အပိုင်း ၆၄ ( The Emperor 14 )

ယန်ကျင်းဇီသည် ချူထင်းရှိူ့အား မြို့စားဘွဲ့ရာထူးကို ပေးခဲ့သော်လည်း တပ်အာဏာကို ပြန်လည်မရုတ်သိမ်းခဲ့ပေ။

သူ့အတွက်မူ သူသည် အရပ်ဘက်မှူးမတ်များကို တာဝန်ယူထားလေသည်။ ပိုက်ဆံပိုရှာနိုင်မည့်နည်းလမ်းကို သူ ရှာတွေ့နိုင်မည်ဆိုလျှင် အကောင်းဆုံးဖြစ်သွားမည်ပင်။

ချီမင်းဆက်၏တိုင်းပြည်တွင် ပြဿနာများစွာ ရှိသည်။ ဥပမာအားဖြင့် စစ်တပ်သည် စားနပ်ရိက္ခာကို လုံလုံလောက်လောက် မထောက်ပံ့နိုင်... သူ သူ့တပ်သားများကို မဆုံးရှုံးချင်သေးပေ။

ပင်းဝမ်၏ပုန်ကန်မှု ပြီးဆုံးပြီးနောက် ကိစ္စရပ်များကို ရက်ပေါင်းများစွာ ကိုင်တွယ်ဖြေရှင်းခဲ့ရပြီး အဆုံးတွင်တော့ ပင်းဝမ်၏ပြစ်မှုများမှာ ပြီးပြတ်သွားခဲ့သည်။

မင်းဧကရာဇ်၏ဂုဏ်သတင်းမှာ ဂုဏ်သိက္ခာ၏ အရေးကိစ္စတစ်ရပ် ဖြစ်ပြီး ညီအစ်ကိုချင်းယှဉ်ပြိုင်မှုအကြောင်း အတင်းအဖျင်းပြောဆိုမှုများမှာ ကောင်းမွန်သော ကိစ္စရပ် မဟုတ်ချေ။ ပင်းဝမ်၏မိခင်ဘက်မှ မျိုးနွယ်ကလည်း လေးလေးနက်နက် အသနားခံတောင်းပန်ခဲ့ပြီး အကျိုးအမြတ်များစွာကို ကမ်းလှမ်းတင်ပြခဲ့သည်... ကောင်းကျိုးနှင့်ဆိုးကျိုးတို့ကို နှိုင်းဆပြီးနောက် ယန်ကျင်းဇီသည် ပင်းဝမ်ကို သေဒဏ်မပေးခဲ့ဘဲ အကျဉ်းချထားလိုက်သည်။

ဘွားတော်ကြီး ကွယ်လွန်သွားပြီး ပင်းဝမ်ကလည်း ကျဆုံးသွားကာ တော်ဝင်ညီလာခံတွင် မှူးမတ်အရာရှိများ သုံးပုံတစ်ပုံခန့် လျော့နည်းသွားသော်လည်း ညီလာခံတစ်ခုလုံးသည် မည်သည့်ပြဿနာမှ မရှိဘဲ ကောင်းမွန်စွာ လည်ပတ်နေလေသည်။

မကြာသေးမီကမှ ယန်ကျင်းဇီသည် အရေးကိစ္စများကို အရှိန်နှုန်းများများနှင့် ဖြေရှင်းနေလေရာ ဤမှူးမတ်အရာရှိများသည် သက်သက်လွတ် မစားရဲတော့ဘဲ တစ်ယောက်ပြီးတစ်ယောက် အစွမ်းကုန် ကြိုးစားပြီး တာဝန်ထမ်းဆောင်နေကြသည်။ ထိုအတိုင်းဆိုလျှင်ပင် ကောင်းမွန်သည်မဟုတ်ပါလော။

သို့သော်ငြား ပညာတော်သင်ကျောင်းသားများကို လူသစ်စုဆောင်းရန်နှင့် ငယ်ရွယ်သော မှူးမတ်အရာရှိများကို လေ့ကျင့်သင်ကြားပေးရန်အတွက် ယန်ကျင်းဇီသည် အနုပညာနှင့်သိပ္ပံ အထူးပညာရပ်သင်ကျောင်းတော်၏ ဖွင့်လှစ်မှုကို အမိန့်ပေးနေဆဲဖြစ်သည်။

ဤအချိန်တွင် ပင်းဝမ်၏ပုန်ကန်မှုအပြီး တစ်လကျော်ကြာမြင့်သွားပြီဖြစ်၏။

ဤလအတောအတွင်း ယန်ကျင်းဇီသည် အလွန့်အလွန် ပျော်ရွှင်ဖွယ်ကောင်းသော ဘဝတွင် နေထိုင်ခဲ့ရသည်။

သူ့စစ်သူကြီးက နန်းတော်ထဲမှာ ညတိုင်း နေတယ်!

ချူထင်းရှိူ့သည် မြောက်ပိုင်းတပ်ဖွဲ့၏အရေးကိစ္စများကို ဖြေရှင်းရန်အတွက် နေ့ဘက်၌ အပြင်ထွက်လိမ့်မည်ဖြစ်သော်ငြား သူသည် ညဘက်တွင် နန်းတော်သို့ ပြန်လာလိမ့်မည်ဖြစ်ပြီး ညစဉ်ညတိုင်း တက်ကြွနေခဲ့သည်... သူ့စစ်သူကြီးက အပြင်ဘက်တွင် အလွန်အေးခဲကာ အတွင်းထဲတွင်တော့ ပူပြင်းမှန်း ယန်ကျင်းဇီ မသိ‌ခဲ့ပေ။

ယန်ကျင်းဇီတောင် သူ မစားနိုင်တော့မှာကို စိုးရိမ်စပြုလာမိသည်...

နံနက်ခင်းညီလာခံကို သွားစရာမလိုသော်လည်း ယန်ကျင်းဇီသည် မနက်ပိုင်းတွင် စောစီးစွာ အိပ်ရာထခဲ့ပြီး ချူထင်းရှိူ့ကိုပါ အိပ်ရာနှိုးသည် : " ထင်းရှိူ့၊ ကိုယ် ဒီနေ့ကစပြီး ကိုယ်ခံပညာကို စလေ့ကျင့်တော့မယ်လို့ ဆုံးဖြတ်ထားတယ်... ပြီးတော့ မင်းလည်း ကိုယ်နဲ့ ပူးပေါင်းပေးရမယ်။ "

ချူထင်းရှိူ့တွင် ထိုမျှအင်အားရှိနေရခြင်းမှာ ငယ်စဉ်ကလေးဘဝကတည်းက လေ့ကျင့်ခဲ့ခြင်းကြောင့်သာ ဖြစ်ရမည်။ အဲ့ဒါကြောင့် သူလည်း ပိုလေ့ကျင့်ဖို့လိုနေပြီ!

မဟုတ်လျှင်... ညဘက် အိပ်ရာထဲတွင် ဘုရင်တစ်ပါး ဖြစ်ပြီး နေ့ဘက်တွင် နံရံကိုကိုင်၍ ‌လမ်းလျှောက်ရသည်မှာ အနည်းငယ်တော့ အရှက်တကွဲ အကျိုးနည်းဖြစ်သည်ပင်။

ချူထင်းရှိူ့ အံ့အားသင့်ပြီးနောက်မှသာ ပြောလာသည် : " အရှင်မင်းကြီး ကိုယ်ခံပညာရပ် လေ့ကျင့်ဖို့က ခက်ခဲတယ်... "

" ကိုယ် မကြောက်ဘူး။ " ယန်ကျင်းဇီတွင် စိတ်ဆုံးဖြတ်ချက်ခိုင်မာမှုများ ပြည့်နှက်နေလေသည်။

သူ ကိုယ်ခံပညာရပ်ကို အခု သင်ရမယ်!

တကယ်တော့ သူ ယခင်‌ဧကရာဇ်မင်းများကို အနည်းငယ် လေးစားမိသည်။

သူက တစ်ယောက်ကိုတောင် မကိုင်တွယ်နိုင်လေရာ ထိုဧကရာဇ်များက မောင်းမဆောင်မှ သုံးထောင်သော အလှလေးတွေကို ရရှိအောင် ဘယ်လိုစီမံခဲ့ကြသလဲ?

ချူထင်းရှိူ့သည် ပင်ကိုသဘာဝအလျောက် ယန်ကျင်းဇီ၏တောင်းဆိုမှုကို တားမြစ်လိမ့်မည်မဟုတ်သော်လည်း သူ့အဘိုးသည် ရွှံ့ခြေထောက်တစ်ချောင်းဖြင့် မွေးဖွားခဲ့သဖြင့် သူ့မိသားစုတွင် အမှန်တကယ်ပင် မည်သည့်မိသားစုရိုးရာသိုင်းပညာမှ မရှိချေ။ ထို့နောက် သူသည် ယန်ကျင်းဇီ၏အစောင့်တပ်မှူးကို ခေါ်လိုက်သည်။

အစောင့်တပ်မှူးသည် တပ်အရာရှိမိသားစုတစ်စုတွင် မွေးဖွားလာခဲ့ပြီး မိသားစုထဲမှ ကောင်လေးတိုင်း ကိုယ်ခံပညာကို သင်ယူရမည်ဖြစ်သည်။ သူက လူသစ်တစ်ယောက်ကို မည်သို့သင်ကြားပေးရမည်အား သူ့ထက်(ချူထင်းရှိူ့ထက်) ပိုသိသည်။

" အရှင်မင်းကြီး၊ အရှင်က အရင်ဆုံး ပြေးသင့်ပါတယ်။ " အစောင့်တပ်မှူးသည် ပထမဦးစွာ သူ့အရှင်မင်းကြီး၏ ကိုယ်ခန္ဓာကြံ့ခိုင်မှုကို စစ်ကြည့်ရန် ဆုံးဖြတ်ခဲ့သည်။

ယန်ကျင်းဇီသည် လေးနက်စွာ ခေါင်းညိတ်ပြီး ပြေးတော့သည်။

မူလပိုင်ရှင်သည် ရံဖန်ရံခါမျှသာ လေ့ကျင့်လေ့ရှိသည်။ ခဏတဖြုတ် ပြေးပြီးနောက် ယန်ကျင်းဇီ ခြေကုန်လက်ပန်းကျကာ မောသွားစဉ် နန်းတော်ထဲမှ လေ့ကျင့်ရေးကွင်းပြင်တွင် သူနှင့်အတူ ပြေးနေသော ချူထင်းရှိူ့ကမူ သူ့အား တာပတ်များစွာ ကျော်တက်သွားခဲ့ပြီဖြစ်သည်။

နည်းနည်းတော့ ရှက်ဖွယ်ကောင်းသည်...

ယန်ကျင်းဇီ အံကြိတ်ကာ ဆက်ပြေးသော်လည်း အဆုံး၌မူ သူ ဆက်မထိန်းနိုင်တော့ပေ : " ထင်းရှိူ့! "

" အရှင်မင်းကြီး? " ချူထင်းရှိူ့သည် ယန်ကျင်းဇီ၏အနားသို့ ရောက်လာခဲ့သည်။ သူ့မျက်နှာမှာ နီမနေဘဲ သူ့အသက်ရှုသံကလည်း ပုံမှန်ကဲ့သို့ တည်ငြိမ်နေသည်။

သူသည် ယခုတလော ယန်ကျင်းဇီအား တစ်နေကုန် နှောင့်ယှက်နေလေ့ရှိပြီး သူ၏ကာယလေ့ကျင့်ချိန်မှာ ယခင်ကထက် ပိုမိုလျော့နည်းသွားသော်ငြား သူသည် အချိန်ရသရွေ့ လေ့ကျင့်နေတတ်သည့်အပြင် သူ့တွင် သူ့အခြေခံကလည်း ရှိနေဆဲဖြစ်လေရာ... ပြေးခြင်းဟာ သူ့အတွက် အလွယ်ကူဆုံးပင်။

" ထင်းရှိူ့ ကိုယ် ဆက်မပြေးနိုင်တော့ဘူး။ " ယန်ကျင်းဇီ ချူထင်းရှိူ့ကိုယ်ပေါ်တွင် မှီလိုက်သည် : " မင်း ကိုယ့်ကို နမ်းမှပဲ ကိုယ် ဆက်ပြေးနိုင်တော့မယ်။ "

ချူထင်းရှိူ့သည် အစောင့်တပ်မှူးအား တစ်ချက်လှမ်းကြည့်ကာ ယန်ကျင်းဇီအား ချက်ချင်း နမ်းလိုက်သည်။

အစောင့်တပ်မှူး : " ... " အရှင်မင်းကြီးက လူတိုင်းကို ထွက်သွားစေချင်တာ မဆန်းတော့ပါဘူး၊ အဲ့ဒါကမှ မူလအစီအစဉ်ပဲ!

မိန်းမစိုးချုပ်ဝမ် : " ... " အရှင်မင်းကြီး၏ခွန်အားကို အမျိုးသမီးတစ်ဦး‌အပေါ်တွင်သာ အသုံးပြုမည်ဆိုလျှင် မင်းသားငယ်လေးတစ်ဦးတော့ ပဋိသန္ဓေတည်နေလောက်ပြီ။

ယန်ကျင်းဇီသည် ချူထင်းရှိူ့နှင့် ခဏတဖြုတ် ကလူကျီစယ်ပြီးနောက် ဆက်လက်၍ ပြေးတော့သည်။

သူသည် ပြေးပြီးသွားသောအခါ သူ၏လက်များနှင့်ခြေထောက်များကို နှိပ်နယ်ပေးရန် ချူထင်းရှိူ့အား သွေးဆောင်ခဲ့သည်။

သေချာတာပေါ့၊ အယူရှိလျှင် ‌အပေးရှိမှ မှန်ကန်မည်ဖြစ်သည်။ ဒါကြောင့် သူလည်း ချူထင်းရှိူ့ကို ကူညီပြီး နှိပ်နယ်ပေးမယ်!

နှိပ်နယ်ပေးခြင်းမှ အခြားတစ်စုံတစ်ခုသို့ အဆင့်တိုးတက်ပြောင်းလဲသွားခြင်းအတွက်မူ... ယန်ကျင်းဇီသည် သူက လေ့ကျင့်ပြီးခါစဖြစ်ပြီး သူ့နှလုံးက လုံလုံလောက်လောက် မသန်မာသည်ကို ဝန်ခံရမည်ပင်။

သို့သော် ချူထင်းရှိူ့က လက်ဦးမှုရယူလေရာ ပြဿနာတော့ မရှိပါချေ။

ယန်ကျင်းဇီသည် လေ့ကျင့်နေစဉ် သူ့စစ်သူကြီးအား အသားယူကျီစယ်နေခဲ့သော်လည်း သူသည် လေ့ကျင့်နေချိန်၌ အမှန်တကယ် လေးနက်ပြီး မဆုတ်မနစ် ကြိုးပမ်းခဲ့သည်။

ပထမဆုံးရက်အနည်းငယ်အတွင်း သူ လက်မမြှောက်နိုင်သည့်အထိ သူ့လက်မောင်းများ နာကျင်ကိုက်ခဲနေခဲ့သော်ငြား ဆယ်ရက်ကြာပြီးနောက် ဤအခြင်းအရာမှာ ပပျောက်သွားပြီး နောက်ထပ်ဆယ်ရက်ကြာပြီးနောက်တွင်တော့ သူသည် အနည်းငယ် အသားညိုသွားရုံတင်မကဘဲ ပို၍လည်း သန်မာလာသည်။

နေ့စဉ်နေ့တိုင်း သူ့တွင် အလုပ်လုပ်စရာမကျန်တော့သောအခါ သူသည် ကိုယ်ခံပညာလေ့ကျင့်ရန် သူ့စစ်သူကြီးအား ဆွဲခေါ်သွားလိမ့်မည်ဖြစ်သည်။

အမှန်ပင်၊ သူ ဤသို့ပြုမူရသည်မှာလည်း ချူထင်းရှိူ့သည် သိုင်းလေ့ကျင့်ချိန်တိုင်း အမြဲတစေ အထူးတလည် စိတ်အခြေအနေကောင်းမွန်လေ့ရှိသည်ကို သူ ရှာတွေ့ထားသောကြောင့်သာ ဖြစ်သည်။

ချူထင်းရှိူ့သည် မြောက်ပိုင်းတွင် ကြီးပြင်းခဲ့ပြီး မြောက်ပိုင်းတွင် မြင်းစီးခြင်း၏‌လွတ်လပ်မှုကို ပျော်ရွှင်ကြည်နူးခဲ့မည်ဖြစ်သော်လည်း ယခု သူက မြို့တော်တွင် ပိတ်မိနေသည်...

အမှန်တကယ်တော့ ယန်ကျင်းဇီသည် အတော်ကလေး အပြစ်ရှိသကဲ့သို့ ခံစားရသော်ငြား သူသည် သူ့အား ( ချူထင်းရှိူ့အား ) ပြန်သွားခွင့်ပြုရန် တွန့်ဆုတ်နေခဲ့သည်။

သူ လုပ်နိုင်သည့် တစ်ခုတည်းသော အရာမှာ ချူထင်းရှိူ့အား မြို့တော်အပြင်ဘက်သို့ လမ်းလျှောက်ထွက်ရန် ခေါ်ဆောင်သွားခြင်းသာ ဖြစ်သည်။

ယန်ကျင်းဇီသည် ရက်အနည်းငယ်ခန့် ဆော့ကစားရန်အတွက် မြို့တော်အပြင်ဘက်ရှိ ရွာတစ်ရွာသို့ သူ့စစ်သူကြီးအား ခေါ်သွားရန် စီစဉ်နေစဉ် ညီလာခံရှိ မှူးမတ်များမှာ ဘွားတော်ကြီး၏အရေးကိစ္စအား ထပ်မံဖော်ထုတ်လာကြပြန်သည်။

ဘွားတော်ကြီး ကွယ်လွန်သွားချိန်၌ သူသည် သုံးနှစ်တိတိ ဘွားတော်ကြီးအတွက် ဝမ်းနည်းပူဆွေးလိမ့်မည်ဟု သူ ပြောခဲ့သည်။

ထိုအချိန်တွင် မှူးမတ်များစွာက ဆန့်ကျင်ခဲ့ကြပြီး ဝမ်းနည်းပူဆွေးခြင်းအခမ်းအနားကို သုံးနှစ်တိတိ ကျင်းပခြင်းမှာ မလိုအပ်ကြောင်း လျှောက်တင်ခဲ့ကြသည်။ သို့သော် ပင်းဝမ်က လှုပ်ရှားခဲ့ရာ ယန်ကျင်းဇီက ဘွားတော်ကြီးအား အဆိပ်ခတ်ခဲ့သည်ဟု ကောလာဟလများ ထွက်ပေါ်လာခဲ့သည်...

မှူးမတ်များသည် သူ ဤသို့ပြောရခြင်းမှာ သူ၏ အပြစ်ကင်းစင်မှုနှင့် သားသမီးဝတ္တရားကျေပွန်မှုတို့ကို သက်သေပြချင်သည်ဟု ခံစားခဲ့ကြရသဖြင့် သူတို့သည် ပြင်းပြင်းထန်ထန် မကန့်ကွက်ခဲ့ကြတော့ပေ။

သို့ရာတွင် ယခု ကောလာဟလများ ပျောက်ကွယ်သွားပြီး မူလက ရုပ်သေးဧကရာဇ် ဖြစ်ခဲ့သော အရှင်မင်းကြီးသည် သူ့ခွန်အားအစစ်ကို ပြသပြီးသွားပြီဖြစ်သည်...

မှူးမတ်အချို့သည် အရှင်မင်းကြီးက ဧကရီတစ်ပါးကို လိုချင်လိမ့်မည်ဟု တွေးမိကြသဖြင့် ညီလာခံရှိ မှူးမတ်အချို့သည် ဘုရင်တစ်ပါး ဖြစ်သော အရှင်မင်းကြီးသည် ဝမ်းနည်းပူဆွေးခြင်းအခမ်းအနားကို သုံးနှစ်တာ ထိန်းသိမ်းကျင်းပရန် မလိုအပ်ကြောင်း လျှောက်တင်ခဲ့ကြစဉ် အခြားသူများက အရှင်မင်းကြီးသည် သူ့ကိုယ်စား ပင်းဝမ်အား ဝမ်းနည်းပူဆွေးခြင်းအခမ်းအနားကို ဆက်လက်ထိန်းသိမ်းစေနိုင်ကြောင်း လျှောက်တင်ခြင်း အစရှိသော အလားတူ အကြံဉာဏ်မျိုးစုံကို တင်ပြခဲ့ကြသည်။

ယန်ကျင်းဇီ : " ... " ဧကရီတစ်ပါး မရွေးချယ်ရရေးအတွက် အကြောင်းပြချက် ရှာရတာ သူ့အတွက် ခက်ခဲခဲ့တယ်။ မင်းတို့ ဒီလိုလုပ်ဖို့ လိုလို့လား?

" သုံးနှစ်တိတိ ဘွားတော်ကြီးအတွက် ဝမ်းနည်းပူဆွေးဖို့ ကိုယ်တော် ဆုံးဖြတ်ပြီးပြီ! " ယန်ကျင်းဇီ ပြောလိုက်သည်။

ထို့နောက် ချက်ချင်းဆိုသလိုပင် ဤရက်များ၌ ညီလာခံတွင် စကားသိပ်ပြောလေ့မရှိသည့် ချူထင်းရှိူ့ကလည်း စကားထပြောခဲ့သည် : " အရှင်မင်းကြီးရဲ့ဆုံးဖြတ်ချက်ကမင်းတို့ မေးခွန်းထုတ်စရာ မဟုတ်ဘူး။ "

မကြာသေးမီက သူသည် နေ့တိုင်း စားလိုက်၊ အိပ်လိုက်၊ အရှင်မင်းကြီးနှင့်အတူတူ လေ့ကျင့်ခန်းလုပ်လိုက်ဖြင့် ဖြတ်သန်းနေခဲ့ပြီး ဘဝက အလွန်ကောင်းမွန်လွန်းနေခဲ့သည်... ချူထင်းရှိူ့သည် ဧကရီတစ်ပါး ဟူသော တစ်စုံတစ်ရာကြောင့် လုံးဝ သက်ရောက်မခံချင်ပါပေ။

အရာရှိများကို စူးစိုက်ကြည့်ရင်း သူ့မျက်နှာမှာ အမှန်တကယ် မကြည်မသာဖြစ်နေခဲ့သည်။

ဘွားတော်ကြီးနှင့်ပင်းဝမ်တို့နှစ်ဦးစလုံး ချူထင်းရှိူ့၏လက်ထဲ၌ ကျရှုံးခဲ့ရသည်။ ပြီးနောက် အရာရှိသည် ချူထင်းရှိူ့၏အကြည့်ကြောင့် အမှန်တကယ် ကြောက်ရွံ့သွားခဲ့သည်။ သို့သော် သူသည် မထိန်းနိုင်ဘဲ ချူထင်းရှိူ့က သူ၏ ပုန်ကန်မှုကို နှိမ်နင်းချေမှုန်းရာတွင် အောင်မြင်မှုကြောင့် အရှင်မင်းကြီးကို အလွန်အမင်း အထင်အမြင်သေးနေလျက်ရှိကြောင်းနှင့် အနှေးနှင့်အမြန် အရှင်မင်းကြီးက သူ့အား မနှစ်သက်တော့မည်ဖြစ်ကြောင်း အသရေဖျက်၍ လုပ်ကြံပြောဆိုတော့သည်။

အမတ်ချုပ်ကြီး ဦးဆောင်သော ညီလာခံရှိ အခြားမှူးမတ်များ ဤမြင်ကွင်းကို တွေ့သောအခါ သူတို့သည် စိုးရိမ်ပူပန်နေခဲ့ပြီး ချူထင်းရှိူ့က အချိန်ကြာကြာ ပိုင်စိုးပိုင်နင်း ပြုမူနိုင်တော့မည်မဟုတ်ဟု ပိုပိုခံစားခဲ့ကြရသည်။

သူက အရမ်းမာနကြီးနေရင် အနှေးနဲ့အမြန် အရှင်မင်းကြီးက သူ့ကို ဖယ်ရှားပစ်လိုက်လိမ့်မယ်!

ချူထင်းရှိူ့ဘက်မှ မဟုတ်သော စစ်ဘက်ဆိုင်ရာ အရာရှိများပင် ချူထင်းရှိူ့ ပြဿနာတက်တော့မည်ဟု ခံစားလိုက်ကြရသည်။ သူတို့သည် ၎င်းနှင့်ပတ်သက်၍ အနည်းငယ် အားရကျေနပ်သွားကြသည် - ချူထင်းရှိူ့ မရှိတော့သောအခါ သူတို့ အဆင့်တစ်ဆင့် ဆက်တက်နိုင်လိမ့်မည်။

မြို့တော်သို့ ရောက်လာသော အသစ်ကလေးများ ဖြစ်သည့် မြောက်ပိုင်းတပ်ဖွဲ့မှ တပ်သားများသာလျှင် ဤအရှုပ်အထွေးနှင့် အလှည့်အပြောင်းများအကြောင်း သိပ်နားမလည်ကြဘဲ အနည်းငယ် စိတ်ရှုပ်ထွေးသွားကြသည်။

တစ်ဖက်တွင်မူ သူတို့သည် မှူးမတ်များက အရှင်မင်းကြီး၏ လက်ထပ်ထိမ်းမြားမှုနှင့်ပတ်သက်၍ ဝင်ရောက်စွက်ဖက်သည်မှာ အနည်းငယ် လွန်လွန်းသည်ဟု ခံစားခဲ့ကြရပြီး တခြားတစ်ဖက်တွင်တော့ သူတို့သည် အခြားမှူးမတ်အရာရှိများနှင့် ဆန့်ကျင်နေခြင်းမှာ သူတို့၏စစ်သူကြီးအတွက် မကောင်းမွန်ဟု ခံစားကြရသည်။

သူတို့စစ်သူကြီးရဲ့ဒေါသက နည်းနည်း လွန်မနေဘူးလား?

အရမ်းပျော်နေတဲ့ တစ်ယောက်သောသူကတော့ ယန်ကျင်းဇီပါပဲ!

သူ့စစ်သူကြီးရဲ့သဝန်တိုပုံလေးက တကယ် ချစ်ဖို့ကောင်းလွန်းတယ်!

ပြီးတော့ သူ သူ့စစ်သူကြီးရဲ့အထက်စီးဆန်တာလေးကိုလည်း ကြိုက်တယ်!

အတူရှိနေသော အမျိုးသားနှစ်ဦးဟာ အနာဂတ်တွင် ပြဿနာများစွာနှင့် မလွဲမသွေ ရင်ဆိုင်ကြုံတွေ့ရမည်ဖြစ်ပြီး လူအများက သူတို့ကို ဆန့်ကျင်ကြလိမ့်မည်။ အဲ့လူတွေကို ရင်ဆိုင်ဖို့ သူ့စစ်သူကြီးလိုမျိုး ယောက်ျားတစ်ယောက် ဖြစ်မှရမယ်!

" အိုက်ချင်း မှန်တယ်။ ကိုယ်တော့်ဆုံးဖြတ်ချက်ကို မင်းတို့ မေးခွန်းထုတ်စရာ မလိုဘူး။ " ယန်ကျင်းဇီ ပြောလိုက်သည်။

မှူးမတ်များ : " ... " မေ့လိုက်တော့၊ အရှင်မင်းကြီးက ရှင်းလင်းရေးကို ဆက်လက်ဆောင်ရွက်ချင်နေလေရာ သူတို့ မတားမြစ်သင့်ပေ။

ဤအခွင့်အရေးကို ယူ၍ သူသည် ဤရက်အနည်းငယ်အတွင်း မြို့တော်အပြင်ဘက်ရှိ ရွာတစ်ရွာတွင် ရက်အနည်းငယ် နေရန် သွားရောက်မည်ဖြစ်ကြောင်း ပြောကြားခဲ့သည်။

မှူးမတ်များ အံ့အားသင့်သွားကြကာ သူတို့အားလုံးက သူ့အား ဖျောင်းဖျပြောဆိုကြတော့သည်။

ဤနှစ်များအတွင်း ချီတိုင်းပြည်တွင် ကိစ္စများစွာ ဖြစ်ပျက်လျက်ရှိသည်။ သူတို့၏မင်းကြီးများမှာ နန်းတော်ထဲတွင် နေထိုင်ကြရာ အတော်ကလေး လုံခြုံကြသော်ငြား သူတို့ မြို့တော်အပြင်ဘက် ထွက်ကြမည်ဆိုလျှင်တော့...

ပုန်ကန်မှုများကို မပြောနှင့်ဦး၊ ချူထင်းရှိူ့နှင့် သူ့မြောက်ပိုင်းတပ်ဖွဲ့က အရှင်မင်းကြီးကို ပြန်ပေးဆွဲသွားကြလျှင် သူတို့ ဘာလုပ်ရမလဲ?

အတိုချုပ်ရလျှင် မှူးမတ်များက သဘောမတူကြဘဲ အချို့က ယန်ကျင်းဇီကို ဖျောင်းဖျရန် ဒူးထောက်ခဲ့ကြသည်။

ဤအချိန်တွင် ချူထင်းရှိူ့က စကားထပ်ပြောခဲ့သည် : " အရှင်မင်းကြီးက နန်းတော်အပြင်ဘက်ကို ထွက်ချင်တယ်။ မင်းတို့ မကန့်ကွက်နိုင်ဘူး။ " သူသည် အရှင်မင်းကြီး၏အနားတွင် ရပ်တည်ရပေမည်။

ထိုမှူးမတ်များမှာ ထိတ်လန့်သွားကြသည်။ စစ်သူကြီးရှိူ့မှာ နိုင်ငံတော်ကို သစ္စာဖောက်ဖို့ အတွေးတွေ ရှိနေတာလား?

သူတို့ ဤသို့တွေးမိသောအခါ သူတို့သည် ယန်ကျင်းဇီကို မော့ကြည့်လိုက်ကြပြီး သူတို့၏အရှင်မင်းကြီးက ဒေါသထွက်ပုံ လုံးဝ မပေါ်ဘဲ ချူထင်းရှိူ့အား ပြုံးလျက် ကြည့်နေသည်ကို တွေ့လိုက်ရသည်။

သူတို့၏အရှင်မင်းကြီးတွင် တန်ပြန်ရေးအစီအမံတစ်ခုခု ရှိနေလောက်သည်။ ဤတစ်ကြိမ် နန်းတော်အပြင်သို့ထွက်မှုတွင် ချူထင်းရှိူ့က အရှင်မင်းကြီးကို မဖြေရှင်းချင်လောက်ဘဲ သူတို့၏အရှင်မင်းကြီးကသာ ချူထင်းရှိူ့ကို ကိုင်တွယ်ဖြေရှင်းချင်နေ‌ခြင်း ဖြစ်နိုင်လောက်သည်။

မှူးမတ်များ တိတ်ဆိတ်သွားကြသည်။

တော်ဝင်ညီလာခံသည် အဆုံး၌ ပြီးဆုံးသွားသောအခါ ချူထင်းရှိူ့သည် ယန်ကျင်းဇီနှင့်အတူ ထွက်သွားတော့မည်ဖြစ်သော်လည်း တော်ဝင်ညီလာခံမပြီးမီ စစ်မက်ရေးရာ အကြံပေးအရာရှိလီသည် သူ့အား အကြိမ်များစွာ လှမ်းလှမ်းကြည့်နေခဲ့ပြီး ပြောစရာ တစ်စုံတစ်ခု ရှိနေပုံပေါ်သဖြင့် သူ ကျန်နေခဲ့လိုက်သည်။

" စစ်သူကြီး! " ယခုအချိန်၌ စစ်မက်ရေးရာ အကြံပေးအရာရှိလီသည် ရာထူးတိုးပြီးပြီဖြစ်ကာ ဖြစ်ထွန်းကြီးပွားလွန်းသဖြင့် သူသည် တော်ဝင်ညီလာခံများကိုပင် တက်ရောက်နေနိုင်ပြီဖြစ်သည်။ ယခု သူ ချူထင်းရှိူ့၏အနားသို့ ရောက်လာသောအခါ သူက ပြောသည် : " စစ်သူကြီး ကျွန်တော့်မှာ စစ်သူကြီးကို ပြောစရာရှိတယ်။ "

" မင်း ဘာပြောမလို့လဲ? " ချူထင်းရှိူ့ မေးလိုက်သည်။

" မင်းမှုထမ်းစာမေးပွဲတွေက ရောက်လာတဲ့ ပညာတော်သင်အမတ်တွေက ကျွန်တော်တို့ကို လာပြီး အထင်အမြင်သေးတယ်။ စစ်သူကြီး အနာဂတ်မှာ ဂရုစိုက်သင့်တယ်။ သူတို့ကို ‌မကျေမနပ် မဖြစ်စေတာ ပိုကောင်းတယ်။ " စစ်မက်ရေးရာ အကြံပေးအရာရှိလီက ဆိုသည်။

အရှင်မင်းကြီးသည် ဧကရီတစ်ပါးကို မရွေးချယ်ချင်ဘဲ အပျော်အတွက် နန်းတော်အပြင်ဘက်သို့ ထွက်ချင်လေရာ အရှင်မင်းကြီးအား ကိုယ်တိုင်ပြောခိုင်းလိုက်သင့်ပြီး ထိုအခါ စစ်သူကြီးက အရှင်မင်းကြီးအတွက်နှင့် ထိုအရပ်ဘက်အရာရှိများကို ဆန့်ကျင်စရာမလိုတော့ချေ။

ချူထင်းရှိူ့သည် လီအကြံပေးက သူ့ကောင်းကျိုးအတွက် ပြောနေမှန်းသိသော်ငြား သူက ပြုံးကာ ပြောသည် : " ငါ သူတို့ကို မကြောက်ဘူး။ " သူသည် ယခုအချိန်၌ ကြောက်ရွံ့မှုကင်းမဲ့သော အခြေအနေ ဖြစ်သည်။

စစ်မက်ရေးရာ အကြံပေးအရာရှိလီသည် ၎င်းနှင့်ပတ်သက်၍ စဉ်းစားကြည့်လိုက်ပြီး သူ့စစ်သူကြီးသည် အမှန်တကယ်ပင် ထိုသူများအား ကြောက်နေစရာမလိုဟု ခံစားမိလိုက်သည်။ ဆက်လက်ဖျောင်းဖျမည့်အစား သူ ဆက်ပြော၏ : " စကားမစပ် စစ်သူကြီး နောက်ထပ်ကိစ္စတစ်ခု ရှိသေးတယ်... မမလေးက သူ(မ)ရဲ့အမှားကို သိသွားပါပြီ။ "

ယခင်က ချူထင်းရှိူ့သည် ချူထင်းလန်အား တံခါးပိတ်ထားလိုက်ပြီးနောက် သူသည် အကြံပေးလီအား သူ(မ)ကို စကားပြောစေခဲ့သည်။

စစ်မက်ရေးရာ အကြံပေးအရာရှိလီသည် အရမ်းစကားပြောကောင်းသဖြင့် ချူထင်းရှိူ့သည် အကြံပေးလီသာ ပင်းဝမ်က လူကောင်း မဟုတ်ကြောင်း သူ့ညီမ သိရှိ‌သွားအောင် ပြောဆိုနိုင်လိမ့်မည်ဟု ယုံကြည်ခဲ့၏။

ကံမကောင်းစွာဖြင့် သူ့ညီမက အလွန်ခေါင်းမာပြီး နားမထောင်ခဲ့ပေ။ စစချင်း ထိုရက်များ၌ ပြင်းထန်သော အငြင်းပွားမှုများ ဖြစ်ပွားခဲ့ပြီး အကြံပေးလီအား စိုးရိမ်ပူပန်စေခဲ့သည်။ အခု သူ(မ)က သူ(မ) မှားမှန်း သိသွားပြီလား?

" မမလေးက စစ်သူကြီးကို တွေ့ပြီး သူ(မ)အမှားကို ဝန်ခံချင်တယ်လို့ ပြောတယ်။ " စစ်မက်ရေးရာ အကြံပေးအရာရှိလီက ပြောသည်။

သူ ပထမဆုံး ချူထင်းလန်ကို သွားတွေ့တုန်းက ချူထင်းလန် ပြောတဲ့ သစ္စာဖောက်ကိစ္စတွေအကုန်လုံးကြောင့် သူ ထိတ်လန့်ခဲ့ရတယ်!

သစ္စာရှိပြီး မျိုးချစ်စိတ်ရှိသော စစ်သူကြီးတွင် ထိုသို့သော ညီမတစ်ယောက် ရှိမှန်း သူ မယုံကြည်နိုင်‌ခဲ့ပေ။

သတင်းကောင်းမှာ သူ၏ အကျိုးသင့်အကြောင်းသင့် ဆက်တိုက်ပြောဆိုမှုပြီးနောက် မိန်းမပျိုက‌ ယခု စိတ်တည်ငြိမ်သွားပြီဖြစ်သည်။

" နောက်မှ ငါ သူ(မ)ကို သွားတွေ့လိုက်မယ်။ " ချူထင်းရှိူ့ ပြောလိုက်သည်။

ဤသည်မှာ အကြံပေးအရာရှိလီ ပြောစရာရှိသည်များ အလုံးစုံဖြစ်ပြီး ပြောပြီးနောက် သူက ထွက်သွားခဲ့သည်။ ထို့နောက်မှသာလျှင် ချူထင်းရှိူ့သည် ယန်ကျင်းဇီအား သွားရှာသည်။

ချူထင်းရှိူ့ ရောက်လာသည်ကို ယန်ကျင်းဇီ တွေ့သောအခါ သူက ပြုံးလျက် ပြောသည် : " ထင်းရှိူ့၊ မင်း ဒီနေ့ ကောင်းကောင်းလုပ်ခဲ့တယ်။ "

ချူထင်းရှိူ့သည် ရာထူးမြင့်သော အထက်တန်းလွှာတစ်ဦး ဖြစ်ပြီး စစ်တပ်အာဏာ ရှိသည်။ အဲ့ဒါကြောင့် အခြားသူတွေကို အလေးအနက် မထားတဲ့ ဒီလိုသဘောထားမျိုး သူ့မှာ ရှိသင့်တယ်!

ထိုသို့ဆိုလျှင် အနာဂတ်၌ ဘယ်သူမှ သူ့ကို မကောင်းပြောရဲတော့မည်မဟုတ်ချေ။