အပိုင်း ၁၄၃

Chapter 143

(လူတစ်ယောက်နဲ့ ဖက်နေတယ်.. )

စုမုန့် ပြောပြီးသွားသည့်အခါ ကောင်မလေးတွေအားလုံး ကျေနပ်သွားသည်။ သို့သော်လည်း၊ဝေ့ရွှယ်  မျက်နှာကတော့ သိပ်မကောင်းချေ။  စုမုန့် ပြောသမျှကို သူမ အားလုံးနီးပါးသိသည်။ယခုဆို ကောင်မလေးတွေကပါ ဝေ့ထင် အကြောင်းကို နားလည်သွားကြပြီဖြစ်သည်။သူမ မပျော်သော်လည်း အပြင်ပန်း၌ ချိုမြိန်သော အပြုံးတစ်ခု ဟန်လုပ်ထားလိုက်သည်။

 "မေးပြီးပြီဆိုတော့ အတူတူ ဓာတ်ပုံရိုက်ရင် ဘယ်လိုလဲ..." ဝေ့ရွှယ်က အကြံပေးသည်။ "ဒါပေမယ့် ဘယ်သူက ခလုတ်နှိပ်မှာလဲ"

 သူမ ဘေးပတ်ပတ်လည်ကို လှမ်းကြည့်ကာ နောက်ဆုံးတွင် ရှောင်ရှောင် ကို စိုက်ကြည့်လိုက်သည်။ထို့နောက် သူမက ရှောင်ရှောင်ကိုဆွဲခေါ်လာပြီး 

"ကဲ နင်က ဓာတ်ပုံရိုက်ဖို့ ကူညီပေး"

ရှောင်ရှောင်သည် လူတိုင်းနှင့်အတူတွဲ၍ ဓာတ်ပုံရိုက်ချင်သောကြောင့် ငြင်းဆန်ချင်စိတ်ဖြစ်မိသည်။သို့သော် ဝေ့ရွှယ်သည် သူမကို အားလူံနှင့် ဓာတ်ပုံအတူရိုက်ခွင့်မပြုရန် စိတ်ပိုင်းဖြတ်ထားပုံရသည်။ ထို့အပြင်၊ဝေ့ရွှယ်သည် သူမအား လည်ဆွဲပေးခဲ့သူပင်။ ထိုကဲ့သို့ တန်ဖိုးကြီးသော လက်ဆောင်ကို ရရှိပြီးနောက်၊ ယခုလို ကိစ္စအသေးအမွှားကြောင့် ဝေ့ရွှယ် အား ငြင်းဆန်ရန်မဖြစ်နိုင်၍ သူမလည်း တုံ့ဆိုင်းစွာ သဘောတူခဲ့ရသည်။

 "နင့်မှာ ကင်မရာရှိလား...ဒါမှမဟုတ် နင့်ဖုန်းကို ပေးလေ" 

ရှောင်ရှောင်က ဝေ့ရွှယ်ကို ပြောလိုက်သည်။သို့သော် ဝေ့ရွှယ်က ခေါင်းယမ်းကာ ငြင်းဆိုသည်။ 

 “ငါတို့က ဓာတ်ပုံနှစ်ပုံပဲ ရိုက်မှာ...ကင်မရာရှာရတာကလည်း မလွယ်နေဘူး...ငါ့ဖုန်းကလည်း ဘက်ထရီကုန်နေတယ်...နင့်ဖုန်းကို ခဏ သုံးမယ်လေ"

ရှောင်ရှောင် အနည်းငယ် စိတ်ရှုပ်သွားပုံရသည်။ထိုအခါ ဝေ့ရွှယ်က သူမကို ခပ်စူးစူးတစ်ချက်ကြည့်ကာ 

"ဘာဖြစ်နေတာလဲ...ဒေါ်လာတစ်သိန်းတန်တဲ့ လည်ဆွဲကို နင့်ကို ပေးထားတာနော်...နင်က  ငါတို့အတွက် ဓာတ်ပုံနည်းနည်းလေးတောင် ရိုက်မပေးချင်ဘူးလား"

"ရပါတယ် ...ငါ ရိုက်ပေးပါ့မယ်..."

ရှောင်ရှောင် သည် ဝေ့ရွှယ်၏ ယခုလိုမျက်နှာထားမျိုးကို တစ်ခါမျှမတွေ့ဖူးပေ။သူမ ထိတ်လန့်သွားပြီး ကမန်းကတန်း ခေါင်းညိတ်လိုက်သည်။

အားလုံး အတူထိုင်လိုက်ကြသည်။အစက ဝေ့ရွှယ်နှင့် စုမုန့်တို့ကို ဓာတ်ပုံရိုက်ရန် စပြီးဖိတ်ခေါ်သည့် အခြားမိန်းကလေးအချို့လည်း ပါသေးသည်။သို့သော် ဓါတ်ပုံရိုက်ချိန်တန်သောအခါ၊ ဝေ့ရွှယ်သည် စုမုန့် နှင့် ဓာတ်ပုံမရိုက်ချင်သလို လုပ်နေသောကြောင့်၊လူတိုင်းကလည်း စိတ်မပါလက်မပါပင် ဓာတ်ပုံရိုက်ကြရ၏။

ရှောင်ရှောင် ဓါတ်ပုံတွေရိုက်ပြီးသည့်အခါ ဝေ့ရွှယ်က ကြည့်ချင်ကြောင်းပြောပြီး ဖုန်းကို အကြမ်းပတမ်း ဆွဲယူသွား၏။ဝေ့ရွှယ်၏ လုပ်ရပ်သည် နည်းနည်းကြမ်းတမ်းသွား၏။ရှောင်ရှောင့်ခမျာ ဖုန်းကို ကိုင်ထားချိန်ပင်မရလိုက်။သူမ ဝေ့ရွှယ်ကို ထိတ်လန့်တကြား လှည့်ကြည့်ကာ ပြန်လုယူချင်စိတ် ဖြစ်မိသည်။သို့သော် သူမ ပြန်လုယူတော့မည့်အချိန်မှာပဲ တခြားမိန်းကလေးတွေက ချက်ချင်းထလာပြီး သူမအား ဝိုင်းရံလိုက်သည်။ထို့နောက် သူမ ဝေ့ရွှယ် အနားသို့ မသွားနိုင်အောင်ပင်၊စကားတွေ ဆက်တိုက်လာပြောကြလေ၏။

"အမ်၊ ရှောင်ရွှယ် ဓာတ်ပုံတွေကြည့်ချင်ရင် ငါ ရှာပေးမယ်...နင် လျှောက်ပြီးကြည့်စရာမလိုဘူး"  

ရှောင်ရှောင် စိုးရိမ်နေသော်လည်း၊ထုတ်မပြဝံ့ပေ။သူမ ဝေ့ရွှယ်ကို အသံခပ်တိုးတိုးဖြင့် ပြောခဲ့သော်လည်း ဝေ့ရွှယ် က သူမအား လျစ်လျူရှုကာ မကြားချင်ယောင်ဆောင်ခဲ့သည်။

စုမုန့်သည် စားပွဲကို မှီ၍ မေး‌ေထာက်ကာ ထိုင်လိုက်သည်။ယခုတစ်ခါ ဝေ့ရွှယ်၏ သရုပ်ဆောင်ချက်က ဆိုးရွားပေသည်။ရှောင်ရှောင်၏ဖုန်းကို ရည်ရွယ်ချက်ရှိရှိ လုယူထားသည်မှာ ထင်ရှားသည်။ သူမ ဝေ့ရွှယ်ကိုကြည့်ကာ ဘယ်လိုမျိုးကြံစည်နေသလဲဆိုတာ ခန့်မှန်းရန်ကြိုးစားနေမိသည်။

ဝေ့ရွှယ်သည် ဓာတ်ပုံကိုသာ ကြည့်ချင်လျှင် ယခုလို အချိန်များစွာယူရန်မလိုအပ်ပေ။ရှောင်ရှောင် ၏ဖုန်းထဲက တစ်ခုခုကို သူမ ရှာနေသည်မှာ ထင်ရှားလှ၏။စောစောက၊  ဝေ့ရွှယ်၏ သရုပ်ဆောင်ချက်များနှင့်၊ဆက်စပ်ကြည့်လိုက်သောအခါ မကောင်းသောအကြံအစည်တစ်ခု ဖြစ်နိုင်ပြီး သူမနှင့်သက်ဆိုင်သည်ဟု ခန့်မှန်းမိသည်။

ဝေ့ရွှယ်သည် ရှောင်ရှောင်၏ ဖုန်းကို ခဏကြည့်နေရာမှ နောက်ဆုံးတွင် ထီမထင်ဟန်မျက်နှာပေးမျိုးဖြစ်သွား၏။တစ်ဖန် သူမ အံ့သြဟန်ဆောင်ပြီး စုမုန့် ကို မယုံကြည်နိုင်စွာ ကြည့်နေတော့သည်။  

“စုမုန့် နင်…တကယ်ပဲ…” 

သူမ စကားမဆုံးသေးသော်လည်း အသံက အလွန်ကျယ်လောင်သောကြောင့် လူတိုင်း သူမကိုကြည့်မိကြသည်။

ဝေ့ရွှယ် ထိတ်လန့်တုန်လှုပ်သွားပြီး ဖုန်းကိုဖွက်ဖို့ ကြိုးစားသော်လည်း၊သူမ  ကြောက်ရွံ့တုန်လှုပ်နေလွန်းတာကြောင့် ဖုန်းကကြမ်းပြင်ပေါ် ပြုတ်ကျသွားသည်။ကံကောင်းထောက်မစွာ၊ကြမ်းပြင်ပေါ်တွင် ကော်ဇောထူကြီးတစ်ခုရှိနေသဖြင့် ဖုန်းက ကွဲမသွားပေ။ဖုန်းက အဆင်ပြေသော်လည်း၊ ရှောင်ရှောင် နှင့် စကားပြောနေသည့် မိန်းကလေးတွေက သူမဘက်ကိုကြည့်လာကြ၏။ 

ဝေ့ရွှယ် အလွန်ထိတ်လန့်သွားသည်ကို ကောင်မလေးများက မြင်လိုက်ကြပြီး စူးစမ်းစိတ်ဖြင့် လျှောက်လာကြသည်။ ဆံပင်ရွှေရောင်နှင့်ကောင်မလေးက ကြမ်းပြင်ပေါ်က ဖုန်းကို ကောက်ကိုင်လိုက်သည်။ တစ်ချိန်တည်းမှာပင် သူမက စူးစမ်းလိုစိတ်ဖြင့် မေးသည်။ 

"ရှောင်ရွှယ်၊ နင် ဒီလိုမျိုး ကြောက်လန့်သွားရအောင် ဘာတွေ့လိုက်လို့လဲ..  ငါလည်း ကြည့်ကြည့်မယ်"

ထိုအခါ ဝေ့ရွှယ်က ဖုန်းကို ပြန်လုယူဖို့ကြိုးစားသော်လည်း၊ ကောင်မလေးက ရှောင်ထွက်သွားသည်။

ဝေ့ရွှယ်သည် ဖုန်းကိုဖွင့်ပြီးတမင်တကာ ပစ်ချခဲ့ခြင်းကြောင့် စခရက်က ပွင့်လျက်သားပင်။ဖုန်းကို လုယူသွားသည့် မိန်းကလေးက ဖုန်းကိုကြည့်ပြီး..

 “ရှောင်ရွှယ်၊ ဒါက နင့်ယောက်မ မဟုတ်ဘူးလား... ဒါ မစ္စစုဆိုတာသေချာတယ်...သူမ ယောက်ျားတစ်ယောက်ကို ဖက်နေပါလား"

 ကောင်မလေး အော်သံကြောင့် ပွဲရှိလူတိုင်းက လှမ်းကြည့်ကြသည်။သူမ စကားက အလွန်တုန်လှုပ်သွားစေခဲ့သည်။စုမုန့်က လူတစ်ယောက်ဖက်နေတာလား…သူမက ဝေ့ထင် နဲ့ မကွာရှင်းရသေးဘူး မလား…

အားလုံးက အံ့သြနေကြသော်လည်း တိုက်ရိုက်မေးရန် မဝံ့ရဲကြပေ။သူတို့အားလုံး နားစွင့်ပြီး တိတ်တိတ်လေး နားထောင်ကြသည်။

 "ရှီရှီ၊ နင်... နင်ကလည်း တိုးတိုးပြောပါ...ငါ့ယောက်မက  တခြားယောက်ျားတစ်ယောက်ကို ဖက်နေတယ်ဆိုတာ လူကြားကုန်ပါ့မယ်"

ဝေ့ရွှယ်က စိုးရိမ်တကြီးဟန်ဖြင့် ပြောလိုက်သည်။

(သစ္စာမဲ့သောမိန်းမ)

ဝေ့ရွှယ်က တခြားသူတွေ မကြားစေနဲ့ဟု ပြောသော်လည်း၊သူမအသံကို လူတိုင်းကြားနေရသည်။

ပထမတော့ အမေဝေ့သည် သူ့ဘေးနားက သူငယ်ချင်းတွေနှင့် စကားစမြည်ပြောနေသည်။ သို့သော်လည်း၊ခန်းမတစ်ဖက်ခြမ်းမှာ တစ်ခုခုဖြစ်နေပြီကို သတိထားမိချိန်၌၊သူမ မျက်မှောင်ကြုတ်ပြီး လျှောက်သွားလိုက်သည်။

ရှီရှီဟုခေါ်သော မိန်းကလေးက ရှောင်ရှောင်ကို တစ်ချက်ကြည့်လိုက်ပြီး 

“ရှောင်ရှောင် နင် ဒီလိုဗီဒီယိုမျိုးကို ရိုက်နိုင်လောက်အောင် တော်လိမ့်မယ်လို့ ငါ မထင်ထားဘူး... ဒါပေမယ့် မစ္စစု နဲ့ဖက်နေတာက ဘယ်သူလဲတော့ မသိဘူး...ဒီကောင်က မစ္စစုကို သတ္တိရှိရှိ သွေးဆောင်ရဲတယ်ပေါ့...သူက ဝေ့မိသားစုကို ဆန့်ကျင်နေတာမဟုတ်ဘူးလား...အားလားလား... ဒီလူ ဘဝဆုံးချင်ပြီနဲ့တူတယ်"

ထို့နောက် သူမက ရှောင်ရှောင်၏ နံဘေးသို့ လျှောက်သွားပြီး ပခုံးပေါ်တင်လိုက်သည်။ 

 "ရှောင်ရှောင် ဒီလူက ဘယ်သူလဲဆိုတာ နင် သိလား...ငါ့ကိုပြောပြလို့ရမလား...ငါဘယ်သူ့ကိုမှ မပြောဘူးလို့ ကတိပေးပါတယ်…နင်က ဗီဒီယိုကို ရိုက်ခဲ့တဲ့သူပဲ..မြင်ဖူးမှာ သေချာတယ်"

တစ်ကယ်တော့ ရှီရှီက ဗီဒီယိုကိုမြင်ပြီးချင်း၊ ဗီဒီယိုထဲကလူမှာ ရှောင်ချမ်မှန်း သိပြီးသားပင်။သူမ မသိဟန်ဆောင်ပြီး ရှောင်ရှောင် ဒုက္ခရောက်အောင်လုပ်နေတာပင်။ 

အရာအားလုံး လက်လွန်တော့မည့်အချိန်ဖြစ်၍၊ ရှောင်ရှောင် မျက်နှာက ဖြူဖျော့သွားရ၏။ ဗီဒီယိုနှင့် ဓာတ်ပုံကို သူမ ဘယ်လိုအစီအစဉ်ဆွဲ၍ ပြောရမှန်း မစဉ်းစားရသေးပေ။စုမုန့် နှင့် ရှောင်ချမ် အတူတူရှိနေသည်ကို ခန်းမထဲက မည်သူမဆို မြင်သွားနိုင်သည်။ သူတို့နှစ်ယောက်ကြားက ကိစ္စကို လူသိရှင်ကြားသိခဲ့လျှင် စုမုန့်သာမက ရှောင်မိသားစုကိုပါ ထိခိုက်သွားပေလိမ့်မည်။

သူမ ဖုန်းကို ပြန်လုယူဖို့ကြိုးစားသော်လည်း၊ရှီရှီက သူမကို မပေးပေ။ သူမကို လက်တစ်ဖက်ဖြင့် တားလိုက်ပြီး တခြားတစ်ဖက်နှင့် ဝေ့ရွှယ်ထံ ဖုန်းပေးလိုက်သည်။ ထိုအခါ သူမက ဝေ့ရွှယ်ကို အသနားခံသလို‌ေပြာလိုက်သည်။

"ရှောင်ရွှယ် ငါ့ဖုန်းကို ပြန်ပေးပါဟာ...နင်က သူငယ်ချင်းကောင်းတစ်ယောက်ဆိုတာ ငါသိတယ်…နင့် သူငယ်ချင်း ဒုက္ခရောက်နေတာကို မမြင်ချင်ဘူးမလား"

ဝေ့ရွှယ်သည် ထိုစကားကိုကြားသောအခါ လက်ကို ချက်ချင်းပြန်ရုတ်လိုက်ပြီး မယူဝံ့တော့ပေ။သူမသာ စိတ်အားထက်သန်စွာ ယူလိုက်ပါက၊  တခြားသူတွေ ရိပ်မိသွားနိုင်၏။

လူအုပ်ကြီးက စုမုန့်ကို စိတ်ဝင်တစား ကြည့်ကြသည်။သူတို့အားလုံးက ပွဲကိုကြည့်ဖို့ အဆင်သင့်ဖြစ်နေကြသော်လည်း၊ စုမုန့် ကတော့ လုံးဝစိတ်မပူပေ။သူမသည် အေးဆေးတည်ငြိမ်စွာပင်ပြုံးနေခဲ့သည်။ 

အမေဝေ့သည်ဝေ့ရွှယ် ဘေးသို့ လျှောက်သွားလိုက်သည်။ ရှီရှီကလည်း အမေဝေ့ဆီ ဖုန်းကို အလျင်အမြန်ပေးလိုက်သည်။ ဗီဒီယိုကိုကြည့်ပြီးနောက် အမေဝေ့ မျက်နှာက မည်းမှောင်သွားကာ စိတ်ဆိုးနေမှန်း သိသာထင်ရှားစွာပင် စကားတစ်ခွန်းမှ မဆိုလာတော့။

 “ငါနဲ့လိုက်ခဲ့” 

အမေဝေ့က စုမုန့် အား သူမ နောက်ကို လိုက်ဖို့ လက်ဟန်ပြသည်။ သူမ ရှေ့ကို ခြေလှမ်းအနည်းငယ်လှမ်းပြီး နောက်လှည့်ကြည့်လိုက်ရာ စုမုန့်က နေရာမှမရွေ့ဘဲ သူမကို ငြိမ်သက်စွာကြည့်နေသည်ကို တွေ့ရလေသည်။စုမုန့်၏ မတုန်မလှုပ်ဖြစ်နေဟန်ကိုကြည့်ပြီး အမေဝေ့ ပို၍ပင် ဒေါသဖြစ်သွားသည်။ သူမ ဖုန်းထဲကဗီဒီယိုအား စုမုန့်ကို ပြလိုက်ကာ စိတ်မရှည်စွာနှင့်...

"ဒီမှာရပ်ပြီး နင်က ဘာဖြေရှင်းချင်တာလဲ…နင်က အရှက်မရှိရင်တောင် ဝေ့မိသားစု မျက်နှာက ရှိနေသေးတယ်...လာ၊ ငါ့အခန်းထဲသွားရအောင်"

အမေဝေ့က ဒေါသတကြီးပြောနေသော်လည်း စုမုန့်သည် နေရာကရွေ့ရန်ပင် ရည်ရွယ်ချက်မရှိပေ။ သူမက မှုန်ကုပ်ကုပ်ပြုံးကာ အမေဝေ့ကိုမေးလာသည်။

 “အန်တီဝေ့၊ ဝေ့မိသားစုကို မျက်နှာပျက်အောင် ကျွန်မ ဘာလုပ်လိုက်မိလို့လဲ” 

အမေဝေ့ ဒေါသထွက်နေသော်လည်း အခြားသူများကြားမည်ကို ကြောက်သောကြောင့် ကျယ်လောင်စွာ မပြောဝံ့ပေ။ သူမ အသံကို လျှော့လိုက်ပြီး 

"ဗီဒီယိုက ဒီမှာရှိနေတာလေ...နင့်မျက်စိက မမြင်ရဘူးလား ..ဒါ့အပြင် နင်လုပ်ခဲ့တဲ့အရာတွေကို ငါ့က ပြောပြဖို့ လိုသေးလား...နင်က ပိုပိုပြီး အတင့်ရဲလာတယ်နော်...အရင်တုန်းက နင်က အပြင်မှာ နေပြီး တခြားယောက်ျားတွေနဲ့ နေချင်သလိုနေသေးတယ် ..အခုလည်း ငါတို့ ဝေ့မိသားစုထဲမှာ သတ္တိရှိရှိ လာလုပ်ပြန်ပြီ"

 "ဒီလူက ဘယ်သူလဲ...နင်က အရမ်းဖုံးကွယ်တတ်တာပဲ...နင့်ချစ်သူကို ဒီကို ငါတို့ သတိမထားမိအောင် ခေါ်လာခဲ့တာပေါ့... ငါတို့ဝေ့မိသားစုမှာ နင့်လိုချွေးမမျိုး အလိုမရှိဘူး...ဒီပွဲပြီးရင် ဝေ့ထင်နဲ့ နင် ချက်ချင်းကွာရှင်းသင့်တယ်"

အမေဝေ့သည် ပြောရင်း စုမုန့် အပေါ်မှာ မုန်းတီးစိတ်များ တိုးလာ၍ အံကြိတ်လိုက်၏။ ဗီဒီယိုထဲမှာ စုမုန့် သည် ထိုအမည်မသိယောက်ျားကို အချိန်အကြာကြီး မှီထားပုံက အတော်ပျော်နေပုံရသည်။ဤမြင်ကွင်းကို သူမ သည်းမခံနိုင်။

စုမုန့်သည် အမေဝေ့ စကားကိုဂရုမစိုက်စွာပင်  ပြုံးပြီး ခေါင်းညိတ်သည်။  

"ဟုတ်ပါတယ်...ကျွန်မကလည်း သိပ်ကိုကွာရှင်းချင်ပါတယ်"

ထိုစကားကို ပြောပြီးနောက် သူမက အနေအထိုင် ပြောင်းလိုက်သည်။လက်တစ်ဖက်က မေးစေ့ကို ထောက်ထားပြီး  နောက်တစ်ဖက်က ရှေ့က ဓားနှင့် ခက်ရင်းကို ကစားနေသည်။

“ကျွန်မက သိပ်ကို ကွာရှင်းချင်တယ်...ဝေ့မိသားစုထဲမှာ ကျွန်မအတွက် နေရကျိုးနပ်တာ ဘာမှမရှိဘူး…အန်တီ့ရဲ့သားကတော့ ပြဿနာပဲ...သူက မကွာရှင်းဘူးတဲ့...အန်တီက သူ့ကို ဒီထက်ပိုပြီး တိုက်တွန်းသင့်တယ်"

သူမ ပြောတာမှန်နေသည်။ အမေဝေ့ကိုယ်တိုင် သူ့ကို ကွာရှင်းဖို့ အကြိမ်ကြိမ် တိုက်တွန်းခဲ့သော်လည်း၊ ဝေ့ထင် ကအကြိမ်တိုင်း ငြင်းပယ်ခဲ့၏။ ထို့ကြောင့် စုမုန့်နှင့် မိသားစု၏ ပြဒါးတစ်လမ်းသံတစ်လမ်း ဆက်ဆံရေးကို အသုံးပြုကာ ကွာရှင်းပြတ်စဲရန် တွန်းအားပေးလိုခြင်း ဖြစ်သည်။

အမေဝေ့ ဝေ့ထင်ကို တစ်ချက်ကြည့်လိုက်သည်။ဝေ့ထင်သည် ယခုအချိန်တွင် လူတစ်ယောက်နှင့် စကားပြောနေသည်။သူတို့နှစ်ဦးသည် အလွန်အရေးကြီးသော အကြောင်းအရာကို ပြောဆိုနေကြပုံရသည်။သူ့မျက်နှာအမူအရာက တည်ကြည်လေးနက်လျက်သားပင်။သူမ၏ သားမှာ အပေါ်ယံမှာ အေးစက်နေပုံရသော်လည်း၊တခြားသူတွေထက် စိတ်ခံစားတတ်လွယ်သူဖြစ်သည်။သူ့ခံစားကိုယ်သူ ဘယ်လိုဖော်ပြရမှန်းမသိ၍ ခပ်တည်တည်နေနေခြင်းသာ။ထို့ကြောင့် သားဖြစ်သူအစား သူမကိုယ်တိုင် ဖြေရှင်းရပေမည်။

xxxxxxx