MM Story Teller

အပိုင်း ၁၆၈

Viewers 15k

Chapter 168

အစပိုင်းတွင် သူမ ကူညီသင့်လားဆိုတာကို မဆုံးဖြတ်ခင် စုမုန့် အခြေအနေကို စောင့်ကြည့်ချင်ခဲ့သည် ။ သို့သော် ထိုလူထံမှ အဖွားအိုတွန်းခံလိုက်ရတာကို တွေ့လိုက်ရသောအခါ သူမ စဥ်းစားမနေတော့ဘဲ အပြေးအလွှားသွားလိုက်သည် ။

" ရပ်လိုက် "

စုမုန့် အပြေးရောက်သွားပြီးနောက်တွင် ထိုလူမှာ သူ၏ခြေထောက်ကို မြှောက်လိုက်ပြီး အဖွားအိုကို ကန်ဖို့ လုပ်လိုက်သည် ။ စုမုန့် သူ့ကို အလျင်အမြန်တားလိုက်သည် ။

ရုတ်တရက် တစ်စုံတစ်ယောက်ပေါ်လာလိမ့်မည်ဟု ထိုလူမှာ မတွေးခဲ့ပေ ။ သူတခဏလောက် အလွန်မှင်သက်သွားခဲ့သည် ။ သူအနှောင့်အယှက်ဖြစ်သွားသော်လည်း သူ၏ခြေထောက်တို့ကို ပြန်ရုတ်လိုက်သည် ။

" မင်းကဘယ်သူလဲ "

ထိုလူက မျက်မှောင်ကြုတ်ကာမေးလိုက်သည် ။

" အဲ့ဒါက ရှင်နဲ့ဘာဆိုင်လဲ ... "

စုမုန့် ထိုလူကိုမျက်လုံးလှည့်ကာကြည့်လိုက်ပြီး အဖွားအို၏ဘက်သို့သွားကာ ညင်ညင်သာသာကူညီပေးလိုက်သည် ။

" အဖွား ...ရှင်အဆင်ပြေရဲ့လား... "

စုမုန့် အဖွားအိုကို ဆိုဖာသို့ခေါ်သွားပြီး ထိုင်ဖို့ကူညီပေးလိုက်သည် ။ထို့နောက် သူမရေတစ်ခွက်သွားယူပြီး အဖွားအို၏ဘေးတွင်ဝင်မထိုင်ခင် ရှေ့မှာ ရေခွက်ကိုချပေးလိုက်သည် ။

" ဒါက ငါတို့မိသားစုကိစ္စပဲ ...မင်းဝင်မစွက်ဖက်ဖို့ ငါမျှော်လင့်တယ် ... "

စုမုန့်၏ဘက်သို့ ထိုလူက လျှောက်သွားကာ အေးစက်စွာ သတိပေးလိုက်သည် ။သူစိတ်မရှည်ဖြစ်နေသော်လည်း သူထပ်၍ မတိုက်ခိုက်တော့ပေ ။ အဘယ်ကြောင့်ဆိုသော် ဒီနေ့မှသာ သူက ရောက်လာခဲ့ပြီး ယခုထိ မှတ်တမ်းကို မစစ်ဆေးကြည့်ရသေးပေ ။ စုမုန့်တွင် အခြားအဖော်များပါသေးလားဆိုတာကို သူမသိပေ ။

" ကျွန်မမှာ သူများအကြောင်းကို စပ်စုနေဖို့ အချိန်မရှိဘူး ... ကျွန်မ သူဌေးကိုပဲ လာရှာတာ ... ဆရာ ...ရှင်ကျွန်မတို့ကို ကိုယ်ရေးကိုယ်တာအချိန်ခဏလောက်ပေးနိုင်မလား ..."

စုမုန့် မေးလိုက်သည် ။

" ဒါက ငါတို့မိသားစုရဲ့ ဟိုတယ်ပဲ ...ငါကဘာလို့ထွက်သွားရမှာလဲ... ငါနဲ့ ငါ့အမေက မိသားစုကိစ္စကို ဆွေးနွေးနေတာ ...မင်း ငါတို့အတွက် သီးသန့်လေးထားပေးမလား ... "

အဖွားအို၏ဘေးတွင် ထိုလူကထိုင်လိုက်ပြီး အဖွားအို၏လက်မောင်းကို ဆုပ်ကိုင်လိုက်သည် ။အဖွားအိုကိုကြည့်ရတာ သူမ၏သားကို အလွန်ကြောက်လန့်နေပုံပေါ်သည် ။ သူမတွင် သူမသားဖြစ်သူ၏ ကြမ်းတမ်းသောအပြုအမူကို ခုခံရန် ရည်ရွယ်ချက်အနည်းငယ်တောင် ရှိသည့်ဟန်မပေါ်ပေ ။

ထိုလူ၏ကြမ်းတမ်းသော အပြုအမူကိုကြည့်ကာ စုမုန့် မျက်မှောင်ကြုတ်လိုက်သည် ။ သူမ အမြဲလိုလိုအခြားသူများ၏ ကိစ္စကို ဝင်ပါရန် အလွန်ပျင်းသော်လည်း ဤအဖွားအိုမှာ တကယ်သနားစရာကောင်းသည် ။ အဖွားအို၏ကံကြမ္မာကို သူမရှာတွေ့ခဲ့ပြီး ဖတ်ရှူပြီးသည့်နောက် သူမအနည်းငယ် အံ့သြသွားရသည် ။

အဖွားအို၏ ကြည့်ရှူစောင်မခံရမှုမှာ အလွှာများကွဲနေလိမ့်မည်ဟု သူမ မမျှော်လင့်ထားခဲ့ပေ ။ အပြင်ဘက်ဆုံးအလွှာမှာ သာမန်လူများနှင့်မကွာခြားသော ခဲရောင်မြူခိုးများဖြစ်သည် ။ သို့သော် သူမပို၍ ဂရုတစိုက်ကြည့်လိုက်သောအခါ ခဲရောင်မြူခိုး၏အောက်တွင် ရွှေရောင်အလွှာရှိနေတာကို တွေ့လိုက်ရသည် ။

ခဲရောင်မှာ သူမအမှားတစ်ချို့ပြုလုပ်ခဲ့တာကို ဖော်ပြနေသည် ။ သာမန်လူများသည် သူတို့၏ဘဝတွင် အနည်းနဲ့အများတော့ အမှားလုပ်တတ်ကြသည် ။ အဓိကပြဿနာများမရှိသရွေ့ သူတို့၏ ဘဝကိုကြည့်ရှူခံရမှုမှာ ခဲရောင်အလွှာဖြင့် ဖုံးအုပ်ခံရသော်လည်း ၎င်းမှာ ပြဿနာကြီးမဟုတ်ပေ ။

အဖွားအို၏ခဲရောင်မြူခိုးမှာ သူမအမှားလုပ်ခဲ့တာကို ဖော်ပြနေပြီး အနည်းငယ်သိပ်သည်းသော်လည်း အရမ်းများနေတာတော့မဟုတ်ပေ ။ သို့သော် အောက်ခြေမှာ ရွှေရောင်သန်းနေပြီး ပြန်ရဖို့ကို ဘာမှမတောင်းဆိုဘဲ ကောင်းသောအရာများကို များစွာလုပ်ခဲ့တာကိုပြနေသည် ။

ပုံမှန်အားဖြင့် ကောင်းသောအရာနှင့် ဆိုးသောအရာတို့မှာ အချင်းချင်း ချေဖျက်ကြသော်လည်း အဖွားအိုတွင်တော့ ရှင်းလင်းသော ကွဲပြားမှုရှိနေခဲ့သည် ။ထိုအရာမှာ တကယ်ထူးဆန်းသည် ။

ထိုကဲ့သို့သောကံကြမ္မာမျိုးကိုမြင်ဖူးခြင်းမှာ စုမုန့်အတွက် ပထမဆုံးအကြိမ်ဖြစ်ပြီး သူမချက်ချင်း စိတ်ဝင်စားသွားခဲ့သည် ။

သို့သော် ထိုလူပြောတာ တစ်ခုတော့မှန်နေသည် ။အခြားသူများ၏ မိသားစုကိစ္စကို ဝင်ပါတာက သူမအတွက်မသင့်တော်ပေ ။သူမ ခဏလောက် စဥ်းစားလိုက်ပြီး အဖြေကသူမ၏နှလုံးသားထဲတွင် တဖြည်းဖြည်းပေါ်လာခဲ့သည် ။

သူမ အထူးဒေါသထွက်နေသော အမူအရာကို ဖော်ပြလိုက်ပြီး ထိုလူကို ပြင်းပြင်းထန်ထန် မေးခွန်းထုတ်လိုက်သည် ။

" ဟုတ်ပြီ ...ဒါက ရှင့်မိသားစုပိုင်တဲ့ ဟိုတယ်ပဲ ... အဲ့ဒါက ဒီဟိုတယ်မှာ ပြဿနာဘယ်လောက်ပဲဖြစ်ပါစေ ရှင်ကတာဝန်ယူရမယ်ဆိုတဲ့ သဘောပဲ ..."

" ရှင်တို့ ဟိုတယ်ရဲ့ အတွင်းပိုင်းဒီဇိုင်းပြင်ဆင်မှုက တော်တော်ဆိုးရွားတာပဲ ... ပြီးတော့ မြေပေါ်မှာလည်း မညီမညာတာတွေရှိသေးတယ် ...ကျွန်မချော်လဲပြီး ဒဏ်ရာရသွားတယ် ... အဲ့ဒါက ရှင့်တို့ဟိုတယ်ရဲ့ ပြဿနာပဲ ... ရှင် ကျွန်မရဲ့ ဆေးဖိုးဝါးခကုန်ကျစားရိတ်အတွက် တာဝန်ယူရမယ် ...အိုး... ဟုတ်သားပဲ ရှင်ဆေးဖိုးဝါးခကို ပေးဖို့လိုတာပဲမဟူတ်ဘူး ...ကျွန်မတို့ရဲကို ဖုန်းဆက်ပြီးတော့ ဒီကိစ္စကိုလည်း ကိုင်တွယ်ခိုင်းရမယ် ..."

" ကျွန်မဆင်းလာတုန်းကလည်း ရှင်ကဒီဟိုတယ်ကို ဖျက်ဆီးချင်နေပြီး ရှင်နဲ့အတူဧည့်သည်တွေကိုပါ သေစေချင်နေတယ်လို့ ကျွန်မကြားလိုက်တယ် ...ရှင့်လို အစွန်းရောက်နေတဲ့သူကို ရဲစခန်းကပဲ ကိုင်တွယ်သင့်တယ် ... ရဲကိုဖုန်းဆက်လိုက် ... ဒီ ပြဿနာဖြေရှင်းလို့မပြီးမချင်း ကျွန်မရပ်မှာမဟုတ်ဘူး ..."

စုမုန့်တွင် ပြဿနာရှိနေပြီး သူတို့ရဲကိုခေါ်ဖို့လိုကြောင်းကြားလိုက်သောအခါ ထိုလူ၏အမူအရာကပြောင်းသွားခဲ့သည် ။

သူမျက်လုံးပြူးကာ စုမုန့်ကိုကြည့်နေပြီး ပြင်းထန်သောလေသံဖြင့်ပြောလိုက်သည် ။

" အဲ့ဒါက ငါတို့ဟိုတယ်ထဲမှာဖြစ်တယ်ဆိုတဲ့သက်သေ မင်းမှာရှိလို့လား ...မင်းငါ့ကို လှုံ့ဆော်နေတာလား ... "

စုမုန့်လှောင်ရယ်လိုက်သည် ။

" ကျွန်မက ရှင့်ကိုလိမ်ညာရမှာလား ...ကောင်းပြီ ၊ ရှင်ကျွန်မကို မယုံဘူးဆိုမှတော့ ရုပ်ပိုင်းဆိုင်ရာစစ်ဆေးဖို့ ဆရာဝန်ကိုရှာပြီး ကျွန်မလိမ်နေလားဆိုတာကို ကြည့်လိုက်လေ...ရှင်ကတော့..."

စုမုန့် အမိုးပေါ်ရှိ ကြည့်ရှူစစ်ဆေးသည့်ကင်မရာကို မော့ကြည့်ပြီးဆက်ပြောလိုက်သည် ။

" ရှင်ပြောသမျှအရာအားလုံးနဲ့ အပြုအမူတွေက ဒီစောင့်ကြည့်စစ်ဆေးတဲ့ကင်မရာမှာ မှတ်တမ်းတင်ပြီးသွားပြီ ... ရှင် ရဲအရာရှိကို ကြည့်ခိုင်းလို့ရတယ် ... "

ထို့နောက် စုမုန့် ဖုန်းကိုထုတ်ကာ ရဲကိုဖုန်းဆက်နေသလို ဟန်ဆောင်လိုက်သည် ။

စုမုန့်၏ အမူအရာကိုမြင်ရသောအခါ ထိုလူက အပြင်းအထန်ရယ်မောလာခဲ့သည် ။

သူရယ်မောနေရင်းပြောလိုက်သည် ။

" ရဲကိုခေါ်မှာလား ...မင်းရဲ့ဖုန်းနဲ့ကစားမနေနဲ့ ...ဒီလို ဘုရားကစွန့်ပစ်ထားတဲ့နေရာမှာ ဘာလိုင်းမှ မမိဘူးဆိုတာ မသိဘူးလား ...ဒီနေရာမှာ အပြင်လောကနဲ့ဆက်သွယ်လို့ရမဲ့ တစ်ခုတည်းသောအရာက ဖုန်းပဲ ...ဖုန်းကလွဲရင် လိုင်းနဲ့ချိတ်ဆက်ရတဲ့အခြားဆက်သွယ်ရေးကိရိယာတွေအကုန်လုံးက အသုံးမဝင်ဘူး ... "

" ဒါပေမယ့် ကံမကောင်းစွာနဲ့ဘဲ အခုလေးတင် ငါဖုန်းလိုင်းကိုဖြတ်လိုက်တယ် ...အဲ့ဒါကြောင့် မင်းဖုန်းကိုလည်း သုံးလို့မရတော့ဘူး ... "

သူ၏စကာလုံးများက စုမုန့်ကို ဟိုတယ်ထဲရှိဖုန်းကို ပြန်သတိရစေသည် ။ ဖုန်းကိုအသုံးပြုကာ အပြင်ဘက်ရှိလူများကို ဆက်သွယ်ဖို့ သူမ အသုံးပြုနိုင်သည် ။

" ကျွန်မကို သတိပေးတဲ့အတွက် ကျေးဇူးပဲ ... မဟုတ်ရင် အဲ့ဒါကို ကျွန်မတွေးမိမှာမဟုတ်ဘူး ... "

စုမုန့်ပြုံးကာ သူမ၏ဖုန်းကို သိမ်းထားလိုက်သည် ။

" မင်းကအကန်းလား ... ငါဖုန်းလိုင်းကို ဖြတ်ပစ်လိုက်တယ်လို့ပြောတာမကြားဘူးလား ...ငါတို့ ရန်ဖြစ်နေတုန်းပဲ မင်းအသုံးချလို့ရတာ ဘာမှမရှိဘူး ..."

ထိုလူက ရယ်မောလိုက်သည် ။စုမုန့် စိတ်ထဲမထားပေ ။ သူမ ထိုလူ၏မျက်လုံးများကိုကြည့်ပြီး ပြောလိုက်သည်။

" တယ်လီဖုန်းလိုင်းကဖြတ်ခံလိုက်ရတာလား ...ဒီဖုန်းပဲ ရှင်ခွဲလိုက်တာမဟုတ်ဘူးလား ...ဟိုတယ်ထဲမှာ ဒီတစ်လုံးထက်ပိုပြီးရှိတယ်လေ ..."

" ဘာလဲ ... မင်းရုံးခန်းကို သွားခဲ့တာလား ..."

ထိုလူက အံ့သြစွာပြောလိုက်သည် ။စုမုန်ရယ်မောကာ သူမ၏ခေါင်းကို ခါလိုက်သည် ။

" ရုံးခန်းထဲမှာ ခေါ်လို့ရတဲ့ဖုန်းရှိလားဆိုတာကို ကျွန်မမသိပါဘူး ...ဒါကြောင့် ကျွန်မကိုပြောပြပေးတဲ့အတွက်ကျေးဇူးပဲ ... "

" မင်းငါ့ကို လာပြီးကစားရဲတယ် ... "

စုမုန့် သူ့ကိုလှည့်စားသွားတာကို ထိုလူကသိလိုက်သောကြောင့် ဒေါသဖြင့် သူ့ကို ရိုက်ရန်လုပ်လိုက်သည် ။

စုမုန့် ထိုလူကို ကြည့်နေခဲ့သည် ။ သူလှုပ်ရှားတာကို တွေ့လိုက်တာနှင့် တစ်ပြိုင်နက် သူမချက်ချင်းလှည့်လိုက်ပြီး ဆိုဖာ၏ထောင့်ကို လှိမ့်လိုက်သည် ။

စုမုန့် အလျင်အမြန်တုံ့ပြန်ပြီး တိုက်ခိုက်မှုကို ရှောင်တိမ်းလိုက်လိမ့်မည်ဟု ထိုလူက မမျှော်လင့်ခဲ့ပေ ။ ဘယ်သူမှ အနားမှာမရှိဘူးဆိုတာကိုသေချာအောင် ထိုလူ အနီးနားကို ဝေ့ကြည့်လိုက်သည် ။ ထို့နောက် သူရှေ့နှစ်လမ်းတိုးကာ စုမုန့်ကို ဆက်ပြီးရိုက်ဖို့လုပ်လိုက်သည် ။

ဧည့်သည်ကို ထိုလူက ရိုက်ဖို့လုပ်နေတာကို တွေ့လိုက်ရသောအခါ အဖွားအိုမှာထိတ်လန့်သွားရသည် ။ သူ့ကို သူမတားရန်ကြိုးစားလိုက်သော်လည်း ထိုလူက သူမကို တွန်းထုတ်လိုက်ပြီး စုမုန့်ကို ဆက်၍ ရိုက်ဖို့ကြိုးစားလိုက်သည် ။

စုမုန့်ရှောင်လိုက်သောအခါ သူမ၏ဒဏ်ရာကို ထပ်ထိမိသွားခဲ့သည် ။နာကျင်မှုက သူမကို ခဏတာ ရီဝေသွားစေပြီး ထိုတခဏတွင် ထိုလူ၏လက်က သူမ၏မျက်နှာကို ထိမလိုပင်ဖြစ်နေသည် ။

စုမုန့် နံရံမှ မပုန်းကွယ်နိုင်ခဲ့ပေ ။ သူမချက်ချင်း တစ်ဖက်သို့ရွေ့လိုက်ပြီး ထိုလူ၏အောက်ပိုင်းကို ကန်ဖို့ သူမ၏ ခြေထောက်ကို မြှောက်လိုက်သည် ။ ကံကောင်းစွာဖြင့် ခုခံကာကွယ်သည့်နည်းလမ်းအချို့ကို သူမသင်ယူခဲ့သည် ။သူမ၏ နောက်ကျောမှ ဒဏ်ရာကြောင့်သာမဟုတ်လျှင် ဤလူကို သူမကြောက်နေလိမ့်မည် မဟုတ်ပေ ။

" မင်း သူမကိုထိရဲတာလား ..."

သို့သော် ထိုလူသူမကို မရိုက်လာခင် ၊ သူမ ထိုလူကို မကန်နိုင်လိုက်ခင် တိုးသက်သော သတိပေးချက်ကိုသာကြားလိုက်ရမည်ဟု သူမ မမျှော်လင့်ထားဘဲ ၊ ထို့နောက် ထိုလူမှာ လွင့်ထွက်သွားခဲ့သည် ။

စုမုန့် မော့ကြည့်လိုက်သောအခါ ဝေ့ထင်က သူမအနောက်တွင် ရပ်နေခဲ့သည် ။

သူဘယ်အချိန်ကရောက်လာလဲဆိုတာကို သူမ မသိပေ ။သို့သော် အရေးကြုံနေသောအချိန်တွင် စုမုန့်ကို တိုက်ခိုက်မှုမှကာကွယ်ရန် အချိန်မီရောက်လာခဲ့သည် ။

" မင်းဒဏ်ရာရနေတဲ့အချိန် မင်းဘာသာပြေးလွှားနေရင် ဘာလို့ကိုယ့်ကိုမခေါ်လိုက်တာလဲ ... "

ဝေ့ထင်ပြောနေရင်း မျက်မှောင်ကြုတ်လိုက်ကာ သူ၏အပြစ်တင်နေသောစကားတို့မှာ စိုးရိမ်မှုနှင့်ပြည့်နေခဲ့သည် ။ ထို့နောက် ဆိုဖာတစ်ဝိုက်ကို သူလျှောက်သွားလိုက်ပြီး စုမုန့်၏ရှေ့တွင် ရပ်လိုက်သည် ။

စုမုန့် "..."

ဝေ့ထင်က သူမအတွက်စိတ်ပူနေတာလား ...ဒါပေမဲ့ ဒီလိုမဖြစ်သင့်ဘူးလေ ... ဝေ့ထင်နဲ့ သူမနဲ့ကြားမှာ လက်ထပ်စာချုပ်ကလွဲရင် တစ်ခြားဘာဆက်ဆံရေးမှ ရှိပုံလည်းမပေါ်ပါဘူး ၊ ဟုတ်တယ်မလား ... ပြီးတော့ သူမဘယ်သွားမယ်ဆိုတာကို ဝေ့ထင်ကို သတင်းပို့ဖို့လိုသေးတာလား ... အတိတ်မှာတုန်းက သူမအမြဲတမ်းတစ်ယောက်ထဲပဲ နေလာခဲ့တာပဲ ...

သူမဝေ့ထင်ကို ကြည့်လိုက်ပြီး ဘာပြောရမှန်း မသိပေ ။

စုမုန့် ဘာမှမပြောခဲ့သော်လည်း ဝေ့ထင်ထံမှ ရိုက်နှက်ခံလိုက်ရသော ထိုလူမှာ သူ၏ပါးစပ်ကို ဖွင့်လာခဲ့သည် ။ မြေပြင်ပေါ်တွင် သူခဏလောက် လှဲနေခဲ့ပြီးနောက် မတ်တပ်ရပ်လိုက်ကာ ဝေ့ထင်ကို ညွှန်ပြလိုက်သည် ။

" ပြီးတော့ မင်းက ဘယ်ကရောက်လာတာလဲ ... "

သူပြောပြီးသွားသောအခါ စုမုန့်နှင့်ပက်သက်ပြီး ဝေ့ထင်အလွန်စိုးရိမ်နေတာကို တွေ့လိုက်ရသည် ။ သူ၏မျက်နှာတွင် စက်ဆုပ်ဖွယ်ကောင်းသောအပြုံးကို ဖော်ပြလိုက်သည် ။

" အိုး ...သူမက မင်းရဲ့ချစ်သူကောင်မလေးပဲ ဟုတ်တယ်မလား ...မင်းစိတ်ပူနေတာ မအံ့သြတော့ပါဘူး ...ဒီနေရာကဘာနေရာလဲဆိုတာကိုရော မင်းသိရဲ့လား ... "

ထိုလူက မစဥ်းစားနေတော့ဘဲ မေးလိုက်သည် ။

" ဒီမှာ မင်းတစ်ခုခုဖြစ်သွားရင်တောင် ဘယ်သူမှသိလိုက်မှာမဟုတ်ဘူး ...ရဲကို ဖုန်းခေါ်ဖို့ကို ထားလိုက်တော့ ...မင်းကငါ့ကို လုံးဝ စော်ကားလိုက်မိတာ ...အခုမင်းကိုယ်မင်းတာဝန်ယူရတော့မယ် ... "

" မင်းမပြောနဲ့ ...ငါအခုလေးတင်သတိမထားမိလိုက်တာ ဒါပေမယ့် ဒီမိန်းမကတော်တော်လှတာပဲ...ကြည့်ရတာ သူမကို ငါခဏလောက်တော့ သိမ်းထားနိုင်မယ့်ပုံပဲ ...ငါပြောတာက..."

ထိုလူမှာ သူ၏စကားကို ဆုံးအောင်မပြောလိုက်နိုင်ခင် ဝေ့ထင်မှာ လှုပ်ရှားလိုက်ပြီဖြစ်သည် ။ ဝေ့ထင် သူ၏ခြေထောက်ကိုမြှောက်ကာ ထိုလူ၏ရင်ဘက်ကို ကန်ထုတ်လိုက်ပြီး လွင့်ထွက်သွားအောင်လုပ်လိုက်သည်။

ဝေ့ထင်မျက်မှောင်ကြုတ်ကာ အေးစက်စွာ ပြောလိုက်သည် ။

" ငါ့အထင်တော့ မင်းကအသက်ရှင်ရတာ ပင်ပန်းနေတဲ့ပုံပဲ ... "

ဝေ့ထင်၏ ကန်ချက်မှာ တကယ်မာကြောပြီး ထိုလူ အသက်ပင်မရှူနိုင်တော့ပေ ။

ဝေ့ထင်ထံမှ အကြောင်းအရင်းမရှိ နှစ်ခါမျှ ရိုက်နှက်ခံလိုက်ရသောအခါတွင် ထိုလူ၏ဒေါသမှာ ချက်ချင်းမြင့်တက်သွားခဲ့သည် ။ သူ၏အိတ်ထဲမှာ ဓါးအသေးကို ထုတ်လိုက်ပြီး ထိုအရာကိုမြှောက်ကာ ဝေ့ထင်ထံသို့ ပြေးဝင်လာခဲ့သည် ။

" သေစမ်း...မင်းက ငါ့ကိုတစ်ဆက်တည်း နှစ်ကြိမ်တောင် တိုက်ခိုက်ခဲ့တာပဲ ... ငါမင်းကိုသတ်ပစ်မယ် ..."

" တိုက်ခိုက်တာရပ်လိုက်ကြတော့ ... တိုက်ခိုက်တာကို ရပ်လိုက်ကြ ... ဒါကို အပြင်မှာ ဖြေရှင်းရအောင် ..."

အခြေအနေများမှာ ထိန်းချုပ်မှုလွတ်ကင်းလာတာကို အဖွားအိုကမြင်လိုက်ပြီး အလျင်အမြန်သူ့ကို တားဖို့ကြိုးစားလိုက်သည် ။ သို့သော် သူမ၏အသံမှာ အလွန်ပျော့ပြောင်းနေပြီး ဘာအရှိန်အဝါမှ ရှိမနေခဲ့ပေ ။မည်သူမှ သူမကို အာရုံမစိုက်ခဲ့ပေ ။

အဖွားအိုမှာ သူ့ကိုဖျောင်းဖျဖို့ အကြိမ်ကြိမ်ကြိုးစားခဲ့သော်လည်း သူ၏သားက ဓါးကိုပါ ထုတ်လိုက်ပြီဖြစ်တာကိုမြင်လိုက်ရသောအခါ သူမပိုပြီး စိုးရိမ်လာခဲ့သည် ။ သူမ တုန်တုန်ရီရီဖြင့် သူ့ကိုတားဖို့လုပ်လိုက်သည် ။

စုမုန့် ထိုအရာကို မြင်လိုက်သောအခါ သူမအပြေးအလွှားသွားပြီး အဖွားအိုကို တားဖို့လုပ်လိုက်သည် ။ ထိုလူမှာ အစောကတည်းက ပျာယာခတ်နေပြီး မတော်တဆအဖွားအိုကို ထိခိုက်မိလျှင် ပိုဆိုးသွားလိမ့်မည် ။

xxxxxxxxx

Prev Next