အပိုင်း ၁၄၂

Chapter 142

( ကြင်နာတတ်သော မစ္စစု)

ဝေ့ရွှယ်သည် စုမုန့်ကိုကြည့်ကာ စိတ်တည်ငြိမ်စေရန် ငြိမ်သက်စွာ အသက်ဝဝ တစ်ချက်ရှုသွင်းလိုက်သည်။ 

“ စုမုန့်၊ ဒီနေ့ ဒီမှာ ငါ့သူငယ်ချင်းတွေ အများကြီးလာကြတယ်...နင်နဲ့ အတူတူ ဓာတ်ပုံရိုက်ကြမယ်ဆို ဘယ်လိုလဲ...ဒီလို အတူတူဆုံဖို့ဆိုတာ ခဲယဉ်းတယ်မလား..ပြီးတော့ သူတို့က နင့်ဆီက အကြံဉာဏ်တောင်းချင်တယ်လို့ ငါ့ကို ပြောနေကြတယ်...နင်က မိသားစုနောက်ခံလည်းမရှိ၊ပညာ အရည်အချင်းလည်း မရှိဘဲ ငါ့အစ်ကိုကို ဘယ်လိုလက်ထပ်ခဲ့တာလဲဆိုတာ မေးချင်နေကြ‌တာ"

 “တချို့ကိစ္စတွေကို ငါသိပေမယ့် နင်သိသလောက်တော့ ငါမသိဘူးလေ...ပြီးတော့ နင်က ကာယကံရှင်မလား.. စုမုန့် ဘယ်လိုထင်လဲ…စိတ်မဆိုးဘူးမလား...ကျေးဇူးပြုပြီး ငါ့ကိုလည်း အထင်မလွဲပါနဲ့နော်...နင့်မှာ မိသားစု နောက်ခံလည်း မရှိ၊ပညာအရည်အချင်းကလည်း နိမ့်ပါးလို့ နင့်ကို ရှုတ်ချလိုစိတ် ငါ့မှာ မရှိပါဘူး...နင် ငါ့အပေါ် အမြင်မစောင်းဘူးမလား?"

စုမုန့်က ခေါင်းညိတ်သည်။  

“ရပါတယ် ငါ စိတ်မဆိုးပါဘူး...ဒါက ဘာခက်လို့လဲ...အသေးအဖွဲလေးပါ...တစ်ခါတလေ ကံကြမ္မာက အရမ်းထူးဆန်းတယ်...ကိုယ် ကြိုက်တဲ့သူကို ရဖို့ ဘယ်လောက်ပဲ ကြိုးစားကြိုးစား သူ့ကို မရနိုင်ဘူး...ဟင်းဟင်း…အမှန်တော့၊ သူတို့ဆီကနေလည်း သင်ချင်သေး‌တယ်... ဝေ့ထင် ငါ့ကို စိတ်မဝင်စားအောင် ဘယ်လိုလုပ်ရမလဲဆိုတာကိုပေါ့"

ဝေ့ရွှယ် : “…”

သူမကို ရည်ရွယ်ချက်ရှိရှိ ဒေါသထွက်အောင်လုပ်ဖို့ ကြိုးစားနေသလား...

ဝေ့ရွှယ် အသက်ပြင်းပြင်းရှူပြီး သူမ စိတ်ထဲမှာနှစ်သိမ့်လိုက်သည်။

'ရပါတယ်၊ စုမုန့်က စကားအဖြစ်ပဲပြောနေတာ...ဝေ့ထင်ကသာ သူမကို သိပ်ချစ်ရင် သူမနဲ့ ကွာရှင်းချင်စိတ်ရှိမှာ မဟုတ်ဘူး...အခု ဝေ့ထင်ကမှ သူမကိုစိတ်မဝင်စားတာ'

ထိုအခါ သူမစိတ်ထဲ ကြည်လင်သွားရ၏။သူမသည် ရှောင်ရှောင်ကို မျှော်ကြည့်ကာ နှုတ်ဆက်ပြီး သူမအနားသို့ လာရန် အရိပ်အခြည်ပြလိုက်သည်။ သို့သော်လည်း ရှောင်ရှောင် သည် လည်ဆွဲကိုသာ အာရုံရောက်နေ၏။သူမ လည်ဆွဲကို သေတ္တာထဲက ထုတ်ပြီး လက်ထဲမှာ ဂရုတစိုက်ကိုင်ကြည့်နေတော့သည်။ပြီးလျှင်၊ သူမ ရင်ဘတ်ရှေ့တွင် ထားကာ ဖုန်းမျက်နှာပြင်ကို မှန်အဖြစ် သုံး၍ ထပ်ခါတလဲလဲ ကြည့်နေလျက်ရှိသည်။

ရှောင်ရှောင်က မကြည့်သဖြင့် ဝေ့ရွှယ် ဖုန်းကိုထုတ်ပြီး ရှောင်ရှောင် ဆီမက်ဆေ့ချ်ပို့ဖို့ကလွဲပြီး ရွေးချယ်စရာမရှိတော့။ မကြာမီ ရှောင်ရှောင်သည် မက်ဆေ့ခ်ျကိုဖတ်ပြီးနောက် မော့ကြည့်လိုက်ကာ၊ ဘာလဲဆိုသည့်သဘောနှင့်မေးဆတ်ပြသော်လည်း၊ယခုထိ ခုံပေါ်ကမထလာသေး။ 

ဝေ့ရွှယ် စိတ်တိုလာကာ သူမကို ဆူပူဟန်ပြသည့် နှုတ်ဟန်လုပ်၍ လက်ယပ်ခေါ်ပြန်သည်။ထိုမှသာ ရှောင်ရှောင် မတ်တပ်ရပ်ပြီး သူမထံ လျှောက်လာလိုက်သည်။သူမ ငတုံးမ ရှောင်ရှောင်ကို မျက်စောင်းတစ်ချက်ထိုးပစ်လိုက်သည်။ထို့နောက် သူမ တစ်ဖက်သို့လှည့်ကာ အခြားသူများကို ခေါ်လိုက်သည်။

မျက်နှာချင်းဆိုင် စားပွဲမှာ ထိုင်နေသည့် မိန်းကလေး သုံးယောက်က ရှောင်ရှောင်ထက် ပိုစမတ်ကျသည်။ ဝေ့ရွှယ် က လက်ဝှေ့ယမ်းပြသောအခါတွင်၊အဓိပ္ပါယ်ကို ချက်ချင်းနားလည်ပြီး သုံးယောက်သား သူမတို့စားပွဲဆီသို့ လျှောက်လာကြလေ၏။ 

 ကောင်မလေးသုံးယောက်ရောက်လာပြီးနောက် ဝေ့ရွှယ်က

 “နင်တို့ ဒီက အစ်မ စုမုန့်ကို မလေးစားဘူးလား...ငါတို့ အတူတူ ဓာတ်ပုံရိုက်ကြရအောင်လေ...ဓာတ်ပုံရိုက်ပြီးရင် နင်တို့ စုမုန့်ကို မေးချင်တာမှန်သမျှ မေးလို့ရတယ်...စုမုန့်က အရမ်းတော်တဲ့လူပါ"

 "ဟုတ်တယ်...မစ္စစုက ချစ်စရာကောင်းပြီး လှလည်းလှတယ်"

 “မစ္စစုအကြောင်းတွေ ငါ အများကြီးကြားဖူးတယ် ..နင်က ဒီလောက်ကြီးကျယ်တဲ့ ဖုန်းရွှေပညာရှင်ကြီး ဖြစ်လိမ့်မယ်လို့ မမျှော်လင့်ထားဘူး...  စာအုပ်တစ်အုပ်ကို အဖုံးကိုကြည့်ပြီး အကဲဖြတ်လို့မရဘူးဆိုတာ သိပ်မှန်တာပဲ"

 “ဒီလိုပြောရတာ မရိုးမသားမှန်းသိပေမယ့် မစ္စစု က သဘောထားမသေးသိမ်ဘူးဆိုတော့ ငါ မေးခွန်းလေးတွေ မေးချင်သေးတယ်…မစ္စတာဝေ့က နင်နဲ့ ပတ်သက်ပြီး ဘာကို သဘောကျတာလဲ...နင့်မှာ မိသားစုနောက်ခံလည်း မရှိဘဲနဲ့ သူက နင့်ကို ဘယ်လို သတိထားမိလာတာလဲ...ပြီးတော့ နင်တို့နှစ်ယောက်က ကျင်လည်နေတဲ့အသိုင်းအဝိုင်းချင်းကလည်း ကွာခြားတယ်လေ…  တောင်းပန်ပါတယ် မစ္စစု...ရိုင်းပျတာမဟုတ်ပါဘူး...  မစ္စတာဝေ့က အရမ်းတော်တယ်..သူ့ကို သဘောကျတဲ့သူတွေ အများကြီးရှိတယ်...မိန်းကလေးတိုင်းက သူ့ကို လက်ထပ်ချင်ကြတာ...နင်က သူ့ကို ကွာရှင်းတော့မှာမို့လို့ သူက တခြားမိန်းမနဲ့ လက်ထပ်သွားရင်လည်း နင့်အတွက် ကိစ္စမရှိဘူးမလား"

 ကောင်မလေးတွေက ဝေ့ရွှယ် စကားကိုကြားသည်နှင့်၊ စုမုန့်အား ချက်ချင်းဝိုင်းပြီး မရပ်မနားပြောလာကြသည်။ဘယ်လိုရည်ရွယ်ချက်နှင့် ပြောမှန်း စုမုန့် မသိသော်လည်း မိန်းကလေးများထဲမှ တစ်ဦးက ထူးထူးဆန်းဆန်း စကားတစ်မျိုးပြောခဲ့သည်။အပေါ်ယံမှ သူမကို ချီးကျူးနေပုံရသော်လည်း၊ တစ်ကယ်တမ်းတော့ သူမတို့အကြောင်းကိုအစ်အောက်မေးနေခြင်းသာ။  အထူးသဖြင့် ဆံပင်ရွှေရောင်နှင့်မိန်းကလေးက ဝေ့ထင် ကို လက်ထပ်ချင်သည်ဟုပင် ပြောခဲ့သည်။

ဝေ့ထင်နှင့် မကွာရှင်းရသေးသည့် သူမအား သက်သက် စော်ကားနေခြင်းဟုသာ မြင်မိ၏။သူမကို လာထိပါးသူများကို သူမကလည်း ယဉ်ကျေးနေဖို့ မလိုအပ်ပေ။သူမ မျက်နှာထားကိုမပြောင်းဘဲ၊ မည်သို့ပြင်ဆင်ရမည်ကိုသာ တွေးနေမိသည်။

တစ်ချိန်တည်းမှာပင်၊ ဤမိန်းကလေးသုံးယောက်သည် ဝေ့ရွှယ်၏အသုံးချခြင်း ခံရကြောင်းကိုလည်း သူမ သိသည်။ သဘောကောင်း၊ကြင်နာပြီး နှစ်လိုဖွယ်ကောင်းသော ပုံရိပ်ကို ထိန်းသိမ်းဖို့အတွက် ဝေ့ရွှယ်က၊ သူမကိုယ်တိုင် မလုပ်ချင်သည့်လုပ်ရပ်တို့အား၊ဤမိန်းကလေးတွေကို လုပ်ခိုင်းခြင်းသာ။

သူတို့အားလုံးသည် ဝေ့ထင်ကို ချစ်နေကြသူများဖြစ်သည်။ ဝေ့ရွှယ် သည်  ဒေါသဖြေဖျောက်ရန် ဤမိန်းကလေးများအား ဝေ့ထင်နှင့်မြှား၍  အသုံးချခဲ့ခြင်းဖြစ်သည်။သို့သော် ဤမိန်းကလေးများမသိသောအရာမှာ ဝေ့မိသားစုထဲသို့ သူမတို့ ဝင်ဆံ့ဖို့ကြိုးစားရာတွင် ဝေ့ရွှယ်ကသာ အကြီးမားဆုံးအတားအဆီးဆိုတာကိုပင်။

ဝေ့မိသားစု၏ ဒုတိယသခင်မလေး ဝေ့ရွှယ်သည် ဝေ့ထင်ကို အစွဲအလမ်းဆုံးသူဖြစ်သည်။ မိန်းကလေးတစ်ယောက်ကသာ ဝေ့ထင်ကိုလက်ထပ်လျှင် ဝေ့ရွှယ်တစ်ယောက် ထိုမိန်းကလေးအား ရေကုန်ရေခန်း လိုက်ဒုက္ခပေးမည်မှာ မြေကြီးလက်ခတ်မလွဲပါပင်။

(ငါ့ကို ပိုက်ဆံပေးပါ)

 "ကျေးဇူးတင်ပါတယ်...တစ်ကယ်တော့ ငါက သိပ်လည်းမလှပါဘူး... ဖုန်းရွှေအကြောင်းကို ကောင်းကောင်းသိတာအပြင် ဝေ့ထင်ကိုလိုက်ဖို့ နည်းလမ်းကိုလည်း သိထားတယ်...ဘာပဲဖြစ်ဖြစ် ငါတို့က လင်မယား ဖြစ်နေတာ ကြာပြီပဲ...  ဝေ့ထင်ကို တခြားသူတွေထက် ပိုသိတယ်”  

စုမုန့်က 'တစ်ခြားသူ' ဆိုသည့်စကားကို ပြောရာတွင် ဝေ့ရွှယ်အား တမင်တကာ ကြည့်နေသည်။

 “ဒါပေမယ့် ဒါက အချိန်အတော်ကြာ သူ့ကိုလေ့လာပြီးမှ ငါလည်းကောက်ချက်ချထားတာပါ...တစ်ကယ်အစစ်ဖြစ်ကြောင်း လုံးဝအာမခံပါတယ်... လူတိုင်းက ဝေ့ထင် အကြောင်းကို အရမ်းသိချင်ကြတာလေ…ဒါကြောင့် နင်တို့လည်း ငါ့ဆီက သတင်းတွေကို ပြန်ဝယ်မယ်ဆိုရင် ဘယ်လိုလဲ...နင်တို့ အိမ်အခြေအနေနဲ့ဆိုရင် ဒီငွေပမာဏလေးကို သိပ်ဂရုစိုက်စရာမလိုဘူးမဟုတ်လား"

 ဆံပင်ရွှေရောင်နှင့် မိန်းကလေးက စုမုန့်စကားကိုကြားလျင် ဝေ့ရွှယ်ကို ချက်ချင်းကြည့်ကာ မေးခွန်းထုတ်လိုက်သည်။ ဒါက သူတို့ သဘောတူထားတဲ့ဟာနဲ့ဘာလို့ မတူတာလဲ..အခု စုမုန့်က သူမတို့ကို ပိုက်ဆံလာတောင်းနေပါလား... 

ဝေ့ရွှယ် အနည်းငယ်ရှက်သွားသည်။  သူမသည် စုမုန့် နှင့် ကောင်းမွန်သော ဆက်ဆံရေးရှိကြောင်းနှင့်၊စုမုန့်က သေ‌ချာပေါက် ပြောပြလိမ့်မည်ဟု ထိုမိန်းကလေးများအား ကတိပေးထားခဲ့သည်။သို့သော် သူမသည် ဤမျှအထိ ငွေမက်လိမ့်မည်ဟု သူမ မမျှော်လင့်ထားပေ။သူမ ဘက်ကတစ်ချက်ကလေး အားစိုက်ထုတ်ရတာနဲ့ သူများကို ငွေလာတောင်းနေပါရောလား...စုမုန့် လုပ်ရပ်က သူမကို အနည်းငယ် ရှက်သွားစေသည်။

စုမုန့် ဘယ်လောက်တောင်းမည်ဆိုသည်ကို သူမ မသိပေ။အရင်က ဖုကျဲ၏ကလပ်မှာ စုမုန့် အဆမတန်ဈေးတောင်းနေသည်ကို သူမမြင်ဖူးသည်။အချိန်အတော်ကြာပြီးနောက်၊ သူမ ပို၍ လောဘကြီးလာလိမ့်မည်ထင်သည်။ထို့ကြာင့် သူမက စုမုန့်ကို ပြောလိုက်သည်။

 “စုမုန့် နင်က ပိုက်ဆံလိုချင်လို့လား... ဘယ်လောက်လိုချင်တာလဲ.…  ပိုက်ဆံမတောင်းဘဲ ငါ့မျက်နှာကို ထောက်ပေးလို့မရဘူးလား...အချင်းချင်း ငွေစကားပြောတာ ဘယ်ကောင်းမလဲ"

သူမက စုမုန့်ကို ဆွဲဆောင်ရန် ကြိုးစားခဲ့သည်။သို့သော် စုမုန့်က မျက်ခုံးပင့်လိုက်ပြီး ခပ်တည်တည်ပင်။

 "နင့်မျက်နှာကိုထောက်ပြီး ပိုက်ဆံမယူရဘူး ဟုတ်လား"

ဝေ့ရွှယ်သည် စိတ်ပြန်ပြောင်းသွားနိုင်သည်ဟု တွေးကာ စုမုန့်ကို မျှော်တလင့်လင့်နှင့် ကြည့်မိသည်။သို့သော် စုမုန့် ၏နောက်ထပ်စကားက သူမအား ကိုယ့်နဖူးကိုယ် ပြန်ရိုက်ချင်စိတ်ပေါက်သွားစေသည်။ 

 "သူတို့ဆီက ငါ ပိုက်ဆံမယူသင့်ဘူးထင်ရင် နင်က ပေးလိုက်ပါလား ..နင် ပေးလေ ... ဘာပဲဖြစ်ဖြစ် နင်နဲ့ငါက ပြောနေရမယ့်သူလည်း မဟုတ်ဘူး...ငါက ဆင်းရဲတဲ့သူပါ…ဒါကြောင့် ငါ့ကို ကူညီတယ်လို့ သဘောထားလိုက်ပါ"

စုမုန့်က တခြားတစ်ယောက်အတွက် သူမအား ပိုက်ဆံပေးခိုင်း‌လာသောအခါ  ဝေ့ရွှယ် ထိုအကြောင်းကို ဆက်မပြောဘဲ ချက်ချင်းပဲ ရပ်လိုက်၏။

ဟာသပဲ!  သူမက ချမ်းသာပေမယ့် သူမပိုက်ဆံကိုတော့ အထိမခံနိုင်...သူမ ဘာကြောင့် သူများကို ကူညီရမှာလဲ… ဒါ့အပြင် စုမုန့် ဒုက္ခရောက်နေတာကို မြင်ချင်တာလေ...ဘာလို့ သူမကို ကူညီရမှာလဲ...

ဝေ့ရွှယ် : "ဒါဆို နင်က ဘယ်လောက်ယူချင်တာလဲ...သူတို့မှာ မေးစရာကလည်း အရေးတကြီး မရှိဘူးလေ..၊ ဒါကြောင့် နင် ကြည့်ကျက်ပြီး သူတို့ဆီက ယူလိုက်ပေါ့"

စုမုန့်က လက်ညိုး တစ်ချောင်းထောင်ပြသဖြင့် ဝေ့ရွှယ်နှင့် မိန်းကလေးတွေက သက်ပြင်းကိုယ်စီချလိုက်သည်။

ဝေ့ရွှယ်က စုမုန့်ကို "ယွမ် 1000 ပဲလား"

စုမုန့် ခေါင်းယမ်းလိုက်သည်။  “လူတစ်ယောက်ကို ယွမ် 10000ပါ...ဒါဆို ငါက ဝေ့ထင် ရဲ့ ကိုယ်ရေးကိုယ်တာကိစ္စတွေကို ပြောပြမယ်...နင်တို့အားလုံးဟာ အရမ်းချမ်းသာတယ်၊ အရမ်းလှတယ်…ချမ်းသာတဲ့မိသားစုက မိန်းမပျိုလေးတွေအနေနဲ့ ဒီပိုက်ဆံလေးကို အိမ်ကနေ ယူသုံးဖို့ဆိုတာလွယ်တယ် မဟုတ်လား…ဟုတ်ပါတယ်၊ ယွမ် 10,000 က နင်တို့အတွက် အများကြီး ဆိုရင်တော့ ငါကလည်း ပြောပြဖို့ မဖြစ်နိုင်ပါဘူး…သဘောတူညီချက် ဆိုတာ အပြန်အလှန်သဘောတူတာကိုပြောတာ...ကဲ နင်တို့တွေ နားမထောင်ချင်ရင်လည်း စကားဆက်ပြောကြလေ...ငါ သွားတော့မယ်" 

စုမုန့် မတ်တပ်ရပ်ပြီး ထွက်သွားဟန်ပြင်လိုက်သည်။ထိုအခါ ရွှေရောင်လှိုင်းတွန့်ဆံပင်ရှည်နှင့် ဦးဆောင်လာသူ မိန်းကလေးက သူမကို အမြန်အော်ပြီးပြောသည်။

 “10000 ပဲပေါ့...အဲ့ဒါက ငါ့အိတ်ထဲက ပိုက်ဆံတစ်ဝက်ပဲရှိတယ်...နင်ပြောတဲ့ သတင်း အချက်အလက်တွေက အသုံးဝင်တယ်ဆိုရင်တော့ တန်ပါတယ်”  

စုမုန့်၏ နည်းလမ်းအတိုင်းလိုက်လုပ်ပြီး ဝေ့မိသားစုထဲကိုသာ ဝင်နိုင်မည်ဆိုလျှင် ဤမျှငွေအနည်းငယ်အတွက် စိတ်ပူနေစရာ မလို။တစ်ချိန်ချိန်တွင် သူမသည် ငွေသန်းပေါင်းများစွာသော စိတ်ထင်သလိုသုံးနိုင်သော ဝေ့ရွှယ်လို ဖြစ်လာနိုင်သည်။သို့သော်လည်း၊ သိပ်ပြီး စိတ်မချရမှန်း  သူမသိသည့်အတွက်

 "နင် ငါတို့ကို လှည့်စားရင် ပိုက်ဆံကို ငါတို့ဆီ ပြန်ပေးရမှာပဲ"

 တစ်ကယ်တော့ စုမုန့်ကို လျော်ကြေးနှစ်ဆပေးဖို့ သူမ တောင်းဆိုချင်သော်လည်း၊ တခြားလူတွေက သူမတို့သည် စုမုန့်ဆီမှ နေ၍ ငွေအချောင်နှိုက်နေသည်ဟု ထင်မှာစိုးသည်။ သူမတို့မိသားစုကလည်း ချမ်းသာ၍ ယွမ် 10,000 နှင့် ငွေစကားကြေးစကား ပြောရမည်ဆိုလျှင် ရှက်စရာကောင်းလှ၏။

 “ကောင်းပြီ”

စုမုန့်က ပြုံးပြီး ပြန်ဖြေသည်။ တစ်ချိန်တည်းမှာပင် သူမ ဖုန်းကို ထုတ်လိုက်သည်။ကလပ်မှာလိုပဲ၊ သူတို့ကို မသင်ပေးခင်မှာ ငွေချေခိုင်းရပေမည်။ သူမ ဤကိစ္စကို လိမ်ညာပြောခဲ့တာမဟုတ်ပေ။သူမသည် ယခုဘဝတွင် ဝေ့ထင် နှင့် အဆက်အသွယ် သိပ်မရှိသော်လည်း ယခင်ဘဝ၌ အဆက်အသွယ်များစွာရှိခဲ့သည်။ နောက်ဆုံး သူမတို့နှစ်ယောက် အတူတူ ကလေးတစ်ယောက်ပင် မွေးခဲ့သေး၏။

 ငွေလက်ခံရရှိပြီးနောက် စုမုန့်သည် ဝေ့ထင်၏ အကြောင်းကို ယခင်ဘဝနှင့် ဤဘဝမှာရော သိသလောက် အကျဉ်းချုပ်ပြောပြခဲ့သည်။ နားထောင်နေသော မိန်းကလေးများသာမက ဝေ့ရွှယ်ပင် အလေးအနက်ထား နားထောင်နေလျက်ရှိသည်။  သို့သော်လည်း ဝေ့ရွှယ်က ပိုက်ဆံမပေးပေ။စုမုန့်ကလည်း သူမကို လှမ်းကြည့်ပြီး နားမထောင်ဖို့ မပြောလိုက်ပေ။ဤမိန်းကလေးများအားလုံးက အကျင့်ပျက်နေသူများပင်။သူတစ်ပါး၏ ခင်ပွန်းကို ပစ်မှတ်ထားပြီး သူမတို့ လင်မယားနှစ်ယောက် ရန်ဖြစ်မည့်နေ့ကို စောင့်နေကြသူများသာ။

xxxxxx