အပိုင်း၁၉၀

🍵Chapter 190

တွေ့လား အဲ့ဒါကတစ်ချက်ခုတ်နှစ်ချက်ပြတ်ဘဲ”

“ကျွန်တော် စိတ်လှုပ်ရှားနေတယ် မန်နေဂျာထုံ”

ထုံရွှယ်လူက လှည့်ကြည့်လိုက်ရာ ကောင်းဝေ့ဖျင်က အလွန်ဖြူဖျော့နေသည်ကိုမြင်လိုက်ရသည်။

“နေပါဦး နင်ကဘာလို့အရမ်းစိတ်လှုပ်ရှားနေတာလဲ”

ကောင်းဝေ့ဖျင်က စိတ်လှုပ်ရှားလွန်းသဖြင့် သွားများတောင် တဂတ်ဂတ်‌ရိုက်နေသည်။

“ခနနေကျ စင်ပေါ်တက်ရရင် လူတိုင်းကဝိုင်းကြည့်မှာကိုတွေးပြီး စိတ်လှုပ်ရှားလို့ပါ”

ထုံရွှယ်လူ :“ရဲဘော်ကောင်းဝေ့ဖျင်ရေ နင်အတွေးလွန်နေပြီ နင်ကလက်ထောက်ဘဲလေ သူတို့က နင့်ကိုကြည့်နေမှာမဟုတ်ဘူး၊ ကြည့်မယ့်ကြည့် ငါ့ကိုဘဲကြည့်ကြမှာပေါ့”

ကောင်းဝေ့ဖျင်“……”

ထုံရွှယ်လူ :“ဘယ်လိုလဲ သက်သာသွားပြီလား စိတ်လှုပ်ရှားနေတုန်းဘဲလား” 

ကောင်းဝေ့ဖျင်က ခေါင်းညိတ်ပြသည်။

“သက်သာသွားပြီ ဒါပေမယ့်စိတ်လှုပ်ရှားနေတုန်းဘဲ”

ထုံရွှယ်လူ :“ဒီမှာ ငါလုပ်သလိုလိုက်လုပ် အသက်ပြင်းပြင်းရှူတဲ့လေ့ကျင့်ခန်းလုပ်ကြမယ်..

ရှူသွင်းမယ်.......ရှူထုတ်မယ် ...ရှူသွင်းမယ် ဗိုက်နဲ့ရှူပြီး စိတ်ကိုအေးအေးထား ရင်ဘတ်နဲ့မရှူနဲ့”

ကောင်းဝေ့ဖျင်က ထုံရွှယ်လူပြောသည့်အတိုင်း ရှူသွင်းရှူထုတ်လုပ်ကြည့်လိုက်သည်။သူ့ဗိုက်က ပိန်လိုက်ဖောင်းလိုက်ဖြစ်နေ၏။

? ? ?

သူတို့နားမှသူများက ဦးနှောက်ခြောက်သွားသည်။

ဘာလုပ်နေကြတာလဲ။

မသိတဲ့သူဆိုရင် ကလေးမွေးနေတယ်လို့ ထင်တော့မယ်။

အကြိမ်အနည်းငယ်လောက် ရှူသွင်းရှူထုတ်လုပ်ပြီးသောအခါ ကောင်းဝေ့ဖျင်ကအတော်လေး စိတ်ငြိမ်သွားသည်။ အနည်းဆုံးတော့ သူ့လက်များက မတုန်တော့ပေ။

ထုံရွှယ်လူ :“နောက်ပိုင်းကျ စိတ်လှုပ်ရှားနေတုန်းဘဲဆိုရင် ဘေးနားမှာဘဲရပ်နေ ဘာမှမလုပ်နဲ့”

ကောင်းဝေ့ဖျင်တစ်ယောက် စိတ်လှုပ်ရှားပြီး အမှားလုပ်သည်ထက်စာလျှင် သူမက အချိန်အနည်းငယ်ယူပြီး သူမဘာသာဟိုပြေးဒီပြေးလုပ်လိုက်ချင်သည်။

ကောင်းဝေ့ဖျင်က ‌အလွန်အမင်းတောင်းပန်လိုစွာပြောလာ၏။

“ကျွန်တော်တောင်းပန်ပါတယ် မန်နေဂျာထုံ ကျွန်တော်က အရမ်းကိုအသုံးမကျတာဘဲ”

ထုံရွှယ်လူ :“ကိုယ့်ကိုကိုယ်နားလည်တာ မဆိုးဘူး၊ တိုးတက်လာအောင်ကြိုးစား”

ကောင်းဝေ့ဖျင်က ခေါင်းတရဆတ်ငြိမ့်ပြလာသည်။

ထုံရွှယ်လူက ပြိုင်ပွဲအတွင် ဟင်းနှစ်မျိုးချက်ပြုတ်ရမှာဖြစ်သည်။ အသားဟင်း၊ အရွက်ဟင်း၊ သရေစာများတောင်ဖြစ်နိုင်သည်။ ပြိုင်ပွဲဝင်များက ကိုယ့်ဘာသာဆုံးဖြတ်ရမှာဖြစ်သည်။

မည်သို့ပင်ဖြစ်စေ ဤအချိန်တွင် လူအများစုက အသားကိုသာချက်ပြုတ်ကြသည်။ အဆုံးတွင် အရွက်များ၊ သွားရေစာများဖြင့်ပြုလုပ်နိုင်သည့်ဟင်းပွဲမှာသိပ်မရှိပေ။ အချိုတည်းစရာအတွက်မူ ယခုကာလတွင် လူများက အချိုပွဲကို အရမ်းမြင့်မြင့်မားမား မတွေးကြပေ။

ပထမအုပ်စုအတွက် အချိန်သည် တစ်နာရီခွဲအကြာတွင် အချိန်စေ့သွားသည်။

စားဖိုမှူးတိုင်းက လုပ်နေသည်များကို ရပ်လိုက်ကြသည်။ တစ်ယောက်ဆိုလျှင် အလွန်စိတ်လှုပ်ရှားနေ၍ ပန်းကန်ခွဲမိသွားကာ ဆော့စ်ကိုရှုပ်ယှက်ခပ်သွားစေသည်။ ရလဒ်အနေဖြင့် သူက ဒုတိယဟင်းလျာကိုပြီးအောင် မချက်နိုင်တော့ပေ။

ထိုစားဖိုမှူးက တုန်လှုပ်နေကာ သူရှူံးပြီးမှန်း သိနေသည်။

ပြိုင်ပွဲဝင်များ၏ဟင်းပွဲများကို ဒိုင်များဆီသို့ယူသွားကာ ဒိုင်ခုနှစ်ယောက်က မြည်းကြည့်ပြီး အမှတ်ပေးလာကြသည်။

ဒိုင်တစ်ယောက်က ဆယ်မှတ်အထိပေးနိုင်ကာ ပထမအုပ်စုမှ တတိယစားဖိုမှူးသည် အမြင့်ဆုံး အမှတ်ငါးဆယ်ရခဲ့သည်။

ထိုစားဖိုမှူးက အလွန်ပျော်နေသဖြင့် ‌ပြန်ဆင်းလာသောအခါ သူ့မျက်နှာက နီရဲနေသည်။

ထို့နောက် ဒုတိယပြိုင်ပွဲစတင်သည်။ ဒီတစ်ခေါက်တွင် ကြယ်နီစားသောက်ဆိုင်မှစားဖိုမှူးလည်းပါ၏။

ထုံရွှယ်လူက ကြယ်နီစားသောက်ဆိုင်မှ စားဖိုမှူးကိုသာ အာရုံစိုက်ထားလိုက်သည်။

သူမထင်ထားသလိုပင် ကြယ်နီစားသောက်ဆိုင်မှစားဖိုမှူးသည် သူတို့၏နာမည်ကြီးဟင်းလျာဖြစ်သည့်  ထောပတ်ဂဏန်းကြော်၊ တို့ဟူးအချဉ်ဖောက်ဝက်သားဟင်းဖြင့် ပြိုင်လာသည်။

ကြယ်နီစားသောက်ဆိုင်မှစားဖိုမှူးသည် နာမည်ကြီးစားဖိုမှူး၏မျိုးဆက်နှင့်တူ၏။ သူစင်ပေါ်ကို ရောက်သွားသည်နှင့် အရာအားလုံးကို ဘေးဖယ်ပြီး ချက်ပြုတ်ရာတွင်သာ အာရုံစိုက်ထားလိုက်သည်။

စိတ်ခံစားချက်ကိုဖော်ပြနေသူဟူ၍ စားဖိုမှူး၏လက်ထောက်သာဖြစ်သည်။လက်ထောက်က လူငယ်တစ်ယောက်ဖြစ်ကာ အသက်၂၀လောက်ရှိ၏။ သူ့ပုံစံသန့်ရှင်းကာ စားဖိုမှူးနှင့် အနည်းငယ်ဆင်၏။ သူက စားဖိုမှူး၏သားဖြစ်လောက်သည်။

ချက်ပြုတ်ရသည်ကိုကြည့်ရသည်မှာ ပျော်စရာကောင်း၏။

ထုံရွှယ်လူက အသိအမှတ်ပြုစွာကြည့်နေပြီး သူ့ဆီမှတစ်ခုခုသင်ယူနိုင်ရန် ရယ်ရွယ်ထားပေသည်။

နာရီဝက်ကြာသောအခါ ပထမဟင်းလျာဖြစ်သည့် တို့ဟူးအချဉ်ဖောက် ဝက်သားဟင်းက ကျက်သွားသည်။

ထိုဟင်းကို အချဉ်ဖောက်ထားသည့် တို့ဟူး၊ ဝက်ဗိုက်သားတို့ဖြင့် ပြုလုပ်ထားသည်။ ပြုလုပ်ရန်မခက်သော်လည်း ၎င်း၏ပုံစံ၊ အနံ့နှင့် အရသာတို့ကို အရသာရှိအောင်လုပ်ရန် ခက်ခဲပေသည်။

၎င်းက အလွန်တကူပုံပျက်သွားနိုင်ကာ ဆီအစ်စေသောဟင်းလျာမျိုးလည်းဖြစ်သည်။

ကြယ်နီစားသောက်ဆိုင်မှစားဖိုမှူးလုပ်ထားသော ဟင်းလျာသည် အနီရောင်တောက်နေ၏။ အဝေးမှကြည့်လျှင်တောင် ထိုဟင်းလျာက နူးညံ့နေပြီး အလွန်ဆီအစ်နေမှာမျိုး မဖြစ်နေသည်ကို ပြောနိုင်၏။

ချက်ပြီးသောအခါ ဒိုင်များဆီသို့ယူသွားလိုက်သည်။

နောက်ထပ်နာရီဝက်ကြာသွားပြီးနောက် ဒုတိယတစ်ခုဖြစ်သည့် ထောပတ်ဂဏန်းကြော်ရလာသည်။

ဂဏန်းသားက မွှေးကြိုင်ကာ‌ စေးပျစ်နေ၏။ အနံ့ရရုံဖြင့်တင် ဗိုက်ဆာသွားစေနိုင်သည်။ လူတိုင်းက မထိန်းချုပ်နိုင်စွာ တံတွေးမြိုချလိုက်ကြသည်။

အားကောင်းသည့်ပြိုင်ဘက်ရှိနေသဖြင့် အခြားပြိုင်ပွဲဝင်များက ဖိအားများလာကြသည်။

လူတိုင်းမျှော်လင့်ထားသလိုပင် ကြယ်နီစားသောက်ဆိုင်မှစားဖိုမှူးက ၆၇မှတ်ရရှိခဲ့သည်။

လူအုပ်က အံ့အားတကြီးအော်ဟစ်လိုက်ကြသည်။ကြယ်နီစားသောက်ဆိုင်က အများဆုံးဖြစ်နိုင်သည့်အမှတ်၇၀တွင် ၆၇မှတ်ရခဲ့ပေသည်။

“ပြိုင်ပွဲကို ရပ်လိုက်လို့တောင်ရနေပြီ သေချာပေါက်ကို ကြယ်နီစားသောက်ဆိုင်ကနိုင်သွားပြီ”

“ငါလည်း အဲ့လိုဘဲထင်တယ်၊ ကြယ်နီစားသောက်ဆိုင်က တည်ရှိလာတာ အရမ်းကြာနေပြီ ငါကြားတာတော့ 1800ခုနှစ်တွေတည်းက ရှိလာတာဆို၊ အဲ့ဒါက အရမ်းးးကြီးကိုမြင့်လွန်းတယ်”

“သူတို့ဆီမှာ ချက်ပြုတ်နည်းအများကြီးရှိတယ်လို့ ငါကြားဖူးတယ် အဲ့ဒါတွေအားလုံးက ယန်မျိုးနွယ်ရဲ့ဘိုးဘေးတွေဆီက ဆင်းသက်လာတာတဲ့”

စကားမျိုးစုံကိုကြားနေရကာ တစ်စုံတစ်‌ယောက်က ထုံရွှယ်လူက ခနခနလှမ်းကြည့်လာသည်။ ဒီနေ့တွင် ထုံရွှယ်လူနိုင်မည်ဟု ဘယ်သူကမှမထင်ကြပေ။

ထုံရွှယ်လူက မကြားသလိုဟန်ဆောင်လိုက်သည်။ သူမက တည်ငြိမ်နေဆဲဖြစ်သည်။

ကောင်းဝေ့ဖျင်က စိတ်လှုပ်ရှားလွန်းသဖြင့် မူးတောင်လဲချင်လာသည်။

ထုံရွှယ်လူကိုကြည့်လိုက်သောအခါ သူမကတည်ငြိမ်နေသည်ကိုမြင်သဖြင့် အလွန်စိတ်သက်သာရာရသွားသည်။သူကအသက်ပြင်းပြင်းရှူပြီး စိတ်ငြိမ်အောင်လုပ်လိုက်သည်။

အုပ်စုသုံးအတွက် အချိန်ကျလာပြီဖြစ်သည်။

ထုံရွှယ်လူက ကောင်းဝေ့ဖျင်ကိုခေါ်ကာ သူမအတွက်သတ်မှတ်ထားသည့်နေရာသို့ သွားလိုက်သည်။

သူမက ကောင်းဝေ့ဖျင်ကို သူတို့၏ပါဝင်ပစ္စည်းများ၊ အရံဟင်းလျာနှင့် မီးဖိုချောင်သုံးပစ္စည်းများကို စစ်ဆေးခိုင်းလိုက်သည်။ ပြသနာတစ်ခုခုတွေ့ပါက အခုပြောနိုင်ပေသည်။

မဟုတ်ပါက သူမ၏အမှတ်ကို ထိခိုက်စေလိမ့်မည်။

ကံကောင်းစွာဖြင့် ဘယ်သူကမှဤလိုပြိုင်ပွဲမျိုးတွင် ရူးမိုက်လောက်သည်အထိ မတုံးပေ။ သူမက အရာအားလုံးအစီအစဉ်တကျဖြစ်နေသည်ကို မြင်သောအခါ စတင်ချက်ပြုတ်လိုက်သည်။

သူမချက်မည့်အရာများမှာ ရတနာရှစ်ပါးဘဲသားထမင်းနှင့် အသားစတိခ်(steak)ဖြစ်သည်။

ရတနာရှစ်ပါးဘဲသားထမင်းသည် တရုတ်လူမျိုးဒိုင်များအတွက်ဖြစ်သည်။ Steakက သူမကွဲထွက်နေမည့်အရာပင်။

သူမက သေချာတွေးကြည့်ပြီးသားဖြစ်သည်။

နိုင်ငံခြားသားဧည့်သည်ကို ဧည့်ခံရမည်ဆိုလျှင် Steakက မရှိမဖြစ်ပင်။

မော်ဒန်ခေတ်တွင် နိုင်ငံခြားသားများက တရုတ်အစားအစာကို သဘောကျကြသော်လည်း အခုအချိန်တွင်မူ ထိုသို့မဟုတ်ပေ။ ‌ကမ္ဘာကြီးက တရုတ်လူမျိုး၊ တရုတ်အစားအစာများနှင့် မရင်းနှီးသေးပေ။

သူတို့က တရုတ်ပြည်သို့အလည်လာသောအခါ တရုတ်အစားအစာများကို အသားမကျသဖြင့် သူတို့၏ကိုယ်ပိုင်အစားအစာမျိုးကိုသာ ပိုတောင့်တကြလိမ့်မည်။

ထို့ကြောင့် စားသောက်ဆိုင်တစ်ဆိုင်က Steakရောင်း၊မရောင်းဆိုသည်မှာ အရေးကြီးလာခဲ့သည်။

သူမက အနည်းငယ်လှည့်စားထားသော်လည်း ဘာမှမဖြစ်ပေ။အချစ်နှင့်စစ်တွင် မတရားတာဟူ၍မရှိပေ။သူမက ဘာအမှားမှမလုပ်ထားဘူးဟု ခံစားမိသည်။

လူတိုင်းက ရတနာရှစ်မျိုးဘဲသားထမင်းကိုသိကြသော်လည်း Steakတဲ့လား။

Steakကဘာကြီးလဲ။

အသားလား၊ အဲ့ဒါကတကယ်စားလို့ရတာလား။

အကဲဖြတ်ဒိုင်နေရာတွင်ထိုင်ကာ ဘာတစ်လုံးမှမပြောခဲ့သည့် လူကြီးမင်းကော်၏မျက်လုံးများက အရောင်တောက်လာသည်။

ထုံရွှယ်လူက အခြားသူများ၏အကြည့်နှင့် စကားသံများကို ဂရုမစိုက်ပေ။သူမက ချက်ပြုတ်ရာတွင်သာ အာရုံစိုက်ထားလိုက်သည်။

ရတနာရှစ်ပါးဘဲသားထမင်းသည် ဘဲသား၊ကောက်ညှင်းဆန်၊ အဆီနည်းသည့်အသား၊ ထောပတ်၊ ရှီတခီမှိုနှင့် ဘဲကျောက်ကပ်အစိမ်းတို့ပါဝင်သည်။

ဘဲကိုသန့်ရှင်းပြီးသားဖြစ်ကာ ကောက်ညှင်းဆန်ကိုလည်း ဆေးပြီးသားဖြစ်သည်။ သူမက ချက်ချင်းစနိုင်ပြီဖြစ်သည်။

တစ်နာရီကြာပြီးနောက် ကြွပ်ရွနေအောင်ချက်ထားသည့် ရတနာရှစ်ပါးဘဲသားထမင်းကအဆင်သင့်ဖြစ်လာသည်။

ဘဲသားက အပြင်ဘက်တွင်ကြွပ်ရွနေသော်လည်း ခြမ်းကြည့်လိုက်သောအခါ အသားမှအရည်များထွက်လာပြီး အနံ့မွှေးလာသည်။

ဘဲကို ပန်းကန်ထဲသို့ဂရုတစိုက်ထည့်လိုက်ပြီး နောက်တစ်ချပ်ထပ်လှီးလိုက်ရာ အဆာပလာအားလုံးပေါ်လာပြီး အနံ့ကပိုမွှေးလာသည်။

လူတိုင်းက တံတွေးမြိုချလိုက်မိကြကာ သူတို့ဗိုက်များက အသံမြည်လာသလိုပင်။

“အရမ်းမွှေးလိုက်တာ၊ ဒါကကြယ်နီစားသောက်ဆိုင်ရဲ့ တို့ဟူးအချဉ်ဖောက်ဟင်းကိုတောင် ယှဉ်နိုင်လောက်တယ်”

“ဟင့်အင်း ငါကတော့ဒါက ပိုကောင်းတယ်လို့ထင်တယ်၊ တို့ဟူးအချဉ်ဖောက်ဝက်သားဟင်းက အရမ်းရိုးရှင်းလွန်းတယ်၊ သူ့မှာပါတာဆိုလို့ ဝက်ဗိုက်သားနဲ့ အချဉ်ဖောက်‌တို့ဟူးဘဲပါ‌တာလေ”

“ငါလည်း သဘောတူတယ်၊ အဲ့ဒီဘဲသားက လုံးဝပြည့်စုံတဲ့အနေအထားထိရောက်အောင် ချက်ထားတာ၊ တစ်ကိုက်လောက်စားကြည့်ရဖို့ ဘာမ‌ဆိုပေးနိုင်တယ်”

ကြယ်နီစားသောက်ဆိုင်မှ စားဖိုမှူးနှင့်တပည့်က ဤစကားများကိုကြားသောအခါ မှုန်မှိုင်းလာကြသည်။

ဒိုင်များက အသား တစ်ယောက်တစ်တုံးစီယူစားလိုက်ကြသည်။ ဘဲရေခွံကကြွပ်ရွကာ အသားကနူးညံ့နေပြီး အဆာသွပ်များဖြင့်စားလိုက်‌ရသောအခါ အရသာက နောက်တစ်ဆင့်ရောက်သွားသည်။

၎င်းက လူကိုပိုပိုပြီးစားချင်လာစေသည်။

ထုံရွှယ်လူက Steakအနည်းငယ်လုပ်လိုက်သည်။

သူမက steakကို medium၊ medium well နှင့်လုံးဝအကျက်ဆိုပြီး သုံးမျိုးလုပ်လိုက်သည်။

သူမလုပ်သည်ကိုမြင်သောအခါ လူတိုင်းက ကြက်သေသေသွားကြသည်။

“မန်နေဂျာထုံက ဘာလုပ်နေတာလဲ၊ မင်းအဲ့ဒါကိုမြင်လား အသားက သွေးတောင်ထွက်နေသေးတယ် အဲ့ဒါကို တကယ်စားလို့ရပါ့မလား”

“သူမက အရမ်းမြန်မြန်ကို လုပ်နေတာ”

“ဟုတ်တယ်လား ငါကတော့ ရိုးရာအစားအစာက ပိုကောင်းတယ်လို့ဘဲထင်တယ်”

ဒိုင်များက သွေးရောင်ပေါက်နေသေးသည့် အသားကိုကြည့်ကာ ဘယ်သူမှစမ်းမစားရဲကြပေ။

လူကြီးမင်းကော်က ရုတ်တရက် စကားပြောလာသည်။

“Steakကို မကျက်တကျက်အနေအထားမျိုးနဲ့ စားလို့ရတယ်ဆိုတာကို မန်နေဂျာထုံက ဘယ်လိုသိတာလဲ”

ထုံရွှယ်လူက ပြုံးပြလိုက်သည်။

“ကျွန်မဘယ်မှာဖတ်ဖူးတာလဲဆိုတာတော့ မေ့သွားပါပြီ၊ အဲ့ဒီထဲမှာ နိုင်ငံခြားသားတွေက သွေးကိုသောက်ပြီး သားမွှေးကိုစားကြတယ်လို့ရေးထားတယ်၊ ကျွန်မက သူတို့တွေက မကျက်တကျက်အစာအစားကို ကြိုက်လောက်တယ်လို့ တွေးမိလို့ လုပ်လိုက်တာပါ”

သူမက လျှောက်ပြောနေခြင်းဖြစ်သည်။ ဒါပေမယ့် ဒီလိုမှမဟုတ်ရင်လည်း သူမက steakကိုမကျက်တကျက်အနေအထားထိလုပ်လို့ရတယ်ဆိုတာကို ဘယ်လိုရှင်းပြရမှာလဲ။

အခုချိန်တွင် နိုင်ငံခြားစာအုပ်များကို ခွင့်မပြုသေးသဖြင့် သူမက အံကြိတ်လိမ်လိုက်ရသည်။

သဘာဝကျစွာပင် ‌လူကြီးမင်းကော်က မယုံပေ။

သို့သော် သူမကောင်လေးက သုတေသီဖြစ်သည်ကို လူတစ်ချို့က သိထားကြရာ သူမက သူမကောင်လေး‌ဌာနမှ နိုင်ငံခြားမှပြန်လာသည့်သူမှတစ်ဆင့် သိ‌နေသည်ဟု ထင်သွားကြသည်။

ထိုသူက အလွန်ထူးခြားသောအနေအထားတွင်ရှိသဖြင့် ဘယ်သူမှအပြစ်ပြောနိုင်မည်မဟုတ်ပေ။

လူကြီးမင်းကော်က ရှင်းပြလာသည်။

“ငါငယ်ငယ်တုန်းက နိုင်ငံခြားမှာပညာသွားသင်ခဲ့တုန်းက နိုင်ငံခြားက steakတွေကိုစားခဲ့ဖူးတယ်၊ ဒါက အဲ့တုန်းကစားခဲ့တာတွေနဲ့ အရသာတူတူဘဲ၊ မန်နေဂျာထုံက အသက်ငယ်ငယ်ဖြင့် ဒီလိုမျိုးအရသာရှိတာကိုလုပ်နိုင်တာ အတော်လေးအထင်ကြီးဖို့ကောင်းတယ်”

လူကြီးမင်းကော်၏ဝေဖန်ချက်ကိုကြားမှသာ အခြားဒိုင်များက သူတို့အမြင်ကျဉ်းသွားသည်ကို သဘောပေါက်သွားကြသည်။

သူတို့က အမြင်မကျဉ်းကြောင်းပြရန်အတွက် steakကို စားရန် သတ္တိမွေးလိုက်သည်။သူတို့က လူကြီးမင်းကော်၏သဘောထားအတိုင်းပင် steakကိုအမှတ်မြင့်မြင့်ပေးလာကြသည်။

ထုံရွှယ်လူက စုစုပေါင်းအမှတ်၇၀တွင် ၆၈မှတ်ရသည်။ ၎င်းကကြယ်နီစားသောက်ဆိုင်ထက် တစ်မှတ်မြင့်၏။

အမှတ်ထွက်လာသောအခါ လူတိုင်းက ကြက်သေသေသွားပြီး ကြယ်နီစားသောက်ဆိုင်မှစားဖိုမှူးများက ခြေဆောင့်ထွက်သွားကြသည်။

“မန်နေဂျာထုံ ဂုဏ်ယူပါတယ်၊ မင်းက ပြိုင်ပွဲဝင်‌တွေကြားထဲမှာမှ တစ်မူထူးချွန်နေတဲ့သူဘဲ”

“သူမက သေချာပေါက်ကိုထူးချွန်တာပါ၊ တရားမျှတမှုရှိရှိအနိုင်ရသွားတာ”

ထုံရွှယ်လူက လူတိုင်းကို နှိမ့်ချစွာ ကျေးဇူးတင်လိုက်ပြီး အလွန်ပျော်နေ၏။

ပထမရသွားခြင်းသည် လစာတိုးမည့်အပြင် စားသောက်ဆိုင်တွင် တယ်လီဖုန်းဆင်နိုင်တော့မည်ဟု ဆိုလို၏။

ဒါက သတင်းကောင်းဘဲ

🍵

ထုံရွှယ်လူပထမရသည့်သတင်းက လျင်မြန်စွာပျံ့သွားသည်။

အစိုးရစားသောက်ဆိုင်၏စီးပွားရေးကလည်း ပိုပြီးတိုးတက်လာသည်။ပေါက်ကွဲထွက်နေသည်ဟုတောင် ပြောလို့ရသည်။

စွင်းမောင်နှမနှစ်ယောက်က ဤအကြောင်းကိုကြားသောအခါ သူတို့မျက်နှာက ဒယ်အိုးဖင်လို့ မဲနက်သွားသည်။

စွင်းမန်ရို့ :“ တတိယအစ်ကို ရဲဘော်ထုံက အရမ်းထူးချွန်လိုက်တာ ကျွန်မတော့ နောက်ဆုတ်သင့်ပြီလို့ ထင်တယ်”

စွင်းဝူယန်:“ ဘာလို့နောက်ဆုတ်မယ်ဘဲပြောနေတာလဲ၊ စိတ်မပူနဲ့ ငါ့မှာအကြံရှိတယ်”

စွင်းမန်ရို့၏မျက်လုံးများက အရောင်တောက်လာသည်။

“ဟုတ်လား ဘာအကြံလဲ”

စွင်းဝူယန်:“ ပထမနေရာကို ကြယ်နီစားသောက်ဆိုင်ဘဲရသင့်တာ ၊ ဘာလို့ရှူံးသွားတာလဲဆိုတော့ ထုံရွှယ်လူက လှည့်စားခဲ့လို့လဲ အခုကြယ်နီစားသောက်ဆိုင်ကအဲ့ဒီသူက မကျေမနပ်ဖြစ်နေတာ”

“ငါယန်ကောင်းကျယ်ကိုသိတယ် စားဖိုမှူးရဲ့သား သူနဲ့ငါက နည်းနည်းရင်းနှီးတယ်၊ သူ့ကို ထုံရွှယ်လူနောက်လိုက်ဖို့ပြောပြီးသွားပြီ၊ သူနဲ့ထုံရွှယ်လူတွဲဖြစ်သွားရင် ထုံရွှယ်လူရဲ့ချက်ပြုတ်နည်းတွေက သူတို့အပိုင်ဖြစ်သွားပြီး နောက်ထပ်ပြိုင်ရတော့မှာမဟုတ်ဘူး”

စွင်းမန်ရို့က မျက်ခုံးပင့်လိုက်သည်။

“သူကလုပ်ချင်ပါ့မလား”

စွင်းဝူယန်က ဟက်ခနဲရယ်လိုက်သည်။

“သေချာတာပေါ့ အခုဆိုရင် သူက အဲ့ဒီဆိုင်ကိုနေ့တိုင်းသွားနေတာ၊ ငါတို့က သူတို့တွဲသွားမှာကိုစောင့်နေရုံဘဲ ပြီးရင် ဝမ်မိသားစုကို ထုံရွှယ်လူက လှေနံနှစ်ဖက်နင်းနေတယ်ဆိုပြီး ပြောပြလိုက်မယ်လေ အဲ့ဒါဆိုပြီးမသွားဘူးလား”

စွင်းမန်ရို့က တခစ်ခစ်ရယ်လိုက်သည် ။

“အဲ့ဒါက တကယ်ကို အကြံကောင်းဘဲ တတိယအစ်ကို”

“အဲ့လိုဘဲဖြစ်ရမယ်လေ”

ထုံရွှယ်လူသည် ပြိုင်ပွဲပြီးကတည်းက စားဖိုမှူး၏လက်ထောက်သည် သူမဆိုင်တွင် နေ့တိုင်းလာစားနေသည်ကို သတိပြုမိသွားသည်။

အစပိုင်းတွင် သူမက ဂရုမစိုက်သော်လည်း ထိုလူက သူမကိုအခွင့်သာတိုင်း စကားလာပြောကာ အိမ်ပြန်လိုက်ပို့မည်ဟုတောင် ပြောလာ၏။

ထုံရွှယ်လူက သူ့ကြောင့် စိတ်အနှောင့်အယှက်အဖြစ်မခံပေ။ သူမက ရဲတိုင်မည်ဟု ပြောလိုက်ကာ ထိုသူ့ကို ငြိမ်သွားစေသည်။

ထုံကျားမင်နှင့် ထုံကျားရှင်းတို့ ဤအကြောင်းကိုသိသောအခါ သူတို့က သူမအလုပ်ပြီးတိုင်းလာကြိုကြသည်။

တစ်ပတ်ကြာပြီးနောက်တွင် ဝမ်ရူကွေ့က ခွင့်ယူနိုင်ခဲ့ပြီး ထုံရွှယ်လူ၏အောင်မြင်မှုအကြောင်း သိသွားသည်။