အပိုင်း ၇၃ ( Little White Face 1 )

မျက်နှာဖြူလေး

20X0 ဇွန်လ ၁ ရက်နေ့တွင် ဧရာမဂြိုဟ်သိမ်ကြီးတစ်လုံးသည် နက္ခတ္တဗေဒပညာရှင်တချို့၏ အဝေးကြည့်မှန်ပြောင်းများတွင် ပေါ်လာပြီး အချို့သော တွက်ချက်မှုများအပြီးတွင် ဂြိုဟ်သိမ်သည် ကမ္ဘာမြေကို ခြောက်လအတွင်း ဝင်တိုက်မည်ဖြစ်ကာ လူသားမျိုးနွယ်အတွက် အကြီးအကျယ် ပျက်စီးစေနိုင်သော ဘေးအန္တရာယ်ကို ယူဆောင်လာလိမ့်မည်ဖြစ်ကြောင်း တွေ့ရှိခဲ့သည်။

နိုင်ငံများသည် အတူပူးပေါင်းပြီး ကမ္ဘာမြေကို ဝင်မတိုက်ခင် ဂြိုဟ်သိမ်ကို ဖျက်ဆီးရန် အလုံးစုံသော အဆင့်မြင့်ဆုံး အာကာသယာဉ်နှင့် ဒုံးကျည်လက်နက်များကို အသုံးပြုခဲ့ကြသည်။

မူလက ဂြိုဟ်သိမ်တစ်ခုလုံးသည် နောက်ဆုံးတွင် မရေမတွက်နိုင်သော အပိုင်းအစများအဖြစ် ပေါက်ကွဲသွားပြီး လေထဲသို့ ကျရောက်ကာ ကမ္ဘာမြေအနှံ့ ပြန့်ကြဲသွားခဲ့သည်။

ထို့နောက် ချက်ချင်းပင် အမည်မသိဗိုင်းရပ်စ်တစ်မျိုးသည် နာရီပိုင်းအတွင်း တစ်ကမ္ဘာလုံးကို ပျံ့နှံ့သွားပြီး ကမ္ဘာ့လူဦးရေ၏ သုံးပုံတစ်ပုံကို ကူးစက်သွားလေသည်။

ဤဗိုင်းရပ်စ် ကူးစက်ခံရသူများသည် ချက်ချင်း သေဆုံးသွားပြီး မကြာမီ ပြန်ထလာကာ ဇွန်ဘီ ဟူသော ကြောက်မက်ဖွယ်သတ္တဝါအဖြစ် ပြောင်းသွားကြသည်။

သူတို့သည် လူသေများ ဖြစ်ကြောင်း သေချာပြီး အသိစိတ်ကင်းမဲ့သော်လည်း လှုပ်ရှားနိုင်နေလျက် အသက်ရှင်နေသော လူသားများကို လိုက်လံဖမ်းဆီး၍ စားပစ်တတ်သည်။

ဒဏ်ရာရသူများအားလုံးသည် တစ်နာရီအတွင်း သို့မဟုတ် ရက်အနည်းငယ်အတွင်း သူတို့ကဲ့သို့ လမ်းလျှောက်နေသော လူသေများ ဖြစ်လာကြသည်။

ထို့‌အပြင် ဂြိုဟ်သိမ်၏ အပိုင်းအစများ ‌ကမ္ဘာပေါ်သို့ ကျဆင်းလာပြီး ကမ္ဘာ၏ သံလိုက်စက်ကွင်းသည်လည်း ရုတ်တရက် အားပျော့သွားခဲ့သည်။ လျှပ်စစ်ဓာတ်ရှိသော နေရောင်ခြည်အမှုန်လေးများ အများအပြားသည် ကမ္ဘာကြီးကို တရစပ် တိုက်ခိုက်ပြီး ကမ္ဘာကြီး၏ သိပ်သည်းသော ဓာတ်အားကွန်ရက်နှင့် လေထုအပြင်ဘက်ရှိ ဂြိုဟ်တုများသည် ရုတ်တရက် သံတိုသံစများ ဖြစ်သွားကြသည်။ တစ်လောကလုံး အင်အားဆုံးရှုံးသွားကြပြီး အင်တာနက်က ချက်ချင်း ပျောက်ကွယ်သွားကာ ဆဲလ်ဖုန်းများလည်း အလုပ်မလုပ်တော့ချေ။

လူ့လောကသည် ကမ္ဘာပျက်ကပ်သစ်ကို ကြိုဆိုလိုက်ရပြီဖြစ်သည်။

ကျေးဇူးတော်ဖြင့် ဘုရားသခင်သည် လူသားဖြစ်တည်မှုစီသို့ လျှောက်လမ်းမပေါ်ရှိ မြင့်မားသော တောင်ကို ဖိနှိပ်လိုက်သောအခါ ရှေ့ဆောင်လမ်းပြပေးခဲ့သည် – ကမ္ဘာပျက်ကပ်ပြီးနောက် အလွန်ကံကောင်းသော လူအချို့သည် သဘာဝလွန်စွမ်းအားများကို နိုးကြားလာစေခဲ့၏။

–––

20X1 နိုဝင်ဘာလ၊ H မြို့ကြီး၏ ဆင်ခြေဖုံးရပ်ကွက်၊ တက္ကသိုလ်မြို့တော်။

H မြို့ကြီးသည် နာမည်ကျော်တက္ကသိုလ်များစွာ တည်ရှိသည့် စီရင်စု၏ အဓိကမြို့တော် ဖြစ်သည်။ ကမ္ဘာပျက်ချိန်များ ရုတ်တရက် ရောက်လာသည်မှာ တစ်နှစ်ကျော်ပြီဖြစ်ပြီး ကျောင်းဝင်းထဲတွင် နေထိုင်နေကြသော ကောလိပ်ကျောင်းသားများသည် ကြီးမားသော ပျက်စီးဆုံးရှုံးများကို ခံစားခဲ့ကြရသည်။

ပထမဆုံးဇွန်ဘီအုပ်စုသည် အလွန်လျင်မြန်စွာ ရုတ်တရက်ပေါ်လာသည်။ အချို့သော ကျောင်းသားအဆောင်များတွင် လူတစ်ဦးကသာ ဇွန်ဘီဖြစ်လာသော်လည်း မသင်္ကာဖွယ်အခြေအနေအတွင်း ထိုသူနှင့် အတူနေသူများသည် မလွှဲရှောင်နိုင်ဘဲ ထိခိုက်ဒဏ်ရာရပြီး ဗိုင်းရပ်စ်ကူးစက်သွားကြသည်။

လုံးဝ ကူးစက်သွားသော ကျောင်းသားအဆောင် အခန်းများ အနည်းငယ်ရှိခဲ့သည်။

တစ်ချိန်တည်းမှာပဲ ဆက်သွယ်ရေးနည်းလမ်းများမှာ လုံးလုံးလျားလျား ပြတ်တောက်သွားပြီး လျှပ်စစ်နှင့် ရေများလည်း ပြတ်တောက်သွားသဖြင့် လူ့အဖွဲ့အစည်းအတွင်း မဝင်ရောက်ရသေးသည့် အသက်ရှင်ကျန်ရစ်သော ကျောင်းသားများကို အထိတ်တလန့် ဖြစ်စေသည်။

ကံကောင်းထောက်မစွာဖြင့် ဤအချိန်တွင် Z ကျောင်းသားသမဂ္ဂ၏ ဥက္ကဌဖြစ်သူ ကျိုးဝမ်ရှိူ့သည် အင်အားကြီးမားသော မီးစွမ်းရည်ကို နိုးကြားစေနိုင်ခဲ့ပြီး ရှေ့ထွက်၍ ကျောင်းရှိ ကျောင်းသားများနှင့် ပတ်ဝန်းကျင်မှ လူများကို စတင်ကူညီပေးခဲ့သည်။

သူသည် လူများကို ဦးဆောင်၍ အသက်ရှင်ကျန်ရစ်သူများကို ကယ်တင်သည်၊ ဇွန်ဘီများကို သတ်ဖြတ်သည်၊ အစားအစာများကို စုဆောင်းသည်... ကျိုး‌ဝမ်ရှိူ့၏ ဦးဆောင်မှုနှင့် စုစည်းမှုအောက်တွင် သူတို့သည် "တက္ကသိုလ်မြို့တော် လုံခြုံရေးအခြေစိုက်စခန်း" ကို တည်ထောင်ဖွင့်လှစ်ခဲ့ပြီး H မြို့ကြီး၏ တက္ကသိုလ်များပေါ်တွင် အခြေတည်ထားလေသည်။

အသက်ရှင်ကျန်သူ ကျောင်းသားများနှင့် ကယ်ဆယ်ခံရသူများသည် အတူတကွ အလုပ်လုပ်ကြပြီး အခြေစိုက်စခန်းကို ပိုပိုပြီး ကောင်းမွန်လာစေရန် တည်ဆောက်ကြသည်။ လက်တွေ့အရည်အချင်း ကင်းမဲ့မှုကြောင့် လှောင်ပြောင်ခံရသော ကောလိပ်ကျောင်းသားများသည်လည်း သူတို့၏ အသက်ရှင်နေထိုင်ရေး အခြေအနေများကို တိုးတက်စေရန် အသုံးဝင်သော ပစ္စည်းမျိုးစုံကို စတင်ပြုလုပ်ခဲ့ကြသည်...

တစ်နှစ်ကျော်ပြီးနောက် အပြင်ဘက်မှ ဇွန်ဘီများသည် ပိုပိုသန်မာလာကြပြီး တက္ကသိုလ်မြို့တော်၏ အခြေစိုက်စခန်းတွင် နေထိုင်သူများ ပိုပိုများလာကြသည်။ သဘာဝလွန်စွမ်းအားရှင်များ၏ အင်အားများသည် တိုက်ပွဲတွင် ရုတ်ခြည်းဆိုသလို တိုးတက်လာကြသော်လည်း အခြေစိုက်စခန်းတစ်ခုလုံးတွင် အသန်မာဆုံးလူမှာ အခြေစိုက်စခန်း တည်ထောင်သူနှင့် တာဝန်ရှိသူ – ကျိုးဝမ်ရှိူ့ ဖြစ်နေဆဲဖြစ်သည်။

ကျိုးဝမ်ရှိူ့သည် ကျောင်းသားသမဂ္ဂ၏ ဥက္ကဌ ဖြစ်ခဲ့ဖူးသော်ငြား ယခုမူ သူသည် တက္ကသိုလ်မြို့တော် အခြေစိုက်စခန်း စီမံခန့်ခွဲရေး အဖွဲ့အစည်း၏ ဥက္ကဌ ဖြစ်ပြီး အခြေစိုက်စခန်းတစ်ခုလုံးကို တာဝန်ယူထားသည်။

ကျိုးဝမ်ရှိူ့၏ ဖခင်သည် နိုင်ငံမျိုးစုံတွင် အခြေစိုက်သော စီးပွားရေးလုပ်ငန်း ကုမ္ပဏီကြီးတစ်ခုကို ပိုင်ဆိုင်သည်။ ကျိုးဝမ်ရှိူ့သည် ငယ်ငယ်ကတည်းက ဉာဏ်ကောင်းပြီး သူ၏ ငယ်ဘဝ ပညာရေးအပြင် သူ၏ ထိပ်တန်း IQ နှင့် EQ တို့ကလည်း သာမန်လူများထက် များစွာသာလွန်သည်။ သူ ကောလိပ်တက်နေစဉ် လူတိုင်းက သူ့ကို အားကျကြပြီး ကမ္ဘာပျက်ချိန် ကျရောက်လာသောအခါ သူ၏ လုပ်ဆောင်မှုမှာ ပို၍ပင် ပြီးပြည့်စုံသေးသည်။

သူ့တွင် ကြီးမားသော ခွန်အားရှိရုံမျှမက သူသည် မျှချေညီအောင် ဆောင်ရွက်နိုင်ပြီး အခြေစိုက်စခန်းကို စနစ်ကျစေသည်။ သာမန်လူတစ်ယောက်က ဒီလိုမျိုး မလုပ်နိုင်ဘူး!

သို့သော် ကျိုးဝမ်ရှိူ့သည် ခြောက်ပြစ်ကင်း သဲလဲစင်သူ မဟုတ်ချေ။

သူသည် ယောက်ျားများကို သဘောကျပြီး အသုံးမကျသော မျက်နှာဖြူလေး*ကို ပျိုးထောင်ထားသည်။

ကမ္ဘာပျက်ချိန်များ ကျရောက်လာသောအခါ ကျိုးဝမ်ရှိူ့ကို အမျိုးသားနတ်ဘုရားအဖြစ် သဘောထားခဲ့သော မိန်းကလေးများမှာ သူ့အား ပို၍ပင် စိတ်ပါဝင်စားလာကြတော့သည်။ ‌ရေတွက်မရသော လူများစွာက သူ့အတွက် ခံစားချက်ကောင်းများကို ထုတ်ဖော်ပြသခဲ့ကြသော်လည်း ကျိုးဝမ်ရှိူ့သည် ဘယ်သူ့ကိုမှ မလိုချင်ဘဲ တစ်ယောက်တည်း နေသည်။

သူက သန့်ရှင်းပြီး ကွဲပြားသည်ဟု လူတိုင်း တွေးထင်နေခါစတွင် သူသည် ယောက်ျားတစ်ယောက်ကို အိမ်ခေါ်လာပြီး စတင်၍ ကျွေးမွေးခြင်းနှင့် ထိုသူအတွက် အဝတ်အစားများကို ထောက်ပံ့ပေးတော့သည်။

သတင်းကြားသိရသူများသည် စူးစမ်းချင်ကြပြီး ကျိုးဝမ်ရှိူ့ကို မေးမြန်းကြလေသည်။ ထို့နောက် သူတို့သည် ထိုလူက သူ့ရည်းစားဖြစ်ကြောင်း ကျိုးဝမ်ရှိူ့၏နှုတ်မှ ကြားလိုက်ရသည်။

ရည်းစားဆိုသည်ထက် မျက်နှာဖြူလေးတစ်ဦးကို ပျိုးထောင်ထားခြင်းဟု ခေါ်လျှင် ပို‌သင့်တော်သည်။

အဘယ့်ကြောင့်ဆိုသော် ထိုယောက်ျားသည် ကြည့်ကောင်းသော မျက်နှာနှင့် နှုတ်ချိုခြင်းတို့မှလွဲ၍ တကယ့်ကို အသုံးမကျ၍ဖြစ်သည်။ သူက ဘာမှမလုပ်နိုင်ပေ။ အခြေစိုက်စခန်းတွင် သက်ကြီးရွယ်အိုများနှင့် ကလေးများပင် အသက်ရှင်နေထိုင်ရေး ထောက်ပံ့ပစ္စည်းများကို ရရှိရန် အလုပ်ကြိုးစားကြလိမ့်မည်။ သို့သော် သူက ကျိုးဝမ်ရှိူ့ ကယ်လာပြီး‌နောက် ဘာအလုပ်မှမလုပ်ပေ။ သူ့ကို အစာကျွေးဖို့ ကျိုးဝမ်ရှိူ့ကိုပဲ အားကိုးနေတယ်!

ဤသည်မှာ ယောက်ျားများအတွက် တကယ့်ကို ရှက်စရာ ဖြစ်သည်။

သို့သော်ငြား ကျိုးဝမ်ရှိူ့သည် သူ့ကို အထူးဂရုစိုက်ပြီး သူ လိုချင်တာမှန်သမျှ အမြဲလိုလို ပေးလေ့ရှိသည်။ ယနေ့တွင် သူသည် ထိုသူ ပျောက်ဆုံးနေကြောင်း သိလိုက်ရပြီး ကောင်းကင်နဂါး အခြေစိုက်စခန်းမှ လူများက ပြန်ပေးဆွဲသွားကြောင်း ကြားသိလိုက်ရသဖြင့် ချက်ချင်းပင် သူတို့နောက် လိုက်သွားခဲ့သည်။

——

တက္ကသိုလ်မြို့တော် အခြေစိုက်စခန်းမှ ဆယ်ကီလိုမီတာအကွာတွင် ယာဉ်တန်းသည် ရှေ့သို့ ဝရုန်းသုန်းကား မောင်းနေသည်။

၎င်းမှာ တက္ကသိုလ်မြို့တော် အခြေစိုက်စခန်းနှင့် ထောက်ပံ့ပစ္စည်းများ လဲလှယ်ရန် ကောင်းကင်နဂါး အခြေစိုက်စခန်းမှ အသုံးပြုသော ယာဉ်တန်းဖြစ်ပြီး တက္ကသိုလ်မြို့တော် အခြေစိုက်စခန်းမှ ထွက်ခွာလာစ ဖြစ်သည်။ ဤအခိုက်အတန့်တွင် ယာဉ်တန်းထဲမှ လူများသည် ကျိန်ဆဲနေကြပြီး ယာဉ်တန်း ရှေ့သို့ ချောမွေ့စွာ ဆက်သွားနိုင်ရန်အတွက် လမ်းကို ကြိုးစားရှင်းလင်းနေကြသည်။

ကမ္ဘာ့အဆုံးသတ်က အလွန်ရုတ်တရက်ဆန်စွာ ရောက်လာလေရာ နိုင်ငံက ၎င်းအတွက် ကြိုတင်မပြင်ဆင်နိုင်ခဲ့ချေ။ ဆက်သွယ်ရေးပစ္စည်းများ အလုပ်မလုပ်နိုင်တော့သောကြောင့် သတင်းများ မလည်ပတ်နိုင်တော့သဖြင့် လူများစွာသည် သတိမထားမိဘဲ ဇွန်ဘီဖြစ်လာသော သူတို့၏ ဆွေမျိုးများထံမှ အကိုက်ခံရပြီး နောက်ဆုံးတွင် ဇွန်ဘီများ ဖြစ်လာကြသည်။

တခြားနေရာများမှ အခြေအနေကိုမူ ယခုအချိန်တွင် သူတို့ မသိသော်လည်း ကိစ္စတစ်ခုကတော့ သေချာသည်။ ကျယ်ဝန်းသော H မြို့ကြီး၌ အနည်းဆုံးတော့ လူဆယ်ဦးတွင် ခုနစ်ဦးမှာ ဇွန်ဘီများ ဖြစ်သွားကြပြီဖြစ်သည်။

အချိန်ကုန်သရွေ့ ပိုမိုသန်မာလာနေကြသော ဤဇွန်ဘီများသည် မသိစိတ်၏ စေ့ဆော်မှုအရ သွေးသားများနောက် လိုက်နေကြပြန်သည်... ယာဉ်တန်းသည် ရှေ့သို့တိုးချင်သည်။ ၎င်းမှာ အလွန်ခက်ခဲလာပြီး မကြာခဏ ဇွန်ဘီများကို ကြိတ်မိနေလေသည်။

ဤကားများ၏ အလယ်တွင် SUV တစ်စီး ရှိပြီး ဤ SUV ၏ နောက်ခုံတန်းတွင် ချောမောသော ရုပ်ရည်နှင့် နှစ်ဆယ်ကျော်ခါစ လူငယ်တစ်ဦး ထိုင်နေသည်။

သူ့အနားမှ လူများသည် အပြင်ဘက်ရှိ ဇွန်ဘီများနှင့် ကား၏ ဆောင့်မိတိုက်မိသော မောင်းနှင်ခြင်းများကို ကျင့်သားရနေကြပြီဖြစ်သည်။ သို့ရာတွင် ဤလူသည် ကားပြတင်းပေါက်၏ အပြင်ဘက်မှ ဇွန်ဘီများကို ကြောက်ရွံ့နေပြီး ကားက ဇွန်ဘီနှစ်ကောင်ကို ရှောင်ရန် ထောင့်ချိုးကွေ့ချလိုက်သောအခါ သူသည် သူ့ကိုယ်သူ မထိန်းနိုင်ဘဲ ခြောက်သွေ့စွာ အော့အန်မိလိုက်သည်။

သူ့ဘေးတွင် ထိုင်နေသော လှပသော မိန်းကလေးသည် သူ့ကို ဤသို့တွေ့သွားပြီး အထင်သေးစွာ မျက်ဖြူလှန်လိုက်သော်လည်း သူ လှည့်ကြည့်သောအခါ သူ(မ)က နူးနူးညံ့ညံ့ ပြုံးပြပြီး စိုးရိမ်မှုများ ပြည့်နှက်နေသော မျက်နှာအမူအရာနှင့် မေးမြန်းသည်။

" ကျင်းဇီ၊ နင် အဆင်ပြေရဲ့လား? "

ယန်ကျင်းဇီက သူ အဆင်ပြေ၊မပြေ ဘယ်လိုလုပ်သိမှာလဲ?

ရုတ်တရက်ကြီး သူက ‌ဤနေရာကို ကူးပြောင်းလာပြီး ဘာမှလည်း မသိပေ။ သူသည် အော်ဂလီဆန်နေပြီး သက်တောင့်သက်သာ မရှိသကဲ့သို့ ခံစားနေရသည်။

ကားမောင်းသမားသည် ကားမောင်းနည်းကို မသိဘဲ အကွေ့တိုင်းကို ပြင်းပြင်းထန်ထန် ကွေ့ချိုးလျက် S ပုံသဏ္ဍာန်အတိုင်း ဆက်တိုက်မောင်းနှင်နေသည်။ ဒါတင်မက မြေပြင်ကလည်း မညီညာသည်မှာ သိသာလှသည်...

ယန်ကျင်းဇီသည် ကားထိုင်ခုံခါးပတ်ကို ရှင်းရှင်းလင်းလင်း ပတ်ထားသော်လည်း အချိန်မရွေး လွင့်ထွက်သွားနိုင်သည်ဟု ခံစားနေရဆဲဖြစ်သည်။ ကားက ရုတ်တရက် လှုပ်ခါသွားပြီး သူ့ခန္ဓာကိုယ်မှာ မြောက်တက်သွားကာ ချက်ချင်း ပြန်ကျသွားသဖြင့် သူ့ကို မူးဝေစေသည်။

" အရမ်းကြမ်းလွန်းတယ်... " ယန်ကျင်းဇီ မပြောဘဲ မနေနိုင်တော့။

သူ့တွင် မကူးပြောင်းခင်က မှတ်ဉာဏ်များ မရှိသည့်အပြင် မူလပိုင်ရှင်၏ မှတ်ဉာဏ်များလည်း မရှိပေ။ ဤအခိုက်အတန့်တွင် သူ့ခေါင်းထဲ၌ လုံးဝ ပြောင်ဗလာဖြစ်နေသော်လည်း သူ ခံစားရသည်မှာ... ကားက အလွန်ဆောင့်မိမနေသင့်ဟူ၍ပင်။

" ကျင်းဇီ သည်းခံလိုက်နော်။ လမ်းရဲ့ ဒီအပိုင်းမှာ ဇွန်ဘီတွေ အများကြီး ရှိ‌တယ်။ ကားမောင်းရတာ မလွယ်ဘူး။ " မိန်းကလေး၏အသံမှာ ထပ်မံထွက်ပေါ်လာပြန်သည်။

ယန်ကျင်းဇီသည် ခေါင်းမော့လိုက်ပြီး ထိုအခါမှသာ သူ့ကို စကားပြောနေသော အမျိုးသမီး၏ ပုံပန်းသွင်ပြင်ကို တွေ့လိုက်ရသည်။

သူ(မ)သည် လှပသော မိန်းကလေး ဖြစ်သော်လည်း မိတ်ကပ်နှင့် ဆံပင်မှာ အလွန်ကောင်းမွန်ခြင်း မရှိချေ။

သူ(မ)သည် ဆံပင်ပြုပြင်ပြီး ဆေးဆိုးထားသော်ငြား ထိုဆံပင်မှာ ကောင်းမွန်စွာ မထိန်းသိမ်းထားဘဲ ထိပ်ဖျားများမှာ ခြောက်သွေ့အက်ကွဲနေသည်။ သူ(မ)သည် မိတ်ကပ်လိမ်းထားသော်လည်း မိတ်ကပ်က အလွန်ရိုးရှင်းပြီး မျက်လုံးမိတ်ကပ်ဆိုလျှင် အလွန်အဆင်မပြေ ဖြစ်နေလေသည်။

ထို့အပြင် သူ(မ)သည် အံ့အားသင့်ဖွယ်ကောင်းစွာ ဂါဝန်နှင့် ဒေါက်မြင့်ဖိနပ်များကို မဝတ်ဆင်ထားဘဲ ရုပ်ဆိုးသော အားကစားဝတ်စုံနှင့် အမည်းရောင်ပတ္တူဖိနပ်တစ်စုံကို ဝတ်ဆင်ထားသည်။ ဖိနပ်များမှာ အနည်းငယ် ညစ်ပေနေသေးသည်။

ယန်ကျင်းဇီသည် ထူးထူးခြားခြား အနည်းငယ် ရွံရှာသွားသည်။

" ကျင်းဇီ၊ လမ်းပေါ်မှာ အခြေအနေတွေက သိပ်မကောင်းပေမယ့် ငါတို့ရဲ့ အခြေစိုက်စခန်းကို ပြန်ရောက်ရင်တော့ အဆင်ပြေသွားမှာပါ။ " မိန်းကလေးသည် ယန်ကျင်းဇီကို ပြုံးလျက် ကြည့်နေသည်။

ယန်ကျင်းဇီသည် မရေမရာ ပြန်ဖြေလိုက်သည်။ သူ ဤအမျိုးသမီးကို မကြိုက်ပေ။ သူ(မ)ကို သူ မကြည့်ချင်။ ထိုအစား သူသည် အမျိုးသမီးနောက်မှ ကားမှန်အပြင်ဘက်ကို ကြည့်လိုက်သည်...

မျက်နှာတစ်ဝက် ပျောက်ဆုံးနေပြီး မျက်လုံးအိမ်မှ မျက်လုံးတစ်လုံး တွဲလောင်းကျနေကာ သွေးနီရင့်ရောင်များဖြင့် ဖုံးလွှမ်းနေသော 'အမျိုးသား'တစ်ဦးသည် သူ့ပါးစပ်ကို အကျယ်ကြီးဟလျက် သူတို့ကားနောက်သို့ အမြန်ပြေးလိုက်နေသည်။

" အဲ့ဒါ ဘာလဲ? " ယန်ကျင်းဇီသည် မသိစိတ်အရ နောက်သို့ပြန်ဆုတ်လိုက်သည်။

အမျိုးသမီးက နောက်လှည့်ကြည့်ပြီး ခေါင်းပြန်လှည့်ကာ သူ့ကို ဆွံ့အစွာ ပြန်ကြည့်လာသည်။ သူ(မ)၏ မျက်ဝန်းများတွင် နက်ရှိုင်းသော အထင်သေးမှုများကို ဖုံးကွယ်လျက်ရှိသည်။

သူ(မ)၏အကြည့်မှာ သူ့ကို ရင်ထိတ်စေပြီး သူ့ကိုယ်သူ ဖော်ထုတ်မိမည်ကို ကြောက်သဖြင့် သူ စကားထပ်မပြောရဲတော့ပေ – သူ ထူးထူးဆန်းဆန်း နေရာတွေကို ကူးပြောင်းလာလေသလား?

အမျိုးသမီးက ယန်ကျင်းဇီ စကားမပြောတော့သည်ကို တွေ့သောအခါ ပြုံးပြလာသည် : " မကြောက်ပါနဲ့။ ငါတို့ အခြေစိုက်စခန်းဘက်ကို ရောက်တဲ့အထိပဲ စောင့်ပါ။ အဲ့နေရာမှာ ဘာဇွန်ဘီမှမရှိဘူး။ ငါ နင့်ကို ကာကွယ်မှာပါ။ နင့်ကို မထိခိုက်စေရဘူး။ "

ဤအမျိုးသမီးသည် သူ့ကို သေချာပေါက် သဘောမကျသော်လည်း စကားများမှာ အလွန်ညင်သာသည်... ယန်ကျင်းဇီသည် မျက်တောင်ချလိုက်ပြီး အနည်းငယ် စိုးရိမ်မိသွားသည်။

မူလပိုင်ရှင်၏ မှတ်ဉာဏ်များ မရှိချေ။ သူ့တွင် မကူးပြောင်းခင်က မှတ်ဉာဏ်များပင် မရှိပေ။ သူ အခု မည်သည့်နေရာတွင် ရောက်နေမှန်း သူ မသိ...

စိတ်ရှုပ်လိုက်တာ!

စဉ်းစားနေစဉ် ယန်ကျင်းဇီသည် ကားအပြင်ဘက်တွင် လက်များနှင့် ခြေထောက်များ ပျောက်ဆုံးနေသော လူအနည်းငယ်က ရှင်းလင်းစွာပင် သေဆုံးပြီးပုံပေါ်လျက်ဖြင့် သူတို့ထံသို့ အမြန်ပြေးလိုက်နေသည်ကို တွေ့နေရသည်။

သူတို့တစ်ယောက်ချင်းစီတွင် တချို့က လည်ပင်းများ လိမ်နေကြပြီး တချို့က လက်များမရှိကြဘဲ တချို့ဆိုလျှင် ပုပ်သိုးနေသော ခန္ဓာကိုယ်များ ရှိနေကြသည်။ ဒါဆို ဘာလို့ သူတို့က ပြေးနေကြသေးတာလဲ?

ဒီသောက်ကျိုးနည်းဟာတွေက ဘာတွေလဲ?

ယန်ကျင်းဇီ အနည်းငယ် အော့အန်ချင်လာသည်။ ဤအချိန်တွင် သူသည် လူသေစီသို့ ပျံသန်းလာသော မီး‌လုံးတစ်လုံးက လူသေ၏ ဦးခေါင်းကို တိုက်ရိုက်လောင်ကျွမ်းစေပြီး လူသေက နောက်ဆုံး မြေပြင်ပေါ်သို့ လဲကျသွားကာ လှုပ်ရှားမှုရပ်တန့်သွားသည်ကို တွေ့မြင်လိုက်ရသည်။

ဒီမီးက ဘယ်ကလာတာလဲ?

ယန်ကျင်းဇီ ပဟေဠိဖြစ်နေပြီး သူ ထိုင်နေသော ကား၏ ခေါင်မိုးပေါ်တွင် လူတစ်ယောက် ထိုင်နေသည်ဟု ရုတ်တရက်ကြီး ဝိုးတိုးဝါးတား ခံစားလိုက်ရသည်။ ထိုလူက... မီးလုံးတစ်လုံးကို ပစ်နေဆဲဖြစ်သည်။

ဒီနေရာက တကယ် ထူးဆန်းတာပဲ!

ဘာလို့ သူက ဒီလိုနေရာကြီးကို ကူးပြောင်းလာရတာလဲ?

ယန်ကျင်းဇီ မကျေမနပ်ဖြစ်နေစဉ် ကားခေါင်မိုးပေါ်မှ လူက ရုတ်တရက် ပြောလာသည်။ " ကျိုးဝမ်ရှိူ့ မီလာပြီ! "

ဤလူ၏အသံတွင် စိတ်လှုပ်ရှားမှု အနည်းငယ် ရောနှောနေသည်မှာ ထင်ရှားလှသည်။

ကျိုးဝမ်ရှိူ့က ဘယ်သူလဲ? ယန်ကျင်းဇီ သတိမထားမိဘဲ ပြန်လှည့်ကြည့်လိုက်သည်။

ကားနောက်ဘက်မှ မှန်မှာ ညစ်ပတ်နေပြီး သူ လှည့်ကြည့်သောအခါ ဘာမှမမြင်ရပေ။ ယန်ကျင်းဇီ၏ ထိုင်ခုံမှာ ပြတင်းပေါက်ဘက်ခြမ်းတွင် ဖြစ်သဖြင့် သူသည် အပြင်ဘက်ကို ရှင်းရှင်းလင်းလင်း တွေ့မြင်နိုင်သည်။

သူတို့သည် စွန့်ပစ်ခံထားရသော မြို့ကြီးတစ်မြို့ထဲတွင် သွားလာနေပြီး ရှေ့နှင့်နောက်တွင် ကားများစွာ ရှိကာ အသင်းတစ်သင်းတည်းဟု ယူဆရသည်။ ဤကားများနောက်တွင် မော်တော်ဆိုင်ကယ်တစ်စီးသည် အရှိန်ပြင်းပြင်းဖြင့် ချဉ်းကပ်လာသည်။

မော်တော်ဆိုင်ကယ်သည် သူတို့နှင့် ‌အနည်းငယ် ဝေးကွာပြီး တက္ကဗေဒအရ ယန်ကျင်းဇီသည် ထိုသူ၏ အသွင်အပြင်ကို မမြင်ရသင့်သော်လည်း အကြောင်းအရင်းတချို့ကြောင့် သူသည် ထိုသူကို ရှင်းလင်းပြတ်သားစွာ တွေ့နိုင်သည်။

မော်တော်ဆိုင်ကယ်ပေါ်တွင် ထိုင်နေသူမှာ အသက်နှစ်ဆယ်ကျော် လူငယ်တစ်ဦး ဖြစ်သည်။

သူ့တွင် နှစ်လိုဖွယ်မရှိသော တုံးတိတိ ဆံပင်ပုံစံ ရှိသော်လည်း ၎င်းက သူ့မျက်နှာကို လုံးဝ မသက်ရောက်ချေ။ ထိုအစား သူက သန့်ရှင်းသပ်ရပ်ပုံ ပေါ်နေသည်။ သာမန်အားကစားဝတ်စုံမှာ သူ ဝတ်ဆင်ထားသောကြောင့် အလွန်ထူးခြားနေသည်။

သူ့မျက်နှာမှာ အေးစက်နေပြီး သူ့မျက်ခုံးများက ထူထဲကာ သူ့နှာတံကလည်း မြင့်မားသည်။ ဤအချိန်တွင် သူ၏ အနည်းငယ် ကျဉ်းမြောင်းသော မျက်ဝန်းများက ရှေ့သို့ ကြည့်ရှုနေသည်မှာ အဖော်မဲ့ဝံပုလွေတစ်ကောင်က အချိန်မရွေး ထခုန်ပြီး သူ့သားကောင်ကို ခုန်အုပ်လိုက်တော့မည့်အတိုင်းပင်။

ယန်ကျင်းဇီ၏ နှလုံးခုန်သံမှာ မြန်ဆန်လာပြီး အပြင်သို့ ခုန်ထွက်လာတော့မတတ် နှလုံးခုန်နေသောကြောင့် သူသည် မသိလိုက်ဘဲနှင့် သူ့နှလုံးသားကိုပင် အုပ်ထားမိလိုက်သည်။

သူသည် ထိုသူကို မြင်မြင်ချင်း ချစ်မိသွားပြီ။

ဤနေရာသို့ အဘယ့်ကြောင့် သူ ရောက်ရှိလာမှန်း သူ သိသွားပြီ... သူ ဒီလူအတွက် လာတာပဲ ဖြစ်ရမယ်!

____

*မျက်နှာဖြူလေး - လှပတဲ့ ကောင်လေး။

Arc အသစ် စပါပြီ! ✨

____