MM Story Teller

အပိုင်း၁၉၇

Viewers 32k

🍵Chapter 197

ရှောင်ထျန်းသည် ယခုနှစ်တွင် အသက် ၁၉ နှစ်ရှိပြီဖြစ်သည်။ သူသည် ကျန်းမာရေးအကောင်းမွန်ဆုံးမဟုတ်သောကြောင့် အလယ်တန်းကျောင်းပြီးဆုံးကတည်းက မည်သည့်အလုပ်ကိုမှ မလုပ်ခဲ့ပေ။ ထို့ကြောင့် ဤအကြိမ်က သူ၏ပထမဆုံးအလုပ်ဖြစ်သည်။

ဟူလိကျူးသည် အထက်တန်းကျောင်းပြီးခဲ့ပြီး အထည်ချုပ်စက်ရုံတွင် ယာယီအလုပ်သမားအဖြစ် လုပ်ကိုင်ခဲ့သည်။ သူမသည် အတွေ့အကြုံရှိသူမဟုတ်သလို လူသစ်အလုပ်သမားလည်းမဟုတ်ပေ။

ထို့နောက် ထုံရွှယ်လူမှ မုန့်ချင်းချင်းနှင့် အခြားသူတို့ကို မိတ်ဆက်ပေးသည်။

လူတိုင်းက သူတို့ကိုယ်သူတို့ မိတ်ဆက်ပြီးသွားသည့်အခါ ထုံရွှယ်လူက " ကျွန်မတို့ လုပ်ဖော်ကိုင်ဖက်တွေဖြစ်လာဖို့ အခွင့်အ‌ရေးရှိတာက ကံကြမ္မာလို့ ပြောနိုင်ပါတယ်။ တစ်ချို့က အတွေ့အကြုံရင့် အလုပ်သမားတွေဖြစ်ပြီး အရင်က ကောင်းကောင်းလုပ်ခဲ့ဖူးတယ်။ ရှင်တို့ရဲ့အလုပ်ကျင့်ဝတ်က ဒီမှာ ဆက်ရှိနေမယ်လို့ ကျွန်မမျှော်လင့်ပါတယ် "

" အသစ်ဝင်လာတဲ့သူတွေကတော့ ရှင်တို့ရဲ့အရင်က စွမ်းဆောင်ရည်နဲ့ပတ်သက်ပြီး မသိပေမယ့် ရှင်တို့အားလုံးက မန်နေဂျာလင်းရဲ့ ဆွေမျိုးတွေဖြစ်ကြတယ်။ မန်နေဂျာလင်းက အလွန်အရည်အချင်းရှိသော ခေါင်းဆောင်တစ်ဦးပါ။ ဒါကြောင့် သူ့ရည်ညွှန်းတဲ့သူတွေကလည်း အရမ်းကောင်းမယ်လို့ ကျွန်မ ယုံကြည်ပါတယ် "

လူအားလုံးက ချီးကျူးခံရခြင်းကို သဘောကျကြပြီး အားလုံး ကျေနပ်ကြလေသည်။

ထုံရွှယ်လူက သူမလက်ကို စားပွဲပေါ်သို့ ရုတ်တရက် ရိုက်ချလိုက်ပြီး " ဒါပေမယ့် စည်းကမ်းတွေက လိုအပ်နေပါသေးတယ်။ ရှင်တို့က ဒီစားသောက်ဆိုင်မှာ အလုပ်လုပ်ရင် ကျွန်မရဲ့ စည်းကမ်းတွေကို လိုက်နာရပါလိမ့်မယ်။ ကောင်းကောင်းလုပ်ဆောင်နိုင်သူက ဆုချီးမြှင့်ခံရမှာဖြစ်ပြီး မလုပ်‌ဆောင်နိုင်သောသူက အပြစ်ပေးခံပါရမယ်။ ရှင်တို့ ဘယ်သူ့ဆွေမျိုးလဲ ဒါမှမဟုတ် ဒီမှာအလုပ်လုပ်နေတာ ဘယ်လောက်ကြာပြီလဲဆိုတာ ကျွန်မ ဂရုမစိုက်ဘူး။ ရှင်တို့အားလုံး စည်းမျဥ်းတွေကို လိုက်နာကြရပါလိမ့်မယ် "

အလုပ်သမားသစ်သုံးဦးနှင့် အလုပ်သမားဟောင်း သုံးဦးစလုံးက အလွန်တရားမျှတသည်ဟု ယူဆကြသည်။

ထုံရွှယ်လူသည် အလုပ်သမားဟောင်းများကို နှစ်ရှည်လများ လက်တွဲလုပ်ကိုင်ခဲ့သည့်အတွက် မျက်နှာသာပေးမည်ကို အလုပ်သမားအသစ်များက စိုးရိမ်နေကြသည်။

အလုပ်သမားဟောင်းများကမူ အထက်လူကြီးနှင့် ဆက်စပ်နေသောလူသစ်များအား မျက်နှာသာပေးမည်ကို စိုးရိမ်နေကြသည်။ အကယ်၍ ထိုသို့ဖြစ်လျှင် သူတို့က အလွန်စိတ်ပျက်ကာ မကျေမနပ်ဖြစ်ရလိမ့်မည်။

လူတိုင်းအတွက် တူညီသောစည်းမျဥ်းစည်းကမ်းများကို လိုက်နာခြင်းသည် အကောင်းဆုံးဖြစ်လိမ့်မည်။ မည်သူ့ကိုမှ မျက်နှာသာပေးမည် မဟုတ်သကဲ့သို့ မည်သူကမှ ထူးထူးခြားခြား ဆက်ဆံခံရမှုကို ရရှိနိုင်မည် မဟုတ်ပေ။

ထုံရွှယ်လူသည် သူတို့၏ပုံသဏ္ဍာန်များကို မြင်သောအခါ သူမ မှန်ကန်သောလုပ်ရပ် ပြုလုပ်ခဲ့ကြောင်း သိလိုက်သည်။

လူအများအပြားရှိသည့်အခါ တရားမမျှတမှုထက် ပိုဆိုးသည့်အရာ မရှိချေ။

ယနေ့မှစ ရှေ့လျှောက် တရားမျှတရန်အတွက် သူမ အစွမ်းကုန် ကြိုးစားရလေမည်။

ထုံရွှယ်လူသည် မုန့်ချင်းချင်း နှင့် ကောင်းချွန်းယွီဘက်သို့ လှည့်လိုက်သည်။ " ချင်းချင်း၊ ချွန်းယွီ၊ လိကျူးကို ထရိန်နင်စပေးလိုက်ပါ။ သူမရဲ့မေးခွန်းအားလုံးကို သေချာဖြေပြီး အကောင်းဆုံးလေ့ကျင့်ပေးပါ။ ကျွန်မတို့ရဲ့ ဆိုင်ဖွင့်ပွဲက လာမယ့်အပတ်မှာဖြစ်ပြီး ကျွန်မတို့ ကိုယ့်ကိုယ်ကိုယ် အရှက်ရမနေစေချင်ဘူ "

ကောင်းချွန်းယွီက ပြုံးပြီး " စိတ်မပူပါနဲ့ မန်နေဂျာ ထုံ။ ရဲဘော်ဟူကို ကောင်းကောင်း လေ့ကျင့်ပေးမယ် "

ဟူလိကျူးလည်း ထိုစကားကိုကြားသောအခါ သက်ပြင်းတစ်ချက်ချလိုက်သည်။

လုပ်ငန်းခွင်အေခြအနေအ‌ကြောင်း အလုပ်မ၀င်မီတွင် သူမကိုယ်တိုင် ပြင်ဆင်ခဲ့သည်။ ယခု မန်နေဂျာထုံက မည်မျှတရားမျှတပြီး လုပ်ဖော်ကိုင်ဖက်များက မည်မျှခန့် ကောင်းသည်ကို မြင်လိုက်ရ‌ေသာအခါ အလုပ်ခွင်အနိုင်ကျင့်ခံရမှုကို လုံးဝ စိတ်ပူစရာ မလိုတော့ဟု ခံစားလိုက်ရသည်။

ထိုသို့ပြောပြီးနောက် ထုံရွှယ်လူက စားဖိုမှူးလိန်ဘက်သို့ လှည့်လိုက်ပြီး " စာဖိုမှူးမုန့် က အချိန်တစ်ခုထိ အပြင်မှာ ရှိနေပါလိမ့်မယ်။ ကျွန်မအပြင် ရှောင်ကောင်းကလည်း အရင်တုန်းက ကျွန်မကို အများကြီး ကူညီပေးခဲ့ဖူးတယ်။ စားဖိုမှူးလိန် ရှင့်ရဲ့ ဟင်းချက်နည်းတွေကို ရေးထားပေးရင်ရော ဘယ်လိုလဲ။ ဒါဆို ကျွန်မတို့လည်း ရှင့်ရဲ့ ဟင်းပွဲတွေကို အတူလုပ်လို့ရတာပေါ့ "

စားဖိုမှူးလိန်က အကြိမ်ကြိမ် ခေါင်းညိတ်သည်။

" ကောင်းပြီ၊ ငါသူတို့ကို အကြံတစ်ချို့ ပေးလိုက်ပါရစေ "

စားသောက်ဆိုင်အသစ်ကို ရောက်လာပြီးနောက် အသုံးမဝင်ဖြစ်ရခြင်းထက် ပိုဆိုးသည့် အရာမရှိပေ။

ထုံရွှယ်လူသည် သူမကိုယ်တိုင် စားဖိုမှူးဖြစ်သောကြောင့် လိန်တယုံက သူ့ထံ၌ ဟင်းချက်ရန် နေရာမရှိမည်ကို စိုးရိမ်ခဲ့မိသည်။

ကြည့်ရသည်မှာ သူ အတွေးလွန်နေခဲ့ပုံရလေသည်။

အစည်းအဝေးကို ရပ်နားပြီးနောက် အားလုံးက ကျေနပ်ကြသည်။

ထုံရွှယ်လူသည် သူမ၏နေ့စဉ်စျေး၀ယ်ထွက်မှုအတွက် ကောင်းဝေ့ဖျင်ကို သူမနှင့်အတူ ခေါ်ဆောင်သွားနေဆဲဖြစ်သည်။ သို့သော် နောက်တစ်နေ့တွင် ရှောင်ထျန်းကို သူမနှင့်အတူ ခေါ်သွားမည်ဟုလည်း ပြောခဲ့ပြီးထို့သို့ဖြင့် သူတို့နှစ်ဦး အလှည့်ကျ ဖြစ်သွားမည်ဖြစ်သည်။

ရှောင်ထျန်းက အလွန်စိတ်လှုပ်ရှားသွားပြီး သူ့မျက်နှာက နီရဲသွားသည်။

ရှောင်ထျန်းသည် စားဖိုမှူးလိန်၏ တပည့်အသစ်ဖြစ်ပြီး မန်နေဂျာထုံက သူ့တပည့်ကို တန်ဖိုးထားသဖြင့် အလွန်၀မ်းသာသွားသည်။

ထုံရွှယ်လူက စားသောက်ဆိုင်မှ ထွက်လာပြီးနောက် တိတ်တဆိတ် သက်ပြင်းချလိုက်သည်။

တရားမျှတရန်ပြုလုပ်ရသည်မှာ မလွယ်ကူပေ။ သို့သော်ငြား အချင်းချင်း ရန်ဖြစ်နေကြသည်ထက် ညီညီညွတ်ညွတ် ပေါင်းစည်းကြရန်ကို သူမ ပိုမိုလိုလားသည်။

🍵

အနောက်မြောက်ဘက်ပိုင်းသို့ ရွှေ့ပြောင်းရမည့် စွင်းမိသားစုအတွက်မူကား တူညီစွာ မပြောဆိုနိုင်ချေ။

စွင်းမိသားစု၏အပြောင်းအရွှေ့ ရပ်ဆိုင်းခံလိုက်ရပြီးနောက် စွင်းဝူယန်နှင့် စွင်းမန်ရို့တို့ များစွာဝမ်းနည်းကြေကွဲခဲ့ရသည်။ ထို့အပြင် ၎င်းတို့သည် နှစ်ရက်အတွင်း စစ်မှုထမ်းအိမ်ရာမှ ပြောင်းရွှေ့ရန်လည်း အကြောင်းကြားခံခဲ့ရသည်။

စွင်းမန်ရို့သည် ၀မ်ရူကွေ့ကို ထပ်မံရှာဖွေလိုသော်လည်း သူက အခြေစိုက်စခန်းသို့ ပြန်ရောက်သွားပြီးဖြစ်ပြီး အဘိုးဝမ်က ဦးလေးဇုန်းကို သူမအား တိုက်ရိုက် နှင်ထုတ်စေခဲ့သည်။

အခြားနေရာမရှိသဖြင့် စွင်းဝူယန်နှင့်အတူ အနောက်မြောက်ဘက်ဆီသို့ ပြန်သွားရန်မှတပါး ရွေးချယ်စရာ မရှိတော့ပေ။

စွင်းမိသားစုအိမ်ထဲသို့ သူတို့နှစ်ယောက် ခြေချလိုက်သည့်အခါ နှစ်ယောက်စလုံး ပါးရိုက်ခံလိုက်ရသည်။

စွင်းပါးပါးက ဒေါသတကြီး ဖြစ်နေသည်။

" အရူးနှစ်ယောက်၊ မင်းတို့ ဘာတွေလုပ်ခဲ့လဲ သိကြရဲ့လား "

တစ်စုံတစ်ယောက်၏ဆက်ဆံရေးကို ကြား၀င်နှောင့်ယှက်ခြင်း၊ အမျိုးသမီးရဲဘော်၏ဂုဏ်သိက္ခာကို ဖျက်ဆီးခြင်း၊ တရားမ၀င်သောလုပ်ရပ်များ ကျူးလွန်ရန် အခြားသူအား တိုက်တွန်းခြင်း။

သူတို့မည်သည်ကိုများတွေးနေကြသနည်း။

သူတို့ကိုယ်သူတို့ မည်သူများဟု ထင်ကြသနည်း။

မြို့တော်ကဲ့သို့ မြို့ကြီးတစ်ခု၌ တံတွေးထွေးလိုက်မိရုံဖြင့် ထိုတံတွေးက တစ်စုံတစ်ယောက်သောသူကို ထိမိသွားလိမ့်မည်။ သူတို့၏လုပ်များနှင့် ရှောင်ရှားသွားနိုင်မည်ဟု အဘယ့်ကြောင့် ထင်ခဲ့ကြသနည်း။

စွင်းမိသားစုသည် လွန်ခဲ့သည့်နှစ်အနည်းငယ်အတွင်း ဗိုလ်မှူးရှောင်းနှင့် ချည်နှောင်ထားသည့် လှေခါးပေါ်သို့ တက်ရန် မလွယ်ကူခဲ့ပေ။ ယခုအခါတွင် ဤလူမိုက်နှစ်ယောက်ပြုလုပ်ခဲ့သည့် ကိစ္စတစ်ခုကြောင့် အလုံးစုံ ပျက်စီးသွားသည်။

ဗိုလ်မှူးရှောင်းသည် စွင်းမန်ရို့ကို သူ၏ မွေးစားမြေးမအဖြစ် အသိအမှတ်မပြုတော့သည့်အပြင် စွင်းမိသားစုနှင့် အချင်းချင်း အပြန်အလှန် ဆက်ဆံတော့မည် မဟုတ်ကြောင်း ဖုန်းဆက်ကာ ပြောခဲ့သည်။

သူက ဒေါသအလွန်ထွက်ပြီး နှလုံးဖောက်လုနီးပါးဖြစ်သွားခဲ့သည်။

စွင်းမိသားစုသည် မည်သည့်နောက်ခံ သို့မဟုတ် မည့်သည့် အဆက်အသွယ်မှ မရှိခဲ့‌ပေ။ သူတို့က ဗိုလ်မှူးရှောင်းနှင့် အတင်းအကြပ် ဆက်ဆံရေးပြုလုပ်ခဲ့ခြင်းသာဖြစ်ပြီး ယခုအခါ အရာအားလုံးပြီးဆုံးသွားလေပြီ။

ပါးရိုက်ခံရသည့်အခါ စွင်းဝူယန်က ခေါင်းငုံ့နေပြီး မည်သည်ကိုမှ မပြောပေ။

သူက မြို့တော်၌ ရှိနေစဉ်အချိန်ကတည်းက နောင်တရနေခဲ့ပြီးဖြစ်သည်။ စွင်းမန်ရို့ငို‌ကြွေးသည်ကိုမြင်သည်နှင့် သူ အဘယ့်ကြောင့် စိတ်လွတ်သွားခဲ့မိသနည်း။

သို့သော် လုပ်ခဲ့မိသည်များက ပြီးသွားခဲ့ပြီဖြစ်ကာ သူ မိုက်မဲမိခဲ့သည်ကို ၀န်ခံရလေမည်။

အဆိုးဆုံးအပိုင်းမှာ စွင်းမန်ရို့၏ သရုပ်ဆောင်ပုံဖြစ်သည်။ ဤညီမနှင့် ရှေ့ဆက်ရန် သူ သေသေချာချာ စဉ်းစားတွေးတောရပေမည်။

ပူလောင်နေသောသူမပါးပြင်ကို ဖုံးအုပ်ထားရင်း စွင်းမန်ရို့ ထိတ်လန့်သွားသည်။

" ဦးလေး သမီးမှားမှန်း သမီးသိပါတယ်။ တတိယအစ်ကိုရဲ့ စကားကို နားမထောင်ခဲ့သင့်ဘူး။ သမီး သူ့ကို သတိတရားတချို့ပြောပြဖို့ ကြိုးစားခဲ့သင့်တယ်....."

စွင်းဝူယန် ရယ်မောလိုက်သည်။

" စွင်းမန်ရို့ ပါးစပ်ပိတ်ထားစမ်း။ နောက်ထပ် စကားတစ်ခွန်းပြောတာနဲ့ မင်းကို ငါ့အိမ်ထဲက နှင်ထုတ်ပစ်မယ် "

စွင်းမန်ရို့ သူ့ကို မယုံကြည်နိုင်စွာ ကြည့်လိုက်သည် ။

" တတိယအစ်ကို၊ အစ်ကို ဘာလို့ အဲဒီလိုပြောရတာလဲ။ ညီမက အစ်ကို့ညီမလို့ အစ်ကိုပြောခဲ့တယ်လေ။ ဘယ်သူက သူတို့ညီမကို အိမ်ထဲက ဆွဲထုတ်လို့လဲ "

စွင်းဝူယန် သူမနှင့် ဆက်၍ မပြောလိုတော့ပေ။

အရူးနှစ်ယောက်ကို ကြည့်ရင်း စွင်းပါးပါး ဒေါသထွက်သွားလေသည်။

" မင်းတို့နှစ်ယောက်က ဒီမှာနေဖို့က အသုံးမ၀င်ဘူး။ ဘယ်ယူနစ်ကမှ မင်းတို့ကိုလက်ခံမှာမဟုတ်ဘူး။ ငါ တွေးပြီးပြီ။ မင်းတို့ရွာတွေဆီ လူငယ်တွေကို ပညာသင်‌ပေးဖို့ သွားရမယ် "

' ရွာကလူငယ်ကို စာသင်ဖို့လား '

စွင်းမန်ရို့ အံ့အားသင့်သွားသည်။

" ဦးလေး၊ သမီးကကျန်းမာရေးမကောင်းဘူး‌လေ။ သမီး ရွာမှာ နေ‌နိုင်လောက်မှာ မဟုတ်ဘူး "

" မင်း မသွားချင်ရင် မင်းအမေအိမ်ဆီ ပြန်သွား "

ပါးပါးစွင်းသည် ဤတူမကို အလိုလိုက်မြတ်နိုးခဲ့ဖူးသည်။ သို့သော် ယခင်က သူမကို ပိုပြီးချစ်ခဲ့လေလေ ယခု သူမကို မြင်သောအခါ ပိုပြီးစိတ်ဆိုးလေလေဖြစ်သည်။ သူမသည် မျက်လုံးဖြူဝံပုလွေမှတပါး ဘာမှမဟုတ်ပေ။

ထိုစကားကို ပြောပြီးနောက် ပါးပါးစွင်းက လှည့်ထွက်သွားသည်။

စွင်းမန်ရို့၏မိခင်သည် နောက်အိမ်ထောင်ပြုခဲ့ပြီး သားနှစ်ယောက်ရှိကာ ဤသမီးကို ဘယ်တုန်းကမှ မလိုချင်ခဲ့‌ပေ။

စွင်းမန်ရို့၏ရင်ဘတ်သည် အလွန်အမင်း နိမ့်ချည်မြင့်ချည် ဖြစ်နေပြီး မျက်ဖြူစိုက်ကာ မေ့လဲသွားသည်။

🍵

ထုံရွှယ်လူသည် စွင်းမိသားစု၏သတင်းများကို မသိပေ။

ရက်သတ္တပတ်တစ်ပတ်က လျင်မြန်စွာ ကုန်လွန်သွားပြီး စားသောက်ဆိုင်၏ ကြီးကျယ်ခမ်းနားသောဖွင့်ပွဲ‌နေ့ရက်သို့ ရောက်ရှိလာသည်။

အဆင့် ၂ နှင့် အဆင့် ၃ စားသောက်ဆိုင်များအားလုံးကို " အစိုးရမှလည်ပတ်သော စားသောက်ဆိုင်များ" ဟု နာမည်တပ်ပြီး အဆင့် တစ် များသာ သူတို့၏ကိုယ်ပိုင်အမည်များရရှိမည်ဖြစ်သည်။

ထုံရွှယ်လူက မန်နေဂျာလင်းအား စားသောက်ဆိုင်အမည်ပေးသည့် တာဝန်ကို လွှဲပေးခဲ့၏။ ထုံရွှယ်လူ မည်မျှ ယဉ်ကျေးသိမ်မွေ့သည်ကိုမြင်သည့်အခါ မန်နေဂျာလင်း၏ အပြုံးမှာ နားရွက်တစ်ဖက်စီနှင့် ထိလုနီးပါးဖြစ်နေသည်။

မန်နေဂျာလင်းသည် နောက်ရက်အနည်းငယ်ကြာအောင် စဉ်းစားခဲ့ပြီး နောက်ဆုံးတွင် စားသောက်ဆိုင်အသစ်၏ အမည်ကို ' အရှေ့လေပြေစားသောက်ဆိုင် ' ဟု အမည်တပ်လိုက်သည်။

ထုံရွှယ်လူက ထိုနာမည်ကို စိတ်မ၀င်‌စားပေ။

Prev Next