MM Story Teller

အပိုင်း ၁၆၃

Viewers 18k

Chapter 163

ကျွန်တော် ရွှယ်ယုံကို သိပါတယ်

ယွီနျန် ရှစ်ရော့ထံမှ ဖိုရမ်ပိုစ့်လင့်ခ်များ လက်ခံရရှိခဲ့သည့် အချိန်က အဖြူရောင် ဆွယ်တာပွပွနှင့် ဂျင်းဘောင်းဘီ ဝတ်ထားရင်း အိမ်ထဲရှိ မီးဖိုချောင်ကောင်တာထဲတွင် အသီးလှီးနေခဲ့ခြင်း ဖြစ်သည်။ ယွီနျန်က ပြင်ဆင်ထားသည်များကို ကျေနပ်သွားသဖြင့် သစ်သီးဗန်းလေးကို ကိုင်ထားရင်း ဆယ်လ်ဖီရိုက်လိုက်ပြီး ဟယ်ရှောင်းထံ ပို့ပေးလိုက်သည်။

သစ်သီးပန်းကန်လေးကို ကိုင်ထားရင်းဖြင့် ယွီနျန်က ညာလက်ကို သုံးကာ လင့်ခ်ကို ဖွင့်ကြည့်လိုက်သည်။ ဖတ်နေရင်းဖြင့် မျက်နှာတစ်ပြင်လုံး အပြုံးများ ပျံ့နှံ့သွားလေသည်။

ရွှယ်ယုံ အလုပ်လုပ်နေသည့် နေရာဖြစ်သည့် စာကြည့်ခန်းထဲသို့ ချဥ်းကပ်လာရင်း ယွီနျန်က တမင်သက်သက် လက်ကို မြှောက်ကာဖြင့် သုံးကြိမ်တိုင် တံခါးခေါက်လိုက်သည်။

"သစ်သီး လာပို့ပါတယ်... မစ္စတာရွှယ်... အခုစားချင်လား... နောက်မှ စားမလား"

ရွှယ်ယုံက သာမန်ကာလျှံကာ ပြန်ဖြေလိုက်သည်။

"နျန်နျန် မကျွေးရင် ကိုယ်မစားချင်ဘူး"

ထို့နောက် သူပြောလိုက်သည့်စကားကို နားလည်သွားပြီး အနည်းငယ် ရှက်ရွံ့သွားသဖြင့် ယွီနျန်၏ အပြုံးတောက်တောက်လေးများထံမှ အကြည့်လွှဲလိုက်သည်။

ဖိနပ်ပါး ဝတ်ထားသည့် ယွီနျန်က စကားတစ်ခွန်းမှ မပြောဘဲ လျှောက်လာနေခဲ့သည်။ ယွီနျန်က အရင်ဆုံး သူ့ပါးစပ်ထဲသို့ ချယ်ရီသီးတစ်လုံး ထည့်ကာ ရွှယ်ယုံ၏ နှုတ်ခမ်းများထံ ခွံ့ကျွေးလိုက်ပြီးနောက် တလက်လက်ဖြာနေသည့် အပြုံးများ ပြည့်နေသည့် အကြည့်ရှင်းရှင်းလေးများဖြင့် မျက်တောင် တဖျတ်ဖျတ် ခတ်လိုက်သည်။

ထိုအချင်းအရာက ရွှယ်ယုံ၏ နားရွက်များကို အမှန်တကယ် နီရဲသွားစေခဲ့သည်။ သူက ယွီနျန်၏ စိုစွတ်နေသော နှုတ်ခမ်းများနှင့် အရည်ရွှမ်းနေသော ချယ်ရီသီးကို ကြည့်ကာ ရှေ့မတိုးဘဲ မနေနိုင်ဖြစ်သွားစေသည်။ ချယ်ရီသီးကို ကိုက်စားလိုက်ပြီး သူတို့၏ နှုတ်ခမ်းများ ထိကပ်သွားသည်နှင့် ရွှယ်ယုံ၏ အသက်ရှူသံများ ပြောင်းလဲသွားခဲ့သည်။ သူ့လက်ကို မြှောက်ကာ ယွီနျန်၏ ခါးလေးကို ပွေ့ပိုက်လိုက်ပြီး ရင်ခွင်ထဲသို့ ဆွဲကပ်၍ အနမ်းများကို နက်ရှိုင်းစေခဲ့သည်။

သူတို့၏ နှုတ်ခမ်းဖျားနှင့် လျှာများ ရစ်ပတ်ဖိကပ်သွားသည်နှင့် အနည်းငယ် ချိုချိုချဥ်ချဥ် ဖြစ်နေသည့် ချယ်ရီသီးအရည်များက သူတို့၏ ပါးစပ်ဖျားများထက် ပျံ့နှံ့သွားခဲ့သည်။ မပြတ်မသားဖြစ်စေသော်လည်း လန်းဆန်းသွားစေသည့် အရသာလေးပါပင်။ ရုတ်တရက် ဖြစ်လာသည့် ပြင်းပြင်းပြပြ အနမ်းနှင့် နောက်ကျောရှိ ရွှယ်ယုံ၏ လက်များက ယွီနျန့်အား ဒူးများ ခွေယိုင်လာသည်အထိ အားနည်းသွားလေသည်။ ယွီနျန်က အမိအရ အသက်ရှူလိုက်ပြီးနောက် မေးလာသည်။

"ဟာဆီရဲ့ မြေခွေးမြီး ဘယ်ရောက်သွားတာလဲ"

ရွှယ်ယုံက ယွီနျန်၏ နှုတ်ခမ်းများကို လိုက်ကြည့်နေရင်း အမှတ်တမဲ့ ပြန်ဖြေလိုက်သည်။

"အင်္ကျီတွေ ထည့်တဲ့ အခန်းထဲမှာ"

ပြောပြီးနောက် ရွှယ်ယုံ၏ လှုပ်ရှားမှုများ ရပ်တန့်သွားပြီး မကြာခင်သေးခင် အခိုက်အတန့်လေးအတွင်း သူ့လျှို့ဝှက်ချက်သေးသေးလေးကို ဖော်ထုတ်မိသွားကြောင်း နားလည်သွားလေသည်။ နောင်တအပြည့်တို့ဖြင့် နှုတ်ခမ်းဟ၍ ပြောလိုက်သည်။

"နျန်နျန်..."

ယွီနျန်မှာ မြေခွေးမြီးကို ရှာရန်အတွက် အဝတ်အစားခန်းထဲသို့ မသွားခဲ့ပေ။ ထိုအစား သူ့လက်များကို ရွှယ်ယုံ၏ လည်တိုင်တွင် ရစ်ပတ်ကာ ပျော်ပျော်ရွှင်ရွှင် ပြုံးပြလိုက်သည်။ ရယ်မောလိုက်ပြီးနောက် ကိုယ်ကို ကိုင်း၍ ရွှယ်ယုံ၏ နှုတ်ခမ်းဖျားများကို ညစ်ကျယ်ကျယ်ဖြင့် နမ်းကာပြောလိုက်သည်။

"အင်း... ခုနက ကျွန်တော် ဘာမှ မကြားလိုက်ဘူးနော်... ကျွန်တော်တို့ ရွှယ်ယုံလေးရဲ့ လျှို့ဝှက်ချက်သေးသေးလေးကို ထိန်းသိမ်းပေးထားရမှာပေါ့"

ယွီနျန်က ရွှယ်ယုံ၏ ပေါင်ပေါ်တွင် ထိုင်နေရင်း လက်ချောင်းသွယ်သွယ်လေးများကို ကစားနေကာ အသံထဲတွင်လည်း စိမ်ပြေနပြေ ဖြစ်နေသည့် ပျင်းတိပျင်းရွဲ အရိပ်အမြွက်တို့ ပြည့်နေခဲ့သည်။ မျက်လုံးထဲတွင် ရယ်ရွှင်မြူးမှုများဖြင့် မေးလိုက်သည်။

"မစ္စတာရွှယ်ကို အင်တာဗျူးပါရစေ... မြေခွေးမြီးကို ဘာလုပ်ဖို့ ဝယ်ခဲ့တာလဲ"

ရွှယ်ယုံက သူ့ကို နီးနီးကပ်ကပ် ဆွဲယူလိုက်ပြီး ယွီနျန်၏ ပုခုံးပေါ်ကို မေးတင်ထားလိုက်ပြီးနောက် နူးနူးညံ့ညံ့ဖြင့် တီးတိုးပြောလိုက်သည်။

"... ကိုယ် ဘယ်သူ့ကိုမှ မင်းသုံးတဲ့ပစ္စည်းတွေရဲ့ စုံတွဲဗားရှင်း မရှိစေချင်လို့လေ" သူထပ်ပြီး အလေးပေးပြောလိုက်သေးသည်။

"ကိုယ်တစ်ယောက်ပဲ ရှိရမယ်"

"ကိုယ်" ဟူသော စကားလုံးကို တမင်သက်သက် ဖိပြောသွားပြီး ယွီနျန်အပေါ် ခြင်းချက်မရှိ ပိုင်ဆိုင်လိုစိတ် များပြသလာခဲ့သည်။

အတူတကွ အသီး စားပြီး သွားကြသောအခါ ယွီနျန် အချိန်စစ်ကြည့်လိုက်သည်။

"အစ်ကိုမုန့်က နောက်ပိုင်းကျရင် ကျွန်တော့်ကို တိုက်ရိုက်လွှင့်ဖို့ ပြောထားသေးတယ်" သူပြုံးလိုက်သည်။

"အစ်ကိုမုန့်စကားအတိုင်း ပြောရရင် 'ရတနာလမ်းစနောက်လိုက်ခြင်း' ပြီးတဲ့နောက် ပေါ်မလာသေးရင် ကုမ္ပဏီက ကျွန်တော့်ကို အေးခဲထားလိုက်ပြီ ဆိုပြီး ဖန်တွေ ထင်သွားကြမယ်တဲ့"

တနင်္ဂနွေနေ့ နေ့လည် 3နာရတိတိ အချိန်တွင် ယွီနျန်က ကင်မရာတပ်ဆင်လိုက်ပြီး ရှင်းဟယ် live streamမှတဆင့် တိုက်ရိုက်လွှင့်လိုက်သည်။

"မတွေ့ရတာကြာပြီနော်... ကျွန်တော်ယွီနျန်ပါ" ဟု ပြောလိုက်သည့်အချိန်မှာပင် မျက်နှာပြင်ကြီး မှိန်ကျသွားကာ လက်ဆောင်များ ရရှိလာကြောင်း စနစ်မှ သတိပေးလာခဲ့သည်။

ယွီနျန် အားပါးတရ ပြုံး၍ ပြောလိုက်သည်။

"လက်ဆောင်အတွက် ကျေးဇူးပါနော်... 'နျန်နျန်ယုံယွီ'"

[အား... ရင်းနှီးနေတဲ့ ဟင်းလျာ... ရင်းနှီးနေတဲ့ အရသာပဲ... 'နျန်နျန်ယုံယွီ'လို့ ခေါ်တဲ့သူက အမြဲတမ်း ယွမ်ကိုးသောင်းကိုးသောင် သုံးပြီး "ငါတို့ရဲ့ လမ်းကြောင်းတွေက ဘယ်တော့မှ ဆန့်ကျင်မသွားဘူး... ပိုက်ဆံသုံးတာ အားလုံး ငါ့အကြောင်းနဲ့ ငါပဲ" ဆိုတဲ့ စကားရဲ့ အဓိပ္ပါယ်မှန်ကို ပြသွားပါပြီ]

[နောက်ပေါက် နျန်ကော်လေးကတော့ ဒီသမိုင်းတွင်တဲ့ နာမည်ကို အရင်က ကြားခဲ့ဖူးပေမယ့် နောက်ဆုံးတော့ မျက်ဝါးထင်ထင် တွေ့လိုက်ရပြီ... ရွှတ်... နျန်နျန်ရေ... မတွေ့ရတာကြာပြီနော်... သူ့ရဲ့ မိန်းမောစရာ မျက်နှာလေးနဲ့သာဆို ဘာရှင်းပြစရာမှ မလိုအပ်တော့ဘူး... သူက တကယ်ချောလိုက်တာနော်... ရွှတ်..ရွှတ်]

ယွီနျန်က ထိုင်ခုံတွင် ဝင်ထိုင်လိုက်ပြီး မျက်နှာပြင်ထက် တရိပ်ရိပ် တက်လာနေသော ကွန်မန့်များကို ကြည့်နေခဲ့သည်။ သူပြန်ဖြေလိုက်သည်။

"ဟုတ်ပါတယ်... ကျွန်တော်အခု ကျွန်တော့်အိမ်ရဲ့ စတူဒီယိုကနေ လွှင့်နေတာပါ... ဘာလို့ နောက်ခံမြင်ကွင်းက အရင်ကနဲ့ မတူရတာလဲဆိုတော့... ကျွန်တော် အိမ်အသစ်ကို ပြောင်းခဲ့တာကြောင့်ပါ... ဒါပေမယ့် မဟုတ်ပါဘူး... စီနျင်းအိမ်တော်ကို ပြောင်းတာ မဟုတ်ပါဘူး"

သူက screenထက်မှ ကွန်မန့်များကို သေသေချာချာ ဖတ်နေပြီး အပြုံးတစ်ခုဖြင့် ပြန်ဖြေလိုက်သည်။

"ဘာလို့ စီနျင်းအိမ်တော်ကို မပြောင်းတာလဲ ဆိုတာကလား... အကြောင်းအရင်းက ရိုးရှင်းပါတယ်... သွားရလာရတာ အဆင်မပြေလို့ပါ... အရမ်းဝေးလွန်းတယ်လေ... ကျွန်တော်သာ အဲ့ဒီမှာ သွားနေလိုက်ရင် မနက်တိုင်း နှစ်နာရီလောက် စောစောထနေရတော့မှာပဲ"

ကြည့်ရှုသူများက ရယ်မောလိုက်ကြသည်။

ယွီနျန်က ပြုံးရယ်လျက် ဆက်ပြောသည်။

"အိုး... ကျွန်တော့် မန်နေဂျာက ဒီတိုက်ရိုက်ထုတ်လွှင့်မှုအတွင်း သေချာရှင်းပြဖို့ အကြိမ်များစွာ သတိပေးထားတယ်... ကျွန်တော်က ကုမ္ပဏီကနေ အေးခဲခံလိုက်ရတာလည်း မဟုတ်သလို အဘန်းခံလိုက်ရတာလည်း မဟုတ်ပါဘူး... အယ်လ်ဘမ်အသစ်အတွက် ပြင်ဆင်နေရလို့ လတ်တလောမှာ ဖိတ်ခေါ်စာနည်းနည်းလောက်ပဲ လက်ခံဖြစ်နေတယ်... အကြိုထုတ်လုပ်မှုက ပြီးသလောက် ရှိသွားပါပြီ... နှစ်ရက်အတွင်း သီချင်းတွေကို စပြီး အသံသွင်းတော့မှာပါ"

သူက ပေါ့ပေါ့ပါးပါး လည်ချောင်းရှင်းလိုက်ရင်း ကင်မရာထောင့်ကို ပြန်ညှိလိုက်ပြီး လက်ချောင်းသွယ်သွယ်လေးများကို လက်ဆစ်ချိုးလိုက်သည်။ "တိုက်ရိုက်ထုတ်လွှင့်မှုမှာ ကြည့်ရှုသူတွေ အရမ်းများနေတယ်ဆိုတော့ ဒီအခြေအနေကို အခွင့်ကောင်းယူပြီး အယ်လ်ဘမ်အသစ်ကို ပရိုမိုးရှင်း ဆင်းဦးမယ်နော်"

ယွီနျန်က လက်ချောင်းလေးများကို အဖြူနှင့် အနက်ရောင် စန္ဒယားခလုတ်များပေါ်တွင် တင်ကာ ပထမဆုံး ဂီတသင်္ကေတပေါ်တွင် နှိပ်လိုက်ပြီးနောက် မျက်တောင်များချ၍ စတင်သီဆိုလေတော့သည်။

"နာရီလက်တံတွေကို နောက်ပြန်လည်သွားဖို့ မျှော်လင့်နေမိတယ်... မင်းမရှိတဲ့ အနာဂါတ်ကနေ လွတ်မြောက်လာပြီးရင်... ငါ့အတွက် အထီးကျန်မှုတွေ လုံလောက်နေပါပြီ... မင်းရဲ့ ကြင်နာမှုတွေကို ဆုံးရှုံးပြီးသွားတော့ ငါ့ကမ္ဘာကြီးမှာ နေ့အလင်းရောင်မရှိတော့..."

[သောက်ကျိုးနဲ... သူက ဦးထုပ်တစ်လုံး ပြုတ်ကျသလို စဆိုတော့တာပဲ... နျန်နျန်ရေ... စမဆိုခင် ဒုတိယအကြိမ် သတိပေးပါဦးလား... မင်းရဲ့ acapellaက တကယ် အံ့သြဖို့ကောင်းတာပဲ... အသံလေးကလည်း ကောင်းကင်ဘုံရဲ့ ကောင်းချီးလေးလို ချိုမြနေရော]

[ငါ ဖုန်းထဲမှာ တစ်ပုဒ်လုံး မှတ်တမ်းယူပြီးသွားပြီ... မကြာခင် အရင်းအမြစ် ဝက်ဆိုဘ်မှာ တင်ပေးပါ့မယ်... ဒါပေမယ့် သောက်ကျိုးနဲ... ဒါက အယ်လ်ဘမ်အသစ်ထဲက သီချင်းလား... သောက်ရမ်းမိုက်ချက်... ငါ့နားထဲ စွဲနေပြီ]

[နျန်နျန့်ကို ပါရမီတွေ ဆုံးရှုံးသွားတာ သူ့ပုံရိပ်ကို ဖျက်ဆီးမိတာလို့ ပြောနေတဲ့သူတွေကို အရမ်း စိတ်ပျက်နေမိပြီ... ပါးစပ်ပိတ်ပြီး နားထောင်လိုက်ကြစမ်းပါ... နျန်နျန့်ရဲ့ ပုံရိပ်က ကျောက်တုံးလို ခိုင်မာနေပြီးသား... ဂုဏ်ယူစရာပဲနော်]

ယွီနျန်က စာသားအချို့ သီဆိုပြီးနောက် ရပ်ကာ ကင်မရာထံ ပြုံးပြလိုက်သည်။

"ဒီသီချင်းကို "ပြောင်းပြန်နာရီ"လို့ ခေါ်ပြီး နောက်ပြန်သွားနေတဲ့နာရီလို့ အဓိပ္ပါယ်ရပါတယ်... ကျွန်တော် ဒီသီချင်းကို ရေးတုန်းက လူတွေ ဘယ်လောက်တောင်က အချိန်ကို နောက်ပြန်သွားပြီး အတိတ်က နောင်တရစရာ ကိစ္စတွေ ပြန်ပြင်ဆင်ချင်နေကြတယ် ဆိုတာကို တွေးမိလို့ ဒီသီချင်းကို ရေးခဲ့တာပါ"

ထိုအခိုက် မျက်နှာပြင်အလယ်တည့်တည့်၌ အရောင်အသွေးစုံလင်ပြီး မျက်စိဖမ်းစားဖွယ်ရာ ကွန်မန့်တစ်ခု တွေ့လိုက်ရသည်။ ယွီနျန် ကျယ်ကျယ် ဖတ်ပြလိုက်သည်။

"တစ်ယောက်ယောက်က မေးနေတယ် .. နျန်နျန်က ဥက္ကဌရွှယ်ကို သိလားတဲ့"

ယွီနျန် ထိုကွန်မန့်ကို ဖတ်ပြလိုက်သောအခါ ကြည့်ရှုနေကြသူများသာမက အသည်းအသန် ကွန်မန့်ရေးနေကြသူများပါ နှစ်စက္ကန့်လောက် ရပ်သွားကြလေသည်။ ယွီနျန်က သတိမထားမိချင်ယောင်ဆောင်ကာ သဘာဝကျကျ ပြန်ဖြေလိုက်သည်။

"ဟုတ်... ကျွန်တော် ရွှယ်ယုံကို သိပါတယ်... သူလည်း ကျွန်တော့်ကို သိပါတယ်"

ယွီနျန် ပြောပြီးနောက် နောက်ထပ် အလားတူမေးခွန်းများကို ဆက်မဖြေတော့ဘဲ အခြားသော အကြောင်းအရာများထံ စကားလမ်းကြောင်း ပြောင်းလိုက်သည်။

တိုက်ရိုက်ထုတ်လွှင့်မှု မရပ်သွားသေးသည့်တိုင် "ယုံယွီမလေးက နှစ်သစ်ကို ကျင်းပနေတယ်" ဟူသည့် ခေါင်းစဥ်ဖြင့် ဖိုရမ်ပိုစ့်တစ်ခု ပေါ်ထွက်လာခဲ့သည်။

[ယုံယွီမလေး မီးရှူးမီးပန်း ဝယ်လိုက်တော့မယ်... ဥက္ကဌရွှယ် ဝယ်ထုတ်သွားတဲ့ ကိစ္စပေါ်သွားပြီးတော့... အားးးးး... နျန်နျန်ကလည်း တစ်ယောက်နဲ့ တစ်ယောက် သိနေကြတဲ့အကြောင်း ဝန်ခံလိုက်တယ်... တိုက်ရိုက်ထုတ်လွှင့်မှု ကြည့်ရတာ နျန်နျန်က ချိုမြနေလိုက်တာ... သူပြုံးလိုက်တိုင်း နှလုံးသားလေး အရည်ပျော်သွားပြီ]

[ယုံယွီမလေး မီးရှူးမီးပန်း ဝယ်လိုက်တော့မယ်... သူတို့က တစ်ယောက်နဲ့တစ်ယောက် သိကြပေမယ့် ဘယ်လိုမျိုး ကောင်းကောင်း သိကြတာတဲ့လဲ... နျန်နျန်က သေချာမပြောပြသွားဘူးနော်... သူတို့က စီးပွားရေးပါတနာတွေလား... အသိတွေလား... တကယ့်ဘဝက သူငယ်ချင်းတွေလား... ငါ့စိတ်ကူးတွေ အရိုင်းဆန်နေပြီ... ညီအစ်မတို့ရေ... ခဏစောင့် ငါ fanfictionတွေ ရေးနေပြီ]

[ယုံယွီမလေး မီးရှူးမီးပန်း ဝယ်လိုက်တော့မယ်... ငါအသက်ရှင်ရတာ လုံလောက်နေပြီ... နျန်နျန်ရဲ့ ပါးစပ်ကနေ ရွှယ်ယုံရဲ့ နာမည်ကို ကြားလိုက်ရတယ်... တောဝက်ထီးလို အော်မြည်နေမိပြီနော်]

မကြာခင် #ယွီနျန်အယ်လ်ဘမ်အသစ်# နှင့် #ယွီနျန်နဲ့ရွှယ်ယုံကအချင်းချင်းသိနေကြတယ်#ဟူသော အကြောင်းအရာနှစ်ခုက ရေပန်းစားအကြောင်းအရာများ၏ ထိပ်ဆုံး ငါးနေရာကို ရောက်ရှိသွားလေသည်။ ထိုအခိုက် ယွီနျန်တစ်ယောက် ဟယ်ရှောင်းထံမှ ဗီဒီယိုကော ခေါ်ဆိုမှု လက်ခံရရှိခဲ့သည်။

ယွီနျန် အချိန်စစ်ကြည့်ကာ ပြောလိုက်သည်။ "ဒီအချိန်က ဒေါက်တာနဲ့ ပုံမှန်စစ်ဆေးမှု လုပ်ရမဲ့အချိန်မဟုတ်ဘူးလား"

ဟယ်ရှောင်းက ပို၍ အားအင်တက်ကြွနေပုံပေါ်ပြီး ဖြည်းဖြည်းချင်း ပြောလိုက်သည်။

"မင်းက ငါ့ထက် ပိုပြီး အချိန်ကို မှတ်မိနေတော့တာပဲ... မစိုးရိမ်ပါနဲ့... ဒေါက်တာ အခုလေးတင် ထွက်သွားတာ"

ယွီနျန် နေရခက်စွာ ပြုံးကာ ခေါင်းငြိမ့်ပြလိုက်သည်။ "ကျွန်တော် အခုလေးတင် အချိန်ကြည့်ပြီးတော့ အိမ်တော်ထိန်းကို အခြေအနေ မေးဖို့ တွေးနေတာ... ပြီးတာနဲ့ ဗီဒီယိုကော ရောက်လာတော့တာပဲ... ဒါက စိတ်ချင်းဆက်နေတာ ဖြစ်မလား"

ဟယ်ရှောင်း ပြုံးလိုက်သောအခါ မျက်လုံးအောက်မှ အရေးအကြောင်းများပင် နူးညံ့သွားပြီး သိမ်မွေ့သော အမူအယာ ပြလာသည်။

"ဒါပေါ့... ဒါပေါ... စိတ်ချင်းဆက်နေတာလို့ပဲ ခေါ်လိုက်ကြရအောင်" သူပြောနေရင်း ပိုပြီး စကားပြာမြန်လာသဖြင့် ခဏရပ်ပြီး အသက်ရှူလိုက်ရသည်။

"မင်းကို ပြောဖို့ သတင်းတစ်ခု ရှိတယ်"

ယွီနျန်က လက်ပေါ်တွင် မေးတင်ထားလိုက်ရင်း ကင်မရာကို ကြည့်လိုက်သည်။ "ဘာသတင်းများလဲ"

"မင်း 'ကော်ရှု'ရဲ့ ဝါးစာလိပ်ကို ဝယ်ချင်နေတယ်မလား" ဟယ်ရှောင်း မေးလိုက်သည်။

ယွီနျန် အလွန် အံ့အားသင့်သွားလေသည်။

"ဟုတ်.. ကျွန်တော် အဲ့ဒီပစ္စည်းကို ဟုန်မြို့မှာ လေလံသွားဆွဲခဲ့သေးပေမယ့် ရောင်းတဲ့သူက လေလံပွဲကို ချက်ချင်း ပြန်ရုတ်သိမ်းလိုက်တယ်... သတင်းကြားမိလို့လား"

ဟယ်ရှောင်းက ဖြည်းဖြည်းချင်း ပြောလိုက်သည်။

"ရောင်းချသူက လေလံပွဲကို ယာယီ ရပ်နားလိုက်ပေမယ့် မင်းထင်ထားသလို မရိုးရှင်းဘူး... ရောင်းဝယ်မှုကို ပိတ်ဆို့နေတဲ့ အားကြီးတဲ့ တွန်းအားတွေ ရှိနေတယ်... ဒီဝါးစာလိပ်ကို မင်း ဒါမှမဟုတ်ရင် မင်းနဲ့ နိုင်ငံတူတဲ့ လူတွေဆီ မရောက်သွားအောင်ပေါ့"

ယွီနျန် နားလည်သွားသည်။ သူတို့နိုင်ငံ အပြင်ဘက်တွင် အဆုံးသတ်သွားသည့် ရတနာများမှာ အမျိုးမျိုးသော အဓိပ္ပါယ်များ ဖြစ်ပေါ်လာခြင်း သို့မဟုတ် ပွင့်ပွင့်လင်းလင်း မဖော်ပြနိုင်သည့် ကွယ်ဝှက်ထားသည့် လက်နက်များ ဖြစ်လာခြင်းများ တစ်ခါတစ်ရံ ဖြစ်လာတတ်သည်။ ထိုကဲ့သို့သော အခြေအနေများက ရှားပါးလှသော်လည်း မကြားဖူးသည်တော့ မဟုတ်ပေ။

“ဒါဆိုရင် လက်ရှိအခြေအနေက ဘယ်လိုလဲ" ယွီနျန် မေးလိုက်သည်။

ဟယ်ရှောင်းက ယွီနျန်၏ တည်ငြိမ်အေးဆေးသော အမူအယာကို လေးစားသွားရပြီးနောက် ပြန်ဖြေလိုက်လေသည်။

"ငါ ရောင်းတဲ့သူကို ဆက်သွယ်ဖို့အတွက် တစ်ယောက်ယောက်ကို ခိုင်းပြီးသွားပြီ"

ယွီနျန် တစ်ခဏမျှ တွေးမိသွားပြီးနောက် မေးလိုက်သည်။

"ရောင်းသူက ပစ္စည်းကို ငွေနဲ့ပဲ လဲလှယ်ချင်နေပြီး အငြင်းပွားစရာ ကိစ္စတွေမှာ ဝင်မပါချင်ဘူး... ဟုတ်တယ်မလား"

"မှန်တယ်... မင်းရဲ့ မိသားစု ချင်းရှန်းယွီ မိသားစုနာမည်နဲ့ဆိုရင် ဖိအားတွေအများကြီး သယ်လာလိမ့်မယ်... အလျင်စလို မလုပ်ကြရအောင်... ငါ့ဘက်ကနေ ကိုင်တွယ်ဖို့ ကြိုးစားလိုက်မယ်" ဟယ်ရှောင်း ရှင်းပြလိုက်သည်။

ယွီနျန်က ကန့်ကွက်စရာ မရှိသဖြင့် ပြန်ဖြေလိုက်သည်။ "ကောင်းပါပြီ"

ဟယ်ရှောင်းက တစ်ခဏမျှ မျက်လုံးများ မှိတ်ထားရင်း ငြီးငွေ့စရာ ကောင်းသည့်အလား ပုံပေါ်သွားပြီးနောက် မေးမြန်းလိုက်သည်။

"ငါတို့ရဲ့ နျန်နျန်မှာရော သဘောကျရတဲ့သူ ရှိနေပြီလား"

ယွီနျန်က သူ ထိုခေါင်းစဥ်ကို ပြောင်းကာ ပြောလာမည်ဟု မထင်ထားခဲ့သော်လည်း မည်သည့်အရာကိုမှ ဖုံးကွယ်ထားလိုစိတ်မရှိဘဲ ခေါင်းငြိမ့်ပြလိုက်သည်။ "ဟုတ်.... ကျွန်တော့်မှာ သဘောကျရတဲ့သူ ရှိနေပြီ... ကျွန်တော် သူနဲ့ အတူရှိရတာ ပျော်တယ်... သူက ကျွန်တော့်ကို တကယ် ကောင်းကောင်း ဆက်ဆံပေးတယ်"

ဟယ်ရှောင်းက ကျေနပ်စွာဖြင့် ခေါင်းငြိမ့်ပြလိုက်ပြီးနောက် ဆက်ပြီး မမေးတော့ပေ။ သူ ရိုးရိုးရှင်းရှင်းသာ ပြန်ဖြေလိုက်သည်။

"ကောင်းတယ်... ဒီလိုဆို နောက်ကျရင် နျန်နျန်လည်း အထီးမကျန်တော့ဘူးပေါ့"

“မစ္စတာဟယ်...”

ယွီနျန်မှာ ဟယ်ရှောင်းအား ထိုကဲ့သို့ မပြောရန် ပြောလိုပါသော်လည်း လည်ချောင်းထဲမှာပင် အသံဆို့နင့်သွားခဲ့သည်။ သူရော ဟယ်ရှောင်းပါ ထိုစကားများက အမှား မဟုတ်ကြောင်း သိနေကြပေသည်။

နှစ်စက္ကန့်မျှ တိတ်ဆိတ်သွားပြီးနောက် ယွီနျန် ခပ်ဖွဖွ ခေါင်းငြိမ့်ပြလိုက်သည်။ "ဟုတ်"

ဖုန်းချပြီးနောက် လူဝီဆန်က သူ့ဖုန်းကို လာသိမ်းပေးလာသည်။

"ဆရာ... ခုနက သခင်လေးရဲ့ မျက်လုံးတွေ ရဲသွားပါတယ်"

ဟယ်ရှောင်းက ခေါင်းအုံးထက်တွင် အားနည်းဖျော့တော့စွာ လဲလျောင်းလိုက်ပြီး မျက်လုံးထဲတွင်လည်း ခါးသီးမှုများ ပြည့်နှက်သွားသည်။ ထိန်းသိမ်းထားသော ပုံရိပ်ကောင်းကိုလည်း လွှတ်ချလိုက်ပြီးနောက် အသံလည်း တိုးဖျလာကာ အနည်းငယ် တုန်ယင်သွားသည်။

"ငါလည်း ရင်တွေကွဲရတာပဲ... ဒါပေမယ့် မင်းမြင်တဲ့အတိုင်း ငါကသာ ငါအကြာကြီး မနေနိုင်ရတော့မှန်း သိနေတာတောင် သူ့ဘဝထဲကို ဖိအားပေး ဝင်လာခဲ့တာ... ဒါမရက်စက်ဘူးလား... ငါ သူ့ကို ငါ့ရဲ့နောက်ဆုံးအချိန်ကို အကူအညီမဲ့စောင့်နေရတာကို ကြည့်မနေစေချင်ဘူး... အနည်းဆုံး ဒီလို ဗီဒီယိုကောကနေတဆင့်ဆိုရင် သူနဲ့ စကားပြောဖို့ ခွန်အားတွေ ရှိနေသေးတယ်လေ..."

သူ့စကားများ မဆုံးခင်မှာပင် ဟယ်ရှောင်း၏ မျက်ခွံများ ပိတ်ကျသွားပြီး အသံကလည်း တိုးလျသွားကာ နှစ်နှစ်ခြိုက်ခြိုက် အိပ်ပျော်သည့် အခြေအနေသို့ ပြန်လည်ရောက်ရှိသွားလေသည်။

လူဝီဆန်က မျက်လုံးထောင့်မှ မျက်ရည်စများကို သုတ်ကာ အနားကပ်လာပြီးနောက် ဟယ်ရှောင်း၏ အားနည်းဖျော့တော့နေသော လက်များကို စောင်အောက်သို့ ထိုးထည့်ပေးလိုက်သည်။

တစ်ဖက်တွင်လည်း ယွီနျန်မှာ ဖုန်းကို ပြန်ချလိုက်ပြီးနောက် နေရာမှာပင် တစ်ခဏမျှ ရပ်နေပြီးမှ အာရုံပြန်ဝင်လာသည်။ အမှတ်တမဲ့ဖြင့် ရွှယ်ယုံရှိရာ စာကြည့်ခန်းထဲသို့ ရောက်လာခဲ့ပြီးသွားပြီး သူ့ရင်ခွင်ထဲသို့ တိတ်တဆိတ် တိုးဝင်မိသွားသည်။

ရွှယ်ယုံက သူ့ကို များများစားစား မမေးဘဲ ယွီနျန်၏ နောက်ကျောလေးကိုသာ ခပ်ဖွဖွ ပုတ်ပေးနေခဲ့သည်။

တစ်ခဏအကြာ ယွီနျန်၏ အသံများ အက်ကွဲလာလေသည်။ "ရွှယ်ယုံ"

"အင်း"

ပလုံးပထွေး ဖြစ်နေသော အသံဖြင့် သူပြောလိုက်သည်။ "ခင်ဗျား ကျွန်တော့်ကို ထားသွားမှာလား"

ရွှယ်ယုံက ယွီနျန်ကို တင်းတင်းကျပ်ကျပ် ဖက်ပေးထားလိုက်ပြီး စိတ်ဆုံးဖြတ်ထားမှုအပြည့်ဖြင့် ပြောလိုက်သည်။

"ထားမသွားဘူး... ကိုယ်က မင်းကို အချိန်တွေ အရမ်းအရမ်းကြာသွားတဲ့အထိ အမြဲတမ်း အတူရှိနေပေးမှာ"

"အရမ်း အရမ်း ကြာသွားတဲ့အချိန်" ဟူသည့် အဓိပ္ပါယ်မှာ ယွီနျန်၏ ဘဝထက်ပင် ပိုကြာသည့် တစ်နေ့ဖြစ်ကြောင်းကိုတော့ မပြောလိုက်တော့ပေ။

Prev Next