အပိုင်း ၂၀၈

Chapter 208

"အင်း"

လင်းဖေး၏အမူအရာမှာ ရှူတည်တည်နှင့်ဖြစ်သည်။မသိလျှင် လင်းလော့ချင်းအား နှုတ်ဆက်ရန် အထူးတလည် ထွက်လာသည်ဟု ဘယ်သူမှပြောနိုင်မှာမဟုတ်ပေ။

"ဒါဆို ပါးပါးသွားတော့မယ်"

"အင်း"

လင်းလော့ချင်း သူ့မျက်နှာကို မသွားချင်သွားချင်ဖြင့် ညစ်လိုက်သည်။ ထို့နောက် သူကျိယွီရှောင်၏ နံဘေးသို့ တစ်ဖန် လျှောက်သွားကာ ဘီးတပ်ကုလားထိုင်ကို တွန်းထုတ်ကာ ထွက်လာခဲ့သည်။

လင်းဖေးက တံခါးပိတ်သွားသည်အထိကြည့်နေပြီးမှ ဖြည်းညှင်းစွာ သူ့အခန်းကို ပြန်လာခဲ့သည်။ မတ်လ ၂၅ ရက်မရောက်ခင် ၁၄ ရက်လိုသေးသည်။လင်းလော့ချင်းကို ဘာလက်ဆောင်ပေးရမလဲ သူစဉ်းစားရမည်။

ရှားစောင်းပင်နှင့် အိုးပေး၍မရတော့ပေ။သူ့မှာ တစ်ခုရှိပြီးသားဖြစ်သည်။

မှတ်စုစာအုပ်တစ်အုပ်လည်း မဖြစ်နိုင်ပေ။သူကစာမေးပွဲမဖြေရသေးသဖြင့် သူ့ကိုယ်ပိုင် ဒုတိယမြောက် မှတ်စုစာအုပ် မရသေးပေ။

ဒါဆို သူဘာပေးရမလဲ...

လင်းဖေးက စာရေးခုံအဖြစ် ယာယီအသုံးပြုထားသည့် စားပွဲရှေ့တွင် ထိုင်ကာ လေးလေးနက်နက် တွေးတောလိုက်သည်။

ကျိယွီရှောင်၊လင်းဖေးနှင့် ကျိလဲ့ယွီတို့သည် လင်းလော့ချင်းကို နှစ်ရက်ကြာအဖော်ပြုပေးပြီးမှ ပြန်သွားခဲ့ကြ၏။

ကျိလဲ့ယွီက ပြန်မသွားချင်ဖြစ်နေသည်။ဖြစ်နိုင်လျှင် ကျောင်းတက်မည့်အစား သူ့ပါးပါးနှင့် အလုပ်အတူတူလုပ်ရန်ပဲ ရွေးချယ်မှာဖြစ်သည်။

သို့သော် သူ့ပါးပါးက သေချာပေါက် ထိုသို့မထင်ခဲ့။ 

"စားကြိုးစား...လာမဲ့စာမေးပွဲအတွက် ထိပ်ဆုံးငါးယောက်ထဲ ဝင်အောင်လုပ်နော်~"

ကျိလဲ့ယွီ:'... သားပင်ပန်းနေပြီ...အကုန်လုံးကိုပဲ မေ့သွားလိုက်ချင်တော့တယ်'

ကျိယွီရှောင်က သူ၏ ညှိုးငယ်သော မျက်နှာလေးကို မြင်ပြီး အကြာကြီး သဘောတကျ ပြုံးနေသည်။လင်းဖေးကပဲ သူ့ကိုအထင်အမြင်သေးစွာကြည့်လေ၏။ဘုရားရေ... သူက ထိပ်ဆုံးငါးယောက်ထဲကိုတောင် မဝင်နိုင်ဘူးလား... သူ့မှာ ဒီလို ခပ်တုံးတုံးညီလေး ဘယ်လိုလုပ် ရှိနေရတာလဲ...

'ဘဝက တကယ် မလွယ်ဘူးပဲ' 

လင်းဖေး သက်ပြင်းချလိုက်သည်။

******

ကျိယွီရှောင်တို့ ထွက်သွားပြီးသည်နှင့် လင်းလော့ချင်း ရိုက်ကူးရေးထဲမှာ မိမိကိုယ်ကို ထပ်မံနှစ်မြုပ်ထားခဲ့သည်။

သူ၏ကျွမ်းကျင်မှုနှင့် သရုပ်ဆောင်မှုများအောက်တွင် ဖူဟန်၏ အခန်းကဏ္ဍသည် နေ့စဉ်နှင့်အမျှ ပို၍ ကွက်ကွက်ကွင်းကွင်း ဖြစ်လာသော်လည်း ဝမ်းနည်းစရာလည်း ကောင်းသည်။ ဒါရိုက်တာဝမ်နှင့် ဇာတ်ညွှန်းရေးဆရာတို့ ၎င်းကြည့်ပြီးသည့်အချိန်၌ မနေနိုင်ဘဲ သူ့အား နောက်ထပ်အခန်းအနည်းငယ် ထပ်ထည့်ပေးမိကြသည်။

သူတို့ အများကြီးမထည့်ဝံ့ကြပေ။ တကယ်တမ်းတွင် ဤဒရာမာ၏ ဇာတ်ဆောင်က ဖူပင်းဖြစ်သည်။ဖူဟန်က ဇာတ်ကြောင်းအခွဲတစ်ခုမျှဖြစ်ပြီး အခြားသူတစ်ဦး၏ဇာတ်ကောင်ကို ရုပ်လုံးကြွစေမည့် လင့်ခ်တစ်ခုသာဖြစ်သည်။ ဒါရိုက်တာဝမ်နှင့် ဇာတ်ညွှန်းရေးဆရာတို့သည် ဖူဟန်အတွက် ဖူပင်း နှင့် မိသားစုဇာတ်ဝင်ခန်းများစွာကို အဓိကထား၍ ထည့်သွင်းခဲ့သည်။

ဤနည်းဖြင့် လူနှစ်ဦး၏ ပင်ကိုယ်စရိုက်နှင့် ရဲအရာရှိများ၏ အခက်အခဲကို ပိုမိုကောင်းမွန်စွာ မီးမောင်းထိုးပြခဲ့သည်။

ဖူဟန်၏ မစ်ရှင်မစမီ ညတွင် ဖူပင်းက သူ့အိပ်ခန်းကိုလာပြီး သူ့ကို ရှာခဲ့သည်။ ဖူဟန်က သူ့အိတ်တွေကို ထုပ်ပိုးနေသည်။ သူက ID ကတ်အသစ်ရရှိပြီးပြီဖြစ်ပြီး မနက်ဖြန်တွင် အခြားလူတစ်ဦးအဖြစ် ဟန်ဆောင်ရန် ငှားထားသည့်အိမ်သို့သွားရန် စီစဉ်ထားသည်။

ဖူပင်းက သူ့သားကို ကြည့်လိုက်သည်။ မသိလိုက်ပါဘဲ၊ သူ့သားက ပဲပင်ပေါက်ငယ်လေးအဖြစ်မှ သူလောက် အရပ်ရှည်သော အမျိုးသားတစ်ဦးအဖြစ် ကြီးပြင်းလာခဲ့သည်။ဖူဟန်က ပစ္စည်းများထုတ်ပိုးရန် ခါးကို ကိုင်းထားသော်ငြား သူ့ပုံစံနှင့် ခန္ဓာကိုယ်တည်ဆောက်ပုံက ယုံကြည်အားထားရပြီး တာဝန်သိတတ်သည့်သူတစ်ယောက်ဟူသော ခံစားမှုပေးစွမ်း၍နေသည်။

ဖူပင်းက သူ့အနားကို လျှောက်လာပြီးစိုးရိမ်စိတ်ဖြင့် မေးသည်။

"အကုန်ထုတ်ပိုးပြီးပြီလား"

"ပြီးခါနီးနေပြီ"

ဖူဟန်က ပြုံးပြုံးလေးပြောသည်။

ဖူပင်း ခေါင်းငုံ့ကြည့်လိုက်ရာတွင် ဖူဟန်၏ ခရီးဆောင်အိတ်ထဲတွင် ဖောင်းပွနေသော ယုန်တစ်ကောင်ကို တွေ့လိုက်ရသည်။ သူ့အမေက ငယ်ငယ်က သူ့အတွက် ဤပစ္စည်းဝယ်ပေးခဲ့ခြင်းဖြစ်သည်။ဖူဟန်က ယုန်များကဲသို့သော တိရိစ္ဆာန်ငယ်လေးတွေက မိန်းကလေးများသာ နှစ်သက်သည့်အရာဟု တွေးထင်ခဲ့သည်။ နောက်ပိုင်းတွင် သူက ယုန်များ၏ လိမ္မာပါးနပ်မှုအကြောင်းကို လေ့လာခဲ့ပြီး လူသားတစ်ဦးအနေဖြင့် ယုန်ကဲ့သို့ ထက်မြက်ပြီး လိမ္မာပါးနပ်သင့်သည်ဟု ခံစားခဲ့ရသည်။

ဖူပင်း သူ့သားက အမှန်တကယ်ပင် ကလေးပဲရှိသေးပြီး အလွန်ငယ်သေးသည်ဟု ရုတ်တရက် ခံစားလိုက်ရသည်။ ကြီးပြင်းအရွယ်ရောက်လာကာ တာဝန်သိစိတ်ရှိပြီး အခြားသူများကို ကာကွယ်စောင့်ရှောက်နိုင်သော်လည်း သူသည် မူလပဲပင်ပေါက်လေးဖြစ်စဥ်ကနှင့် ဘာမှမခြားပေ။

"ဒါက မစ်ရှင်တစ်ခုမှာ အရုပ်တစ်ရုပ် ယူသွားကို ငါပထမဆုံး မြင်ဖူးတာပဲ"

ဖူပင်းက ပြုံးပြီး ပြောလိုက်သည်။

ဖူပင်းက စိတ်မဆိုးဘဲ သွားလေးသာဖြီးပြ၍နေသည်။သူ့ဘေးမှာ ဤယုန်လေးရှိနေသည်က သူ့မိဘတွေ သူ့ဘေးမှာ ရှိနေသလိုမျိုး ခံစားရ၏။

"ကျွန်တော်မရှိတော့ရင် အိမ်စောစောပြန်ပြီး မားနဲ့ညစာအတူစားဖို့မမေ့နဲ့နော်"

"ငါသိပါတယ်"

ဖူပင်းက ပြန်ဖြေသည်။

"မင်းရောပဲ"

သူက ပြောသည်။ 

"အိမ်စောစောပြန်ပြီး စောစောစား"

ဖူဟန်က ခေါင်းညိတ်လိုက်သည်။

သို့ပေမဲ့ သူ ဘယ်သောအခါမှ အိမ်ပြန်မလာခဲ့ပေ။သူ့အမေ၏လက်ရာကိုလည်း ထပ်မစားနိုင်တော့ပေ။

သားအဖနှစ်ယောက် လင်းထိန်နေသော အခန်းထဲတွင် ရပ်နေကြသည်။ ပြတင်းပေါက် အပြင်ဘက်မှာ မှောင်နေပြီး တောက်ပရွှန်းလဲ့နေသော လရောင်သာရှိ၏။ဖူဟန်ကဆိုသည်။

"ဒီညရဲ့လက ဝိုင်းစက်နေတာပဲ"

ဖူပင်း တစ်ချက်ကြည့်လိုက်သည်။ တကယ်ကို ဝိုင်းပြီး လှနေသည်။

သားအဖနှစ်ယောက် လကိုအတူတူကြည့်ခဲ့ကြပြီး နောက်ဆုံးမှာ ကောင်းသောညပါဟု ပြောပြီး နှုတ်ဆက်လိုက်သည်။

ထို့နောက်မှာကား လက ဘယ်သောအခါမှ ထိုမျှ ဝိုင်းစက်ခြင်းမရှိတော့ပေ။

ဒါရိုက်တာဝမ်က မော်နီတာအား စိုက်ကြည့်ကာ အထိန်းအကွပ်မရှိ သက်ပြင်းချလိုက်သည်။လင်းလော့ချင်းက ဤမျှ ကောင်းမွန်စွာ သရုပ်ဆောင်နိုင်မည်ဟု မထင်ထားခဲ့ပေ။သူက ဖူဟန်၏ဇာတ်ကောင်ကို ပြီးပြည့်စုံမှုပေးခဲ့သည်မှာ ထင်ရှားလေသည်။ဖူဟန် သေဆုံးပြီးနောက်တွင် ပရိသတ်များ မည်မျှ ငိုရမည်က သိသာထင်ရှားသည်။

ဝမ်းနည်းစရာကောင်းပေမဲ့ ယင်းက အမှန်တရားဖြစ်၏။

လက်တွေ့တွင်၊ ရဲအရာရှိများစွာ၏အဆုံးသတ်သည် ဖူဟန်၏အဆုံးသတ်ထက် သာ၍ကောင်းမနေပါချေ။

ထို့ကြောင့် ဤအလုပ်သည် ရိုသေလေးစားမှုနှင့် ထိုက်တန်သောအလုပ်ဖြစ်ပေသည်။

"ကဒ်" 

ဒါရိုက်တာဝမ် အော်လိုက်၏။

လင်းလော့ချင်း ဖူဟန်ဇာတ်ရုပ်ထဲမှ ရုန်းထွက်လိုက်သော်လည်း အနည်းငယ် ဝမ်းနည်းမှုက ကျန်ရှိနေဆဲဖြစ်သည်။သူအနားယူရာနေရာကို လျှောက်သွားပြီး ထိုင်ချလိုက်ကာ အချိန်ခဏတာမျှ ဗလာကျင်းသွားသလို ခံစားလိုက်ရသည်။ ထို့နောက် သူ့ဖုန်းကို ထုတ်ကာ Weibo ကို စတင်ကြည့်ခဲ့သည်။

'ထောင်လီပုရန်'က ထုတ်လွှင့်တော့မည်။ ရက်အနည်းငယ်ပဲ လိုတော့သည်။

အချိန်ဇယား၏ ပရိုမိုးရှင်းကြောင့်၊ စာအုပ်ပရိသတ်အချို့ သို့မဟုတ် ဤအကြောင်းအရာကို စိတ်ဝင်စားသော ပရိသတ်အချို့က ၎င်းအကြောင်းကို မသိမည်ကို အဖွဲ့သားတို့က စိုးရိမ်ခဲ့ကြသည်။ ထို့ကြောင့် ၎င်းတို့သည် ဤဒရာမာကို မြှင့်တင်ရန် အပူတပြင်း ရှာဖွေမှုကို အထူးတလည်ဝယ်ယူခဲ့သည်။

ယောင်မော့မေ့ာနှင့် လီဟန်ဟိုင်တို့၏ ပရိသတ်များသည် ၎င်းကို ပရိုမိုးရှင်းပြုလုပ်ရန် နေ့တိုင်း ကြိုးစားနေကြသည်။ 'ထောင်လီပုရန်' ကို သုံးရက်အတွင်း ထုတ်လွှင့်မည်ကို လူတိုင်းအား အသိပေးရန် မစောင့်နိုင်ခဲ့ကြပေ။

လင်းလော့ချင်းကလည်း ပူးပေါင်းပါဝင်ပြီး countdownပိုစတာကို မျှဝေခဲ့သည်။

ရှေ့မှာ သူစုဆောင်းထားသည့် မျက်နှာဖန်တွေက ချက်ချင်းပဲ မှတ်ချက်ပေးခဲ့ကြသည်။ 

[ကျားယို့ ကောကော... ထုတ်လွှင့်မှုကို စောင့်နေပါတယ်]

[ငါတကယ်ကို စိတ်မရှည်ဖြစ်နေပြီ... ကောကောရဲ့အလှကို ရှုစားဖို့ မစောင့်နိုင်တော့ဘူး]

[ဝူးဝူး...ငါ အခုကြည့်ချင်နေပြီ!]

[ကောကော အခုနောက်ပိုင်း ဘာတွေဖြစ်နေတာလဲ... Weibo မှာပရိုဖိုင်လေး မကြာမကြာချိန်းပါဦလား]

[အားးး... ငါ့ရဲ့ရတနာလေးကောကောကို နောက်ဆုံးမှာ တခြားသူတွေ ရှာတွေ့တော့မှာလား... မြန်မြန် မြန်မြန်!]

သရုပ်ဆောင်တွေ၏ ဖန်တွေနှင့် စာအုပ်ပရိသတ်တွေ၏ ဆုတောင်းစကားတွေနှင့်မျှော်လင့်ချက်တွေကြားမှာ 'ထောင်လီပုရန်'က နောက်ဆုံးမှာ စတင်ထုတ်လွှင့်ခဲ့လေပြီ။

ပေါ့ပေါ့ပါးပါး အချစ်ဟာသဇာတ်ကားဖြစ်ပြီး 'ထောင်လီပုရန်' ၏ အရှိန်အဟုန်က အလွန်သွက်လက်သည်။ ပထမအပိုင်းတွင် အဓိကဇာတ်ကောင်အားလုံးနီးပါးကို မိတ်ဆက်ပေးထားပြီး လူအများအပြားကြားရှိ ဆက်ဆံရေးကို ရှင်းပြထားသည်။

ဇာတ်ညွှန်းရေးဆရာ မူရင်းဝတ္ထု၏ ဇာတ်ကွက်ကို အလွန်အကျွံ မပြောင်းလဲခဲ့ပေ။မူရင်းဝတ္ထုတွင် သတိမထားမိကြသော အသေးစိတ်အချက်များနှင့် နမိတ်ပုံအချို့ကိုသာ ပြုပြင်မွမ်းမံထားသည်။ တစ်ချိန်တည်းမှာပင်၊ မိသားစုနှင့် ရင်းနှီးမှုအပိုင်းများကို အရှိန်မြှင့်ပြီး ကာရိုက်ဆက်တင်ကို သိသိသာသာ ပိုမိုတိုးတက်ကောင်းမွန်လာစေရန်အတွက် ပိုမိုပေါင်းစပ်ထည့်သွင်းထားသည်။

ယောင်မော့မော့ နှင့် လီဟန်ဟိုင်တို့သည် ဒါရိုက်တာကျန်း နှင့် လင်းလော့ချင်း တို့၏အကူအညီဖြင့် ပွဲဦးထွက်ကတည်းက အကောင်းဆုံးသရုပ်ဆောင်စွမ်းရည်ကိုပြသနိုင်ခဲ့သည်။ ဒါရိုက်တာကျန်း ရိုက်ကူးထားသော ကြည်လင်လှပသောရိုက်ချက်တွေနှင့် အဖွဲ့သားတွေ၏ လက်ရာမြောက်သော ၀တ်စုံတွေနှင့် ပေါင်းစပ်လိုက်သည့်အခါ တကယ်ကို လှပဆန်းသစ်ပြီး ပထမဆုံး အပိုင်းနှစ်ပိုင်းတည်းနှင့် ပရိသတ်၏ နှလုံးသားကို ဖမ်းစားနိုင်ခဲ့သည်။နောက်အပိုင်းတွေက ဤအရည်အသွေးအတိုင်းဆက်ထိန်းထားနိုင်သရွေ့ ဤဒရာမာက ယခုနှစ်များအတွင်း ရေပန်းအစားဆုံး idol ဒရာမာဖြစ်လာမည်ဟု အများစုက ဆိုကြသည်။

[အားး ကောင်းတယ် အရမ်းကောင်းတယ်...ထောင်လီပုရန်က အရမ်းကောင်းတယ်]

[သေစမ်း... အစက ဘယ်လောက်ဆိုးရွားသလဲ ကြည့်ဖို့ ရည်ရွယ်ချက်နဲ့ သွားခဲ့တာ...ဒီလောက်ကောင်းမယ်လို့ မမျှော်လင့်ထားဘူး]

[ဒါက မူရင်းဝတ္ထုရှိလား... ဘယ်လိုဆက်ဖြစ်မလဲ အရမ်းသိချင်လို့ မူရင်းကိုဖတ်ကြည့်ချင်တယ်]

[မူရင်းဝတ္ထုက ကြိုစပွိုင်းလို့ရတဲ့ဇာတ်ကားပဲ... အရမ်းထိမိပါတယ်... အပေါ်ထပ်မှာ မူရင်းဝတ္ထုရှိတယ်...ဖတ်ရတာ အရမ်းကောင်းတယ်... သွားဖတ်ပါ!]

[အဲဒီတုန်းကတော့ ယောင်မော့မော့ နဲ့ လီဟန်ဟိုင် သရုပ်ဆောင်မှာ ဆိုတာသိတော့ ငါ ဒါကိုကြည့်ဖို့ ငြင်းဆန်ခဲ့တာ...ဘယ်လိုပဲဖြစ်ဖြစ် သူတို့နှစ်ယောက်က မျက်နှာပဲ ရှိတာလေ... သူတို့နှစ်ယောက် ဒီလောက်သရုပ်ဆောင်ကောင်းမယ်လို့ မမျှော်လင့်ထားဘူး...ဇာတ်ကောင်နဲ့ နီးစပ်တယ်]

[ရိုက်ကူးရေးအဖွဲ့က သူတို့ရဲ့ မူရင်းအသံတွေကို သုံးခဲ့ကြတာ...ယောင်မော့မော့ရဲ့ မူရင်းအသံက ချစ်စရာကောင်းပြီး ချိုသာတယ်...မန်ထောင်နဲ့ နီးစပ်တယ်]

[မန်ထောင်အကြောင်းပြောမှ မန်ဟွားကို တစ်ယောက်ယောက် သတိထားမိကြလား...အားးး သူက အရမ်းချောတယ်...အရမ်းခန့်တာပဲ! ...ကြည့်လိုက်တာနဲ့ ပါးစပ်အဟောင်းသားဖြစ်သွားတာ]

[အပေါ်ထပ်ကျယ်မေ့ရေ ငါလည်းအတူတူပဲ!!!]

[ရိုက်ကူးရေးအဖွဲ့က အသိတရားရှိလွန်းတယ်...မန်ဟွားကို ဝတ္ထုထဲမှာ အရမ်းချောမောတဲ့ ဆယ်ကျော်သက်တစ်ဦးအဖြစ်နဲ့ ဖော်ပြထားတာ...ရိုက်ကူးရေးအဖွဲ့က သူ့ကို ဇာတ်ပို့အဖြစ် မြင်ပြီး သူ့နေရာမှာ သရုပ်ဆောင်ဖို့ ရုပ်ဆိုးတဲ့လူကို ရှာလိုက်မှာကို ငါ စိုးရိမ်နေခဲ့တာ

.. သူ့ကို ဒီလောက်ချောတဲ့လူဖြစ်ဖို့ ငါမမျှော်လင့်ထားဘူး]

[ဒီဒရာမာက မျက်နှာဖန်တွေ အားလုံးအတွက် ပွဲတော်ပဲ... သူတို့အားလုံးက အချောအလှလေးတွေချည်း]

[ဟားဟားဟား...ငါက အမျိုးသားဇာတ်လိုက်နဲ့ အမျိုးသမီး ဇာတ်လိုက်ရဲ့ စိတ်ခံစားမှုဆိုင်ရာ ဇာတ်ကြောင်းတွေကို စိတ်မဝင်စားဘူး... အမျိုးသမီး ဇာတ်လိုက်နဲ့မုန့်ဟွားကြားက မောင်နှမ ဇာတ်ကြောင်းကိုပဲ ကြိုက်တယ်... မောင်နှမနှစ်ယောက်က ချစ်ချင်စရာကောင်းလွန်းတယ်!]

[ငါတော့ သူများမောင်နှမတွေကိုအရမ်းမနာလိုတာပဲ]

[ငါက အခု ဆိုဖာပေါ်မှာ ဆန့်ဆန့်ကြီးလှဲနေတဲ့ ငါမောင်လေးကို ကြည့်နေတာ... ထားလိုက်ပါ...သူ့ကို လွှင့်ပစ်လိုက်တော့မယ်]

[သရုပ်ဆောင်စာရင်းကိုကြည့်ရင် မုန့်ဟွားနေရာမှာသရုပ်ဆောင်တဲ့ မင်းသားက လင်းလော့ချင်းတဲ့... မကြားဖူးပေမဲ့ ဒီတိတိကတော့ နာမည်ကြီးတော့မှာ သေချာတယ်...ထောင်လီပုရန်က ပထမအပိုင်းနှစ်ပိုင်းရဲ့ အရည်အသွေးကိုသာ ဆက်ထိန်းထားရင် အခုနှစ်ရဲ့ ထိပ်တန်း idol ဒရာမာဖြစ်လာမှာ]

လင်းလော့ချင်း လူတိုင်း၏ အကဲဖြတ်ချက်များကို မြင်ပြီး ဟက်ဟက်ပက်ပက် ရယ်မောလိုက်သည်။

အဖွဲ့ထဲက တခြားသရုပ်ဆောင်တွေကလည်း သူ့လိုပါပင်။

ယောင်မော့မော့: [ဒါက တကယ်မလွယ်ကူဘူး...အင်တာနက်သုံးစွဲသူတွေက ငါရဲ့ သရုပ်ဆောင်စွမ်းရည်ကို ချီးကျူးခဲ့ကြတယ်... ဝူးဝူးဝူးဝမ်းသာအားရ ငိုနေမိတယ်]

လီဟန်ဟိုင်ကတွေးလိုက်သည်။

 '... ဘာမှမပြောပေမဲ့ တိတ်တိတ်လေး+1'

စုယင်: [ငါလည်းတူတူပဲ]

ယောင်မော့မော့: [ကျေးဇူးတင်ပါတယ် ရှောင်လင်းလောင်ရှီး]

စုယင်: [ကျေးဇူးတင်ပါတယ် ရှောင်လင်းလောင်ရှီး (ကျွန်မ ကော်ပီမကူးထားပါဘူး...လက်နဲ့ပဲရိုက်ထားတာပါနော်)]

လီဟန်ဟိုင်:: [ကျေးဇူးတင်ပါတယ် လော့ချင်း]

ဝူကျားနှင့် ကျန်းချွမ်တို့က အတော်လေး နောက်ကျမှလိုင်းတက်လာသည်။သူတို့ကလည်း ချက်မှတ်တမ်းများကို ကြည့်ရှုကြပြီး ကျေးဇူးတင်စကား ပေးပို့ကြသည်။

ပထမအပိုင်းနှစ်ပိုင်း၏ အကဲဖြတ်ချက်ကို ဖတ်ပြီးနောက် ထုတ်လုပ်သူက နေရာမှာတင် ကျယ်လောင်စွာ ရယ်မောခဲ့သည်။ သူ စိတ်ချလက်ချဖြင့် ပရိုမိုးရှင်းအဖွဲ့ကို အပူတပြင်းရှာဖွေမှုဝယ်ခိုင်းလိုက်သည်။ယခုတစ်ကြိမ်တွင်၊ ပရိုမိုးရှင်းအဖွဲ့ အင်တာနက်သုံးစွဲသူများ၏အကဲဖြတ်မှုမှ ပရိုမိုးရှင်းအချက်အသစ်တစ်ခုကို ဖမ်းဆုပ်မိလိုက်သည်- [မျက်နှာဖန်များအတွက် ပွဲတော်တစ်ခု]

သေချာသည်ပင်၊ မျက်နှာဖန်တွေ တစ်ယောက်ပြီးတစ်ယောက် ကလစ်နှိပ်ပြီးဝင်လာကြသည်။ချောမောလှပသော ဇာတ်ဆောင်တွေနှင့် ဇာတ်ပို့တွေကို တွေ့ပြီးသည့်နောက် သက်ဆိုင်ရာ ဗီဒီယိုတွေကိုပါ စပ်စပ်စုစု နှိပ်လိုက်ကြသည်။

သရုပ်ဆောင်တွေ၏ ဖန်တွေနှင့် စာအုပ်ပရိသတ်တွေလည်း အပြေးအလွှား ဝင်ရောက်လာကြပါသည်။ 

[ထောင်လီပုရန်ကို ကြည့်ထားသရွေ့ မင်းတို့က ငါ့ရဲ့ ဖအေမတူမအေကွဲ ညီအစ်မတွေပါပဲ]

အချိန်တစ်ခုကြာသည်အထိ 'ထောင်လီပုရန်' ၏ သက်ဆိုင်ရာ အပူတပြင်း ရှာဖွေမှုများ ဆက်လက် မြင့်တက်လာပြီး လင်းလော့ချင်း၏ ပရိသတ်များလည်း ဆက်လက် တိုးပွားလာခဲ့သည်။

ဝူရှင်းယွမ် ပုံမှန်မဟုတ်စွာ ပရိတ်သတ်များ တိုးလာသည်ကို မြင်ခဲ့ရပြီး လင်းလော့ချင်း ယခုတစ်ခေါက်တွင် ရေပန်းစားလာတော့မည်ကို အကင်းပါးပါးဖြင့် သတိပြုမိလိုက်၏။ 

သူ မှန်ကန်စွာ မှန်းဆနိုင်ခဲ့ကြောင်း ထွက်ပေါ်လာခဲ့သည်။ 'ထောင်လီပုရန်' ၏ သတ္တမမြောက်အပိုင်းကို ထုတ်လွှင့်ချိန်တွင် ဒရာမာသည် လုံးဝပေါက်ကွဲသွားခဲ့သည်။

ပထမအပိုင်းနှစ်ပိုင်း၏ အကောင်းဆုံးအရည်အသွေး၊ အဖွဲ့သားများ၏ပရိုးမိုးရှင်းဆင်းမှုနှင့် ပရိသတ်များက ဤဒရာမာကို ရေပန်းစားမှုအများကြီးရရှိလာစေခဲ့လာခဲ့သည်။ အချို့က ပရိုမိုးရှင်းကြောင့် ကြည့်ရှုခဲ့ကြပြီး အချို့က ၎င်းကို ၎င်း၏အသွင်အပြင်ကြောင့် ကြည့်ရှုခဲ့ကြသည်။ အခြားသူများက ၎င်းကို ပုန်ကန်သော စိတ်ဖြင့် ကြည့်ရှုခဲ့ကြသည်။ သို့သော်၊ ၎င်းကိုကြည့်ပြီးနောက်၊ လူအများစုတွေးမိကြသည်က 'ဖာ့ခ် ဒါကတကယ် ကြည့်လို့ကောင်းသလိုပဲ'ဟူ၍ဖြစ်သည်။ 

အဆင့်သတ်မှတ်ချက်များ ဆက်လက်မြင့်တက်လာပြီး ကြည့်ရှုသူဦးရေ ဆက်လက်တိုးလာခဲ့သည်။ထိုကာလမှာ ယှဉ်ပြိုင်နိုင်သည့် ဒရာမာတွေ မရှိသလောက်ပါပင်။ တစ်စုံတစ်ယောက်က "အခုတလော ကြည့်စရာ တီဗီဒရာမာတစ်ခုခု ရှိလား" ဟု မေးလာပါက၊

အဖြေက "ထောင်လီပုရန် သွားကြည့်"ဟူ၍ဖြစ်သည်။ 

အချိန်နှင့်နေရာ ကွက်တိအဆင်သင့်ဖြစ်ခဲ့သည်။ 'ထောင်လီပုရန်'၏လူကြိုက်များမှု ပေါက်ကွဲသည်က ယုတ္တိတန်လေသည်။ဤမျှ ပြင်းထန်စွာ ပေါက်ရန် မည်သူမျှ မမျှော်လင့်ထားဘဲ ဖြစ်နေရုံဖြစ်သည်။

ဒါရိုက်တာကျန်း ကိုယ်တိုင်ကပင် မယုံနိုင်လောက်အောင်ဖြစ်နေသည်။ 'ထောင်လီပုရန်' သည် သူရိုက်ကူးခဲ့သည့် အကြီးဆုံးသော ရင်းနှီးမြုပ်နှံမှုဖြင့် ဒရာမာပင်မဟုတ်သော်လည်း အကောင်းဆုံးတုံ့ပြန်မှုရရှိခဲ့သည့်တစ်ခုဖြစ်သည်။ဤသည်က သရုပ်ဆောင်တွေ၏ ကူညီပံ့ပိုးပေးမှုနှင့် အလုပ်ကြိုးစားမှုတို့ဖြင့် ခွဲထုတ်၍မရပါချေ။

လင်းလော့ချင်းသာ ယောင်မော့မော့ နှင့် လီဟန်ဟိုင်တို့၏လိုင်းများကို ပြုပြင်ပေးရာတွင် စိတ်ရှည်သည်းခံပြီး လေးလေးနက်နက် မကူညီခဲ့ပါက၊ အလုံးစုံသောအကျိုးသက်ရောက်မှုသည် အလွန်ကြီးကောင်းမွန်မည်မဟုတ်ပေ။ သူတစ်ယောက်တည်း လူအုပ်ထဲကနေထင်းထွက်နေခြင်းမျိုး ဖြစ်နိုင်သည်။ သို့သော် ဇာတ်လိုက်များက ကောင်းကောင်းသရုပ်မဆောင်နိုင်လျှင် သူ မည်မျှ ထူးချွန်သည်ဖြစ်စေ အရေးမကြီးပေ။၎င်းကို ဘယ်သူမှ မြင်မှာမဟုတ်ပေ။

အလားတူပင်၊ယောင်မော့မော့ နှင့် လီဟန်ဟိုင် တို့သည် မိမိတို့ကိုယ်ကို အထင်ကြီးပြီး နှိမ့်ချစွာ အကြံဉာဏ်တောင်းရန် ဆန္ဒမရှိပါက လင်းလော့ချင်းက သင်ပေးလိုလျှင်ပင် အသုံးမဝင်ပေ။ သူတို့က သူတို့၏ ကောင်းမွန်သော သရုပ်ဆောင်မှုစွမ်းရည်ကြောင့် ချီးကျူးခံရမှာ မဟုတ်သည့်အပြင် အင်တာနက်သုံးစွဲသူတွေ၏ ရယ်မောခြင်းကို ခံရမှာ ဖြစ်လေသည်။ 

ဒါရိုက်တာ၊ ဇာတ်ညွှန်းရေးဆရာနှင့် မူရင်းဝတ္ထုတို့သည် ဤဒရာမာ၏အောင်မြင်မှုကို ပံ့ပိုးပေးသည်ဟု ဆိုနိုင်သော်လည်း သရုပ်ဆောင်များကမူ ၎င်းကို ပေါက်စေခဲ့သည်။

သရုပ်ဆောင်အားလုံးကသာ သူတို့လိုဖြစ်နိုင်လျှင် သိပ်ကောင်းမည်။ ဒါရိုက်တာကျန်း သူ့နှလုံးသားထဲမှာ တိတ်တဆိတ် သက်ပြင်းချလိုက်သည်။

'