အပိုင်း ၁၄၄

Chapter 144

(သူငယ်ချင်းကို သစ္စာဖောက်ခြင်း)

 “အဲဒါအတွက် စိတ်မပူပါနဲ့…နင့်ဘက်က ကွာရှင်းဖို့ သဘောတူရင် ကျန်တာ ငါ့ဘာသာ ဆက်လုပ်မယ်... ပွဲပြီးရင် ငါနဲ့ လိုက်ခဲ့ရမယ်...ဒီကိစ္စကို ငါကိုယ်တိုင်ကိုယ်ကျ ကိုင်တွယ် ဖြေရှင်းလိုက်ရင် မကြာခင် ပြီးသွားမှာပါ”

အမေဝေ့သည် စုမုန့်ကို အေးစက်စွာကြည့်နေသည်။စုမုန့်ကို ကြာကြာကြည့်လေလေ၊ သူမကို ပိုမုန်းလေလေဖြစ်သည်။စုမုန့်သည် ဝေ့ထင် နှင့် မကွာရှင်းခင် ဝေ့မိသားစုရှေ့မှာပင် တခြားလူတစ်ယောက်နှင့် ပူးကပ်နေနေတာကြောင့် အတင့်ရဲလှသူပင်။သူမ စုမုန့်ကို သတိပေးလိုက်၏။

 “ကွာရှင်းမယ်ဆိုတာက သိပ်သေချာနေ‌ပေမယ့် အခုတော့ နင်တို့က မကွာရှင်းသေးဘူး...ဒီလိုဆက်လုပ်ရင် ဝေ့မိသားစုရဲ့ ဂုဏ်သိက္ခာကို ထိခိုက်လိမ့်မယ်...နင် ဘာတွေတွေးနေလဲဆိုတာ ငါဂရုမစိုက်ဘူး၊ ဒါပေမယ့် ကွာရှင်းစာချုပ်မချုပ်ခင် နင်ကိုယ်တိုင်က ပိုကောင်းအောင်နေရမယ်"

အမေဝေ့ ဒေါသတကြီးနှင့် အော်ဟစ်လျက်ရှိသည်။ထိုလူက ဘယ်သူလဲဆိုတာ သူမ,သိချင်သည်။ စုမုန့်က ဘယ်သူမှန်း သိသော်လည်း သူမနှင့် နီးစပ်ဖို့သတ္တိရှိသူ တစ်ယောက်ပင်။သူက ဝေ့မိသားစုကို လျှော့တွက်ထားတာပဲ... ဗီဒီယိုသည် အလွန်ရှင်းလင်းသော်လည်း ကင်မရာရိုက်ချက်ထောင့်ကြောင့် ထိုလူ၏ မျက်နှာတစ်ဝက်သာ ထင်ရှားစွာ မြင်ရသည်။ထို့အပြင် ယနေ့တွင် ဧည့်သည်များစွာရှိ၍ လူတိုင်းအား သူမ မသိပေ။ ထို့ကြောင့် ထိုလူ၏ အဝတ်အစားနှင့် ဆံပင်ကို သေချာမြင်ရလျှင်ပင် မည်သူမည်ဝါမှန်း အတပ် မပြောနိုင်ပေ။

အမေဝေ့သည် မှုန်ကုပ်ကုပ်မျက်နှာဖြင့် ဧည့်သည်များဘက်ကို လှည့်ကြည့်လိုက်သည်။တခြားသူတွေကလည်း သူမအကြည့်ကိုမြင်လျှင် ချက်ချင်း ခေါင်းကို အလျင်အမြန် ငုံ့ပြီး ကိုယ့်အလုပ်ကိုယ် ဆက်လုပ်ဟန်ဆောင်နေကြပြန်၏။သူမ ဧည့်သည်အားလုံးနီးပါးကို ကြည့်လိုက်သော်လည်း ဗီဒီယိုထဲမှ လူကို သူမ မတွေ့ခဲ့ပေ။

'ဝေ့မိသားစုထဲကို ပြင်ပလူတစ်ယောက်က ခိုးဝင်လာတာဖြစ်နိုင်မလား' 

ယနေ့လူများနေသည်ကိုအခွင့်ကောင်းယူ၍ ခိုးဝင်လာသူလည်း ရှိနိုင်၏။ သေတော့မသေချာပေ။

 "ရှောင်ရွှယ် ဒီကိုလာ" သူမ ဝေ့ရွှယ်ကို  ခေါ်လိုက်ပြီးနောက် ဗီဒီယိုကိုဖွင့်ပြပြီး 

"ဗီဒီယိုထဲကလူက ဘယ်သူလဲဆိုတာ နင် သိလား"

ဝေ့ရွှယ်သည် ခဏကြာအောင် ဂရုတစိုက်ကြည့်ကာ ဟန်ဆောင်လိုက်သည်။

 “အဲဒါ သူ…သူ…” 

ပြောရင်းဆိုရင်း သူမက ရှောင်ရှောင် ကို လှည့်ကြည့်ပြီး တခြားဘာမှ မပြောတော့ပေ။သို့သော် သူမ၏ အမူအရာက ရှင်းလင်းနေသည်။ဤကိစ္စသည် ရှောင်မိသားစုနှင့် သက်ဆိုင်ကြောင်း အမေဝေ့ ချက်ချင်း သဘောပေါက်သွားသည်။

ရှောင်ရှောင်သည် ဝေ့ရွှယ်က ရှောင်ချမ်ဟု ပြောလိုက်မှာကို ကြောက်မိသွားသည်။သူမ စိတ်ထဲက တုန်လှုပ်ချောက်ချားသွားရကာ ဝေ့ရွှယ်ကို အဓိပ္ပါယ်ရှိသော အကြည့်ဖြင့် ကြည့်ပြီး ဆက်မပြောဖို့ အရိပ်အခြည်ပြလိုက်၏။

အမေဝေ့ စိတ်ထဲမှာ ထင်နေပြီဖြစ်သော်လည်း၊ တိကျသောအဖြေမရှိဘဲ ရှောင်ရှောင်ကို တိုက်ရိုက်မေးဖို့မ ဖြစ်နိုင်ပေ။ ရှောင်မိသားစု၏ အဆင့်အတန်းမှာ မမြင့်မားသော်လည်း ယခုအချိန်၌ ဧည့်သည်များလည်း ရှိသေးသည်။သူမ ရန်လိုစွာ ပြုမူလိုက်ပါက၊ သူတို့အတွက် ပြောစရာဖြစ်သွားနိုင်သည်။ထို့ကြောင့် သူမက ဝေ့ရွှယ်ကို ဆက်မေးသည်။

"ရှောင်ရွှယ်၊ သူက ဘယ်သူလဲဆိုတာ သိလား...သိရင် အမေ့ကို မြန်မြန်ပြောပါ… မကြောက်ပါနဲ့ အမေ့ရှိတယ်လေ...သမီးကိုဘယ်သူမှ အနိုင်ကျင့်မှာ မဟုတ်ဘူး”

ဝေ့ရွှယ်သည် ဘယ်သူလဲဆိုသည်ကို ပြောဖို့ မစောင့်နိုင်သော်လည်း၊သူမသာ အမြန်ပြောလိုက်လျှင်၊တမင်သက်သက် အကွက်ဆင်ထားသည်ဟု ရှောင်ရှောင် ရိပ်မိသွားနိုင်၍ အတတ်နိုင်ဆုံး စကားကိုနှေးနှေးလေး ပြောရမည်။ဆက်တိုက်ဆိုသလို၊ အမေဝေ့၏ အဆက်မပြတ်မေးခွန်းထုတ်မှုအောက်တွင် သူမ နောက်ဆုံးတွင် ထိုသူ၏အမည်ကို ပြောခဲ့သည်။  

"သူ...သူက ရှောင်ရှောင် ရဲ့ အစ်ကို ရှောင်ချမ်ပါ"

 သူမပြောပြီးသည်နှင့် ရှောင်ရှောင်ကို တောင်းပန်သည့် သဘောနှင့် သူမ တစ်ကယ်မရည်ရွယ်ပါကြောင်း ကြည့်လိုက်သည်။

 "ရှောင်ချမ်...ရှောင်မိသားစုကလား... တကယ်ပဲ သူလား”  

အမေဝေ့ အထင်မှန်သွားရ၏။ ရှောင်မိသားစုသည် အင်အားမရှိသော်လည်း ယခုလို ရည်မှန်းချက်ကြီးကြီးမားမားထားမည်ဟု သူမ မမျှော်လင့်ထားပေ။  ရှောင်ချမ်သည် ဝေ့မိသားစု၏ချွေးမကို တမင်တကာ ဖြားယောင်းခဲ့သည်။သူ့လုပ်ရပ်က ဝေ့မိသားစုကို ဆန့်ကျင်ရုံတင်မကဘဲ၊ ဝေ့မိသားစု၏ မျက်နှာကို အိုးမည်းသုတ်ပစ်ခြင်းပင်။ယခင်က ဝေ့မိသားစုနှင့် ရင်းနှီးဖို့အတွက် အမေရှောင်သည် သူမကို နည်းအမျိုးမျိုးနှင့် လိုက်ကပ်ခဲ့သည်။အမေရှောင်သည် သူ့သား ဘာလုပ်ခဲ့သည်ကို မသိ။သူမ သိခဲ့ရင် ဘယ်လိုကိုင်တွယ်မလဲ... ရှောင်မိသားစုသည် ဝေ့မိသားစုကို ဆန့်ကျင်လိုက်၍၊သူတို့စီးပွားလုပ်ငန်းကို ဆက်မလုပ်ချင်တော့ပုံရသည်။

ရှောင်ချမ်၏ဂုဏ်ကျက်သရေမရှိသည့် လုပ်ရပ်တွေကို အမေဝေ့ ကြားဖူးခဲ့တာ ကြာပါပြီ။သူမနှင့် ဘာမှမပတ်သက်သည့်အတွက် ယခင်ကဆို ဂရုမစိုက်ခဲ့ပေ။ယခုတော့ ရှောင်ချမ်က ဝေ့မိသားစုကို ရန်စဖို့တောင် သတ္တိရှိနေသဖြင့်၊သူမလည်း ရှောင်မိသားစုအပေါ် ယဉ်ကျေးနေဖို့ မလိုအပ်တော့။

အမေဝေ့ သည် အမေရှောင်ကို တစ်ချက် စိုက်ကြည့်လိုက်သည်။ယခု လူတွေများနေသဖြင့် သူမ ဘာမှ မပြောနိုင်သေး။ဤကိစ္စကိုသာ လူသိရှင်ကြားဖြစ်သွားလျှင်၊သူမတို့ ဝေ့မိသားစုကို ထိခိုက်စေလိမ့်မည်။သူမ ဤကိစ္စကို လောလောဆယ် ဘေးဖယ်ထားရမည်ဖြစ်သည်။ပွဲပြီးသွားလျှင်တော့ အမေရှောင် နှင့်ရှင်းရပေမည်။

 စကားဝိုင်းသည် အလွန်တိတ်ဆိတ်နေပြီး တခြားသူတို့မှာ မျက်နှာမကောင်းကြောင်းသာ မြင်နိုင်သော်လည်း သူတို့ဘာပြောနေသည်ကို မသိကြပေ။မူလက ရှီရှီနှင့် မိန်းကလေးတစ်စုသည် ကိစ္စတစ်ခုအတွက် ပြောဆိုနေကြသော်လည်း အရေးကြီးသောအခိုက်အတန့်တွင် မေမေဝေ့က ဦးဆောင်လျက်သားပင်။

 ဤသည်မှာ ဝေ့မိသားစု၏ ကိစ္စဖြစ်သည်။ စုမုန့်ကို အမေဝေ့ ဘယ်လောက်ပဲ မုန်းတီးနေပါစေ၊ ပြင်ပလူတွေကို ဝင်ရောက်စွက်ဖက်ခွင့် မပြုနိုင်ချေ။အထူးသဖြင့်၊ အပြင်လူများသည် သက်သက်မဲ့ ‌အပျော်သဘောမျိုးသာ သဘောထားကြပေမည်။နှစ်ပေါင်းများစွာ အသက်ရှင်နေထိုင်လာရင်း၊ သူမသည် ထိုမိန်းကလေးများ၏ အတွေးအမြင်များကို တစ်ချက်ကြည့်လိုက်ရုံဖြင့် သိနေသည်။

 သူမကို လှည့်စားဖို့ ကြိုးစားနေတာလား...နင်တို့ နောက်ထပ်ကြိုးစားလိုက်ဦး...

အမေဝေ့က ဤနေရာကို စိုးမိုးထားသဖြင့် ဘယ်သူကမှ သူမတို့အဖြစ်အား ပွင့်ပွင့်လင်းလင်း ဂရုမစိုက်ဝံ့ပေ။ဝေ့မိသားစုကို သွားရောက်ထိပါးသလိုဖြစ်မည်စိုး၍၊ဧည့်သည်များမှာ တိတ်တဆိတ်သာ စောင့်ကြည့်နေခဲ့သည်။

(မရယ်လို့ ငိုနေရမှာလား...)

အမေဝေ့ ဤအကြောင်းတွေကို ဆက်မဆွေးနွေးချင်တော့ဘဲ စုမုန့်အား ဘယ်သူမှ မရှိသည့်နေရာသို့သာ ခေါ်သွားချင်မိသည်။သို့သော် စုမုန့်သည် သူမ စကားနားမထောင်ပေ။ အပြင်လူများသာ မရှိလျှင် စုမုန့်ကို အစေခံများနှင့် အဆွဲထုတ်ခိုင်းမှာ သေချာ၏။

ဝေ့ရွှယ်သည် ကိစ္စက မရှင်းမရှင်းဖြစ်နေသည်ကို မြင်လိုက်ရပြီး စိတ်ထဲတွင် သက်ပြင်းချလိုက်သည်။ အမေဝေ့ ရောက်လာသည်မှာ အနည်းငယ်စောလွန်း၍ သူမ ခင်းထားသည့် အစီအစဉ်ကို ကောင်းကောင်းအသုံးမချလိုက်ရပေ။ အကယ်၍ အမေဝေ့သာ နောက်မှရောက်လာပါက၊ စုမုန့် သည် မကောင်းသောမိန်းမဖြစ်ကြောင်း လူတိုင်းသိအောင်ပြောနိုင်မည်ဖြစ်သည်။

သို့ဆိုလျှင်၊ အမေဝေ့က စုမုန့် နှင့်ဝေ့ထင်ကို မကွာရှင်းစေချင်သေးလျှင်တောင် မဖြစ်နိုင်ပေ။ ဝေ့မိသားစု၏ နာမည်ဂုဏ်သတင်းကြောင့် စုမုန့် နှင့် ဝေ့ထင်တို့၏ ကွာရှင်းမှုသည် အချိန် နှောင့်နှေးမည်မဟုတ်ပေ။ထိုအကြောင်းကို တွေးပြီး သူမ အမေဝေ့ကို အပြစ်တင်ပါတော့သည်။

ဝေ့ထင်က ဧည့်သည်များနှင့် အလုပ်ကိစ္စဆွေးနွေးပြီးသည်နှင့် ဤနေရာတွင် မူမမှန်ဖြစ်နေသည်ကို သတိပြုမိသည်။သူထပြီး လျှောက်သွားလိုက်ရာ၊ လူတိုင်း မျက်နှာထားတွေက တစ်မျိုးတစ်မည် ဖြစ်နေ၍ သူ့အမေကိုမေးလိုက်သည်။ “ဘာကိစ္စရှိလို့လဲ”

 !!

အမေဝေ့က ဘေးဘီကိုလှည့်ကြည့်လိုက်သည်။သူမတို့အား ဘယ်သူမှ မကြည့်နေသည်ကို မြင်လျှင်၊ ဝေ့ထင်ကို 

“မင်းရဲ့ ဇနီးကို ကြည့်စမ်း... အိမ်ထောင်က မကွဲရသေးဘဲ နောက်အိမ်ထောင်ပြုဖို့ မစောင့်နိုင်ဘူးဖြစ်နေပြီ… ဝေ့မိသားစုမှာ နေပြီး ဒီလိုလုပ်နေပြီ...အပြင်မှာနေရင် တစ်ခုခုတော့ ဖြစ်သွားနိုင်တယ်"

စကားပြောနေစဉ် သူမသည် ဖုန်းကို ဝေ့ထင်အား ပေးပြီး ဗီဒီယိုကို ကြည့်ခွင့်ပေးခဲ့သည်။

အမေဝေ့ ပြောသောစကားကြောင့် စုမုန့် သဘောကျသွားကာ မထိန်းနိုင်ဘဲ ရယ်မောလိုက်သည်။အမေဝေ့သည် သူမအား တခြားယောက်ျားတစ်ယောက်နှင့် ရင်းနှီးနေ၍ ဆူပူကြိမ်းမောင်းနေသော်လည်း၊ ဝေ့ထင် ရှေ့ရောက်ခါမှ၊ သူမမှာ ချစ်သူရှိနေသည်ဟု စကားပြောင်းပြောနေခြင်းပင်။ဤကိစ္စကို ရှင်းရှင်းလင်းလင်းတောင် မပြောရသေးဘဲ အလျင်စလို ကောက်ချက်ချခဲ့သည်။ကြည့်ရသည်မှာ၊ အမေဝေ့က သူမအား ယခုလို ဖြစ်ဖို့ တမင်တကာမျှော်လင့်နေပုံပင်။

စုမုန့် ရယ်သံကိုကြားလျှင်၊ အမေဝေ့၏ မျက်နှာက ပိုမိုပျက်ယွင်းလာသည်။ဤအခြေအနေမျိုးမှာ စုမုန့် ရယ်နိုင်လိမ့်မည်ဟု သူမ မမျှော်လင့်ခဲ့ပေ။သူမက စုမုန့် ကို ပြင်းပြင်းထန်ထန် စိုက်ကြည့်ပြီး ဝေ့ထင်အား ပြောလိုက်၏။

"သူမကို ကြည့်လိုက်စမ်း...  ဒီလိုအချိန်မျိုးမှာ သူမ ဘယ်လိုလုပ်ပြီး ရယ်နိုင်သလဲ... တော်တော် မျက်နှာပြောင်တဲ့မိန်းမ"

ထိုစဉ် ဝေ့ထင်၏ အဖြေကို စောင့်မနေဘဲ စုမုန့်က ဝင်ပြော၏။

 “အန်တီ့အပြောက နည်းနည်းတော့ ယုတ္တိမတန်ဘူး…ဒီနေ့က အဘိုးရဲ့ မွေးနေ့ပွဲလေ…ကျွန်မက မရယ်လို့ ငိုနေရမှာလား…"

စုမုန့် စကားက ရယ်စရာကောင်းမှန်း အမေဝေ့ သိသော်လည်း မည်သို့ ချေပရမှန်း မသိဘဲ နှုတ်ဆိတ်နေရသည်။

သူမတို့က်ိုကြည့်ပြီး ဝေ့ရွှယ်သည် စုမုန့် အသာစီးမရဖို့ လုပ်မည်ဟု တွေးလိုက်၏။ယခုအချိန်သည် ဝေ့ထင်၏ စိတ်ထဲတွင် စုမုန့်၏ပုံရိပ်ကို ဖျက်ဆီးရန် အကောင်းဆုံးအချိန်ဖြစ်သည်။သူမ ဤအခွင့်အရေးကို လက်မလွှတ်နိုင်ပေ။ သူမ ခဏလောက်တွေးပြီး ဝေ့ထင်ဆီသို့ လျှောက်သွားသည်။ ပြီးလျှင် ဝေ့ထင်၏ လက်မောင်းကို ကိုင်ထားရန် သူမ လက်ကို မြှောက်လိုက်သော်လည်း ဝေ့ထင်က အမြန်ရှောင်သည်။သူမကလည်း ဂရုမစိုက်သလိုပင်၊ စုမုန့် အစား ဟန်ဆောင် အသနားခံလိုက်သည်။  

"အစ်ကို ဝေ့ထင်၊ စုမုန့် ကလေ တခြားယောက်ျားနဲ့ အရမ်း တရင်းတနှီးစကားပြောနေပြီး သူ့ကို ဖက်ထားတာတဲ့…ဒါပေမယ့် သူမကို စိတ်မဆိုးပါနဲ့နော်...သူမမှာလည်း သူ့ကိစ္စနဲ့သူ ရှိနေမှာ" 

ဝေ့ထင် တစ်ချက် မျက်မှောင်ကြုတ်ကာ အနည်းငယ်စိတ်မရှည်ဖြစ်သွားသည်ကိုမြင်လိုက်ရ၏။ဝေ့ထင်က ဤကိစ္စကို တွေးကာစိတ်တိုနေပြီဟုထင်မိ၍ သူမ မီးထဲကို လောင်စာထည့်လိုက်သည်။

 “အစ်ကိုဝေ့ထင်၊ နောက်တစ်ခုရှိသေးတယ်... စုမုန့်က အစ်ကို ပေးခဲ့တဲ့ လက်ဆောင်သေတ္တာ ပျောက်သွားတယ်တဲ့...ညီမကပဲ သူမကိုယ်စား တောင်းပန်ပါတယ်…ကျေးဇူးပြုပြီး သူမကို အပြစ်မတင်ပါနဲ့…သူမ ရည်ရွယ်ချက်ရှိရှိ လုပ်တာမဟုတ်ပါဘူး..ပွဲပြီးရင် ညီမ ကူရှာပေးပါ့မယ်"

စုမုန့်ကလည်း 

“ဟုတ်တယ် ဝေ့ထင်…ရှင့်ညီမလေးက အရမ်းတော်တာ…ကျွန်မ ပျောက်သွားမှန်း သိတော့ သူမကလည် ရှာပေးမယ့်လို့ ပြောတယ်လေ...နင် သေတ္တာက ဘယ်မှာလဲဆိုတာ မသိဘူးလို့ ပြောတယ်မလား...ဟုတ်တယ်မဟုတ်လား ရှောင်ရွှယ်…ကျေးဇူးအရမ်းတင်ပါတယ်"

 "စုမုန့်ကလည်း ဘာပြောနေတာလဲ"  

ဝေ့ရွှယ်က ရှက်ရွံ့စွာ ခေါင်းယမ်းလိုက်သည်။  

"နင်က ငါ့ယောက်မ မဟုတ်တော့ရင်တောင် နင့်ကို ငါ့ညီမလို ဆက်ဆံမယ်လေ...ကိုယ့်အစ်မ တစ်ယောက် ဒုက္ခရောက်နေချိန်မှာ ဘယ်ညီမက မကူညီဘဲ နေနိုင်မှာလဲ...ဒါကြောင့် နင် ငါ့ကို ရှက်နေဖို့ မလိုပါဘူး”

စုမုန့် ခေါင်းညိတ်လိုက်သည်။ 

"နင် ပြောတာမှန်တယ်…ရှောင်ရွှယ်က အရမ်းဖြူစင်ပြီး ကြင်နာတယ်နော်…ငါကတော့ နင့်ကို အရမ်းခင်နေပြီ'

ဝေ့ရွှယ်က ရှက်ရွံ့စွာ ခေါင်းငုံ့ထားလိုက်သည်။

ဝေ့ထင်သည် ဘေးမှာရပ်ပြီး ဘာမှပြန်မပြော။ သူမတို့တွေ အချင်းချင်း ပြောဆိုနေတာကို သူ ကြည့်နေလိုက်သည်။ နောက်ဆုံးတွင် သူများတွေ ပြောပြီးသောအခါမှ သူက မျက်မှောင်ကြုတ်ကာ ပြောသည်။

 “ ကျွန်တော် ပြောပြီးသားပါ... ကျွန်တော်တို့ ကွာရှင်းမှာမဟုတ်ဘူး… စုမုန့်က ဝေ့မိသားစုရဲ့ သခင်မလေးပဲဖြစ်နေမှာပါ”

 "ပြီးတော့ ဒီဗီဒီယို..." 

ဝေ့ထင် ဖုန်းကို တချိန်လုံး ကိုင်ထားသော်လည်း၊ ဗီဒီယိုကို တစ်ချက်သာ ကြည့်နေခဲ့ခြင်းပင်။ သူ ဖုန်းကို မြှောက်လိုက်ပြီး လူတိုင်းရှေ့တွင် ဖျက်ပစ်သည့်ခလုတ်ကို နှိပ်လိုက်သည်။

 “အဲဒီအချိန်တုန်းက ကျွန်တော် အဲ့ဒီနေရာမှာ ရှိနေခဲ့ပြီး ဖြစ်ပျက်ခဲ့သမျှကို သိထားတဲ့အတွက် ဗီဒီယိုကို သိမ်းထားဖို့ မလိုပါဘူး...ကျွန်တော့်လူတွေကို ဘယ်သူမှ အနှောင့်အယှက်ပေးလို့ မရဘူး"

ဝေ့ထင်သည် သူ့ရှေ့မှ လူအနည်းငယ်ကို ကြည့်ကာ အေးစက်သော အကြည့်ဖြင့် သတိပေးလိုက်သည်။

xxxxx