အပိုင်း ၁၂၇

Chapter 127

(အချစ်ပြိုင်ဘက်ကို ရှာတွေ့အောင် လုပ်ရမယ်...)

အဖေဝေ့၏ အမည်အောက်တွင် သနားစရာကောင်းသော အစုရှယ်ယာအနည်းစုသာ ရှိပြီး ရှယ်ယာအများစုမှာ အဘိုးဝေ့၏ လက်ထဲတွင် ရှိနေသည်။ အဘိုးဝေ့သည် အစုရှယ်ယာအားလုံးကို အဖေဝေ့ထံ လွှဲပြောင်းမပေးချင်ဘဲ ဝေ့ထင်ထံ တိုက်ရိုက်လွှဲပြောင်းပေးလိုသည်။

အဘိုးဝေ့က သူတို့တွေ ဘာတွေတွေးနေမှန်း သိနေတာကြောင့်  သူက ယဉ်ကျေးစွာပြောခြင်းဖြစ်သည်။ ထို့နောက် စုမုန့်အား လူတိုင်းနှင့် မိတ်ဆက်ပေးသည်။  

“ဒါက ဝေ့ထင်ရဲ့ ဇနီး..ငါ့မြေးမ စုမုန့်....ငါ့သူငယ်ချင်းတော်တော်များများက သူမကို မသိတော့ ငါက မိတ်ဆက်ပေးတာ"

အဘိုးဝေ့ က သူမကို မိတ်ဆက်ပြီးသည်နှင့်၊ထိုလူများက စုမုန့်ကို ချီးကျူးကြသည်။  

"မစ္စစုမုန့်က တစ်ကယ်လှတာပဲ...သူမဟာ ဥက္ကဌဝေ့အတွက် ပြီးပြည့်စုံတဲ့ ဇနီးကောင်းတစ်ယောက်ပါ"

 “ဟုတ်ပါတယ်၊ မစ္စစုက ဝေ့ထင် သဘောကျနိုင်တဲ့ ထူးခြားချက်တွေ အများကြီးရှိရမယ်...တစ်ကယ်ကို အားကျစရာကောင်းပါတယ်"

စုမုန့်ကို ပတ်ဝန်းကျင်က လူတွေ တစ်ယောက်ပြီး တစ်ယောက် ချီးမွမ်းနေသဖြင့် ဝေ့ရွှယ် စိတ်မသက်မသာဖြစ်လာရ၏။ထိုအချိန်တွင် သူမ၏ ယောက်ျားလေး သူငယ်ချင်း တစ်ယောက်က လာပြီး သူမ နားကိုကပ်ကာ  တိုးတိုးလေးပြောသည်။

 "ဝေ့ရွှယ်၊နင့်မှာ အရမ်းလှတဲ့ ယောင်းမ တစ်ယောက် ရှိနေတာကို ဘာလို့ သူမကို ငါတို့နဲ့ မိတ်ဆက်မပေးတာလဲ…ဘာလို့လဲ...ငါက သူမကို မျက်စိကျမှာ ကြောက်လို့လား"

ထိုလူက တော်တော်ကြည့်ကောင်းသည်။သို့သော် မျက်နှာက ခင်ချင်စရာမကောင်းပေ။အဆီတဝင်းဝင်းနှင့် လူကောင်းပုံမျိုးမဟုတ်။သူ ပြောနေပုံမှာ သူ့ကိုယ်သူ အတော်ချောသည်ဟု ထင်နေပုံပင်။သူက ရှောင်ရှောင် ၏ အစ်ကိုဖြစ်သူ ရှောင်ချမ် ပင်။ ရှောင်မိသားစု၏ တတိယမြောက်သခင်လေးဖြစ်၏။သူသည် နေရာတိုင်းတွင် မိန်းကလေးများနှင့် ရှုပ်ပွေရန် သူ၏ ရုပ်ရည်ကလေးနှင့် မိသားစုနောက်ခံကောင်းကို အသုံးပြုလေ့ရှိသည်။ အပျိုများကို လိုက်လျှင် တော်သေးသော်လည်း အိမ်ထောင်သည်မိန်းမများကိုပါ သတ္တိရှိရှိ လိုက်ရဲသူပင်။ထို့ကြောင့် ဤအသိုင်းအဝိုင်းထဲမှာ သူ့ကို ပလေးဘွိုင်းဟု ခေါ်ကြပြီး လူအများက သူ့ကို မုန်းတီးကြသည်။

 ဤချမ်းသာသော ဒုတိယမျိုးဆက်၏ အသိုင်းအဝိုင်းတွင် ကလေးများစွာသည် မိသားစုပိုင်ဆိုင်မှုအတွက် ရန်ဖြစ်ကြသူများဖြစ်၍ ရှောင်ချမ်သည်လည်း လုပ်သင့်၊မလုပ်သင့် ဆိုတာမျိုးကို ခွဲခြားတတ်၏။ သူသည် အပြင်တွင် နာမည်ပျက်ရုံသာမက အခြားသူများ၏ မုန်းတီးခြင်းကို ခံခဲ့ရသည်။ သူ့မိသားစုဝင်တွေတောင် သူ့ကို မုန်းတီးနေ၍၊ ဘယ်သူကဖြစ်ဖြစ် သူ့ကို မကြိုဆိုကြချေ။

ရှောင်ချမ်သည် သူ့ကိုမုန်းရခြင်း၏ အကြောင်းပြချက်ကို သိသော်လည်း မပြောင်းလဲပေ။ သူ့နည်းသူ့ဟန်ဖြင့် အမြဲစွတ်လုပ်နေခဲ့သည်။ ဝေ့ရွှယ် ကလွဲ၍  သူ့အပေါ် ကြင်နာတတ်သူ သိပ်မရှိ။ သို့သော်လည်း ဝေ့ရွှယ် နူးညံ့သိမ်မွေ့ရခြင်းသည် လူတိုင်းရှေ့တွင် ထိုသို့သော ကြင်နာ ပုံပေါက်အောင် ဟန်ဆောင်ရခြင်းကြောင့်သာဖြစ်သည်။ ဘယ်သူဖြစ်ဖြစ်၊သူမဘက်က အမြဲကောင်းစွာဆက်ဆံပေး၏။အရေးကြီးဆုံးက သူမ နာမည်ကြီးဖို့ပင်။

 သို့သော်လည်း ရှောင်ချမ် ၏ စိတ်ထဲတွင် ဝေ့ရွှယ် ၏ သဘောကောင်းမှုမှာ  သူနှင့် မိတ်ဆွေဖွဲ့လိုခြင်းဖြစ်ပြီး သူ့ကို သူငယ်ချင်းကောင်းအဖြစ် ဆက်ဆံသည်ဟု ထင်မြင်နေသည်။

 ....

ဝေ့ရွှယ် သူ့ကို စိတ်ထဲကနေ မထီမဲ့မြင် ကြည့်နေ‌ေသာ်လည်း အပေါ်ယံကမူ နူးညံ့စွာပြုံးလိုက်ရင်း တွေးမိသည်။ 'ဒီပလေးဘွိုင်းကို ငါဘယ်လိုလုပ် မေ့သွားရတာလဲ... သူက မှ ငါ့ကို ကူညီနိုင်မှာ'

ထိုသို့တွေးပြီး သူမက စိတ်ရှုပ်နေပုံဖြင့်

"ငါက နင်တို့ကို မိတ်ဆက်မပေးချင်တာမဟုတ်ဘူး၊ တကယ်တော့...နောက်ထပ်အကြောင်းပြချက်တစ်ခုရှိသေးတယ်"

 "ဘာအကြောင်းကြောင့်လဲ"  ရှောင်ချမ်က မေးသည်။

ဝေ့ရွှယ် သက်ပြင်းတစ်ချက်ချပြီး ဝမ်းနည်းနေဟန်ဖြင့်ပြောသည်။

 “ဒါတွေအားလုံးက သူမနဲ့ ငါ့အစ်ကိုကြားက ဆက်ဆံရေးပြဿနာကြောင့်ပါ...  ဒါက… တကယ်သနားစရာပဲ…ငါက သူမကို အရမ်းခင်ပါတယ်"

ရှောင်ချမ်က ဝေ့ရွှယ် ပြောသည်ကို ကြားလျှင် သူချက်ချင်း စိတ်ဝင်စားသွားပြီး “ဘာပြဿနာလဲ… စိတ်မပူပါနဲ့… ငါတို့က နှစ်ပေါင်းများစွာ သူငယ်ချင်းဖြစ်ခဲ့ကြတာ...ငါက  နည်းနည်း ရှုပ်တယ်ဆိုရင်တောင် ကိုယ့်သူငယ်ချင်းတွေရဲ့ လူတွေကို ဘယ်တော့မှ မထိဘူး...နင့်ယောင်းမကို  စိတ်ပူနေစရာမလိုဘူး... မြန်မြန်ပြောနော်!"

သူက စုမုန့် ကို တစ်ခုခုလုပ်ဖို့ မျှော်လင့်မိပေမယ့် သူက မလုပ်ရဲဘူးလား..… ရှောင်ချမ် မှာ သတ္တိမရှိမှန်း သူမ သိသော်လည်း၊ အနည်းဆုံး စုမုန့်ကို နှောင့်ယှက်နိုင်သည်။ သူ့ကိုသာ အပိုင်ပေါင်းထားမည်ဆိုလျှင်၊ သူမအတွက် အကူအညီတစ်ခုသဖွယ် အသုံးဝင်လာလိမ့်မည်။ထိုသို့တွေးပြီး ရှောင်ချမ် စုမုန့်ကို စိတ်ဝင်စားစေဖို့အတွက် သူမ ဘာပြောသင့်သလဲ ဆိုတာကို တွေးလိုက်သည်။

ဝေ့ရွှယ် က အချိန်အကြာကြီး တွေးနေတာကြောင့် ရှောင်ချမ် က ပြောလာသည်။

 "ဝေ့ရွှယ်၊နင် ငါ့ကို စိတ်ပူလို့ မပြောချင်ဘူးဖြစ်နေတာ မဟုတ်ဘူးလား…နင် စိတ်မပူဖို့ ငါပြောထားပြီးသား…  ငါ့သူငယ်ချင်းတွေရဲ့လူတွေကို ငါတကယ်ဘာမှလုပ်မှာမဟုတ်ဘူး…ပြီးတော့ နင့်ရဲ့အစ်ကိုက ဝေ့ထင် ပါ...သူ့မိန်းမကို  ဘယ်သူက ထိရဲမှာလဲ…ငါက သေချင်လို့ သွားထိရမှာလား"

ထိုအခါ ရှောင်ချမ် က စုမုန့် ကို တစ်ကယ်မထိဝံ့မှာစိုး၍ ဝေ့ရွှယ် အမြန်ပြောလိုက်သည်။

 “မဟုတ်ဘူး၊ ငါဆိုလိုတာကို နင် နားလည်မှုလွဲနေတာ...ငါက အဲ့ဒီလိုမထင်ပါဘူး…နောက်ပြီး အစ်ကိုက အရမ်းတော်တယ်… အစ်ကို့ကို နင် အရမ်းလည်း ကြောက်မနေနဲ့"

ရှောင်ချမ် က ပြုံးပြီး ခေါင်းညိတ်ကာ သူမပခုံးပေါ်မှာ သူ့လက်ကိုတင်ပြီး "ဒါဆို နင်က ဘာလို့ မပြောဝံ့တာလဲ" 

ဝေ့ရွှယ် သည် သူမ၏ ပခုံးပေါ်မှ သူ့လက်ကို ခါချပစ်ကာ  ရေထည့်‌ရန်မတ်တပ်ထလိုက်သည်။ ရှောင်ချမ် အတွက် ရေထည့်ပြီးနောက် သူမက 

"ငါပြောနိုင်တယ်၊ ဒါပေမယ့် ဒါကို လျှို့ဝှက်ထားရမှာ…တခြားသူတွေကို မသိစေရဘူး...မဟုတ်ရင် ငါ့ယောက်မက ငါ့ကို အပြစ်တင်မှာ ကြောက်တယ်"

(ကစားသမားတစ်ဦးစီအတွက် အကွက်ရွှေ့ခြင်း)

ရှောင်ချမ်သည် သူ၏ ဘယ်လက်ကို မြှောက်ကာ ကောင်းကင်သို့ ကျိန်ဆိုလိုက်သည်။ 

 "စိတ်မပူပါနဲ့…ငါ ဘယ်သူ့ကိုမှ မပြောဘူးလို့ ကတိပေးတယ်...တစ်ကယ်လို့ ပြောခဲ့မယ်ဆိုရင် တခြား ကောင်မလေးတွေကို လိုက်လို့မရပါ‌စေနဲ့..... ဘယ်လိုလဲ… ဒီသစ္စာက အဆိပ်သင့်နိုင်တယ်မလား”

ဝေ့ရွှယ် ရှောင်ချမ်ကို စိတ်ထဲက ရယ်နေမိ၏။သူမက မကောင်းသည့် လုပ်ရပ်တစ်ခုလုပ်ဖို့ ပေါ့ပေါ့တန်တန်ပြောနေသော်လည်း၊အရူး ရှောင်ချမ် က သူမကို တစ်ကယ်ယုံကြည်ပြီး ယခုလို အဆိပ်ပြင်းသည့် ကျိန်ဆိုမှုမျိုကိုတောင် ကျိန်ဆိုခဲ့သည်။

ရှောင်မိသားစု၏ တတိယမြောက် သခင်လေး၏ ဂန္ထဝင်စကားမှာ 'ယောက်ျားတစ်ယောက်က သေချင် သေနိုင်တယ်...ဒါပေမယ့် ချောမောလှပတဲ့ မိန်းကလေး တစ်ယောက်ကို အလွတ်မပေးရဘူး' ဖြစ်မှန်း ဘယ်သူက မသိဘဲနေမှာလဲ...ဒါပေမယ့် ဒီလိုကြီးကျိန်ဆိုတာကတော့ ယုံရခက်ခက်ပဲ…

 "နင် အရမ်းတွေးနေတာပဲ... ငါက နင့်ကို မကျိန်ဆိုခိုင်းပါဘူး...ငါတို့က နှစ်ပေါင်းများစွာ သူငယ်ချင်းဖြစ်ခဲ့ကြတာ… ဒီလိုအသေးအမွှားကိစ္စတွေကို မယုံရင် သူငယ်ချင်းအဖြစ် ဘယ်လိုသတ်မှတ်ရမလဲ"  

သူမ သက်ပြင်းချလိုက်ပြီး ဆက်၍

 “တစ်ကယ်တော့ ဒီလိုပါပဲ...ငါ့ယောင်းမက အစ်ကို့ကို အရမ်းချစ်တယ်…သူမက အစ်ကို့အနားက နာမည်ကြီးမင်းသမီးတွေကိုတောင်  စော်ကား ပြောဆိုခဲ့တာ”

 “ဒီတော့ အစ်ကိုက သည်းမခံနိုင်တော့ဘူး...သူတို့ နှစ်ယောက် ခဏတိုင်း ရန်ဖြစ်ရတယ်...တစ်ရက်ကျတော့ အစ်ကို့အပေါ်ထားတဲ့ ယောင်းမရဲ့ သဘောထားက ရုတ်တရက် ပြောင်းလဲသွားတယ်...ကြည့်ရတာ...အစ်ကို့ သူမကို အလျှော့ပေးအောင် တမင်သက်သက်လုပ်ပြနေတာထင်တယ်...သူမက နားမလည်နိုင်တဲ့ကိစ္စတွေလည်း လုပ်ခဲ့သေးတာ...အစ်ကိုက တစ်ကယ်ကို သည်းမခံနိုင်တော့ဘူးလေ...အခု သူတို့နှစ်ယောက် ကွာရှင်းဖို့ ပြင်ဆင်နေကြပြီ” 

ဝေ့ရွှယ် အမှန်ကိုတစ်ဝက်ခန့် ထည့်ပြောထား၏။ရှောင်ချမ် လုံးဝသံသယမ၀င်ပေ။သူမစကားကိုကြားပြီးနောက် သူ တစ်ကယ်ယုံကြည်ခဲ့သည်။တစ်ဖန် စုမုန့်ကိုကြည့်လိုက်သည့် သူ့မျက်လုံးတွေက ချက်ချင်းတောက်ပသွားသည်။သူ မျက်တောင်မခတ်ဘဲ စုမုန့်ကို  စိုက်ကြည့်နေသည်။ထိုအကြည့်သည် သားကောင်ကို တွေ့ရှိသွားသည့် မြေခွေးနှင့်တူသည်။ 

ဝေ့ရွှယ်လည်း ရှောင်ချမ် အကြည့်ကို မြင်လိုက်သဖြင့် စိတ်ထဲမှာ တိတ်တိတ်လေး လှောင်ရယ်နေမိ၏။ရှောင်ချမ်က သူမကို တစ်ကယ်ယုံကြည်နေပုံရသည်။

 "ဝေ့ရွှယ်...နင့်အစ်ကိုက သူမကို မကြိုက်လို့ ကွာရှင်းဖို့ ပြင်ဆင်နေတယ်လို့ နင် ပြောခဲ့တယ်မလား...ဒါအမှန်လား"  

ရှောင်ချမ် က ဝေ့ရွှယ် ကို မေးနေသော်လည်း သူ့မျက်လုံးတွေက စုမုန့် ကိုသာ မမှိတ်မသုန် စိုက်ကြည့်နေဆဲပင်။

ဝေ့ရွှယ် ရယ်ချင်စိတ်ကို ထိန်းကာ သက်ပြင်းချသော အမူအရာဖြင့် ပြောသည်။

“ဟုတ်တယ်…ငါ့အစ်ကိုက သူမကို လုံးဝမကြိုက်ဘူး…မကွာရှင်းသေးပေမယ့် ငါယောက်မက တခြားယောက်ျား တစ်ယောကက်နဲ့ နေနေပြီ… ဒါကိုလည်း အစ်ကိုက ဘာမှ မပြောဘူး”

သူတို့နှစ်ယောက် တစ်ခန်းတည်းမအိပ်ကြသော်လည်း စုမုန့် သည် ထိုယောက်ျားနှင့် ရင်းနှီးသည်ကို သူမ မြင်ဖူးထား၍၊သူမ ပြောသည့်စကားမှာ အမှားအယွင်းမရှိပေ။ အကြမ်းဖျင်းပြောရလျှင် စုမုန့် သည် ကွာရှင်းခြင်းမပြုမီ တခြားအမျိုးသားတစ်ဦးနှင့် နေထိုင်ခဲ့သည်။သူမ ဘယ်လိုနေထိုင်ခဲ့လဲ ဆိုသည်က ကြားရသူတိုင်း အထင်လွဲချင်စရာပင်။ထို့ကြောင့် ဝေ့ရွှယ် စကားက အဓိပ္ပါယ်ကို အတော်ပြောင်းလဲစေ၏။

ရှောင်ချမ် ပါးစပ်ပါ အဟောင်းသားဖြစ်သွားရသည်။ သူ အရင်က မရေမတွက်နိုင်သည့် မိန်းကလေးတွေကို လိုက်ခဲ့ဖူးသော်လည်း ဝေ့ရွှယ် ပြောသော စုမုန့် လုပ်ရပ်က သူ့ကို အံအားသင့်စေလေသည်။ 

စုမုန့် က ဘယ်သူမို့လဲ… သူမသည် ဝေ့ထင် ၏တရားဝင်ဇနီးဖြစ်ပြီး ဝေ့မိသားစု၏ သခင်မလေး ဖြစ်သည်။ ဝေ့ထင် က ဘယ်သူလဲ…သူသည် နောင်တစ်ချိန်မှာ ဝေ့မိသားစုတစ်ခုလုံး၏ လုပ်ငန်းများအား အမွေဆက်ခံမည့် အကြီးဆုံး သခင်လေး ဖြစ်သည်။ဝေ့ရွှယ် အပြောအရ သူတို့နှစ်ယောက်ဟာ လုပ်ချင်ရာလုပ်နေကြသော အကြင်လင်မယားသာ။

ရှောင်ချမ် စိတ်ထဲက သဘောကျသွားသည်။ သူတို့လင်မယားနှစ်ယောက်က သူ့ထက်ပိုပြီး လူလည်ကျတတ်သည်။ ဝေ့ထင် သည် သူနှင့်သက်ဆိုင်သည့်အရာများကို အခြားသူများအား လိုချက်စိတ်ပင်ဖြစ်ခွင့်မပေးသော လူမျိုးဟု သူ အမြဲတွေးခဲ့သည်။သို့သော်၊ယခုလို သူပိုင်သော အရာတစ်ခုအား သဘောကောင်းဖို့  မမျှော်လင့်ခဲ့ပေ။

 ထိုအခြေအနေကြောင့် ရှောင်ချမ် စိတ်ထဲတွင် အတွေးတစ်ခု တဖြည်းဖြည်း ပေါ်လာသည်။ ဝေ့ထင် က စုမုန့် ကို ဂရုမစိုက်ဘဲ ကွာရှင်းတော့မည်ဆိုလျှင်...  ဒါဆို သူ ကြိုးစားကြည့်နိုင်မလား...

 သူ့စိတ်ထဲမှာတွေးနေသော်လည်း စုမုန့် သည် ​​ဝေ့ရွှယ်၏ မိသားစုဝင်ဖြစ်တာကြောင့် သူမ ထင်မြင်ချက်ကို သိရှိရန် လိုအပ်သည်ဟု သူ ခံစားမိသည်။

 "ဝေ့ရွှယ် နင့်အစ်ကိုနဲ့ ယောက်မတို့ ဆက်ဆံရေးက အရမ်းအေးစက် နေတယ်ဆိုတော့ ငါကြိုးစားကြည့်လို့ရမလား"  သူက အစမ်းသဘောမေးသည်။

ဝေ့ရွှယ် နားမလည်ဟန်ဆောင်ကာ ယောင်ဝါးဝါးဖြင့်

 “အားယာ၊နင် ငါယောက်မကို အနိုင်ကျင့်ဖို့ တွေးမနေနဲ့...သူမက မကြာခင် ငါ့အစ်ကိုနဲ့  ကွာရှင်းတော့မှာ ဆိုတော့ ဝေ့မိသားစုဝင်မဟုတ်တော့ပေမယ့် သူမက ငါ့ယောင်းမနော်...နင် သူ့ကိုအနိုင်ကျင့်ရင် ငါဒေါသထွက်မိလိမ့်မယ်"

ဝေ့ရွှယ် က မငြင်းသဖြင့် ရှောင်ချမ် နောက်ထပ်မေးခွန်းမမေးတော့။ဝေ့ရွှယ် ၏ သဘောထားမှာ အလွန်ထင်ရှားသည်။စုမုန့်ကို အနိုင်မကျင့်သရွေ့တော့ သူဘာပဲလုပ်လုပ်၊လုပ်ခွင့်ရှိနေ၏။

ရှောင်ချမ်၏ အကြည့်များသည် စုမုန့်ကို ကြည့်နေရင်း ပို၍ စူးရှနက်နဲလာသယောင်ပင်။ထို့အပြင် သူမကို ပိုကြည့်လေ၊ သူမက ပိုလှလာလေလေပင်။ 

စုမုန့်  လောလောဆယ် မိတ်ကပ်မလိမ်းထားမှန်း သိသာသည်။နှုတ်ခမ်းနီလည်း မဆိုးထား။သူမ၏ မျက်နှာသွင်ပြင်သည် သပ်ရပ်ပြီး ပြေပြစ်သည်။ လက်ဖဝါးအရွယ် ဘဲဥပုံမျက်နှာပေါ်တွင် အပြစ်အနာအဆာတစ်ခုမှ မရှိ‌ေပ။  ရိုးရိုးရှင်းရှင်းလေးနှင့် အကြည့်ခံသောအလှမျိုးပင်။ 

 မိတ်ကပ်မလိမ်းဘဲနဲ့တောင် ဒီလိုပုံစံဖြစ်နေတာဆိုရင် မိတ်ကပ်လိမ်းရင် ဘယ်လောက်လှမလဲ...

ရှောင်ချမ်သည် မရေမတွက်နိုင်သော ပန်းပွင့်များနှင့် ရောနှောဖူးသူ ဖြစ်ကြောင်း ဝန်ခံသည်။စုမုန့် ဆိုသည့် ပန်းကလေးကသာ သူ့ကို အံ့အားသင့်ဆုံးသော ပန်းပွင့်ဖြစ်သည်။ထို့အပြင် သူမသည် အားလုံးထဲမှာ တောက်ပပြီး လှပနေသော်လည်း သူမ၏ စိတ်နေစိတ်ထားမှာ အေးစက်နေသည်။ ဒီလိုမိန်းမမျိုးကို အနိုင်ယူဖို့ မလွယ်ဘူး… သို့သော် သူမကို အနိုင်ယူခဲ့ရင် နောင်တွင်...

ထိုသို့တွေးပြီး သူ အနည်းငယ်စိုးရိမ်နေမိသည်။သူမလို မိန်းကလေးမျိုးကို တခြားသူတွေအား လုယူခွင့် မပေးချင်ပေ။ဝေ့ထင်က သူမကို  မလိုချင်ဘူးဖြစ်နေ၍ သူ့ကို အပြစ်လာတင်ဖို့ မလိုအပ်ပါချေ။

xxxxxx