MM Story Teller

အပိုင်း၂၀၂

Viewers 39k

🍵Chapter 202

" ဟုတ်ကဲ့၊ ယန်ကျိုးထမင်းကြော်နည်းကို ကျွန်မ သိပါတယ်။ ဒါပေမယ့် ရဲဘော်ကျယ်က မြို့တော်ဇာတိဖြစ်တယ်လို့ ကျွန်မ ထင်ထားခဲ့တာ ယန်ကျိုးထမင်းကြော်ကို ဘာလို့ တောင့်တနေရတာပါလဲ "

ကျယ်ချန်ကျိုး၏ အသံက တုန်လှုပ်သွားသည်။

" ကျုပ်အမေက ယန်ကျိုးကပါ။ သူမက ကျုပ်နှင့်မောင်နှမတွေအတွက်ထမင်းကြော် အမြဲလုပ်ပေးလေ့ရှိသည်။ ကျုပ် နိုင်ငံခြားထွက်‌တော့ အမေက တရုတ်ပြည်မှာနေခဲ့ပြီး အဲ့ကတည်းက သူမ လုပ်‌ပေးတဲ့ ထမင်းကြော်ကို မစားရတော့ဘူး "

သူ့မိခင်သည် သူ တိုင်းပြည်မှ ထွက်သွားပြီး ဆယ်နှစ်အကြာမှာ ဆုံးပါးသွားခဲ့သည်။ သူက သမုဒ္ဒရာ၏တစ်ဖက်ကမ်းတွင် ရှိနေခဲ့ပြီး ပြန်လာရန် လမ်းမရှိခဲ့ချေ။

၂၉ နှစ်ကြာ သူ ထွက်ခွာသွားခဲ့သည်။ သူကား မိခင်ကို နောက်ဆုံးအကြိမ်တွေ့ရန်ပင် မစွမ်း‌ ဆောင်နိုင်သော သားသမီး၀တ္တရားမကျေပွန်သည့် သားတစ်ယောက်ဖြစ်သည်။

ကျယ်ချန်ကျိုးက သူ့မျက်မှန်ကို ချွတ်လိုက်ပြီး မျက်လုံးကို အင်္ကျီလက်ဖြင့် ပွတ်သပ်လိုက်သည်။

ရှောင်ကျယ်က သူ့ကို နှစ်သိမ့်ပေးရန် ပခုံးကို ပုတ်လိုက်သည်။

ကားအတွင်းမှ လေထုမှာ ရုတ်တရက် လေးလံသွားလေသည်။

ကားက ရွှေရောင်နွေဦးဟိုတယ်ဆီသို့ အရင်ခေါ်သွားခဲ့ခြင်းကြောင့် ကျယ်ချန်ကျိုးနှင့် သူ၏သားတို့သည် သူတို့၏ ခရီးဆောင်အိတ်များကို ထားခဲ့နိုင်လေသည်။

ထိုအချိန်တွင် ထုံရွှယ်လူသည် အခြားကားဖြင့်အ‌ရှေ့စားသောက်ဆိုင်သို့ ပြန်သွားကာ လိုအပ်သည့် ပါ၀င်ပစ္စည်းများကို ယူဆောင်ပြီးနောက် ဤဟိုတယ်သို့ ပြန်လာသည်။

၎င်းတို့သည် ဗွီအိုင်ပီများဖြစ်သောကြောင့် ညွှန်ကြားရေးမှူးလင်းက ၎င်းတို့အား အိမ်ကဲ့သို့ ခံစားစေလိုသည်ဟု ဆိုလေသည်။ ထို့ကြောင့် စားသောက်ဆိုင်၌ ထမင်းမစားစေ‌ပေ။ ယင်းအစား ထုံရွှယ်လူကို ဟိုတယ်၌ ၎င်းတို့၏ အစားအသောက်များကို ပြင်ဆင်စေမည်ဖြစ်သည်။

ထုံးစံအတိုင်း ထုံရွှယ်လူမှာ ဤကဲ့သို့ အထူးတလှယ်ဆက်ဆံမှုကို ကန့်ကွက်ပိုင်ခွင့်မရှိပေ။

ထို့အပြင် သူမမှာ ခေါ်ယူခံရပြီး‌နောက် ထားခဲ့ခံရနိုင်မည်လည်းဖြစ်ရာ ယခုမှာ တခြားနေရာ၌ ဟင်းချက်ရသည့်ကိစ္စတစ်ခုမျှသာလျှင် ဖြစ်ပေသည်။

ထုံရွှယ်လူသည် ကားစီးနေစဉ်အတွင်း ကျယ်ချန်ကျိုးနှင့် သူ့သားတို့ နှစ်သက်သည့် အစားအသောက်များအကြောင်း မေးမြန်းခဲ့သည်။

သူမ အနည်းငယ် စဉ်းစားပြီးနောက် ယန်ကျိုးထမင်းကြော်၊ အမဲနံရိုးနှပ်၊ ကြက်သွန်ဖြူနှင့်မွှေ‌ကြော်ထားသည့် ဂေါ်ဖီထုပ်‌ကြော်၊ ခရမ်းချဉ်သီးနှင့်ကြက်ဥ စွပ်ပြုတ် စသည်များကို ပြုလုပ်ရန် စီစဉ်လိုက်သည်။

ကျယ်ချန်ကျိုးထံမှ သူမ စုဆောင်းနိုင်ခဲ့သည့်အချက်အလက်များအရ သူသည် သူ့အမေ၏ မိသားစုအတွက် ချက်ပြုတ်‌ပေးခဲ့သည့် ဟင်းလျာအများစုကို လွမ်းဆွတ်နေသည်။

ထို့ကြောင့် ဟင်း ၄ လုံးတွင် ၃ မျိုးက သူ့အတွက် ပြင်ဆင်ထားခြင်းဖြစ်သည်။ နောက်ဆုံးတစ်ခုဖြစ်သည့် အမဲနံရိုးနှပ်ဟင်းကို ရဲဘော်‌ ရှောင်ကျယ်၏ တရုတ်အမေရိကန် ၀မ်းဗိုက်ကို စိတ်ထဲထည့်ကာ ပြုလုပ်ထားခြင်းဖြစ်သည်။

ယန်ကျိုးထမင်းကြော်တွင် ထမင်းအပြင် ကြက်ဥ၊ ပဲစေ့၊ ခါကျက်ဥ၊ ပုဇွန်နှင့် ပြောင်းဖူးတို့လည်း ပါ၀င်သည်။ ထုံရွှယ်လူသည် ထမင်းကို ကြက်ဥဖြင့်အုပ်ရန် ကြက်ဥကြော် မပြုလုပ်မီ ပါဝင်ပစ္စည်းတစ်ခုစီကို သီးခြားစီ ကြော်လှော်ချက်ပြုတ်သည်။ စပါးတစ်စေ့ချင်းစီသည် ပွကာ ရွှေဝါရောင်ရှိသည်။ ထိုအချိန်တွင် သူမက အခြားပါဝင်ပစ္စည်းများကို ပေါင်းထည့်လိုက်ပြီး နူးညံ့၊ချောမွေ့ပြီး အရောင်အသွေးစုံလင်သော ယန်ကျိုး ထမင်းကြော် နှစ်ပန်းကန် ထွက်‌ပေါ်လာသည်။

ထို့နောက် ဂေါ်ဖီနှင့်ကြက်သွန်ဖြူမွှေကြော်၊ ခရမ်းချဉ်သီးနှင့်ကြက်ဥစွပ်ပြုတ်တို့ ချက်ပြီးသည့်အခါ အမဲနံရိုးနှပ်သည်လည်း ကျက်သွားခဲ့လေပြီ။

အမဲနံရိုးပေါ်ရှိအသားများသည် တူဖြင့် ညှပ်ယူသောအခါ အရိုးပေါ်မှပင် ပြုတ်ကျလာနိုင်သည်။ အသားက ကြည်လင်သောအရောင်ရှိပြီး ထိုမွှေးရနံ့က မီးဖိုခန်းတစ်ခုလုံး ချက်ချင်း ပြည့်လျှံသွားစေသည်။

သူမ အနောက်မှ "ချပ်" ဟူသော အသံအနည်းငယ်ကို ရုတ်တရက်ကြားလိုက်ရသည်။

ထုံရွှယ်လူ လှည့်ကြည့်လိုက်သည့်အခါ ရဲဘော် ရှောင်ကျယ်က သူမကို ကင်မရာနှင့် ဓာတ်ပုံရိုက်နေသည်ကို မြင်လိုက်ရသည်။

ထုံရွှယ်လူ သတိထားမိသည်ကို ရှောင်ကျယ်က သတိပြုမိသောအခါ သူ၏ချောမောသောမျက်နှာပေါ်တွင် တောက်ပသောအပြုံးတစ်ခုဖြစ်ပေါ်လာသည်။

" မင်္ဂလာပါ ရဲဘော်ထုံ မင်းက ဟင်းချက်တာကို အာရုံစိုက်နေတဲ့အခါ အရမ်းလှတယ် "

အမှန်တကယ် သူ ထိုနေရာ၌ ရောက်ရှိနေသည်မှာ အတော်ကြာနေပြီဖြစ်သည်။ သို့သော် ထုံရွှယ်လူက ဟင်းချက်ခြင်း၌ အလွန်အာရုံစိုက်နေခဲ့ပြီး သူ့အား သတိမပြုမိခဲ့ချေ။

သူမသည် အစောပိုင်းက အလွန်ထူထဲသော အင်္ကျီ ၀တ်ဆင်ထားခဲ့ပြီး မီးခိုးရောင်ဘောလုံးကြီးကဲ့သို့ ဖြစ်နေခဲ့သဖြင့် ထိုဂျာကင်အင်္ကျီအောက်၌ ဤမျှလောက် အချိုးအဆစ်ပြေပြစ်သော ခန္ဓာကိုယ်ရှိနေမည်ဟု သူ မထင်ထားခဲ့ပေ။

သူမကို ဓါတ်ပုံရိုက်သည့်အခါမှသာ သူမ မည်မျှ လှပသည်ကို သူက သတိထားမိသည်။သူမသည် မော်ဒယ်ကောင်းတစ်ဦး ဖြစ်ပေးခဲ့သည်။

ထုံရွှယ်လူက သူ့ကို တစ်ချက်ကြည့်လိုက်ပြီး ပြောသည်။

" ရှင်က ကျွန်မရဲ့ကိုယ်ပိုင်အခွင့်အရေးကို ချိုးဖောက်လိုက်တာပဲ။ ဒီတစ်ခါတော့ ထားလိုက်မယ်။ နောက်ထပ် ထပ်မလုပ်ပါနဲ့ "

ရှောင်ကျယ်က ထိုစကားကိုကြားသောအခါ မျက်ခုံးများပင့်လိုက်သည်။

" ရဲဘော်ထုံ က တကယ့်ကို ထူးခြားတယ်။ ဒီလို တုံ့ပြန်မှုမျိုး ကျွန်တော် တစ်ခါမှ မကြားခဲ့ဖူးဘူး "

အစောပိုင်းက သူသည် ကင်မရာနှင့် ဓာတ်ပုံများရိုက်ရင်း ဟိုဟိုဒီဒီ လမ်းလျှောက်နေခဲ့သည်။ သူ့ကင်မရာကို မြင်သည့်အခါ လူတချို့က သိချင်စိတ်ဖြင့် စူးစမ်းကြပြိီး တချို့ကတော့ ကြောက်ရွံ့ကြသည်။ သူက ဓာတ်ပုံရိုက်ရန် ကမ်းလှမ်းသည့်အခါ သူတို့အားလုံး က အလွန်စိတ်လှုပ်ရှားသွားခဲ့ကြသည်။

တစ်ဖက်တွင်မူ သူမက အလွန်ငြိမ်သက်နေ သည်။ ထို့အပြင် သူက သူမ၏အခွင့်အရေးကို ချိုးဖောက်ခဲ့သည်ဟုပင် မကျေမနပ်ပြောလာခဲ့လေသည်။

ရှောင်ကျယ်က ထုံရွှယ်လူကို တောင်းပန်လိုက်သည်။

" တောင်းပန်ပါတယ် ရဲဘော်ထုံ။ ကျွန်‌တော် ထပ်မလုပ်တော့ပါဘူး "

ထုံရွှယ်လူက ခေါင်းညိတ်ပြပြီး ပန်းကန်လုံးထဲသို့ အမဲနံရိုးနှပ်များကို ခပ်ထည့်လိုက်သည်။

အစားအစာ၏ရနံ့သည်‌ ရှောင်ကျယ်ကို ဗိုက်ဆာစေလေသည်။

သူက လမ်းလျှောက်လာကာ တစ်ချက်ကြည့်လိုက်ပြီး လေချွန်လိုက်သည်။

" မင်းက တကယ်ကို ပထမရတဲ့ စားဖိုမှူးပဲ။ ဒီဟင်းလျာက အသွင်အပြင်၊ အရောင်၊ အနံ့ အားလုံး ပါ၀င်တယ် "

" ရှင်က အရမ်းချီးမွန်း‌နေလွန်းပါပြီ "

ရှောင်ကျယ်က မေးသည်။

" အာ ဒါနဲ့ မင်းနာမည်က ဘယ်လိုခေါ်လဲ ရဲဘော်ထုံ။ ကျွန်တော့်နာမည်က ကျယ် ……"

ရှောင်ကျယ်က သူ့နာမည်ကို ဝေမျှလိုက်သောအခါ အပြင်ဘက်မှ ခွဲခြား၍မရသော ကျယ်လောင်သောအသံတစ်ခု ထွက်ပေါ်လာသည်။

ထုံရွှယ်လူက အနည်းငယ် မျက်မှောင်ကြုတ်ပြီး ပြောသဘ်။ " ကျွန်မက ထုံရွှယ်လူပါ။ နှင်းပွင့်များဆိုတဲ့ ရွှယ်နဲ့ အစိမ်းရောင်က လူ ပါ။ ရှင့်နာမည်က ဘာလို့ပြောလိုက်တာလဲ။ ကျွန်မ မကြားလိုက်မိလို့ပါ "

" အိုး မိုင်။ မင်းမှာ နာမည်ကောင်းရှိတာပဲ။ အစိမ်းရောင်က ကျွန်‌‌တော် အကြိုက်ဆုံးအရောင်‌လေ ။ မျှော်လင့်ချက်ကို ကိုယ်စားပြုတယ်။ ကျွန်တော့်မှာ ဦးထုပ် အစိမ်းရောင်တောင် ရှိတယ် "

ထုံရွှယ်လူ "……"

' ကလေး မင်း တကယ်ကြီးပြောနေတာလား '

ရှောင်ကျယ်က စကားပြောပြီးသောအခါ သူ၏ လေယူလေသိမ်းကြောင့်ဖြစ်မည်ထင်သဖြင့် အိတ်ကပ်ထဲမှ ဘောပင်နှင့် စာရွက်တစ်ရွက်ကို ထုတ်ကာ သူ့နာမည်ကို ချရေးသည်။

ထုံရွှယ်လူက သူ့နာမည်ကိုကြည့်ရန် ခေါင်း‌ေစာင်းလိုက်၏။ သူမနှုတ်ခမ်းများက အလွန်အမင်း တွန့်သွားပြီး သူမ မေးမြန်းလိုက်သည်။ " ရှင့်မှာ အင်္ဂလိပ်နာမည်လည်း ရှိတယ်လား ရဲဘော်ကျယ် "

ရှောင်ကျယ်က " ဟုတ်ပါတယ်။ ကျွန်တော့်ရဲ့ အင်္ဂလိပ်နာမည်က ဂျေဆန် ပါ။ အဲဒါက တရုတ်လို ကျယ်စန်း လေ "

" ကျွန်မ ရဲဘော် ရှောင်ကျယ်လို့ပဲ ဆက်ခေါ်ပါမယ် " ထုံရွှယ်လူက ပြောသည်။

ကျယ်စန်းက ဘာသိဘာသာ ပခုံးတွန့်ပြလိုက်ပြီး " သဘောပါ "

ထုံရွှယ်လူက မှတ်ချက်မပေး‌‌ချေ။ သူမက ကောင်းဝေ့ဖျင်ကိုသာ အစားအသောက်များ သယ်သွားစေသည်။

ကျယ်ချန်ကျိုး လှေကားမှဆင်းလာသောအခါတွင် လွှမ်းမိုးကြီးစိုးသည့် ရင်းနှီးသော မွှေးရနံ့ကို ချက်ချင်း ရလိုက်သည်။ ထိုရနံ့သည် သူ့အား စိတ်ခံစားချက်များ တစ်ဖန်ပြန်၍ ပြင်းထန်စေသည်။

သူက ယန်ကျိုးထမင်းကြော်တစ်ဇွန်းစားရန် မစောင့်နိုင်တော့သည့်အပြင် မျက်လုံးများကလည်း စိုစွတ်လာပြန်သည်။

" ဒီအရသာ....ကျုပ်အမေ ချက်ကျွေးခဲ့တာနဲ့ အတူတူပဲ။ ၂၉ နှစ်ရှိပြီ။ ကျုပ်ဒီအရသာကို နောက်ဆုံးခံစားခဲ့ရတာ ၂၉ နှစ်ရှိပြီ "

သူ့မိခင်၏ ထမင်းကြော်အား စားနေခြင်းကို အကြိမ်ပေါင်းများစွာ အိပ်မက်မက်ခဲ့ဖူး၏။

သူသည် သူ့တစ်သက်တာ ဘယ်သောအခါမှ မမြည်းစမ်းနိုင်တော့ဟု ထင်ခဲ့၏။ သို့‌သော် ဇာတိနိုင်ငံသို့ ပြန်ရောက်သည့် ပထမဆုံးနေ့၌ သူ အကြိမ်ပေါင်း မရေမတွက်နိုင်အောင် အိပ်မက်မက်ခဲ့ရသည့်ဟင်းလျာကို ပြန်လည် မြည်းစမ်းနိုင်လိမ့်မည်ဟု ဘယ်တုန်းကမှ မထင်ခဲ့မိချေ။ သူ မည်ကဲ့သို့ စိတ်ခံစားချက် မပြင်းထန်ဘဲ နေမည်နည်း။

ကျယ်ချန်ကျိုးသည် အခြားဟင်းလျာအချို့ကိုလည်း စားသုံးကြည့်ရာ သူ၏ ချီးကျူးမှုကို မရပ်တန့်နိုင်ပေ။

" ရဲဘော်ထုံရဲ့ ဟင်းချက်လက်ရာက တကယ့်ကို အံ့အားသင့်ဖွယ်ကောင်းပါတယ်။ အခု မင်း ငယ်ငယ်ရွယ်ရွယ်နဲ့ စားသောက်ဆိုင်ရဲ့ မန်နေဂျာဖြစ်လာပုံကို ကျုပ်နားလည်သွားခဲ့ပြီ "

ကျယ်စန်း အကြိုက်ဆုံးဟင်းမှာ အမဲနံရိုးနှပ်ဖြစ်သည်။ အဆီများသောအစိတ်အပိုင်းသည် အဆီများသော်လည်း အလွန်အကျွံ မဟုတ်သည့်အပြင် အမဲသားအပိုင်းက နူးညံ့ပြီး အနံ့မွှေးလှသည်။ တစ်ချက်ကိုက်လိုက်ရုံနှင့် ဟင်းအနှစ်က ပါးစပ်ထဲတွင် ပေါက်ကွဲသွားပြီး မယုံကြည်နိုင်လောက်အောင် အရသာရှိနေသည်။

သားအဖနှစ်ယောက်လုံး အစားအသောက်နှင့် ပက်သက်ပြီး အလွန်စိတ်တိုင်းကျနေကြသည်။

ထုံရွှယ်လူသည် ညစာစားပြီးနောက် စားသောက်ဆိုင်သို့ ပြန်လာသည်။ မြူနီစီပယ်နိုင်ငံခြားရေးရုံးမှ သူများကသာ ကျယ်သားအဖကို အဖော်ပြုရန် တာဝန်ရှိသူများဖြစ်သည်။ ထုံရွှယ်လူမှာ သူတို့နှစ်ဦးအတွက် ညစာပြင်ဆင်ရန် ပြန်သွားရန်သာ လိုအပ်သည်။

၎င်းသည် လာမည့်ရက်အနည်းငယ်အတွက် သူမ၏ လုပ်ရိုးလုပ်စဉ် ဖြစ်ပေမည်။

ကျယ်ချန်ကျိုးသည် ထုံရွှယ်လူ၏ ချက်ပြုတ်ခြင်းကို အလွန်သဘောကျသောကြောင့် ညွှန်ကြားရေးမှူးကောင်းနှင့် ညွှန်ကြားရေးမှူးလင်းတို့ရှေ့တွင် သူမအား အကြိမ်ကြိမ် ချီးကျူးခဲ့သည်။ ထို့ကြောင့် အထက်အရာရှိများအားလုံး ယခုအခါ ထုံရွှယ်လူ ၏နာမည်ကို သိသွားကြပြီဖြစ်သည်။

သူမသည် တရုတ်နှစ်သစ်ကူးတွင် ဆုလာဘ် ရရှိခဲ့သည်။

သူမသည် အပေါ်တွင် " အမျိုးသမီးများသည်ကောင်းကင်တစ်၀က်ကို ထောက်ကိုင်ထားနိုင်သည်" ဟူသော စကားလုံးဖြင့် ခွက်နှစ်ခွက်ကို လက်ခံရရှိပြီး ဆုကြေးငွေအဖြစ် ယွမ် ၅၀ ကိုလည်း ရရှိသည်။

ယွမ် ၅၀ မှာ သူမ၏ လ၀က်စာ လခနှင့် ညီမျှပြီး ထုံရွှယ်လူက သူမ၏ဆုလာဘ်ကို အလွန်သဘောကျလေသည်။

🍵

နောက်ဆုံး၌ တရုတ်နှစ်သစ်ကူးသို့ ရောက်ရှိလာသည်။

စက်ရုံများအားလုံးနှင့်စားသောက်ဆိုင်များကို ပိတ်သိမ်းထားကြသည်။ ထိုသို့ဆိုလျှင်တောင်မှ လမ်းများက ‌ရှင်းလင်းမနေချေ။ ကလေးသူငယ်များစွာ လမ်းပေါ်၌ ပြေးလွှားဆော့ကစားနေကြသည်ကို တွေ့မြင်ကြရနိုင်သည်။

နှစ်သစ်ကူးအချိန်အခါသမယမှာ ကလေးများက အမြဲလိုလို ပျော်ရွှင်ကြသည်ပင်။ အဝတ်အစားအသစ်များ ဝတ်ဆင်နိုင်ရုံတင်မက အရသာရှိသည့်အစားအစာများကိုလည်း အများကြီးစားရနိုင်လေသည်။

ဗိုလ်မှူးရှောင်းသည် နှစ်သစ်ကူးအကြို မတိုင်မီ မြို့တော်သို့ ပြန်လာခဲ့ပြီး တရုတ်နှစ်သစ်ကူးအတွက် ပြင်ဆင်ထားသည့် ရိက္ခာများလည်း ရောက်ရှိလာသည်။

ထုံရွှယ်လူ ကူးပြောင်းလာပြီးနောက်ပိုင်း ပထမဆုံးအကြိမ်အဖြစ် သူတို့အားလုံး နှစ်သစ်ကူးပွဲတော်ကို အတူတကွ ဖြတ်သန်းကြခြင်းလည်းဖြစ်သည်။

အပြင်ဘက်တွင် နှင်းများကျနေပြီး အသက်ရှူခြင်းတစ်ချက်က ရေခဲအဖြစ်ပြောင်းသွားနိုင်သည်။ သို့သော်ငြား အိမ်အတွင်းထဲ၌မူ အလွန်သဟဇာတဖြစ်နေကြသည်။

Prev Next