ...

လမ်းကြောင်းကို စစ်ဆေးဖို့ လူတစ်ယောက်လောက် အရင်ရှာမှ ဖြစ်မယ်ထင်တယ် ...