အပိုင်း ၁၅

Chapter 15

သူမှားသွားခဲ့တယ်

ယင်းမင်ကျန်းက အသက်ငယ်သော်လည်း ရက်စက်တတ်မှန်း သူတို့အားလုံးသိကြသည်။ သူက လူငယ်များဆိုလျှင် ဥပဒေအရအပြစ်ပေးမခံရနိုင်မှန်းကိုပင်သိထားပြီး ထိုစကားနှင့် နစ်နာသူကိုခြိမ်းခြောက်ခဲ့ကာ နစ်နာသူနှင့်သူ့မိသားစုကိုပြောင်းရွေ့ရန် တွန်းအားပေးခဲ့သည်။

ထိုသို့နှင့် သူက တစ်ကြိမ်တည်းနှင့် နာမည်ဆိုးဖြင့်ကျော်ကြားခဲ့ရသည်။ ထိုအချိန်အတွင်းတွင် အရက်မူးနေသောဖခင်ဖြစ်သူကတောင် သူခြိမ်းခြောက်ခဲ့သောစကားကြောင့် သူ့ကိုရန်စရန် သတ္တိမရှိခဲ့ပေ။

သို့သော်လည်း ယင်းချန်းက သူအရက်သောက်ပြီးသည်နှင့် အကြောင်းပြချက်အားလုံးကိုမေ့တတ်သောလူဖြစ်သည့်အတွက် ခဏကြာသောအခါ ယခင်အကျင့်အဟောင်းအတိုင်းသာပြန်ဖြစ်တတ်သည်။ ယင်းမင်ကျန်းက သူ့ကိုသတ်ပြီး အဆုံးသတ်ပစ်ချင်စိတ်များ များစွာရှိခဲ့ဖူးသည်။ သို့သော်လည်း နောက်ဆုံးတွင်တော့ သူ့ဖခင်သာဖြစ်ပြီး လူသတ်ခြင်းက မှားယွင်းသည်။ ထို့ကြောင့် ထိုမျှလောက်ထိ သူမလုပ်ခဲ့ပေ။

ထိုဖြစ်ရပ်ပြီးနောက် ယင်းမင်ကျန်းက ချောမောလှပခြင်းက ကောင်းသည့်အရာမဟုတ်ကြောင်းသိရှိသွားခဲ့သည်။ သူက မိန်းကလေးနှင့် အလွန်တူ၏။ သူယခုလိုသာဆက်ဖြစ်နေမည်ဆိုလျှင် နောက်ထပ်ပစ်မှတ်ထပ်ဖြစ်နိုင်သည်။

ရလဒ်အနေဖြင့် အားလုံးက ယင်းမင်ကျန်းကို ပုန်ကန်သည့်အဆင့်ကိုကျော်ဖြတ်ခဲ့ကြောင်းသိကြပြီး သူ့ဆံပင်ပုံစံကိုလည်းပြောင်းကာ ရွှေရောင်ဆိုးခဲ့သည်။ သူ့ပုံစံက ရန်မစရဲစရာကောင်းသည့်ပုံစံဖြစ်သွား၏။

ယင်းမင်ကျန်းက သူစိတ်မတည်ငြိမ်ခင် အိပ်ရာပေါ်တွင် အကြာကြီးလဲလျောင်းနေလိုက်သည်။ ထို့နောက် သူက ယွမ်တစ်ရာကိုယူ၍ အခန်းထဲမှ ထွက်လာခဲ့လိုက်သည်။

သူတံခါးဖွင့်လိုက်သည်နှင့် ယင်းချန်းက သူ့အခန်းရှေ့တွင် လဲလျောင်းနေကြောင်းတွေ့သွားသည်။ ယင်းမင်ကျန်းက သူ့ကိုအေးစက်စွာကြည့်၍ ကျော်ခွလာခဲ့လိုက်သည်။

ယင်းချန်းက ဝက်လိုအိပ်နေသဖြင့် ဘာမှမတုံ့ပြန်ပေ။

ယင်းမင်ကျန်းက အနီးနားက စတိုးဆိုင်ကိုသွား၍ ရုပ်အဆိုးဆုံးသောဆံပင်တုကို ဝယ်လာခဲ့လိုက်သည်။ သူက နေထိုင်ရာပတ်ဝန်းကျင်နှင့် အလွန်ရင်းနှီးနေသည့်အတွက် ဘယ်နေရာမှာဘာရောင်းမှန်းသိသည်။ ဆံပင်တုဝယ်ပြီးနောက်တွင် အိမ်သို့ ညစာပြင်ရန်ပြန်လာခဲ့သည်။

ရှုနဉ်က ကျိုးကျွမ်ကိုဆက်သွယ်ထားပြီး ည ၉နာရီ ပထမထပ်တွင်တွေ့ရန် ချိန်းထားသည်။ 

ကျိုးကျွမ်က မရောက်သေးချေ။ ရှုနဉ်က လှေကားဆစ်ချိုးနားရှိ ခုံတန်းလျားတွင်ထိုင်နေပြီး စောင့်နေလိုက်သည်။

သူတွေ့ခဲ့ပြီးကြားခဲ့သည့်အရာက သူ့အပေါ် ကြီးမားသည့်သက်ရောက်မှုရှိနေသည်။

အိမ်ပြန်ပြီး ထိုအကြောင်းကို ခဏစဉ်းစားပြီးသည်နှင့် ထိုလူက မည်သူဖြစ်ကြောင်းကို နောက်ဆုံးမှာ မှတ်မိသွားခဲ့ရသည်။ သူတို့၏ အိမ်နီးချင်းရပ်ကွက်တွင် ထိုသူနေခဲ့ဖူးသည်။ ပါပါးရှုကပင် သူနှင့် ယခင်က စကားပြောခဲ့ဖူးသေးသည်။ သူက ယဉ်ကျေးပြီး ခံညားသည့်ပုံစံရှိသည်။ သူက ကုမ္ပဏီတစ်ခုက စီမံခန့်ခွဲရေးတွင်အလုပ်လုပ်နေသူဖြစ်ကြောင်းကို ရှုနဉ်ကြားသိခဲ့ဖူးသည်။ သူ့မိန်းမကလည်း အလွန်အထင်ကြီးဖွယ်ကောင်း၏။ သူမက တက္ကသိုလ်တွင် ပါမောက္ခဖြစ်သည်။

ရှုနဉ်က ခိုးယူလုယက်မှုအကြောင်းလည်း ကြားခဲ့ရသည်။ သူက ထိုကိစ္စနှင့်ပက်သက်ပြီး ကောင်းကောင်းကြီးမှတ်မိသည်။ ထိုအချိန်တုန်းက အိမ်နီးချင်း များက ထိုအကြောင်းကိုသာ နေ့တိုင်းပြောဆိုနေခဲ့ကြသည်။ မစ္စချိုက်နှင့် ပါပါးရှုက နေ့တိုင်း ထိုအကြောင်းကိုပြောခဲ့ကြပြီး ၎င်းတို့၏အတွေးအမြင်များကို ဖော်ပြခဲ့ကြသည်။ ယင်းမင်ကျန်းဆီက မသင်ယူဖို့ကိုတောင် သင်ခန်းစာပေးခဲ့ကြသေး၏။

ထိုကိစ္စက အလွန်ကြီးမားသည့်ကိစ္စဖြစ်ခဲ့သည်။ 

ကံကောင်းစွာနှင့် နစ်နာသူက ယင်းမင်ကျန်း၏ မိသားစုအခက်အခဲအခြေအနေကို ထည့်သွင်းစဉ်းစားပေးပြီး ထိုကိစ္စကို အလွန့်အလွန်အထိ မလိုက်ခဲ့ပေ။ ယင်းမိသားစုဆီမှ လျော်ကြေးကိုလည်း မတောင်းခံခဲ့သဖြင့် ကိစ္စက ထိုမျှနှင့်သာပြီးဆုံးသွားခဲ့သည်။

အားလုံးက နစ်နာသူကို သနားကြင်နာခြင်းများပြသခဲ့ကြပြီး အလွန်ခွင့်လွှတ်နိုင်သည့်အတွက် သူနှင့်သူ့မိသားစုကို ချီးကျူးခဲ့ကြသည်။ ရလဒ်အနေဖြင့် သူတို့က ယင်းမင်ကျန်းကို ယခင်ကထက် ပို၍ ဖယ်ကြဉ်ခဲ့ကြသည်။

သူက သေချာစာမလုပ်ဘဲ သူများဆီကတောင်မှ ခိုးယူတတ်နေပြီ သူကြီးလာလျှင် သူ့အဖေလို ထောင်ထဲမှာအဆုံးသတ်မှာတဲ့လေ...။

ရှုနဉ်က ထိုထင်မြင်ချက်များကို အကြိမ်ပေါင်းမရေတွက်နိုင်အောင်ကြားခဲ့ရသည်။ ထိုစကားများကို မိဘများ၏ပါးစပ်များထံမှကြားခဲ့ရပြီး တခြားကလေးများ၏နှုတ်မှလည်း ကြားသိခဲ့ရသည်။ ထိုပတ်ဝန်းကျင်ပုံစံမျိုးတွင် ဗီလိန်ကိုဖယ်ကြဉ်ပြီး ထိုထင်မြင်ချက်များကို သူပင်ပြောဆိုခဲ့မိသည်။

မကြာသေးခင်ကမှ ဗီလိန်လေးက သူ့ကိုပြောခဲ့သောစကားများကို တွေးလိုက်မိသည်။ 

“မင်းငါ့ကို မမုန်းဘူးလား ငါ့အဖေက ထောင်ထဲသွားရလို့ ငါလည်းထောင်ထဲသွားရမှာပဲလို့ မင်းမပြောခဲ့ဘူးလား ဘာလဲ အခုမှ ရုတ်တရက်ကြီး အသိတရားဝင်လာတာလား” 

ထိုစကားလုံးများ၏နောက်ကွယ်မှာ နာကျင်မှုများကို ဘယ်လောက်တောင်ခံစားခဲ့ရသလဲဆိုတာကို သူရုတ်တရက် နားလည်လာသွားရသည်။

လူတွေအားလုံးပြောသလို အမှန်တရားကသာ မတူညီပါက ယင်းမင်ကျန်းက နစ်နာသူသာဖြစ်နေသည်ဆိုလျှင် သူဗီလိန်အပေါ်ကို ဘယ်လောက်တောင်နာကျင်မှုတွေ ပေးခဲ့ပြီးပြီလဲ။

သူတစ်ခါတုန်းက ယွမ်နှစ်ရာကို လျှောက်လမ်းတွင်ချထားခဲ့သော်လည်း ယင်းမင်ကျန်းက ကောက်ယူပြီး သူ့ကိုပြန်ပေးခဲ့သည်။ ထိုအချိန်မှစ၍ ရှုနဉ်က ယင်းမင်ကျန်းက ခိုးယူမည့်သူမျိုးမဖြစ်နိုင်မှန်း သံသယဖြစ်ခဲ့ပြီးဖြစ်သည်။

သူဒီနေ့ကြားခဲ့မြင်ခဲ့ရပုံများအရ ခုနက လူကြီးရဲ့ပုံစံက…

ယင်းမင်ကျန်းဆီမှာ ဘာတွေဖြစ်ခဲ့မလဲဆိုတာကိုတွေးရင်း ရှုနဉ် ကြောက်ရွံ့သွားရသည်။ သူ့လက်များကပင် စတင်၍ တုန်လှုပ်လာ၏။

သူမသိဘူး။ သူ အဲ့ဒီလူကြီးလက်က လွတ်အောင်ပြေးနိုင်ခဲ့ရဲ့လား။

သူထိုအတွေးကို ဆက်မတွေး၀ံ့တော့ပေ။

ယင်းမင်ကျန်းက ထိုအရွယ်တုန်းက ကလေးသာရှိသေးသည်။ လူကြီးတစ်ယောက်ကို သူဘယ်လိုများအနိုင်ယူနိုင်ပါ့မလဲ။

“ရှုနဉ်”

ကျိုးကျွမ်၏အသံက ရှုနဉ်ကို အသိတရားပြန်ဝင်လာစေသည်။ သူက ခေါင်းမော့ကြည့်လိုက်သောအခါ ကျိုးကျွမ်က ဈေးဝယ်လာသောအိတ်ဖြင့် လျှောက်လာကြောင်းတွေ့လိုက်ရပြီး သူမမျက်နှာပေါ်တွင်လည်း မျှော်လင့်ချက်အပြည့်နှင့်ဖြစ်နေသည်။

ရှုနဉ်က ထရပ်ပြီး သူမကို နွားနို့နှင့် အာဟာရရှိသောဖြည့်စွက်စာများ ကမ်းပေးလိုက်သည်။

“ဒါတွေအားလုံးက ယင်းမင်ကျန်းအတွက်… သူ့ကို မနက်တိုင်းနွားနို့သောက်ခိုင်းပြီး ညဘက်မှာ ကယ်ဆီယမ်ဆေးတိုက်နော်” 

ရှုနဉ်က လေးလံစွာဖိပြောလိုက်သည်။ 

“တစ်ချိန်တည်းမှာ အများကြီးမသောက်ခိုင်းပါနဲ့ အဲဒါက ကယ်ဆီယံဓာတ်တွေများသွားလိမ့်မယ်”

“သူက နွားနို့မသောက်ဘူး” ကျိုးကျွမ်က ပြောသည်။

“သောက်ပါတယ်” ရှုနဉ်က ကြားဖြတ်ပြောလိုက်သည်။

“သူက မသောက်ဘူးလို့ပြောတယ်…”

ရှုနဉ်က သူမ တကယ်နားမလည်တာလား၊ ဟန်ဆောင်နေတာလားဆိုတာကို မသိတော့ချေ။ 

“သူအဲဒီလိုပြောတာက ခင်ဗျားတို့ရဲ့ငွေရေးကြေးရေးအခြေအနေကို ထည့်စဉ်းစားပေးလို့ပဲ နားလည်လား”

ကျိုးကျွမ်က အေးခဲသွားရသည်။

ရှုနဉ်က သက်ပြင်းချလိုက်သည်။ ကလေးတစ်ယောက်က စဉ်းစားချင့်ချိန်နိုင်စွမ်းရှိလေ၊ လျစ်လျူရှုခံရဖို့ ပိုလွယ်ကူလေသာဖြစ်သည်။

တချို့သောကလေးများက သူတို့မိသားစုမှာ အခက်အခဲဖြစ်နေမှန်းသိသည့်အတွက် စားစရာမုန့်များနှင့် အဝတ်အစားအသစ်များကို မကြိုက်နှစ်သက်ကြောင်း တမင်တကာပြောတတ်ကြသည်။

သို့သော် အမှန်တကယ်တွင်တော့ ဘယ်ကလေးက စားစရာမုန့်နှင့် အဝတ်အစားအသစ်များကို မကြိုက်ဘဲနေပါ့မလဲ။

ထိုသည်က သာမာန်သာဖြစ်သော်လည်း ကျိုးကျွမ်က ဘာလို့များ အံ့ဩနေရသလဲ။

ရှုနဉ်က တည်ကြည်စွာပြောလိုက်သည်။ 

“ကျွန်တော်ဒီနေ့ သူ့ကို နို့ဗူးပေးခဲ့တာ သူသောက်တယ်… သူမသောက်ဘူးဆိုရင်…”

ရှုနဉ်က ခေါင်းမော့၍ ကျိုးကျွမ်ကိုကြည့်လိုက်သည်။ 

“နွားနို့သောက်ပြီး ကယ်ဆီယမ်ဆေးပြားသောက်တာက သူ့ကိုအရပ်ပိုရှည်စေမှာလို့ပြောလိုက်… ပြီးတော့ အာဟာရရှိတာတွေစားတာက သူ့ကိုပိုပြီးသန်မာစေမှာမို့ ရန်ဖြစ်ရင်တခြားသူတွေကို ကောင်းကောင်းရိုက်နိုင်လိမ့်မယ်လို့”

ရှုနဉ်၏ ရုတ်တရက်ပြောင်းလဲသွားသောပြောဆိုပြုမူပုံကြောင့် ကျိုးကျွမ်က ဖိနှိပ်ခံလိုက်ရသလိုခံစားရသဖြင့် သူမက အလိုအလျောက် ခေါင်းညိတ်မိလိုက်သည်။ 

ထို့နောက် သူမက ချီတုံချတုံဖြင့်မေးလိုက်သည်။ 

“ဒါတွေအားလုံးက လှူတာလား”

“ဟုတ်တယ်” ရှုနဉ်က အေးစက်စွာပြောလိုက်သည်။

“အလှူရှင်ကလည်း ဒီလိုပစ္စည်းတွေကိုလှူတာပဲလား” 

ကျိုးကျွမ်က တစ်ခုခုထူးဆန်းတာကိုခံစားမိပြီး စိတ်မသက်မသာဖြစ်သွားမိသည်။

ရှုနဉ်က တခြားမေးခွန်းနှင့်တုံ့ပြန်လိုက်သည်။ 

“ဘယ်သူလှူလဲဆိုတာ အရေးကြီးလို့လား”

ပစ္စည်းများကိုကြည့်နေသောကျိုးကျွမ်က ရုတ်တရက် ရပ်တန့်သွားသည်။

ရှုနဉ်က အသက်ပြင်းပြင်းရှုလိုက်ပြီး “ဘာပဲဖြစ်ဖြစ် ကိုယ်တိုင်ဝယ်ထားသလိုပေးလိုက်ပါ ယင်းမင်ကျန်းကို ကျွန်တော်ပြောသလိုပြောဖို့ မမေ့နဲ့ဦး”

ကျိုးကျွမ်က မျက်မှောင်ကြုတ်ပြီး မျက်ခွံက အနည်းငယ်တွန့်လှုပ်သွားခဲ့သည်။ ထို့နောက် သူမက ခေါင်းညိတ်ပြီး နွားနို့နှင့် အာဟာရဖြည့်စွက်စာများကိုယူကာ လှေကားဆစ်ချိုးအတိုင်းထွက်သွားတော့သည်။

“ခဏလေး”

ရှုနဉ်က သူမကိုတားလိုက်သည်။

ကျိုးကျွမ်က လှည့်ကြည့်လာသည်။ သူမ၏ဆံပင်ထိပ်ဖျားလေးက နားရွက်နားကိုပြေကျသွားသဖြင့် ဖရိုဖရဲဖြစ်ကာ မျက်တွင်းကျသည့်ပုံစံဖြစ်သွားစေသည်။

ရှုနဉ်က သူမ ဘဝတစ်လျှောက်လုံး အရိုက်နှက်ခံခဲ့ရသောအမျိုးသမီးကိုကြည့်ကာ မေးလိုက်သည်။ 

“လွန်ခဲ့တဲ့နှစ်တွေတုန်းက ဒီရပ်ကွက်မှာ ခိုးယူလုယက်မှုဖြစ်ခဲ့တယ် ယင်းမင်ကျန်းက လူတစ်ယောက်ရဲ့အိမ်ထဲကိုဝင်ပြီး တစ်ခုခုခိုးခဲ့တယ်”

ကျိုးကျွမ်က ကုန်စုံအိတ်များကိုဆုပ်ကိုင်ထားသောလက်အား ပိုတင်းကျပ်လိုက်ကာ စိုးရိမ်စွာဖြင့်မေးသည်။ 

“မင်ကျန်း… သူထပ်ပြီးခိုးပြန်ပြီလား”

သူ့နှလုံးသားထဲတွင် ဒေါသစိတ်များက တဟုန်ထိုးစီးဆင်းလာခဲ့သဖြင့် ရှုနဉ်က အသံကိုမြှင့်ပြောလိုက်သည်။ 

“သူ့ကိုခိုးတယ်လို့ ကျွန်တော်ပြောမိလို့လား”

ကျိုးကျွမ်က ထိုအသံနှုန်းကြောင့် လန့်သွားကာ မျက်မှောင်ကြုတ်လိုက်သည်။ သူ့ကြောင့် အနည်းငယ် စိတ်မသက်မသာဖြစ်မိသော်လည်း ကြောက်ရွံ့မှုကို အသားကျနေသည့်အတွက် သတ္တိနည်းစွာဖြင့်သာ ကလေးကိုပြန်မတော်လှန်နိုင်ပေ။ ထို့ကြောင့် သူမက တိတ်ဆိတ်စွာနေလိုက်သည်။

သူမ၏ပုံစံကိုတွေ့တော့ ရှုနဉ်က အသက်ပြင်းပြင်းရှုကာ မေးလိုက်သည်။ 

“အဲဒီတုန်းက ယင်းမင်ကျန်းက တကယ်ပဲ အဲဒီလူဆီက ခိုးခဲ့တာလား ခင်ဗျားကို တခြားအကြောင်းပြချက်ပေးခဲ့သေးလား”

ကျိုးကျွမ်က ခေတ္တမျှ ကြက်သေသေသွားရသည်။ အရမ်းကြာနေပြီဖြစ်သည့်ကိစ္စကို အခုမှဘာလို့မေးနေရလဲဆိုတာကို သူမက နားမလည်သည့်ပုံစံဖြစ်နေ၏။

“ဒါက နောက်ခံအကြောင်းစုံစမ်းတာပါ” ရှုနဉ်က ရှင်းပြလိုက်သည်။ 

“လှူတဲ့သူက ဒီအကြောင်းကိုကြားလို့ ယင်းမင်ကျန်းကိုထပ်ပြီး ထောက်ပံ့ပေးရမလား မပေးရဘူးလားဆိုတာကို တုံ့ဆိုင်းနေကြတာ”

ကျိုးကျွမ်က စိတ်ပူသွားရသည်။ “အဲဒါက…”

ရှုနဉ်က သူမနားကို ခြေလှမ်းလှမ်းလိုက်သည်။ 

“သူတစ်ခုခုခိုးထားရင် သူ့ဆီမှာခိုးထားတဲ့ဟာရှိမှာပဲမလား သူဘာကို ခိုးခဲ့တာလဲ”

ကျိုးကျွမ်က ပြောသည်။

“အဲဒါက… သူတို့ပြောတာက ဖုန်းနဲ့ကင်မရာလို့ပြောတယ်… အားလုံးပျက်စီးသွားပြီတဲ့”

“အိုး” ရှုနဉ်က ခေါင်းညိတ်လိုက်သည်။ 

“ဒါဆို သူက တကယ်ခိုးခဲ့တာပေါ့”

ကျိုးကျွမ်က အချိန်အတော်ကြာ တုံ့ဆိုင်းနေခဲ့သည်။ သို့သော်လည်း လှူဒါန်းရန်လာသည့်ကိစ္စဖြစ်သောကြောင့် ပြစ်မှုနှင့်ပက်သက်ပြီး လျင်မြန်စွာ ဝန်မခံနိုင်ပေ။

“ယင်းမင်ကျန်းက သူမခိုးခဲ့ဘူးလို့ပြောတယ် ဒါပေမယ့် အဲဒီလူက ခိုးတယ်တဲ့”

___

ဘာသာပြန်သူ၏ မှတ်ချက်:

ခေါင်းပုံဖြတ်အမြတ်ကြီးစားတဲ့သူတွေက အားနည်းတဲ့သူတွေကို သားကောင်အဖြ

စ်ဖမ်းစားနေကြတာ။ ယင်းမင်ကျန်းကလည်း အရမ်း အရမ်းကို အားနည်းတယ်။ ရပ်ကွက်ထဲကလူတွေက သူမလုပ်နိုင်တဲ့အရာအပေါ်မှာ ဖယ်ကြဉ်ခဲ့ကြတာကို အဲ့ဒီလူကအခွင့်ကောင်းယူထားတယ်။ သေစမ်း အဲဒီလူကြီး…

__